ಭಾರತೀಯ ಸೇನೇಚೆ ವಾಯುದಳಾಂತು ಟೆಕ್ನಿಕಲ್ ಆಫೀಸರ ಹ್ಯಾ ನಾತ್ಯಾನ ದೇಶ ಸೇವೇಚೆ ಸೌಭಾಗ್ಯ ಮೆಳ್ಳೆಲಿ ಕುಮಾರಿ ರಶ್ಮಿ ಜಿ. ಭಟ್ ಹ್ಯಾ ಹುದ್ದ್ಯಾಚೆರ್ ಪಾವಿಲ್ಲಿ ಪ್ರಥಮ ವನಿತಾ ಜಾವನು ಅಪುರಬಾಯೆಚಿ ನಾಮನಾ ಜೊಳ್ಳೇಲಿ ಕೀರ್ತಿಕ ಪಾತ್ರ ಜಾಲ್ಯಾ ಆನಿ ಸಗಳೇಚಿ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಕ ಅಭಿಮಾನ ಪಾವಯಲಾ.

ಕೇರಳಚೆ ಕೊಚ್ಚಿ ಶಹರಾಂತುಲೆ ಗೋಶ್ರೀಪುರ ಗಾಂವಚೆ ವಿಖ್ಯಾತ ಕೊಚ್ಚಿ ತಿರುಮಲ ದೇವಸ್ವಮ್ ಹ್ಯಾ ದೇವಸ್ಥಾನಾಂತು ಮುಖ್ಯ ಜಾವನು ಪಾಲ್ಲಂಕೆಕ ಖಾಂದೊ ಮಾರನು ದೇವಾಲಿ ಸೇವಾ ದಿನನಿತ್ಯ ಕರನು ಯೆವಚೆ ಗೋಪಿನಾಥ ಭಟ್ ಆನಿ ಶೋಭಾ ಭಟ್ ದಂಪತಿಲಿ ಏಕಮೇವ ಚೆರಡು ಜಾವನು ೧೯೯೩ ಇಸವಿಂತು° ರಶ್ಮಿ ಜನ್ಮಾಕ ಆಯಿಲಿ. ತಿರುಮಲ ದೇವಸ್ಥಾನಾಚೆ ವಿದ್ಯಾಲಯಾಂತು ಅತ್ಯಂತ ಶಿಸ್ತಾರಿ ಧಾವೆ ದರ್ಜೆ ಪರ್ಯಂತ ತಿಗೆಲೆ ಶಿಕಪ ಜಾಲೆ°. ೨೦೦೯ ಜಾತಾನಾ ಹರ ಏಕ ವಿಷಯಾಂತು "ಏ ಪ್ಲಸ್’ ಮಟ್ಟಾರಿ ಅಂಕ ಜೋಡೂನ ತೀ ಉತ್ತೀರ್ಣ ಜಾಲಿ. ಸೌಮ್ಯ ಸ್ವಭಾವಾಚಿ ಆನಿ ಸದಾ ಹಸನ್ಮುಖಿ ಆಶಿಲಿ ರಶ್ಮಿಕ ಜೀವನಾಂತು ಅತ್ಯಂತ ಉತ್ಸಾಹ ಆಶಿಲೊ. ಕೊಚಿಂತೂಚಿ ತೊಪ್ಪುಮ್ಪಡಿ ಪ್ರದೇಶಾಂತು ಸಂತ ಸೆಬಾಸ್ಟಿಯನ್ ಹೈ ಸ್ಕುಲಾಂತು ಪ್ಲಸ್ ಟೂ ಜಾತ್ತನಾ ೯೪% ಅಂಕ ಘೆವನು ಯಶಸ್ವಿ ಜಾಲ್ಲಿ.

ಮುಕಾವೇಲೆ ಶಿಕಪ ಶಂಕರಾಚಾರ್ಯಾಲೆ ಜನ್ಮಸ್ಥಾನ ಮ್ಹಣು ವಿಖ್ಯಾತ ಕಾಲಡಿ ಗಾವಾಂತು ಆದಿಶಂಕರಾ ಇನ್ಸ್ಟಿಟ್ಯೂಟ್ ಒಫ್ ಇಂಜಿನಿಯರಿοಗ್ ಅಂಡ್ ಟೆಕ್ನೋಲೊಜಿಂತು ಸೇರವುನು ಎಲೆಕ್ಟ್ರಾನಿಕ್ಸ್ ಆನಿ ಕಮ್ಯುನಿಕೇಶನ್ ವಿಷಯಾಂತು ಬಿ.ಟೆಕ್ ಬಿರುದ ಜೊಡುಕ ಶಿಕಚೆ ತೆನ್ನಾಚಿ ಕ್ಯಾಂಪಸ್ ಇಂಟರ್ವ್ಯೂ ಚಲತಾನಾ ಟಿ. ಸಿ. ಎಸ್. ಹ್ಯಾ ಕಂಪೆನಿοತು ರಶ್ಮಿ ಕಾಮಾಕ ಚುನಾಯಿತ ಜಾಲಿ. ಬೆಂಗಳೂರಾοತು ತ್ಯಾ ಕಂಪೆನಿοತು ಸೇರವಲಿ ಆನಿ ಥಂಯಿ ಆಪ್ಣಾಲೇ ವೃತ್ತಿ ಜೀವನ ಪ್ರಾರಂಭ ಕೆಲೆ°. ಬೆಂಗಳೂರಾοತು ಏರೋಸ್ಪೇಸ್ ವಿಭಾಗಾಂತು ತಿಣೆ ತೀನಿ ವರ್ಸ ಕಾಮ ಕೆಲೆ°. ಹೊಸ್ಟೆಲಾಂತು ಸಾಂಗಾತಿ ರಾಬೂನು ಆಶಿಲಿ ಸಂಜನಾ ನಾವಾಚಿ ಏಕಿ ಚೆಲ್ಲಿ ಭಾರತೀಯ ಕರಸೇನೆಂತು ಸೆರವಲೇಲೆ ಪಳಯಿಲೆ ರಶ್ಮಿಕ ದೇಶಾಚಿ ಸೇವಾ ಕರಚಿ ಉಮೇದಿ ಆನಿ ಧ್ಯೇಯ ಅನುಭವಾಕ ಆಯಲೆ°. ತಶಿ ಜಾವನು ಸ್ಟಾಫ್ ಸಿಲೆಕ್ಷನ್ ಬೋರ್ಡಾಚೆ ಪರೀಕ್ಷೆಕ ತಯಾರಿ ಕೆಲಿ. ಶುರುವೇಕ ಬರಯಿಲೆ ವೇಳಾರಿ ಹಾರವಲಿ ತರಿ ದುಸರೆ ಪಟಿ ಜಿಕವೂಚೆ ಛಲ ತಿಣೆ ದವೋರ್ನು ಘೆತಲೆ°.

ದೆಕುನು ತೀ ತ್ಯಾ ಪರೀಕ್ಷಾ ಉತ್ತೀರ್ಣ ಜಾಲಿ. ಫಲಿತಾಂಶ ಯೆತಾನಾ ತಿಗೆಲೆ ನಾವ ವಿಜೇತಾಂಗೆಲೆ ಮಧೆ° ಪಳೊವನು ತಿಕಾ ಅತ್ಯಂತ ಸಂತೋಸ ಜಾಲೊ. ೨೦೧೮ ದಶಂಬರಾοತು ತಿಣೆ ಟಿ. ಸಿ. ಎಸ್. ಸೊಡೂನ ಹೈದರಾಬಾದಾಂತು ಏರ್ ಫೋರ್ಸ್ ಎಕಾಡೆಮಿಂತು ಭರತಿ ಜಾಲಿ. ದೇಡ ವರಸ ಭಾರತೀಯ ವಾಯುಸೇನೆಚೆ ಅತೀವ ಕುಶಲತಾಯೆಚೆ ಪರಿಶೀಲನ ಜಾಲೆ°. ಸೊಳಾ ಜನಾಂಕ ವಾಯುದಳಾಚೆ ೯೪ವೆ° ಬ್ಯಾಚ್ ಮ್ಹಣು ವೆಂಚೂನು ಕಾಳ್ಳೆ ಆನಿ ತಾಂತು ಏಕಲೀಚಿ ಚೆಲಿ ಆಶಿಲಿ ರಶ್ಮಿ. ನಂತರ ತಿಕಾ ವಡೋದರಾಂತು ಸಾಂಕೇತಿಕ ಆಫೀಸರ್ ಮ್ಹಣು ನೇಮಣೂಕ ಜಾಲೆ°. ಹೆ° ಏಕ ಫ್ಲ್ಯಾಯಿಂಗ್ ಓಫೀಸರ್ ರಾಂಕ್ ಜಾವನು ಆಸಾ. ಬಾಪೂಸು ಗೋಪಿನಾಥ ಭಟ್ ಕೇವಲ ದೋನಿ ಕ್ಲಾಸ್ ಪರ್ಯಂತ ಶಿಕಲಾ. ಆವಸು ಶೋಭಾ ಭಟ್ ಆಟ ಪರ್ಯಂತ ಶಿಕಿಲಿ. ದೇವಸ್ಥಾನಾಂತುಲೆ ಕಾಮಾನ ಮೆಳಚಿ ಕಮಾಯಿನ ಧುವೆಲೆ ಶಿಕವಣೆಚೊ ಖರ್ಚು ಕಷ್ಟಾರಿ ಕಾಡತಾನಾ ತ್ಯಾ ಕುಟುಂಬಾಕ ಸಮಾಜಾಚೆ ವಿವಿಧ ಸಂಘ ಸಂಸ್ಥೆನಿ ವಿದ್ಯಾರ್ಥಿ ವೇತನ ಮ್ಹಣು ಇತ್ಲೊ ಇತ್ಲೊ ಧನಸಹಾಯು ಕೆಲಾ.

ಬಿರುದ ಪದವಿಕ ಶಿಕತಾನಾ ಮಂಗಳೂರಾಚೆ ವಿಶ್ವ ಕೊಂಕಣಿ ಕೇಂದ್ರಾನ ದಿಲೆಲೆ ಅನುದಾನ ಆನಿ ಪರಿಶೀಲನ ಆಪ್ಣಾಕ ಏಕ ನವೋ ಉಜವಾಡು ದಾಕಯಲೊ ಅಶಿ° ರಶ್ಮಿಕ ಭೊಗತಾ. ಆಪ್ಣಾಲೆ ಸಪನ ಸಾಕಾರ ಕರನು ಘೆವಚೆ ಭಾಗ್ಯ ದೇವಾಲೆ ದಯೇನ ಆನಿ ಮ್ಹಾಲಗಡ್ಯಾಲೆ ಆಶೀರ್ವಾದಾನ ಅಶಿ ರಶ್ಮಿ ಸಾಂಗತಾ. ಹ್ಯಾ ಕಾಮಾಚೆ ತರಬೇತಿಂತು ಅಥವಾ ಶಿಕವಣೆ ವಿಷಯಾಂತು ಏಕಿ ಚೆಲ್ಲಿ ಮ್ಹಣು ಕಾಯಿ ಉಣೆಪಣ ಆಪ್ಣಾಕ ದಿಸನಿ ದೆಕುನು ದೇಶಸೇವೆಚೆ ಧ್ಯೇಯ ಆಶಿಲೆ ಖಂಚೇಯಿ ಚೆಲಿಯಾನಿ ಸೇನೇಚೆ ಖಂಚೇಯಿ ವಿಭಾಗಾಂತು ಕಾಮ ಕರೂಂಕ ಸಾಧ್ಯ ಆಸ್ಸ ಮ್ಹಣು ರಶ್ಮಿ ಸಾಂಗತಾ. ವಿನಯ ಆನಿ ವಿಜಯ ದೊನ್ನಿಚೆಯಿ ನಿದರ್ಶನ ಜಾವನು ಆಶಿಲಿ ರಶ್ಮಿ ಭಟ್ಟಾಕ ಹಾರ್ದಿಕ ಅಭಿನಂದನ. ತಿಗೆಲೆ ಆವಸು ಬಾಪಸುಂಕ ಆಮಗೆಲೆ ಅಭಿವಾದನ. ಸೇನಾಸೇವೆಂತು ರಶ್ಮಿಕ ಆನಿಕಯಿ ಉನ್ನತ ಸ್ತರಾರಿ ಪಾವಚಾಕ ರಶ್ಮಿಕ ದೇವು ಅನುಗ್ರಹ ಕರೊ ಹೀ ಅಮಗೆಲಿ ಶುಭಾಶಂಸಾ.

- ಪಯ್ಯನೂರು ರಮೇಶ ಪೈ

ಬೆಂಗಳೂರು: ಗೌಡ ಸಾರಸ್ವತ ಮಹಿಳಾ ವೃಂದ ಬೆಂಗಳೂರು ಹಾಂನಿ° ಮಾ. ೮ ಕ ಹಾಂಗಾಚೆ ಶ್ರೀ ಕಾಶಿಮಠಾಂತು° ಅಂತರಾಷ್ಟೀಯ ವನಿತಾ ದಿವಸ ಆಚರಣ ಕೆಲೊ. ಹ್ಯಾ ವೇಳಾರ ಮಂಗಳೂರಾಚೆ ಎಕ್ಸ್ಪರ್ಟ ಗ್ರೂಪ್ ಆಫ್ ಇನ್ಸ್ಟಿಟ್ಯೂಟ್ ಹಾಜೀ ಉಪಾಧ್ಯಕ್ಷ ಡಾ|| ಉಷಾ ಪ್ರಭಾ ನಾಯಕ, ಎಂ.ಎ ಪರೀಕ್ಷೆಂತು ಅವಲ್ ಅಂಕ ಜೋಡಿಲಿ ಅಂಧ ವಿದ್ಯಾರ್ಥಿನಿ ಕಾವ್ಯಾ ಭಟ್, ಪಾಕ ತಜ್ಞಾ ಗೀತಾ ಆರ್. ನಾಯಕ ಹಾಂಕಾ° ಸನ್ಮಾನ ಚಲೊ.

ಡಾ|| ಪಿ. ದಯಾನಂದ ಪೈ ಹಾಂನಿ° ಮಹಿಳಾ ಸಬಲೀಕರಣ ಬದಲ್ ಮಾಹಿತಿ ದಿಲಿ. ಜಿ. ಜಿ. ಶೆಣೈ ಹಾಂನಿ° ಶುಭಾಷಯ ಪಾಟಯಲೊ. ಮಹಿಳಾ ವೃಂದಾಚೆ ಅಧ್ಯಕ್ಷಾ ವಸುಧಾ ಕಾಮತ ಹಾಂನಿ° ಸ್ವಾಗತಾಚೆ ಉತ್ರಂ ಸಾಂಗಲಿ°. ಮೋಹಿನಿ ಡಿ.ಪೈ ವೇದಿಕೆರಿ ಉಪಸ್ಥಿತ ಆಶಿಲಿಂತಿ. ಕಾರ್ಯದರ್ಶಿ ಮೀರಾ ಜಿ. ಶ್ಯಾನುಭೋಗ ಹಾಂನಿ° ಆಭಾರ ಮಾನಲೊ.

ಸಭಾ ಕಾರ್ಯಕ್ರಮಾಚೆ ಉಪರಾಂತ ಸಾಂಸ್ಕೃತೀಕ ಕಾರ್ಯಕ್ರಮ ಚಲೊ. ಶೀಲಾ ನಾಯಕ ನಿರ್ದೇಶಿತ ‘ಶ್ರವಣ ಕುಮಾರ’, ಡಾ|| ವಿದ್ಯಾಭೂಷಣ ಹಾಂಗೆಲೆ° ‘ದಾಸರ ಪದಗಳು’ ಪ್ರತಿಭಾ ನಾಟ್ಯಾಲಯಾಚೆ ವಿದ್ಯಾರ್ಥಿಯಾಲೆ° ‘ಅಪ್ರಮೇಯ ಕೃಷ್ಣ’ ನಾಟ್ಯ ಪ್ರದರ್ಶನ ಜಾಲೆ°. ಶ್ರೀ ಪಾರ್ಥಸಾರಥಿಕ ಪೂಜಾ ಜಾತರಿ ಪ್ರಸಾದ ವಾಂಟಪ ಜಾಲೆ°.

ಮಂಗಳೂರು: ಜಿ. ಎಸ್. ಬಿ. ಮಹಿಳಾ ವೃಂದ (ರಿ) ಮಂಗಳೂರು ಹಾಂಗೆಲೆ ನವೆಂಬರ್ ಮ್ಹಯನ್ಯಾಚಿ ಸಭಾ ಆರತಾ° ಗೋಕರ್ಣ ಮಠಾಚೆ ದ್ವಾರಕಾನಾಥ ಭವನಾಂತು ಚಲಿ. ಮುಖೇಲ ಸೊಯರೀಣ ಜಾವನು ಫಿಜಿಯೊಥೆರೆಪಿಸ್ಟ್, ಡಾ. ಅಶ್ವಿನಿ ರಾವ್ ಆಯಿಲಿಂತಿ. ಹಾಂನಿ ಪ್ರಾಯ ಜಾತರಿ ಯೆವಚೆ ಆರೋಗ್ಯ ಸಮಸ್ಯಾ, ತೇ ಸಗಟ ವ್ಯಾಯಾಮ ಕರನು ಕಶಿ° ಊಣೆ ಕರಯೇತ ಮ್ಹಣು ಪ್ರಾತ್ಯಕ್ಷಿಕ ಸಮೇತ ಕಳಯಲೆ°. ಅಧ್ಯಕ್ಷಾ ವಿಮಲಾ ಕಾಮತಿನ ಸೊಯರಾಲೆ ವಳಕ ಕರನು, ಸ್ವಾಗತ ಕೆಲೆಂ.

ಲಕ್ಷ್ಮೀ ಭಂಡಾರಕಾರಾನ ಅಮೃತ ವಚನ ವಾಚಿಲೆ°. ನಯನಾ ರಾವಾನ ವರದಿ ವಾಚಲಿ. ವೃಂದಾಚಿ ಸದಸ್ಯಾ ಕಸ್ತೂರಿ ಕಾಮತ್ ಹಾಂಗೆಲಿ ನಾತಿ, ಕುಮಾರಿ ಧೃತಿ ಕಾಮತ್ ಹಾಂಕಾ ಶಾಸ್ತಿಯ ಸಂಗೀತ ಆನಿ ಭರತನಾಟ್ಯ ಕ್ಷೇತ್ರಾಂತು ಸಾಧನ ಕೆಲೆಲೆ ಬದಲ ಸನ್ಮಾನ ಚಲೊ. ರಾಧಿಕಾ ಕಾಮತಿನ ಆಬಾರ ಮಾನಲೊ. ಮರೋಳಿ ಸಬಿತಾ ಕಾಮತಿನ ಸೂತ್ರ ಸಂಚಾಲನ ಕೆಲೆ°.

ಮಂಗಳೂರು: ಜಿ. ಎಸ್. ಬಿ. ಮಹಿಳಾ ವೃಂದ (ರಿ), ಮಂಗಳೂರು ಹಾಂನಿ ಕೊಂಕಣಿ ದಿವಸಾಚೆ ಆಚರಣೆ ಪ್ರಯುಕ್ತ ಕೊಂಕಣಿ ಭಾಷೆಂತು ಬಾಳ ಗೀತಾ /ಭಕ್ತಿ ಗೀತಾ/ಭಾವ ಗೀತಾ ಆನಿ ಕಾಣಿ ಸಾಂಗಪಾಚೆ ಸ್ಪರ್ಧೊ ಗೋಕರ್ಣ ಮಠಾಚೆ ಸಭಾಗೃಹಾಂತು ಆರತಾ° ಮಾಂಡೊನು ಹಾಡಲೊ.

ಗಾಂವಚೆ ವೆಗಳೆ ವೆಗಳೆ ಶಾಳೆಚೆ ಆನಿ ಕಾಲೇಜಾಚೆ ಚೆರಡುವ° ನಂತಾ° ಸಾಠಿ ವರಸಾ ವಯಿಲೆ ಸ್ತೀಯಾಂನಿ  ಚಡ ಸಂಖೆರಿ ಹ್ಯಾ ಸ್ಪರ್ಧೆಂತು ವಾಂಟೊ ಗೆತಲೊ. ಸ್ಪರ್ಧೆಚೆ ವಿಜೇತಾಂಕ ಇನಾಮು ಜನವರಿ ಮೈನಾಂತು ಚಲೊಚೆ ಕೊಂಕಣಿ ದಿವಸು ಆಚರಣೆ ಸಮಾರಂಭಾοತು ವಾಂಟಿತಾತಿ. ಅದ್ಯಕ್ಷಾ ವಿಮಲಾ ಕಾಮತಿನ ಭಾಗ ಘೆತಿಲೆ ಸಕಡಾಂಕ ಪ್ರೋತ್ಸಾಹಕ ಇನಾಮು ಆನಿ ಪ್ರಮಾಣ ಪತ್ರ ವಾಂಟಪಾಚೆ ಕಾರ್ಯಕ್ರಮು ಚಲೊನು ದಿಲೊ.

ಹೇ ಸ್ಪರ್ಧೆಚೆ ನಿರ್ಣಾಯಕ ಜಾವುನು ಚೇತನಾ ಕಾಮತ ಆನಿ ನಿರ್ಮಲಾ ನಾಯಕ ಆಯಿಲಿಂತಿ. ನಯನಾ ರಾವ ಹಾಂನಿ ಸ್ಪರ್ಧೆ ಚಲಾಯಿಸುನು ದಿಲೆ°.

ಕಾರ್ಕಳ: ಬಾಲ್ ಬ್ಯಾಡ್ಮಿಂಟನ್ ಸ್ಪರ್ಧೆತು° ರಾಷ್ಟಸ್ಥರಾಕ ವಿಂಚುನ ಆಯಿಲಿ ಭುವನೇಂದ್ರ ಕಾಲೇಜಾಚಿ ದ್ವಿತೀಯ ಪಿ.ಯು.ಸಿ. ವಿದ್ಯಾರ್ಥಿನಿ ಸತೀಶ್ ಶೆಣೈ ಹಾಂಗೆಲಿ ಧುವ ಶ್ವೇತಾ ಶೆಣೈ ಹಾಂಕಾ° ಅರಸ್ ಕಟ್ಟೆ ಪ್ರಭು ಫ್ಯಾಮಿಲಿ ತರಪೇನ ಕಾರ್ಕಳಚೆ ಕಾಶಿ ಮಠಾಂತು° ಆರತಾ° ಅಭಿನಂದನ ಕರಚೆ° ಜಾಲೆ°. ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಅಧ್ಯಕ್ಷ ಡಾ| ಜಗದೀಶ ಪೈ ಮುಖೇಲ ಸೊಯ್ರೆ ಆಶಿಲೆ.

ಉದ್ಯಮಿ ವಿಜಯ ಶೆಟ್ಟಿ, ಸುರೇಂದ್ರ ಭಟ, ರವೀಂದ್ರ ಪ್ರಭು, ಸುರೇಶ ಪ್ರಭು, ಮ್ಹಾಲ್ಗಡೊ ಕಲಾವಿದ ಕಲಾವಿದ ಮೋಹನದಾಸ ಪ್ರಭು, ಉಡುಪಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ರಿ ವಿಜೇತ ದಿನೇಶ ಪ್ರಭು ಕಲ್ಲೊಟ್ಟೆ, ಅಂಚೆ ಇಲಾಖೆಚೊ ಉಪಅಧೀಕ್ಷಕ ಧನಂಜಯ ಆಚಾರ ಹಾಂನಿ° ಶುಭಾಷಯ ಪಾಟಯಲೊ. ಪ್ರಕಾಶ ಪ್ರಭುನ ಸ್ವಾಗತಾಚೆ ಉತ್ರ° ಸಾಂಗಲಿ°. ಶೋಭಾ ಬಾಸ್ಕರ ಹಾಂನಿ° ಸೂತ್ರ ಸಂಚಾಲನ ಕೆಲೆ°. ನಾಗೇಶ ಪ್ರಭುನ ಆಭಾರ ಮಾನಲೊ.