कोडियाल: “कोंकणी समाजाक कोंकणी भासच आमगेली अस्मिताय आनी विश्वास, आयच्या जगांत आमची आवय भास कोंकणी तर उरल्यार आमचो समाज आसता नासल्यार समाज दूसरे समाजांत विलीन जाता. त्या खातीर विश्व कोंकणी केंद्राचो कोंकणी कार्यावळां आपण्याक खूब आवडता”. अशें गोंयचो फ़ोमेंटो उद्देमीक समूहाचो अध्यक्ष भोमानेस्त अवधूतबाब तिंबलो हांनी म्हळ्ळें. ते विश्व कोंकणी केंद्रांत घडलेल्या ‘कोंकणी समारोह २०२४’ दबाज्यांत मुखैल सोयरो जावन टी. विमला वी पै विश्व कोंकणी साहित्य पुरस्कार आनी बस्ती वामन शेणै सॆवा पुरस्कार प्रदान करून आपण्याले उत्रांत तानीं सांगलें. कोंकणीचे प्रसरणाचे काम ‘मळबांत विध्यापीठ’ म्हळ्यार आधुनिक तंत्रज्ञान वापुरून करूक जाय म्हणु सल्ला दिल्ली. फ़ा. मोहिजिनो दे आताइद हांका जीवन सिद्धी सम्मान, प्रकाश डी नायक हांका कविता कृती पुरस्कार, सेवा भारती संस्थेक आनी श्रीमती वीणा अडिगे हांका बस्ती वामन शेणै सेवा पुरस्कार प्रदान केल्लो. मेघा पैन कोंकणी अभीमान गीत गायलो, अध्यक्ष सीऎ नंदगोपल शेणै हानी येवकार दिलो. विश्व कोंकणी केंद्राच्या गौरवाध्यक्ष डॉ. पी दयानंद पै आनी टी.वी.मोहन्दास पै हांचो संदॆश प्रसार जालो. कर्नाटक राज्योत्सवाचो जिल्ला प्रशस्ती फ़ावो जालेल्या विश्वस्थ विलियम डी’सौजा हांका अभिनंदन पेटौन सम्मान जालो. कोंकणी भास बरौव्पाचे सर्तांत मंग्ळूरच्या नलंदा आंग्ल माध्यम शाळेचो गगन भट्ट आनी गोंयचो अक्षय प्रकाश नायक हांका भोवमान मुखैल सोयर्यान दिलो. तांचे धन्यवादाचे उत्रांत विश्व कोंकणी केंद्राचो गौरव सचीव डा. कस्तूरी मोहन पै हांनीं गोंय सावन थळांतर आयिल्या कर्नाटक आनी केरळ लोकानी कोंकणी भास कशें दवरून घेतली आनी ताची उदरगत कशें केल्ली म्हणुन सांगलें आनी सोयर्यांक धन्यवाद सांगलें आनी देव ब्रे करूं म्हळाले. कार्यावळेंत तीन उपाध्यक्ष गील्बर्ट डी’सौज़ा, कुड्पी जगदीश शेणै, डॉ. कीरण बुडुकुले, गौरव खजांची बी.आर.भट्ट, विश्वस्थ रमेश नायक, मेल्वीन रोड्रिगस,शकुंतला कीणी, वतीका पै, विलीयम डी’सौज़ा, नारायण नायक उपस्थीत आशील्ले. स्मीता शेणै आनी सुचित्रा शेणै हानीं कार्यावळेची सूत्र संचालन केलें. केरळ, कर्नाटक, गोंय आनी महारास्ट्र सावन खूब प्रतिनीधी आशिल्ले.    

To Support Kodial Khaber click the following button.

ಮಂಗಳೂರು: ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿನ ಹರ ವರಸ ಕೊಂಕಣಿ ಸಾಹಿತ್ಯ, ಕಲಾ, ಜಾನಪದ ಕ್ಷೇತ್ರಾಂತ ಸಾಧನಾ ಕೆಲೆಲೆ ಮ್ಹಾಲ್ಗಡೆಂಕ ವಿಂಚೂನ ಗೌರವ ಪ್ರಶಸ್ತಿ ಆನಿ ಕೊಂಕಣಿ ಕವನ, ಸಾನ ಕಾಣಿಯೊ, ಕಾದಂಬರಿ, ಲೇಖನ ಆನಿ ಭಾಷಾಂತರ ಪುಸ್ತಕಾಂಕ ಪುಸ್ತಕ ಪುರಸ್ಕಾರ ದಿವಚೊ ಕಾರ್ಯಕ್ರಮ ಹ್ಯಾ ವರಸ ನವೆಂಬರ್ 10ಕ ಹೊನ್ನಾವರಚೆ ಕಾಸರಕೋಡಾಚೆ ಶ್ಯಾನಭಾಗ್ ರೆಸಿಡೆನ್ಸಿಚೆ ವಠಾರಾಂತ ಚಲಚೆ ಆಸಾ.
ಗೌರವ ಪ್ರಶಸ್ತಿಯೊ ಹಾಂಕಾ° ಫಾವೊ ಜಾತಾ.
ಕೊಂಕಣಿ ಸಾಹಿತ್ಯ: ಮಾರ್ಸೆಲ್ ಎಮ್. ಡಿಸೋಜ, ಮಂಗಳೂರು,
ಕೊಂಕಣಿ ಕಲಾ: ಹ್ಯಾರಿ ಫೆರ್ನಾಂಡಿಸ್, ಮುಂಬಯಿ,
ಕೊಂಕಣಿ ಜಾನಪದ: ಅಶೋಕ್ ದಾಮು ಕಾಸರಕೋಡ್.
ಪುಸ್ತಕ ಪುರಸ್ಕಾರ:
ಕೊಂಕಣಿ ಕವನ : "ಅಟ್ವೊ ಸುರ್" - ಮೇರಿ ಸಲೋಮಿ ಡಿಸೋಜ, ಬಂಟ್ವಾಳ
ಕೊಂಕಣಿ ಸಾನ ಕಾಣಿಯೊ: "ಪಯ್ಲಿ ಭೆಟ್" - ಫಾ.ರೊಯ್ಸನ್ ಫೆರ್ನಾಂಡಿಸ, ಹಿರ್ಗಾನ್
ಕೊಂಕಣಿ ಭಾಷಾಂತರ: "ಎಕ್ಲೊ ಎಕ್ಸುರೊ" - ಸ್ಟೀಫನ್ ಮಸ್ಕರೇನ್ಹಸ್ (ಹೇಮಾಚಾರ್ಯ), ಮಂಗಳೂರು
ಗೌರವ ಪ್ರಶಸ್ತಿ ಸಾಂಗತ ರೂ. 50,000/-ನಗದ, ಪ್ರಮಾಣ ಪತ್ರ, ಶಾಲ, ಹಾರ, ಪೇಟ, ಸ್ಮರಣಿಕಾ, ಫಲಪುಷ್ಪ ಆಸತಾ.
ಪುಸ್ತಕ ಪುರಸ್ಕಾರಾಚೆ ಸಾಂಗತ ರೂ.25,000/- ನಗದ, ಪ್ರಮಾಣ ಪತ್ರ, ಶಾಲ, ಹಾರ, ಸ್ಮರಣಿಕಾ, ಫಲಪುಷ್ಪ ಆಸತಲೆಂ.
ಕರ್ನಾಟಕ ಸರ್ಕಾರಾಚೊ ಮೀನುಗಾರಿಕೆ, ಬಂದರು ಮತ್ತು ಒಳನಾಡು ಜಲಸಾರಿಗೆ ಆನಿ ಉತ್ತರ ಕನ್ನಡ ಜಿಲ್ಲೆಚೊ ಉಸ್ತುವಾರಿ ಮಂತ್ರಿ ಮಂಕಾಳ ಎಸ್. ವೈದ್ಯ ಹಾಂನಿ° ಪ್ರಶಸ್ತಿ ಪ್ರದಾನ ಕರತಾತಿ. ಶಾಸಕ ಸತೀಶ್ ಸೈಲ್, ಕುಮಟ-ಹೊನ್ನಾವರ ಶಾಸಕ ದಿನಕರ ಶೆಟ್ಟಿ, ಕಾಸರಕೋಡು ಪಂಚಾಯತ ಅಧ್ಯಕ್ಷಾ ಮಂಕಾಳಿ ಪ್ರಕಾಶ್ ಹರಿಜನ್ ಆನಿ ಹೇರ ಮಾನಾಚೆ ಸೊಯ್ರೆ ಆಸತಲೆ ಮ್ಹಣು ಅಕಾಡೆಮಿಚೆ ಕಳವಣಿಂತು° ಸಾಂಗಲಾ°.

ಮಂಗಳೂರು: ನವಾರಾತ್ರಿ ಶುರು ಜಾಲ್ಯಾ. ರಸ್ತೆ ಸಗಟ ಶೃಂಗಾರಾನ ಪರಜಳತಾ ಆಸಾತಿ. ರಥಬೀದಿಚೆ ಆಚಾರ್ಯ ಮಠಾಚೆ ಸಾರ್ವಜನಿಕ ಶಾರದಾ ಉತ್ಸವ ಆರಂಭ ಜಾವನು 102 ವರಸ ಜಾಲ್ಯಾಂತಿ. ಕುದ್ರೊಳಿ ಶ್ರೀ ಗೋಕರ್ಣನಾಥ ಕ್ಷೇತ್ರಾಂತು ಶಾರದಾ ಉತ್ಸವ ಶುರು ಜಾವನು 35 ವರಸ° ಜಾಲ್ಯಾಂತಿ. ಸಾಬಾರ ವರಸ ದಾಕೂನ ಮಂಗಳೂರು ದಸರ ಮ್ಹಣೂನ ಘೆವಚೆ ಹ್ಯಾ ಉತ್ಸವ ಆಜಿ ರಾಜ್ಯ ಭರ ದಾಕೂನ ಭಜಕಾಂಕ ಮಂಗಳೂರಾಕ ತಾಂಡೂನ ಹಾಡತಾ ಆಸಾ. ಈತಿಹಾಸ ಪ್ರಸಿದ್ಧ ಶ್ರೀ ಮಂಗಳಾದೇವಿ ದೇವಳಾಂತೂಯಿ ಆದಿ ದಾಕೂನ ಜಾತ್ರಾ ಹ್ಯಾಚ ವೇಳಾರ ಚಲಚೆ° ಆಸಾ. ಮಂಗಳೂರ ಮ್ಹಣು ನಾಂವ ಆಯಿಲೆ° ಹ್ಯಾಚ ದೇವಿಲೆ ನಿಮಿತ ಮ್ಹಣು ಸಾಂಗತಾತಿ. ಕೊಡಿಯಾಲ ಖಬರ ತುಮಕಾ ಹ್ಯಾ ಬದಲ ವಿಶೇಷ ಮಾಹಿತಿ ದಿವಚೆ° ಕರತಾ ಆಸಾ. ನಾವಾದೀಕ ಫೋಟೊಗ್ರಾಫರ ಕೃಷ್ಣ ನಾಯಕ ಹಾಂನಿ ತಾಂಗೆಲೆ ಕ್ಯಾಮಾರಾಂತು ಧರಲೆಲೆ ಥೋಡಿ° ತಸ್ವಿರಾ° ಹಾಂಗಾ ಪ್ರಕಟ ಕೆಲ್ಯಾಂತಿ. ಮಂಗಳೂರಚೆ ರಸ್ತೆಚೊ ಶೃಂಗಾರ, ದೇವಳಾ ಮುಕಾರಚೆ ದೃಶ್ಯ°, ದಸರಾಚೆ ವೇಸ, ಸಾಂತ ಆಶೆ° ಖೂಬ ತಸ್ವಿರ° ತಾಣೆ ದಾಡಿಲೆ° ಆಸಾ. 

ಮಂಗಳೂರು: ಶಕ್ತಿ ಪಿ. ಯು. ಕಾಲೇಜಾಂತು° ಉಪನ್ಯಾಸಕ ಜಾವನು ಸೇವಾ ದಿವನು ಆಸಚೆ ಸಬಿತಾ ರಂಜಿತ್ ರಾವ್ ಹಾಂಕಾ° ಆರತಾ° ಘಡಲೆಲೆ ಸ್ಪರ್ಧೇಂತು ಮಿಸಸ್ ಕರ್ನಾಟಕ ಕ್ಲಾಸಿಕ್ - 2024  ಪುರಸ್ಕಾರ ಲಾಭಲಾ. ಹಾಜೇನ ಡಿಸೆಂಬರ್ ಮ್ಹಯನ್ಯಾಂತು° ರಾಜಸ್ಥಾನಾಚೆ ಜೈಪುರಾಂತು° ಘಡಚೆ ರಾಷ್ಟ್ರೀಯ ಸ್ಥರಾಚೆ ಮಿಸಸ್ ಇಂಡಿಯಾ ಕ್ಲಾಸಿಕ್ ಸ್ಪರ್ಧೇಂತು° ವಾಂಟೊ ಘೆವಚೊ ಅವಕಾಶ ಹಾಂಕಾ° ಮೆಳಾ. ದೋನ ಚೆರಡುವಾಂಲಿ ಆವಸು ಜಾವನು ಆಸಚೆ ಹಾಂನಿ° ಜೆ.ಸಿ.ಐ ಇಂಪಾಕ್ಟ್ ಆನಿ ಸಾಧನಾ ಬಳಗ ಮಂಗಳೂರು ಹಾಜೆ ಸದಸ್ಯ ಜಾವನೂಯಿ ಆಸಾತಿ. ಹ್ಯಾ ಪಯಲೆ° ಮಂಗಳೂರಾoತು° ಘಡಲೆಲೆ ಸ್ಫರ್ಧೇಂತು° ಹಾಂನಿ° ವಿಜೇತ ಜಾಲ್ಯಾಂತಿ. ಬಿ.ಎಸ್ಸಿ, ಬಿ. ಎಡ್, ಎಂ.ಎ (ಎಡುಕೇಶನ್), ಪಿ.ಜಿ. ಡಿ.ಸಿ (ಕೌನ್ಸೆಲಿಂಗ್) ಆನಿ ಎಂ. ಎ (ಹಿಂದಿ) ಪದವೀದರಾ ಜಾವನು ಆಸಾತಿ. ಪ್ರತಿಭಾಶಾಲಿ ಜಾವನು ಆಸಚೆ ಹಾಂನಿ° ಕೊಂಕಣಿ ನಾಟಕ "ಘೊಟಾಳೊ" ಹಾಂತು ನಟನ ಕೆಲೆಲೆ° ಆಸಾ.

मंगळूरु: मंगळूरच्या विश्व कोंकणी केंद्रांत कोंकणी मान्यताय दीसाचो सुवाळ्यांत मंगळूरु विद्यापीठांत ७ एम.ये कोंकणी शिकपीयांक आनी तीन शिकोवप्यांक रू. १०००० चे भोमान केंद्राच्या तर्पेन अध्यक्ष नंदगोपाल शेणै आनी तांची घरकार्णी श्रीमती उषा शेणै दंपतीन फ़ावो केलो. सुवाळ्यांत कर्नाटकाच्या हळियाळ प्रांथाचे श्रीमती लक्ष्मी सिद्धी आनी पंगडान ‘सिद्धी नाच आनी बजपेच्या मोहन गौडा-शेखर गौडा हांचे पंगडान कुडुमी गुमट आनी तोनया खेळाचे झलक दाखयलो. तांका केंद्राच्या तर्पेन भोमान जालो. श्रीमती सबीता मरोळी कामत हांचे मुखैलपणांत ‘लग्नांचो होवियो’ प्रदर्शन दिल्लें. केंद्राचो गौरव सचीव डा. कस्तुरी मोहन पै हांनी मान्यताय दीसाचो महत्व, गोंय आनी मंगळूराचे कोंकणी संबंधाचेर म्हायती दिल्ली. सिद्धी समाजाचे मुखैल बोस्त्याम सिद्धी हांचे भावचित्र तांच्या धर्म पतीन आनी कुटुमाच्यान कोंकणी कीर्ती मंदिरांत अनावरण केलें. सुवाळ्यांत केंद्राच्या दोन उपाध्यक्ष गिल्बर्ट डीसोझ आनी कुडुपी जगदीश शेणै हांका सम्मान जालो. श्रीमती सुचित्रा शेणाय हांनी कार्यावळेचें सूत्र संचालन केलें आनी श्रीमती सुचित्रा नायक हांनी संघटन केलो. खजांची बी.आर.भट्ट. विश्वस्थ रमेश नायक, शकुंतला किणी हांनी सभा मांडयलो. आडळीत अधिकारी डा. देवदास पै हांनी उपकार मागुन देवबरे करूं म्हळ्ळें.     

ಮಂಗಳೂರು: 43 ವರಸ ದಾಕೂನ ಮಂಗಳೂರು ಶಹರಾಂತು° ಕೊಂಕಣಿ ಭಾಸ ಆನಿ ಸಂಸ್ಕೃತಿಚಿ ಸೇವಾ ಕರನು ಆಸಚೊ ಸಂಸ್ಥೊ ಕೊಂಕಣಿ ಸಾಂಸ್ಕçತಿಕ ಸಂಘ (ರಿ.) ಮಂಗಳೂರು ಹಾಂನಿ° ಮೇ 31ಕ ಕೊಡಿಯಾಲಚೆ ಕುದಮುಲ್ ರಂಗ ರಾವ್ ಪುರಭವನಾಂತು° "ಸೀತಾ ಕಲ್ಯಾಣ" ಕೊಂಕಣಿ ಕಾಲಮಿತಿ ಯಕ್ಷಗಾನ ಪ್ರಸ್ತುತ ಕರತಾತಿ. ಸಾಂಜವೇಳಾ 5.30ಕ ಚಲಚೆ ಉಗ್ತಾವಣ ಸುವಾಳ್ಯಾಂತು° ಟಾಟಾ ರಿಫ್ರೇಕ್ಟರಿಸ್ ಹಾಜೊ ನಿವೃತ್ತ ಆಡಳಿತ ನಿರ್ದೇಶಕ ಸಿ.ಡಿ. ಕಾಮತ್, ದೇವಗಿರಿ ಚಹಾಚೊ ಮಾಲಕು ನಂದಗೋಪಾಲ ಶೆಣೈ, ಎಸ್.ಎಲ್. ಶೇಟ್ ಜುವೆಲ್ಲರ್ಸ್ ಅಂಡ್ ಡೈಮಂಡ್ಸ್, ಕೆ. ಎಸ್. ರಾವ್ ರಸ್ತೊ ಮಂಗಳೂರು ಹಾಜೊ ಪ್ರಶಾಂತ್ ಶೇಟ್ ಆನಿ ಸಾಧನಾ ಬಳಗ ಹಾಜೊ ಗೌರವಾಧ್ಯಕ್ಷ ನರಸಿಂಹ ಭಂಡಾರ್‌ಕಾರ್ ಮಾನಾಚೆ ಸೊಯ್ರೆ ಆಸತಲೆ. ಹ್ಯಾ ಯಕ್ಷಗಾನ ಖೇಳಚಾಕ ಯಕ್ಷಕಲಾವಿದ ಗಣೇಶಪುರ ಗಿರೀಶ್ ನಾವಡ ಹಾಂನಿ° ದ ತರಬೇತಿ ದಿಲ್ಯಾ. ಸಾಹಿತ್ಯ ಎಂ. ಶಾಂತರಾಮ ಕುಡ್ವ, ಮೂಡುಬಿದಿರೆ ಹಾಂಗಲೆ° ಜಾವನು ಆಸಾ.
ದೇವಾದಿನ ಜಿ. ಜಿ. ವಾಸುದೇವ ಪ್ರಭಹು ಹಾಂನಿ° ಸ್ಥಾಪನಾ ಕೆಲೆಲೆ ಹ್ಯಾ ಸಂಸ್ಥೆoತು° ಆಜಿ ಸಾಬಾರ 600 ಸಾಂದೆ ಆಸಾತಿ ಆನಿ ವಸರಸಾಕ ಸಾಬಾರ ಕಾರ್ಯಕ್ರಮ ಆಯೋಜನ ಕರತ ಆಸಾತಿ ಮ್ಹಣು ಸಂಘಾಚೊ ಅಧ್ಯಕ್ಷ ಮಣೇಲ್ ಗಜಾನನ ಶೆಣೈನ ಪತ್ರಿಕಾ ಪರಿಶಧೆಂತು° ಕಳಯಲಾ°. ಹ್ಯಾಚ ಕಾರ್ಯಕ್ರಮಾಂತು° ಕಟೀಲು ಮೇಳಾಚೊ ಕಲಾವಿದ ಗಣೇಶ್ ಪಾಲೆಚಾರ್ ಹಾಂಕಾ° "ಕೊಂಕಣಿ ಸಾಂಸ್ಕೃತಿಕ ರಾಯಭಾರಿ" ಬಿರುದು ದೀವನು ಸನ್ಮಾನ ಚಲಚಾ ಆಸಾ. ಪತ್ರಿಕಾ ಪರಿಶದೇಂತು° ಕಾರ್ಯದರ್ಶಿ ಕೃಷ್ಣ ಕಾಮತ್, ಖಜಾಂಚಿ ರತ್ನಾಕರ ಕುಡ್ವಾ ಎಂ. ಆನಿ ಯಕ್ಷಗಾನ ಕಲಾವಿದ ಆನಿ ಲೇಖಕು ಎಂ. ಶಾಂತಾರಾಮ ಕುಡ್ವಾ, ಮೂಡುಬಿದಿರೆ ಉಪಸ್ಥಿತ ಆಶಿಲೆ.

To Support Kodial Khaber click the following button.

ಜಿ.ಎಸ್.ಬಿ.ಮಹಿಳಾ ವೃಂದ (ರಿ), ಮಂಗಳೂರು, ಹಾಜೆ 2024-25 ವರಸಾಚೆ ಮಹಾ ಸಭಾ 27-5-2024 ದಿವಸು ಗೋಕರ್ಣ ಮಠಾಚೆ ಸಭಾಗೃಹಾಂತು ಮಾಲಗಡೆ ಸಾಂದೆ, ಮರೋಳಿ ಸಬಿತಾ ಕಾಮತ್ ಹಾಂಗೆಲೆ ಮುಖೇಲಪಣಾರಿ ಚಲೆ. ನಿಕಟಪೂರ್ವ ಅಧ್ಯಕ್ಷಾ ನಯನಾ ರಾವ್ ಹಾಂನಿ ನೂತನ ಅಧ್ಯಕ್ಷಾ ಪೂರ್ಣಿಮಾ ಭಂಡಾರ್ಕರ್ ಹಾಂಕಾ ಅಧಿಕಾರು ಒಪಸೂನ ದಿಲೊ. ನೂತನ ಅಧ್ಯಕ್ಷಾನ ನಯನಾ ರಾವ್ ಹಾಂಕಾ ಫಲ, ಯಾದಸ್ತಿಕಾ ದೀವನು ಸಮ್ಮಾನು ಕೆಲೊ. ಉಪಾಧ್ಯಕ್ಷಾ ಜಾವನು ವಿಜಯಲಕ್ಷ್ಮಿಕಾಮತ್, ಕಾರ್ಯದರ್ಶಿ ಮಮತಾ ಕಾಮತ್, ಸಹ ಕಾರ್ಯದರ್ಶಿ, ಗಾಯತ್ರಿ ಪ್ರಭು, ಕೋಶಾಧಿಕಾರಿ ವಸುಧಾ ಬಾಳಿಗಾ ಆನಿಕ ಸಹ ಕೋಶಾಧಿಕಾರಿ ಜಾವನು ಮೀನಾಕ್ಷಿ ಎನ್. ಪೈ ವಿಂಚೂನ ಆಯಿಲಿಂತಿ.

ಮರೋಳಿ ಸಬಿತಾ ಕಾಮತ್, ಎ. ಗೀತಾ ಕಾಮತ್, ಚಂದ್ರಿಕಾ ಮಲ್ಯ, ಪ್ರಭಾ ಪೈ ಆನಿಕ ಗೀತಾ ಸಿ. ಕಿಣಿ ಸಲಹಾ ಸಮಿತಿಚೆ ಸಾಂದೆ ಜಾವನು ನೇಮಕ ಜಾಲಿಂತಿ. ತಶೀಂಚಿ ನಯನಾ ರಾವ್, ನಂದಿನಿ ಶೆಣೈ ಆನಿಕ ಸಪ್ನಾ ಕಾಮತ್ ಹಾಂನಿ ಕಾರ್ಯಕಾರಿ ಸಮಿತಿಚೆ ಇತರ ಸಾಂದೆ ಜಾವನು ನೇಮಕ ಜಾಲಿಂತಿ.

ವಿಜಯಲಕ್ಷ್ಮೀ ಕಾಮತ್ ಹಾನಿ ಆದರೆ ವರಸಾಚೆ ವರದಿ ವಾಚನ ಕೆಲೆ°. ಕೋಶಾಧಿಕಾರಿ, ವಸುಧಾ ಬಾಳಿಗಾ ಹಾಂನಿ 2023-24 ವರಸಾಚೆ ಲೇಕ ಪೋಕ ಮಂಡನ ಕೆಲೆ. 2024-25 ವರಸಾಚೆ ಲೆಕ್ಕ ಪರಿಷೋಧಕ ಜಾವನು ನಕುಲ್ ಪೈ ಹಾಂನಿ ನಿಯೋಜಿತ ಜಾಲಿಂತಿ. ನೂತನ ಅಧ್ಯಕ್ಷಾನ ಸಗಟ ಸಾಂದೆಲಾಗಿ ಸಹಕಾರು ಮಾಗಲೊ. ತಿಗೆಲೆ ಮುಖೆಲಪಣಾರಿ ಸಮಾಜ ಸೇವಾ ಬರೆ° ತರಾನ ಜಾವೊ ಮ್ಹೊಣು ಆಶಾ ವ್ಯಕ್ತ ಕೆಲಿ. ನಯನಾ ರಾವ್ ಹಾಂನಿ ತಿಗೆಲೆ ಅಧಿಕಾರಾಚೆ ಅವಧಿಂತು ತಿಕಾ ಸಹಾಯ ಕೆಲೆಲೆ ಸಗಟ ಸಾಂದೆಂಕ ಧನ್ಯವಾದು ದಿಲೊ. ಸಬಿತಾ ಕಾಮತಿನ ಹೇರ ಪ್ರಕಟಣಾ ಕೊಂದನು ಆಹಾರ ಮಾಗಲೆ. ಶಾಂತಿ ಪಾಠು ಜಾತರಿ ಸಭಾ ಸಾಂಪಲಿ. ವೀರ ವಿಠಲ ದೇವಾಕ ಪೂಜಾ ಜಾತರಿ ಪ್ರಸಾದ ರೂಪಾರಿ ಭೋಜನ ವ್ಯವಸ್ಥಾ ಆಶಿಲಿ. ಸಾಬಾರ 120 ಸಾಂದೆ ಹಾಜರ ಆಶಿಲಿಂತಿ.

To Support Kodial Khaber click the following button.

ಮಂಗಳೂರು: ಕೊಂಕಣಿ ಭಾಶೆಂತು° ವ್ಹಿಂಗಡ ಭಾಶೆಂತ ಆಸಲ್ಯಾ ಮ್ಹಣಕೆ ಸಾಬಾರ ಬೋಲಿ ಆಸಾತಿ. ತ್ಯಾ ದೆಕೂನ ಮುಕಾವಯಲೆ ಪಿಳಗಿನ ಕೊಂಕಣಿ ಭಾಸ ಶಿಖೂನು ವರೊವಚೆ° ಕರಕಾ. ಕರ್ನಾಟಕ ರಾಜ್ಯಾಂತ ಸ್ಹವೆಂ ಕಕ್ಷಾ ದಾಕೂನ ಐಚ್ಛಿಕ ಭಾಸ ಜಾವನು ಕೊಂಕಣಿ ಭಾಸ ಶಿಖುಂಕ ಅವಕಾಶ ಆಸಾ. ಜಾಲ್ಯಾರ ಹ್ಯಾ ಬದಲ ಕೊಂಕಣಿ ಲೋಕಾನ ಚಡ ಉಮೇದಿ ದಾಕೊವಚೆ° ಜಾವಕಾ" ಮ್ಹಣು ಕನಾರ್ಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಅಧ್ಯಕ್ಷ ಸ್ಟ್ಯಾನಿ ಅಲ್ವಾರಿಸ್ ಹಾಂನಿ° ಸಾಂಗಲೆ°. ಮಂಗಳೂರ ದಾಕೂನ ಪ್ರಕಟ ಜಾವಚೆ° ಕೊಡಿಯಾಲ ಖಬರ ಡಾಟ್ ಕಾಮ್ ತರಪೇನ ಮೇ 19, 2024ಕ ಮಂಗಳೂರಚೆ ಕದ್ರಿ ಮಲ್ಲಿಕಟ್ಟೆಚೆ ಲಯನ್ಸ್ ಸೇವಾ ಮಂದಿರಾoತು° "ಸಾರಸ್ವತ ಕೊಂಕಣಿ ಪುರಸ್ಕಾರ" ಪ್ರದಾನ ಕರನು ತಾಂನಿ° ಉಲಯತಲೆ.

2007 ವರಸಾಂತು° ಶುರುವಾತ ಜಾಲೆಲೆ ಕೊಂಕಣಿ ಪಾಕ್ಷಿಕ ಪತ್ರಿಕಾ, ಡಿಜಿಟಲ್ ಮಾಧ್ಯಮ 'ಕೊಡಿಯಾಲ ಖಬರ ಡಾಟ್ ಕಾಮ್' ಜಾವನು ರೂಪಾಂತರ ಜಾವನು ಚಾರ ವರಸ° ಜಾಲ್ಯಾಂತಿ. ವಾಚಕಾಲೆ ಸಹಯೋಗಾನ ಆಜಿ ಸಾಬಾರ ವೀಸ ಹಜಾರ ಲೋಕ ಹರ ದೀವಸ ಸೈಟಾಕ ಭೇಟಿ ದಿತಾ ಆಸಾತಿ ಮ್ಹಣು ಸಂಪಾದಕ ವೆಂಕಟೇಶ ಬಾಳಿಗಾ ಮಾವಿನಕುರ್ವೆ ಹಾಂನಿ° ಸ್ವಾಗತ ಭಾಷಣಾಂತು° ಕಳಯಲೆ°.
ಡಾ. ಕಸ್ತೂರಿ ಮೋಹನ ಪೈ ಹಾಂಕಾ° 'ಕೊಂಕಣಿ ಸಾಹಿತ್ಯರತ್ನ ಪ್ರಶಸ್ತಿ', ಗೀತಾ ಸಿ. ಕಿಣಿ ಹಾಂಕಾ° 'ಕೊಂಕಣಿ ಸಂಘಟನಾರತ್ನ ಪ್ರಶಸ್ತಿ', ಮಂಗಳೂರು ಕೆ. ಎಸ್. ರಾವ್ ರಸ್ತೆಚೆ 'ಮೆ. ಎಸ್. ಎಲ್. ಶೇಟ್ ಜ್ಯೂವೆಲ್ಲರ್ಸ್ ಎಂಡ್ ಡೈಮಂಡ್ ಹೌಸ್' ಹಾಂಕಾ° 'ಕೊಂಕಣಿ ಪೋಷಕರತ್ನ ಪ್ರಶಸ್ತಿ', ಕುಂಬ್ಳೆ ನರಸಿಂಹ ಪ್ರಭು ಹಾಂಕಾ° 'ಕೊಂಕಣಿ ಉದ್ಯಮರತ್ನ ಪ್ರಶಸ್ತಿ' ಆನಿ ಡಾ. ಅರವಿಂದ್ ಶ್ಯಾನುಭಾಗ ಬಾಳೇರಿ, ಕುಮಟಾ ಹಾಂಕಾ° 'ಕೊಂಕಣಿಯುವ ರತ್ನ ಪ್ರಶಸ್ತಿ' ಪ್ರದಾನ ಜಾಲೆಂ. ಡಾ. ಕಸ್ತೂರಿ ಮೋಹನ ಪೈ ಹಾಂಗೆಲೆ ಅನುಪಸ್ಥಿತಿರಿ ಬಾಯಲ ಉಷಾ ಮೋಹನ ಪೈ ಹಾಂನಿ° ಪ್ರಶಸ್ತಿ ಸ್ವೀಕಾರ ಕೆಲೆ°.

ಪ್ರಶಸ್ತಿ ಸ್ವೀಕಾರ ಕರನು ಸಮ್ಮಾನಿತ ಉಲಯಲೆ. "ಮಾಕಾ ಕೊಂಕಣಿ ಭಾಸ ವಾಪರೂನ ಬರೊವಚಾಕ ವೆಂಕಟೇಶ ಬಾಳಿಗಾ ಹಾಂನಿ° ಕಾರಣ ಜಾವನು ಆಸಾತಿ. 2010 ವರಸಾಂತು° ತಾಂನಿ° ಮಾಕಾ ಎಕ ಪಾಕಿಟ್ ಡಿಕ್ಷನರಿ ದಿವನು ಬರೊವಚಾಕ ಶುರು ಕರಿ ಮ್ಹಣು ಸಾಂಗಿಲೆ ನಿಮಿತ ಹಾಂವ ಆಜಿ ಇತಲೆ° ಬರೊವಚಾಕ ಜಾಲೆ°" ಮ್ಹಣು ಡಾ. ಅರವಿಂದ ಶ್ಯಾನುಭಾಗ ಹಾಂನಿ° ಸಾಂಗಲೆ°. "ಉದ್ಯಮ ಶುರು ಕರಚಾಕ ಪ್ರಾಯ ಮುಖ್ಯ ನ್ಹಹಿ°. ಮನ ಮುಖ್ಯ. ಐಡಿಯಾ ಮುಖ್ಯ ಜಾತಾ. ಆಮಗೆಲೆ ತರನಾಟೆನಿ ಉದ್ಯಮಶೀಲತಾ ವಾಡೊಕಾ. ಬಂಡವಾಳ ಆನಿ ಹೇರ ವಿಷಯ ಮೇಳಚೆಂ ಅತ್ಯಂತ ಸುಲಭ ಆಸಾ" ಮ್ಹಣು ಕುಂಬ್ಳೆ ನರಸಿಂಹ ಪ್ರಭು ಹಾಂನಿ° ಸಾಂಗಲೆ°. "ಕೊಡಿಯಾಲ ಖಬರ ಶುರು ಜಾತಾನ ಹಾಂವೆoಯಿ ಬರೊವಚಾಕ ಶುರು ಕೆಲೆಲೆಂ. ಆಜಿ ಹಾಂವೆ° ಥೊಡೆ ರಾಂದಪಾ ಬದಲ ಪುಸ್ತಕ° ಪ್ರಕಟ ಕರಚಾಕ ತೆಂಚಿ ಕಾರಣ" ಮ್ಹಣು ಗೀತಾ ಸಿ. ಕಿಣಿ ಹಾಂನಿ° ಕಳಯಲೆ°. "17 ವರಸ ಮಾಕ್ಷಿ ಕೊಡಿಯಾಲ ಖಬರ ಶುರು ಜಾಯತ ದಾಕೂನ ಎಸ್. ಎಲ್. ಶೇಟ್ ಜ್ಯುವೆಲ್ರ‍್ಸ್ ಎಂಡ್ ಡೈಮಂಡ್ ಹೌಸ್, ಕೊಡಿಯಾಲ ಖಬರೆಚೆ ಸಾಂಗತ ಆಸಾ. ಆನಿ ಮುಕಾರಯಿ ಆಸತಾ. ಖಂಚೆಯ ಉದ್ಯಮಾಕ ಜನಾಲೊ ಸಹಕಾರ ಮುಖ್ಯ ಜಾತಾ." ಮ್ಹಣು ನಿಶಾಂತ ಶೇಟ್ ಹಾಂನಿ ಕಳಯಲೆ°.

ಹ್ಯಾಚ ಸುವಾಳ್ಯಾಂತು° ಆರತಾ° ಘಡಲೆಲೆ ಎಸ್. ಎಸ್. ಎಲ್. ಸಿ ಪರೀಕ್ಷೆಂತು° ಕೊಂಕಣಿ ಭಾಶೆಂತು ಶಂಬರಿಕ ಶಂಬರಿ ಅಂಕ ಜೋಡಿಲೆ ಕೆನರಾ ಹೈಸ್ಕೂಲ್ ಡೊಂಗರಕೇರಿ ಹಾಂಗಾಚೆ ವಿದ್ಯಾರ್ಥಿನಿಯೊ ಶ್ರದ್ಧಾ ಕೆ. ಶೇಟ್ ಆನಿ ನಮೃತಾ ಜಿ. ನಾಯಕ ಹಾಂಕಾ° ಪ್ರಶಸ್ತಿ ಫಲಕ ಆನಿ ನಗದ ಇನಾಂ ದೀವನು ಸನ್ಮಾನ ಚಲೊ. ಉಷಾ ಮೋಹನ ಪೈ ಹಾಂನಿ° ಹೊ ಸನ್ಮಾನ ಕೆಲೊ. ಹ್ಯಾಚ ವೇಳಾರ ಶಿಕ್ಷಕಿ ಪೂರ್ಣಿಮಾ ರಾವ್ ಹಾಂಕಾoಯಿ ಗೌರವಾರ್ಪಣ ಜಾಲೆ°. "ಪೂರ್ಣಿಮಾ ರಾವ್ ಹಾಂನಿ° ನಿಷ್ಠೇನ ಆನಿ ಶ್ರದ್ಧೇನ ಶಿಕ್ಷಕಿಲೆ ಕಾಮ ಕೆಲಾಂ. ತಿಗೆಲೆ ಕಾಮ ಅತ್ಯಂತ ಅಮೂಲ್ಯ ಆಸಾ" ಮ್ಹಣು ಉಷಾ ಮೋಹನ ಪೈ ಹಾಂನಿ° ಸಾಂಗಲೆ°.

ಮಾನಾಚೆ ಸೊಯ್ರೆ ಜಾವನು ಆಶಿಲೆ ಟಾಟಾ ರಿಫ್ರೇಕ್ಟರಿಸ್ ಹಾಜೆ ನಿವೃತ್ತ ಆಡಳಿತ ನಿರ್ದೇಶಕ ಸಿ. ಡಿ. ಕಾಮತ ಆನಿ ಜಿ. ಎಸ್. ಬಿ. ಮಹಿಳಾ ವೃಂದ ಮಂಗಳೂರು ಹಾಜಿ ಅಧ್ಯಕ್ಷಾ ನಯನಾ ರಾವ್ ಹಾಂನಿ° ಶುಭಾಶಯ ಪಾಟಯಲೊ. ಉಪಸ್ಥಿತ ಸಭಿಕಾಲೆ ತರಪೇನ ಕೆ. ಸಿ. ಪ್ರಭು ಆನಿ ಪಣಂಬೂರು ವಿಠೋಭಾ ಭಂಡಾರಕಾರ ಹಾಂನಿ° ಅಭಿನಂದನ ಪಾಟಯಲೆ°. ಸಹ ಸಂಪಾದಕಿ ವಿದ್ಯಾ ಬಾಳಿಗಾನ ಆಬಾರ ಮಾನಲೊ. ಪ್ರಭಾ ಭಟ್ ಹಾಂನಿ° ಪ್ರಾರ್ಥನಾ ಸಾಂಗಲಿ. ಡಾ. ಅಜೀತ್ ಕಾಮತ್, ಮಹಿಮಾ ಕಿಣಿ, ಮೇಘಾ ಪೈ, ಸೌರಬ್ ಕುಮಟಾ ಆನಿ ವಿಭಾ ಬಾಳಿಗಾ ನಾಯಕ ಹಾಂನಿ° ಸನ್ಮಾನಿತಾಲೊ ವಳಕ ಕರನು ದಿಲೊ. ವಿಘ್ನೇಶ ಬಾಳಿಗಾ ಆನಿ ಸಮರ್ಥ ಭಟ್ ಹಾಂನಿ° ಸಹಕಾರ ದಿಲೊ. ಗಾಂವ° ಪರಗಾಂವಚೆ ಆಯಿಲೆ ಕೊಡಿಯಾಲ ಖಬರ ಅಭಿಮಾನಿ ಉಪಸ್ಥಿತ ಆಶಿಲೆ.

To Support Kodial Khaber click the following button.

ಮoಗಳೂರ ಶಹರಾಚೆ ಇತಿಹಾಸಾಂತ ಸ್ವಾತಂತ್ರ್ಯೋತ್ತರ ಜಾಲೆಲೆ ಅಭಿವೃದ್ಧಿಚೊ ಚಡಾವತ ವಾಂಟೊ ದಾರ್ಶನಿಕ ವ್ಯಕ್ತಿ ಉಳ್ಳಾಲ ಶ್ರೀನಿವಾಸ ಮಲ್ಯ ಹಾಂಗೆಲೆ ಕಾಲಗತಿಂತು° ಜಾಲೆ° ಮ್ಹಳೆಲೆ° ಕೋಣಯಿ ನಕಾರಚಾಕ ಜಾಯನಾ. ತೆ° ಸಗಟ ಇತಿಹಾಸಾಚೆ ಪಾನ್ನಾರ ಬರೊವನು ಜಾಲಾ°. ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೊ ಉಳ್ಳಾಲ ಶ್ರೀನಿವಾಸ ಮಲ್ಯ ತಾಗೆಲೆ ಇಷ್ಟ ಲೋಕಾಂಕ ಶೀನಪ್ಪ ಮಲ್ಯ ಯಾ ತುಳು ಭಾಶಿಕ ಲೋಕಾಂಕ ಶೀನಪ್ಪ ಮಲ್ಯೇರ ಮ್ಹಣೊನ ಘೆತಾಲೊ. ತೊ ಭಾರತಾಚೆ ಲೋಕಸಭೆಂತು° ಹ್ಯಾ ಪ್ರದೇಶಾಚೊ ಪಯಲೊ ಜನ ಪ್ರತಿನಿಧಿ ಆಶಿಲೊ. ತಾಗೆಲೆ ಜನಾನುರಾಗಿ ಗುಣ, ನಿಸ್ವಾರ್ಥ ಸೇವಾ ಮನೋಭಾವ, ಕಾರ್ಯಕ್ಷಮತಾ, ಚಾಣಾಕ್ಷ ಮುಖೇಲಪಣಾಚೆ ನಿಮಿತ ತಾಣೆ ಹ್ಯಾ ಪ್ರದೇಶಾಚೆ ಅಭಿವೃದ್ಧಿಕ ಖೂಬ ಯೋಗದಾನ ದಿವಚಾಕ ಜಾಲೆ°.
ಮಂಗಳೂರು ಆಕಾಶವಾಣಿ, ಮಂಗಳೂರು ವಿಮಾನ ನಿಲ್ದಾಣ, ಮಂಗಳೂರು - ಹಾಸನ ರೈಲ್ವೇ ಯೋಜನಾ, ರಾಷ್ಟ್ರಿಯ ಹೆದ್ದಾರಿ 17, ರಾಷ್ಟ್ರಿಯ ಹೆದ್ದಾರಿ 42, ಕರ್ನಾಟಕ ರೀಜನಲ್ ಇಂಜಿನೀಯರಿoಗ್ ಕಾಲೇಜ್, ಮಂಗಳೂರು ಸರ್ವಋತು ಬಂದರ್, ಮಂಗಳೂರು ಕೆಮಿಕಲ್ಸ್ ಎಂಡ್ ಫರ್ಟಿಲೈರ‍್ಸ್ ಹಿ° ಶೀನಪ್ಪ ಮಲ್ಯ ಹಾಂನಿ° ಹ್ಯಾ ಮಂಗಳೂರು ಪ್ರದೇಶಾಕ ಹಾಡಲೆಲೆ ಪ್ರಮುಖ ಯೋಜನಾ ಆಸಾತಿ.

ಹ್ಯಾ ಸರ್ವ ಯೋಜನಾ ಮಂಗಳೂರಾಕ ಹಾಡಚಾಕ ತಾಣೆ ಕೆಲೆಲೆ ಕಸರತ್ತಾ ಬದಲ ಖೂಬ ಕಾಣಿಯೊ ಆಯಕೂಂಕ ಮೆಳತಾತಿ. ಎಕ ಕಾಣಿ ಮಂಗಳೂರು - ಹಾಸನ ರೈಲ್ವೇ ಯೋಜನಾ ಬದಲ ಆಸಾ. ತ್ಯಾ ವೇಳಾರ ಲಾಲಬಹಾದ್ದೂರ ಶಾಸ್ತ್ರೀ ಓಕ್ಕೂಟ ಸರಕಾರಾಚೊ ರೈಲ್ವೇ ಮಂತ್ರಿ ಆಶಿಲೊ. ಮಂಗಳೂರು - ಹಾಸನ ರೈಲ್ವೇ ಯೋಜನೆಚೆ ಫೈಲ್ ತಾಗೆಲೆ ಮೇಜೆರಿ ಆಶಿಲೆ°. ಶೀನಪ್ಪ ಮಲ್ಯಾನ ತೀನ ಚಾರ ಪಾವಟಿ ಶಾಸ್ತ್ರೀಕ ಉಡಗಾಸ ಕೆಲೊ. ಜಾಲ್ಯಾರಯಿ ಅಧಿಕಾರಿ ಲೋಕಾಲೆ ನಕಾರಾತ್ಮಕ ಷರಾ ಆಸೂಂಕ ಲಾಗೂನ ಶಾಸ್ತ್ರೀಲೆ ಅನುಮತಿ ಸಾಧ್ಯ ಜಾಯನಿ ಆಶಿಲೆ°. ಹ್ಯಾ ಸಂದರ್ಭಾರ ಶೀನಪ್ಪ ಮಲ್ಯಾನ ತಾಗೆಲೊ ಆಖೇರಿಚೊ ಅಸ್ತ್ರ ಪ್ರಯೋಗ ಕೆಲೊ. ಡೆಲ್ಲಿ ದಾಕೂನ ಕೊಡಿಯಾಲಾಕ ಯೆವನು "ಮಂಗಳೂರು - ಹಾಸನ ರೈಲ್ವೇ ಯೋಜನೆಕ ಅನುಮತಿ ದೀನಿ ಜಾಲ್ಯಾರಿ ಹಾಂವ° ಪಾರ್ಲಿಮೆಂಟಾ ಮುಕಾರಿ ಉಪಾಶಿ ಬಯಸೂನ ಸತ್ಯಾಗ್ರಹ ಕರತಾ" ಮ್ಹಣು ಶಾಸ್ತ್ರೀಕ ವಾಯರ್ ಸೋಳೆ°. ಹಾಜೆನ ಕಾಮ ಜಾಲೆ°. ಶಾಸ್ತ್ರೀನ ಪರತೂನ ವಾಯರ್ ಸೊಡೂನ ಅನುಮತಿ ದಿಲ್ಯಾ ಮ್ಹಣು ಕಳಯಲೆ° ಖಂಯ.
ಸುರತ್ಕಲ್ ಕರ್ನಾಟಕ ರೀಜನಲ್ ಕಾಲೇಜ್ ಸ್ಥಾಪನಾ ಕೆಲೆಲಿ ಕಾಣಿ ಸುತಾ ವರ್ಣರಂಜಿತ ಆಸಾ. ದೇಶಾಂತು° ಚಾರ ರೀಜನಲ್ ಇಂಜಿನಿಯರಿoಗ್ ಕಾಲೇಜ° ಸ್ಥಾಪನಾ ಕರಚೆ° ಮ್ಹಣು ಒಕ್ಕೂಟ ಸರಕಾರಾನ ಠರಯಿಲೆ° ಕಳಿತಾಕ್ ಆಯ್ಲೆ ಕೂಡಲೆ ಶೀನಪ್ಪ ಮಲ್ಯಾ ವಿದ್ಯಾಮಂತ್ರಿ ಲಾಲ್ ಬಹಾದ್ದೂರ್ ಶಾಸ್ತ್ರೀಕ ವಚೂನ ಮೆಳೊ. ಎಕ ರೀಜನಲ್ ಕಾಲೇಜ್ ತಾಗೆಲೆ ಕ್ಷೇತ್ರಾಕ ದೀವಕಾ ಮ್ಹಣು ವತ್ತಾಯ ಕೆಲೊ. ಜಾಲ್ಯಾರ ತುಮಗೆಲಾಗಿ ತಾಕಾ ಜಾವಕಾ ಜಾಲೆಲಿ ವ್ಯವಸ್ಥಾ ನಾ, ತ್ಯಾ ದೆಕೂನ ವತ್ತಾಯ ಕರುನಕಾ ಮ್ಹಣ ಶಾಸ್ತ್ರೀನ ಸಾಂಗಲೆ° ಖಂಯ°. ಜಾಲ್ಯಾರಿ ವಿಷಯ ಥಂಯಕ ಸೋಣಾ ಆಶಿ° ಶೀನಪ್ಪ ಮಲ್ಯಾನ ವ್ಯವಸ್ಥಾ ದಾಕೋವಚಾಕ ಪಂದ್ರಾ ದೀಸಾಚೊ ವೇಳ ಘೆತಲೊ. ತ್ಯಾಚ ರಾತಿ ಮಂಗಳೂರಚೆ ಪಿ.ಡಬ್ಲು.ಡಿ ಇಂಜಿನಿಯರ್ ಎಂ. ಎಲ್. ಶ್ರೇಷ್ಠಾಕ ಫೋನ ಕರನು ಸುರತ್ಕಲಚೊ ಜಾಗೊ ರೀಜನಲ್ ಇಂಜಿನಿಯರಿoಗ್ ಕಾಲೇಜಾಕ ಮೇಳತವೆ ಮ್ಹಣು ತಪಾಸಣಾ ಕರಚಾಕ ಆದೇಶ ದಿಲೊ. ತ್ಯಾಚ ವೇಳಾರ ಉದ್ಯಮಿ ಸಿ.ಪಿ.ಸಿಚೊ ವಿ. ಎಸ್. ಕುಡ್ವಾಕ ಫೋನ ಕರನು ತ್ಯಾ ಜಾಗೇರಿ ತಾತ್ಕಾಲಿಕ ಶೆಡ್ ಬಾಂದಚಾಕ ತಾಕೀತ ಕೆಲೆ°. ಪಂದ್ರಾ ದೀಸಾನ ಶಾಸ್ತ್ರೀನ ಯೆವನು ಸುರತ್ಕಲ್ ಇಂಜಿನಿಯರಿoಗ್ ಕಾಲೇಜಾಚೆ ಉಗತಾವಣ ಕೆಲೆ°. ಶೀನಪ್ಪ ಮಲ್ಯಾಲೆ ಚಾಣಕ್ಷತಾ ನಿಮಿತ ಅಸಲೆ ಯೋಜನಾ ಮಂಗಳೂರಾಕ ಆಯಲಿಂತಿ. ಮಂಗಳೂರು ಪುರಭವನ, ಕದ್ರಿ ಸರ್ಕ್ಯೂಟ್ ಹೌಸ್ ಬಾಂದಿಲಿ ಕೀರ್ತಿ ಸುತಾ ಶೀನಪ್ಪ ಮಲ್ಯಾಲಿ ಜಾವನು ಆಸಾ.
ಮಂಗಳೂರು ಬಂದರಾರಿ ಹೋಡ ಹೋಡ ಬಂಡಸಾಳಾ ಆಶಿಲೆ ಉಳ್ಳಾಲ ಮಲ್ಯ ಕುಟುಂಬೆoತು° ಜಲ್ಮಾ ಆಯಿಲೆ ಶ್ರೀನಿವಾಸ್ ಮಲ್ಯ ಹಾಂನಿ° 18 ವರಸ ಪ್ರಾಯೇರಿಚಿ ರಾಜಕೀಯ ಕ್ಷೇತ್ರಾಕ ಪಾವಲ° ದವರಲಿ°. 1920 - 30ಚೆ ದಶಕಾಂತು° ಕಾರ್ನಾಡ್ ಸದಾಶಿವ ರಾವ್ ಹಾಂಗೆಲೆ ಮುಖೇಲಪಣಾರ ಸ್ವಾತಂತ್ರ್ಯಾಚೆ  ಜೂಜ್ ಚಲತ ಆಶಿಲೆ ವೇಳಾರ 1920 ತು° ಅಗಸ್ಟ್ 19ಕ ಮಹಾತ್ಮಾ ಗಾಂಧೀನ ಮಂಗಳೂರಾಕ ಭೇಟಿ ದಿಲಿ. ತ್ಯಾ ವೇಳಾರ ಗಾಂಧೀಜಿಲೆ ತತ್ವಂ ಜಾವನು ಆಸಚೆ ಅಹಿಂಸಾತ್ಮಕ ಚಳವಳ, ಹರಿಜನೋದ್ಧಾರ, ಹರಿಜನಾಂಕ ದೇವಳಾಂಕ ಪ್ರವೇಶ, ಖಾದಿ-ಚರಕ ಹಾಜೆ ಬದಲ ದಿಲೆಲೆ ಸಂದೇಶ ಆಯಕೂನು ಶೀನಪ್ಪ ಮಲ್ಯ ಪ್ರಭಾವಿತ ಜಾಲೆ. ಎಕ ಸಾಮಾನ್ಯ ಕಾರ್ಯಕರ್ತ ಜಾವನು ಸ್ವಾತಂತ್ರ್ಯ ಹೋರಾಟಾಕ ಉಡಿಲೆ ಶೀನಪ್ಪ ಮಲ್ಯಾಕ ಮುಕಾರಿ ಜವಾಹರಲಾಲ್ ನೆಹರು, ಕಮಲಾದೇವಿ ಚಟ್ಟೋಪಾಧ್ಯಾಯ, ಸರದಾರ ವಲ್ಲಭಭಾಯ ಪಟೇಲ, ಲಾಲ ಬಹಾದ್ದೂರ ಶಾಸ್ತ್ರೀ ತಸಲೆ ಊಂಛ ಸ್ಥರಾಚೆ ಮುಕೇಲಿಯಾಲೆ ಸಾಂಗತ ಕಾಮ ಕರಚೊ ಅವಕಾಶ ಮೆಳೊ.
1946 ಇಸವಿಂತು° ದೇಶಾಕ ಸ್ವಾತಂತ್ರ್ಯ ಮೆಳಚೆ° ಮ್ಹಣು ಜಾತಾನ ಶೀನಪ್ಪ ಮಲ್ಯಾಕ ಕಾನ್ಸ್ಟಿಟ್ಯುಯೆಂಟ್  ಎಸೆಂಬ್ಲಿಚೊ ಸಾಂದೊ ಜಾವಚೊ ಅವಕಾಶ ಮೆಳೊ. 1947 ಇಸವಿಂತು° ಭಾರತ ದೇಶಾಕ ಸ್ವಾತಂತ್ರ್ಯಮೇಳತ ದಾಕೂನ ತಾಗೆಲೆ ಜೀವಿತಾವಧಿಕ (17 ವರಸ°) ತೊ ಪಾರ್ಲಿಮೆಂಟಾoತು° ಕಾಂಗ್ರೆಸ್ ಪಕ್ಷಾಚೊ ಚೀಫ್ ವ್ಹಿಪ್ ಆಶಿಲೊ. ತ್ಯಾ ವೇಳಾರ ತಾಕಾ ಸರಕಾರಾಚೆ ವರಿಷ್ಠ, ದೇಶಾಚೆ ವೆಗವೆಗಳೆ ಪ್ರದೇಶಾಚೆ ಜನ ಪ್ರತಿನಿಧಿ ಲೋಕಾಂಚೊ ಆನಿ ಪಾರ್ಟಿಚೆ ಮುಖೇಲಿ ಆನಿ ಸಾಂದ್ಯಾಲೆ° ಸಾಂಗತ ನಿಕಟ ಸಂಪರ್ಕ ದವರಚೊ ಅವಕಾಶ ಮೆಳೊ. ತಾಣೆ ಮಂಗಳೂರು ಆನಿ ಪರಿಸರಾಚೆ ಪ್ರದೇಶಾಂಚೆ ಅಭಿವೃದ್ಧಿ ಕರಚಾಂತು° ಹೆ° ಖೂಬ ಮದದಾಕ ಮೆಳೆ°.
ಸಾಮಾನ್ಯ ಕಾರ್ಯಕರ್ತ ಜಾವನು ಕಾಮ ಕರನು ಊಂಛ ಸ್ಥರಾಕ ಪಾವಿಲೊ ಶೀನಪ್ಪ ಮಲ್ಯಾನ ಪಕ್ಷಾಚೆ ಸಾಮಾನ್ಯ ಕಾರ್ಯಕರ್ತಾಂಕ ವಿಸೊರಚೆ° ಕರನಿ. ಖಂಚೆಯ ಕಾರ್ಯಕರ್ತಾನ ಕಷ್ಟಾರ ಆಸಾ ಮ್ಹಣು ಕಳನು ಆಯಲ್ಯಾರಿ ತೊ ಸ್ವತ: ಯಾ ತಾಗೆಲೆ ಇಷ್ಟಾಂಚೆ ಮದದ ಪಾವೊಚಾಕ ವ್ಯವಸ್ಥಾ ಕರತಲೊ. ಹಾಗೆಲೆ ಹ್ಯಾ ಗುಣ ಪಳೊವನು ಕಾಂಗ್ರೆಸ್ ಪಕ್ಷಾನ ತಾಕಾ ದೇಶಭರ "ಟ್ರಬಲ್ ಶೂಟರ್" ಜಾವನು ವಾಪರಲಾ.
ಸ್ವಾತಂತ್ರ್ಯ ಹೋರಾಟಾ ಖಾತೀರ ದಕ್ಷಿಣ ಕನ್ನಡ ಜಿಲ್ಲೆಚೆ ಹರ ಎಕ ಮುಲ್ಲೆಕ ಭೊಂವಿಲೆ ನಿಮಿತ ಶೀನಪ್ಪ ಮಲ್ಯಾಕ ಹ್ಯಾ ಪ್ರದೇಶಾಚೆ ಗರಜೆಚೆ ವಿಷಯ ಕಳಿತ ಆಶಿಲೆ. ತ್ಯಾ ದೆಕೂನ ನೆಹರುನ ಪಂಚ ವಾರ್ಷಿಕ ಯೋಜನಾ ಘಾಲತನಾ 1952- 62 ಮಧೆಂತು° ಶೀನಪ್ಪ ಮಲ್ಯಾನ ತಾಗೆಲೆ ಸಂಪೂರ್ಣ ಚರಿಶ್ಮಾ ವಾಪರೂನ ದಕ್ಷಿಣ ಕನ್ನಡ ಜಿಲ್ಲೆಂತ ಸಾಬಾರ ಯೋಜನಾ ಹಾಡಚಾಂತು° ಸಫಲ ಜಾಲೊ. ತಾಗೆಲೆ ಉಪರಾಂತ ಸಾಬಾರ ಜನಪ್ರತಿನಿಧಿನಿ ಪ್ರಯತ್ನ ಕೆಲೆ°. ಜಾಲ್ಯಾರ ತಾಗೆಲೆ ಸ್ಥರಾಕ ಪಾವಚೊ ಎಕ ಪ್ರತಿನಿಧಿ ವಿಂಚೂನ ಕಾಡಚಾಕ ಆಮಿ ಅಸಫಲ ಜಾಲ್ಯಾಂತಿ.
ನ. 21 2023 ಉಳ್ಳಾಲ ಶ್ರೀನಿವಾಸ ಮಲ್ಯ ಹಾಂಗೆಲೊ 121ವೊ° ಜಲ್ಮ ದೀವಸ. ಆಯಚೆ ಹ್ಯಾ ಸುಮುಹೂರ್ತಾರಿ ಆಮಿ ಸಂಕಲ್ಪ ಕರಚೆ° ಗರಜೆಚೆ° ಆಸಾ. ಆಮಗೆಲೆ ಮಧೆ° ಆಸಚೆ ಸಮಾಜಮುಖಿ ಲೋಕಾಂಕ ಸೋದೂನ ಆಮಗೆಲೆ ಜನಪ್ರತಿನಿಧಿ ಕರಕಾ. ಅಸಾಮಾಜೀಕ ತತ್ವ ಪಸರಚೆ ಲೋಕಾಂಕ ದೂರ ದವರಚೆ° ಕರಕಾ. ಪರತೂನ ಎಕ ಪಾವಟಿ ಶೀನಪ್ಪ ಮಲ್ಯ ತಸಲೆ ಲೋಕ ಆಮಗೆಲೆ ಜನ ಪ್ರತಿನಿಧಿ ಜಾವಕಾ.
ಶೀನಪ್ಪ ಮಲ್ಯ ಫಕತ ಎಕ ಲೋಕಸಭಾ ಸದಸ್ಯ ಆಶಿಲೊ. ತಾಣೆ ಮಂತ್ರಿ ಜಾವಯೆತ ಆಶಿಲೆ°. ಅಧಿಕಾರ ಪ್ರಯೋಗ ಕರನು ವಿಪಕ್ಷಚಾಂಕ ಭಾದಾ ದಿವಯೆತ ಆಶಿಲೆ. ತಾಣೆ ತಶಿ° ಕರನಿ. ತೋ ಸಗಟಾಲೆ ಸಾಂಗತ, ತಾಂತೂoತಾಯಿ ಗೆಲೆ ವಿರೋಧಿ ಲೋಕಾಲೆ ಸಾಂಗತ ಬರೊ ಸಂಬoಧ ದವರನು ಆಶಿಲೊ. ಕೊಣ ತಾಗೆಲೆ ಘರಾ ಬಾಗಲಾ ಆಯಲ್ಯಾರಯೀ ತಾಂಗೆಲೆ ಕಾಮ ಕರನು ದಿತಾಲೊ. ತೊ ಖರೆ° ಅರ್ಥಾರ ಜನಪ್ರತಿನಿಧಿ ಆಶಿಲೊ.
ಬಂಟ್ವಾಳ ದಾಮೋದರ ಪ್ರಭು ಹಾಂಗೆಲಿ ದ್ಹುವ ಇಂದಿರಾಲೆ ಸಾಂಗತ ಲಗ್ನ ಜಾಲೆಲೆ ಹಾಂಕಾ° ಚೆರಡುವ° ನಾತಿಲಿ°. ಇಂದಿರಾ ಮಲ್ಯ ಸುತಾ ಶೀನಪ್ಪ ಮಲ್ಯಾಲೆ ಮ್ಹಣಕೆ ಜನಾನುರಾಗಿ ಆಸೂನ ಆತಿಥ್ಯಾಕ ನಾವಾದೀಕ ಆಶಿಲಿ.

To Support Kodial Khaber click the following button.

ಮಂಗಳೂರು: ಹಾಂಗಾಚೆ ಜಿ.ಎಸ್.ಬಿ. ಮಹಿಳಾ ವೃಂದ (ರಿ.) ಹಾಂನಿ° ನ. 12ಕ ಶ್ರೀ ಗೋಕರ್ಣ ಮಠಾಂತು° ದೀಪಾವಳಿ ಪರಬೆಚೆ ವಾಂಟೊ ಜಾವನು ಶ್ರೀ ಲಕ್ಶ್ಮೀ  ಪೂಜಾ ಕೆಲಿ. ವೇದಮೂರ್ತಿ ಹಾಂಗೆಲೆ ಮುಖೇಲಪಣಾರಿ ಚಲೆಲೆ ಶ್ರೀ ಲಕ್ಶ್ಮೀ ಅಷ್ಟೋತ್ತರಾಂತು° 70 ಸುವಾಸಿಯಾನಿ ವಾಂಟೊ ಘೆತಲೊ. ಅಧ್ಯಕ್ಷಾ ನಯನಾ ರಾವ್ ಹಾಂನಿ° ದೇವಾ ಮುಕಾರಿ ದಿವೊ ಲಾಯಲೊ. ಆದಲಿ ಅಧ್ಯಕ್ಷಾ ಮರೋಳಿ ಸಬಿತಾ ಕಾಂತ ಹಾಂನಿ° ಮಾರ್ಗದರ್ಶನ ದಿಲೆ°. ಉಪಾಧ್ಯಕ್ಷಾ ಲಕ್ಶ್ಮೀ ಭಂಡಾರಕಾರ, ಕಾರ್ಯದರ್ಶಿ ವಿಜಯಲಕ್ಶ್ಮೀ ಕಾಮತ್, ಕಾರ್ಯಕಾರಿ ಮಂಡಳಿಚೆ ಸಾಂದೆ ಆನಿ ಹೇರ ಸಾಂದೆ ಉಪಸ್ಥಿತ ಆಶಿಲೆ.

To Support Kodial Khaber click the following button.