ಮಂಗಳೂರು: ವಿಶ್ವ ಕೊಂಕಣಿ ಕೇಂದ್ರ ಹಾಂನಿ° ವರಸಂಪ್ರತಿ ಪ್ರದಾನ ಕರಚೆ ಕೊಂಕಣಿ ಭಾಸ, ಸಾಹಿತ್ಯ ಆನಿ ಸಮಾಜ ಸೇವೆಕ ದಿವಚೆ ವಿಮಲಾ ವಿ. ಪೈ ವಿಶ್ವ ಕೊಂಕಣಿ ಪುರಸ್ಕಾರ ಪ್ರದಾನ ಸುವಾಳೊ ಆರತಾ° ಘಡಲೊ. ಮುಖೇಲ ಸೊಯರೆ ಜಾವನ ಆಯಿಲೆ ಮುಂಬಯಿಚೆ ನಾಮನೆಚೆ ಏಶಿಯನ್ ಇನ್ಸ್ಟಿಟ್ಯೂಟ್ ಆಫ ಆಂಕಾಲಜಿ ಚೆಯರ್ಮೆನ ಡಾ. ರಮಾಕಾಂತ ಕೃಷ್ಣಾಜಿ ದೇಶಪಾಂಡೆ, ಹಾನ್ನಿ ಕೊಂಕಣಿ ಸಾಧಕಾಂಕ ಪ್ರಶಸ್ತಿ ಪ್ರದಾನ ಕರನ ಕೊಂಕಣಿ ಭಾಷಿಕ ಜನ ಲ್ಹಾನ ಸಮುದಾಯಾಚೆ ಜಾವನ ಆಸಲಾರಯೀ ಸರ್ವ ಕ್ಷೇತ್ರಾಂತ ಉತ್ತಮ ಗೌರವಯುತ ಸ್ಥಾನ ಮಾನ ಪಾವಲ್ಯಾಂಚಿ. ಕೊಂಕಣಿ ಉಲಯಲೆ° ಸರ್ವ ಲೋಕಾಂನಿ ಸಾಂಗಾತಾ ಮೆಳನು ಹೀ ಭಾಸ ಆನಿಕಯ ವಾಡಚೆ ತಶಿ ಕರಕಾ ಮ್ಹಣು ಸಾಂಗಲೆ°.

ವಿಮಲಾ ವಿ. ಪೈ ವಿಶ್ವ ಕೊಂಕಣಿ ಪ್ರಶಸ್ತಿಚೆ ಪ್ರಾಯೋಜಕ ಮಣಿಪಾಲ ಗ್ಲೋಬಲ್ ಎಜುಕೇಶನ್ ಸಂಸ್ಥೆಚೊ ಅಧ್ಯಕ್ಷ ಟಿ. ವಿ. ಮೋಹನದಾಸ ಪೈ ಹಾನ್ನಿ ಪ್ರಶಸ್ತಿ ವಿಜೇತಾಂಕ ಶುಭಾಷಯ ಪಟಯಲೊ. ಕೊಂಕಣಿ ಭಾಸ ಆನಿ ಸಂಸ್ಕೃತಿಚೆ ಪ್ರತಿನಿಧಿ ಜಾವನ ಆಸಚೆ ಸಾಹಿತಿಂಕ, ಕಲಾಗಾರಾಂಕ ಆನಿ ವಾವರಾಡಿಂಕ ಸೊದುನು ಪ್ರೋತ್ಸಾಹ ದಿವಚೆ ವಾವರ ನಿರಂತರ ಜಾವಕಾ. ತಶೀಂಚಿ ಜಗಭರ ಆಸಚೆ ಕೊಂಕಣಿ ಭಾಷಿಕಾಂನಿ ಸಾಂಗಾತಾಕ ಮೇಳನು ಏಕ ಜಾಗತಿಕ ಸಮುದಾಯ ನಿರ್ಮಾಣ ಜಾವಚಾಕ ಕಾರ್ಯ ಪೃವೃತ್ತ ಜಾವಕಾ. ವಿಶ್ವ ಕೊಂಕಣಿ ಕೇಂದ್ರ ತರಪೇನ 10 ವರಸಾಂತ 20 ಹಜಾರ ಪಶಿ ಚಡ ವಿದ್ಯಾರ್ಥಿಯಾಂಕ ರೂ. 25 ಕೋಟಿ ಶಿಷ್ಯ ವೇತನ ವಿತರಣ ಜಾಲಾ°. ಕೊಂಕಣಿ ಸಮುದಾಯಾಚೆ 100 ಪಶಿ ಚಡ ವಿದ್ಯಾರ್ಥಿ ವಿದೇಶಾಂತ ಉಚ್ಛ ಶಿಕ್ಷಣ ಫಾವೊ ಕರತ ಆಸತಿ. ಹೆ° ಸಂಖೊ 5 ಹಜಾರಾಕ ಪಾವಕಾ ಮ್ಹಣು ತಾಂನಿಂ ಸಾಂಗಲೆ°. ವಿಶ್ವ ಕೊಂಕಣಿ ಕೇಂದ್ರ ಅಧ್ಯಕ್ಷ ಬಸ್ತಿ ವಾಮನ ಶೆಣೈ ಹಾನಿ° ಸ್ವಾಗತ ಕರನ ಪ್ರಾಸ್ತಾವಿಕ ಉತ್ರ ಉಲಯಿಲಿಂಚಿ. ಶ್ರೀಮತಿ ವಿಮಲಾ ವಿ. ಪೈ ವಿಶ್ವ ಕೊಂಕಣಿ ಜೀವನ ಸಿದ್ಧಿ ಪುರಸ್ಕಾರ-2019ಖ್ಯಾತ ಕೊಂಕಣಿ ಸಾಹಿತ್ಯಕಾರ, ಸಂಶೋಧಕ ಡಾ. ರೋಕಿ ವಿ. ಮಿರಾಂದಾ, ಮೈಸೂರು ಹಾಂಕಾ ಪ್ರದಾನ ಕೆಲೆ°.

ವಿಶ್ವ ಕೊಂಕಣಿ ಅತ್ಯುತ್ತಮ ಕೊಂಕಣಿ ಪುಸ್ತಕ ಪುರಸ್ಕಾರ - 2019 ಗೊಂಯಚೆ ಖ್ಯಾತ ಕೊಂಕಣಿ ಲೇಖಕ ಶ್ರೀ ದೇವಿದಾಸ ಕದಮ್ ಹಾಂಗೆಲೆ ಜಾಣವಯ ಕಾದಂಬರಿಕ ಪಾವಲೆ°. ವಿಶ್ವ ಕೊಂಕಣಿ ಅತ್ಯುತ್ತಮ ಕೊಂಕಣಿ ಕವಿತಾ ಕೃತಿ ಪುರಸ್ಕಾರ-2019 ಶಕುಂತಲಾ ಆರ್ ಕಿಣಿ ಹಾಂಗೆಲೆ ಥೋಡೇ ಏಕಾಂತ ಕವಿತಾ ಸಂಗ್ರಹಾಕ ಪಾವಲೆ°. ಬಸ್ತಿ ವಾಮನ ಶೆಣೈ ವಿಶ್ವ ಕೊಂಕಣಿ ಸಮಾಜ ಸೇವಾ ಪ್ರಶಸ್ತಿ - 2019 ಅಂತರಾಷ್ಟ್ರೀಯ ಸ್ಥರಾಚೊ ಯೋಗ ಸಾಧಕ ಮೈಸೂರಚೆ ಕೆ. ರಾಘವೇಂದ್ರ ಪೈ ಹಾಂಕಾ ಆನಿ ಕುಮಟಾಚೆ ಸಮಾಜ ಸೇವಾ ಕಾರ್ಯಕರ್ತಾ ಮೀರಾ ಶ್ರೀನಿವಾಸ ಶ್ಯಾನಭಾಗ ಹಾಂಕಾ ಪ್ರದಾನ ಕೆಲೆ°.

ದಶಮಾನೋತ್ಸವಾಚೆ ಸಂದರ್ಭಾರ ಘೋಷಣ ಜಾಲೆಲೆ ಶ್ರೀಮತಿ ವಿಮಲಾ ವಿ. ಪೈ ವಿಶ್ವ ಕೊಂಕಣಿ ವಿಶೇಷ ಪುರಸ್ಕಾರ ಗೊಂಯ ಸ್ವಾತಂತ್ರ್ಯ ಚಳುವಳ ಕಾಲಾ ತಾವನ ನಿರಂತರ ಜಾವನ ಕೊಂಕಣಿ ಆನಿ ಇಂಗ್ಲಿಷ್ ಪತ್ರಿಕಾಂತ ಲೇಖನ ಬರೊವನ ಪ್ರಸಿದ್ಧ ಜಾಲೆಲೆ ನಾಮನೆಚೆ ಸಾಹಿತಿ ಆನಿ ಅಂಕಣಕಾರ ಗೊಂಯಚೆ ಸುಹಾಸ ಯಶವಂತ ದಲಾಲ್ ಆನಿ ಮಂಗಳೂರಚೆ ಖ್ಯಾತ ಹಿಂದೂಸ್ಥಾನಿ ಶಾಸ್ತ್ರೀಯ ಸಂಗೀತ ಕಲಾವಿದಾ ವಸಂತಿ ಆರ್. ನಾಯಕ ಹಾಂಕಾ ಪ್ರದಾನ ಕೆಲೆ°. ಡಾ. ಆಸ್ಟಿನ್ ಡಿಸೋಜಾ ಪ್ರಭು ಚಿಕಾಗೊ ಆನಿ ಬೆಂಗಳೂರಚಿ ಸಬಿತಾ ಸತೀಶ ಪೈ ಮಾನಾಚೆ ಸೊಯ್ರೆ ಆಶಿಲೆ. ಸಿ.ಡಿ ಕಾಮತ, ವಿಶ್ವ ಕೊಂಕಣಿ ವಿದ್ಯಾರ್ಥಿ ವೇತನ ನಿಧಿ ಅಧ್ಯಕ್ಷ ರಾಮದಾಸ ಕಾಮತ್ ಯು, ಕಾರ್ಯದರ್ಶಿ ಪ್ರದೀಪ ಜಿ. ಪೈ, ವಿಶ್ವ ಕೊಂಕಣಿ ಕೇಂದ್ರ ಉಪಾಧ್ಯಕ್ಷ ಕುಡ್ಪಿ ಜಗದೀಶ ಶೆಣೈ, ಗಿಲ್ಬರ್ಟ್ ಡಿಸೋಜಾ, ವೆಂಕಟೇಶ ಎನ್. ಬಾಳಿಗಾ, ಕೋಶಾಧ್ಯಕ್ಷ ಬಿ. ಆರ್. ಭಟ್, ಕರ್ನಾಟಕ ರಾಜ್ಯ ಕುಡುಬಿ ಸಮಾಜ ಸೇವಾ ಸಂಘ ಉಪಾಧ್ಯಕ್ಷ ಪ್ರಭಾಕರ ನಾಯ್ಕ ಆನಿ ಅಖಿಲ ಭಾರತ ಕೊಂಕಣಿ ಖಾರ್ವಿ ಮಹಾಜನ ಸಭಾ ಸಮಾಜ ಸೇವಾ ಸಂಘ ಪ್ರಧಾನ ಕಾರ್ಯದರ್ಶಿ ಕೃಷ್ಣ ತಾಂಡೇಲ ಉಪಸ್ಥಿತ ಆಶಿಲಿಂಚಿ. ಸಾತಯೀ ಪ್ರಶಸ್ತಿಚೆ ಸಾಂಗತ ರೂ. 1.00 ಲಾಖ, ಮಾನಪತ್ರ, ಯಾದಸ್ತಿಕಾ ಆನಿ ಫಳ ದೀವನ ಸನ್ಮಾನ ಚಲೊ. ಸ್ಮೀತಾ ಶೆಣೈನ ಸೂತ್ರ ಸಂಚಾಲನ ಕೆಲೆ°. ಸ್ವರಶ್ರೀ ಕಲಾ ವೇದಿಕೆ ಟ್ರಸ್ಟ ಪಂಗಡಾಚೆ ವಿದ್ಯಾರ್ಥಿನಿ ಕೊಂಕಣಿ ಪ್ರಾರ್ಥನಾ ಗೀತ ಗಾಯಲೆ°. ವಿಶ್ವ ಕೊಂಕಣಿ ಕೇಂದ್ರ ಹಾಜೊ ಕಾರ್ಯದರ್ಶಿ ಬಿ. ಪ್ರಭಾಕರ ಪ್ರಭುನ ಆಭಾರ ಮಾನಲೊ.

ಮಂಗಳೂರು: ಕೊಂಕಣಿ ಸಾಂಸ್ಕೃತಿಕ ಸಂಘ ಮಂಗಳೂರು ಹಾಂಗೆಲೆ° ವರಸಾವಧಿ ಧಾರ್ಮಿಕ ಪ್ರವಾಸ ಆರತಾ° ಜ. 12ಕ ಚಲೊ. ಸಕಾಳಿಂ 6.30ಕ ಮಂಗಳೂರು ರಥಬೀದಿಚೆ ವೆಂಕಟರಮಣ ದೇವಳಾಚೆ ಮುಕಾರ ಸಾಂಗತ ಮೆಳೆಲೆ ಸಾಂಸ್ಕೃತಿಕ ಸಂಘಾನ ಆಯೋಜನ ಕೆಲೆಲೆ ಬಸ್ಸಾರಿ ಸಂಘಾಚೆ 60 ಸಾಂದೆನ ಪ್ರವಾಸ ಶುರು ಕೆಲೊ. ಪ್ರವಾಸ ನಿರ್ವಿಘ್ನ ಜಾವಚೆ ಖಾತಿರ ಅಧ್ಯಕ್ಷ ಸಂತೋಷ ಶೆಣೈ ಮಾಮಾನ ದೇವಾಲಾಗಿ ಪ್ರಾರ್ಥನ ಕರನು ಬಸ್ಸಾಕ ನಾರಲ ಉವಾಳನು ಫೊಡಚೆ° ಕೆಲೆ°.

ಬಸ್ಸಾರ ಚಡಚೆಂ ಪಯಲೆ° ಸಗಟಾಂಕ ಹೂನೀ ಕಾಫಿ ಆನೀ ಬಿಸ್ಕೆಟ್ ವಾಂಟೂನ ದೇವಾಕ ಜಯಕಾರ ಘಾಲನು ಪ್ರವಾಸ ಶುರು ಜಾಲೊ. ಮುಕ್ಕಾಲ ಗಂಟ್ಯಾನ ಕಟಪಾಡಿ ಕಾಮತ ಹೋಟೆಲಾಕ ಪಾವತಾನಾ ಥಂಯ° ಹೂನಿ ಇಡ್ಲಿ, ವಡಾ ಆನೀ ಬನ್ಸ ರಾಖತಾ ಆಶಿಲೆ°. ಪೋಟ ಗಟ್ಟ ಕೆಲೆಲೆ ಸಗಟಾನ ಬಸ್ಸಾರಿ ಅಂತ್ಯಾಕ್ಷರಿ, ಕಾರ್-ಬಸ್ ಆನೀ ಹೇರ ಖೇಳ ಖೇಳಚೆ° ಕೆಲೆ°. ವಯಾನ ಮ್ಹಾಲ್ಗಡೊ ಆನೀ ಮನಾನ ತರನಾಟೊ ಸುರೇಶ್ ಭಟ್ ಮಾಮ ಹಾಂನಿ° ಹಾಜೆ° ಮುಖೇಲಪಣ ಘೆತಿಲೆ°. ಸುರೇಶ ಭಟ್ ಆನೀ ಗಜಾನನ ಶೆಣೈ (ಗಜ್ಜು) ಮಾಮು ಹಾಂಗೆಲೆ° ವರ್ಣನಾತೀತ ನೃತ್ಯ ಪಳೊವನು ಸಗಟ ಸಂತೋಸ ಭೊಗಲೆ. ಚಲಚೆ ಬಸ್ಸಾರ ನಾಂಚಿ ಹಾಂಗೆಲಿ ಪ್ರತಿಭಾ ಪಳಯಿಲೆ ತಿತಲೆ ಸುಲಭ ನಾ. ಥಂಯ ದಾಕೂನ ಪ್ರವಾಸ ಐತಿಹಾಸಿಕ ಜಾಗೊ ಬಾರ್ಕೂರಾಕ ಪಾವಲೊ. ಕೋಟೆ ಅರಮನೆ ಸೋದೂನ ಗೆಲೆಲೆ ಆಮಕಾ ವಿಶಾಲ ಮೈದಾನಾರಿ ಶಿಂಪೂಡನ ಪಳೆಲೆ ಥೊಡೆ ಶಿಲೆ ಫಾತೋರ ಆನೀ ಎಕ ಸಾನ ತಳೆ° ಪಳೋವಚಾಕ ಮೆಳೆ°. ಚಡಾವತ ಸಾಟಿ ವರಸಾಕಯೀ ಚಡ ವಯಾಚೆ ಪ್ರವಾಸಾಕ ಆಯಿಲ್ಯಾನ ಪಳೋವಚಾಕ ಖಾಂಯ ಮೇಳನಿ ಮ್ಹಣು ಥೊಡೆ ಲೋಕಾಂಕ ನಿರಾಶಾ ಜಾಲಿ ಮ್ಹಣಯೆತ. ಉಪರಾಂತ ಆಮೀ ಥಂಯ ಲಾಗಿಚೆ 12ವೆ° ಶತಮಾನಾಚೆ ಬಸದಿಕ ಪಾವಲಿಂತಿ.

ಫುಟ ವಾತಾಶರಣಾಂತು° ಪುರಾತತ್ವ ಇಲಾಖೆನ ರಾಕೂನ ಹಾಡಲೆಲೆ ಹ್ಯಾ ಬಸದಿ ಲಾಗಿ ಆಮೀ ಖೂಬ ತಸ್ವೀರ° ಕಾಡಚೆ° ಕೆಲೆ°. ಮೊಬೈಲ್ ಸೇಲ್ಫಿ ನಂತಾ° ಪ್ರವಾಸಾರಿ ಸಾಂಗತ ಆಯಿಲೊ ನಾವಾದೀಕ ಫೋಟೊಗ್ರಾಫರ್ ಕೃಪ್ಣ ನಾಯಕ ಹಾನಿ° ಆಮಗೆಲೆ ತಸ್ವೀರ° ತಾಂಗೆಲೆ ಕ್ಯಾಮರಾಂತು° ದೇವಯಲಿ°. ಎಕ ಪುರಾತನ ಆನೀ ಐತಿಹಾಸಿಕ ಇಮಾರತ ಪಳಯಿಲೊ ಸಂತೋಸ ಮನಾಂತ ಘೆವನು ಪ್ರವಾಸ ಮುಕಾರ ಚಲೋ. ಸಾಬಾರ ಎಕ ಗಂಟೊ ಪ್ರಯಾಣ ಕರನು ಆಮೀ ಕಮಲಶಿಲೆಚೆ ಬ್ರಾಹ್ಮಿ ಶ್ರೀದುರ್ಗಾಪರಮೇಶ್ವರಿ ದೇವಳಾಕ ಆಮೀ ಪಾವಲಿಂತಿ. ಥಂಯ ಅಧ್ಯಕ್ಷಾಲೆ ಮುಖೆಲಪಣಾರಿ ಸರ್ವ ಸೇವಾ ಕರನು ಸಗಟಾಂಕ ಪ್ರಸಾದ ವಾಂಟಚೆ° ಜಾಲೆ°. ದೇವಳಾಂತು ಆಮಕಾ ಜೇವಣಾಚಿ ವ್ಯವಸ್ಥಾ ಆಶಿಲಿ.

ಥಂಯಚೆ° ಜೇವಣಾಚಿ ಖೂಬ ಖಬರ ಆಯಕಲೆಲೆ ಆಮಕಾ ತಾಜೊ ಪ್ರತ್ಯಕ್ಷ ಅನುಭವ ಜಾಲೊ. ಚಡಾವತ ಲೋಕಾಂಕ ವ್ಹಾರ್ಡಿಕೆ ಜೇವಣಾಚೊ ಉಡಗಾಸ ಜಾಲೊ ಮ್ಹಳ್ಯಾರ ಚೂಕಿ ಜಾವಚೆ ನಾ. ದೋನ ನಮೂನ್ಯಾಚೆ° ಗೊಡಶೆ° ಆಶಿಲೆ°. ಜೇವಣ ಜಾತರಿ ಆಮೀ ಥಂಯ ದಾಕೂನ ದೇವಳಾಚೆ ಮೂಲ ಸ್ಥಾನ ಪಳೊವಚಾಕ ಗೆಲಿಂತಿ. ರಾನಾ ಮಧೆ° ಸಾಬಾರ 100 ಮೀಟರ ಫಾತರಾ ವಾಟ ವ್ಹಾಣ ಕಾಡೂನ ಚಮಕೂನ ವಚಕಾ. ಥಂಯ ಗುಹೆಂತು° ಶಿವಲಿಂಗ ಆನೀ ಗಣಪತಿಲಿ ಮೂರ್ತಿ ಆಸಾ ಮ್ಹಣು ಪಳಯಿಲೆ ಸಾಂಗತಾತಿ.

ಫಾತರಾರ ಚಮಕೂಕಾ ಮ್ಹಣು ಥೊಡೆ ಲೋಕ ಥಂಯ ವಚನಿತಿ. ಆನೀ ಥೊಡೆ ಲೋಕ ಗುಹೆಂತು° ಕಾಳೊಕ ಪಳೊವನು ಅರ್ಧಾರ ಮಾಕ್ಷಿ ಆಯಲೆ. ಥಂಯ ದಾಕೂನ ಆಮೀ ಕುಂದಾಪುರ ಕೋಡಿಚೆ ಸಮುದ್ರ ತಡಿಕ ಯೇವನು ಪಾವಲಿಂತಿ. ಥಂಯ ಉದಕಾಂತು° ಖೇಳಚೆ° ಆನೀ ಹೇರ ಖೇಳ ಖೇಳನು ಆಮೀ ಕೋಟಾ ಲತಾ ಹೋಟೇಲಾಕ ಪಾವಲಿಂತಿ. ಥಂಯ ಹೂನ ಹೂನ ಚಣಾ ಬತೂರಾ ಖಾವನು ರಾತಿ 10 ಗಂಟ್ಯಾಕ ಆಮೀ ಮಂಗಳೂರ ರಥಬೀದಿಕ ಯೇವನು ಪಾವಲಿಂತಿ. ಪರತೂನ ಯೇವಚೆ ವಾಟೇರಿ ಬಸ್ಸಾರಿ ಖೂಬ ಲೋಕಾನ ಡಿ.ಜೆ ಮ್ಯೂಸಿಕಾಕ ನಾಂಚೆ° ಕೆಲೆ°.
- ವಿಭಾ ಬಾಳಿಗ

ಮಂಗಳೂರು; ಯಂಗ್ ಚಿತ್ರಾಪುರ ಸಾರಸ್ವತ ಅಸೋಸಿಯೇಶನ್ ಮಂಗಳೂರು ಹಾಂನಿ° ಆರತಾ° ದೀಪಾವಳಿ ಉತ್ಸವ ಆಚರಣ ಕೆಲೊ. ನಾವಾದಿಕ ಚಿತ್ರ ನಟು ಅನಂತನಾಗ ಆನೀ ತಾಗೆಲಿ ಬಾಯಲ ಚಿತ್ರ ನಟಿ ಗಾಯತ್ರಿ ಮುಖೇಲ ಸೊಯ್ರೆ ಆಶಿಲೆ. ಹ್ಯಾ ಸಮಾರಂಭಾಂತು° ಅನಂತನಾಗ ಹಾಂಕಾ° ಸಾರಸ್ವತ ರತ್ನ ಮ್ಹಣು ಬಿರುದು ದೀವನು ಸನ್ಮಾನ ಚಲೊ. ರಾಮದಾಸ ಗುಲ್ವಾಡಿ ಆನೀ ಸುಜಾತ ಗುಲ್ವಾಡಿ ಹಾಂನಿ° ಸನ್ಮಾನ ಚಲಾವನು ದಿಲೊ. ಅನಂತನಾಗ ಆನೀ ಗಾಯತ್ರಿ ಹಾಂಗೆಲೆ° ಸಾಂಗಾತ ಸಂವಾದ ಚಲೊ. ಖೂಬ ವಿಷಯಾರಿ ಜಮಿಲೆ ಲೋಕಾನಿ ಸವಾಲ ಗಾಲೆಂತಿ. ದೀಪಕ ಗುಲ್ವಾಡಿ ಹಾಂನಿ° ಸಂವಾದ ಸಾಂಬಾಳನು ಹಾಡಲೊ.

ಹ್ಯಾಚ ವೇಳಾರ ಅನಂತನಾಗ ಹಾಂನಿ° ದೋನ ಪದ° ಗಾಯಲೆ°. ತಾಂನಿ° ದೋನ ಚಲನಚಿತ್ರಾಂತು° ನಾರದಾಲೆ ಪಾತ್ರ ಕೆಲೆಲೆ ಉಗಡಾಸಾಕ ಎಂತಾ ಲೋಕವಯ್ಯ ಆನೀ ಬಾಗ್ಯಾದ ಲಕ್ಷ್ಮೀ ಬಾರಮ್ಮ ಪದ° ತಾಂನಿ° ಗಾಯಲೆ°. ಅಧ್ಯಕ್ಷ ಅಶ್ವಿನ್ ರಾವ್ ಚೆರ್ಕಳ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ಕಾರ್ಯದರ್ಶಿ ಅಮಿತ ನಾಗರಮಠ ಹಾಂನಿ° ಆಭಾರ ಮಾನಲೊ. ದೀಪಾಲಿ ಕಂಬದಕೋಣೆ ಆನೀ ದೀಪಕ ಗುಲ್ವಾಡಿ ಹಾಂನಿ° ಸೂತ್ರ ಸಂಚಾಲನ ಕೆಲೆ°. ಭರತ ನಾಗರಮಠ ಹಾಂನಿ° ಪ್ರಾರ್ಥನಾ ಸಾಂಗಲಿ. ಉಪಾಧ್ಯಕ್ಷ ಅಸ್ಮಿತಾ ಕಂಡ್ಲೂರ್, ಗಣೇಶ ದಾಂಬ್ಲೆ, ಖಜಾನದಾರ ಸಂತೋಷ ಬಂಟ್ವಾಳ, ಸಹ ಕಾರ್ಯದರ್ಶಿ ಕೇದಾರ ನಾಗರಮಠ ಆನೀ ಶೈಲೇಶ ತಗರೆ ವೇದಿಕೆರಿ ಉಪಸ್ಥಿತ ಆಶಿಲೆ. ಜಯಾ ಪ್ರಬಾಕರ ಕಾಮತ, ನಿರಂಜನ ರಾವ, ಎಂ.ಆರ್ ಕಾಮತ, ವಿದ್ಯಾ ವೆಂಕಟೇಶ ಬಾಳಿಗಾ ಆನೀ ಹೇರ ಉಪಸ್ಥಿತ ಆಶಿಲೆ. ಸಭಾ ಕಾರ್ಯಕ್ರಮಾಚೆ ಉಪ್ರಾಂತ ಸಾಬಾರ ಸಾಂಸ್ಕೃತಿಕ ಕಾರ್ಯಕ್ರಮಾಚೆ ಪ್ರದರ್ಶನ ಜಾಲೆ°.

ಮಂಗಳೂರು: ನಾಟಕಕಾರ ನಟು, ನಿರ್ದೇಶಕ, ಕೊಂಕಣೀ ವಾವ್ರಾಡಿ, ಸಂಘಟಕು ಕಾಸರಗೋಡು ಚಿನ್ನ ಹಾಂಗೆಲೆ ರಚನಾ ತ್ರಿಭಾಷಾ ರಂಗ ನಾಟಕಗಳು ಮ್ಹಳೆಲೆ ಕೃತಿ ಹಾಜೆಂ ಉಗ್ತಾವಣ ಆರತಾ° ಹಾಂಗಾಚೆ ರೋಟರಿ ಕ್ಲಬ ಉತ್ತರ, ರಂಗ ಸಂಗಾತಿ ಸಾಂಸ್ಕೃತಿಕ ಪ್ರತಿಷ್ಠಾನ, ಬಿಂಬ ಮಂಗಳೂರ ಆನೀ ರಂಗಕಿರಣ ಹಾಂಗೆಲೆ ಜೋಡ ಆಶ್ರಯಾರಿ ಘಡಲೆ.

ಹ್ಯಾ ಸುವಾಳ್ಯಾಚೆ ಮುಖೇಲ ಸೊಯ್ರೆ ಜಾವನು ಶಾಸಕ ಪ್ರತಾಪಸಿಂಹ ನಾಯಕ, ಪರ್ತಕರ್ತ ಮನೋಹರ ಪ್ರಸಾದ, ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿಚೊ ಅಧ್ಯಕ್ಷ ದಯಾನಂದ ಕತ್ತಲಸಾರ್, ರಂಗಕಮರ್ ಶಶಿರಾಜ್ ಕಾವೂರು, ರೊ. ವಿಶ್ವನಾಥ ಶೆಟ್ಟಿ ಆನೀ ರಂಗ ಕಿರಣಾಚೊ ಅಧ್ಯಕ್ಷ ವಿಠಲ ಕುಡ್ವ ಉಪಸ್ಥಿತ ಆಶಿಲೆ. ತ್ರಿಭಾಷಾ ರಂಗ ನಾಟಕಗಳು ಕೃತಿ ಕನ್ನಡ ಕೊಂಕಣಿ, ತುಳು ಶಿಕಚೆ ಉಮೇದಿ ಆಶಿಲ್ಯಾಂಕ ಉಪಯುಕ್ತ ಕೃತಿ. ಏಕಚ ಕೃತಿಂತು° ತೀನಯಿ ಭಾಷೆನ ನಾಟಕ ಪ್ರಕಟಕ ರಚೆಂ ಹೆಂ ಪಯಲೆ ಪಾವಟಿ ಜಾಲಾ° ಮ್ಹಣು ಕಾಸರಗೋಡು ಚಿನ್ನಾ ಹಾಂನಿಂ ಕಳಯಲೆ°