ಮಣಿಪಾಲ: "ಚಡಶಾ ಭುರಗೇಪಣಾಂತಲ್ಯಾ ಕ್ಯಾನ್ಸರಾಚೇರ ಯೋಗ್ಯ ಪಂಗಡಾನ ಯೋಗ್ಯ ಉಪಚಾರಾ ವರವೀಂ ಯೋಗ್ಯ ವೇಳಾರ ಉಪಚಾರ ಕೇಲ್ಯಾರ ಬರೇ ಜಾತಾತ. ಭುರಗ್ಯಾಂಚ್ಯಾ ಕ್ಯಾನ್ಸರಾ ವಿಶೀಂ ಜಾಗೃತಾಯ ಕರಪಾ ಖಾತೀರ ಆನೀ ಕ್ಯಾನ್ಸರ ಆಶಿಲ್ಲ್ಯಾ ಭುರಗ್ಯಾಂಕ, ತಾಂಚೀ ಜತನಾಯ ಘೇವಪೀ ಆನೀ ಕ್ಯಾನ್ಸರಾಂತಲ್ಯಾನ ಜಿವೀತ ಉರಿಲ್ಲ್ಯಾಂಕ ಆದಾರ ದಾಖೋವಪಾ ಖಾತೀರ ದರ ವರ್ಸಾ ಫೆ. 15ಕ ಸಂವಸಾರೀಕ ಪಾಂವಡ್ಯಾರ ಆಂತರರಾಷ್ಟ್ರೀಯ ಭುರಗ್ಯಾಂಚೋ ಕ್ಯಾನ್ಸರ ದೀಸ ಮನಯತಾತ. ಏಕ ಬರೀ ಜಿವೀತ ಉರಪ ಮ್ಹಣಲ್ಯಾರ ತುಮಚ್ಯಾ ಹಾತಾಂತಲ್ಯಾನ ಸಾಧ್ಯ ಕರಪಾಕ ಮೇಳತಾ ಹೇ° ಆಯ್. ಸಿ. ಸಿ. ಡಿ.ಚ್ಯಾ ತೀನ ವರ್ಸಾಂಚ್ಯಾ ಮಿಶನಾಚೇ° (2021-2023) ದ್ಯೇಯವಾಕ್ಯ ಜಾವನು ಆಸಾ. ಮಣಿಪಾಲ ಕೆ. ಎಂ. ಸಿ. ಚೆ ಡೀನ ಡಾ. ಪದ್ಮರಾಜ್ ಹೆಗ್ಡೆನ ಸ್ವಾಗತಾಚೆ ಉತ್ರ° ಸಾಂಗಲಿ°. "ಕ್ಯಾನ್ಸರ ಆಸಚೆ ಖಂಚೆಯ ಚೆರಡು ಚಿಕಿತ್ಸಾ ಮೇಳನಾಶಿ° ವಚಾಕ ನಜ" ಹ್ಯಾ ನದರೇನ ಕೆ. ಎಂ. ಸಿ ಕ್ರಿಯಾಶೀಲ ಆಸಾ ಮ್ಹಣು ತೊ ಮ್ಹಣಾಲೊ. ಬಾಲ ರೋಗ ವಿಜ್ಞಾನ ಆನೀ ಒಂಕಾಲಾಜಿ ಸಹಾಯಕ ಪ್ರಾದ್ಯಾಪಕ ಡಾ| ಹರೀಶ ವರ್ಮಾ ಟಿ. ಹಾಂನಿ° ಉಲಯತಾ ಅಶೆ° ಸಾಂಗಲೆ°. "ಕ್ಯಾನ್ಸರ ಆಶಿಲ್ಲ್ಯಾ ಭುರಗ್ಯಾ° ಖಾತೀರ ಏಕತ್ರೀತ ಕಾಳಜೀ ಪದ್ದತೀಂತ ಚಡಾಂತ ಚಡ ಯಶ ಮೇಳೊವಪಾ ಖಾತೀರ ಜಾಯತ್ಯಾ ಜಾಣಾಂನೀ ಏಕಠಾಂಯ ಕಾಮ ಕರಪಾಚೀ ಗರಜ ಆಸಾ." ಮ್ಹಣು ಸಾಂಗಲೆ°. ಜೀತ್ ಅಸೋಸಿಯೆಶನ್ ಫಾರ್ ಸಪೋರ್ಟ ಆಫ್ ಕ್ಯಾನ್ಸರ್ ಪೇಶೆಂಟ್ಸ್ ಸಿ. ಇ. ಒ ಡಾ. ಕೆ. ವಿ. ಗಣಪತಿ, ಮಾಹೆ ಚೆ ಆದಲೆ ಉಪಕುಲಪತಿ ಡಾ. ರಾಜ್ ವಾರಿಯರ್ ಮಾನಾಚೆ ಸೊಯ್ರೆ ಆಶಿಲೆ.
ವೈಜಕೀ ಅಧೀಕ್ಷಕ ಡಾ. ಅವಿನಾಶ ಶೆಟ್ಟಿ ಹಾಂಣೀ ಉಪಕಾರ ಮಾನಲೊ. ಶಿಕ್ಷಣೀಕ ಹಾಸ್ಪಿಟಲಾಂಚೇ ವೇವಸ್ಥಾಪಕೀಯ ಸಂಚಾಲಕ ಡಾ. ಆನಂದ ವೇಣುಗೋಪಾಲ ಆನೀ ಕೆ. ಏಂ. ಸಿ. ಮಣಿಪಾಲಾಚೇ ಸಹಾಯಕ ಡೀನ ಡಾ. ಕೃಷ್ಣಾನಂದ ಪ್ರಭು ಹಾಂನಿ° ಉಪಸ್ಥಿತ ಆಶಿಲೆ. ಸ್ಪರ್ಧೇಂತ ಜೈತಿವಂತ ಜಾಲ್ಲ್ಯಾಂಕ ಕಸ್ತೂರಬಾ ಹಾಸ್ಪಿಟಲ, ಮಣಿಪಾಲ ಹಾಂಗಾಚೇ ನರ್ಸಿಂಗ ಸೇವಾ ಮುಖೇಲೀ ಡಾ. ಪಿ. ಸುಬಾ ಸೂರಿಯಾನ ಇನಾಂ ವಾಂಟಿಲೆ°. ಸಭಾ ಕಾರ್ಯಾವಳಿಚೆ ಉಪರಾಂತ ಭುರಗ್ಯಾಂ ಖಾತೀರ ಆನೀ ತಾಂಚ್ಯಾ ಪಾಲಕಾಂಕ ಮನೋರಂಜನಾ ಕಾರ್ಯಕ್ರಮ ಆಯೋಜಿತ ಕೆಲೆಲೊ. ಸಹಾಯಕ ಡಾ. ಅರ್ಚನಾ ಎಂ. ವಿ. ಆನಿ ಸಹಾಯ್ಯಕ ಪ್ರಾಧ್ಯಾಪಕ ಡಾ. ವಾಸುದೇವ ಭಟ್ ಹಾಂಣೀ ಸೊಯ್ರಾಲೊ ವಳಕ ಕರನು ದಿಲೊ. ವಾಣಿಶ್ರೀ ಹಾಂನಿ° ಸೂತ್ರ ಸಂಚಾಲನ ಕೆಲೆ°.

ದಾವಣಗೆರೆ: ಹಾಂಗಾಚೆ ಕಲಾಕುಂಚ ಸಾಂಸ್ಕೃತಿಕ ಸಂಸ್ಥೆನ ಮಹಾಶಿವರಾತ್ರಿ ಪ್ರಯುಕ್ತ 50 ಪಯಶೆಚೆ ಪೋಸ್ಟ್ ಕಾರ್ಡಾರಿ ಚಿತ್ರ ರಚನ ಕರಚೊ ಸ್ಪರ್ಧೊ ರಾಜ್ಯಾ ಸ್ಥರಾರಿ ಆಯೋಜನ ಕೆಲೆಲೊ. ಕರ್ನಾಟಕ ಆನಿ ಸೇಝಾರಿ ರಾಜ್ಯಾ° ದಾಕೂನ ಸಾಬಾರ 1,789 ಪೋಸ್ಟ್ ಕಾರ್ಡ° ಆಯಿಲಿಂತಿ ಮ್ಹಣು ಕಲಾಕುಂಚ ಸಂಸ್ಥೆಚೊ ಸಂಸ್ಥಾಪಕ ಸಾಲಿಗ್ರಾಮ ಗಣೇಶ್ ಶೆಣೈ ಹಾಂನಿ° ಕಳಯಲಾ°. ಸ್ಪರ್ಧಿಕಾಂಚೆ ವಯಾಕ ಸಮ ಜಾವನು ವೆಗವೆಗಳೆ ವಿಭಾಗಾಂತು° ಸ್ಪರ್ಧೊ ಚಲೊ. ಮ್ಹಾಲ್ಗಡೆಲೆ ವಿಭಾಗಾಂತು° ಪಯಲೆ° ಇನಾಂ ತೀನ ಲೋಕಾಂಕ ವಾಂಟೂನ ಗೆಲೆ°. ದಕ್ಷಿಣ ಕನ್ನಡ ಜಿಲ್ಲೆಚೆ ಮಂಗಳೂರಚೆ ರಾಜೇಶ್ ಡಿ. ಶೇಟ್, ಗದಗಾಚೆ ಎಸ್. ಐ. ತೆಗ್ಗಿನಮನಿ, ಉತ್ತರ ಕನ್ನಡ ಜಿಲ್ಲೆಚೆ ಗೋಕರ್ಣಚೆ ನವ್ಯಾ ಮನೋಹರ ಪೈ ಹಾಂಕಾ° ಪಯಲೆ° ಇನಾಂ, ದಾವಣಗೆರೆಚೆ ಜೀವಿಕಾ ಎಂ. ಹಾಂಕಾ° ದುಸ್ರೆ ಇನಾಂ, ಕೇರಳ ರಾಜ್ಯಾಚೆ ಕಾಸರಗೋಡು ಮಂಜೇಶ್ವರಚೆ ಶಕುಂತಲಾ ನಾಗೇಶ್ ಶೆಣೈ ಹಾಂಕಾ° ತಿಸ್ರೆ° ಇನಾಂ, ದಾವಣಗೆರೆಚೆ ಡಾ|| ದೀಪಶ್ರೀ ಪ್ರಮೋದರ ಗುಜ್ಜಾರ್, ಲೀಲಾ ಸುಭಾಷ್ ಹಾಂಕಾ° ಸಮಾಧಾನಕರ ಇನಾಂ ಫಾವೊ ಜಾಲಾ°. ದ್ಹಾಕಲೆಲೆ ವಿಭಾಗಾಂತು° ಪಯಲೆ° ಇನಾಂ ಬಸವಾಪಟ್ಟಣಾಚೆ ವೀರೇಶ್ ಬಿಳಚಿ ಬಿ.ಎಸ್., ದುಸ್ರೆ ಇನಾ° ದಾವಣಗೆರೆಚೆ ಸುಭೀಕ್ಷಾ ಎಸ್., ತಿಸ್ರೆ ಇನಾಂ ಅರಸೀಕೆರೆಚೆ ಅನನ್ಯ ಜಿ, ಸಮಾಧಾನಕರ ಇನಾ° ಮಹಾರಾಷ್ಟಾçಚೆ ಶ್ರೀರಾಮಪುರಾಚೆ ಸುಶ್ಮಿತಾ ಪವಾರ್, ನಾಸಿಕಚೆ ಜಮೀರಾಬಾನು ಹಾಂಕಾ° ಫಾವೊ ಜಾಲಾ°. ಪ್ರಾಥಮಿಕ ವಿಭಾಗಾಂತು° ಪಯಲೆ° ಇನಾಂ ತಿರುವನಂತಪುರಾಚೆ ಪ್ರಾನ್ಸಿಸ್ ಡಿಲೇರಿಯ, ದುಸ್ರೆ ಇನಾಂ ಬಸವಾಪಟ್ಟಣಾಚೆ ಸಾತ್ವಿಕ್ ಕೆ.ಬಿ, ತಿಸ್ರೆ ಇನಾಂ ಜಗಳೂರಚೆ ವೈಭವ್ ಬಿ. ಜ್ಯೋಯ್ಸ್, ಸಮಾಧಾನಕರ ಇನಾಂ ಶಿರಾಲಿಚೆ ರಾಮದಾಸ್ ದೇವಣ್ಣ ನಾಯಕ್, ಶಿಗ್ಗಾವಚೆ ಶ್ರೀಪ್ರಿಯಾ ಬಸಪ್ಪ ಬಂಡೀಕಾರ್ ಹಾಂಕಾ° ಫಾವೊ ಜಾಲಾ°. ಸ್ಪರ್ಧೆಚೆ ನಿಯಮಾ ಪ್ರಮಾಣೆ ವಿಜೇತಾಂಕ ಅಭಿನಂದನಾ ಪತ್ರ ವ್ಯಾಟ್ಸಾಪ್ ಮುಖಾಂತರ ದಾಡೂನ ದಿತಾತಿ ಮ್ಹಣು ಕಳವಣಿ ಸಾಂಗತಾ.