ಮಿಗೆಲೆ ಜೀವನಾರಿ ದೆವಾನ ಕಂಚೇ ವಿಷಯಾಂತು ಊಣೆ ಕರನಿ. ಗುಣೀ ಬಮ್ಮುಣು, ಚಾಂಗಮಾಯಿ ಸಂಗಿಲ್‌ವರೀ ಐಕುಚೆ ಪೂತು, ಮಸ್ತ ಮೋಗು ಕರಚೆ ಮಿಗೆಲೆ ಅಮ್ಮ, ಅಕ್ಕ, ಭಾಮ, ಸಂಬAಧಿಕ, ಫ್ರೆಂಡ್ಸ್ ಸ್ವಂತ ಘರ, ಘರಾ ಕಾಮಾಕ ಮೊಣು ಕಾಮಾಚಿ ಅಶಿ ಮಸತ ಆರಾಮ ಅನಿ ಖುಷೇರಿ ಅಸ. ಸಂತೃಪ್ತ ಜೀವನ ಮಿಗೆಲೆ. ಹೆಜೆ ಪಶಿ ಚಡಿ ಎಕಲೇಕ ಕಸ ಜಾಯಿ ? ಖರೇ ನಂವೆ ?

ಜಲ್ಯಾರ್ ಏಕ ಆಶಿ ಕೆದ್ನಾಕೈ ಪೂರ್ಣ ಜಾಯ್ನ ಮೊಣು ಗೊತ್ತಸ್ಲೆರೈ ವಿಚಾರಾ ಆಶಾ ಮಿಗೆಲ್ ಮನಾ ದುಕುನ್ ವಚಸ. ತೇಚಿ ಗವರ್ಮೆಂಟ್ ನೌಕರುಚ ಆಶಾ. ಅತ ಹಾಂವ ಪಂದರ ವರಸಾ ತುಕುನ್ ಏಕ ಖಾಸಗಿ ಶಾಳೆಂತು ರಾಮ ಕರತಸ.

ಹಂಗ ಅಮಕ ಪೂರಾ ಸವಲತು ಅಸೀ ಲಾಯೇಕ ಸಂಬೊಳು ಅತ್ಯುತ್ತಮ ಶಿಕ್ಷಣ ಸಂಸ್ತಾ, ಪ್ರೋತ್ಸಾಹ ದಿವುಚೆ ಶಾಲಾ ಪ್ರಾಂಶುಪಾಳು, ಶಿಕ್ಷಕವರ್ಗ... ಪೂರಾ ಅಸಲೆರೈ ಕೆಲವು ಪಟಿ ಸರಕಾರೀ ನೌಕರಿ ಮಕ ಮೇಳನಿಮೂ ಮೊಣು ಭಾರೀ ಬೆಜಾರು ಜವಚೆಅಸ.

ಅಟರಾ ವರಸ ಪೂಡೆ ಹಾಂವ ಟೀರ‍್ಸ್ ಟ್ರೇನಿಂಗ್ ಕರಲಿಲೆ. ಕೊಡಯಾಲಾಚ ಪ್ರತಿಷ್ಠಿತ ಶಿಕ್ಷಣ ಸಂಸ್ಥಾರಿ. ತೆದನಾ ಹಾಂವ ಖೂಬ ಬದಂತಿ ಅಶಿಲಿ. ಸಂಗೀತ, ನೃತ್ಯ, ಶಿಕ್ಷಣ, ಯೋಗ... ಅಶಿಂ ಪೂರಾ ಕ್ಷೇತ್ರಾಂತು ಬುದಂತಿ ಅಶಿಲಿ. ಶಿಕ್ಷಣಾರಿ ಸಮೇತ ಲಾಯೇಕ ಅಂಕ ಎತಾಲೆ. ಪೂರಾ ಟೀಚರ್ ಮಾಸ್ತರಾಲೆ ಫೇವರಿಟ್ ಅಶಿಲಿ. ಬರೇ ಅಂಕ ಮೆಳತಾರೆ ಶಿಕಚೆರ್ ಬುದ್ಧಂತ್ ಮಣು ಮಂಡ್ಯಾಚ ಮಳವಳ್ಳಿ ಮಳಿಲ್ ಕಡೆ ಕ್ಯಾಂಪಾಕ ಪೆಟೋವನು ಅಶಿಲೆ.

ಜಲೇರ್ ಹೇ ದೋನ ವರಸ ತಿತಲೆ ಸುಲಭ ನಾಶಿಲೆ. ಶಿಕತನಾ ಹಾಂವ ಕೊಡಿಯಾಲಾ ತುಕುನು ಒಪಾಸ್ ಘರಾ ಎವಚೆಕ್ ತ್ರಾಸ ಜತಾ ಮ್ಹಣು ತೈಚೆ ಹಾಸ್ಟೆಲಾರ್ ರಬು ಲಗಲಿ. ಮಗೆಲೆ ದೋನ ವರಸ ಜಲೆ ಕೂಡಲೆ ಧವನಚೆ ಆಲೋಚನ ಅಶಿಲೆ.

ಹಾಂವ ಮಗೆಲೆ ಶಿಕುನು ಜಲೆ ಕೂಡಲೇ ಜೀವನ ಮುಕಾರಿ ಆರಾಮ. ಆರಾಮೆರೆ ಸರಕಾರೀ ಶಾಳೆಂತು ಕಾಮ ಕೊರಚೆ ಮೊಣು ಸಪನ ಘೇವುನು ಅಶಿಲಿ.

ಪ್ರತೀ ಮಯಿನೋ ಮಗೆಲೆ ಅಮ್ಮಾ ಪವ್‌ನ್‌ಶೆ ಹಾಸ್ಟೆಲಾ ಕತಿರ. ಪೆಟೆಯಿತ ಅಶಿಲಿ. ಹಾಸ್ಟೆಲಾಚೆ ಜೀವನ ಖೂಬ ಕಠಿಣ ಅಶಿಲೆ. ಘರಾಂತು ಆರಾಮೆರಿ ಸಾಡಿಸಾತ್ ಘಂಟೆಲಗಿ ಉಟೊವಚೆ ಹಾವ, ಮಗೆಲೆ ಜೀವನ ಕ್ರಮ ಹಂಗ ಪೂರ್ಣ ಬದಲ ಕೋರಕಾ ಪಳೆ. ಸಕಾಣಿ ಪಾಂಚ ಘಂಟೆ ಉಟೊವಚೆ, ಹಾಸ್ಟೆಲಾಚೆ ಹಾಲ ನಾಣಿ ಜಡಚೆ, ನಿದ್ದಾ ದೊಳೇರಿ ಚಪಾತಿ ಕೊರಚೆ. ಹೇಯ ಪೂರಾ ಸಕಾಣಿಚೆ ಅಮಗೆಲೆ ಕಾಮ ಅಶಿಲೆ. ಹಂಗಕಾಮ ಕೊರನೂಚಿ ಹಾಂವ ಥೊಡೆ ಕಾಮಾರ ಬುದಂತಿ ಜಲೆಲಿ ಮೊಣು ಸಂಗುಯೇತ. ಜಲ್ಯಾರ್ ಸಕಾಣಿ ತೇ ಗೋಡನೀದ ಸೋಣು ಉಟಾವುಚೆಕ ಖೂಬ ಕಷ್ಟ ಜತಾಲೆ. ಜಲೇರ ಸಮೇತ ಹಾಂವ ಹೇಯ ಪೂರಾ ಕೆಲೆ. ಮಗೆಲೆ ಕತಿರ ನಯಿ. ಮಗೆಲೆ ಅಮ್ಮಾ ಕತಿರ – ತಿಕ ಖೂಷಿ ದಿವುಕ ಮ್ಹಣು ಮುಕಾರ ಕಾಮ ಮೇಳಕ ಮೊಣು.

ಖಂಡಿತ ಹೇಯ ದೀಸು ಖೂಬ ಖುಷಿಚೆ ನಾಶಿಲೆ. ಹಾಸಟೆಲಾರಿ ಶಿಸ್ತು ಬದ ಜೀವನೂ, ಚಾಡ ಹಸುವುನು ಉಲೊಚೆ ನಾ, ದೋಸ್ತಿ ಒಟು ಅಮಗೆಲೆ ಕಷ್ಟ ಸುಖ ಆರಾಮೆರ್ ಸಂಗುನ್ ಘೆವುನು ಬಯಿಸುಚೆ ನಾ, ತೊಂಡಾ ರೂಚಿ ನಾತಿಲ್ ರಂದಪ, ಉಪಕರಿ ಖಾವುಕ ಪಡ್‌ತಲೆ, ಅಮಕಾ ಮೊಣು ಅಯಿಲೆ ಪತ್ರ ಕೂಡಲೆ ಅಮಗೆಲೆ ಹಾತಾ ಪಾವುನಾಶಿಲೆ. ಹಾಸ್ಟೆಲ್ ವಾರಡನಾಲೆ ಖೂಬ ಡಾಂಟ್ ಖಾವುಕ ಪಡತಲೆ.... ಅಶಿ ಹಾಸ್ಟೆಲಾರ್ ಖೂಬ ತ್ರಾಸ ಪಾವುನು ಅಸುಕ ಪಡತಲೆ. ಅಶಿ ಅಮಗೆಲೆ ಶಿಕ್ಷಣ ಸಂಸ್ಥೆರ್ ಬಿ, ಅಜೀರ್ಣ ಜವಚೆ ತಿತಲೆ ಶಿಸ್ತು ನಿಯಮ ಕಾನೂನು ಅಶಿಲೆ. ಮತ್ಯಾಕ ಭರ ತೆಲ ಘಾಲುನು ಫಂತಿ ಘಾಲುನು, ಪಂಗೂರುನು ಮಂತ್ಹಾರಿ ಮ್ಹಣಕೆ ಸಾರಿ ನೆಸುಕ ಪಡತಲೆ. ಸಗಳೋ ದೀಸಾರ ಪಾಠು, ಖೇಳು ಮಳೆಲೆ ನಾಶಿಲೆ. ಅಮಗೆಲೆ ಅಠರಾ ವರಸಾರಿ ಅಮಿ ಪೂರಾ ಅಯಿಂಶಿ ವರಸಾ ಮಂತಾರಿ ಮ್ಹಣಕೆ ಅಸೂಕಾಶಿಲೆ. ಅಮಗೆಲೆ ಯೌವನ ಕಾಲಾಂತು ಅಮ್ಹಿ ಪೂರಾ ಶಿಸ್ತು ಮಣು ಜೀವನ ಸಂಧ್ಯಾ ಕಾಲಾರಿ ಅಶಿಲೆ ಮ್ಹಣಕೆ ಭಾಸ ಜತಾಶಿಲೆ. ತೇಯ ಹೋಡ ಹೋಡ ಚೀಲ ಘೆವುನು ಪೂರಾ ಶಾಳೆಂಕ ಬಸಾರ ಭವಂಚೆ ಅಮಿ ಕಶಿ ಪುಣೇ ಶಿಕ್ಷಕ ತರಬೇತಿ ಪೂರ್ಣಕೆಲೆ. ಏಕ ದೀಸು ಅಮಕ ಆರಾಮಾ ನೀದ ನಾಶಿಲೆ. ಭೂಕ ಜಲೇರ ಬಿ ಭಾಯರ್ ದುಕುನು ಕಾಂಯಿತರಿ ಖವುಂಕ ಹಡುನಾಶಿಲೆ. ಕಶೀ ಪ್ಹುಣಿ ದೋನ್ ವರಸ ತರಬೇತಿ ಘೆವುನ್ ಗಾಂವಾ ಅಯಿಲಿ. ಹಾಂವ್ ಗಾಂವಾ ಎತನ ಸಂಪೂರ್ಣ ಬದಲ ಜಲೆಲಿ. ದೋನಿ ವರಸಾ ಪೂಡೆ ಅನಿ ಅತ ಪಳಯತನ ಖೂಬ ಫರಕ ಅಶಿಲೆ. ಪೂರಾ ವಿಚಾರಾಂತು !

ಗಾಂವಾ ಐಲೆಲೀಚಿ ಹಾವ್ ಏಕ ಸರಕಾರಿ ಶಾಳೆಕ ಗೌರವ ಶಿಕ್ಷಕ ಜಾವುನು ಸೆರವರಿ. ಕಾಯಿ ಪಗಾರ್ ದೀನಾಶಿಲೆ. ಜಲ್ಯಾರ್ ಚರಡುವಾ ಒಟ್ಟು ಅಸಚೆಕ್ ಶಿಕೋಂಕ್ ಖುಷೀ ದಿಸತಾಲೆ. ಹೇ ಜಾವುನು ದೋನಿ ಮಹಿನೋ ಶೆಕೆಕಾಲ ರಜ ಆರಂಭ ಜಲೆ. ಮಗಿರಿ ಹಾವ ಎಕ ನವೇ ಶಾಳೆಕ ಟೀಚರ್ ಜಾವುನು ಸೆರವರಿ. ಥೈಮಕ ಶಾಳೆಚೆ ಪಾಠ ಸೊಣು ಜೀವನ ಪಾಠ ಸಮೇತ ಕೆಲವು ಶಿಕುಚೆಕ ಮೆಳೆ. ತಜೆ ಮಧಿಯೇರ್ ಸರಕಾರೀ ಕಾಮಾಕ ಸರಕಾರ ತುಕುನು ಬುಲಾವ ಅಯಿಲೆ. ಹಾಂವ್ ‘ಬಾಗಲಕೋಟೆ ಜಿಲಾ ವಸುನು ಪರೀಕ್ಷಾ ಬೊರೊವಯಾ’ ಮ್ಹಣು ಮಗೆಲೆ ದೋಸ್ತಿ ಒಟು ಥಯಿ ಚಮಕಲಿ. ವಚೆ ಪೂಡೆ ‘ಫಾರಂ’ ಮಿಗೆಲೆ ಫೇವರೀಟ್ ಟೀಚರಾಲಗಿ ಭರ್ತಿ ಕೋರನು, ಪರೀಕ್ಷಾಕಕ ಸಿಇಟಿ ಪುಸ್ತಕ ಎಕಲಿಲೆ ದುಡ್ಡು ದೀವುನು ಘೆವುನು ಸಾಧಾರಣ ತಯಾರಿ ಕೋರನು ಚಯಕಲಿ.

ತೇ ಗಾಂವಾ ವಸೂನ್ ಜತರಿ, ಏಕ ಹೊಟೇಲಾ ಘೆಲಿ. ರೋಟಿ, ಪನಾ ಉಪಕರಿ, ಜುಣುಕಾಪುಡಿ, ಎಣ್ಣೆಗಾಯಿ. ಅಸಲ್ ಆಹಾರ ಅಶಿಲೆ. ತೇ ಪೊಳೊವನು ಹಾವ ಅನಿ ಅಸಲೇ ಖಾಣ ಖಾವು ಕಾಮೂ ಮೊಣು ಲೆಕಲೆ. ಮಳೇರಿ ಮಗೆಲೆ ಮನಾಂತು ‘ಮಕ ಹೇ ಕಾಮ ಖಂಡಿತ ಮೆಳಕಾ’ ಮ್ಹಣು ಅಶಿಲೆ. ಮಗೆಲೆ ಸಂಗಾತ್ ಅಯಿಲೆ ಪಾಂಚ ದೋಸ್ತಿ ಜೀವು ಸೋಣು ಮಧ್ಯರಾತ್ರಿ, ಸಕಾಣಿ ಸುರುವೇಕ ಉಟಾವುನು ವಜಿತಶಿಲೆ. ಅಂತೂ ಇಂತೂ ಪರೀಕ್ಷಾ ಬರೋವಚೆ ದೀಸು ಅಯಿಲೆ. ಹಾವ ಬದಾ ಮೊಣುಕ ಜಲ್ಯಾರ್ ಖೂಬ ಮ್ಹಣು ವಜಿಲೆನಾ. ಅತಿ ನಂಬಿಕಾರಿ. ಪರೀಕ್ಷ ಬರಯಿತನ, ಥೊಡೆ ಕಷ್ಟ ಅಶಿಲೆ. ಕೆಲವು ಅಂದಾಜೆಕ ಗುಂಡು ಮರಲೆ. ಕೆಲವು ಗೊತ್ತಶಿಲ್ ಬರಯಿಲೆ. ಜಲ್ಯಾರ್ ಸೀಟ ಮೆಳತ ಮ್ಹಣಕೆ ನಂಬಿಕ ಖೂಬ ಅಶಿಲೆ.

ಫಲಿತಾಂಶ ಎತ್ತಾನ ಮಗೆಲೆ ನಾವ ನಾ. ಮೆಗೆಲೆ ದೋಸ್ತಿ ಪೂರಾ ಜನ ಆಯಕಾ ಜಲೆಲೆ. ಅಮಾಕ ಬೇಜಾರ ಜಲೆ ಜಲ್ಯಾರ್ ಮಕ ಸಮಾಧಾನ ಸಂಗತಾಚಿ, ‘ಅನೇಕ ಪಂತ ಲಾಯೇಕ ಕೊರನು ಬರಯಿ ಮಣಾಲಿ. ದೀಸು ದವಂತ ಗೆಲೆ. ದೋನಿವರಸ ಖಾಸಗಿ ಶಾಳೆಂತು ಕಾಮ ಕರತ ಗೆಲಿ. ತಜೆ ಮಧ್ಯೇರಿ ವರ್‌ಡಿಕ, ಚರಡು, ಸಂಸಾರ.... ಅಶಿ ಅನ್ಯ ಜವಾಬ್ದಾರಿ ಚಡತ ಗೆಲೆ. ಜಲ್ಯಾರ್ ಭಿ ಪ್ರಯತ್ನ ಕರತ ಗೆಲಿ. ಸಮವಜಿನಾಶಿ. ಏಕ ವೆಳಾಕಿ ಮಕ ಡಿಡಿಪಿಯ ಆಫೀಸಾತುಕುನ್ ಅಪೋನ್ ತುಮಗೆಲೆ ವೇಯಿಟಿಂಗ್ ಲಿಸ್ಟಾ ನಾವ ಅಶಿಲೆ ತೇ ಸಿಲೆಕ್ಷನ್ ಜಲಾ’ ಮ್ಹಣು ಸಂಗಲೆ. ಮೆಗೆಲೆ ಖುಷಿಕ ಠಿಕಾಣಿ ನಾ ಜಲೆ. ಜಲೆರಿ ಕಡೆತ ಕಾರಣಾಂತರದುಕುನು ತೇವಯಿ ಹತಾ ದುಕುನುಗೆಲೆ. ಮಗಿರಿ ಮಗಿರಿ ಪರೀಕ್ಷಾ ಕಠಿಣ ಜತಾಗೆಲೆ. ಅಭ್ಯರ್ಥಿ ಶಂಬರಿ ಜಲ್ಯಾರ್ ಸೀಟ ೨ ಮಾತ್ರ ಅಶಿ ಜತಾಗೆಲೆ. ಸಾತ್ ಆಟ್ ವೆಳಾ ಪರೀಕ್ಷಾ ಬಸಲಿ. ಮೇಳನಿ. ಆತ್ಮವಿಶ್ವಾಸ್ ಬಿ ಊಣೆ ಜತಾ ಗೆಲೆ. ಕಡೇಕ ಮನಾಕ್ ದಿಸಲೆ. ‘ತುಗೆಲೆ ನಸೀಬಾಂತ್ ಸರಕಾರಿ ಕಾಮ ಬರಯಿನಿ ಮೊಣು. ಹತಾಶ ಜಲಿ.

ಅತ ಹೇ ವಿಚಾರ ಜಾವುನು ಪಂದರ ವರಸ ಜಲೆ. ಜಲ್ಯಾರ್ ಆಜಿ ಸಮೇತ ಮಗೆಲೆ ಸರಕಾರಿ ನೌಕರಿ ಮೆಳೆಲೆ ಸಹಪಾಠೀಂಕ ಪಳಯಿತನ ಮನ ಮಕ ಸಂಗಾತ ಉರತ - ‘ತೂ ಸಮೇತ ಥೊಡೇ ಪ್ರಯತ್ನ ಕೆಲೆಲ್ ಜಲೇರಿ ತುಕಾಯಿ ಸರಕಾರಿ ನೌಕರಿ ಮೆಳತಶಿಲೆ’ ಮ್ಹಣು. ಅನಿ ತೇ ಮೆಳಚೆೆ ಸಾಧ್ಯತಾ ಭಾರೀ ಊಣೆ. ಅನಿ ನಾ ಮೊಣು ಮ್ಹಣೇತ.

ಮೆಗೆಲೆ ಅಸಡತನ, ಅತಿವಿಶ್ವಾಸ, ಊಣೆ ಸಿದ್ಧತಾ, ಪೂರಾ ವಿಚಾರ ಲಘು ಜಾವುನು ಘವಚೆ ಸ್ವಭಾವ, ಸರಕಾರಿ ಕಾಮ ಮೇಳನಾಶೀ ಕೆಲೆ. ಜಲ್ಯಾರಿ ಮಗೆಲೆ ಅಮ್ಮ ‘ತುಕಾ ದೆವಾನ್ ಕಂಚೇಕ ಊಣೆ ಕೆಲಾ ಪುತಾ? ತುಗೆಲೆ ನಸಿಬು ನಾಶಿಲೆ ದಿಸತಾ. ತಶಿ ತುಕ ಮ್ಹೆಳನಿ. ತಕಾ ಪೂರಾ ನಸೀಬ ಜಾವುಕಾ. ‘ಮ್ಹಣು ಮಣತಾ ಜಲೆರ್ ತಿಗೆಲ್ ಮನಾ ಭಿತರ್ ತಿಗೆಲೆ ಧೂವೆಕ ಏಕ ಸರ್ಕಾರಿ ಕಾಮ ಮೇಳುಕಾಶಿಲೆ ಮಣಚೆ ಆಸಾ ಮ್ಹಣು ಮಕ ಕೆದನಾಯಿ ದಿಸತ. ಅತ ಅಶಿಲೆ ಶಿಕ್ಷಕ ಕಾಮಾಂತು ಮಕ ಸಮಾಧಾನ, ಖುಷಿ, ಪ್ರೀತಿ ಪೂರ ಅಸಲೆರಯಿ, ಜೀವನಾಂತು ತುಕ ಕಸನೆ ಮೇಳನಿ? ತೂ ಕಂಚೆ ವಿಚಾರ ಖೂಬ ಇಷ್ಟ ಪವಿಲೆ? ಮುಕಾರಿ ಜನಮಾರಿ ತುಕ ಕಸ ಜಾವುಕ? ಮಣು ಕೊಣಯಿ ತರಿ ಪ್ರಶ್ನಾ ನಿಮಗಿಲೆರಿ ಮಗೆಲೆ ಉತ್ತರ ಖಂಡಿತ ಅಶಿ ಅಸತಾ, - ‘ಮಕ ಹೇಯ ಜೀವನಾಂತು ಮಗೆಲೆ ಸಂಗಾತಿ ಕೊಣ ಪೂರಾ ಅಶೀಲೆ ಕೀ, ತನಿ ಸಕಡ ಜಾವುಕ. ತ್ಹಂಗೆಲೆ ಪ್ರೀತಿ ವಿಶ್ವಾಸ ಜಾವುಕ. ಉತ್ತಮ ಆರೋಗ್ಯ ಜಾವುಕ. ಅನಿ ಕಡೆ ಜಾವುನು ಸರಕಾರಿ ಶಾಳೆಚ ಶಿಕ್ಷಕ ಜಾವುಕ’. ಅಶಿ ತೇ ಚೋಯ್ನಾ ನತ್ತಿಲ್ ದರ್ಯಾ ಕತಿರ್ ಮನ ಮಿಗೆಲೆ ಕೆದನಾಯಿ ಅಂವ್ಡೇತಾ.

ಚೋಯ್ನಾತ್ತಿಲ್ ದರ್ಯಾ ಖಾತೀರ್ ಆಂವ್ಡೇತಾ ಮನ
- ಸೀಮಾ ಕಾಮತ, ಕಾರ್ಕಳ

• Prev
• Next