ಮಂಗಳೂರು: “ಹಿಂದುಸ್ಥಾನಿ ಸಂಗೀತ ಯಾ ಖಂಚೆಯ ನಮೂನ್ಯಾಚಿ ಕಲಾ ಎಕ ಮನಶಾಕ ಮೆಳಚೆ ತಾಂಗೆಲೆ° ಭಾಗ್ಯ ಜಾವನು ಆಸಾ. ಸಗಟಾಂಕ ಮೇಳನಾ ತೆ°. ನಿರಂತರ ಅಭ್ಯಾಸ ಆನಿ ಕಠಿಣ ಪರಿಶ್ರಮಾನ ತಾಂಕಾ° ಯಶ ಮೇಳತಾ. ಆಮೀ ಯಶಸ್ವಿ ಜಾಲೆ ಮ್ಹಣು ಅಹಂಕಾರ ಭೊಗಚಾಕ ನಜ. ಶಿಖಚಾಕ ಅನಿಕಯೀ ಆಸಾ ಮ್ಹಳೆಲೆ ವಿನಮೃತಾ ಭಾವಾನ ಕಲಾರಾಧನಾ ಕೆಲ್ಯಾರಿ ಶ್ರೇಷ್ಠ ಕಲಾಕಾರ ಜಾವಚಾಕ ಸಾಧ್ಯ ಆಸಾ” ಮ್ಹಣು ಎಕ್ಸಪರ್ಟ ವಿದ್ಯಾ ಸಂಸ್ಥೆಚೆ ಅಧ್ಯಕ್ಷ ನರೇಂದ್ರ ಎಲ್. ನಾಯಕ ಹಾಂನಿ° ಸಾಂಗಲಾ°. ಗೌಡ ಸಾರಸ್ವತ ಬ್ರಾಹ್ಮಣ ಸೇವಾ ಸಂಘ ಹಾಂನಿ° ಆಯೋಜನ ಕೆಲೆಲೆ ‘ಯುವ ವಸಂತ ಸಂಗೀತೋತ್ಸವ’ ಉಗ್ತಾವಣ ಕರನು ತಾಂನಿ° ಅಶೆ° ಸಾಂಗಲೆ°. ಕೆನರಾ ಬ್ಯಾಂಕ ರಥಬೀದಿ ಶಾಖೆಚಿ ಪ್ರಭಂದಕಿ ಶಾಂಭವಿ ಪ್ರಭು ಮಾನಾಚಿ ಸಯ್ರಿಣಿ ಆಶಿಲಿ.

 ಮಾರ್ಚ 20ಕ ವಿ. ಟಿ. ರಸ್ತೆಚೆ ನಳಂದಾ ಶಾಳೆಚೆ ‘ಉಮಾ- ವಿಶ್ವ’ ಹವಾನಿಯಂತ್ರಿತ ಸಭಾಗೃಹಾಂತು° ಸಕಾಳಿ 10 ದಾಕೂನ ದೋನಪಾರಾ 2 ತಾಂಯ ಘಡಲೆಲೆ ಹ್ಯಾ ಸಂಗೀತೋತ್ಸವಾοತು° ಶುರುವೇಕ ಜಿ. ಎಸ್. ಬಿ ಸೇವಾ ಸಂಘಾಚೊ ಅಧ್ಯಕ್ಷ ಡಾ| ಕೆ. ಮೋಹನ ಪೈ ಹಾಂನಿ° ಹಿಂದುಸ್ಥಾನಿ ಗಾಯನ ಕರನು ಚಾಲನ ದಿಲೆ°. “ಹಿಂದುಸ್ಥಾನಿ ಸಂಗೀತಾοತೂಯಿ ಕೊಂಕಣಿ ಭಾಸ ವಾಪರೂಂಕ ಜಾತಾ ಮ್ಹಣು ದಾಕೊವಚೆಂ ಆಮಗೆಲೊ ಉದ್ಧೇಶ ಜಾವನು ಆಸಾ. ಆಜೀ ಆಮಿ ಆಪಯಿಲೆ ತರನಾಟೆ ಕಲಾಕಾರ ಬಡಾ ಖಯಾಲ, ಚೋಟಾ ಖಯಾಲ ಆನಿ ಎಕ ಪದ ಪ್ರಸ್ತುತ ಕರತಾತಿ. ತಾಂತೂಲೆ° ಖಂಚೆοಯ ಎಕ ಕೊಂಕಣಿ ಭಾಶೆನ ಆಸತಾ. ಆಯಚೊ ಹೊ ಕಾರ್ಯಕ್ರಮು ಶ್ರೇಷ್ಠ ಹಿಂದುಸ್ಥಾನಿ ಕಲಾಕಾರ° ಭಾರತ ರತ್ನ ಪಂಡಿತ್ ಭೀಮಸೇನ ಜ್ಯೋಷಿ, ಪಂಡಿತ್ ಅರ್ಕುಳ ಶ್ರೀನಿವಾಸ ಶೆಣೈ ಆನಿ ಪಂಡಿತ್ ಎಂ. ನಾರಾಯಣ ಪೈ ಹಾಂಗೆಲೆ ಉಡಗಸಾಕ ಅರ್ಪಣ ಕರತಾತಿ” ಮ್ಹಣು ತಾಂನಿ° ಸಾಂಗಲೆ°.
ಉಪರಾಂತ ಜಿ. ಎಸ್. ಬಿ ಸಮಾಜಾಚೆ ಉದಯೋನ್ಮುಖ ಕಲಾಕಾರ ಜಾವನು ಆಸಚೆ ದೀಪಿಕಾ ಕಾಮತ, ದಯಾಕರ ಭಟ್, ಮೇಘಾ ಪೈ, ನಾಗಕಿರಣ್ ನಾಯಕ ಹಾಂನಿ° ತೀಸ್ ತೀಸ್ ಮೀನಿಟ° ತಾಂಗೆಲಿ ಪ್ರತಿಭಾ ಪ್ರದರ್ಶನ ಕೆಲೆ°. ಹಾಂಕಾ° ತಬಲಾರಿ ತರನಾಟೊ ಶ್ರೀದತ್ ಪ್ರಭು ಆನಿ ಹಾರ್ಮೋನಿಯಾಂರಿ ತರನಾಟೆ ಕಿಶನ್ ಪ್ರಭು ಆನಿ ಸಂಪ್ರೀತ್ ಶೆಣೈ ಹಾಂನಿ° ಸಾತ ದಿಲೆ. ಗಣಪತಿ ನಾಯಕ ಹಾಂನಿ° ತಾಳ ಸಾಥ ದಿಲೆ°.
ಆಖೇರಿಕ ಮ್ಹಾಲ್ಗಡಿ ಕಲಾಕಾರಾ ನಂದಿತಾ ಪೈ ಹಾಂನಿ° ಪ್ರಾತ್ಯಕ್ಷಿಕಾ ದಿವನು ಸಗಟ ಕಲಾಕಾರಾಲಿ ಉಮೇದಿ ವಾಡಯಲಿ.

ಸಂಘಾಚೊ ಖಜಾನದಾರ ಜಿ. ವಿಶ್ವನಾಥ ಭಟ್, ಸುರೇಂದ್ರ ಆಚಾರ್ಯ, ಎ. ರಮೇಶ ಪೈ, ಬಿ. ಆರ್. ಶೆಣೈ, ಎಚ್. ವಿ. ಕಾಮತ, ಉಷಾ ಮೋಹನ ಪೈ, ಪ್ರತಿಮಾ ಪ್ರಭು ಹಾಂನಿ° ಕಲಾಕಾರಾಂಕ ಫುಲ, ಯಾದಸ್ತಿಕಾ ಆನೀ ಗೌರವ ಧನ ದಿವನು ಯೆವ್ಕಾರ ದಿಲೊ.
ಸುಚಿತ್ರಾ ಶೆಣೈನ ಸೂತ್ರ ಸಂಚಾಲನ ಕೆಲೆ°. ಸಾಂಸ್ಕೃತೀಕ ವಿಭಾಗಾಚೊ ಮುಖ್ಯಸ್ಥ ಎಂ. ಆರ್. ಕಾಮತ ಆನಿ ರಾಧೇಶ ಶೆಣೈ ಹಾಂನಿ° ಕಲಾಕಾರಾಂಚೊ ವಳಕ ಕರನು ದಿಲೊ. ವೆಂಕಟೇಶ ಬಾಳಿಗಾನ ಆಭಾರ ಮಾನಲೊ. ಸಂಗೀತಾಸಕ್ತ ಲೋಕ ಚಡತೆ ಸಂಖ್ಯಾನ ಉಪಸ್ಥಿತ ಆಶಿಲೆ.

ಮೂಡುಬಿದಿರೆ: ಶಾಸ್ತ್ರೀಯ ಸಂಗೀತಾಚೆ ಬದಲ ಉಮೇದಿ ಯೆವಕಾ ಜಾಲ್ಯಾರ ಶುರುವೆಕ ಬಯಸೂನು ಆಯಕೂಕಾ.  ಶರಣಾಲೆ°, ದಾಸ, ಶರೀಫ ಸಾಹಿತ್ಯ ಆಯಕತಾ ಶಾಸ್ತ್ರೀಯ ಸಂಗೀತಾ ಲಾಗಿ ಪಾವಚಾಕ ಸಾಧ್ಯ ಆಸಾ. ಸ್ವರಭಾವ ಆಶಿಲೆ ಕಡೆನ ಪ್ರಭಾವ ಆಸತಾ. ಭಕ್ತಿ, ಭಾವ, ಶ್ರದ್ಧಾ ಆಸತಾನಾ ಸಂಗೀತಾಚೆ ಪ್ರಭಾವಾಚೆ ಸಾಂಗತ ಅಭ್ಯಾಸ, ಗುರುಕೃಪಾ ಆನಿ ಅದೃಷ್ಟ ಆಸಲ್ಯಾರ ಗಾಯಕ ಸಾಧಕ ಜಾವಚಾಕ ಸಾಧ್ಯ ಮ್ಹಣು ನಾವಾದೀಕ ಹಿಂದೂಸ್ತಾನಿ ಗಾಯಕ ಪಂಡಿತ್ ವೆಂಕಟೇಶ್ ಕುಮಾರ್ ಹಾಂನಿ° ಸಾಂಗಲೆ°. ಹಾಂಗಾಚೆ ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನಾಚೆ ತರಪೇನ ಕನ್ನಡ ಭವನಾಚೆ ಕೆ. ಅಮರನಾಥ ಶೆಟ್ಟಿ ಸಭಾಂಗಣಾಂತ ಘಡಲೆಲೆ ‘ಸಂಧ್ಯಾರಾಗ' ಕಾರ್ಯಕ್ರಮಾಂತು°  ಜಮೀಲೆ ಸಂಗೀತಾಸಕ್ತ ಲೋಕಾ ಮುಕಾರ ತಾಂನಿ°  ಅಶೆ° ಸಾಂಗಲೆ°.

ಸಂಗೀತಾಚೆ ವಿದ್ಯಾರ್ಥಿಯಾಂಕ ಯೋಗ್ಯ ಗುರು, ಅಭ್ಯಾಸಾಂತ ಶ್ರದ್ಧಾಚೆ ಸಾಂಗತ ಅದೃಷ್ಟ ಮುಖ್ಯ ಜಾತಾ ಮ್ಹಣು ತಾಂನಿ°  ಸಾಂಗಲೆ°.

ರಾಗ ವೈಭವ: ಮುಲ್ತಾನಿ ರಾಗಾನ ತಾಗೆಲೆ ಸಂಗೀತ ಕಾರ್ಯಕ್ರಮ ಶುರು ಕೆಲೆಲೆ ಪಂಡಿತ್ ಎಂ. ವೆಂಕಟೇಶ್ ಕುಮಾರ್ ಹಾಂನಿ ಉಪರಾಂತ ಶಂಕರ ರಾಗ ಗಾಯಲೊ. ಭಕ್ತಿ ಗೀತೆಂತು°  ಕಲಿಯುಗದೊಳು ಹರಿನಾಮವ ನೆನೆದರೆ, ವಾರ ಒಂದರಿಯೆ, ಹಾಡಿ ಕಮಲೇ ಕಮಲಾಲಯೇ, ಮಾತಾ ಭವಾನಿ, ಭಾಗ್ಯದಾ ಲಕ್ಷ್ಮೀ ಬಾರಮ್ಮಾ, ಅಕ್ಕ ಕೇಳವ್ವ ನಾನೊಂದ ಕನಸ ಕಂಡೆ ಗಾವನು ಒಂದು ಬಾರಿ ಸ್ಮರಣೆ ಸಾಲದೇ ಭಜನೆಚೆ  ಸಾಂಗತ ದೋನ ಗಂಟ್ಯಾಚಿ ಕಛೇರಿ ಸಂಪನ್ನ ಕೆಲಿ. ಹಾಕಾ ಹಾರ್ಮೊನಿಯಾಂರಿ ಪ್ರೊ. ನರೇಂದ್ರ ಎಲ್. ನಾಯಕ್ ಮಂಗಳೂರು, ತಬ್ಲಾರಿ ಕೇಶವ ಜೋಷಿ ಬಾಗಲಕೋಟೆ ಆನೀ ಅಭಿಜಿತ್ ಶೆಣೈ ಕಡಂದಲೆ, ತಾನ್ಪುರಾರಿ ಕುಂದಾಪುರ ಚಿಂತನ ಧನ್ಯ, ಚಿನ್ಮಯ ಧನ್ಯ , ಮಂಜಿರಾ ಆನೀ ಪಾರ್ಶ್ವ ತಾಳೊ ಜಾವನು ಉಡುಪಿಚೆ ನಾಗರಾಜ್ ಶೇಟ್ ಹಾಂನಿ° ಸಹಕಾರ ದಿಲೊ. ಆಳ್ವಾಸ್ ಶಿಕ್ಷಣ ಪ್ರತಿಷ್ಠಾನಾಚೊ ಅಧ್ಯಕ್ಷ ಡಾ. ಎಂ. ಮೋಹನ ಆಳ್ವ ಹಾಂನಿ° ಕಲಾವಿದಾಂಕ ಸಮ್ಮಾನ ಕೆಲೊ. ಜೈನ ಮಠಾಚೆ ಭಟ್ಟಾರಕ ಶ್ರೀ ಸಹಿತ ಗಣ್ಯ, ಕಾರ್ಯಕ್ರಮಾತು° ಉಪಸ್ಥಿತ ಆಶಿಲೆ. ರಾಂ ಪ್ರಸಾದ್ ಕಾಂಚೋಡು ಹಾಣೆ ಸೂತ್ರ ಸಂಚಾಲನ ಕೆಲೆ°.