ಕುಂದಾಪುರ: ಆರತಾ° ಹಾಂಗಾಚೆ ಶ್ರೀ ವೆಂಕಟರಮಣ ದೇವಸ್ಥಾನಾಂತು ದ್ಹಾ ದೀವಸಾಚೆ “ಆವಾಸಿಕ ಸಂಧ್ಯಾವoದನ ಆನಿ ಧಾರ್ಮಿಕ ಶಿಬಿರ" ಚಲೆ°. ಕೊಡಿಯಾಲಾಚೆ ಶ್ರೀ ಶ್ರೀನಿವಾಸ ನಿಗಮಾಗಮ ಪಾಠಶಾಲಾ ಆನಿ ಕುಂದಾಪುರ ಪೇಟೆ ಶ್ರೀ ವೆಂಕಟರಮಣ ದೇವಸ್ಥಾನಾಚೆ ತರಪೇನ ಹ್ಯಾ ಶಿಬಿರಾಚೆ ಆಯೋಜನ ಜಾಲೆಲೆ°. ಶಿಬಿರಾಚೆ ಘಟನ ಜಾವಚೆ ಎಕ ಮ್ಹಯನೆ ಪಯಲೆ° ಮ್ಹಾಲ್ಗಡೆ ಜಾವನು ಆಶಿಲೆ ಸಿ. ಎಲ್. ಶೆಣೈ, ಪ್ರೇಮಾನಂದ ಕಿಣಿ, ಮನೋಹರ್ ಕಾಮತ್ ಆನಿ ಸಂದೇಶ್ ಕಾಮತ ಹಾಂನಿ° ಶಿಬಿರಾಚೆ ಸ್ಥಳಾಕ ಭೇಟಿ ದಿಲೆಲಿ. ವೆಂಕಟರಮಣ ವಿದ್ಯಾಲಯ ಸಂಕೀರ್ಣ ಆಜಿ 3,500 ಚೆರಡುವ° ಆಸೂನ ಭವ್ಯ ಜಾವನು ವಾಡಲಾ°.

ಹ್ಯಾ ವರಸಾಚೆ ಶಿಬಿರಾಂತು ದಕ್ಷಿಣ ಕನ್ನಡ, ಉಡುಪಿ, ಉತ್ತರ ಕನ್ನಡ,  ಮಡಿಕೇರಿ, ಬೆಂಗಳೂರು ದಾಕೂನ ಆಯಿಲೆ ಸಾಬಾರ ಚಾಳಿಸ (40) ವಟುನಿ ವಾಂಟೊ ಘೆತಿಲೊ. ಶಿಬಿರಾರ್ಥಿಂಕ ದೋನಿ ವೇಳೆಚೆ ಸಂಧ್ಯಾವoದನ, ನಮನ_ವ್ಯಾಸೋಪಾಸನ, ವಿಷ್ಣು ಸಹಸ್ರನಾಮ, ವೇದ ಪರಿಚಯ, ಸುಲಭ ಸಂಸ್ಕೃತ, ಪುರಾಣಾಚಿ ಕಾಣಿ, ಖೇಳು ಸಹಿತ ಹೇರ ವಿಷಯ ಶಿಕೂಂಕ ಮೆಳೆ°.  ತ್ಯಾ ನಂತಾ° ಚೆರಡುವಾಂಕ ದೇವಳಾಂತು ತ್ರಿಕಾಲ ಪೂಜಾ, ವಸಂತ ಪೂಜಾಂತು ಭಾಗಿ ಜಾವಚಾಕ ಮೆಳೆ°. ದೇವಸ್ಥಾನಾಚೆ ಆಡಳಿತ ಮೊಕ್ತೇಸರ ರಾಧಾಕೃಷ್ಣ ಶೆಣೈ ಆನಿ ಪಂಗಡಾನ ತಾಗೆಲೆ ಟೀಮ್ ಹಾಂನಿ° ಖಾಣ, ಜೇವಣ ಆನಿ ಹೇರ ವ್ಯವಸ್ಥಾ ಸಾಂಬಾಳನು ಹಾಡಲಿ.

ವೇ.ಮೂ. ನರಹರಿ ಆಚಾರ್ಯ, ಸಂದೇಶ್ ಕಾಮತ್, ಗುರುದತ್ ಪೈ ಗುರುಪುರ, ಸುಮಂತ್ ಶೆಣೈ ಸಂಪನ್ಮೂಲ ವ್ಯಕ್ತಿ ಆಶಿಲೆ.  ವೇ. ಮೂ. ಸುಧಾಕರ ಭಟ್, ಗಣೇಶ್ ಭಟ್ ಮಂಜೇಶ್ವರ, ಚೇತನಾ ಅರವಿಂದ ಭಟ್, ವಾಸುದೇವ ಭಟ್, ಕಟಪಾಡಿ ಜನಾರ್ಧನ ಭಟ್ ಹಾನಿ° ಅಭ್ಯಾಗತ ಉಪನ್ಯಾಸಕಾರ ಆಶಿಲೆ. 

ಶಿಬಿರಾಚೆ ಯಶಾ ಮಾಕ್ಷಿ ಖೂಬ ಲೋಕಾನ ಸಹಕಾರ ದಿಲೆಲೊ ಆಸಾ. ಸ್ವಾದಿಷ್ಟ ಆಹಾರ ಪೂರವಣ ಕೆಲೆಲೆ ನರೇಂದ್ರ ಪೈ, ಶಿಬಿರಾರ್ಥಿಂಕ ವಿಶ್ರಾಂತಿಕ ಹಾಂತುಳ, ಉಶೆಂ, ವಲಿ ದಿಲೆಲೆ ಪ್ರಶಾಂತ್ ರಾವ್, ದೇವಾಳಾಚೆ ಅರ್ಚಕ ವೇ. ಮೂ. ತಾರಾನಾಥ ಭಟ್ ಆನಿ ಕುಟುಂಬ, ಶೈಲಾ ಜಿ. ಭಟ್ ಹಾಂಗೆಲೊ ಆಬಾರ ಮಾನಪ ಜಾಲೆ°. ಹ್ಯಾಚ ವೇಳಾರ ಶಿಬಿರಾರ್ಥಿಯಾಂಕ ಕೋಟೆ ಆಂಜನೇಯ ದೇವಸ್ಥಾನಾಂಕ, ಬಸ್ರೂರು ಉಭಯ ಸ್ವಾಮೆಂಗೆಲೆ ವೃಂದಾವನಾoಕ, ಫಲೋದ್ಯಾನಾಂಕ ಭೇಟಿ ದಿವಚೊ ಅವಕಾಶ ಮೆಳೊ. ಪರಮಪೂಜ್ಯ ಸಂಯಮೀoದ್ರ ತೀರ್ಥ ಸ್ವಾಮೇಲೆ ಮಾರ್ಗದರ್ಶನಾರಿ ಚಲೆಲೆ ಹ್ಯಾ ಶಿಬಿರ ಯಶಸ್ವಿ ಜಾವನು ಚಲೆಲೆ ಆಸಾ.

- ಮುನಿಯಾಲು ದೇವದಾಸ ಕಿಣಿ
ಮೆಗೆಲೆ ವಿದ್ಯಾರ್ಥಿ ಜೀವನಾಂತು ಏಕ ದಿಕ್ಸೂಚಿ ಜಾವನು ಆಶ್ರಯ ದಿಲೆಲೋ ಗಾಂವ° ಕುಂದಾಪುರ ಜಾವನು ಆಸಾ. ತ್ಯಾ ಚಂದನ ಮೂರ್ತಿಲೆ ಸಾನಿಧ್ಯಾಚೆ ಕುಂದಣಪುರಾoತು°, ಶಿಬಿರಾಂತು ಏಕ ಸಿಬ್ಬಂದಿ ಜಾವನು ಸೇವಾ ದಿವಚೆ ಭಾಗ್ಯ ಮಾಕಾ ಪ್ರಾಪ್ತ ಜಾಲೆ°.