ಉಡುಪಿ: ಹಾಂಗಾಚೆ ಶಿವಪಾಡಿ ಶ್ರೀ ಉಮಾಮಹೇಶ್ವರ ದೇವಸ್ಥಾನ ಅಭಿವೃದ್ಧಿ ಟ್ರಸ್ಟ್ ಆನಿ ಉಮಾಮಹೇಶ್ವರ ಭಜನಾ ಮಂಡಳಿ ಹಾಂಗೆಲೆ ಮುಖೇಲಪಣಾರಿ ಆರತಾ° ಪಂಡಾರಪುರ ಶ್ರೀ ವಿಟ್ಠಲ ರುಕ್ಮಿಣಿ ದೇವಳಾಂತು° ಭಜನ ಸೇವಾ ಚಲಿ. ಹ್ಯಾ ವೇಳಾರ ದೇವಳಾಚೊ ಆಡಳಿತಾಧಿಕಾರಿ ಟ್ರಸ್ಟಾಚೊ ಅಧ್ಯಕ್ಷ ಮಹೇಶ್ ಠಾಕೂರ್ ಹಾಂಕಾ° ಸನ್ಮಾನ ಚಲೊ.

ಮುಂಬಯಿ: ಮಹಾರಾಷ್ಟಾಚೆ ಪಂಡರಾಪುರಾಚೆ ಪುರಾಣ ಪ್ರಸಿದ್ಧ ಶ್ರೀ ವಿಠೋಭ ದೇವಸ್ಥಾನಾಕ ಶ್ರೀ ಕಾಶೀಮಠಾಧೀಶ ಶ್ರೀಮದ್ ಸಂಯಮೀοದ್ರ ತೀರ್ಥ ಸ್ವಾಮೀಜಿ ಹಾಂನಿ° ಆರತಾ° ಭೇಟಿ ದಿಲಿ. ದೇವಳಾಚೆ ಶಿಷ್ಟಾಚಾರ ಪ್ರಮಾಣೆ ಗುರುವರ್ಯಾಂಕ ಸ್ವಾಗತ ಕರಚೆ° ಜಾಲೆ°. ಗುರುವರ್ಯಾಲೆ ಉಪಸ್ಥಿತಿರಿ ಶ್ರೀ ವಿಠೋಭ ದೇವಾಕ ದೇವಳಾಚೆ ಅರ್ಚಕ ವೃಂದಾನ ವಿಶೇಷ ಅಲಂಕಾರ ಕೆಲೊ. ಶ್ರೀಮದ್ ಸಂಯಮೀοದ್ರ ತೀರ್ಥ ಹಾಂನಿ° ಕಾಶೀಮಠ ಸಂಸ್ಥಾನಾಚೆ ಆರಾಧ್ಯ ದೇವು ವ್ಯಾಸ ರಘುಪತಿಲೆ ತಸ್ವೀರ ಆಸಚೊ ಸ್ವರ್ಣಹಾರ ಶ್ರೀ ವಿಠೋಭ ದೇವಾಕ ಅರ್ಪಣ ಕೆಲೆ°. ಹ್ಯಾ ಸಂದರ್ಭಾರಿ ಸುಕೃತೀಂದ್ರ ಸ್ವಾಮಿ ಸೇವಾ ಪ್ರತಿಷ್ಠಾನ ಹಾಜೊ ಅಧ್ಯಕ್ಷ ರಘುವೀರ್ ಭಂಡಾರಕಾರ್, ಗುರುಪ್ರಸಾದ್ ಕಾಮತ್ ಕಾಞಗಾಡ್, ರಾಘವೇಂದ್ರ ಭಕ್ತ, ವಿಶ್ವನಾಥ ಭಟ್, ಪಂಡರಾಪುರ ಬ್ಯಾಂಕಾಚೊ ಸಿಇಒ ಉಮೇಶ್ ವಿರ್ದೆ, ಕೊಚ್ಚಿ ನವೀನ್ ಕಾಮತ್ ಆನೀ ಖೂಬ ಶಿಷ್ಯವರ್ಗ ಉಪಸ್ಥಿತ ಆಶಿಲೆ.

ಪಂಡರಾಪುರ: ದೇವಾಲೊ ಅನುಗ್ರಹ, ಗುರು ಪರಂಪರೆಚೊ ಆರ್ಶೀವಾದಾನ ಭಕ್ತಲೋಕಾಂಚೆ ದೋನ ದಶಕಾಂಚೆ ಸೋಪನ ಸಾಕಾರ ಜಾತಾ ಆಸಾ ಮ್ಹಣು ಶ್ರೀ ಕಾಶೀಮಠಾಧೀಶ ಶ್ರೀಮದ್ ಸಂಯಮೀοದ್ರ ತೀರ್ಥ ಸ್ವಾಮೀಜಿ ಹಾಂನಿ° ಸಾಂಗಲೆ°. ಮಹಾರಾಷ್ಟ್ರಾಚೆ ಪಂಡರಾಪುರಾಂತು° ಕಾಶೀಮಠಾಚೆ ನೂತನ ಶಾಖಾ ಮಠಾಕ ನಿಧಿಕಲಶ ಸ್ಥಾಪನಾ ಆನಿ ವಿವಿಧ ಧಾರ್ಮಿಕ ವಿಧಿವಿಧಾನ ಕರನು, ಶಿಲಾನ್ಯಾಸ ಕರನು ತಾಂನಿ° ಆರ್ಶೀವಚನ ದಿಲೆ°. ಪ್ರಸಿದ್ಧ ಪುಣ್ಯಕ್ಷೇತ್ರ ಪಂಡರಾಪುರಾಂತು° ಶಾಖಾ ಮಠ ಸ್ಥಾಪನ ಕರಕಾ ಮ್ಹಣು ಭಕ್ತವರ್ಗ ಸಾಂಗತ ಆಯಿಲೆ°. ಚಂದ್ರಭಾಗಾ ನ್ಹಂಯಚೆ ತಡಿಯೆರಿ ಮಠಾಚೆ ನಿರ್ಮಾಣ ಜಾತಾ ಆಸಾ. ಭಜನಾ ಪ್ರಿಯ ವಿಠಲ ದೇವಾಲೆ° ಕ್ಷೇತ್ರ ಆನಿ ಭಗವಂತು ಕೃಷ್ಣಾಲೆ ಪಾದುಕಾ ಆಸಚೆ ವಿಷ್ಣುಪಾದಾ ಲಾಗಿ ಮಠ ಸ್ಥಾಪನ ಜಾವಚೆ° ಸುಯೋಗ. ಕಾಶಿಮಠಾಚೆ ಮ್ಹಾಲ್ಗಡೆ ಯತಿವರ್ಯರ ಕೇಶವೇಂದ್ರ ತೀರ್ಥ ಸ್ವಾಮೀಜಿ ಹಾಂಗೆಲೆ ಪುಣ್ಯತಿಥಿ ದೀವಸು ನವೀನ ಮಠಾಚೆ ಶಿಲಾನ್ಯಾಸ ಜಾವಚೆ° ದೇವಾಲೆ ಆನಿ ಗುರುಂಗೆಲೆ ಅನುಗ್ರಹಾನ ಸಾಧ್ಯ ಜಾಲೆ° ಮ್ಹಣು ಗುರುವರ್ಯಾನ ಸಾಂಗಲೆ°. ಪುಣ್ಯ ಕ್ಷೇತ್ರಾಂತು° ಶಾಖಾ ಮಠ ಸ್ಥಾಪನ ಜಾವಚೆ ನಿಮಿತ ಭಕ್ತ ಲೋಕಾಂಚೆ ವಾಸ್ತವ್ಯಾಕ ಅನುಕೂಲ ಜಾತಾ. ಹರಿದ್ವಾರ, ತಿರುಪತಿಂತು ಶಾಖಾಮಠ ಸ್ಥಾಪನ ಕರತನಯೀ ಆಮಗೆಲೆ ಗುರು ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೀಜಿ ಹಾಂಗೆಲೆ° ಚಿಂತನಯೀ ತೆಂಚಿ ಜಾವನು ಆಶಿಲೆ°. ತಾಂಗೆಲೆ ಆರ್ಶೀವಾದಾನ ಆತ° ಪಂಡರಾಪುರಾಂತೂಯೀ ಮಠ ನಿರ್ಮಾಣ ಜಾತಾ ಆಸಾ ಮ್ಹಣು ತಾಂನಿ° ಸಾಂಗಲೆ°.
ವೇದಮಂತ್ರ ಘೋಷಾನ ಗುರುವರ್ಯಾಲೆ° ಸ್ವಾಗತ ಜಾಲೆ°. ನೂತನ ಶಾಖಾ ಮಠಾಕ ಯೋಗ್ಯ ಜಾಗೊ ಪಳಯತನಾ ಆಯಿಲೆ ದುಬಾವಾ ಬದಲ ಮಂಬೈಚೆ ದೀಪಕ್ ಭಾಸ್ಕರ್ ಶೆಣೈನ ಕಳಯಲೆಂ. ಜಗನ್ನಾಥ ಕಾಮತ್ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ರಘುವೀರ್ ಭಂಡಾರಕಾರ್, ಅಜಿತ್ ಕಾಮತ್, ಜಯಂತ್ ಪ್ರಭು, ದಿನೇಶ್ ಕಾಮತ್ ಕೋಟೇಶ್ವರ್, ರಾಜೇಶ್ ಪ್ರಭು ಎರ್ನಾಕುಲಂ, ರಮೇಶ್ ಭಂಡಾರಕಾರ್, ನಿತಿನ್ ಪ್ರಭು, ಗುರುಪ್ರಸಾದ ಕಾಮತ್ ಕಾಞಗಾಡ್, ಗಣೇಶ್ ಹೆಗ್ಡೆ ಪಂಡರಾಪುರ, ಪ್ರವೀಣ್ ಪೈ ಪಂಡರಾಪುರ, ಚೇತನ್ ಕಾಮತ್, ನರೇಶ್ ಪ್ರಭು ಆನಿ ಮಹಾರಾಷ್ಟ್ರ, ಕರ್ನಾಟಕ, ಕೇರಳ ಸಹಿತ ದೇಶಾಚೆ ಖೂಬ ಪ್ರದೇಶಾ ದಾಕೂನ ಶಿಷ್ಯ ವರ್ಗ ಉಪಸ್ಥಿತ ಆಶಿಲೆ. ಶ್ರೀ ಸುಕೃತೀಂದ್ರ ಸ್ವಾಮಿ ಸೇವಾ ಪ್ರತಿಷ್ಠಾನ ಹಾಂನಿ° ಹೋ ಕಾರ್ಯಕ್ರಮ ಆಯೋಜನ ಕೆಲೆಲೊ. ಪಂಡರಾಪುರಚೆ ಗೌಡ ಸಾರಸ್ವತ ಬ್ರಾಹ್ಮಣ ಸಮುದಾಯಾಚೆ ಲೋಕಾನ ಭಜನಾ ದಿಂಡಿ ಮೆರವಣಿಗಾ ಕೆಲಿ.

ಹಜಾರ ವರಸಾಕಯಿ  ಚಡ ಇತಿಹಾಸ ಆಸಚೆ ಶ್ರೀಕ್ಷೇತ್ರ ಪಂಡರಪುರಾಚೆ ಶ್ರೀ ಕ್ಷೇತ್ರದ ವಿಠ್ಠಲ ರುಕ್ಮಾಯಿ ದೇವಸ್ಥಾನಾಚೆ ಶ್ರೀ ವಿವೇಕಾನಂದ ವಾಸ್ಕರವಾಡಾಚೆ  ನವೀಕರಣ ಕರತಾನ  ನವೀನ ದ್ವಾರ ನಿರ್ಮಾಣ ಕೆಲಾ°. ದೇವಳಚೋ ಆರಾಧಕ ಜಾವನು ಆಸಚೆ ಹಳಿಯಾಳಚೆ  ಶಾಸಕ ಆರ್ . ವಿ. ದೇಶಪಾಂಡೆ ಹಾಂನಿ ಸೇವಾ ರೂಪಾರಿ ಹಾಜೆ°  ನಿರ್ಮಾಣ ಕರೋನು ಆಜಿ ಹಳಿಯಾಳಚೇ ಸ್ವಗೃಹಾಂತು ಗಾಂವಚೆ ವಾರಕರಿ ಸಮುದಾಯಾಚೆ ಲೋಕಾಲೆ ಉಪಸ್ತಿತಿರಿ ಪೂಜಾ ಕರನು ಶ್ರೀ ಕ್ಷೇತ್ರಾಕ ದಾಡಚೆ° ಜಾಲೆ°. ಹ್ಯಾ ಸಂದರ್ಭಾರ ವಾರಕರಿ ಮುಖೆಲಿ ವಿವೇಕಾನಂದ ಕೌಸ್ತುಬ ವಾಸ್ಕರ ಹಾಂಕ ಸನ್ಮಾನ ಚಲೊ.