ದಾವಣಗೆರೆ: ಹಾಂಗಾಚೆ ದೇವರಾಜು ಅರಸು ಬಡವಾಣೆಚೆ ದೈವಜ್ಞ ವಿದ್ಯಾ ಸಂಸ್ಥೆಚೆ ವಠಾರಾಂತು° ವಿಶ್ವ ಯೋಗ ದಿನಾಚರಣಾ ಜಾಲೆ°. ಶಾಳೆಚಿ ಮ್ಹಾಲ್ಗಡಿ ಶಿಕ್ಷಕಿ ಆಶಾ ಬಂಡಿಗೇರಿ ಹಾಂನಿ° ವಿದ್ಯಾರ್ಥಿಯಾಂಕ ಯೋಗಾಭ್ಯಾಸಾ ಕರೊನು ಯೋಗ ಕ್ರೀಯೆಚೊ ಮಹತ್ವ ಸಾಂಗಲೊ. ಸೂರ್ಯನಮಸ್ಕಾರ, ಪ್ರಾಣಾಯಾಮ ಆನಿ ವೆಗವೆಗಳೆ ಆಸನಾಚೆ ಪ್ರದರ್ಶನ ಜಾಲೆ°. ಹರ ಎಕ ಶನ್ವಾರಾ ಶಾಳೆಂತು° ಯೋಗ ಶಿಕ್ಷಣ ಜಾವಚೆ° ಆಸಾ ಮ್ಹಣು ಕಳಯಲೆ°.

ಬೇಕರಿ ವಸ್ತು ಆನಿ ಥಂಡ ಪೇಯ ಘೆನಾಶಿ° ಕಾರ್ಯದರ್ಶಿ ಯೋಗರಾಜ್ ಆರ್ ಅಣ್ವೇಕರ್ ಹಾಂನಿ° ವಿದ್ಯಾರ್ಥಿಯಾಂಕ ಸಲ್ಲಾ ದಿಲೆ°. ಮುಖ್ಯೋಪಾದ್ಯಾಯಿನಿ ಪದ್ಮಾವತಿ ವೆರ್ಣೇಕರ್ ಹಾಂನಿ° ಆಭಿನಂದನ ಪಾಟಯಲೆ°.

ಮಂಗಳೂರು: ದೈವಜ್ಞ ಬ್ರಾಹ್ಮಣ ಸಮಾಜಾಚೆ ತರನಾಟೆ ಲೋಕಾಲಿ ಸಾಧನಾ ಜಗಭರಿ ಸೊಶಿಯಲ್ ಮಿಡಿಯಾ ಮುಖಾಂತರ ಫಾಯಸ ಕರಚೆ ನದರೇನ "ಯೂಥ್ ಆಫ್ ದೈವಜ್ಞ" ಚಾನಲ್ ಶುರು ಕೆಲಾ° ಮ್ಹಣು ಚಾನೆಲಾಚೊ ಮುಖ್ಯ ಸಂಚಾಲಕ ಆನಿ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಸಾಂದೊ ಅರುಣ ಜಿ. ಶೇಟ್ ಹಾಂನಿ° ಸಾಂಗಲಾ°.

"ಯೂಥ್ ಆಫ್ ದೈವಜ್ಞ" ಚಾನಲ್ ಆನೀ ತಾಜೆ ಲೋಗೊಚೆ ಉಗ್ತಾವಣ ಮಂಗಳೂರಚೆ ಶ್ರೀ ಗಾಯತ್ರಿ ದೇವಿ ಸಿದ್ದಿ ವಿನಾಯಕ ದೇವಳಾಂತು° ಜ. 22ಕ ಚಲೆ°. ಚಾನೆಲಾಚೆ ಪ್ರಪ್ರಥಮ ವೀಡಿಯೊ "ಅಮೃತವನ" ಹಾಂತು° ಮಂಗಳೂರಚೊ 22 ವರಸಾಚೊ ತರನಾಟೊ ಮನೋಜ್ ಆರ್. ರೇವಣಕರ್ ಹಾಣೆ ಶುರು ಕೆಲೆಲೆ ದೇಸಿ ಗಾಯಚೆ ತಳಿಚೆ ಗೋಶಾಲಾ ಸ್ಟಾರ್ಟಪ್ ಬದಲ್ ವಿಸ್ತçತ ವರದಿ ಆಸಾ.

ಹ್ಯಾ ಸಂದರ್ಭಾರಿ ದೈವಜ್ಞ ಬ್ರಾಹ್ಮಣ ಸಂಘಾಚೊ ಅಧ್ಯಕ್ಷ ಸುಧಾಕರ ಶೇಟ್, ದೈವಜ್ಞ ಯುವಕ ಮಂಡಳಿಚೊ ಅಧ್ಯಕ್ಷ ಗಣೇಶ್ ಶೇಟ್ ಎಕ್ಕೂರು, ದೈವಜ್ಞ ಮಹಿಳಾ ಮಂಡಳಿಚಿ ಅಧ್ಯಕ್ಷಾ ಪುಷ್ಪ ಕೆ. ಶೇಟ್, ದೈವಜ್ಞ ಬ್ರಾಹ್ಮಣ ಚಿನ್ನ-ಬೆಳ್ಳಿ ಕೆಲಸಗಾರರ ಸಂಘಾಚೊ ಗೌರವ ಅಧ್ಯಕ್ಷ ಅರುಣ್ ಶೇಟ್ ಆನಿ ಅಧ್ಯಕ್ಷ ಶ್ರೀಪಾದ ಬಿ. ರಾಯ್ಕರ್, ದೈವಜ್ಞ ಸೌರಭ ಪತ್ರಿಕೆಚೊ ಪ್ರಕಾಶಕ ರಾಜೇಂದ್ರಕಾοತ ಶೇಟ್, ಮಂಜುನಾಥ ಶೇಟ್, ಕಾರ್ತಿಕ್ ಶೇಟ್, ಸಿ.ಎ ಕಿರಣ್ ಜಿ. ಶೇಟ್ ಉಪಸ್ಥಿತ ಆಶಿಲೆ. ಪಯಲೊ ವಿಡಿಯೊ ಕನ್ನಡ ಭಾಶೆನ ಆಸಲ್ಯಾರಯಿ ಮುಕಾವಯಲೆ ವಿಡಿಯೊ ಸರ್ವಯಿ ಕೊಂಕಣಿ ಭಾಶೆನ ಆಸತಾತಿ ಮ್ಹಣು ಅರುಣ್ ಶೇಟ್ ಹಾಂನಿ° ಕಳಯಲಾ°.