Displaying items by tag: MAT

Friday, 22 October 2021 16:23

ಶಾರದೆಕ ದಿವ್ಯಾಲಂಕಾರಾಚಿ ಸೇವಾ

ಮಂಗಳೂರು ರಥಬೀದಿಚೆ ಶ್ರೀ ವೆಂಟರಮಣ ದೇವಳ ವಠಾರಾಚೆ ಆಚಾರ್ಯ ಮಠಾಚೆ ಸಾರ್ವಜನಿಕ ಶಾರದಾ ಮಹೋತ್ಸವಾಕ 99 ವರಸ° ಜಾಲಿಂತಿ. ಜಾತಿ ಮತ ಭೇದ ನಾತಿಲೆ ಮಂಗಳೂರ ಆನೀ ಲಾಗಿಚೆ ಗಾಂವಚೆ ಲೋಕ ಹ್ಯಾ ಶಾರದೆಲೆ ಕೃಪಾಕಟಾಕ್ಷ ಪಾವಚಾಕ ಹಜಾರಾನಿ ಸಂಖ್ಯಾನಿ ದೇವಳಾಕ ಭೇಟಿ ದಿತಾತಿ. ಪಾಂಚ ದೀವಸ ಪುಜೂನು ಆಖೇರಿಚೆ ದಿವಸ ಜಲಸ್ಥಂಭನ ಕರಚೆ ಶಾರದಾ ವಿಗ್ರಹಾಕ ವ್ಹಿಂಗವ್ಹಿoಗಡ ಅವತಾರಾಚೆ ಅಲಂಕಾರ ಕರಚೆ° ವಿಶೇಷ ಜಾವನು ಆಸಾ. ಆರತಾ° ಏಕ ದಶಕ ದಾಕೂನ ದೇವಳಾಚೆ ವಠಾರಾಂತು° ದೀವೆ ಲಾವನು ವಿಶೇಷ ಅಲಂಕಾರ ಕರಚೆ° ಆನೀ ತೆ° ಪಳೊವಚಾಕ ಗಾಂವ° ಪರಗಾಂವಚೆ ಲೋಕಾನ ಯೆವಚೆ° ದಿಸತಾ. ಹಾಜೆ ಬದಲ ಆಮಗೆಲೆ ವಾಚಕಾಂಕ ಮಾಹಿತಿ ದಿವಕಾ ಮ್ಹಣಚೆ ನದರೇನ ಕೊಡಿಯಾಲ ಖಬರೆನ ಹ್ಯಾ ಸೇವಾ ಶುರು ಜಾಯತ ದಾಕೂನ ತಾಂತು° ಸಕ್ರೀಯ ಆಸಚೆ ದತ್ತಾತ್ರೇಯ ಭಟ್ ಹಾಂಕಾ° ಮೆಳಚೆ° ಜಾಲೆ°.
2002 ವರಸ ದೇವಳಾಚೊ ಏಕ ಸ್ವಯಂ ಸೇವಕ ಗಣೇಶ ಬಾಳಿಗಾ (ಆತ° ದೇವಾದಿನ) ಹಾಕಾ ಹೀ ಕಲ್ಪನಾ ಆಯಲಿ. ಶಾರದಾ ಮಾತೆಲೆ ಮಾಂಟಪಾoತು° ಏಕ ದಿವಸ ಸಂಪೂರ್ಣ ದಿವ್ಯಾನಚಿ ಉಜ್ವಾಡು ಹಾಡಕಾ ಮ್ಹಣು ತಾಗೆಲಿ ಕಲ್ಪನಾ ಆಶಿಲಿ. ಜಾಲ್ಯಾರ ಅನಿರೀಕ್ಷಿತ ಜಾವನು ತ್ಯಾಚ ವರಸ ತೊ ಏಕ ಅವಘಡಾಂತು° ಅಂತರಲೊ. ತಾಗೆಲಿ ಇಚ್ಛಾ ಪೂರ್ಣ ಜಾಯನಿ. ಜಾಲ್ಯಾರ 2009 ವರಸಾಂತ ತಾಗೆಲೆ ಥೊಡೆ ದೊಸ್ತ ಬಿ. ಗಣೇಶ ಬಾಳಿಗಾ(ಹೊ ವ್ಹಿಂಗಡು), ದತ್ತಾತ್ರೆಯ ಭಟ್ ಆನೀ ರವೀಂದ್ರ ಮಲ್ಯ ಹಾಂನಿ° ಶಾರದೋತ್ಸವ ಸಮಿತಿ ಆನೀ ಭಟ್ ಮಾಮಾಕ ಮೇಳನು ಹೀ ಇಚ್ಛಾ ಪ್ರಕಟ ಕೆಲಿ ಆನಿ ತಾಂಗೆಲೆ ಸಹಕಾರಾನ ದೀಪಾಲಂಕಾರ ಸೇವಾ ಶುರು ಕೆಲಿ. ತ್ಯಾ ವರಸ 3000 ಮಾತ್ಯೆ ಪಣತಿ ಲಾವನು ಹೀ ಸೇವಾ ಶುರು ಜಾಲಿ. ಪಯಲೆ ದೋನ ವರಸ ಫಕತ ಮಾತ್ಯೆ ಪಣತಿ ಲಾವನು ಜಾಲೆಲಿ ಹೀ ಸೇವಾ ಉಪರಾಂತಾಚೆ ವರಸಾಂತು ಗ್ಲಾಸಾಚೆ ದೀವೆ ಲಾವನು ಚಲತ ಆಸಾ. ಫಕತ ೩೦೦೦ ಪಣತಿ ಲಾವನು ಶುರು ಜಾಲೆಲೆ ಹ್ಯಾ ಸೇವೆಂತು° ಆಜೀ ಸಾಬಾರ 16000 ಕಯೀ ಚಡ ಗ್ಲಾಸಾಚೆ ದೀವೆ ಲಾಯತಾತಿ.
ಪ್ರಮುಖ ಜಾವನು ಎಸ್. ವಿ. ಟಿ. ಮ್ಯಾಟ್ ಫ್ರೆಂಡ್ಸ್ ಹಾಜೆ ಸದಸ್ಯಾನಿ ಮೇಳನು ಕರಚೆ ಹ್ಯಾ ಸೇವೆಕ ವ್ಹಿಂಗಡ ಲೋಕಯಿ ಸಹಕಾರ ದಿತಾತಿ. ಸಾಬಾರ 150 ಸ್ವಯಂಸೇವಕ ದೋನ ದಿವಸ ಸೇವಾ ದಿವನು ಹೀ ದಿವ್ಯಾಲಂಕಾರ ಸೇವಾ ಕರತಾತಿ. ಚೌತೆ ದೀವಸ ಚಲಚೆ ಹ್ಯಾ ದಿವ್ಯಾಲಂಕಾರಾಚಿ ತಯಾರಿ ಎಕ ಮ್ಹಯನೊ ಫುಡೆಚಿ ಶುರು ಜಾತಾ. ಸೇವೆಚೆ ಫುಳೆ ದಿವಸ ರಾತಿ ಪೂಜಾ ಜಾತರಿ ಇಕ್ರಾ ಗಂಟ್ಯಾಕ ದಿವೆ ಮಾಂಡೊನ ಹಾಡತಾತಿ. ಹಾಕಾ ಸಾಬಾರ 6-7 ಗಂಟೆ ವೇಳ ಲಾಗತಾ. ಹ್ಯಾ ಕಾಮಾಂತು° ಸ್ವಯಂ ಸೇವಕ ನಂತಾ° ಹೇರ ಲೋಕಯಿ ಸಹಕಾರ ದಿತಾತಿ. ಸೇವೆಚೆ ದಿವಸ ಸಾಂಜವೇಳಾ 6 ಗಂಟ್ಯಾಕ ದೇವಳಾಚೆ ಧ್ವಾರ ಉಗ್ತೆಂ ಜಾತರಿ ಶಾರದಾ ಮಾತೆಕ ಆರತಿ ದಾಕೊವನು ತ್ಯಾಚ ಆರತಿನ ಸಗಟ ದಿವೆ ಲಾವಚೆ° ಜಾತಾ.
ದಿವ್ಯಲಂಕಾರಾಚೆ ಮಧೆ° ರಂಗರoಗಾಳ ರಂಗೊಲಿ ಘಾಲಚಾಂತು° ಜಿ. ಎಸ್. ಬಿ. ಸಮಾಜಾಚೆ ವನಿತಾ ಲೋಕ ಆನೀ ರಥಬೀದಿ ಪರಿಸರಾಚೆ ಅನ್ಯ ಸಮಾಜಾಚೆ ಲೋಕಯಿ ಸಹಕಾರ ದಿತಾತಿ. ತ್ಯಾ ನಂತಾ° ಏಕ ರಂಗೊಲಿ ಕಲಾವಿದು ಸುತಾ ಸೇವಾ ರೂಪಾರಿ ರಂಗೊಲಿ ಘಾಲಚೆ° ಕರತಾ. ಹ್ಯಾ ವರಸ ಎಕ ತರನಾಟ್ಯಾನ ರುಬಿಕ್ ಕ್ಯೂಬ್ ವಾಪರೂನ ಶಾರದಾ ಚಿತ್ರ ಅನಾವರಣ ಕೆಲೆಲೆ° ಪಳೊವಚಾಕ ಮೆಳೆ°.
ಹ್ಯಾ ಸರ್ವ ದಿವೆ ಲಾವಚಾಕ ಸಾಬಾರ ಏಕ ಲಾಖ ವಾತಿಯೊ ಆನಿ ಪಾಂಯಶೆ° ಲೀಟರ್ ತಿಳೇಲ ತೇಲ ವಾಪೂರಚೆ° ಜಾತಾ. ಉಡುಪಾಚಿ ಎಕ ಆರ್ಥಿಕ ಜಾವನು ದುರ್ಭಲ ಸ್ತ್ರೀ ಲಾಗಿ ವಾತಿ ಖರೀದಿ ಕರಚೆ ಹಾಂನಿ° ಸ್ವಯಂ ಸೇವಕಚೀ ಮೇಳನು ಹೊ ಸರ್ವ ಖರ್ಚು ಸಾಂಬಾಳತಾತಿ.
ಸಾನ ರೂಪಾರಿ ಶುರು ಜಾಲೆಲೆ ಹ್ಯಾ ಸೇವೆಂತು° ಆಜಿ ತಂತ್ರಜ್ನಾನಾಚೆ ವಾಪರೂಪ ಜಾಲೆಲೆ° ಪಳೊವಚಾಕ ಮೆಳತಾ. ರಿವಾಲ್ವಿಂಗ್ ದಿವೆ ಅತ್ಯಂತ ಆಕರ್ಷಕ ಆಸಾತಿ. ಹಾಜೆ ಮಾಕ್ಷಿ ಸ್ವಯಂಸೇವಕಾ° ಪಯಕಿ ಆಸಚೆ ೭ ತರನಾಟೆ ಇಂಜಿಯರ್ ಜಾವನು ಆಸಾತಿ. ಎಂ.ಎನ್.ಸಿ ತು° ಕಾಮ ಕರಚೆ ಹಾಂನಿ° ಅಸಲೊ ವಿಷಯ ಯೆತಾನಾ ಸಕ್ರೀಯ ಜಾವನು ವಾಂಟೊ ಘೆತಾತಿ.
12 ವರಸ ದಾಕೂನ ಚಲಚೆ ಹ್ಯಾ ದಿವ್ಯಾಲಂಕಾರ ಸೇವಾ ಆಜಿ ದೇಶಾಚೆ ವ್ಹಿಂಗಡ ಗಾಂವಾoತೂಯಿ ನಾವಾದೀಕ ಜಾಲ್ಯಾ. ಹ್ಯಾಚ ಪಂಗಡಾನ ಹೀ ಸೇವಾ ವ್ಹಿಂಗವ್ಹಿoಗಡ ಸಂದರ್ಭಾರ ಮುಲ್ಕಿ ದೇವಳಾಂತು°, ಅಡೂರಚೆ ಹನುಮಾನ ದೇವಳಾಂತು°, ಸಂಘನಿಕೇತನಾಚೆ ಗಣೇಶೊತ್ಸವಾಚೆ ಉಷಾ ಪೂಜೆ ವೇಳಾರ, ಉರ್ವಾ ಮಾರ್ಕೆಟಾಚೆ ಹಿಂದು ಸೇವಾ ಸಮಿತಿಚೆ ಗಣೇಶೋತ್ಸವಾಚೆ ವೇಳಾರ ದಿಲೆಲಿ ಆಸಾ.

ತ್ಯಾ ನಂತಾ° ತಿರುವನಂತಪುರಾಚೆ ಶ್ರೀ ಅನಂತ ಪದ್ಮನಾಭ ದೇವಳಾಂತು° 2020 ವರಸ ಚಲೆಲೆ ‘ಪೂರಜಪ’ ಸಂದರ್ಭಾರ ಕೆಲೆಲಿ ಸೇವಾ ಅವಿಸ್ಮರಣೀಯ ಮ್ಹಣಯೆತ. ಮಂಗಳೂರ ದಾಕೂನ ತೀನಿ ಲಾರಿ ಸಾಮಾನು ಆನಿ 160 ಸ್ವಯಂಸೇವಕಾoಕ ವ್ಹರನು ಹೀ ಸೇವಾ ದಿಲೆಲೆ ಹ್ಯಾ ಪಂಗಡಾಕ ಖೂಬ ಸಂತೋಸ ದಿಲೆಲೆ ಘಡಣಿ ಜಾವನು ಆಸಾ. ತ್ಯಾ ದೇವಳಾಚೆ ವಿಶೇಷತಾ ಮ್ಹಳ್ಯಾರ ಥಂಯ ದಿವೆ ಫಕತ ನಾರಲೆಲ ತೇಲ ಘಾಲನೂಚಿ ಲಾಯತಾತಿ. ಜಿ. ಎಸ್. ಬಿ ಸಮಾಜಾಚೆ ತರನಾಟ್ಯಾನಿ ದಿಲೆಲೆ ಹ್ಯಾ ಸೇವೆಕ ವ್ಹಿಂಗಡ ಸಮಾಜಾಚಾನಿ ತೆಂವಯೀ ವ್ಹಿಂಗಡ ರಾಜ್ಯಾಂತ ದಿಲೆಲೆ ವಿಶೇಷ ಮಾನ್ಯತಾ ಆಮಕಾ ಸಗಟಾಂಕ ಭರಮೆಚೊ ವಿಷಯ ಜಾತಾ.
ಆಮಗೆಲೆ ತರನಾಟೆ ದೇವಳಾಕ ಯೆನಾತಿ ಯಾ ಯೆವಚೆ ಊಣೆ ಜಾಲಾ° ಮ್ಹಣು ಆಯಕೂನ ಯೆವಚೆ ದಿವಸಾಂತು° ಅಸಲೆ ತರನಾಟೆ ಸುತಾ ಆಸಾತಿ ಮ್ಹಣು ಕಳನು ಯೆವಚೆಂ ಸಮಾಜಾಚೆ ಫುಡಾರಾಚೆ ನದರೇನ ಬರೊ ವಿಚಾರ ಜಾತಾ.

Published in Mangalore

Tagged under

Editorial

ಡಾಕ್ಟರಾಲೆ ಆತ್ಮ ಪರಮಾತ್ಮಾಲೆ ಸಾಂಗತ ವಿಲೀನ ಜಾಲೆ°,,,

ಡಾ. ಜಿ. ಜಿ. ಲಕ್ಷ್ಮಣ್ ಪ್ರಭು ಎಕ ನಾವಾದೀಕ ಡಾಕ್ಟರು ಆಶಿಲೊ. ಯುರಾಲಾಜಿ ತಾಗೆಲಿ ಸ್ಪೇಷಾಲಿಟಿ. ತೊ ಎಕ ಫಾಮಾದ ಡಾಕ್ಟರ್ ನಂತಾ° ಎಕ ಬರೊ ಭಾಷಣಗಾರುಯೀ ಜಾವನು ಆಶಿಲೊ. ಸಾನ ಪ್ರಾಯೆರಿ ತೊ ಜನಾ ಮೋಗಾಳ ಜಾಲೆಲೊ. ತೊ ಅನೀರಿಕ್ಷಿತ ಜಾವನು ಅಂತರಲೊ ಮ್ಹಳೆಲಿ ಖಬರ ಆಯಕತನಾ ಸಾಬಾರ ಲೋಕಾಂಕ ತೆಂ ನಂಬಗೂಚಾಕ ಜಾಯನಿ. ಬ್ಯುಸಿ ಡಾಕ್ಟರ್ ಆಶಿಲೊ ತೊ ಕೆದನಾಯಿ ಕೊಡಿಯಾಲಚೆ ಕೆ. ಎಂ. ಸಿ ಹಾಸ್ಪಿಟಲಾಂತ ಪಳೊವಚಾಕ ಮೆಳತಲೊ. ಸಕಾಳಿ ದಾಕೂನ ಸಾಂಜವೇಳಾ ತಾಂಯ ಆಪರೇಶನ್ ಥಿಯೇಟರಾಚೆ ಸಮವಸ್ತ್ರಾಂತು ತೊ ದಿಸತಲೊ ಮ್ಹಣು ಆಸ್ಪತ್ರೆಕ ಗೆಲೆಲೆ ಸಾಂಗತಲೆ. ತಿತಲೊ ಬ್ಯುಸಿ ಡಾಕ್ಟರ್ ತೊ. ತಾಣೆ ತಾಗೆಲೆ ಪೆಶೆಂಟಾoಕ ಪಳೊವಚಾಕ ಆಸ್ಪತ್ರೆಚೆ ರೌಂಡ್ಸಾರ ವತನಾ ತಾಗೆಲೊ ಹೋಡು ತಾಳೊ ಆಯಕೂನು ತ್ಯಾ ಮ್ಹಾಳ್ಯೆರಿ ಆಸಚೆ ಸಗಟ ರೂಮಾಂತುಲೆ° ಪೇಶೆಂಟಾoಕ ತೊ ಆಯಲೊ ಮ್ಹಣು ಕಳತಲೆ° ಖಂಯ. ಕುಶಾಲ ಉಲೊವನು ಪೇಶೆಂಟಾoಲಿ ಮನೋಸ್ಥಿತಿ ಸಂತೋಸಮಯ ಕರಚೆಂ ತಾಗೆಲಿ ಸವಯ್ ಆಶಿಲಿ.
ನ. 9ಕ ಎಕ ಆಪರೇಶನ ಪೂರ್ಣ ಕರನು ಭಾಯರ ಆಯಿಲೆ ಡಾಕ್ಟರಾಕ ಕಠಿಣ ಹೃದಯಘಾತ ಜಾಲೆ°. ತ್ಯಾ ನಿಮಿತ ತಾಕಾ ತುರ್ತಾನ ಶುಶ್ರುತಾ ಮೇಳಚಾಕ ಸಾಧ್ಯ ಜಾಲೆ°. ತೊ ಐ.ಸಿ.ಯುಂತ 8 ದೀವಸ ಆಶಿಲೊ. ತಾಕಾ ಊಂಛ ಸ್ಥರಾಚೆ ಟ್ರಿಟಮೆಂಟ್ ಮೆಳೆ°. ಜಾಲ್ಯಾರ ದೈವಿಚ್ಛಾ ವ್ಹಿಂಗಡ ಆಶಿಲಿ. ನ.17 ಕ ತಾಗೆಲೆ ದೇಹಾಂತ್ಯ ಜಾಲೆ°.
ಡಾಕ್ಟರಾಕ ಫಕತ 60 ವರಸ°. ಸಾಬಾರ 30 ವರಸಾಚೊ ವೈದ್ಯಕೀಯ ಅಣಭವ. ಡಾಕ್ಟರ ಮ್ಹಣು ನ್ಹಹಿ°, ಆರತಾ° ತರನಾಟೆ ಲೋಕಾನ ಹೃದಯಘಾತ ಜಾವನು ಮರಣ ಪಾವಚಿ ಖಬರ ಆಯಕೂಚೆ° ಚಡ ಜಾಲಾ°. ಸ್ವತ: ಡಾಕ್ಟರ ಆಶಿಲೆ ತಾಕಾ ಖಾಂಯ ಮುನ್ಸೂಚನಾ ಮೇಳನಿ ವೆ ? ತಾಣೆ ತಾತಾವಳಿ ತಾಗೆಲಿ ಆರೋಗ್ಯಾಚಿ ತಪಾಸಣಾ ಕರನು ಆಸಚೆ° ಸಾಧ್ಯತಾ ಆಸಾ. ಎಕ ಫಾಮಾದ ಡಾಕ್ಟರಾಕಚೀ ಅಶಿ° ಜಾಲೆ ಮ್ಹಣತಾನ ಸಾಮಾನ್ಯ ಮನಶಾನ ತಾಗೆಲೆ ಆರೋಗ್ಯಾ ಬದಲ ಕಿತಲಿ ಜಾಗೃತಿ ಘೆವಕಾ ? ಮನಶಾನ ತಾಗೆಲೆ ಆಹಾರ ಪದ್ಧತಿ ಆನಿ ಜೀವನ ಶೈಲಿ ಕಶಿ° ದವರಕಾ ? ವಿಜ್ಞಾನ ಇತಲೆ° ವಾಡಲಾ° ಕೀ, ವಿಜ್ಞಾನಿ ಲೋಕಾ° ಮಧೆಂತೂಚಿ ಆಮಿ ಘೆವಚೆ ವಕದ ಆನಿ ಹೇರ ವಿಷಯಾಚೆರಿ ಚರ್ಚಾ ಜಾವಚೆ° ಆಮಿ ಸೋಶಿಯಲ್ ಮೀಡಿಯಾರಿ ವಾಚತಾತಿ ಆನಿ ಆಯಕತಾತಿ. ಆಮಿ ಘೆತಿಲೆ ಕೋವಿಡ್ ವ್ಯಾಕ್ಸಿನಾ ಬದಲಯಿ ಸಂದೇಹ ಉಲಯತಲೆ ಆಸಾತಿ. ಆಶೆ° ಸಾಬಾರ ಸವಾಲಾ° ಆಮಗೆಲೆ ಮುಕಾರ ಆಸಾತಿ.
ಆಹಾರ ಪದ್ಧತಿ ಬದಲ ಖೂಬ ಚರ್ಚಾ ಜಾತಾ ಆಸಾ. ಆರತಾ° ಕ್ರಿಕೇಟರ್ ಕೊಹ್ಲಿನ ತಾಗೆಲೆ ಆಹಾರ ಪದ್ಧತಿ ಬದಲ ಸಾಂಗಿಲೊ ಎಕ ವಿಡೀಯೊ ಪಳೊವಚಾಕ ಮೆಳೊ. ತಾಂತು° ತೊ ಕಾರ್ಬ್ಸ ಊಣೆ ಕರಚೆ°, ಪ್ರೊಟಿನ್ ಚಡ ಕರಚೆ°, ಗೀನ್ ವೇಜಿಟೆಬಲ್ಸ್ ಖಾವಚೆ°, ಲೋಣಿ - ತುಪ ಖಾವಚೆ° ಸಾಂಗತಾ. ತಾಗೆಲೆ ಉತ್ರ° ಆಯಕತನಾ ಆಮಗೆಲೆ ಥೊಡೆ ಇಷ್ಟ ಲೋಕಾನ ಆಶೆ° ಕರಚೆ° ಚೂಕಿ ನ್ಹಹಿ° ಮ್ಹಣು ದಿಸತಾ. ಆಮಿ ಪ್ರಯತ್ನ ಕರನು ಪಳೊವಯೆತ ಮ್ಹಣು ಭೊಗತಾ. ದೀವಸಾಕ ಉಣೆನಾ 30 ಮಿನೀಟ್ ಚಮಕಲೆರಿ ಬರೆ° ಮ್ಹಣು ಹರ ಎಕಲೊ ಡಾಕ್ಟರು ಸಾಂಗತಾ. ಆಮಗೆಲೆ ತರನಾಟೆನಿ ಸುತಾ ಸಾನ ಪ್ರಾಯೇರಿಚಿ ಆಹಾರ ಪದ್ಧತಿ ಸಮ ಕರನು ಜೀವನ ಶೈಲಿ ಸಮ ಕರಚಾಕ ಪ್ರಯತ್ನ ಕರಕಾ.
ಡಾಕ್ಟರ್ ಜಿ. ಜಿ. ಲಕ್ಷ್ಮಣ್ ಪ್ರಭು ಬರೊ ಡಾಕ್ಟರು ಆನಿ ಭಾಷಣಗಾರ ನಂತಾ° ಎಕ ಕವಿ ಸುತಾ ಆಶಿಲೊ. ತಾಣೆ ಕನ್ನಡ ಭಾಶೆನ ಖೂಬ ಕವಿತಾಂ ರಚನ ಕೆಲಾಂ ಮ್ಹಣು ತಾಣೆ ದೇವಾದಿನ ಜಾತರಿಚಿ ಲೋಕಾಂಕ ಕಳೆ°. ತಾಣೆ ಆರತಾ° ಎಕ ಸಮಾರಂಭಾoತ ಪ್ರಸ್ತುತ ಕೆಲೆಲೆ ಭಾಷಣ ಖೂಬ ವೈರಲ್ ಜಾಲಾ°. ತಾಂತು° ತೊ ಆತ್ಮ ಆನಿ ಪರಮಾತ್ಮಾ ವಿಷಯಾರಿ ಉಲಯತಾ.
"ಕ್ರಷ್ಣಾನ ಸಾಂಗಲ್ಯಾ ಮ್ಹಣಕೆ ಪರಮಾತ್ಮಾಲೆ ಮ್ಹಣಕೆ ಆತ್ಮಾಕಯೀ ಆದಿ ನಾ ಯಾ ಅಂತ್ಯ ನಾ, ಮ್ಹಳ್ಯಾರಿ ಮರಣ ನಾ" ಮ್ಹಣು ತ್ಯಾ ಭಾಷಣಾಚೆ ಶುರುವಾತಾರಿ ಡಾಕ್ಟರು ಸಾಂಗತಾ. ಆಮಿ ಜೀವನಾಂತು° ಆಮಗೆಲೆ ಕರ್ತವ್ಯ ಕರಕಾ, ಕರತನಾ ಆಮಕಾ ಜಯ ಮೇಳತಾ ಯಾ ಸೋಲು ಮೇಳತಾ. ಆಮಗೆಲೆ ವಿಷಯಾರಿ ಕೋಣ ಕಸಲೆ° ಚಿಂತಾ ಕರತಾ ಮ್ಹಣು ಆಮಿ ಮನಾಂತ ದವರನು ಕರ್ತವ್ಯ ಕರಚೆ° ಕಷ್ಟ ಜಾತಾ. ತಸಲೆ ಮನೋಸ್ಥಿತಿರಿ ತುಮಿ ಕರ್ತವ್ಯ ಕರಚೆ° ಸುಲಭ ಜಾಯನಾ ಆನಿ ಕರಚೆ ಕರ್ತವ್ಯಾಕ ನ್ಯಾಯ ದಿವಚಾಕ ಜಾಯನಾ ಮ್ಹಣು ತೊ ಸಾಂಗತಾ.
ಮುಕಾರ ತೊ ಅಶೆ° ಸಾಗತಾ ಕೀ, ಎಕ ಪಾವಟಿ ತಾಗೆಲೆ ಪ್ರೋಫೆಸರಾನ ಸಾಂಗಿಲೆ° ಖಂಯ, ತುವ° ತುಗೆಲೆ ವೃತ್ತಿಂತು° ಪ್ರಚಾರ ಘೆವಚಾಕ ಯಾ ನಾವಾದೀಕ ಜಾವಚಾಕ ಆಯಿಲೊ ನ್ಹಹಿ°. ತುಗೆಲೆ ಮನಾಕ ಖಂಚೆ ಸಮ ಮ್ಹಣ ದಿಸತಾ ತ್ಯಾ ಪ್ರಮಾಣೆ ಮಾನವಿಯತಾ ದೃಷ್ಠಿ ದವರನು ಕರ್ತವ್ಯಪಾಲನ ಕರಿ. ಕೋಣಾಕ ಅಭಿಮಾನ ಆಸಾಕೀ ತಾಗೆ ಲಾಗಿ ಮಾನವೀಯತಾ ಆಸತಾ. ಕೋಣಾಕಯಿ ಖುಷಿ ಕರಚಾಕ ಕರ್ತವ್ಯ ಕರಚಾಕ ಜಾಯನಾ. ಅಹಂ ಸೋಡಕಾ, ಶರೀರ ಆನಿ ಪ್ರಾಪಂಚಿಕ ವಸ್ತು ಸೋಡಚೆ° ಕರಕಾ. ಶರೀರ ಆನಿ ಹೇರ ವಸ್ತು ಆಮಗೆಲೊ ನ್ಹಹಿ° ಮ್ಹಣು ಚಿಂತಲ್ಯಾರಿ ಸಹಜ ಜಾವನು ಆಮಿ ಸ್ವತಂತ್ರ ಜಾತಾತಿ. ಆತ್ಮ ವ್ಹಂವಚಾಕ ಶರೀರ ಶಿವಾಯ, ಶರೀರ ವ್ಹವಂಚಾಕ ಆತ್ಮ ನ್ಹಹಿ° ಮ್ಹಳೆಲೆ ಉಡಗಾಸ ದವರಕಾ. ಆತ್ಮಾನ ಶರೀರ ವ್ಹಂವಚಿ ಪರಿಸ್ಥಿತಿ ಆಯಲ್ಯಾರಿ ಶರೀರ ಸೋಡಕಾ ಮ್ಹಣು ತೊ ಸಾಂಗತಾ.
ಆರೋಗ್ಯ ಸಾಂಬಾಳಚಾಕ ಕಸಲೆ° ಕರಕಾ ಮ್ಹಣೂಯಿ ಡಾಕ್ಟರಾನ ತಾಗೆಲೆ ಭಾಷಣಾಂತು° ಸಾಂಗಲಾ°. ಜೀವನಾಂತು° ಚಲನ, ಭೋಜನ, ಶಯನ ಆನಿ ಪ್ರಕೃತಿ ವೀಲಿನಾಚೆ ಬದಲ ಜ್ಞಾನ ಆಸೂಕಾ ಮ್ಹಣು ತೊ ಸಾಂಗತಾ.
ಆಮಿ ಕೆದನಾಯಿ ಚಲನಶೀಲ ಆಸೂಕಾ. ಚಲಚನಶೀಲತಾ ಮ್ಹಳ್ಯಾರಿ ಜೀವಂತ ಆಸಾತಿ ಮ್ಹಣಚೆ ಸೂಚನಾ. ತ್ಯಾ ನಿಮಿತ ಪ್ರಾಯ ಜಾಲೆಲ್ಯಾನಿ ಜಾಲೆ ತಿತಲೆ ಚಮ್ಕೂಚೆ° ಕರಕಾ. 60 ವರಸ° ಜಾತರಿ ಎಕ ವಾಕಿಂಗ್ ಸ್ಟಿಕ್ ದ್ಹರನು ಚಮಕೂಚೆ° ಬರೆ° ಮ್ಹಣು ತೊ ಡಾ. ಟಿ. ಎ. ಎ. ಪೈಲೆ ಉದಾಹರಣ ದಿತಾ.
ದುಸ್ರೆಂ, ಭೋಜನ. ತರನಾಟೆ ಆಸತನಾ ಫಾತೋರ ಖಾವನು ಜೀರ್ಣ ಕರಚಿ ಶಕ್ತಿ ಆಸತಾ. ಪ್ರಾಯ ಜಾತಾನ ತೀ ಶಕ್ತಿ ಊಣೆ ಜಾತಾ. ತಶಿಂ ಮ್ಹಣು ಕಸಲೆಂಯಿ ಸೊಡಚೆಂ ನ್ಹಹಿಂ. ನ್ಯೂಟ್ರಿಶಿಯನ್ ಮ್ಹಳ್ಯಾರಿ ಹೈ ಫೈಬರ್ ಆಸೂಕಾ, ಉದಾಕ ಪಿವಕಾ, ಲಾಯಕ ಕರನು ನಿದೋಕಾ. ಎಕ ಲೇಖಾ ಪ್ರಮಾಣೆ 8 ಗಂಟೊ ಕಾಮ ಕರಕಾ, 8 ಗಂಟೊ ಕುಟುಂಬಾಕ ದೀವಕಾ ಆನಿ 8 ಗಂಟೊ ನಿದೋಕಾ. ವಗೀ ನಿದೊಚೆಂ ಆನಿ ವಗೀ ಉಟಾಚೆ° ಕರಕಾ. ಪ್ರಕೃತಿ ಸಾಂಗತ ಮೆಳಚೆ° ಕರಕಾ. ಅನೈಸರ್ಗಿಕ ವಸ್ತು ದೂರ ದವರಕಾ. ಮೊಬೈಲ್ ಆನಿ ತಸಲೆ ಹೇರ ವಸ್ತು ದೂರ ಕರಚೆ°, ಖಂಚೆಯ ಗಾರ್ಡನಾಕ ವಚೆ° ಹಾಕಾ ಉದಾಹರಣ ಜಾತಾತಿ. ಪ್ರಕೃತಿ ಮಾತೆಲೆ ಸಾಂಗತ ಮೇಳನು ಆಸಚೆಂ ಅತ್ಯಂತ ಪ್ರಮುಖ ಜಾತಾ.
ಆಯಚೆ ದೀಸಾಂತ ಸಂಭoದ ಚೂಕುನ ವಚೆ° ಸಾಮಾನ್ಯ ಜಾಲಾ°. ಸಂಭoದ ವರೊನ ಹಾಡಚೆ° ಕರಕಾ. ದೋಸ್ತ ಮ್ಹಳಯಾರಿ ಕಾನ್ನಡಿ ಶೆಂ ಆಸತಾತಿ. ಮುಖಸ್ತುತಿ ಕರತಲೆ ನ್ಹಹಿ°. ಕೇದನಾಯಿ ಸಂಭoದ ಉದಾಕಶೆ° ಆಸೂಕಾ. ಉದಾಕ ಪಾರದರ್ಶಕ ಆಸತಾ. ತಾನಿ ನಿವಯತಾ. ಆಮಿ ತಶೀಂಚಿ ಜಾವಕಾ. ತ್ಯಾ ನಿಮಿತ ಜೀವನಾಂತು° ಚಲನ, ಭೋಜನ, ಶಯನ ಆನಿ ಪ್ರಕೃತಿ ವೀಲಿನಾಚೆ ಬದಲ ಚಡ ಮಹತ್ವ ದೀವಕಾ. ತ್ಯಾಚ ವೇಳಾರ ಸ್ನೇಹ ಪರಿಪಾಲನ ಕರಚೆ° ಕರಕಾ ಮ್ಹಣು ಸಾಂಗೂನು ತಾಣೆ ತಾಗೆಲೆ ಭಾಷಣ ಆಖೇರಿ ಕೆಲೆಲೆಂ ಆಸಾ.
ತಾಣೆ ಭಾಷಣಾಂತು° ಕಸಲೆ° ಸಾಂಗಲಾ° ತೆ° ತಾಣೆ ಜೀವನಾಂತು° ಪರಿಪಾಲನ ಕೆಲಾ° ಮ್ಹಣಯೆತ. ತಾಗೆಲೆ ಬದಲ ತಾಗೆಲೆ ದೋಸ್ತಾನಿ, ಪೇಶೆಂಟಾನಿ ಆನೆ ಹೇರಾನಿ ಸೋಶಿಯಲ್ ಮೀಡಿಯಾರಿ ಫಾಯಸ ಕೆಲೆಲೆ ಸಂದೇಶ ಪಳೊವನು ಆಶೆಂ ಸಾಂಗಚಾಕ ಜಾತಾ.
ಡಾಕ್ಟಾçಲೊ ಮ್ಹಾಂತು ಜಿ. ಜಿ. ವಾಸುದೇವ ಪ್ರಭು ಹಾಂನಿ° ಮಂಗಳೂರಾoತು° ಕೊಂಕಣಿ ಭಾಶೆ ಖಾತೀರ ಸೇವಾ ದಿವಚೆ ನದರೇನ 1981ತು° ಶುರು ಕೆಲೆಲೊ ಸಂಸ್ಥೊ ಕೊಂಕಣಿ ಸಾಂಸ್ಕೃತೀಕ ಸಂಘ ಆಜಿಕಯೀ ತೀ ಸೇವಾ ದಿವೂನ ಆಸಾ. ಸಂಘಾನ ಆಪಯಿಲೆ ತೇದನಾ ಜಿ. ಜಿ. ಲಕ್ಷ್ಮಣ್ ಪ್ರಭು ಯೆವನು ತಾಂಕಾ° ಮಾರ್ಗದರ್ಶನ ದಿತಲೊ. ಉತ್ತಮ ವೈದ್ಯ, ವಾಘ್ಮಿ, ಸಂಘಟಕ, ಸಾಹಿತಿ ಆನಿ ಬರೊ ಮನಿಸ್ ಆಶಿಲೆ ತಾಂಗೆಲೆ ಆತ್ಮಾಕ ಶಾಂತಿ ಮಾಘೂಯಾ°.

Shabdvihar

ಮುನಾಫೋ

ಮುನಾಫೋ ನಾಶಿಲೊ ವ್ಯಾರು ಕರನು ಪ್ರಯೋಜನ ಕಸಲೆ ? ವ್ಯಾರು ಮ್ಹಳೆ ಪರಾಂತ ತಾಂತು ಮುನಾಫೋ ಮೇಳಕಾಚಿಚಿ. ಹೆ ಉದ್ಘೃತ ವಾಕ್ಯಾಂತು ಮುನಾಫೋ ಮ್ಹಣಚೊ ಜೋ ಶಬ್ದು ಪಾವರಲಲೋ ಆಸಾ ತೇ ಶಬ್ದಾ ವಿಶಿ ಸಮಜೂವ್ಯಾಂ.

ಮುನಾಫೋ ಮ್ಹಣಚೊ ಹೊ ಶಬ್ದು ಸಂಸ್ಕೃತ ಭಾಶೆಚೆ ಕ್ಹಂಚೆಯ ಶಬ್ದಾಚೆ ತದ್ಬವ ರೂಪ ಜಾವೋ ಪ್ರಾಕೃತ ಶಬ್ದ ರೂಪ ಜಾವೋ ನ್ಹಹಿಂ. ಹೊ ಶಬ್ದು ಅರಬ್ಬೀ ಭಾಷಾಚೊ ಮುನಾಫಾ ಮ್ಹಣಚೊ ಶಬ್ದು ಜಾವನು ಆಸಾ. ಅನ್ಯ ಭಾಶಾ ಶಬ್ದ ಸ್ವೀಕರಣ ಮ್ಹಣಚೆ ನಿಯಮಾನುಸಾರ ಹೊ ಮುನಾಫಾ ಮ್ಹಣಚೊ ಶಬ್ದು ಕೊಂಕಣಿ ಭಾಶೆಂತುಂ ಸ್ವೀಕಾರ ಕೆಲಾ. ಆನೀಕ ಹೇ ಶಬ್ದಾಚೊ ಅರ್ಥ ಲಾಭು ಮ್ಹಣು ಜಾವನು ಆಸಾ.

Education