ಮಂಗಳೂರು: 1974 ವರಸಾಂತು° ಕೊಂಕಣಿ ವರಕವಿ ಚಾಫ್ರಾ ದೆಕೊಸ್ತಾ ಹಾಂನಿ° ಅಧ್ಯಕ್ಷ ಆಸೂನ, ಪಂಚ್ಕದಾಯಿ ಸಂಪಾದಕ ಬಿ. ವಿ. ಬಾಳಿಗಾ ಹಾಂನಿ° ಉಪಾಧ್ಯಕ್ಷ ಆಸೂನ, ಆಸ್ಟಿನ್ ಡಿಸೋಜ ಪ್ರಭು ಕಾರ್ಯದರ್ಶಿ ಆಸೂನ ರಾಕ್ನೋ ಪತ್ರಿಕೆಚೆ ತೇದನಾಚೆ ಸಂಪಾದಕ ಫಾದರ್ ಮಾರ್ಕ್ ವಾಲ್ಡರ್ ಖಜಾಂಚಿ ಆಸೂನ ಸ್ಥಾಪನಾ ಜಾಲೆಲೆ ಕೊಂಕಣಿ ಭಾಶಾ ಮಂಡಳ ಕರ್ನಾಟಕ ಹಾಜೊ ಭಾಂಗರಾಳೊ ಮಹೋತ್ಸವ ಜನವರಿ 9ಕ ಮಂಗಳೂರಚೆ ಕದ್ಮುಲ ರಂಗ ರಾವ್ ಪುರಭವನಾಂತು° ಚಲಚೆ ಆಸಾ ಮ್ಹಣು ಅಧ್ಯಕ್ಷ ಕೆ. ವಸಂತ ರಾವ್ ಹಾಂನಿ° ಆಜಿ ಪತ್ರಿಕಾ ಪರಿಶಧೆಂತು° ಕಳಯಲೆ°. ಹ್ಯಾ ಸಂದರ್ಭಾರಿ ಪಾಂಚ ಪ್ರಶಸ್ತಿಯೊ ಪ್ರಧಾನ ಕರತಾತಿ ಮ್ಹಣು ತಾಂನಿ° ಕಳಯಲೆ°. ಕೊಂಕಣಿ ಭಾಶೆ ಖಾತಿರ ಜೀವಮಾನ ಭರ ಸೇವಾ ದಿಲೆಲೆ ಮ್ಹಾಲ್ಗಡೆ ರಾಮದಾಸ್ ಗುಲ್ವಾಡಿ ಹಾಂಕಾ° ಜೀವಮಾನ ಪ್ರಶಸ್ತಿ, ಲೋಕವೇದ ಕಲಾವಿದ ಆನಿ ಗಾಂವoಟಿ ಚಿಕಿತ್ಸಕ ಕಲ್ಯಾಣಿಬಾಯಿ ನೀರ್ಕೆರೆ ಹಾಂಕಾ° ಜಾನಪದ ಪ್ರಶಸ್ತಿ ಕೊಂಕಣಿ ವಾರಪತ್ರಿಕೆಕ ಚಂದಾದಾರ ಕರರತ ಆಸಚೆ ಸಾಗರಚೆ ಅಪ್ಪುರಾಯ ಪೈ ಹಾಂಕಾ° ಕೊಂಕಣಿ ಕಾರ್ಯಕರ್ತ ಪ್ರಶಸ್ತಿ, ಕೊಂಕಣಿ ನಾಟಕ/ಚಲನ ಚಿತ್ರ ನಟ ಕ್ಲಾನ್‌ವಿನ್ ಫೆರ್ನಾಂಡಿಸ್ ಹಾಂಕಾ° ಯುವ ಪ್ರಶಸ್ತಿ, ಆನಿ ಪಯಲಿ ಕೊಂಕಣಿ ಕೃತಿ ಪ್ರಕಟ ಕೆಲೆಲಿ ಕೃತಿಕಾ ಕಾಮತ ಹಾಂಕಾ° ಪುಸ್ತಕ ಪ್ರಶಸ್ತಿ ಫಾವೊ ಜಾತಾ ಮ್ಹಣು ತಾಂನಿ° ಕಳಯಲೆ°. ಹ್ಯಾ ನಂತಾ° ವೆಗವೆಗಳೆ ಕ್ಷೇತ್ರಾಂತು° ಸೇವಾ ದಿಲೆಲೆ ಪನ್ನಾಸ ಸಾಧಕಾಂಕ ಸನ್ಮಾನ ಚಲತಲೊ. ತ್ಯಾ ದೀಸ ಸಕಾಳಿ ಅಂತರ ಶಾಳಾ ಆನಿ ಕಾಲೇಜ ವಿಭಾಗಾಂತು° ವಿವಿಧ ವಿನೋದಾವಳಿ ಸ್ಪರ್ಧೋ ಚಲಚೊ ಆಸಾ ಆನಿ ತ್ಯಾ ವೇಳಾರ ಕೊಂಕಣಿ ಸಂಗೀತ, ನಾಟ್ಕುಳೆ°, ಜಾನಪದ, ನೃತ್ಯ ಆನೀ ಹೇರ ಸಾಂಸ್ಕೃತೀಕ ಪ್ರದರ್ಶನ ಚಲಚೆ° ಆಸಾ ಮ್ಹಣು ತಾಂನಿ° ಸಾಂಗಲೆ°.
ಭಾಂಗರಾಳೊ ಮಹೋತ್ಸವಾಚೆ ವಾಂಟೊ ಜಾವನು ಚಲೆಲೆ ಪ್ರಭಂದ ಸ್ಪರ್ಧೆಂತು° ಸಂತ ಅಲೋಶಿಯಸ್ ಕಾಲೇಜಾಚೆ ವಿದ್ಯಾರ್ಥಿ ಫ್ರಾಂಕಿ ್ಲನ್ ಕ್ರಿಸ್ಟನ್ ಕೆಸ್ಟೆಲಿನೊಕ ಪಯಲೆ°, ಕುಮಾಟಾಚೆ ಸರಸ್ವತಿ ಪಿಯುಸಿ ಕಾಲೇಜಾಚಿ ಅಕ್ಷತಾ ವಿನಾಯಕ ಶಾನಭಾಗಾಕ ದುಸ್ರೆ°, ಮಂಗಳೂರು ವಿಶ್ವವಿದ್ಯಾನಿಲಯಾಚೆ ಕೊಂಕಣಿ ಎಂಎ ವಿದ್ಯಾರ್ಥಿ ರವಳನಾಥ ಆರ್ ಕಾಮತ್ ಹಾಂಕಾ° ತಿಸ್ರೆ° ಇನಾಂ ಫಾವೊ ಜಾಲಾ° ಆನಿ ಹಾಂಕಾ° ಹ್ಯಾಚ ಸಮಾರಂಭಾoತು° ಇನಾಂ ವಾಂಟತಾತಿ.
1995 ಇಸವಿಂತು° ಕೊಂಕಣಿ ಭಾಶಾ ಮಂಡಳಾನ ಕೊಂಕಣಿ ಉಲೊವಚೆ ಸರ್ವ ಧರ್ಮಾಚೆ (ಹಿಂದು, ಮುಸ್ಲಿಂ, ನವಾಯತ ಮುಸ್ಲಿಂ) ಹಾಂಕಾ° ಸಾಂಗತ ಹಾಡೂನ ಪಯಲೆ° ವೀರ್ಶವ ಕೊಂಕಣಿ ಸಮ್ಮೇಳನ ಆಯೋಜನ ಕೆಲಾಂ, ಕೊಂಕಣಿ ಭಾಸ ಆನಿ ಸಂಸ್ಕೃತಿ ಪ್ರತಿಷ್ಠಾನ ಸ್ಥಾಪನ ಕರಚಾಕ ಮೂಲ ಧನ ದಿಲಾ° ಮ್ಹಣು ತಾಂನಿ° ಸಾಂಗಲೆ°. ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಸ್ಥಾಪನ ಜಾವಚಾಕ, ಕೊಂಕಣಿ ಭಾಸ ಸಂವಿಧಾನಾಚೆ ಆಟ್ವೇ ವಳೇರಿಂತು° ಮೆಳೋಚಾಕ ಭಾಶಾ ಮಂಡಳಾನ ಖೂಬ ವಾವ್ರ ಕೆಲಾ° ಮ್ಹಣು ತಾಂನಿ° ಸಾಂಗಲೆ°. ಪತ್ರಿಕಾ ಪರಿಶಧೆಂತು° ಅಧ್ಯಕ್ಷ ಕೆ ವಸಂತ ರಾವ್, ಕಾರ್ಯದರ್ಶಿ ಆನಿ ಸಂಚಾಲಕ ರೇಮಂಡ್ ಡಿಕೂನಾ ತಾಕೊಡೆ, ಪ್ರಶಸ್ತಿ ಸಂಚಾಲಕ ಡಾ. ಅರವಿಂದ್ ಶಾನಭಾಗ, ಪೋಷಕ ಎಂ. ಪ್ರಶಾಂತ ಶೇಟ್, ಖಜಾಂಜಿ ಸುರೇಶ್ ಶೆಣೈ, ಉಪಾಧ್ಯಕ್ಷ ರತ್ನಾಕರ ಕುಡ್ವ ಆನಿ ಸಹ ಕಾರ್ಯದರ್ಶಿ ಜೂಲಿಯೆಟ್ ಪೆರ್ನಾಂಡಿಸ್ ಉಪಸ್ಥಿತ ಆಶಿಲೆ.

To Support Kodial Khaber click the following button.

ಮಂಗಳೂರು: "ಕೊಂಕಣಿ ಭಾಸ ಸಮೃದ್ಧ ಆಸಾ. ದೇಶಾಚೆ ಸರ್ವ ಭಾಶೆ° ಪಯಕಿ ಆಮಗೆಲಿ ಮಾತೃ ಭಾಸ ಕೊಂಕಣಿಕ ವಿಶೇಷ ಸ್ಥಾನಮಾನ ಆಸಾ. ಕೊಂಕಣಿ ಭಾಷಿಕ ಲೋಕಾನಿ ರಾಜಕೀಯ, ವಿಜ್ಞಾನ, ಉದ್ಯಮ, ಶಿಕ್ಷಣ ಆನಿ ಸಾಹಿತಿಕ ಕ್ಷೇತ್ರಾಂತು° ಶ್ರೇಷ್ಠ ಸಾಧನಾ ಕೆಲೆಲೆ ಆಸಾ. ದೇಶಾಚೆ ಸಂವಿಧಾನಾಚೆ ಆಟ್ವೇ ವಳೇರಿಂತು° ಕೊಂಕಣಿ ಭಾಶೆಕ ಸ್ಥಾನ ಮೇಳನು ತೀನ ದಶಕ° ಜಾಲೆಂತಿ. ಆಮಗೆಲೆ ಮಾತೃ ಭಾಶೆ ಬದಲ ಭರಮ ದವರೂನ ಆಮಿ ಮುಕಾರ ಸರಕಾ" ಮ್ಹಣು ಕೊಡಿಯಾಲ ಶ್ರೀ ವೆಂಕಟರಮಣ ದೇವಳಾಚೆ ಆಡಳಿತ ಮೋಕ್ತೆಸರ್ ಸತೀಷ ಪ್ರಭು ಹಾಂನಿ° ಸಾಂಗಲಾ°. ನಲಂದಾ ಸ್ಕೂಲ್ ಆನಿ ಕೊಂಕಣಿ ಭಾಶಾ ಮಂಡಳ ಕರ್ನಾಟಕ ಹಾಂನಿ° ಮೇಳನು ಆಚರಣ ಕೆಲೆಲೆ "ಕೊಂಕಣಿ ಮಾನ್ಯತಾ ದೀವಸ" ಸುವಾಳ್ಯಾಂತು° ಮುಖೇಲ ಸೊಯ್ರೆ ಆಸೂನ ತಾಂನಿ° ಆಶೆ° ಸಾಂಗಲೆ°.

ನಲಂದಾ ಶಾಳೆಚೆ ಪ್ರಮುಖ ಡಾ| ಕೆ. ಮೋಹನ ಪೈ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. "ಬರಪಿ ಆನಿ ಉಲೋವಪಿ ಕೊಂಕಣಿ ಭಾಶೆಂತು° ಖೂಬ ಫರಕ ಆಸತಾ. ತೆ° ಸಮಜೂನ ಘೆವನು ಸ್ಪಷ್ಟ ಕೊಂಕಣಿ ಭಾಸ ವಾಪೂರಚೆ° ಗರಜೆಚೆ° ಆಸಾ. ಹ್ಯಾ ನದರೇನ ಶಾಳೆಂತು° ಕೊಂಕಣಿ ಶಿಕ್ಷಣಾಕ ಸಗಟಾನ ಚಡ ಉಮೇದಿ ಘೆವಕಾ ಮ್ಹಣು ತಾಂನಿ° ಉಲೋ ದಿಲೊ. ಕೊಂಕಣಿ ಭಾಶಾ ಮಂಡಳ ಕರ್ನಾಟಕ ಹಾಜೊ ಅಧ್ಯಕ್ಷ ವಸಂತ ರಾವ್ ಹಾಂನಿ° ಶುಭಾಷಯ ಪಾಟಯಲೊ. ವಿದ್ಯಾರ್ಥಿ ಗಗನ್ ಭಟ್ ಆನಿ ವಿಧಿ ಪುರೋಹಿತ್ ಹಾಂನಿ° ಕೊಂಕಣಿ ಕಾಣಿಯೆಂಚೆ ವಾಚನ ಕೆಲೆ°.

ಭಾಶಾ ಮಂಡಳಾಚೆ ಕಾರ್ಯದರ್ಶಿ ರೇಮಂಡ್ ಡಿಕುನ್ಹಾ, ಖಜಾನದಾರ ಸುರೇಶ ಶೆಣೈ, ಆದಲೊ ಅಧ್ಯಕ್ಷ ವೆಂಕಟೇಶ ಎನ್ ಬಾಳಿಗಾ ಆನಿ ಸಾಂದೊ ಡಾ| ಅರವಿಂದ ಶ್ಯಾನುಭಾಗ ಉಪಸ್ಥಿತ ಆಶಿಲಿಂತಿ. ಕೊಂಕಣಿ ಶಿಕ್ಷಕಿ ಐಶ್ವರ್ಯಾ ಭಟ್ ಹಾಂನಿ° ಸೂತ್ರ ಸಂಚಾಲನ ಕೆಲೆ°. ವಿದ್ಯಾರ್ಥಿಯಾಂಕ ಸ್ಕೂಲ್ ಬ್ಯಾಗ್ ಆನಿ ಮಿಠಾಯಿ ಉಂಡೊ ವಾಂಟೂಚೆ° ಜಾಲೆ°.

ಮಂಗಳೂರು: "ಮಾತೃ ಭೂಮಿ ಆನಿ ಮಾತೃಭಾಸ ಆಮೀ ಕೇದನಾಯಿ ವಿಸೊರೂಂಕ ನಜ. ಮಾತೃಭಾಸ ಕೊಂಕಣಿಕ ಸಂವಿಧಾನಾಚೆ ಆಟ್ವೆ ವಳೆರಿಂತ ಸ್ಥಾನ ಮೇಳನು 30 ವರಸ° ಜಾಲೆಲೆ ವೇಳಾರ ಆಮಿ ಸಗಟಾನ ಮೇಳನು ಕೊಂಕಣಿ ಭಾಶೆಚೆ ಅಭಿವೃದ್ಧಿಕ ನಿರಂತರ ಸೇವಾ ದಿಲೆಲೆ ಲೋಕಾಲೊ ಉಡಗಾಸ ಕಾಣು ತಾಂಕಾ° ಅಭಿನಂದನ ಸಾಂಗೂಕಾ. ತಾಂಗೆಲೆ ನಿಸ್ವಾರ್ಥ ಸೇವೆ ನಿಮಿತ ಆಮೆಗೆಲಿ ಮಾತೃ ಭಾಸ ಕೊಂಕಣಿಕ ಆಜಿ ಊಂಚ ಸ್ಥಾನ ಪ್ರಾಪ್ತ ಜಾಲಾ°. ಮಂಗಳೂರಾಂತು° ಖೂಬ ಸಂಘ ಸಂಸ್ಥೆ ಕೊಂಕಣಿ ಭಾಶೆಚೆ ಅಭಿವೃದ್ಧಿ ಕಾತಿರ ಕಾಮ ಕರತ ಆಸಾತಿ. ಜಾಲ್ಯಾರ 48 ವರಸಾಚೊ ಇತಿಹಾಸ ಆಸಚೆ ಕೊಂಕಣಿ ಭಾಶಾ ಮಂಡಳಾನ 1995 ಇಸವಿಂತು° ಪಯಲೆ° ಪಾವಟಿ ವಿಶ್ವ ಕೊಂಕಣಿ ಸಮ್ಮೇಳನ ಆಯೋಜನ ಕರನು ತಾಜೆ ಉಡಗಾಸಾಕ ಶಕ್ತಿನಗರಾಂತು°ವಿಶ್ವ ಕೊಂಕಣಿ ಕೇಂದ್ರ ಸ್ಥಾಪನಾ ಕೆಲಾ°. 2024 ಇಸವಿಂತು° ಭಾಶಾ ಮಂಡಳಾಕ 50 ವರಸ° ಭರತಾತಿ ತ್ಯಾ ವರಸ ಪನ್ನಾಸ ಬರೆ ಕಾರ್ಯಕ್ರಮ ಕರಕಾ. ಹಾಂವ ತುಮಗೆಲೆ ಸಾಂಗತ ಆಸತಲೊ" ಮ್ಹಣು ನಾವಾದಿಕ ಚಾರ್ಟರ್ಡ ಅಕೌಂಟೆಂಟ್ ಎಸ್. ಎಸ್. ನಾಯಕ ಹಾಂನಿ° ಸಾಂಗಲೆ°.

ಕೊಂಕಣಿ ಭಾಶಾ ಮಂಡಳ ಕರ್ನಾಟಕ ಹಾಂನಿ° 30ವೆ° ಕೊಂಕಣಿ ಮಾನ್ಯತಾಯ್ ದೀವಸಾಚೊ ವಾಂಟೊ ಜಾವನು ಆಯೋಜನ ಕೆಲೆಲೆ ಅಂತರ ಶಾಳಾ ಆನಿ ಅಂತರ ಕಾಲೇಜ ವಿವಿಧ ವಿನೋದಾವಳಿ ಸ್ಪರ್ದೇಚೆ ಉಗ್ತಾವಣ ಕರನು ತಾಂನಿ° ಆಶೆ° ಸಾಂಗಲೆ°.

ಕೊಡಿಯಾಲ ಖಬರ ಸಂಪಾದಕ ಆನಿ ಕೊಂಕಣಿ ಭಾಶಾ ಮಂಡಳಾಚೊ ಆದಲೊ ಅಧ್ಯಕ್ಷ ವೆಂಕಟೇಶ ಬಾಳಿಗಾ ಮಾವಿನಕುರ್ವೆ ಹಾಂನಿ ಕೊಂಕಣಿ ಮಾನ್ಯತಾಯ ದಿವಸಾಚೊ ಸಂದೇಶ ದಿಲೊ. "ಕೊಂಕಣಿ ಭಾಶೆಕ ಹಜಾರಾನಿ ವರಸಾಚೊ ಇತಿಹಾಸ ಆಸಾ. ಕೊಂಕಣಿ ಭಾಸ ಬರೊವಚೆ° ಆನಿ ವಾಚೂಚೆ° ಕೆಲ್ಯಾರಿ ಭಾಸ ವರತಾ. ಆಯಚೆ ಪಿಳಗಿಕ ಶಾಳೆಂತು° ಆನಿ ಕಾಲೇಜಾಂತು° ಕೊಂಕಣಿ ಶಿಖಚೊ ಅವಕಾಶ ಆಸಾ. ಕೊಂಕಣಿ ಎಂ.ಎ ಕರಚೊ ಅವಕಾಶ ಆಸಾ. ಹಾಜೆ ಉಪೇಗ ಸಗಟಾನ ಕರಕಾ" ಮ್ಹಣು ತಾಂನಿ° ಸಾಂಗಲೆ°. ವಿದ್ಯಾರ್ಥಿಯಾ° ಕಾತಿರ ತಾಂನಿ° ಕೊಂಕಣಿ ಕ್ವಿಜ್ ಆಯೋಜನ ಕರನು ವೆಗವೆಗಳೆ ವಿಷಯಾರಿ ಮಾಹಿತಿ ದಿಲಿ. ವಿದ್ಯಾರ್ಥಿಯಾನಿ ಉಮೇದಿನ ವಾಂಟೊ ಗೆತಿಲೆ° ದಿಸೂನ ಆಯಲೆ°.
ವಿವಿಧ ವಿನೋದಾವಳಿ ಸ್ಪರ್ಧೇಚೊ ಸಂಚಾಲಕ ಆನಿ ಭಾಶಾ ಮಂಡಳಾಚೊ ಉಪಾಧ್ಯಕ್ಷ ರತ್ನಾಕರ ಕುಡ್ವ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲೆ°. ತಾಣೆ ಭಾಶಾ ಮಂಡಳಾಚೆ ಸ್ಥಾಪಕ ಲೋಕಾಲೊ ಉಡಗಾಸ ಕಾಳೊ. ಸ್ಥಾಪಕ ಅಧ್ಯಕ್ಷ ದೇವಾದಿನ ಚಾಫ್ರಾ ಡಿಕೋಸ್ತಾ, ಉಪಾಧ್ಯಕ್ಷ ದೇವಾದಿನ ಬಿ. ವಿ. ಬಾಳಿಗಾ, ಸ್ಥಾಪಕ ಕಾರ್ಯದರ್ಶಿ ಆಸ್ಟಿನ್ ಡಿಸೋಜಾ, ಸ್ಥಾಪಕ ಖಜಾಂಚಿ ಫಾ| ಮಾರ್ಕ ವಾಲ್ಡರ್ ತಸಲೆ ಹಜಾರಾನಿ ಸಂಖ್ಯಾನಿ ಕೊಂಕಣಿ ವಾವ್ರಾಡಿಲೊ ಆಶೀರ್ವಾದ ಆಮಕಾ ಆಸಾ. ವಗೀಚ ಯೆವಚೆ ಸ್ವರ್ಣ ಮಹೋತ್ಸವ ಅತ್ಯಂತ ವಿಜೃಂಭಣೆನ ಆಚರಣ ಕರತಾತಿ ಮ್ಹಣು ತಾಣೆ ಭಾಷೈಲೆ°. ದೇವಾದಿನ ಪೌಲ ಮೋರಾಸ ಹಾಂಗೆಲೆ ಹಾಂನಿ° ಭಾಶಾ ಮಂಡಳಾಚೆ ಅಧ್ಯಕ್ಷ ಆಸತಾನ ಚಲೆಲೆ ಕೊಂಕಣಿ ಚಳ್ವಳಾಚೆ ನಿಮಿತ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಸ್ಥಾಪನ ಜಾಲಿ. ಭಾಶಾ ಮಂಡಳಾನ ವಿಶ್ವ ಕೊಂಕಣಿ ಸಮ್ಮೇಳನ ಆಯೋಜನ ಕೆಲೆಲೆ ನಿಮಿತ ವಿಶ್ವ ಕೊಂಕಣಿ ಕೇಂದ್ರ ಸ್ಥಾಪನ ಜಾಲೆಂ ಮ್ಹಣು ತಾಣೆ ಕಳಯಲೆಂ. ಕೊಂಕಣಿ ಭಾಶಾ ಮಂಡಳಾಚೊ ಅಧ್ಯಕ್ಷ ವಸಂತ ರಾವ್ ಹಾಂನಿ° ಅಧ್ಯಕ್ಷೀಯ ಭಾಷಣ ಕೆಲೆ°.

ಉಪರಾಂತ ಘಡಲೆಲೆ ಅಂತರ ಶಾಳಾ ಆನಿ ಅಂತರ ಕಾಲೇಜ ವಿವಿಧ ವಿನೋದಾವಳಿ ಸ್ಪರ್ಧೇಂತು° ವಿದ್ಯಾರ್ಥಿಯಾನಿ ಕೊಂಕಣಿ ಭಾಶೆಚೆ ಸಂಸ್ಕ್ರತಿಚೆ ವಳಕ ಕರನು ದಿಲೆ. ಕೊಂಕಣಿ ವೊವಯೊ, ಮ್ಹಣಿಯೊ, ನಾಟ್ಕುಳೆ°, ಬೈಲಾ ನೃತ್ಯ, ಹರಿಕಥಾ, ಪದ ಗಾಯಚೆ° ಅಶೆ° ಸಾಬಾರ ಸಾಂಸ್ಕೃತಿಕ ಪ್ರಕಾರಾಂಚೆ° ಪ್ರದರ್ಶನ ಕೆಲೆ°.
ಉಪರಾಂತ ಘಡಲೆಲೆ ಸಮಾರೋಪ ಕಾರ್ಯಕ್ರಮಾಂತು° ನಾವಾದೀಕ ನಟು ಆನಿ ನಿರ್ದೇಶಕ ಕಾಸರಗೊಡು ಚಿನ್ನಾ ಹಾಂಕಾ° "ಕೊಂಕಣಿ ಭಾಶಾ ರತ್ನ" ಬಿರುದು ದಿವನು ಸನ್ಮಾನ ಚಲೊ. ಕೆನರಾ ಬ್ಯಾಂಕಾಚೆ ಎ.ಜಿ.ಎಂ ರಾಬರ್ಟ ಡಿಸಿಲ್ವಾ ಹಾಂನಿ° ಮುಖೇಲ ಸೊಯ್ರೆ ಆಶಿಲೆ. ತಾಂನಿ° ವಿಜೇತಾಂಕ ಇನಾ° ವಾಂಟಲಿ°. "ಆಮಿ ಆಮಗೆಲೆ ಮಧೆ° ಉಲಯತಾನಾ ಕೊಂಕಣಿ ಭಾಸ ವಾಪೂರಕಾ. ಕೆನರಾ ಬ್ಯಾಂಕ ಅಸಲೆ ಕಾರ್ಯಕ್ರಮಾಂಕ ಕೆದನಾಯಿ ಪಾಟಿಂಬೊ ದಿತಾ" ಮ್ಹಣು ತಾಂನಿ° ಸಾಂಗಲೆ°.
ಸನ್ಮಾನ ಸ್ವೀಕಾರ ಕೆಲೆಲೆ ಕಾಸರಗೊಡು ಚಿನ್ನಾ ಹಾಂನಿ ಶುಭಾಷಯ ಪಾಟಯಲೊ. "ಮಂಗಳೂರ ಶಹರಾಂತು° ಕೊಂಕಣಿ ಭಾಶೆ ಕಾತಿರ ಕಾಮ ಕರಚೆ ಖೂಬ ಸಂಸ್ಥೆ ಆಸಾತಿ. ತೆಂಚಿ ಭಾಯರಚೆ ಗಾಂವ° ಪಳಯಲ್ಯಾರಿ ಅಸಲೆ ಸಂಸ್ಥೆ ಖೂಬ ಊಣೆ ಆಸಾತಿ. ಅಶೆ° ಕಸಲ್ಯಾಕ ಜಾತಾ ? ಹರ ಎಕ ಗಾಂವಾಂತು° ಕೊಂಕಣಿ ಭಾಶೆ ಕಾತಿರ ಕಾಮ ಕರಚೆ ಸಂಸ್ಥೆ ಜಾವಕಾಚಿ" ಮ್ಹಣು ತಾಂನಿ° ಸಾಂಗಲೆ°. ಭಾಶಾ ಮಂಡಳಾಚೊ ಕಾರ್ಯದರ್ಶಿ ರೇಮಂಡ ಡಿಸೋಜಾನ ಆಭಾರ ಮಾನಲೊ. ಖಜಾಂಚಿ ಸುರೇಶ ಶೆಣೈ, ಸಹ ಕಾರ್ಯದರ್ಶಿ ಜ್ಯುಲಿಯೆಟ್ ಫೆರ್ನಾಂಡಿಸ್ ವೇದಿಕೆರಿ ಉಪಸ್ಥಿತ ಆಶಿಲೆ. ವಿದ್ಯಾ ಬಾಳಿಗಾ, ನವೀನ ಕುಲಶೇಖರ, ಗೀತಾ ಸಿ. ಕಿಣಿ, ರಾಘವೇಂದ್ರ ಕಿಣಿ, ಲಾರೇನ್ಸ್ ಪಿಂಟೊ, ಪವಿತ್ರಾ ಕುಡ್ವ, ಅನಿರುದ್ಧ ಕುಡ್ವ ಹಾಂನಿ° ಸಹಕಾರ ದಿಲೊ.
ಅರುಣ ಪ್ರಕಾಶ ನಾಯಕ, ಉರ್ಬನ್ ಡಿಸೋಜಾ, ಪ್ರೇಮ ಮೋರಾಸ್ ವರೇಣ್ಯಾರ ಆಶಿಲೆ.

ಸ್ಪರ್ಧೆಚೊ ಫಲಿತಾಂಶ:

ಪ್ರೌಢಶಾಳಾ ವಿಭಾಗ: 

ಪಯಲೆ° ಸ್ಥಾನ: ಸಂತ ಅಲೋಶಿಯಸ್ ಪ್ರೌಢ ಶಾಳಾ

ದುಸ್ರೆ° ಸ್ಥಾನ: ಕೆನರಾ ಹಿರಿಯ ಪ್ರಾಥಮಿಕ ಶಾಳಾ

ತಿಸ್ರೆ° ಸ್ಥಾನ: ಉರ್ವ ಕೆನರಾ ಪ್ರೌಢ ಶಾಳಾ.

ಕಾಲೇಜ ವಿಭಾಗ:

ಪಯಲೆ° ಸ್ಥಾನ: ಮಿಲಾಗ್ರಿಸ್ ಕಾಲೇಜ

ದುಸ್ರೆ° ಸ್ಥಾನ: ಸಂತ ಅಲೋಶಿಯಸ್ ಕಾಲೇಜ

ತಿಸ್ರೆ° ಸ್ಥಾನ: ಕೆನರಾ ಡಿಗ್ರಿ ಕಾಲೇಜ.

ಅತ್ಯುತ್ತಮ ಸೂತ್ರದಾರ ಪ್ರಶಸ್ತಿ:

ಪ್ರೌಢಶಾಳಾ ವಿಭಾಗ: ಸಂತ ಅಲೋಶಿಯಸ್

ಕಾಲೇಜು ವಿಭಾಗ: ಮಿಲಾಗ್ರಿಸ್ ಕಾಲೇಜ.