ಹೈದರಾಬಾದ: ಆಂಧ್ರಪ್ರದೇಶ ಹೋಟೆಲ್ ಎಸೋಸಿಯೆಶನ್ ಹಾಜೊ ಪ್ರಧಾನ ಕಾರ್ಯದರ್ಶಿ ಜಾವನು ಉಡುಪಿ ಜಿಲ್ಲೆಚೆ ದೊಡ್ಡರಂಗಡಿ ಗಾಂವಚೊ ಐ. ರಘುವೀರ ಶೆಣೈ ಹಾಂಗೆಲೆ° ನೆಮಣೂಕ ಜಾಲಾ°. ಅಕ್ಟೋಬರ್ 4 ತಾರೀಕೆಕ ಚಲೆಲೆ ಮಹಾಸಭೆಂತು° ಹಾಂಗೆಲೆ° ನೆಮಣೂಕ ಜಾಲೆ°. ಆಂಧ್ರಪ್ರದೇಶಾಚೆ ನಂದ್ಯಾಲ ಗಾಂವಾoತು° ಶ್ರೀನಿಧಿ ಹೋಟೆಲ್ ಚಲಾಯತಾ ಆಸಚೆ ಹಾಂಕಾ° ರಾಯಲಸೀಮಾ ವಿಭಾಗಾಚಿ ಜಬಾಬ್ದಾರಿ ಮೆಳೆಲಿ ಆಸಾ. ಮೂಲತ: ದೊಡ್ಡೆರಂಗಡಿಚೆ ಜಾವನು ಆಸಚೆ ಹಾಂನಿ° ಸಮಾಜ ಸೇವೆಂತೂಯಿ ಮುಕಾರ ಆಸಾತಿ.

ಐ. ರಘುವೀರ ಶೆಣೈ: ಹಾಂಗೆಲೊ ಜಲ್ಮು ಉಡುಪಾಂತು° ಜಾಲೆ°. ಐ. ಕೃಷ್ಣ ಶೆಣೈ ಆನಿ ರಾಧಾ ಶೆಣೈ ಹಾಂಗೆಲೊ ಪೂತು ಜಾವನು ಜಲ್ಮಾಕ ಆಯಿಲೆ ಹಾಂಕಾ° ಚಾರ ಭಾವ ಆನಿ ಎಕಲಿ ಬ್ಹಯಣಿ ಆಸಾತಿ. ಹಾಂಗೆಲೆ ಮೂಳಾವೆ ಶಿಕ್ಷಣ ದೊಡ್ಡೆರಂಗಡಿಚೆ ಕುಕ್ರಾಜೆ ಸರಕಾರಿ ಶಾಳೆಂತು° ಜಾಲೆ°. ಹಿರಿಯಡ್ಕ ಸರಕಾರಿ ಕಾಲೇಜಾ ದಾಕೂನ ಪಿ.ಯು.ಸಿ ಶಿಕ್ಷಣ ಫಾವೊ ಕೆಲೆಲೆ ಹಾಂನಿ° ಪದವಿ ಶಿಕ್ಷಣ ನಂದ್ಯಾಳಾoತು° ಪ್ರಾಪ್ತ ಕೆಲೆ°.
ಕರ್ನೂಲ್ ಜಿಲ್ಲಾ ಹೋಟೇಲ್ ಎಸೋಸಿಯೇಶನಾಚೆ ಅಧ್ಯಕ್ಷ ಜಾವನು ಆಸಚೆ ಹಾಂನಿ° ನಂದ್ಯಾಳಾoತು° ಶ್ರೀ ನಿಧಿ ರೆಸ್ಟೋರೆಂಟ್ ಚಲಾಯಶಿತಾ ಆಸಾತಿ. ತ್ಯಾ ನಂತಾ° ನಂದ್ಯಾಳಾoತು° ಶ್ರೀ ನಿಧಿ ಟಿಫಿನ್ ಸೆಂಟರ್ ಆನಿ ಹೋಟೇಲ್ ಅಕ್ಷಯ್, ಆಟ್ಮಕುರುಂತು° ಹೋಟೇಲ್ ಗೀತಾ ಭವನ ಹಾಂನಿ° ಚಲಾಯಸಿತಾ ಆಸಾತಿ.
ಜಿನಿಯಸ್ ರೂರಲ್ ಎಜುಕೇಶನ್ ಎಂಡ್ ಎಂಪವರಮೆoಟ್ ಸೊಸೈಟಿ ಹಾಜೆ ಗೌರವಾಧ್ಯಕ್ಷ, ಮಹಾ ನಂದೀಶ್ವರ ಆಧ್ಯಾತ್ಮ ಎಂಡ್ ಸಾಂಸ್ಕೃತೀಕ ಸೇವಾ ಕೇಂದ್ರ ಹಾಜೆ ಅಧ್ಯಕ್ಷ, ಜಿ.ಎಸ್.ಬಿ ಸಮಾಜ ಆಂಧ್ರಪ್ರದೇಶ ಹಾಜೆ ಸಂಚಾಲಕ, ಕರುನಾಡ ಭಂದು ಸೇವಾ ಸಮಿತಿ ಹಾಜೆ ಅಧ್ಯಕ್ಷ ಆನಿ ಡಿಸ್ಟ್ರಿಕ್ಟ್ಡ ಟೂರಿಸಮ್ ಕೌನ್ಸಿಲ್ ಹಾಜೆ ಸದಸ್ಯ ಜಾವನು ಹಾಂನಿ° ಸೇವಾ ದಿತಾ ಆಸಾತಿ. ಹಾಂಕಾ ಬಾಯಲ ಗೀತಾ ಶೆಣೈ ಆನೀ ಚೆರಡುವಂ ಹೃಷಿಕೇಶ ಆನೀ ಅನಿರುದ್ಧ ಹಾಂಗೆಲೋ ಸಂಪೂರ್ಣ ಸಹಕಾರ ಮೆಳೆಲೊ ಆಸಾ.

Click Support Us to support Kodial Khaber