ನವೆಂಬರ ಮ್ಹಯನೊ ಸರನು ದಶಂಬರ ಪಾವಚೆ ಸಂದರ್ಭಾರ ಲೋಕಾಂಕ ಕಂಠಾಳೊ ಯೆವಚೆ ತಶಿ° ಪಾವಸಾಚೆ ತ್ರಾಸ ಚಡ ಜಾಲ್ಯಾ. ಕೋಣಾಲೆ ತೊಂಡಾoತು° ಪಳಯಲೆಶಿ ಆತಾ° ಏಕ ಹಪ್ತೊ ದಾಕೂನ ಪಾವಸಾಚೆ ಜಪ ಚಲತ ಆಸಾ. ಸಕಡಾನಿ ಸಾಂಗಚೆ° ಕೆತೆಂಕಿ ಮ್ಹಳ್ಯಾರ “ಫುಡೆ ಅಶಿ° ನಾ ಆಶಿಲೆ°, ಆತಾ° ವರಸ ಭರ ಪಾವಸ ಪಡತಾ”. ಹೆ° ವಿಚಾರ ಸತ್ಯ ಆಸಾ. ಫುಡೆ ಚಾರ ಮ್ಹಯನೆಕ ಎಕ ಪಾವಟಿ ಪಾವಸು, ಶಿಯ° ಆನೀ ಧಗು ಅಶಿ° ತೀನ ಕಾಳ ವೇಳಾಕ ತಕೀತ ಯೆತಾಶಿಲೆ. ಆತಾ° ಸಕಾಳಿಕ ಶಿಯ°, ದೋನಪಾರಾ ಧಗು ಆನೀ ಸಾಂಜವೇಳಾ ಪಾವಸು. ವಾತಾವರಣಾಂತು° ಮಸ್ತ ಬದಲಾವಣ ಜಾಲಿಲೆ ಪಳೊವಚಾಕ ಮೆಳತಾ. ಹೆ° ಪರಿವರ್ತನ ಕಿತಲೆ ಸಾರಕೆ°? ಅಶಿ° ವೆಳು ಚೂಕುನು ಪಾವಸು ಕಿತ್ಯಾಕ ಯೆತಾ? ಅಸಲೆ ಅಕಾಲಿಕ ಪಾವಸಾನ ಮುಕಾರ ಕಿತೆ° ಅನಾಹುತ ಘಡಚೆ° ಆಸ ಖಾಯ? ಹಾಕ ಪರಿಹಾರ ಕಿತೆ°? ಅಸಲೆ ಅನೇಕ ಪ್ರಶ್ನ ಸಾಮಾನ್ಯ ಮನಶಾಲೆ ಆಲೋಚನೆಂತು° ಯೆತಾ. ಹೆ° ಸರ್ವ ಸವಲಾಂಕ ಜಬಾಬ ಸೊದಿಲೆಶಿ ಥೊಡೆ ಆತಂಕ ಜಾತಾ. 
‘ಹವಾಮಾನ ವೈಪರಿತ್ಯ’ ಮ್ಹಣಚೆ ಅಶೆ° ಆಯಚೆ ಆಧುನಿಕ ಕಾಲಘಟ್ಟಾಂತು ನಿತ್ಯಾಚೆಶೆ° ಜಾಲ್ಯಾ. ಕ್ಲೈಮೇಟ್ ಚೆಂಜಾಕ ಆನೀ ಗ್ಲೋಬಲ್ ವಾರ‍್ಮಿಂಗಾಕ ಅನ್ಯೋಯ ಸಂಬoಧ° ಆಶಚೆ ದಿಸುನು ಯೆತಾ. ಕೆನ್ನಾ ವಾತಾವರಣ ಪರಿವರ್ತನ ಜಾತ ರಾಬತಾ ತೆದಾನಾ ಜಾಗತೀಕ ತಾಪಮಾನ ಮ್ಹಣಚೆ ವಿಚಾರ ಮುಕಾವಯಲೆ ಪಂಕ್ತಿoತು° ಉರತಾ. 
ಆಮಿ ವಸತಿ ಆಶ್ಚೆ ಕೊಂಕಣ ಕರಾವಳಿ ಪ್ರಾಂತ್ಯಾoತು° ಜೂನ ಥಾವನು ಸಪ್ಟಂಬರ ಪರ್ಯಂತ ಪಾವಸು ಪಡಚೆ ರೂಡಿಘತ ಆಸಾ. ಹೊ ವೆಳು ಸೋಣು ನವಂಬರ್ ಯಾ ಜನವರಿಂತು° ಪಾವಸು ಆಯಲೆರಿ ಬಂಗಳಕೊಲ್ಲಿoತು° ವಾಯುಭಾರ ನಶ್ಟ ಜಾಲಾ ಮ್ಹಣಚೆ ಖಬರ ಟಿವಿಂತು° ಯೆತಾ. ಸಮುದ್ರಾಂತು° ಆನೀ ವಾರೆಂತು ಅಸಲೆ ವಾಯುಭಾರ ಪ್ರಮಾಣ ಚಡ-ಕಮ್ಮಿ ಜಾಲ್ಲೆಶಿ ಚಡಾವತ ಪಾವಸು, ಚಂಡಮಾರುತ, ವಾರೆಝಡ, ಪ್ರವಾಹ ಯೆವನು ಜನಜೀವನ ಅಸ್ತವ್ಯಸ್ತ ಜಾತಾ. ತೆನ್ನಾ ತಜ್ಞ ಲೋಕ ಅಸಲೆ ಪ್ರಾಕೃತೀಕ ವಿಕೋಪಾಕ ಕಾರಣ ಶೋಧ ಕರನು ವರದಿ ದಿತಾತ. ತಾಜೆ ಪಾಲನ ಕರಕಾಶಿಲೆ ಸರ್ಕಾರ ಯಾ ಖಂಚೆಯ ಸಂಘ ಸಂಸ್ಥೊ ತಜ್ಞ ಲೋಕಾಲೆ ಸುಚೋವಣಿ ಫೈಲಾಂತು° ದವರೂನ ಅನುಷ್ಠಾನಾಕ ಹಾಣಾಶಿಂಚಿ ಆಶಿಲೆಕ ಆಜಿ ಅನೇಕ ಸಮಸ್ಯಾ ಉದ್ಭವ ಜಾಲಿಲೆ ಪಳೊವಚಾಕ ಮೆಳತಾ. 
ದೆಹಲಿಂತು ಮಾಲಿನ್ಯ ಪ್ರಮಾಣ ಚಡಿಲೆಕ ಶಾಳಾ ಕಾಲೇಜಾಕ ಸುಟಿ ದಿವಚೆ ಪರಿಸ್ಥಿತಿ ನಿರ್ಮಾಣ ಜಾಲ್ಯಾ. ಸುಪ್ರಿಂ ಕೋರ್ಟಾನ ಕೇಂದ್ರ ಸರಕಾರಾಕ ಮಾಲಿನ್ಯ ನಿಯಂತ್ರಣ ಕರಕಾ ಮ್ಹಣೂನ ಸಾಂಗಿಲೆ ಆಸಾ. ತ್ಯಾ ದೆಕೂನ ದೇಶಾಚೆ ರಾಜಧಾನಿತು° ವರ್ಕ ಫ್ರಾಂ ಹೋಮ್ ಪರತ ಶುರು ಕೆಲ್ಯಾ. ವಾತಾವರಣಾಚೆ ಮಾಲಿನ್ಯ ಚಡ ಕರಚೆ ತಸಲೆ ಉದ್ಯಮ ಥೊಡೆ ದಿವಸ ಬಂದ ದವರಚೆ°, 50% ಉಷ್ಣವಿದ್ಯುತ್ ಘಟಕಾಚೆ ಕಾಮ ರಾಬೊವಚೆ, 10 ವರಶಾ ಪಶೆ ಚಡ ಧಾಂವಿಲೆ ವಾಹನಾಕ ನಿರ್ಬಂಧ. ಹೆ° ಸಗಟ ಪಳಯಲ್ಯಾರಿ ಮಾಲಿನ್ಯ ಜಾಲಿಲೆಕ ದೆಹಲಿಂತು ಲಾಕಡೌನ್ ತಸಲೆ ವಾತಾವರಣ ನಿರ್ಮಾಣ ಜಾಲ್ಯಾ. ಅಶಿ° ಮಾಲಿನ್ಯ, ತಾಪಮಾನ ಚಡಚೆ° ಆನೀ ಅಕಾಲಿಕ ಪಾವಸು ಆತಾಚೆ ಪಾಂಚ - ಸ್ಹ ವರಸಾ ದಾಕೂನ ಪರತೂನ ಪರತೂನ ಘಡತಾ ಆಸಾ. 
ಕೊವಿಡ್ ಸಂದರ್ಭೇರಿ ದೇಶವ್ಯಾಪಿ ಲಾಕಡೌನ್ ಆಶಿಲೆಕ ತೆದನಾ ಜಗತ್ಯಾಂತು° ಮಾಲಿನ್ಯ ಊಣೆ ಜಾಲ್ಯಾ ಮ್ಹಣು ಹವಮಾನ ಇಲಾಖೆನ ಮಾಹಿತಿ ದಿಲ್ಲಿಲೆ. ಹೋಡ ಹೋಡ ಶಹರಾಂತು° ರಾನ್ನಾಚೆ ಪಕ್ಷಿ-ಪ್ರಾಣಿ ಭೊಂವಚೆ ಚಿತ್ರಾ° ಸಾಮಾಜಿಕ  ಮಾಧ್ಯಮಾಂತು° ವೈರಲ್ ಜಾಲಿಲೆ. ಸುಮಾರ ವರಸಾಚೆ ಮಾಲಿನ್ಯ 7% ತಿತಲೆ ಕಮ್ಮಿ ಜಾವನು ಪರಿಸರಾಂತು° ನವೆ ಚೈತನ್ಯ ಆಯಿಲೆ ಪಳೊವನು ಆನಂದ ಜಾಲಿಲೆ. ಎಕ ವರಸಾಂತು° ಹೆ°ಸಗಟ ಉಲ್ಟಾ ಪಲ್ಟಾ ಜಾಲ್ಯಾ. ಕೊವಿಡ್ ನಿರ್ಭಂದ ಊಣೆ ಕೆಲ್ಲೆ ಉಪರಾಂತ ಮಾರ್ಗಾರ ವಾಹನಾಚೆ ಸಂಚಾರ ಚಡ ಜಾಲೆ. ಸಕಾರಾಚೆ ವೆವೆಗಳೆ ಯೋಜನೆಂತು° ಅಭಿವೃದ್ಧಿಚೆ ನಾಂವಾರಿ ಸುಮಾರ ಕಾಮಗಾರಿ ಆರಂಭ ಜಾವನು ತ್ಯಾ ಉದ್ಧೇಶಾನ ಸುಮಾರ ರೂಕ ಖಂಡಲೆ. 
ಅಧಿಕಾರಿ ಲೋಕಾಲೊ ಪಾಕಿಟ್ ಭರಚೆ ಲೋಕಾಂಕ ಅಕ್ರಮ ರೆಂವ ಕಾಡಚೆ, ಫಾತರಾಚೆ ಕಣಿ ಚಲೋವಚಾಕ ಅವಕಾಶ ದಿವಚೆ, ಪರ್ವತ ಪ್ರದೇಶಾಂತು° ಡೈನಾಮೈಟ್ ಘಾಲನು ಶಿಲೆಚೆ ಫಾತೋರು ಭೆತ್ತುಚೆ, ಪೆಟ್ರೋಲ್ ಡಿಸೇಲ್ ವಾಹನಾಚೆ ಸಂಚಾರ ಅತ್ಯಧೀಕ ಪ್ರಮಾಣಾರಿ ಜಾಲ್ಲಿಲೆ ನಿಮಿತ ಪರಿಸರ ಆನೀಕ ಆನೀಕ ಮಾಲಿನ್ಯ ಜಾತಾ ಆಸಾ. ವಾತಾವರಣಾಂತು° ವೈಪರಿತ್ಯ ಜಾವನು ವೆಳು ನಾಶಿ ಪಾವಸು, ಪ್ರವಾಹ ಯೆವನು ವ್ಯಯಕ್ತಿಕ ಆನಿ ತಶಿ° ಸಾರ್ವಜನಿಕ ಆಸ್ಥಿಕ ನಷ್ಟ ಜಾತಾ ಆಸಾ. ಪರಿಸರಾಕ ಮಾರಕ ಆಶ್ಚೆ ಕಾನೂನ ಬಾಹಿರ ಚಟುವಟಿಕಾ ರಾಬಕಾ. ರೂಕ ಖಾಂಡಚೆ°, ಹೋಡ ಹೋಡ ಅಪಾರ್ಟಮೆಂಟ್ ಬಾಂದೂಚೆ°, ಇಂಧನಾಚೆ ವಾಪರಾಕ ಬ್ರೇಕ್ ಘಾಲ್ಲೆರಿ ಯೆವಚೆ ದಿಸಾತುಂ ಮಾಲಿನ್ಯಾಚೆ ಆನೀ ವಾತಾವರಣಾಚೆ ವೈಪರಿತ್ಯ ರಾಬೋವಚಾಕ ಜಾತಾ.  

ಪರಬೆಕ ತಿಸ್ರೆ ಲ್ಹಾರಾಚೆ ಭಯ

ವಿಶ್ವಾಕಚ ಕರೋನಾಚೆ ಭಯ ಆಸಾ. ಆಮ್ಮಿ ಆರತಾಂ ಕೋವಿಡಾಚೆ ದೋನ ಲ್ಹಾರಾ ಪಳಯ್ಲೆ. ತಿಸರೆ ಲ್ಹಾರಾಚೆ ಖಬರ ಪತ್ರಾಂತ್ ವಾಚತ ಆಸ್ತಾಚಿ. ತಶಿ ಆಸಲೆರಿವರಿ ಆಮಕಾ ಭಯ ನಾ. ಧೈರ್ಯಾನ ಆಮ್ಮಿ ದಿನಂಪ್ರತಿ ಮಾರ್ಕೆಟಾಕ, ದುಕಾನಾಕ ವತ್ತ ಉರತಾಚಿ. ಏಕ ಪಾವಟಿ ಭಾಯರಿ ಗೆಲ್ಲೆರಿ, ಸಾತ-ಆಟ ದಿವಸಾಚೆ ಕಾಮ ಸರೊವಚೆ ತಸಲೆ ಚಾಣಾಕ್ಷತನ ಜಾವಕಾಚಿಚಿ. ನಾ ಜಾಲ್ಯಾರ್ ಮುಕಾರಿ ಪಶ್ಚಾತ್ತಾಪ ಕರಕಾ ಜಾತ್ತಾ. ವ್ಯಾಕ್ಸಿನ್ ಘೆತಲ್ಯಾ ಮೋಣು ಕಾಂಯಿ ಭೀತಿ ನಾಶಿ, ಲೊಕಾಲೆ ಗರ್ದಿ ಆಶಿಲೆ ಜಾಗೆರ್ ಭೊಂವತ ಉರಲೆರ್ ಅಪಾಯ ಆಸ್ಸೂಚೆ ಪಕ್ಕಾ. ಹೆಂ ವಿಷಯ ಹಾಂವೆ ಸಾಂಗಚೆ ನೈ. ವೈದ್ಯ ಆನಿ ತಜ್ಞ ಲೋಕಾನಿ ಅಸಲೆ ಸೂಚೊವಣಿ ದಿಲ್ಲಿಲೆ ಆಸಾ. 
ತಿಸ್ರೆ ಲ್ಹಾರಾ ಯೆವಚೆ ಗ್ಯಾರಂಟಿ ವೆ? ಅಸಲೆ ಸವಾಲ್ ಖೂಬ್ ಜಣಾಲೆ ಮನಾಂತು ಆಸಾ. ಹಾಕ್ಕಾ ಜವಾಬ್ ಹೊಯಿ ಮೋಣು ಸಾಂಗುಕಾ ಜಾತ್ತಾ. ವಿದೇಶಾಂತು ಪಾಂಚವೆ ಲಾರಾ ಯವ್ನು ಗೆಲ್ಲಾ. ಭಾರತಾಂತು ಕರೋನಾಚೆ ಬಾಧಾ ಊಣೆ ಜಾಲ್ಲಿಲೆ ನಾ. ಕೊಡಿಯಾಲಾಂತು ಕರೋನಾ ಕೇಸ್ ಚಡ ಜಾತ್ತಾಸಾ. ಕೇರಳ ರಾಜ್ಯಾಚೆ ಲೊಕಾನಿಂ ರೈಲ್ ಆನಿ ಬಸ್ಸಾರಿ ವೆವೆಗಳೆ ಉದ್ದೇಶಾನ ಮಂಗಳೂರಾಕ ಯವಚೆ ಏಕ ಕಾರಣ ಆಸಲೆರಿ, ಪರಬೆಕ ಲೊಕಾನಿ ಜಮ್ಚೆ ದುಸ್ರೆ ಕಾರಣ ಮ್ಹೋಣು ಸಾಂಗ್ಯೇತ. ಅಗಸ್ಟ್ 25 ದಾಕೂನು 29 ಪರ್ಯಂತ ಕೇರಳಾಂತು ದಿವಸಾಕ ಅಜಮಾಸು 30000 ಕರೋನಾಚೆ ಕೇಸ್ ದಾಖಲ ಜಾಲ್ಲಿಲೆ ಆಸ್ಸಾ. ಕರ್ನಾಟಕಾಂತುವರಿ 1500 ಆಂಕಡೆಚೆ ಕರೋನಾ ಕೇಸ್ ದಿನಂಪ್ರತಿ ಚಡ ಜಾವಚೆ ಆತಂಕಾಚೆ ವಿಷಯ. 

ಕೇರಳಾಂತು ಕರೋನಾಚೆ ತಿಸರೆ ಲ್ಹಾರಾ ಆಯಲ್ಯಾ ಮ್ಹೋಣು ಥೋಡೆ ತಜ್ಞ ಸಾಂಗತಾತಿ. ಹೇº ವಿಷಯಾಂತು ಸರಕಾರ ಕಾಂಯಿ ಪ್ರತಿಕ್ರಿಯಾ ದಿತ್ತ ನಾ. ತರೀಪಣ ಲೊಕಾನಿ ಸಾಂಗಚೆ ವಿಚಾರ ಅಶಿ ಆಸಾ-‘ಬಕ್ರೀದ್, ಓಣಂ ಅಸಲೆ ಪರಬೆಕ ಮಾರ್ಗಸೂಚಿ ಪಾಲನಾ ಕರನಾಶಿ ಜಣ ಭೊಂವಲ್ಯಾತಿ’. ತ್ಯಾ ನಿಮಿತ್ತ ರೋಗಪ್ರಸಾರ ಚಡ ಜಾಲ್ಯಾ. ಕರ್ನಾಟಕಾಂತು ಕಾಂಯ್ ಪರಿಸ್ಥಿತಿ ನಿಯಂತ್ರಣಾoತು ಆಸಾ ಮೋಣು ಸಾಂಗಚಾಕ ಜಾಯನಾ. ತೀರ್ಥಕ್ಷೇತ್ರ ಆನಿ ದೇವಳಾಕ ಜಣಾಲೆ ಭೊಂವಡಿ ಚಡ ಜಾಲ್ಯಾ. ಕರ್ನಾಟಕಾಚೆ ಥೊಡೆ ಜಿಲ್ಲೆಂತು ವೀಕೆಂಡ್ ಕರ್ಫ್ಯೂ ನಾಂವಾಕ ಮಾತ್ರಶೆ ಆಸಾ. ಲೊಕಾಲೆ ಸಂಚಾರಾಕ ಖಂಚೆಯ್ ಪ್ರತಿಬಂಧ ಲಾಗಿಲೆ ನಾ. ನಾಗರಪಂಚಮಿ, ರಾಘವೇಂದ್ರ ಸ್ವಾಮ್ಯಾಲೆ ಮಧ್ಯಾರಾಧನಾ ಆನಿ ಕೃಷ್ಣಾಷ್ಟಮಿಕ ಪೂಜಾ ಸಾಮಗ್ರಿ ಘೆವಚಾಕ ಮಾರ್ಕೆಟಾಂತ್ ಲೊಕಾಲೆ ಭೀಡ್ ಚಡ ಆಶಿಲೆ. ದೆವಳಾಚೆ ಭಿತ್ತೆರ್ ಸಾಮಾಜಿಕ ಅಂತರ, ಮಾಸ್ಕ್ ನಾಶಿಚ ಕಾರ್ಯಕ್ರಮ ಕೆಲ್ಲಿಲೆ ಪಳಯಲ್ಯಾರಿ ನಿಷ್ಕಾಳಜಿ ಆಶ್ಚೆ ದಿಸ್ತಾ.

ಶ್ರಾವಣ-ಭಾದ್ರಪದ ಪರಬೆಚೆ ಮಹಿನೊ ಜಾವ್ನಾಸ್ಸಾತ್. ಆಮ್ಮಿ ಅಸಲೆ ಸಂದರ್ಭಾರ್ ಜಾಗರೂಕತಾಯೆನ ವ್ಯವಹಾರ ಕರಕಾ. ಮುಕಾರ್ ಯವಚೆ ಗಣೇಶೋತ್ಸವ, ಅನಂತ ನೋಪಿ ಅಸಲೆ ಸಂಭ್ರಮಾಚೆ ಆಚರಣೆಕ ಥೊಡೆಶೆ ನಿಯಂತ್ರಣಾಚೆ ಗರಜ ಆಸ್ಸಾ. ವ್ಯಾಕ್ಸಿನ್ ಘೆತಲ್ಯಾ ಮ್ಹೋಣು ರೋಗ ಯೇನಾ ಮೋಣು ಸಮಜೂಚೆ ನೈ. ವ್ಯಾಕ್ಸಿನಾಚೆ ಪ್ರಯೋಜನ ಮ್ಹಳ್ಯಾರ್ ರೋಗನಿರೋಧಕ ಶಕ್ತಿ ಚಡಯ್ತಾ. ಅತಾಂ ಥೊಡೆ ಭಾಗಾಂತ್ ಶಾಳಾ-ಕಾಲೇಜ್ ಆರಂಭ ಜಾಲ್ಲಿಲೆ ಆಸಾ. ತಾಜೆ ಮಧೆಂ ಪರಬೆಚೆ ವಾತಾವರಣ. ಸಂಭ್ರಮಾoತು ಭಾಗ ಘೆವಚಾಕ ಆತುರ ನಾಕಾ. ಸದ್ಯಾ ಆಚರಣ ಕರಚೆ ತಸಲೆ ಪರಬೆಕ ಸ್ವನಿಯಂತ್ರಣ ಘಾಲ್ನು ಘೆವಚೆ ಬರೆ. 
ಸರ್ಕಾರಾಚೆ ಮಾರ್ಗಸೂಚಿ ಕಶಿ ಉರೊ.ಆಮ್ಮಿ ಸ್ವತಃ ಥೊಡೆ ನಿಯಮಾಚೆ ಪಾಲನ ಕೆಲ್ಲೆರಿ ರೋಗ ಪ್ರಸಾರ ಜಾವಚೆ ರಾಬ್ಬೊವಚಾಕ ಜಾತ್ತಾ. ತಶಿ ಆಸಲೆರಿ ಕಿತ್ತೆ ಕರಿಯೇತ? ಗಣೇಶೋತ್ಸವ ಘರಾಂತುಚ ಸರಳ ರೀತಿರ ಆಚರಣ ಕರಚೆ. ಸಾರ್ವಜನಿಕ ಕಾರ್ಯಕ್ರಮಾಕ ವಚನಾಶಿ ಉರಚೆ ಬರೆ. ಸಾಂಸ್ಕೃತಿಕ ಸಮಾರಂಭ, ಮೆರವಣಿಗಾ ಅಸಲೆ ಕಾರ್ಯಾವಳಿಚಾನ ದೂರ ಆಶ್ಚೆ. ಏಕ ಹಫ್ತೆಕ ಪಾವಚೆ ತಿತಲೆ ರೇಶನ್ ಸಾಮಗ್ರಿ ಯಾ ತರಕಾರಿ ಸಂಗ್ರಹ ಘರಾಂತು ದವರಚೆ. ಚಡ ಲೊಕಾಮಧೆಂ ಸಾರ್ವಜನಿಕ ಸ್ಥಾನಾರಿ ವಚೂನು ಆಯಲೆರಿ ತುರಂತ ನ್ಹಾವಚೆ. ತರಕಾರಿ ಆನಿ ಫಲವಸ್ತು ಧೂಯನು ಖಾವಚೆ. ಎನ್-95 ಮಾಸ್ಕ ವಾಪರಚೆ. ಭಯ ದೂರ ಕರ‍್ನು ಜಾಗರೂಕತಾಯೆನ ಉರಚೆ ಆನಿ ಲೊಕಾಂಕ ಮಾರ್ಗದರ್ಶನ ಕರಚೆ. ಹಾಜ್ಜೆ ಪಶೆ ಹೋಡ ನಿಯಂತ್ರಣ ಆನಿ ಕಾಂಯ್ ನಾ. 

-    ಅರವಿಂದ ಶ್ಯಾನಭಾಗ, ಬಾಳೇರಿ