ಕುಂದಾಪುರ: “ಹರ ಎಕ ವಿಷಯಾಂತು° ಸಂಪದ್ಭರಿತ ಆಶಿಲೆ ಭಾರತ ದೇಶಾಚೆರಿ ವಿದೇಶಿ ಲೋಕಾಲೆ ಆಕ್ರಮಣಾ ನಿಮಿತ ಮೂಲ ಸಂಸ್ಕೃತಿಕ ಮಾರ ಪಡಲೊ. ಆಮಗೆಲೆ ದೌರ್ಭಲ್ಯಾಚೆ ದುರುಪಯೋಗ ಕರನು ತಾಂನಿ° ಆಮಕಾ ಆಳಶಿಲೆ° ಆನಿ ಜೀವನ ಪದ್ಧತಿ ಬದಲೆಚೆ° ಕೆಲೆ°. ಮತಾಂತರ ಕರಯಲೆ°. ಶಿಕ್ಷಣ ವ್ಯವಸ್ಥಾ ಬದಲ ಕೆಲಿ. ಹೆ° ಕರಚಾಂತು° ತಾಂಕಾ° ಆಮಗೆಲೆ ಲೋಕಾನ ಮದದ ಕೆಲೆ°. ಆಜಿಕಯೀ ತಸಲೆ ಮನೋಭಾವ ಆಶಿಲೆ ಲೋಕ ಆಸಾತಿ. ಅಸಲೆ ಪರಿಸ್ಥಿತಿಂತು° ಆಮಗೆಲಿ ಸಂಸ್ಕೃತಿ ರಾಕೂನ ಹಾಡಚಾಂತು° ಜನಪದ ಸಾಹಿತ್ಯ, ಕಲಾ ಪ್ರಕಾರ° ಸಹಕಾರಿ ಜಾಲ್ಯಾಂತಿ. ಹೆಂ ವರೋನು ಹಾಡಚಾಂತು° ಆಮಗೆಲೆ ಮ್ಹಾಲ್ಗಡೆನ ಕೆಲೆಲಿ ಸೇವಾ, ತ್ಯಾಗ ಉಡಗಾಸ ಕರನು ಮುಕಾವಯಲೆ ಪಿಳಗಿಕ ಪಾವೊಚೆ° ಗರಜೆಚೆ° ಆಸಾ. ಆಮಗೆಲಿ ಜನಪದ ಸಂಸ್ಕೃತಿ ಆಮೀಚಿ ವರಯನಾಶಿ° ಆನಿ ಕೊಣೆ ವರೊಚೆ° ? ಉಪ್ಪಿನಕುದ್ರು ಗೊಂಬೆಯಾಟ ಅಕಾಡೆಮಿ ಆನಿ ಫಣಿಗಿರಿ ಪ್ರತಿಷ್ಠಾನ ಶಿರೂರು ಹಾಂನಿ° ಮನೊರಂಜನಾ ದ್ವಾರಿ ಸಾಂಸ್ಕೃತಿಕ ಜಾಗೃತಿ ಹಾಡಚೆ° ಕರತಾ ಆಸಾತಿ. ಹೆ° ಅಭಿನಂದನಿಯ ಜಾವನು ಆಸಾ” ಮ್ಹಣು ವಿಶ್ರಾಂತ ರಾಜ್ಯಪಾಲ ಪಿ. ಬಿ. ಆಚಾರ್ಯ ಹಾಂನಿ° ಸಾಂಗಲೆ°.

ಉಪ್ಪಿನಕುದ್ರು ಗೊಂಬೆಯಾಟ ಅಕಾಡೆಮಿಚೊ ಮ್ಹಯನಾಳೊ ಕಾರ್ಯಕ್ರಮಾಂತು° ಫಣಿಗಿರಿ ಪ್ರತಿಷ್ಠಾನ ಶಿರೂರು ಹಾಂಗೆಲಿ ಫಣಿಗಿರಿ ಪ್ರಶಸ್ತಿ 2022 ಹಾಜೆ° ಉಗ್ತಾವಣ ಕರನು ತಾಂನಿ° ಆಶೆ° ಸಾಂಗಲೆ°.
ಸರ್ವ ಧರ್ಮಾಂಕ ಗೌರವ ದಿವನು, ಕೊಣಾಚೆರಯೀ ಆಕ್ರಮಣ ಕರನಾಶಿ°, ಮೌಲ್ಯಾಧಾರಿತ ಜೀವನ ಕ್ರಮ ಆಪಣಾವನು ಆಸಚಿ ಭಾರತೀಯ ಸಂಸ್ಕೃತಿ ಆಜಿ ಆಧುನಿಕರಣ, ಕೌಟಂಬಿಕ ಮೌಲ್ಯ ವಿಸರೂನ ದುಡು ಸಂಪಾದನ ಕರಚೆಂಚಿ ಮುಖ್ಯ ಮ್ಹಣು ಚಿಂತನ ಕರಚೆ ವಿದ್ಯಾವಂತ ಲೋಕಾ ನಿಮಿತ ಆಮಗೆಲೆ ಸಂಸ್ಕೃತಿಕ ಅಪಾಯ ಆಯಲಾ. ತಾಂಕಾ° ಹ್ಯಾ ಭಜನ, ಹರಿಕಥಾ, ಯಕ್ಷಗಾನ, ನಾಟಕ ತಸಲೆ ಕಲಾಪ್ರಕಾರಾಂತು° ಉಮೇದಿ ನಾ. ತಾಕಾ ಸಮ ಜಾವನು ಆಮಗೆಲೆ ವಿದ್ಯಾಸಂಸ್ಥೆ, ಮುಖೆಲಿ ಲೋಕ ಹ್ಯಾ ಬದಲ ಕಾಳಜಿ ಘೆತಾ ನಾಂತಿ°. ಜಾಲ್ಯಾರಿ ಆಜಿಕಯಿ ಆಮಗೆಲೆ ಲೋಕಾಂಕ ಭಾರತೀಯ ಸಂಸ್ಕೃತಿ ಬದಲ ಉಮೇದಿ ಆಸಾ ಮ್ಹಣಚಾಕ ‘ಕಾಂತಾರ’ ಚಲಚನಚಿತ್ರಾಚೆ ಯಶ ನಿದರ್ಶನ ಜಾವನು ಘೆವಯೆತ ಮ್ಹಣು ಆಚಾರ್ಯಾ ಹಾಂನಿ° ಸಾಂಗಲೆ°.

ಫಣಿಗಿರಿ ಪ್ರತಿಷ್ಠಾನಾಚೆ ಪದಾಧಿಕಾರಿ, ಉಪ್ಪಿನಕುದ್ರು ಗೊಂಬೆಯಾಟ ಅಕಾಡೆಮಿಚೆ ಭಾಸ್ಕರ ಕೊಗ್ಗ ಕಾಮತ ಹಾಂನಿ° ಪ್ರಸಂಗಕರ್ತ ಕಂದಾವರ ರಘುರಾಮ ಶೆಟ್ಟಿ ಹಾಂಕಾ° ಸನ್ಮಾನ ಕೆಲೊ. ಯಕ್ಷಗಾನ ಕಲಾ ಕೇಂದ್ರ ಹಂಗಾರಕಟ್ಟೆಚೆ ಐರೋಡಿ ರಾಜಶೇಖರ ಹೆಬ್ಬಾರ ಹಾಂನಿ° ಸಭೆಚೆ ಅಧ್ಯಕ್ಷ ಆಶಿಲೆ. ಮ್ಹಾಲ್ಗಡೆ ವಿದ್ವಾಂಸ ಡಾ. ಕಬ್ಬಿನಾಲೆ ವಸಂತ ಭಾರದ್ವಾಜ ಮುಖೇಲ ಸೊಯ್ರೆ ಆಶಿಲೆ.

ಶಿರೂರು ಫಣಿಗಿರಿ ಪ್ರತಿಷ್ಠಾನಾಚೆ ಶಿರೂರು ಫಣಿಯಪ್ಪಯ್ಯ ಸಂಸ್ಮರಣಾರ್ಥ ಶಿರೂರು ಫಣಿಯಪ್ಪಯ್ಯ ವಿರಚಿತ ಪ್ರಸಂಗ ಸಂಪುಟ ಹಾಜೆ° ಮೊಕಳಿಕ ಜಾಲೆ°. ಕಂದಾವರ ರಘುರಾಮ ಶೆಟ್ಟಿ ಹಾಂಕಾ° “ಫಣಿಗಿರಿ ಪ್ರಶಸ್ತಿ – 2022” ಪ್ರದಾನ ಜಾಲೆ°. ರೋಟರಿ ಕುಂದಾಪುರ ದಕ್ಷಿಣ ಹಾಜೊ ಅಧ್ಯಕ್ಷ ಸತ್ಯನಾರಾಯಣ ಪುರಾಣಿಕ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ಉಮೇಶ ಶಿರೂರು ಹಾಂನಿ° ಪ್ರಾಸ್ತಾವಿಕ ಉತ್ರಂ ಸಾಂಗಲಿ°. ಕೃಷ್ಣಮೂರ್ತಿ ಬ್ರಕ್ಮಾವರ ಹಾಂನಿ° ಫಣಿಯಪ್ಪಯ್ಯ ಹಾಂಗೆಲೆ ತಾಳೆಗರಿ ಸಂಗ್ರಹ ಹಾಜೆ ಬದಲ ಮಾಹಿತಿ ದಿಲಿ. 77ವೆ° ಮ್ಹಯನಾಳೆ ಕಾರ್ಯಕ್ರಮ ಕರತಾ ಆಸಚೆ ಭಾಸ್ಕರ ಕೊಗ್ಗ ಕಾಮತ ಹಾಂನಿ° ತ್ಯಾ ಬದಲ ಮಾಹಿತಿ ದಿಲಿ. ಕವಿತಾ ಆಚಾರ್ಯ ಉಪಸ್ಥಿತ ಆಶಿಲಿಂತಿ. ಹೆರಂಜಾಳ ಗೋಪಾಲ ಗೌಡ ಆನಿ ಸಾಂಗಡ್ಯಾಲೆ° ಯಕ್ಷಗಾನ ಗಾನ ವೈಭವ ಪ್ರದರ್ಶನ ಜಾಲೆಂ. ಉಪ್ಪಿನಕುದ್ರು ಗೊಂಬೆಯಾಟ ಪಂಗಡಾನ ಪ್ರಾತ್ಯಕ್ಷಿಕಾ ದಿಲಿ. ಮಂಜುನಾಥ ಶಿರೂರು ಹಾಂನಿ° ಆಭಾರ ಮಾನಲೊ.

ಉಪ್ಪಿನಕುದ್ರು ಗೊಂಬೆಯಾಟಾಚಿ ಕಾಣಿ
17ವೆ° ಶೇಕಡೆಂತು° ಉಪ್ಪಿನಕುದ್ರು ಕಾಮತ ಕಟುಂಬೆಚೆ ಕೃಷ್ಣ ಬಾಬುರಾಯ ಕಾಮತ ಆನಿ ತಾಂಗೆಲೊ ಪೂತು ಲಕ್ಷ್ಮಣ್ ಭಾಗವತ ಹಾಂನಿ° ಸ್ಥಾಪನ ಕರನು ಗಾಂವ° ಗಾಂವ° ಭೊವನು ಹ್ಯಾ ಬೊಂಬೆಯಾಟಾಕ ಚಾಲನ ದಿಲೆಲೆ°. ಉಪರಾಂತ ಲಕ್ಷ್ಮಣ್, ನರಸಿಂಹ ಆನಿ ಮಂಜಯ್ಯ ಕಾಮತ ಬ್ಹಾಂವಡಾನಿ ತೀನ ಶತಮಾನ ಮಾಕ್ಷಿ ಕುಂದಾಪುರ ತಾಲೂಕೆಚೆ ಉಪ್ಪಿನಕುದ್ರು ಗಾಂವಾοತು° ಗಣೇಶ ಯಕ್ಷಗಾನ ಗೊಂಬೆಯಾಟ ಪಂಗಡ ಬಾಂದಿಲೆ°. ಲಕ್ಷ್ಮಣ್ ಕಾಮತ ಹಾಂಗೆಲೊ ನಾತು ಆನಿ ಚೌತೆ ಪಿಳಗಿಚೊ ದೇವಣ್ಣ ಕಾಮತಿನ ಹೀ ಕಲಾ ಎಕ ತಪಸ್ಯ ಶೆ° ಘೆವನು ಮುಕಾರ ವ್ಹೆಲಿ. ಆರ್ಥಿಕ ಪರಿಸ್ಥಿತಿಕ ಲಾಗೂನ 1941 ಇಸವಿಂತು° ದೇವಣ್ಣ ಕಾಮತ ಹಾಂನಿ° ಗೊಂಬೆಯಾಟ ಸ್ಥಬ್ದ ಕರಚೆಂ ಜಾಲೆ°. ಉಪರಾಂತ 1966 ಇಸವಿಂತು° ತೇದನಾ ಆಲ್ ಇಂಡಿಯಾ ಹ್ಯಾಂಡಿಕ್ರಾಫ್ಟ್ ಬೋರ್ಡ ಹಾಜಿ ಪಯಲಿ ಅಧ್ಯಕ್ಷಾ ಆಶಿಲಿ ಕೊಂಕಣಿ ಮನಿಶಿ ಕಮಲಾದೇವಿ ಚಟ್ಟೋಪಾದ್ಯಾಯ ಹಾಂನಿ° 75 ವರಸಾಚೆ ದೇವಣ್ಣ ಕಾಮತ ಹಾಂಕಾ° ಗೊಂಬೆಯಾಟ ಪರತೂನ ಶುರು ಕರಚಾಕ ಉಮೇದಿ ದಿಲಿ. 1966 ಇಸವಿಂತೂಚಿ ದೇವಣ್ಣ ಕಾಮತ ಹಾಂಕಾ° ದೇಶಾಚೆ ಗಣರಾಜ್ಯೋತ್ಸವಾಚೆ ಸಂದರ್ಭಾರಿ ರಾಷ್ಟ್ರಪತಿಲೊ ಸನ್ಮಾನ ಚಲಾ. ದೇವಣ್ಣ ಪದ್ಮನಾಭ ಕಾಮತ ಹಾಂಗೆಲೆ ಉಪರಾಂತ ಕೊಗ್ಗ ಕಾಮತ ಹಾಂನಿ° ಹಿ ವೃತ್ತಿ ಆಪಣಾಯಲಿ. ಕೊಗ್ಗ ಕಾಮತ ಹಾಂನಿ° ದೇಶ ವಿದೇಶಾಂತು° ಗೊಂಬೆಯಾಟ ಪ್ರದರ್ಶನ ದಿಲೆ°. ಕೆ. ಎಸ್. ಉಪಾದ್ಯಾಯ ಹಾಂನಿ° ಹ್ಯಾ ಬದಲ ಹಾಂಕಾ° ಸಹಕಾರ ದಿಲೆಲೊ ಆಸಾ.
ಆಜಿ ಸ್ಹವೆ ಪಿಳಗಿಚೆ ಭಾಸ್ಕರ ಕೊಗ್ಗ ಕಾಮತ ಹಾಂನಿ° ಗಣೇಶ ಉಕ್ಷಗಾನ ಗೊಂಬೆಯಾಟ ಮಂಡಳಿ ಹಾಜೆ° ಸಾರಥ್ಯ ಗೆತಿಲೆ° ಆಸಾ.

ಮಂಗಳೂರು: ನಾಗಾಲ್ಯಾಂಡ ಸಹಿತ 6 ರಾಜ್ಯಾಂಚೊ ರಾಜ್ಯಪಾಲ ಜಾವನು ಆಶಿಲೆ ಪಿ. ಬಿ. ಆಚಾರ್ಯ ಆನಿ ತಾಗೆಲಿ ಬಾಯಲ ಕವಿತಾ ಆಚಾರ್ಯ ಹಾಂನಿ° ಆರತಾಂ ಮಂಗಳೂರಾಕ ಆಯಿಲೆ ವೇಳಾರಿ ಉಡುಪಿಚೆ ಪ್ರಾಚ್ಯ ಸಂಚಯ ಸಂಸ್ಥೆಚೆ ಎಸ. ಎ. ಕೃಷ್ಣಯ್ಯ, ಸುಜಯ ಕೆ. ಎಸ್., ಶ್ರೀಧರ ಭಟ್ – ಕಲ್ಯಾಣಪುರ ಆನಿ ಪರಿಸರ ಚಿಂತಕ ರವಿ ಆಳ್ವ ಹಾಂನಿ° ಮೇಳನು ಗೌರವಾರ್ಪಣ ಕೆಲೆ°. ಹ್ಯಾ ವೇಳಾರಿ ಕೃಷ್ಣಯ್ಯ ಹಾಂನಿ° ವಿಶ್ರಾಂತ ರಾಜ್ಯಪಾಲಾಕ ತಾಂಗೆಲೆ ಸಂಸ್ಥೆನ ಕರಚೆ ಸೇವಾ ಕಾರ್ಯಾ ಬದಲ ಮಾಹಿತಿ ದಿಲಿ. ಹ್ಯಾಚ ವೇಳರ ತಾಂನಿ° ಆಚಾರ್ಯ ದಂಪತಿοಕ ‘50 ತುಳು ಸಾಹಿತ್ಯಗಳು’, ‘ಮೆಕ್ಕಿಕಟ್ಟೆ ಉರು’ (ಆಂಗ್ಲ ಕೃತಿ) ಆನಿ ‘ಉಡುಪಿ ಜಿಲ್ಲೆಯ ಜಾನಪದ’ ಕೃತಿಯೊ ಭೇಂಟ ದಿವಚೆ° ಜಾಲೆ°. “ಸಂಘಟಿತ ಜಾವನು ಆತ್ಮ ವಿಶ್ವಾಸು ವಾಡಯಾ. ಎಕಾಗ್ರತಾ ಆಪಣಾವನು ಕೆಲೆಲೆ° ಸರ್ವ ಕಾರ್ಯಾಂಕ ಸಫಲತಾ ಮೇಳತಾ. ಯೊಜನಾಭದ್ಧ ಕಾಮ ಕರತಲ್ಯಾಂಕ ಆರ್ತೀಕ ಬಲ ದಿತಲೆ ಆಸಾತಿ” ಮ್ಹಣು ಆಚಾರ್ಯ ಹಾಂನಿ° ಹ್ಯಾ ವೇಳಾರಿ ಸಾಂಗಲೆ°.
ಆರತಾ° ಪ್ರದರ್ಶನ ಜಾಲೆಲೆ° ಚಲನಚಿತ್ರ ‘ಕಾಂತಾರ’ ಹಾಜೆ ಉಧಾಹರಣ ದಿವನು ತಾಂನಿ° ಭಾರತೀಯ ಸಂಸ್ಕೃತಿ ರಾಖಚೆ° ಕರಕಾ ಮ್ಹಣು ಸಾಂಗಲೆ°. ರಾಷ್ಟ್ರೀಯತಾ ವಾಡೊಚೆ° ಕರಕಾ, ದೇಸಾಚಿ ಪರಿಸ್ಥಿತಿ ನಾಜೂಕ ಆಸಾ ಮ್ಹಣೂಯಿ ತಾಂನಿ° ಚಿಂತಾ ವ್ಯಕ್ತ ಕೆಲಿ.

ಕೊಡಿಯಾಲ ಖಬರ ಸಂಪಾದಕ ವೆಂಕಟೇಶ ಬಾಳಿಗಾ ಮಾವಿನಕುರ್ವೆ ಆನಿ ಕೊಂಕಣಿ ಎಂ. ಎ ಪ್ರಾದ್ಯಾಪಿಕಾ ವಿದ್ಯಾ ವಿ. ಬಾಳಿಗಾ ಮಾನಾಚೆ ಸೊಯ್ರೆ ಆಶಿಲೆ. ಆಚಾರ್ಯ ದಂಪತಿನ ಸಗಟಾಂಕ ನಾಗಾಲ್ಯಾಂಡಾಚೆ ಸಾಂಪ್ರದಾಯಿಕ ಶಾಲ ಪಾಂಗರೂನ ಸನ್ಮಾನ ಕೆಲೊ. ಕದ್ರಿ ದೇವಳಾಚೆ ಮೆನೇಜರ್ ಅರುಣ ಜೋಗಿ, ಹಿಂದಿ ಸಾಹಿತ್ಯ ವಿಮರ್ಶಕಾ ಅರ್ಚನಾ ಶೆಣೈ, ಸಮಾಜ ಸೇವಕ ಗೋಪಾಲಕೃಷ್ಣ ಶೆಣೈ ಆನಿ ಟೈಮ್ಸ್ ಆಫ್ ಕುಡ್ಲ ಹಾಜಿ ಪ್ರತಿನಿಧಿ ಶೃತಿ ಉಪಸ್ಥಿತ ಆಶಿಲಿಂತಿ.