ಮoಗಳೂರ ಶಹರಾಚೆ ಇತಿಹಾಸಾಂತ ಸ್ವಾತಂತ್ರ್ಯೋತ್ತರ ಜಾಲೆಲೆ ಅಭಿವೃದ್ಧಿಚೊ ಚಡಾವತ ವಾಂಟೊ ದಾರ್ಶನಿಕ ವ್ಯಕ್ತಿ ಉಳ್ಳಾಲ ಶ್ರೀನಿವಾಸ ಮಲ್ಯ ಹಾಂಗೆಲೆ ಕಾಲಗತಿಂತು° ಜಾಲೆ° ಮ್ಹಳೆಲೆ° ಕೋಣಯಿ ನಕಾರಚಾಕ ಜಾಯನಾ. ತೆ° ಸಗಟ ಇತಿಹಾಸಾಚೆ ಪಾನ್ನಾರ ಬರೊವನು ಜಾಲಾ°. ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೊ ಉಳ್ಳಾಲ ಶ್ರೀನಿವಾಸ ಮಲ್ಯ ತಾಗೆಲೆ ಇಷ್ಟ ಲೋಕಾಂಕ ಶೀನಪ್ಪ ಮಲ್ಯ ಯಾ ತುಳು ಭಾಶಿಕ ಲೋಕಾಂಕ ಶೀನಪ್ಪ ಮಲ್ಯೇರ ಮ್ಹಣೊನ ಘೆತಾಲೊ. ತೊ ಭಾರತಾಚೆ ಲೋಕಸಭೆಂತು° ಹ್ಯಾ ಪ್ರದೇಶಾಚೊ ಪಯಲೊ ಜನ ಪ್ರತಿನಿಧಿ ಆಶಿಲೊ. ತಾಗೆಲೆ ಜನಾನುರಾಗಿ ಗುಣ, ನಿಸ್ವಾರ್ಥ ಸೇವಾ ಮನೋಭಾವ, ಕಾರ್ಯಕ್ಷಮತಾ, ಚಾಣಾಕ್ಷ ಮುಖೇಲಪಣಾಚೆ ನಿಮಿತ ತಾಣೆ ಹ್ಯಾ ಪ್ರದೇಶಾಚೆ ಅಭಿವೃದ್ಧಿಕ ಖೂಬ ಯೋಗದಾನ ದಿವಚಾಕ ಜಾಲೆ°.
ಮಂಗಳೂರು ಆಕಾಶವಾಣಿ, ಮಂಗಳೂರು ವಿಮಾನ ನಿಲ್ದಾಣ, ಮಂಗಳೂರು - ಹಾಸನ ರೈಲ್ವೇ ಯೋಜನಾ, ರಾಷ್ಟ್ರಿಯ ಹೆದ್ದಾರಿ 17, ರಾಷ್ಟ್ರಿಯ ಹೆದ್ದಾರಿ 42, ಕರ್ನಾಟಕ ರೀಜನಲ್ ಇಂಜಿನೀಯರಿoಗ್ ಕಾಲೇಜ್, ಮಂಗಳೂರು ಸರ್ವಋತು ಬಂದರ್, ಮಂಗಳೂರು ಕೆಮಿಕಲ್ಸ್ ಎಂಡ್ ಫರ್ಟಿಲೈರ‍್ಸ್ ಹಿ° ಶೀನಪ್ಪ ಮಲ್ಯ ಹಾಂನಿ° ಹ್ಯಾ ಮಂಗಳೂರು ಪ್ರದೇಶಾಕ ಹಾಡಲೆಲೆ ಪ್ರಮುಖ ಯೋಜನಾ ಆಸಾತಿ.

ಹ್ಯಾ ಸರ್ವ ಯೋಜನಾ ಮಂಗಳೂರಾಕ ಹಾಡಚಾಕ ತಾಣೆ ಕೆಲೆಲೆ ಕಸರತ್ತಾ ಬದಲ ಖೂಬ ಕಾಣಿಯೊ ಆಯಕೂಂಕ ಮೆಳತಾತಿ. ಎಕ ಕಾಣಿ ಮಂಗಳೂರು - ಹಾಸನ ರೈಲ್ವೇ ಯೋಜನಾ ಬದಲ ಆಸಾ. ತ್ಯಾ ವೇಳಾರ ಲಾಲಬಹಾದ್ದೂರ ಶಾಸ್ತ್ರೀ ಓಕ್ಕೂಟ ಸರಕಾರಾಚೊ ರೈಲ್ವೇ ಮಂತ್ರಿ ಆಶಿಲೊ. ಮಂಗಳೂರು - ಹಾಸನ ರೈಲ್ವೇ ಯೋಜನೆಚೆ ಫೈಲ್ ತಾಗೆಲೆ ಮೇಜೆರಿ ಆಶಿಲೆ°. ಶೀನಪ್ಪ ಮಲ್ಯಾನ ತೀನ ಚಾರ ಪಾವಟಿ ಶಾಸ್ತ್ರೀಕ ಉಡಗಾಸ ಕೆಲೊ. ಜಾಲ್ಯಾರಯಿ ಅಧಿಕಾರಿ ಲೋಕಾಲೆ ನಕಾರಾತ್ಮಕ ಷರಾ ಆಸೂಂಕ ಲಾಗೂನ ಶಾಸ್ತ್ರೀಲೆ ಅನುಮತಿ ಸಾಧ್ಯ ಜಾಯನಿ ಆಶಿಲೆ°. ಹ್ಯಾ ಸಂದರ್ಭಾರ ಶೀನಪ್ಪ ಮಲ್ಯಾನ ತಾಗೆಲೊ ಆಖೇರಿಚೊ ಅಸ್ತ್ರ ಪ್ರಯೋಗ ಕೆಲೊ. ಡೆಲ್ಲಿ ದಾಕೂನ ಕೊಡಿಯಾಲಾಕ ಯೆವನು "ಮಂಗಳೂರು - ಹಾಸನ ರೈಲ್ವೇ ಯೋಜನೆಕ ಅನುಮತಿ ದೀನಿ ಜಾಲ್ಯಾರಿ ಹಾಂವ° ಪಾರ್ಲಿಮೆಂಟಾ ಮುಕಾರಿ ಉಪಾಶಿ ಬಯಸೂನ ಸತ್ಯಾಗ್ರಹ ಕರತಾ" ಮ್ಹಣು ಶಾಸ್ತ್ರೀಕ ವಾಯರ್ ಸೋಳೆ°. ಹಾಜೆನ ಕಾಮ ಜಾಲೆ°. ಶಾಸ್ತ್ರೀನ ಪರತೂನ ವಾಯರ್ ಸೊಡೂನ ಅನುಮತಿ ದಿಲ್ಯಾ ಮ್ಹಣು ಕಳಯಲೆ° ಖಂಯ.
ಸುರತ್ಕಲ್ ಕರ್ನಾಟಕ ರೀಜನಲ್ ಕಾಲೇಜ್ ಸ್ಥಾಪನಾ ಕೆಲೆಲಿ ಕಾಣಿ ಸುತಾ ವರ್ಣರಂಜಿತ ಆಸಾ. ದೇಶಾಂತು° ಚಾರ ರೀಜನಲ್ ಇಂಜಿನಿಯರಿoಗ್ ಕಾಲೇಜ° ಸ್ಥಾಪನಾ ಕರಚೆ° ಮ್ಹಣು ಒಕ್ಕೂಟ ಸರಕಾರಾನ ಠರಯಿಲೆ° ಕಳಿತಾಕ್ ಆಯ್ಲೆ ಕೂಡಲೆ ಶೀನಪ್ಪ ಮಲ್ಯಾ ವಿದ್ಯಾಮಂತ್ರಿ ಲಾಲ್ ಬಹಾದ್ದೂರ್ ಶಾಸ್ತ್ರೀಕ ವಚೂನ ಮೆಳೊ. ಎಕ ರೀಜನಲ್ ಕಾಲೇಜ್ ತಾಗೆಲೆ ಕ್ಷೇತ್ರಾಕ ದೀವಕಾ ಮ್ಹಣು ವತ್ತಾಯ ಕೆಲೊ. ಜಾಲ್ಯಾರ ತುಮಗೆಲಾಗಿ ತಾಕಾ ಜಾವಕಾ ಜಾಲೆಲಿ ವ್ಯವಸ್ಥಾ ನಾ, ತ್ಯಾ ದೆಕೂನ ವತ್ತಾಯ ಕರುನಕಾ ಮ್ಹಣ ಶಾಸ್ತ್ರೀನ ಸಾಂಗಲೆ° ಖಂಯ°. ಜಾಲ್ಯಾರಿ ವಿಷಯ ಥಂಯಕ ಸೋಣಾ ಆಶಿ° ಶೀನಪ್ಪ ಮಲ್ಯಾನ ವ್ಯವಸ್ಥಾ ದಾಕೋವಚಾಕ ಪಂದ್ರಾ ದೀಸಾಚೊ ವೇಳ ಘೆತಲೊ. ತ್ಯಾಚ ರಾತಿ ಮಂಗಳೂರಚೆ ಪಿ.ಡಬ್ಲು.ಡಿ ಇಂಜಿನಿಯರ್ ಎಂ. ಎಲ್. ಶ್ರೇಷ್ಠಾಕ ಫೋನ ಕರನು ಸುರತ್ಕಲಚೊ ಜಾಗೊ ರೀಜನಲ್ ಇಂಜಿನಿಯರಿoಗ್ ಕಾಲೇಜಾಕ ಮೇಳತವೆ ಮ್ಹಣು ತಪಾಸಣಾ ಕರಚಾಕ ಆದೇಶ ದಿಲೊ. ತ್ಯಾಚ ವೇಳಾರ ಉದ್ಯಮಿ ಸಿ.ಪಿ.ಸಿಚೊ ವಿ. ಎಸ್. ಕುಡ್ವಾಕ ಫೋನ ಕರನು ತ್ಯಾ ಜಾಗೇರಿ ತಾತ್ಕಾಲಿಕ ಶೆಡ್ ಬಾಂದಚಾಕ ತಾಕೀತ ಕೆಲೆ°. ಪಂದ್ರಾ ದೀಸಾನ ಶಾಸ್ತ್ರೀನ ಯೆವನು ಸುರತ್ಕಲ್ ಇಂಜಿನಿಯರಿoಗ್ ಕಾಲೇಜಾಚೆ ಉಗತಾವಣ ಕೆಲೆ°. ಶೀನಪ್ಪ ಮಲ್ಯಾಲೆ ಚಾಣಕ್ಷತಾ ನಿಮಿತ ಅಸಲೆ ಯೋಜನಾ ಮಂಗಳೂರಾಕ ಆಯಲಿಂತಿ. ಮಂಗಳೂರು ಪುರಭವನ, ಕದ್ರಿ ಸರ್ಕ್ಯೂಟ್ ಹೌಸ್ ಬಾಂದಿಲಿ ಕೀರ್ತಿ ಸುತಾ ಶೀನಪ್ಪ ಮಲ್ಯಾಲಿ ಜಾವನು ಆಸಾ.
ಮಂಗಳೂರು ಬಂದರಾರಿ ಹೋಡ ಹೋಡ ಬಂಡಸಾಳಾ ಆಶಿಲೆ ಉಳ್ಳಾಲ ಮಲ್ಯ ಕುಟುಂಬೆoತು° ಜಲ್ಮಾ ಆಯಿಲೆ ಶ್ರೀನಿವಾಸ್ ಮಲ್ಯ ಹಾಂನಿ° 18 ವರಸ ಪ್ರಾಯೇರಿಚಿ ರಾಜಕೀಯ ಕ್ಷೇತ್ರಾಕ ಪಾವಲ° ದವರಲಿ°. 1920 - 30ಚೆ ದಶಕಾಂತು° ಕಾರ್ನಾಡ್ ಸದಾಶಿವ ರಾವ್ ಹಾಂಗೆಲೆ ಮುಖೇಲಪಣಾರ ಸ್ವಾತಂತ್ರ್ಯಾಚೆ  ಜೂಜ್ ಚಲತ ಆಶಿಲೆ ವೇಳಾರ 1920 ತು° ಅಗಸ್ಟ್ 19ಕ ಮಹಾತ್ಮಾ ಗಾಂಧೀನ ಮಂಗಳೂರಾಕ ಭೇಟಿ ದಿಲಿ. ತ್ಯಾ ವೇಳಾರ ಗಾಂಧೀಜಿಲೆ ತತ್ವಂ ಜಾವನು ಆಸಚೆ ಅಹಿಂಸಾತ್ಮಕ ಚಳವಳ, ಹರಿಜನೋದ್ಧಾರ, ಹರಿಜನಾಂಕ ದೇವಳಾಂಕ ಪ್ರವೇಶ, ಖಾದಿ-ಚರಕ ಹಾಜೆ ಬದಲ ದಿಲೆಲೆ ಸಂದೇಶ ಆಯಕೂನು ಶೀನಪ್ಪ ಮಲ್ಯ ಪ್ರಭಾವಿತ ಜಾಲೆ. ಎಕ ಸಾಮಾನ್ಯ ಕಾರ್ಯಕರ್ತ ಜಾವನು ಸ್ವಾತಂತ್ರ್ಯ ಹೋರಾಟಾಕ ಉಡಿಲೆ ಶೀನಪ್ಪ ಮಲ್ಯಾಕ ಮುಕಾರಿ ಜವಾಹರಲಾಲ್ ನೆಹರು, ಕಮಲಾದೇವಿ ಚಟ್ಟೋಪಾಧ್ಯಾಯ, ಸರದಾರ ವಲ್ಲಭಭಾಯ ಪಟೇಲ, ಲಾಲ ಬಹಾದ್ದೂರ ಶಾಸ್ತ್ರೀ ತಸಲೆ ಊಂಛ ಸ್ಥರಾಚೆ ಮುಕೇಲಿಯಾಲೆ ಸಾಂಗತ ಕಾಮ ಕರಚೊ ಅವಕಾಶ ಮೆಳೊ.
1946 ಇಸವಿಂತು° ದೇಶಾಕ ಸ್ವಾತಂತ್ರ್ಯ ಮೆಳಚೆ° ಮ್ಹಣು ಜಾತಾನ ಶೀನಪ್ಪ ಮಲ್ಯಾಕ ಕಾನ್ಸ್ಟಿಟ್ಯುಯೆಂಟ್  ಎಸೆಂಬ್ಲಿಚೊ ಸಾಂದೊ ಜಾವಚೊ ಅವಕಾಶ ಮೆಳೊ. 1947 ಇಸವಿಂತು° ಭಾರತ ದೇಶಾಕ ಸ್ವಾತಂತ್ರ್ಯಮೇಳತ ದಾಕೂನ ತಾಗೆಲೆ ಜೀವಿತಾವಧಿಕ (17 ವರಸ°) ತೊ ಪಾರ್ಲಿಮೆಂಟಾoತು° ಕಾಂಗ್ರೆಸ್ ಪಕ್ಷಾಚೊ ಚೀಫ್ ವ್ಹಿಪ್ ಆಶಿಲೊ. ತ್ಯಾ ವೇಳಾರ ತಾಕಾ ಸರಕಾರಾಚೆ ವರಿಷ್ಠ, ದೇಶಾಚೆ ವೆಗವೆಗಳೆ ಪ್ರದೇಶಾಚೆ ಜನ ಪ್ರತಿನಿಧಿ ಲೋಕಾಂಚೊ ಆನಿ ಪಾರ್ಟಿಚೆ ಮುಖೇಲಿ ಆನಿ ಸಾಂದ್ಯಾಲೆ° ಸಾಂಗತ ನಿಕಟ ಸಂಪರ್ಕ ದವರಚೊ ಅವಕಾಶ ಮೆಳೊ. ತಾಣೆ ಮಂಗಳೂರು ಆನಿ ಪರಿಸರಾಚೆ ಪ್ರದೇಶಾಂಚೆ ಅಭಿವೃದ್ಧಿ ಕರಚಾಂತು° ಹೆ° ಖೂಬ ಮದದಾಕ ಮೆಳೆ°.
ಸಾಮಾನ್ಯ ಕಾರ್ಯಕರ್ತ ಜಾವನು ಕಾಮ ಕರನು ಊಂಛ ಸ್ಥರಾಕ ಪಾವಿಲೊ ಶೀನಪ್ಪ ಮಲ್ಯಾನ ಪಕ್ಷಾಚೆ ಸಾಮಾನ್ಯ ಕಾರ್ಯಕರ್ತಾಂಕ ವಿಸೊರಚೆ° ಕರನಿ. ಖಂಚೆಯ ಕಾರ್ಯಕರ್ತಾನ ಕಷ್ಟಾರ ಆಸಾ ಮ್ಹಣು ಕಳನು ಆಯಲ್ಯಾರಿ ತೊ ಸ್ವತ: ಯಾ ತಾಗೆಲೆ ಇಷ್ಟಾಂಚೆ ಮದದ ಪಾವೊಚಾಕ ವ್ಯವಸ್ಥಾ ಕರತಲೊ. ಹಾಗೆಲೆ ಹ್ಯಾ ಗುಣ ಪಳೊವನು ಕಾಂಗ್ರೆಸ್ ಪಕ್ಷಾನ ತಾಕಾ ದೇಶಭರ "ಟ್ರಬಲ್ ಶೂಟರ್" ಜಾವನು ವಾಪರಲಾ.
ಸ್ವಾತಂತ್ರ್ಯ ಹೋರಾಟಾ ಖಾತೀರ ದಕ್ಷಿಣ ಕನ್ನಡ ಜಿಲ್ಲೆಚೆ ಹರ ಎಕ ಮುಲ್ಲೆಕ ಭೊಂವಿಲೆ ನಿಮಿತ ಶೀನಪ್ಪ ಮಲ್ಯಾಕ ಹ್ಯಾ ಪ್ರದೇಶಾಚೆ ಗರಜೆಚೆ ವಿಷಯ ಕಳಿತ ಆಶಿಲೆ. ತ್ಯಾ ದೆಕೂನ ನೆಹರುನ ಪಂಚ ವಾರ್ಷಿಕ ಯೋಜನಾ ಘಾಲತನಾ 1952- 62 ಮಧೆಂತು° ಶೀನಪ್ಪ ಮಲ್ಯಾನ ತಾಗೆಲೆ ಸಂಪೂರ್ಣ ಚರಿಶ್ಮಾ ವಾಪರೂನ ದಕ್ಷಿಣ ಕನ್ನಡ ಜಿಲ್ಲೆಂತ ಸಾಬಾರ ಯೋಜನಾ ಹಾಡಚಾಂತು° ಸಫಲ ಜಾಲೊ. ತಾಗೆಲೆ ಉಪರಾಂತ ಸಾಬಾರ ಜನಪ್ರತಿನಿಧಿನಿ ಪ್ರಯತ್ನ ಕೆಲೆ°. ಜಾಲ್ಯಾರ ತಾಗೆಲೆ ಸ್ಥರಾಕ ಪಾವಚೊ ಎಕ ಪ್ರತಿನಿಧಿ ವಿಂಚೂನ ಕಾಡಚಾಕ ಆಮಿ ಅಸಫಲ ಜಾಲ್ಯಾಂತಿ.
ನ. 21 2023 ಉಳ್ಳಾಲ ಶ್ರೀನಿವಾಸ ಮಲ್ಯ ಹಾಂಗೆಲೊ 121ವೊ° ಜಲ್ಮ ದೀವಸ. ಆಯಚೆ ಹ್ಯಾ ಸುಮುಹೂರ್ತಾರಿ ಆಮಿ ಸಂಕಲ್ಪ ಕರಚೆ° ಗರಜೆಚೆ° ಆಸಾ. ಆಮಗೆಲೆ ಮಧೆ° ಆಸಚೆ ಸಮಾಜಮುಖಿ ಲೋಕಾಂಕ ಸೋದೂನ ಆಮಗೆಲೆ ಜನಪ್ರತಿನಿಧಿ ಕರಕಾ. ಅಸಾಮಾಜೀಕ ತತ್ವ ಪಸರಚೆ ಲೋಕಾಂಕ ದೂರ ದವರಚೆ° ಕರಕಾ. ಪರತೂನ ಎಕ ಪಾವಟಿ ಶೀನಪ್ಪ ಮಲ್ಯ ತಸಲೆ ಲೋಕ ಆಮಗೆಲೆ ಜನ ಪ್ರತಿನಿಧಿ ಜಾವಕಾ.
ಶೀನಪ್ಪ ಮಲ್ಯ ಫಕತ ಎಕ ಲೋಕಸಭಾ ಸದಸ್ಯ ಆಶಿಲೊ. ತಾಣೆ ಮಂತ್ರಿ ಜಾವಯೆತ ಆಶಿಲೆ°. ಅಧಿಕಾರ ಪ್ರಯೋಗ ಕರನು ವಿಪಕ್ಷಚಾಂಕ ಭಾದಾ ದಿವಯೆತ ಆಶಿಲೆ. ತಾಣೆ ತಶಿ° ಕರನಿ. ತೋ ಸಗಟಾಲೆ ಸಾಂಗತ, ತಾಂತೂoತಾಯಿ ಗೆಲೆ ವಿರೋಧಿ ಲೋಕಾಲೆ ಸಾಂಗತ ಬರೊ ಸಂಬoಧ ದವರನು ಆಶಿಲೊ. ಕೊಣ ತಾಗೆಲೆ ಘರಾ ಬಾಗಲಾ ಆಯಲ್ಯಾರಯೀ ತಾಂಗೆಲೆ ಕಾಮ ಕರನು ದಿತಾಲೊ. ತೊ ಖರೆ° ಅರ್ಥಾರ ಜನಪ್ರತಿನಿಧಿ ಆಶಿಲೊ.
ಬಂಟ್ವಾಳ ದಾಮೋದರ ಪ್ರಭು ಹಾಂಗೆಲಿ ದ್ಹುವ ಇಂದಿರಾಲೆ ಸಾಂಗತ ಲಗ್ನ ಜಾಲೆಲೆ ಹಾಂಕಾ° ಚೆರಡುವ° ನಾತಿಲಿ°. ಇಂದಿರಾ ಮಲ್ಯ ಸುತಾ ಶೀನಪ್ಪ ಮಲ್ಯಾಲೆ ಮ್ಹಣಕೆ ಜನಾನುರಾಗಿ ಆಸೂನ ಆತಿಥ್ಯಾಕ ನಾವಾದೀಕ ಆಶಿಲಿ.

To Support Kodial Khaber click the following button.

ಬೆಂಗಳೂರು: ನವೀನ ಜಾವನು ಘಟನ ಜಾಲೆಲೆ ಸಿದ್ದರಾಮಯ್ಯಾ ಸರಕಾರಾನ ಕಾಂಗ್ರೇಸ್ ಪಕ್ಷಾಚೆ 5 ಗ್ಯಾರಂಟಿοಕ 52 ಹಜಾರ್ ಕೋಟಿ ರುಪಯೊ ಅನುದಾನ ದಿಲಾ°. ತ್ಯಾಚ ವೇಳಾ ಅಬಕಾರಿ ಕರ ಖೂಬ ಚಡ ಕೆಲಾ. ಕರ ಚಡ ಸಂಖ್ಯಾನ ಸಂಗ್ರಹ ಕರಚೆ° ದ್ಯೇಯ ದಿಸುನ ಯೆತಾ.

ಹೈಲೈಟ್ಸ್:
♦ ಕರ್ನಾಟಕ ಬಜೆಟ್ 2023-24 ಹಾಜೆ° ಗಾತ್ರ: 3 ಲಾಖ 27 ಹಜಾರ ಕೋಟಿ ರೂಪಯೊ.
♦ 5 ಗ್ಯಾರಂಟಿ ಯೋಜನೆಂಕ 52 ಸಾವಿರ ಕೋಟಿ ರೂಪಯೊ ಆರಕ್ಷಿತ ಕೆಲಾ.
♦ ಅಬಕಾರಿ ಕರ 20 ಠಕೊ ತಾಂಯ ಚಡ ಜಾಲಾ. ಬಿಯರಾಚೆರಿ ಅಬಕಾರಿ ಸುಂಕ 10 ಠಕೊ ತಿತಲೊ ಚಡ ಜಾಲಾ.
♦ ಇಂದಿರಾ ಕ್ಯಾಂಟೀನಾಕ 100 ಕೋಟಿ ರೂ. ಅನುದಾನ
♦ ಬೆಂಗಳೂರಾಕ 45 ಹಜಾರ ಕೋಟಿ ರೂ. ಅನುದಾನ
♦ ನಮ್ಮ ಮೆಟ್ರೋ ಆನಿ ಉಪನಗರ ರೈಲು ಯೋಜನೆಂಕ 30 ಸಾವಿರ ಕೋಟಿ ರೂ. ಅನುದಾನ
♦ ಬೆಂಗಳೂರಚೆ ಬೈಯ್ಯಪ್ಪನ ಹಳ್ಳಿಂತು° ಸರ್. ಎಂ. ವಿಶ್ವೇಶ್ವರಯ್ಯ ಟರ್ಮಿನಲ್ ಲಾಗಿ ಮೇಲ್ಸೇತುವೆ ನಿರ್ಮಾಣ.
♦ ಮೈಸೂರಾಂತು° ಚಾಮುಂಡೇಶ್ವರಿ ದೇವಸ್ಥಾನ ಅಭಿವೃದ್ಧಿ ಪ್ರಾಧಿಕಾರ ರಚನ ಕರಚಾಕ ನಿರ್ಧಾರ.
♦ ಗಾಯಿ, ಬೈಲು, ಮಶಿ ಮೆಲ್ಯಾರಿ 10 ಸಾವಿರ ರೂ. ಪರಿಹಾರ - 'ಅನುಗ್ರಹ ಯೋಜನೆ' ಮರು ಜಾರಿ
♦ ಶೇತಗಾರಾಲೆ° ಉತ್ಪನ್ನಾಂಕ ಏಕೀಕೃತ ಬ್ರಾಂಡಿοಗ್ ವ್ಯವಸ್ಥಾ 10 ಕೋಟಿ ರೂ. ಆರಕ್ಷಿತ.
♦ ಎಪಿಎಂಸಿ ಕಾಯ್ದೆ ವಾಪಸ ಘೆವಚಾಕ ರಾಜ್ಯ ಸರ್ಕಾರಾಚೊ ನಿರ್ಧಾರ
♦ ರಾಮನಗರ, ಶಿಡ್ಲಘಟ್ಟ ಹಾಂಗಾ ರೇಷ್ಮೆ ಮಾರುಕಟ್ಟೆ ಸ್ಥಾಪನಾ: 75 ಕೋಟಿ ರೂ. ಅನುದಾನ
♦ ಕಾಫಿ ಟೂರಿಸಂ, ಪೋಡಿಪಾನ, ಮೈಸೂರು ಮಲ್ಲಿಗೆಕ ಬ್ರಾಂಡಿοಗ್
♦ 'ಕೃಷಿ ಭಾಗ್ಯ ಯೋಜನೆ'ಕ ನರೇಗಾ ಸಕಳ 100 ಕೋಟಿ ರೂ.
♦ ಜಳಕೆ ಉದ್ಯಮಾಚೆ ಸ್ತ್ರೀಯಾಂಕ ದಿವಚೆ ರೀಣಾಚಿ ಮಿತಿ 50 ಸಾವಿರ ರೂ. ದಾಕೂನ 3 ಲಾಖಾಕ ಚಡಯಲಾ.
♦ ಕೊಪ್ಪಳ, ಕಾರವಾರ, ಕೊಡಗು ಹಾಂಗಾಚೆ ಜಿಲ್ಲಾಸ್ಪತ್ರಾ ಉನ್ನತೀಕರಣ
♦ ಕನಕಪುರ ತಾಲ್ಲೂಕಾಂತು° ನವೀನ ವೈದ್ಯಕೀಯ ಕಾಲೇಜ.
♦ ಮೈಸೂರು, ಬೆಳಗಾವಿ, ಕಲಬುರಗಿ ಜಿಲ್ಲೆಂತು° ಸೂಪರ್ ಸ್ಪೆಷಾಲಿಟಿ ಆಸ್ಪತ್ರಿ
♦ ಕಲಬುರಗಿಯಲ್ಲಿ ತಾಯಿ - ಮಗು ಆಸ್ಪತ್ರೆ ನಿರ್ಮಾಣ - 70 ಕೋಟಿ ರೂ.
♦ ಮಾಕ್ಷಿ ಸರ್ಕಾರಾಚೆ ಪಠ್ಯ ಪರಿಷ್ಕರಣ ಕರಚೊ ನಿರ್ಧಾರ: ಪರಿಷ್ಕರಣ ಕೆಲೆಲೆ° ಪಠ್ಯ ಸೊಡೂಂಕ ನಿರ್ಣಯ.
♦ ಸರ್ಕಾರಿ, ಅನುದಾನಿತ ಶಾಳೆಂಚೆ° 1 ದಾಕೂನ 10ವೆ° ಕಕ್ಷಾಚೆ ವಿದ್ಯಾರ್ಥಿಂಕ ವಾರಾಕ 2 ಪಾವಟಿ ಮೊಟ್ಟೆ, ಶೇಂಗಾ ಚಿಕ್ಕಿ ಯಾ ಕೆಳೆ° ವಿತರಣ.
♦ 1 ಲಾಖ 62 ಹಜಾರ ಕೋಟಿ ರೂ. ಕರ ಸಂಗ್ರಹಾಚೊ ಉದ್ಧೇಶ.
♦ ವಾಣಿಜ್ಯ ತೆರಿಗೆ ಇಲಾಖೆಕ 1,01,000 ಕೋಟಿ ರೂ. ಕರ ಸಂಗ್ರಹಾಚೊ ಲಕ್ಷ್ಯ.
♦ ಅಬಕಾರಿ ಇಲಾಖೆಕ 36 ಹಜಾರ ಕೋಟಿ ರೂ. ಕರ ಸಂಗ್ರಹಾಚೆ ಲಕ್ಷ್ಯ.
♦ ನೋಂದಣಿ ಆನಿ ಮುದ್ರಾಂಕ ಇಲಾಖೆಕ 25 ಹಜಾರ ಕೋಟಿ ರೂ. ಕರ ಸಂಗ್ರಹಾಚೊ ಲಕ್ಷ್ಯ.