ವೀಕೆಂಡ್ ಕರ್ಫ್ಯೂ – ತಾಪತ್ರಯ !

ದೇಶಾಂತು° ಕೊವಿಡ್ ಕೇಸ° ನಿರಂತರ ಚಡತಾ ಆಸಾತಿ. ಕಾಲಚೆ ದೀಸಾಕ (ಜ.11) ಎಕಚ ದೀವಸಾಕ 1,90,955 ಕೇಸ° ದಾಖಲೊ ಜಾಲ್ಯಾಂತಿ. ಹೊ ಸಂಖೊ 6 ಲಾಖ ಪಾವಚೊ ಅಂದಾಜ ಆಸಾ. ಮುಂಬಯಿ ಶಹರಾಂತು° ಮಾಕ್ಷಿಚೆ ತೀನ ದಿವಸಾಂತು° ಸರಾಸರಿ ವೀಸ ಹಜಾರ ಕೇಸ° ದಾಖಲೊ ಜಾಲ್ಯಾಂತಿ. ಆಂಕಡೊ ಪೀಕ್ ಯಾ ಶಿಖರಾಕ ಕೆದನಾ ಪಾವತಾ ಮ್ಹಣು ಸಗಟಾನ ರಾಖಚೆ° ಜಾಲಾ°. ಎಕ ಪಾವಟಿ ಶಿಖರಾಕ ಪಾವಲ್ಯಾರಿ ಮಾಗಿರಿ ಕೇಸ° ದ್ಹೆಂವತಾತಿ ಮ್ಹಣು ಪಯಲೆ ಆನಿ ದುಸ್ರೆ ವೇವಾಂತು° ಆಮಿ ಪಳಯಲಾ°.
ಹ್ಯಾ ಪಾವಟಿ ‘ಓಮಿಕ್ರಾನ್’ ಮ್ಹಳೆಲಿ ಕೊವಿಡಾಚಿ ನವೀ ತಳಿ ಭಾಯರ ಸರಲ್ಯಾ. ಆಫ್ರಿಕಾಂತು° ಶುರು ಜಾಲೆಲಿ ಹೀ ತಳಿ ಆಜಿ ಸಗಳೆ ಪ್ರಪಂಚಾಕ ಪಾವಲ್ಯಾ. ಆಫ್ರಿಕಾಂತು° ಜುಲೈ ಮ್ಹಯನ್ಯಾಂತು° ತಿಸ್ರೆ° ವೇವ್ ಶುರು ಜಾಲೆ° ಆನಿ ಶಿಖರಾಕ ಪಾವನು ಪರತೂನ ಸಕಳ ದ್ಹೆಂವಚೆ° ಜಾಲೆ°. ಹಿ ತಳಿ ವಗೀಚ ಪಸರತಾ ಮ್ಹಣು ಸಾಂಗತಾತಿ. ಭಾರತಾಂತಯೀ ವಗೀಚ ಆಂಕಡೊ ಶಿಖರಾಕ ಪಾವತಲೊ ಮ್ಹಣು ತಜ್ಞ ಲೋಕಾಲೊ ಅಭಿಪ್ರಾಯ ಆಸಾ.

ಭಾರತಾಂತು° ತಿಸ್ರೆ° ವೇವಾಚೆ ಶಿಖರ ಮಾರ್ಚ 2022 ಮ್ಹಣತಾನಾ ಸಕಳ ಯೆವಚಾಕ ಶುರು ಜಾತಾ ಮ್ಹಣು ತಾಂಗೆಲೊ ಅಭಿಪ್ರಾಯ ಆಸಾ. ಮಾಕ್ಷಿಚೆ ದೋನ ವೇವಾಂತು° ಆಮಿ ಸಾಬಾರ ತಜ್ಞ ಲೋಕಾಲೊ ಅಭಿಪ್ರಾಯ ಆಯಕಲ್ಯಾಂತಿ. ತಾಜೋ ಖೂಬ ಅನುಭವ ಆಮಕಾ ಜಾಲಾ !

ಸರಕಾರಾನ ಸುತಾ ಹ್ಯಾ ತಜ್ಞ ಲೋಕಾಂಚೆ° ಉತ್ರ° ಆಯಕೂನು ಕಠಿಣ ಕ್ರಮ ಘೆವಚೆ° ದಿಸೂನ ಯೆತಾ. ಕರ್ನಾಟಕ ಆನೀ ಹೇರ ಪ್ರಮುಖ ರಾಜ್ಯಾಂತು° ಎದೋಳೂಚಿ ವಿಕೆಂಡ್ ಕರ್ಫ್ಯೂ ಜ್ಯಾರಿ ಜಾಲಾ. ವ್ಹಾರ್ಡಿಕ ಮುಂಜಿಕ ಚಡ ಲೋಕಾಂಕ ಆಪೋವಚಾಕ ಜಾಯನಾ, ಸಾರ್ವಜನಿಕ ಕಾರ್ಯಕ್ರಮಾಂಕ ಲಾಗೂನ ಪ್ರೋಟೊಕಾಲ ಆಯಲಾ, ಮಾಸ್ಕ್ ಧಾರಣ, ಶಾರೀರಿಕ ಅಂತರ ಸಾಂಬಾಳಚೆ° ಆನೀ ಸೆನಿಟೈಸೆಶನ್ ಕಡ್ಡಾಯ ಜಾಲಾ°.

ಜಾಲ್ಯಾರ ಹೆ° ಸಗಟ ಕಿತಲೆ ಪಾಲನ ಜಾತಾ ಆಸಾ ಮ್ಹಳೆಲೊ ಹೋಡ ಸವಾಲ ಜಾಲಾ. ರಾಜಕೀಯ ಪಾದಯಾತ್ರಾ ಚಾಲೂ ಆಸಾ, ಪಾದಯಾತ್ರೆಚೆ ವಿರುದ್ಧ ಪ್ರತಿಭಟನಾ ಯಾತ್ರಾ ಚಾಲೂ ಜಾಲ್ಯಾ. ಹೆ° ಸಗಟ ಸಮವೇ ? ಮ್ಹಣು ವಿಚಾರಲ್ಯಾರಿ ಇಂಗಿ ನ್ಯಾಯ ಉಲಯತಾತಿ. ರೈತ ಲೋಕಾನ ದೆಹಲಿ ಭಾಯರ ಎಕ ವರಸ ಪ್ರತಿಭಟನಾ ಕರನಿ ವೇ ? ಚುನಾವ ಆಶಿಲೆ ರಾಜ್ಯಾಂತು° ಚುನಾವ ರ‍್ಯಾಲಿ ಚಲನಿತಿ ವೆ ? ಮಂತ್ರಿಲೆ ಘರಾಕಡೆನ ಹೋಡ ಮಟ್ಟಾರ ವ್ಹಾರ್ಡಿಕ ಜಾಯನಿ ವೆ ? ಅಶೆ° ಸಾಂಗತಲ್ಯಾοಕ ಕಸಲೆ° ಸಾಂಗಚೆ° ? ತಾಕಾ ತಕೀತ ಎಕ ವೈಜ್ಞಾನಿಕ ವಿಷಯ ಭಾಯರ ಆಯಲಾ. ಹೆ° ವೈರಸ್ ವ್ಹಾರೆಂತು° ಪಾಂಚ ಮಿನಿಟಾಕಯೀ ಚಡ ವಾಂಚನಾ ಖಂಯ ! ಹೊ ಬರೊ ವಿಷಯ ಕೀ ನ್ಹಹಿ° ಮ್ಹಣು ಅನಭವಸುನುಚೀ ಪಳೊವಕಾ.

ಹಾಜೆ ಮಧೆ° ವಿಕೆಂಡ್ ಕರ್ಫ್ಯೂ ನಿಮಿತ ಹೋಟೆಲ°, ರೇಡಿಮೆಡ್ ಕಪಡೆ ದುಕಾನ, ವ್ಹಾಣೆ ಆಂಗಡಿಯೊ, ಕೇಟರಿಂಗ್, ಇವೆಂಟ್ ಮ್ಯಾನೇಜಮೆಂಟ್ ತಸಲೆ ಉದ್ಯಮಾಚೆ ಲೋಕ ಕಂಗಾಲ ಜಾಲ್ಯಾಂತಿ. ಪಯಲೆ° ಆನಿ ದುಸ್ರೆ ವೇವಾಚೆ ವೇಳಾರಿಚಿ ಪೆಟ್ಟು ಖಾವನು ಪರತೂನ ಜೀವು ಯೆತಾ ಮ್ಹಣತಾನಾ ತಿಸ್ರೆ ವೇವಾಚೆ ವಿಕೆಂಡ್ ಲಾಕಡೌನ್ ಶುರು ಜಾಲಾ°. ಫಕತ ದೋನ ಹಪ್ತ್ಯಾಂಚೆ ವಿಕೆಂಡ್ ಲಾಕಡೌನ್ ಮ್ಹಳೆಲೆ ಸರಕಾರಾನ ಮ್ಹಯನ್ಯಾ ಆಖೇರಿ ತಾಂಯ ವಿಕೆಂಡ್ ಲಾಕಡೌನ್ ಘೋಷಣ ಕೆಲಾ°. ಹ್ಯಾ ಪಾವಟಿ ರಾಜ್ಯ ಸರಕಾರಂಚಿ ನಿರ್ಧಾರ ಘೆತಾ ಆಸಾತಿ.

ಪಯಲೆ ದೋನ ವೇವಾಚೆ ವೇಳಾರಿಚಿ ಥೊಡೆ ವ್ಯಾರು ಕವಳನು ಗೆಲಾ. ತಿಸ್ರೆ° ವೇವ್ ಸಾಂಬಾಳನು ಘೆವಚೆ ಕಶಿ° ಮ್ಹಳೆಲೊ ಹೋಡ ಸವಾಲ ವ್ಯಾಪಾರಿ ಲೋಕಾ ಮುಕಾರ ಆಸಾ. ಹಾಕಾ ಲಾಗೂನ ಸ್ಥಳಿಯ ವ್ಯಾರೆಂಲಿಕ ಆನಲೈನ್ ಕಂಪನಿಚಾಲೊ ಸ್ಪರ್ಧೊ ಕಷ್ಟಾಚೊ ಜಾಲಾ. ಲಾಕಡೌನ್ ಆನೀ ಆನಲೈನ್ ಸಂಸ್ಥೆ ಮ್ಹಳೆಲೆ ದೋನ ಫಾತರಾ ಮಧೆ° ಚೆಂಚೂನ ಗೆಲೆಲೆ ಸ್ಥಳಿಯ ವ್ಯಾರೆಲಿ ಕಸಲೊ ಪರಿಹಾರ ಸೋದಿತಾತಿ ಮ್ಹಳೆಲೆ° ರಾಖೂನ ಪಳೊವಕಾ. ಸ್ಥಳಿಯ ವ್ಯಾರೆಲಿಯಾಲೆ ಯಶಾಂತೂಚಿ ಗಾಂವಚೆ ಯಶ ಆಸಾ.
ಸರಕಾರ ಖಾಂಯ ಪುಣಿ ಕರತವೆ ? ಕೀ ಸ್ಥಳಿಯ ವ್ಯಾರೆಲಿಯಾನಿ ಮೆಳನು ಖಾಂಯ ಪುಣಿ ವಕ್ಕದ ವಾಟೂಕಾ ಮ್ಹಣು ಕಳನಾ. ವಗೀಚ ಪರಿಹಾರ ಮೆಳತಲೊ ಮ್ಹಣು ವಿಶ್ವಾಸ ಕರೂಯಾ°.