ಕುಮಟಾ: ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಲಿ ಜಿವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮೀಜಿ ಹಾಂಗೆಲೊ ಶುಭಕೃತ ನಾಮ ಸಂವತ್ಸರಾಚೊ ಚಾತುರ್ಮಾಸ ಉತ್ತರಕನ್ನಡ ಜಿಲ್ಲೆಚೆ ಕುಮಟಾಚೆ ಶ್ರೀ ಶಾಂತೇರಿ ಕಾಮಾಕ್ಷಿ ರಾಮನಾಥ ಲಕ್ಷ್ಮೀನಾರಾಯಣ ದೇವಳಾಂತು° ಜುಲೈ 20 ದಾಕೂನ ಸೆಪ್ಟೆಂಬರ್ 10 ಥಾಂಯ ಚಲಚೊ ಆಸಾ ಮ್ಹಣು ದೇವಳಾಚೆ ಕಳವಣಿಂತು° ಸಾಂಗಲಾ°. ಪೀಠಾಧಿಪಾತಿ ಜಾತರಿ ಹೊ ಗುರುವರ್ಯಾಲೊ ದುಸ್ರೊ ಚಾತುರ್ಮಾಸ ಜಾವನು ಆಸಾ. ಜುಲೈ 16ಕ ಗುರುವರ್ಯಾಲೆ° ಪುರಪ್ರವೇಶ ಆನಿ ಸೆಪ್ಟೆಂಬರ್ 10ಕ ಚಾತುರ್ಮಾಸ ವೃತ ಸಮರ್ಪಣ ಜಾವಚೆ° ಆಸಾ ಮ್ಹಣು ಕಳವಣಿ ಸಾಂಗತಾ.

ಯಲ್ಲಾಪುರ ಪ್ರಭು ಹೊಟೇಲ್ ಹಾಜ್ಜೆ ಮಾಲಕ ವಿದ್ಯಾಧರ ಪ್ರಭು ಸದ್ಗತಿಕ ಪಾವಲೆ. ಜನಸಂಘ ಆನಿ ಭಾರತೀಯ ಜನತಾ ಪಕ್ಷಾಚೆ ಸಕ್ರಿಯ ಸಾಂದೊ ಜಾವ್ನು ವಾವುರಲ್ಲೊ ಪ್ರಭು ಮಾಮ್ ರಾಜಕೀಯಾಕ ಘೂಸನಾಶಿ ಜನಸೇವಾ ಕೆಲ್ಲಿಲೊ ಮನೀಸ್. ಆರತಾಂ ತೀಸ್- ಚಾಳೀಸ ವರಶಾಚೆ ಮಾಕ್ಷಿ ಯಲ್ಲಾಪುರಾಂತು ಮಾಶಳಿ ಜವಣಾಕ ಫಾಮಾದ್ ಜಾಲ್ಲಿಲೆ ಶುಚಿ-ರುಚಿ ಹೊಟೇಲ್ ಶೂರು ಕೋರನು ಆಜಿವರಿ ತೇಂ ಜವಣಾಚೆ ಸ್ವಾದ ಲೊಕಾಂಕ ದಿತ್ತ ಆಶಿಲೆ ಖ್ಯಾತಿ ಹಾಂಕಾ ಆಸಾ. ಯಲ್ಲಾಪುರ ವೆಂಕಟರಮಣ ಮಠಾಂತು ಸಂಪನ್ನ ಜಾಲ್ಲಿಲೆ ಪರ್ತಗಾಳಿ ಮಠಾಚೆ ಸ್ವಾಮಿ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಹಾಂಗೆಲೆ ಚಾತುರ್ಮಾಸ್ಯ ವೃತಾಚೆ ಆಯೋಜನೆಕ ಪ್ರಭು ಮಾಮಾನ ತೆಂಕೊ ದಿಲ್ಲಿಲೊ ಆಸಾ. ಕೊಂಕಣಿ ಮೋಗಿ ವಿದ್ಯಾಧರ ಮಾಮಾನ ಕೊಂಕಣಿ  ಪತ್ರಾಚೊ ವಾಚಪಿ ಜಾವ್ನು ಭಾಷಾಭಿಮಾನ ದವರುನು ಘೆತಿಲೊ.