ಮಂಗಳೂರು: ಶ್ರೀ ಸಂಸ್ಥಾನ ಗೌಡಪಾದಾಚಾರ್ಯ ಕವಳೆಮಠ ಹಾಜೆ° ಮಂಗಳೂರು ಶಾಖಾ ಮಠ ಹಾಜೆ° ಬಾಂದಪ ಹಾಂಗಾಚೆ ಕೊಟ್ಟಾರ ಪ್ರದೇಶಾಚೆ ಕೊಡಿಕಲಾಂತು° ಶೀಘ್ರ ಸಂಪನ್ನ ಜಾವಚೆ° ಆಸೂನ ನ.7ಕ ಮಠಾಧೀಶ ಶ್ರೀಮದ್ ಶಿವಾನಂದ ಸರಸ್ವತಿ ಸ್ವಾಮಿ ಗುರು ಮಹಾರಾಜ್ ಹಾಂನಿ° ಬಾಂದ ಸ್ಥಳಾಕ ಭೇಟಿ ದಿವನು ಮಾರ್ಗದರ್ಶನ ದಿಲೆ°.

ಕೊಟ್ಟಾರ ಫೈಒವರಾಕ ಲಾಗೂನ ಆಸಚೆ ಜಾಗೆರಿ ಬಾಂದಿತ ಆಸಚೆ ಹ್ಯಾ ಚೌದ ಹಜಾರ ಸ್ಕ್ವೇರ್ ಫೀಟ್ ಇಮಾರತಾಂತು° ಬೇಸಮೆಂಟ್, ಗ್ರೌಂಡ್ ಆನಿ ಎಕ ಮ್ಹಾಳಿ ಆಸತಲೆ. ಸಾಬಾರ ಚಾರ ಕರೋಡ ರುಪಯೆಚೆ ಹ್ಯಾ ಯೋಜನೆಕ ಸಮಾಜಾಚೆ ಹರ ಎಕಲೆಲೆ ಯೋಗದಾನ ಆಸೂಂಕ ಜಾಯ ಮ್ಹಣು ಗುರುವರ್ಯಾನ ಸಾಂಗಲಾ°. ಹ್ಯಾ ಮಠ ನಿರ್ಮಾಣ ಕರಚಾಕ ಜಾವಕಾ ಜಾಲೆಲೊ 15 ಸೆಂಟ್ಸ್ ಜಾಗೊ ಅಳಿಕೆ ಗೋಪಾಲಕೃಷ್ಣ ಪೈ ಹಾಂನಿ° ತಾಂಗೆಲಿ ಆವಸು ತಾರಾ ಗೋವಿಂದ ಪೈ ಹಾಂಗೆಲೆ ಉಡಗಾಸಾಕ ಮಠಾಕ ಉಡಗಿರೆ ಜಾವನು ದಿಲೆಲೆ° ಆಸಾ.

2700 ವರಸಾಚೊ ಇತಿಹಾಸ ಆಸಚೆ ಹ್ಯಾ ಮಠಾಕ ದೇಶ ಭರ ಎದೋಳೂಚಿ 18 ಶಾಖಾ ಮಠ ಆಸಾತಿ. ಹ್ಯಾ ಮಠಾಕ ಶ್ರೀಮದ್ ಗೌಡಪಾದಾಚಾರ್ಯ ಹಾಂಗೆಲಿ ಗುರು ಪರಂಪರಾ ಆಸೂನ ತಾಂಗೆಲೊ ಶಿಷ್ಯ ಶ್ರೀಮದ್ ಭಗವದ್ ಪಾದಾಚಾರ್ಯ ಹಾಂನಿ° ಆದಿ ಶಂಕರಾಚಾರ್ಯ ಹಾಂಕಾ° ದೀಕ್ಷಾ ದಿಲೆಲಿ ಆಸಾ. ಭವಾನಿ ಶಂಕರ ಮಠಾಚೊ ಆರಾಧ್ಯ ದೇವು ಜಾವನು ಆಸೂನ ಮೂಲ ಮಠ ಗೊಂಯಚೆ ಕವಳೆಂತು° ಆಸಾ. ಶ್ರೀಮದ್ ಸಚ್ಛಿದಾನಂದ ಸರಸ್ವತಿ ಸ್ವಾಮೀಜಿ ಹಾಂಗೆಲೆ ಶಿಷ್ಯ ಜಾವನು ಆಸಚೆ ಆಯಚೆ ಪೀಠಾಧಿಪತಿ ಶ್ರೀಮದ್ ಶಿವಾನಂದ ಸರಸ್ವತಿ ಸ್ವಾಮೀಜಿ ಹಾಂಕಾ° ಕೊಡಿಯಾಲಾಚೆ ಶಿಷ್ಯವರ್ಗಾಚೆರಿ ವಿಶೇಷ ಮೋಗು ಆಸಾ. ಹಾಕಾ ಪ್ರಮುಖ ಕಾರಣ ಮ್ಹಳ್ಯಾರಿ 1994ತು° ಕವಳೆಂತು° ಹಾಂಕಾ° ಶಿಷ್ಯ ಸ್ವೀಕಾರ ಕರಚೊ ಕಾರ್ಯಕ್ರಮ ಘಡತನಾ ಮಂಗಳೂರು ಆನಿ ಉಡುಪಿ ಪರಿಸರಾಚೆ ಅಸಂಖ್ಯ ವೈದಿಕ ಆನಿ ಶಿಷ್ಯ ವರ್ಗಾನ ವಾಂಟೊ ಘೆತಿಲೆ° ಜಾವನು ಆಸಾ. ಗುರುವರ್ಯಾನ ಖಂಚೆಯ ಮೊಕ್ಕಾಂತು° ಆಸಲ್ಯಾರಯಿ ಗಣೇಶೋತ್ಸವಾಚೆ ವೇಳಾರ ಮಂಗಳೂರಚೆ ಸ್ವಯಂಸೇವಕಾನ ವಚೂನ ಗಣಪತಿ ಪಾವೊಚೆ° ಕರತಾತಿ. ಹೆ° ಸಾಬಾರ ದಶಕಾ ದಾಕೂನ ಚಲನು ಯೆವನು ಮಂಗಳೂರ ಶಹರಾ ವಿಷಯಾರಿ ಗುರುವರ್ಯಾಂಕ ಆಸಚೆ ವಿಶೇಷ ಅಭಿಮಾನಾಕ ಕಾರಣ ಜಾಲಾ°. 1998 ಇಸವಿಂತು° ಮಂಗಳೂರ ಶ್ರೀ ವೆಂಕಟರಮಣ ದೇವಳಾಂತು° ಶ್ರೀಮದ್ ಸಚ್ಛಿದಾನಂದ ಸರಸ್ವತಿ ಹಾಂನಿ° ಶಿಷ್ಯ ಸಹಿತ ಚಾತುರ್ಮಾಸ ಅತ್ಯಂತ ವಿಜೃಂಭಣೆನ ಆಚರಣ ಕೆಲೆಲೊ ಆಸಾ.
ಸದ್ಯಾಕ ಆಖೇರಿಚೆ ಸ್ಲೇಬಾಚೆ ಕಾಮ ಚಾಲೂ ಆಸೂನ ಗುರುವರ್ಯಾನ ಅವಲೋಕನ ಕರನು ಬಾಂದ ಸಮಿತಿಚೆ ಸಾಂದ್ಯಾ°ಕ ಸೂಕ್ತ ಮಾರ್ಗದರ್ಶನ ದಿವಚೆ° ಜಾಲೆ°. ಹ್ಯಾ ವೇಳಾರ ಮಂಗಳೂರು ಶಾಖಾ ಮಠಾಚೆ ವ್ಹಾಂಗಡಿ, ಸ್ವಯಂಸೇವಕ, ಇಂಜಿನಿಯರ್, ಆರ್ಕಿಟೆಕ್ಟ್, ಕಾಂಟ್ರೆಕ್ಟರ್ ಆನೀ ಹೇರ ಸಮಾಜ ಭಾಂದವ ಉಪಸ್ಥಿತ ಆಶಿಲೆ.

To Support Kodial Khaber click the following button.

ಮಂಗಳೂರು: ಮನಶಾನ ಭೂಯಿ° ಆನಿ ದುಡ್ವಾಚೊ ವ್ಯಾಮೋಹ ಸೋಡಲ್ಯಾರಿ ಮುಕ್ತಿ ಆನಿ ಮೋಕ್ಷ ಸಾಧ್ಯ. ನಶ್ವರ ವಸ್ತುಚೆರಿ ಆಸಚೆ ಪ್ರೀತಿನ ಆಹಂ ವಾಡತಾ. ಆಮಿ ಕೆದನಾಯಿ ಉರ್ಧ್ವಮುಖಿ ಜಾವಚೆ ನದರೇನ ಚಿಂತನ ಕರಕಾ” ಮ್ಹಣು ಕವಳೆ ಮಠಾಧೀಶರಾದ ಶ್ರೀಮದ್ ಶಿವಾನಂದ ಸರಸ್ವತಿ ಸ್ವಾಮೀಜಿ ಹಾಂನಿ° ಸಾಂಗಲಾ°. ಕೊಟ್ಟಾರಾಂತು° ಶ್ರೀ ಸಂಸ್ಥಾನ ಗೌಡಪಾದಾಚಾರ್ಯ ಕವಳೆ ಮಠಾಚೆ ನೂತನ ಶಾಖಾ ಮಠಾಕ ಶಂಕುಸ್ಥಾಪನಾ ಕರನು ತಾಂನಿ° ಅಶೀರ್ವಚನ ದಿಲೆ°. “ಮಠ, ಮಂದಿರ° ಆಸಚೆ° ಜನಕಲ್ಯಾಣಾ ಕಾತಿರ. ಹರ ಎಕ ಸಮಾಜಾನ ಅಭಿವೃದ್ದಿ ಜಾವಕಾ ಜಾಲ್ಯಾರಿ, ಸಮಾಜಾಕ ಸಮ ವಾಟೆರಿ ವಚೆ° ತಶಿ° ಮಾರ್ಗದರ್ಶನ ದಿವಚೆ° ಮಠಾಧೀಶಾನಿ ಮ್ಹಣು ತಾಂನಿ° ಸಾಂಗಲೆ°. ಫಕತ ದೇವಾಲೆ ನಾಮ ಸ್ಮರಣ ಕೆಲ್ಯಾರಿ ಪಾವನಾ, ಸೂಕ್ತ ಮಾರ್ಗದರ್ಶನ ದಿತಲೆ ಗುರು ಜಾವಕಾಚಿ. ವಿಷ್ಣು ಆನಿ ಶಿವ ಪೂಜೆಂತು° ಬೇಧ ಕರನಾಶಿ°, ಭಕ್ತಿನ ಪರಮಾತ್ಮಲೆ ಅರಾಧನಾ ಕರಕಾ. ವ್ಹಿಂಗವ್ಹಿοಗಡ ಪ್ರದೇಶಾಂತು° ಕವಳೆ ಮಠಾಚೆ ಶಾಖಾ ಮಠ ಸ್ಥಾಪನಾ ಜಾತಾ ಆಸಾತಿ, ಹಾಜೆ ನಿಮಿತ ಸರ್ವ ಶಿಷ್ಯ ವೃಂದಾನ ಸಾಂಗತ ಯೆವಚೊ ವೇಳು ಆಯಲಾ ಮ್ಹಣು ಗುರುವರ್ಯಾನಿ ಸಾಂಗಲೆ°.
ಮಂಗಳೂರಾಮತು° ಕವಳೆ ಮಠಾಚೊ ಶಾಖೊ ಜಾತಾ ಆಸಚೆ ಸಂತೋಸಾಚೊ ವಿಷಯ, ಸರ್ವ ಸಾರಸ್ವತ ಲೋಕಾನ ಹಾಕಾ ಜಾಯ ಆಶಿಲಿ ಸೇವಾ ಕರಕಾ ಮ್ಹಣು ಮಂಗಳೂರು ದಕ್ಷಿಣ ಶಾಸಕ ವೇದವ್ಯಾಸ ಕಾಮತ್ ಹಾಂನಿ° ಸಾಂಗಲೆ°.
ಆವಸೂಲೆ ಆಶೆ ಪ್ರಮಾಣೆ ಹಾಂವೆ° ಹೊ ಜಾಗ ದಾನ ಕೆಲಾ ಮ್ಹಣು ಎ. ಜಿ. ಪೈ ಹಾಂನಿ° ಕಳಯಲೆ°.
ಮಂಗಳೂರಾοತು° ಮಠ ಸ್ಥಾಪನಾ ಜಾವಕಾ ಮ್ಹಣು ಖೂಬ ಕಾಳಾಚೆ ಸೊಪನ ಸ್ವಾಮ್ಯಾಲೆ ಆನಿ ದೇವಾಲೆ ಆಶೀರ್ವಾದಾನ ಜಾಲಾ° ಮ್ಹಣು ಮ್ಹಾಲ್ಗಡೊ ಉದ್ಯಮಿ ಎ. ಕೆ. ಮಂಜುನಾಥ ಶೆಣೈ ಹಾಂನಿ° ಸಾಂಗಲೆ°. ಶಾಸಕ ಡಾ ಭರತ್ ಶೆಟ್ಟಿ, ಸ್ಥಳೀಯ ನಗರಪಾಲಿಕಾ ಸಾಂದೊ ಮನೋಜ್ ಕುಮಾರ್, ಮಠಾಚೆ ಇಮಾರತ ಬಾಂದಪ ಇಂಜಿನಿಯರ್ ಗುರುಪುರ ಯೋಗೀಶ್ ಪೈ, ಪಾಲಿಕಾ ಸದಸ್ಯಾ ಸಂಗೀತ ನಾಯಕ್, ಸಾಗರ ನಗರ ಸಭೆಚೊ ಉಪಾಧ್ಯಕ್ಷ ಮಹೇಶ್ ವಿ ಮಾನಾಚೆ ಸೊಯ್ರೆ ಆಶಿಲೆ.
ರಥಬೀದಿ ಶ್ರೀ ವೆಂಕಟರಮಣ ದೇವಳಾಚೆ ಟ್ರಿಸ್ಟಿ ಅಡಿಗೆ ಬಾಲಕೃಷ್ಣ ಶೆಣೈ, ಕಿರಣ್ ಪೈ, ಸತೀಶ್ ಪ್ರಭು, ಗಣೇಶ್ ಕಾಮತ್, ಸಿಎ ಜಗ್ನನಾಥ ಕಾಮತ್, ಕೊಂಚಾಡಿ ದೇವಳಾಚೆ ಟ್ರಸ್ಟಿ ಡಿ. ವಾಸುದೇವ ಕಾಮತ್, ಭಾರತ್ ಸಮೂಹ ಸಂಸ್ಥೆಚೆ ಆನಂದ ಪೈ, ಸುಬ್ರಾಯ ಪೈ, ಬೆಂಗಳೂರು ಆರ್‌ಎಸ್‌ಬಿ ಸಂಘಾಚೊ ಅಧ್ಯಕ್ಷ ನಾಗೇಂದ್ರ ಕಾಮತ್, ಜಿಎಸ್‌ಸಭಾ ಕೋಡಿಕಲ್ ಹಾಜೊ ಅಧ್ಯಕ್ಷ ಆರ್.ಎಂ. ಪ್ರಭು, ಕೆ ಎಸ್ ಬಿ ಸಮಾಜಾಚೊ ಅಧ್ಯಕ್ಷ ಸುಧರ್ಶನ್ ನಾಯಕ್, ಮಠ ಕಟ್ಟಡ ಸಮಿತಿ ಅಧ್ಯಕ್ಷ ಸುಬ್ರಹ್ಮಣ್ಯ ಭಟ್, ಉಪಾಧ್ಯಕ್ಷ ಪ್ರವೀಣ್ ನಾಯಕ್, ಟಿ. ಅವಿನಾಶ್ ಶೆಣೈ, ಕೋಶಾಧಿಕಾರಿ ಗೋಪಾಲಕೃಷ್ಣ ರಾವ್, ರಮೇಶ್ ಭಟ್ ಉಪಸ್ಥಿತ ಆಶಿಲಿಂತಿ. ಗುರುವರ್ಯಾಂಕ ಪೂರ್ಣ ಕುಂಭ ಸ್ವಾಗತ ಕೆಲೆ°. ಗೌರವಾಧ್ಯಕ್ಷ ಗೋಕುಲದಾಸ್ ನಾಯಕ್ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ಮಹೇಶ್ ರಾವ್ ಗಾಯಿತೊಂಡೆ ಹಾಂನಿ° ದಾನಿ ಲೋಕಾಲಿ ಯಾದಿ ವಾಚಲಿ. ಪ್ರಧಾನ ಕಾರ್ಯದರ್ಶಿ ನರೇಶ್ ಕಿಣಿ ಹಾಂನಿ° ಸೂತ್ರ ಸಂಚಾಲನ ಕರನು ಮಠ ಬಾಂದಪಾ ಬದಲ ಮಾಹಿತಿ ದಿಲಿ.