ಉಡುಪಿ: ಹಾಂಗಾಚೆ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಚೆ ಗಣೇಶ ವಿಗ್ರಹ ವಿಸರ್ಜನಾ ಶೋಭಾಯಾತ್ರಾ ಶನಿವಾರ (ಸೆ.23) ಸಾಂಜವೇಳಾ ಚಲೆ. ದೇವಳಾಂತು° ಪೂಜಿಲೆಲೆ 12 ಗಣೇಶ ಮೂರ್ತಿಚೆ ಸಾಂಗತ ದೇವಳಾಚೆ ಮಹಾಗಣಪತಿಕ ರುಪ್ಯಾ ಪಾಲ್ಲಕಿ ಉತ್ಸವಾರಿ ಮಂಗಳ ವಾದ್ಯ, ವಾಘಾ ವೇಸ ಸಹಿತ ಮೆರವಣಿಗಾ ಚಲಿ. ದೇವಳಾ ದಾಕೂನ ಭಾಯರ ಸರಲೆಲಿ ಮೆರವಣಿಗಾ ಐಡಿಯಲ್ ಸರ್ಕಲ್ - ಪೊರನೆ ಪೋಸ್ಟ್ ಆಫೀಸ್ ರಸ್ತೊ - ಡಯಾನಾ ಸರ್ಕಲ್ - ಕವಿ ಮುದ್ದಣ್ಣ ಮಾರ್ಗ - ತ್ರಿವೇಣಿ ವೃತ್ತ - ಪೋಸ್ಟ್ ಆಫೀಸ್ ರಸ್ತೊ - ಸಂಸ್ಕೃತ ಕಾಲೇಜು ಸರ್ಕಲ್ - ಮಾರುತಿ ವಿಥಿಕ ರಸ್ತೊ - ಚಿತ್ತರಂಜನ್ ಸರ್ಕಲ್ - ಮೈಸೂರ್ ಸ್ಟೀಲ್ ರಸ್ತೊ - ತೆಂಕುಪೇಟೆ ಜಾವನು ಪರತೂನ ದೇವಳಕಾ ಪಾವಲಿ. ಉಪತಾಂತ ದೇವಳಾಚೆ ಪದ್ಮ ಸರೋವರಾಂತು° ಶ್ರೀ ಗಣೇಶ ವಿಗ್ರಹಾಚೆ ವಿಸರ್ಜನಾ ಚಲೆ. ಅರ್ಚಕ ವಿನಾಯಕ ಭಟ್ , ದಯಾಘನ್ ಭಟ್, ಗಿರೀಶ ಭಟ್ ಹಾಂನಿ° ಧಾರ್ಮಿಕ ಪೂಜಾ ವಿಧಿ ವಿಧಾನ ಸಂಪನ್ನ ಕೆಲೆ°. ದೇವಳದ ಆಡಳಿತ ಮಂಡಳಿಚೆ ಸಾಂದೆ, ಜಿ ಎಸ್ ಬಿ ಯುವಕ ಮಂಡಳಿ ಆನಿ ಮಹಿಳಾ ಮಂಡಳಿಚೆ ಸಾಂದೆ ಆನಿ ಸಮಾಜ ಬಾಂದವ ಉಪಸ್ಥಿತ ಆಶಿಲೆ.

ತ್ಯಾಚ ದೀವಸ ಸಾಂಜವೇಳಾ ಕಲ್ಯಾಣಪುರ ಶ್ರೀ ವೆಂಕಟರಮಣ ದೇವಳಾಚೆ ಶ್ರೀ ಗಣೇಶ ವಿಸರ್ಜನಾ ಮೆರವಣಿಗಾ ಚಲಿ. ಗಾಂವಚೆ ಪ್ರಮುಖ ಬೀದಿಂತು° ಮೆರವಣಿಗಾ ಚಲನು ಸ್ವರ್ಣ ನ್ಹಂಯತು° ವಿಸರ್ಜಾನ ಚಲೆ. ದೇವಳಾಚೊ ಆಡಳಿತ ಮೋಕ್ತೆಸರ ಅನಂತ ಪದ್ಮನಾಭ ಕಿಣಿ ಹಾಂಗೆಲೆ ಮಾರ್ಗದರ್ಶನಾರಿ ದೇವಳಾಚೆ ಪ್ರಧಾನ ಅರ್ಚಕ ಜಯದೇವ ಭಟ್, ಗಣಪತಿ ಭಟ್ ಹಾಂನಿ° ಧಾರ್ಮಿಕ ಪೂಜಾ ವಿಧಾನ ಸಂಪನ್ನ ಕೆಲೆ°. ಜಿ ಎಸ್ ಬಿ ಸಭಾ ಸದಸ್ಯ ಆನಿ ಭಕ್ತವೃಂದ ಉಪಸ್ಥಿತ ಆಶಿಲೆ.