Displaying items by tag: GSB
‘ಶಾಳೆಂತು° ಕೊಂಕಣಿ ಶೀಖರೆ ಬಾಳಾ’ ಆಂದೋಲನಾಕ ಚಾಲನ
ಮಂಗಳೂರು: ಕೊಂಕಣಿ ಚಳುವಳಿಚೊ ಪಿತಾಮಹಾ ಶೆಣೈ ಗೊಂಯಬಾಬ ಹಾಂಗೆಲಿ ಪುಣ್ಯ ತಿಥಿ ಖೂಬ ವರಸ ದಾಕೂನ ವಿಶ್ವ ಕೊಂಕಣಿ ದೀವಸ ಜಾವನು ಆಚರಣ ಕರನು ಆಯಲ್ಯಾಂತಿ. ಕೊಂಕಣಿ ಭಾಶಾ ಮಂಡಳ ಕರ್ನಾಟಕ ಆನಿ ಜಿ.ಎಸ.ಬಿ ಸೇವಾ ಸಂಘ, ಮಂಗಳೂರು ಹಾಂಗೆಲೆ ಜೋಡ ಆಶ್ರಯಾರಿ ಮಂಗಳೂರಾοತು° ಪಯಲೆ ಪಾವಟಿ ಎ. 9ಕ ‘ವಿಶ್ವ ಕೊಂಕಣಿ ದೀವಸ’ ಸಂಭ್ರಮಾರಿ ಗಾಂವಚೆ ಸಿ. ವಿ. ನಾಯಕ ಸಭಾಸಾಲಾಂತು° ಆಚರಣ ಜಾಲೊ.
ಹ್ಯಾ ವೇಳಾರ ‘ಶಾಳೆಂತು° ಕೊಂಕಣಿ ಶೀಖರೆ ಬಾಳಾ’ ಆಂದೋಲನಾಕ ನಿಶಾಂತ ಶೇಟ್ ಹಾಂನಿ° ಚಾಲನ ದಿಲೆ°. “ಕರ್ನಾಟಕ ರಾಜ್ಯಾಂತು° ಸ್ಹವೆ ದಾಕೂನ ದ್ಹಾವೆ ಕಕ್ಷಾ ತಾಂಯ ತೀಸ್ರಿ ಐಚ್ಛಿಕ ಭಾಸ ಜಾವನು ಕೊಂಕಣಿ ಶೀಖಚೊ ಅವಕಾಶ ಆಸಾ. ಚಡ ಲೋಕಾನ ಉಮೇದಿ ದಾಕೊವಚೆ° ದಿಸೂನ ಯೆನಾ. ತಾಜೆ ಖಾತೀರ ಕೊಂಕಣಿ ಭಾಷಾ ಮಂಡಳ ಕರ್ನಾಟಕ ಹಾಂನಿ° ಹೊ ಕಾರ್ಯಕ್ರಮ ಮಾಂಡೂನ ಹಾಡಲಾ” ಮ್ಹಣು ಕೊಂಕಣಿ ಭಾಷಾ ಮಂಡಳ ಕರ್ನಾಟಕ ಹಾಜೊ ಅಧ್ಯಕ್ಷ ವೆಂಕಟೇಶ ಬಾಳಿಗಾ ಮಾವಿನಕುರ್ವೆ ಹಾಂನಿ° ಸಾಂಗಲೆ°.
ಹ್ಯಾ ಕಾರ್ಯಕ್ರಮಾಂತು ಕೊಂಕಣಿ ಸಾಹಿತಿ ನವೀನ ಕುಲಶೇಖರ ಹಾಂಕಾ° ಡಾ| ಬಿ ದೇವದಾಶ ಪೈ ಹಾಂನಿ°, ಮಾಕ್ಷಿಚೆ ದೋನ ವರಸಾಂತು° ಕೊಂಕಣಿ ಎಂ.ಎ ಸ್ನಾತಕೋತರ ಪದವಿ ಫಾವೊ ಕೆಲೆಲ್ಯಾಂಕ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಸಾಂದೊ ನವೀನ ನಾಯಕ ಹಾಂನಿ°, ಶಾಳೆಂತು° ದೇವನಾಗರಿ ಲಿಪಿಂತು° ಕೊಂಕಣಿ ಶೀಕಿಲೆ ವಿದ್ಯಾರ್ಥಿಯಾಂಕ ಜಿ. ಎಸ. ಬಿ ಸೇವಾ ಸಂಘ ಹಾಜೆ ಸಾಂದ್ಯಾನಿ ಸನ್ಮಾನ ಚಲೊ. “ಕೊಂಕಣಿ ಭಾಶೆ ವಯರಿ ಪೋರ್ಚುಗೀಸಾಲೆ ದಬಾವ ಪಡೂನ ಕೊಂಕಣಿ ಭಾಸ ನಾಶ ಜಾವಚೆ ಪರಿಸ್ಥಿತಿ ಯೆತನಾ ಮುಂಬಯಿοತು° ಕರತ ಆಶಿಲಿ ಬರಿ ನೌಕರಿ ಸೋಡೂನ ಆಂಗಣಾಕ ದೇವೂನ ಮಾತೃ ಭಾಸ ಕೊಂಕಣಿಚೆ ರಕ್ಷಣೆಕ ರಾಬಿಲೊ ಮಹಾಪುರುಷ ಶೆಣೈ ಗೋಂಯಬಾಬಾಲಿ ಪುಣ್ಯ ತಿಥಿ ವಿಶ್ವ ಕೊಂಕಣಿ ದೀವಸ ಜಾವನು ಆಚರಣ ಕರತಾತಿ. ಪಯಲೆ ಪಾವಟಿ ಮಾತೃಭಾಸ ಕೊಂಕಣಿ ಭಾಶೆಚಿ ವ್ಯಾಕರಣ ಆನೀ ಬರೊವಚಿ ಶೈಲಿ ಕಳಯಿಲೆ ಶೆಣೈ ಗೊಂಯಬಾಬ ಸಹಸ್ರಮಾನಾಚೊ ಮಹಾಪುರುಷ ಜಾವನು ಆಸಾ. ತಾಂಗೆಲೆ ಹ್ಯಾ ಯೋಗದಾನಚೆ ನಿಮಿತ ಕೊಂಕಣಿ ಆಜಿ ಏಕ ಸ್ವತಂತ್ರ ಭಾಸ ಮ್ಹಣೂನ ಸಾಬಿತ ಜಾವನು ಆಸಾ” ಮ್ಹಣು ಡಾ| ಕೆ. ಮೋಹನ ಪೈ ಹಾಂನಿ° ಹ್ಯಾ ವೇಳಾರ ಸಾಂಗಲೆ°. ಸನ್ಮಾನ ಸ್ವೀಕಾರ ಕೆಲೆಲೆ ಸಾಹಿತಿ ನವೀನ ಕುಲಶೇಖರ ಹಾಂನಿ° ಆಭಾರ ಪ್ರಕಟ ಕೆಲೊ. ಮಂಗಳಾ ಭಟ್, ಚಂದ್ರಿಕಾ ಮಲ್ಯ ಆನೀ ಫಾ. ಜೇಸನ್ ಪೀಂಟೊ ಹಾಂನಿ ಶಣೈ ಗೋಂಯಬಾಬಾಚೆ° ಸಾಹಿತ್ಯಾಚೆ ವಿಮರ್ಸೊ ಕೆಲೊ.
ಉಪರಾಂತ ಚಲೆಲೆ ಕಾರ್ಯಕ್ರಮಾಂತು° ಭಾಷಾ ಮಂಡಳಾಚೆ ಅಧ್ಯಕ್ಷ ವೆಂಕಟೇಶ ಬಾಳಿಗ ಹಾಂನಿ° ‘ಎನ್. ಇ. ಪಿ 20(ನ್ಯೂ ಎಜುಕೇಶನ್ ಪಾಲಿಸಿ) ತು° ಕೊಂಕಣಿ ಭಾಶೆಕ ಆಸಚೊ ಅವಕಾಶ’ ಬದಲ ಮಾಹಿತಿ ದಿಲಿ. ಡಾ| ಕೆ. ಮೋಹನ ಪೈ ಹಾಂನಿ° ಎನ್. ಇ. ಪಿ ಪ್ರಮಾಣೆ ಪಠ್ಯಪುಸ್ತಕ ತಯಾರಿ ಕರಚೆ ಬದಲ ಮಾರ್ಗದರ್ಶನ ದಿಲೆ°. ಡಾ| ದೇವದಾಸ ಪೈ ಹಾಂನಿ° ವಿಚಾರ ಮಂಡನ ಕೆಲೆ°. ಜಿ. ಎಸ ಬಿ ಸೇವಾ ಸಂಘಾಚೆ ಖಜಾಂಚಿ ವಿಶ್ವನಾಥ ಭಟ್, ಸಹ ಕಾರ್ಯದರ್ಶಿ ರಮೇಶ ಪೈ, ಎಚ್. ವಿ. ಕಾಮತ, ಜಿ. ಎಂ ಪ್ರಭು, ಕೊಂಕಣಿ ಭಾಷಾ ಮಂಡಳಾಚೆ ಆದಲಿ ಅಧ್ಯಕ್ಷಾ ಗೀತಾ ಸಿ. ಕಿಣಿ, ಕಾರ್ಯಕಾರಿ ಮಂಡಳಿಚೊ ಸಾಂದೊ ಪ್ರವೀಣ ಕಾಮತ ಉಪಸ್ಥಿತ ಆಶಿಲೆ. ಮೇಘಾ ಪೈನ ಪ್ರಾರ್ಥನಾ ಕೆಲಿ. ಎಂ. ಆರ್. ಕಾಮತ ಹಾಂನಿ° ಸೂತ್ರ ಸಂಚಾಲನ ಕೆಲೆ°. ಕನ್ನಡ ಸಾನ ಕಾಣಿ ಕೊಂಕಣಿ ಭಾಶೆಕ ಅಣಕಾರ ಕರಚೆಂ ಆನೀ ಕನ್ನಡ/ ಇಂಗ್ಲಿಷ್ ಶಬ್ದಾಂಚೆ ಕೊಂಕಣಿ ಸಮಾನಾಂತರ ಶಬ್ದ ಬರೊವಚೆ ಸ್ಪರ್ಧೇ ಚಲೆ. ಮೇಧಾ ಕಾಮತ ಆನೀ ಶಾಂತಕುಮಾರ ಭಟ್ ವರೇಣ್ಯಾರ ಆಶಿಲೆ.
ವಿನಾಯಕ ಬಾಳಿಗಾ ಹುತಾತ್ಮ ಜಾವನು 6 ವರಸ°
ಮοಗಳೂರು: ಆರ್. ಟಿ. ಐ. ಕಾರ್ಯಕರ್ತ ವಿನಾಯಕ ಬಾಳಿಗಾಕ ಜೀವಶಿ ಮಾರನು ಸ್ಹ ವರಸ° ಜಾಲಿಂತಿ. ಕೊಡಿಯಾಲ ಶ್ರೀ ವೆಂಕಟರಮಣ ದೇವಾಲೊ ಪರಮ ಭಕ್ತ, ಆರ್. ಎಸ್. ಎಸ್. ಆನಿ ಬಿ. ಜೆ. ಪಿ.ಚೊ ಕಾರ್ಯಕರ್ತ ಆಶಿಲೊ ಹಾಕಾ ಸಕಾಳಿ 5 ಗಂಟ್ಯಾಕ ಉಟಾನು ನ್ಹಾವನು, ರಥಬೀದಿಕ ವಚೂನ ದೇವಾಲಿ ಭೇಟಿ ಕರನು ಪರತೂನ ಯೆತಾನಾ ದೂದ ಘೆವನು ಯೆವನು ಸಕಾಳಿಚೆ ತಾಂನಿ° ಘೆವಚಿ ಸವಯ ಆಶಿಲಿ. ತ್ಯಾ ದೀವಸು 2016 ವರಸಾಚೆ ಮಾರ್ಚ 21ಕ ಕೆದನಾಚೆ ಮ್ಹಣಕೆ ತೋ ದೇವಳಾಕ ಭಾಯರ ಸರಲಲೊ. ಜಾಲ್ಯಾರ ಬೆಸೆಂಟ್ ಕಾಲೇಜಾ ಲಾಗಿಚೆ ತಾಗೆಲೆ ಘರಾಚೆ ಓಣಿ ದಾಕೂನ ಭಾಯರ ಯೆವಚೆ ಪಯಲೆಂಚಿ ರಾಖೂನ ಬಶಿಲೆ ಹಂತಕಾನಿ ತಾಗೆಲೆ ಬೋಡ ಭೆತೂನ, ಗಳೊ ಖಾತೊರನು ಜೀವಶಿ ಮಾರಲೆ°. ತಾಗೆಲೆ ಬ್ಹಯಣ್ಯಾನಿ ಆಸ್ಪತ್ರೆಚೆ ಆಂಬ್ಯುಲೆನ್ಸಾರಿ ಆಸ್ಪತ್ರೆಕ ವ್ಹೆಲ್ಯಾರಯೀ ತಂಯ ಪಾವಚೆ ಪಯಲೆಂಚಿ ತೋ ದೇವಾ ಲಾಗಿ ಪಾವಿಲೊ.
ತೇದನಾಚೆ ಪೋಲಿಸ್ ಕಮಿಷನರ್ ಚಂದ್ರಶೇಖರ ಆನಿ ಸಿಬಂದಿ ವರ್ಗಾಚೆ ದಕ್ಷ ಆನಿ ಪ್ರಾಮಾಣಿಕ ಕಾಮಾನ ಸರ್ವ ಆರೋಪಿಯಾಲೆ° ಬಂಧನ ಜಾಲೆ°. ಉಪರಾಂತ ತಾಂನಿ° ನ್ಯಾಯಾಲಯಾಂತು ಬೇಲ್ ಘೆವನು ಭಾಯರ ಆಯಲೆ. ಆಜಿಕಯೀ ವಿನಾಯಕಾಲೆ ಬ್ಹಯಣ್ಯೊ ನ್ಯಾಯಲಯಾಂತು° ಹೆ° ಕೇಸ್ ಝುಜತಾ ಆಸಾತಿ. ತಾಂಕಾ° ತಾಗೆಲೆ ಸ್ವ ಸಮಾಜಾಚೊ ಯಾ ಪಕ್ಷಾಚೊ ಕಸಲೊಯಿ ನಮೂನ್ಯಾಚೊ ಸಹಕಾರ ಯಾ ಸ್ಪಂದನ ಮೆಳನಿ ಮ್ಹಣು ತಾಂನಿ° ಸಾಂಗತಾತಿ.
ವಿನಾಯಕನ ಮಂಗಳೂರು ಶ್ರೀ ವೆಂಕಟರಮಣ ದೇವಳಾಚೆ ಆಡಳಿತ ಸಾಂಬಾಳಾಚಾಕ ಪೊರನೆ, ದೋನ ಪಾನಾಚೆ ಸ್ಕೀಮ್ (ಸಂವಿಧಾನ) ಪಾವನಾ ತಾಕಾ ನವೀನ ವಿಸ್ತçತ ಸ್ಕೀಮ್ ತಯಾರ ಕರಕಾ ಮ್ಹಣು ಮಾಘಣಿ ದೇವಳಾಚೆ ತೇದನಾಚೆ ಆಡಳಿತ ಮಂಡಳಿ ಮುಕಾರ ದವರಲೆಲಿ. ತೊ ವಿಷಯು ನ್ಯಾಯಾಲಯಾಕ ಪಾವನು ನ್ಯಾಯಾಲಯಾನ ಮಾಕ್ಷಿ ವರಸ ತಾಜೊ ನಿರ್ಣಯ ದಿವನು ನವೀನ ಸ್ಕೀಮಾಕ ಪರವಾಣಗಿ ದಿಲಿ. ತಾಜೆ ಪ್ರಮಾಣೆ ಮಾರ್ಚ 15 ತಾಂಯ ಸಮಾಜಾಚೆ ಪುರುಷ ಲೋಕಾನಿ ಮತದಾರ ಜಾವನು ನೊಂದ ಜಾವಚಾಕ ಅವಕಾಶ ಆಶಿಲೊ. ಹೆ° ಸ್ಕೀಮ್ ನ್ಯಾಯಾಲಯಾಕ ವಚನಾಶಿ° ಕರಚಾಕ ಸಾಧ್ಯ ಆಶಿಲೆ° ವೆ ? ಮ್ಹಳೆಲೊ ಎಕ ಹೋಡ ಸವಾಲ ಆಸಾ.
ವಿನಾಯಕಾನ ಮರನು 6 ವರಸ° ಜಾಲಿಂತಿ. ತಾಗೆಲೆ ಆವಸು ಆನಿ ಬಾಪುಸು ಹ್ಯಾಚ ಖಂತ್ಯೆοತು ದೇವಾದಿನ ಜಾಲೆ. ಆಜೀ ಘರಕಡೆ ಆಸಚೆ ದೋಗ ಬ್ಹಯಣ್ಯೊ ವಿನಾಯಕಾಕ ನ್ಯಾಯ ಮೇಳಕಾ ಮ್ಹಣು ಝುಜತಾ ಆಸಾತಿ.
ದೇವಳಾಚೆ ಮತದಾರ ಪಟ್ಟಿಕ ನೊಂದಣಿ
ಮಂಗಳೂರು : ಹಾಂಗಾಚೆ ರಥಬೀದಿಚೆ ಗೌಡಸಾರಸ್ವತ ಬ್ರಾಹ್ಮಣ ಸಮಾಜಾಚೆ ಪ್ರಮುಖ ದೇವಳಾ° ಪಯಕಿ ಎಕ ದೇವಳ ಶ್ರೀ ವೆಂಕಟರಮಣ ದೇವಳಾಕ ಜಿಲ್ಲಾ ಸೆಷನ್ಸ್ ನ್ಯಾಯಾಲಯಾನ ನವೆಂಬರ 30, 2020ಕ ದಿಲೆಲೆ ತೀರ್ಪಾಚೆ ಪ್ರಮಾಣೆ ದೇವಳಾಚೆ ಆಡಳಿತ ಸಾಂಬಾಳನು ಹಾಡಚಾಕ ಎಕ ಯೋಜನಾ(ಸ್ಕೀಮ್) ಯಾ ಸಂವಿಧಾನ ಜ್ಯಾರಿ ಕರನು ತೀರ್ಪು ದಿಲೆಲೊ ಆಮಗೆಲೆ ಕಳಿತಾಕ ಆಶಿಲೊ ವಿಷಯು ಜಾವನು ಆಸಾ. ಹಾಜೆ ಪ್ರಮಾಣೆ ದೇವಳಾಚೆ ಆಡಳಿತ ಸಾಂಬಾಳಾಚಾಕ 5 ಮೊಕ್ತೆಸರಾಂಕ ವಿಂಚೂಚಾಕ ಅವಕಾಶ ಆಸಾ(ಆತಂಚೆ ಸ್ಕೀಮಾ ಪ್ರಮಾಣೆ ಫಕತ ತೀನ ಮೊಕ್ತೆಸರ ಆಸಾತಿ). ಹಾಂಗೆಲೆ° ವಿಂಚಪ ದೇವಳಾಚೆ ಮಹಾಸಭೆಂತು° ಮಹಾಸಭೆಚೆ ಸದಸ್ಯಾನಿ ಕರಕಾ ಜಾತಾ. ಹ್ಯಾ ಸ್ಕೀಮಾ ಪ್ರಮಾಣೆ ಮಂಗಳೂರು ನಗರಪಾಲಿಕೆಚೆ 60 ವಾರ್ಡಾಂತು° ಬಿಡಾರ ಆಸಚೆ ಜಿ.ಎಸ್.ಬಿ ಸಮುದಾಯಾಚೆ 18 ವರಸಾಕಯೀ ಚಡ ವಯಾಚೆ ಪುರುಷಾಂಕ ಮಹಾಸಭೆಚೆ ಸದಸ್ಯ ಯಾ ಸಾಂದೊ ಜಾವನು ನೊಂದಣಿ ಕರಚಾಕ ಅರ್ಹತಾ ಆಸಾ. ತಾಂನಿ° 31.03.2021 ಭಿತರಿ ನೊಂದ ಕರಕಾ ಮ್ಹಣು ಎದೊಳೂಚಿ ದೇವಳಾ ತರಪೇನ ಪತ್ರಿಕಾ ಪ್ರಕಟನಾ ದಿಲೆಲಿ, ಜಾಲ್ಯಾರ ತಾಕಾ ಸ್ಟೇ ಆರ್ಡರ್ ಆಶಿಲ್ಯಾನ ನೊಂದ ಪ್ರಕ್ರಿಯಾ ಪೂರ್ಣ ಜಾಲೆಲಿ ನಾ. ತ್ಯಾ ಸ್ಟೇ ಆರ್ಡರ್ ಜೂನ್ 29, 2021ಕ ವೇಕೆಟ್ ಜಾಲೆಲ್ಯಾನ ಪರತೂನ ಪತ್ರಿಕಾ ಪ್ರಕಟಣ ದೀವನು ಸಮಾಜ ಭಾಂದವಾನಿ ನೊಂದ ಕರಕಾ ಮ್ಹಣು ದೇವಳಾ ತರಪೇನ ಉಲೊ ದಿಲೆಲೊ ಆಸಾ. ಕೊರೊನಾ ಮಹಾಮಾರಿ ಆನಿ ಜಿಲ್ಲಾಡಳಿತಾಚೆ ನಿರ್ದೇಶನಾಕ ಲಾಗೂನ ನೊಂದ ಕರಚಾಕ ಮಹಾಜನ ಮಾಕ್ಷೆಚೆ° ಜಾಲಾ°. ದೇವಳಾಚೆ ಆಡಳಿತಾನ ಪರತೂನ ರಾಜ್ಯಾಚೆ ಉಚ್ಛ ನ್ಯಾಯಾಲಯಾಂತು° ಮಾಘಣಿ ಕೆಲೆಲೆ ಪ್ರಮಾಣೆ ಉಚ್ಛ ನ್ಯಾಯಾಲಯಾನ ನೊಂದ ಪ್ರಕ್ರಿಯಾ ಮಾರ್ಚ 15, 2022 ಭಿತರಿ ಸಂಪೋವಕಾ ಮ್ಹಣು ಪರವಣಗಿ ದಿಲ್ಯಾ ಮ್ಹಣು ದೇವಳಾಚೆ ಕಳವಣಿಂತು° ಸಾಂಗಲಾ°.
ದೇವಳಾಚೆ ಮಹಾಸಭೆಕ ಸಾಂದೆ ಯಾ ಸದಸ್ಯ ಜಾವಚಾಕ ಫಕತ ಪಾಂಚ ವರಸಾಕ ಎಕ ಪಾವಟಿ ಅವಕಾಶ ಆಸತಲೊ ಮ್ಹಳೆಲೊ ವಿಷಯ ಮಹಾಜನಾನಿ ಮನಾಕ ವ್ಹರಕಾ ಮ್ಹಣೂಯೀ ಕಳವಣಿಂತು° ಸಾಂಗಲಾ°. ತಶಿಂಚಿ ದೇವಳಾಚೆ ವತಿನ ಸಮಾಜ ಭಾಂದವಾಂಕ ಮೆಳಚಾಕ ಸಾಧ್ಯ ಆಶಿಲೆ ವಿದ್ಯಾರ್ಥಿ ವೇತನ, ಬ್ಹಾಡೆ ಘರ/ಘರಾ ಜಾಗೊ, ಸಾಮಾಜಿಕ ಇನ್ಶೂರೆನ್ಸ್ ಆನೀ ತ್ಯಾತ್ಯಾ ವೇಳೆರಿ ಮೇಳಚೆ ಸವಲತ್ತ ಆನೀ ಹೇರ ಅನೂಕುಲತಾ ಫಕತ ಮಹಾಸಭೆಚೆ ಸದಸ್ಯಾಂಕ ಮೆಳತಲೆ ಮ್ಹಣು ಕಳವಣಿಂತು° ಕಳಯಲಾ°. ತ್ಯಾ ದೆಕೂನ ಮಂಗಳೂರು ಮಹಾನಗರ ಪಾಲಿಕೆಚೆ 60 ವಾರ್ಡಾಂತು° ಬಿಡಾರ ಆಸಚೆ ಜಿ.ಎಸ್.ಬಿ ಸಮಾಜ ಭಾಂದವಾನಿ ತಾಂಗೆಲೆ ಸಾಂದೆಪಣ ಯಾ ಸದಸ್ಯತ್ವ ನೊಂದ ಕರಚೆ° ಗರಜೆಚೆ° ಆಸಾ.
ಹಿ ಪ್ರಕ್ರಿಯಾ ಫಕತ ದೇವಳಾಚೆ ಚುನಾವಾಕ ಸಂಭಂದ ಆಸಚಿ ನ್ಹಹಿ° ಜಾಲೆಲ್ಯನ ಸಗಟ ಸಮಾಜ ಭಾಂದವಾನಿ ಮಾರ್ಚ 15, 2022 ಭಿತರಿ ನೊಂದಣಿ ಕರಕಾ ಮ್ಹಣು ದೇವಳಾಚೆ ತರಪೇನ ಮೊಕ್ತೆಸರಾನಿ ಮಾಘಣಿ ಕೆಲ್ಯಾ. ವಾಟ್ಸಾಪಾರಿ ಹೊ ಸಂದೇಶ ಘುವಂತ ಆಶಿಲ್ಯಾನ ಕೊಡಿಯಾಲ ಖಬರೆನ ದೇವಳಾಚೊ ಮೊಕ್ತೆಸರ ಪ್ರಶಾಂತ ರಾವ್ ಹಾಂಗೆಲಾಗಿ ಹ್ಯಾ ಕಳವಣಿಚೆ ಖರೆಂಪಣಾ ವಿಷಯಾರಿ ಸಮಜಣಗಿ ಘೆತಲಿ.
GSB ಟ್ರೋಫಿ 2021 ಕ್ರಿಕೆಟ್ ಟೂರ್ನಮೆಂಟ್
ತೆಂಕಪೇಟೆ ಫ್ರೆಂಡ್ಸ್ ಉಡುಪಿ ಹಾಂನಿ° ಆರತಾ° ಬೀಡಿನಗುಡ್ಡೆ ಮೈದಾನಾಂತು° GSB ಟ್ರೋಫಿ 2021 ಕ್ರಿಕೆಟ್ ಟೂರ್ನಮೆಂಟ್ ಆಯೋಜನ ಕೆಲೆ°. ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಚೆ ಆಡಳಿತ ಮೊಕ್ತೇಸರ ಪಿ. ವಿ. ಶೆಣೈ ಹಾಂನಿ° ದೀವೊ ಲಾವನು ಟೂರ್ನಮೆಂಟಾಚೆ ಉಗ್ತಾವಣ ಕೆಲೆ°. ಉಡುಪಿ ನಗರಾಭಿವೃದ್ಧಿ ಪ್ರಾಧಿಕಾರಾಚೊ ಅಧ್ಯಕ್ಷ ರಾಘವೇಂದ್ರ ಕಿಣಿ, ಸಮಾಜ ಸೇವಕ ಪ್ರದೀಪ್ ರಾವ್, ಜಿ. ಎಸ್. ಬಿ. ಯುವಕ ಮಂಡಳಿಚೊ ಅಧ್ಯಕ್ಷ ನಿತೇಶ್ ಶೆಣೈ, ಕ್ರಿಕೆಟ್ ಖೇಳಾಡು ವಿನೋದ್ ನಾಯಕ್ ಮಾನಾಚೆ ಸೊಯ್ರೆ ಆಶಿಲೆ. ದೋನ ದೀವಸಾಚೆ ಹ್ಯಾ ಟರ್ನಾಮೆಂಟಾಂತು° 16 ಪಂಗಡಾನಿ ವಾಂಟೊ ಘೆತಿಲೊ. ಎಸ್. ಎಸ್. ಫ್ರೆಂಡ್ಸ್ ಮುಲ್ಕಿ ಹಾಂನಿ° ವಿನ್ನರ್ ಪ್ರಶಸ್ತಿ , ಜಿ ಎಸ್ ಬಿ ಫ್ರೆಂಡ್ಸ್ ಹರಿಖಂಡಿಗೆ ಹಾಂನಿ° ರನ್ನರ್ ಅಪ್ ಪ್ರಶಸ್ತಿ ಫಾವೊ ಕೆಲೆ°. ಸಮಾರೋಪ ಸಮಾರಂಭಾಂತು° ಜಗದೀಶ ಕಾಮತ್, ಡಾ| ನರೇಂದ್ರ ಶೆಣೈ, ಡಾ| ರಾಜೇಶ್ ಭಕ್ತ ಹಾಂನಿ° ಇನಾಂ ವಾಂಟಲೆ°. ರವಿ ಕಡಿಯಾಳಿ ಸೂತ್ರ ಸಂಚಾಲಕ ಆಶಿಲೆ.
ಮೂಡುವೇಣುಪುರಾಂತು° ಸಂಭ್ರಮಾಚೊ ಕಾರ್ತಿಕ ದೀಪೋತ್ಸವ
ಮೂಡುಬಿದಿರೆ: ಮೂಡುವೇಣುಪುರ ಶ್ರೀ ವೆಂಕಟರಮಣ ಆನೀ ಶ್ರೀ ಹನುಮಂತ ದೇವಳಾಚೆ ಕಾರ್ತಿಕ ದೀಪೋತ್ಸವ ಸಂಭ್ರಮು ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮ ಸಹಿತ ಚಲೊ. ನಗರ ಭಜನಾ ಮಂಗಲೋತ್ಸವ, ಉತ್ಥಾನ ದ್ವಾದಶಿ ತುಳಸೀ ಪೂಜೆಚೆ ಸಾಂಗತ ಶುರು ಜಾಲೆಲೊ ಸಂಭ್ರಮು ವರ್ಷಾವಧಿ ಮಹೋತ್ಸವ ತಳೇ ದೀಪೋತ್ಸವ, ಕಾರ್ತಿಕ ದೀಪೋತ್ಸವ, ಅವಭೃತೋತ್ಸವಾಚೆ ಸಾಂಗತ ಸಂಪನ್ನ ಜಾಲೊ. ವಿಜಯ ದಶಮಿ ದೀವಸ ದಾಕೂನ ಎಕ ಮ್ಹಯನೊ ಕಾಳ ಚಲೆಲೆ ನಗರ ಭಜನಾ ಸಂಕೀರ್ತನೆಚೊ ಮಂಗಲೋತ್ಸವಾಚೆ ಬದಲ ಕಾರ್ತಿಕ ಶುದ್ಧ ದಶಮಿ ದೀವಸು ಸಕಾಳಿ ಪಕ್ಷಿಜಾಗರ ಪೂಜಾ, ನಗರ ಸಂಕೀರ್ತನ ಚಲೆ. ಉತ್ಥಾನ ದ್ವಾದಶಿ ದೀವಸು ತುಳಸಿ ಪೂಜಾ ಚಲಿ.
ವೈಕುಂಠ ಚತುದರ್ಶಶಿ ದೀವಸು ಪೆಂಟಾ ಉತ್ಸವ, ದೇವಳಾಚೆ ಶ್ರೀ ಸುಧೀಂದ್ರ ಸರೋವರಾಂತು° ತಳೆ ದೀಪೋತ್ಸವ ಚಲೊ. ಶ್ರೀ ದೇವಳಾಚೆ ತರಪೇನ ಶ್ರೀ ವೆಂಕಟರಮಣ ಭಜನಾ ಮಂಡಳಿಚೊ ಅಧ್ಯಕ್ಷ ವಿಘ್ನೇಶ್ ಪ್ರಭು, ಸಂಕೀರ್ತನಾ ಸಾಧಕಿ ಜಿ. ಅನುಪಮಾ ಜಿ. ಶೆಣೈ, ರಾಷ್ಟ್ರಸ್ಥರಾಚೆ ಕ್ವಿಜ್ ಸಾಧಕ ಅವಿನಾಶ್ ಪ್ರಭು ಹಾಂಕಾ° ಸನ್ಮಾನ ಚಲೊ. ಪಿಯುಸಿ ಪರೀಕ್ಷೆಂತು° 95 ಠಕೊ ಅಂಕ ಜೋಡಿಲೆ 6 ವಿದ್ಯಾರ್ಥಿಯಾಂಕಯೀ ಸಮ್ಮಾನ ಚಲೊ. ಜಿ. ಎಸ್. ಬಿ. ವಿದ್ಯಾರ್ಥಿ ವೇತನ ನಿಧಿ ದಾಕೂನ 20 ಅರ್ಹ ಪ್ರತಿಭಾವಂತ ವಿದ್ಯಾರ್ಥಿಯಾಂಕ ವೇತನ ದಿವಚೆ° ಜಾಲೆ°. ನವಶಕ್ತಿ ಮಿತ್ರವೃಂದಾಚಾನಿ ಪ್ರಸ್ತುತ ಕೆಲೆಲೆ ಸಾಂಸ್ಕೃತಿಕ ಪ್ರತಿಭಾ ಸ್ಪರ್ಧೆಂತು° ಜಿಕಿಲ್ಯಾಂಕ ಆಡಳಿತ ಮೊಕ್ತೇಸರ ಜಿ. ಉಮೇಶ ಪೈ ಆನೀ ಹೇರ ಮೊಕ್ತೇಸರ, ಉದ್ಯಮಿ ಕೆ. ವಿಶ್ವನಾಥ ಪ್ರಭು ಹಾಂನಿ° ಇನಾ° ವಾಂಟಿಲೆ°.
ನ19 ದೀವಸು ಕಾರ್ತಿಕ ದೀಪೋತ್ಸವಾಚೆ ವಾಂಟೊ ಜಾವನು ವನಮಂಟಪಾಂತು° ಪಂಚಾಮೃತ, ಸೀಯಾಳಾಭಿಷೇಕ, ಮಹಾಪೂಜಾ, ವನಭೋಜನ ಚಲೆ°. ಉಪರಾಂತ ಉತ್ಸವ ಬ್ಹಾಯರಸರನು ಶ್ರೀ ಹನುಮಂತ ದೇವಳಾಂತು° ವಿಶೇಷ ರಂಗಪೂಜಾ ಜಾತರಿ ದೇವಳಾಚೆ, ಮಹಾಮ್ಮಾಯಿ ದೇವಳಾಚೆ ಉತ್ಸವ ಶ್ರೀ ಗೋಪಾಲಕೃಷ್ಣ ದೇವು ಸಹಿತ ಪಟ್ಟಾಚೆ ಶ್ರೀ ವೆಂಕಟರಮಣ ದೇವಾಲಿ ಲಾಲ್ಕಿ, ಪಲ್ಲಕ್ಕಿ ಉತ್ಸವ, ಪೆಂಟಾ ಸವಾರಿ, ಕಟ್ಟೆ ಪೂಜಾ ಸಕಾಳಿ ತಾಂಯ ಚಲೆ. ಶನಿವಾರ ಅವಭೃತೋತ್ಸವಾಚೆ ಸಾಂಗತ ಮಹೋತ್ಸವ ಸಂಪನ್ನ ಜಾಲೊ.
ತಬಲಾ, ಹಾರ್ಮೋನಿಯಂ, ಕೀಬೋರ್ಡ, ಕೋಳಲ ಫುಕಟ ತರಬೇತಿ
ಮಂಗಳೂರು: ಸಾಂಸ್ಕೃತಿಕ ಕಾರ್ಯಕ್ರಮಾದ್ವಾರಿ ಜಿ.ಎಸ್. ಬಿ ಸಮಾಜಾಚೆ ಚೆರಡುವಾ° ಮಧೆ° ವ್ಯಕ್ತಿತ್ವ ವಿಕಸನ ಕರಚೆ ನದರೇನ ಸಾಧನಾ ಬಳಗ (ರಿ) ಮಂಗಳೂರು ಹಾಂನಿಂ ತಿಸ್ರೆ ದಾಕೂನ ಸ್ಹವೆ ಕಕ್ಷಾಚೆ 20 ಚೆರಡುವಾಂಕ ಚಾರ ವರಸ° ತಬಲಾ, ಹಾರ್ಮೋನಿಯಂ, ಕೀಬೋರ್ಡ, ಕೋಳಲ ಫುಕಟ ತರಬೇತಿ ದಿವಚೆ ಯೋಜನಾ ಶುರು ಕೆಲ್ಯಾ. ತ್ಯಾ ನಂತಾ° ಆರ್ಥಿಕ ಜಾವನು ದುರ್ಭಲ ಆಸಚೆ 10 ಚೆರಡುವಾಂಕ ತಬಲಾ ಆನೀ ಕೀಬೋರ್ಡ ಫುಕಟ ಜಾವನು ದಿತಾತಿ ಮ್ಹಣು ಕಳವಣಿಂತು° ಸಾಂಗಲಾ°. ಪ್ರವೇಶ ಶುಲ್ಕ ನಾ ಮ್ಹಣು ಕಳವಣಿಂತು° ಸಾಂಗಲಾ°. ಪ್ರವೇಶ ಪತ್ರ° ಮಂಗಳೂರು ರಥಬೀದಿಚೆ ಪೈ ಟಿಫಿನಾಚೆ ಮುಕಾರ ಆಸಚೆ ಭಂಡಾರಕಾರ್ ಎಂಟರಪ್ರೈಸಸ್ ಹಾಂಗಾ ಮೇಳತಾತಿ. ಡಿಸೆಂಬರ್ 15, 2021 ಪ್ರವೇಶ ಪತ್ರ° ಪ್ರಾಪ್ತ ಕರಚಾಕ ಆಖೇರಿಚೊ ದೀವಸ ಜಾವನು ಆಸಾ.
51 ವೊ ವಾರ್ಶಿಕೋತ್ಸವ
ಉಡುಪಿ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಚೆ ಜಿ ಎಸ್ ಬಿ ಯುವಕ ಮಂಡಳಿಚೆ 51 ವೊ ವಾರ್ಶಿಕೋತ್ಸವ ಅ.18 ಕ ಚಲೊ. ಡಾ| ಕಲ್ಯಾ ವಿನಾಯಕ ಶೆಣೈ ದಂಪತಿ ಮಾನಾಚೆ ಸೊಯ್ರೆ ಆಶಿಲೆ. ವೆಗವೆಗಳೆ ಕ್ಶೇತ್ರಾಂತ ಸೇವಾ ದಿಲೆಲೆ ನೀಲಕಂಠ ಭಾಗವತ್, ವಿಗ್ನೇಶ್ ಭಟ್, ಶ್ವೇತಾ ಭಾಗವತ್, ಪ್ರತೀಕ್ ಕಾಮತ್ ಹಾಂಕಾ° ಸನ್ಮಾನ್ ಚಲೊ. ವ್ಹಿಂವ್ಹಿಂಗಡ ಖೇಳ ಸ್ಪರ್ದೇತು° ಜೀಕಿಲೆ ಚೆರಡುವಾಂಕ ಇನಾಂ ವಾಂಟಚೆ° ಜಾಲೆ°. ಆಡಳಿತ ಮೋಕ್ತೆಸರ್ ಪಿ. ವಿ. ಶೆಣೈ ಹಾಂನಿ° ಮಾನಾಚೆ ಸೊಯ್ರೆಂಕ ಸನ್ಮಾನ ಕೆಲೊ. ಯುವಕ ಮಂಡಳಿಚೊ ಅಧ್ಯಕ್ಷ ಕೆ. ನಿತೀಶ ಶೆಣೈ, ಆದಲೊ ಅಧ್ಯಕ್ಷ ಟಿ. ಸುಬ್ಬಣ್ಣ ಪೈ ಆನಿ ಹೇರ ಉಪಸ್ಥಿತ ಆಶಿಲೆ. ಉಪರಾಂತ ಮನೋರಂಜನಾ ಕರ್ಯಕ್ರಮ ಚಲೊ.
“ವಿದ್ಯಾರ್ಥಿಯಾನಿ ತಾರ್ಕಿಕ ಚಿಂತನ ಕರಕಾ” - ಸಿ.ಎ. ಯು. ರಾಮದಾಸ ಕಾಮತ್
ಸೊಮೇಶ್ವರ, ಉಡುಪಿ: “ವಿದ್ಯಾರ್ಥಿಯಾನಿ ತಾರ್ಕಿಕ ಚಿಂತನ ವಾಡೊಕಾ ಆನೀ ಜ್ನಾನ ವಾಡೊಚೆ ನದರೇನ ಸವಾಲ ವಿಚಾರಕಾ” ಮ್ಹಣು ಇನ್ಫೋಸಿಸಾಚೊ ನಿವೃತ್ತ ಮ್ಹಾಲ್ಗಡೊ ಉಪಾಧ್ಯಕ್ಷ ಯು. ರಾಮದಾಸ ಕಾಮತ ಹಾಂನಿ° ಸಾಂಗಲೆ°. ಅ. 17ಕ ಉಡುಪಿ ಜಿಲ್ಲೆಚೆ ಸೊಮೇಶ್ವರಚೆ ಶ್ರೀ ವೆಂಕಟರಮಣ ಸ್ವಾಮಿ ದೇವಸ್ಥಾನಾಚೆ ಸಭಾಂಗಣಾoತು° ಚಲೆಲೆ ಜಿ. ಎಸ. ಬಿ ಸಮಾಜಾಚೆ “ವಿದ್ಯಾಕಲ್ಪಕ ವಿದ್ಯಾರ್ಥಿ ವೇತನ” ಕಾರ್ಯಕ್ರಮಾಚೆ ಉಗ್ತಾವಣ ಕರನು ತಾಂನಿ° ಆಶೆ° ಸಾಂಗಲೆ°. “ಫುಡೆ ಕಾಳಾಂತು° ದೇವಳ° ಶೈಕ್ಷಣಿಕ ಆನಿ ಸಾಮಾಜಿಕ ಕೇಂದ್ರಯೀ ಜಾವನು ಆಶಿಲಿಂಚಿ. ಆಜೀ ದೇವಳಂ ಫಕತ ಧಾರ್ಮಿಕ ಕೇಂದ್ರ ಜಾಲ್ಯಾಂತಿ ಮ್ಹಣು ತಾಂನಿ ಸಾಂಗಲೆ°.
ವಿದ್ಯಾಕಲ್ಪಕ ವಿದ್ಯಾರ್ಥಿ ವೇತನ ಯೋಜನೆಚೊ ಸ್ಥಾಪಕ ಖ್ಯಾತ ಲೆಕ್ಕ ಪರಿಶೋಧಕ ನಂದಗೋಪಾಲ ಶೆಣೈ ಹಾಂನಿ ಪ್ರಾಸ್ತಾವಿಕ ಉತ್ರ ಸಾಂಗಲಿ°. “ವಿದ್ಯಾ ಕಲ್ಪಕ ವಿದ್ಯಾರ್ಥಿ ವೇತನ ನಿಧಿ ಏಕ ಸಂಸ್ಥೊ ನ್ಹಹಿಂ. ತೆ° ಏಕ ಕಲ್ಪನಾ. ಹಾಂಗಾ° ದಾನಿ ಆನೀ ವಿದ್ಯಾರ್ಥಿಯಾಲೆ ಮಧೆ° ಶೀದಾ ಸಂಪರ್ಕ ಆಸತಾ. ದಾನ ದಿತಲೆ ವಿದ್ಯಾರ್ಥಿಯಾಲೆ ಖಾತೆಕ ಶೀದಾ ದುಡು ವರ್ಗಾವಣ ಕರತಾತಿ. ಪಾಂಚ ವರಸ ದಾಕೂನ ಹೊ ಕಾರ್ಯಾಕ್ರಮ ವ್ಹಿಂಗವ್ಹಿoಗಡ ಗಾಂವಾoತ ಚಲಾ. ಎದೊಳು ಥಾಂಯ 194 ಅರ್ಹ ವಿದ್ಯಾರ್ಥಿಯಾಂಕ ಸಾಬಾರ 1 ಕೋಟಿ 63 ಲಾಖ ರುಪಯೊ ವಿದ್ಯಾರ್ಥಿ ವೇತನ ದಿವಚೆ° ಜಾಲಾ°. ಹಾಂತು° 90 ಠಕೊ ವಿದ್ಯಾರ್ಥಿಯಾಲೊ ಬಾಪುಸು ನಾ ಯಾ ತಾಂಗೆಲೆ° ವ್ಹಡಿಲಾಲೆ° ಶಿಕ್ಷಣ ಎಸ್. ಎಲ್.ಎಲ್. ಸಿ ಪಶಿ ಊಣೆ ಆಸಾ” ಮ್ಹಣು ತಾಂನಿ° ಕಳಯಲೆ°.
ಸೊಮೇಶ್ವರಚೆ ಶ್ರೀ ವೆಂಕಟರಮಣ ಸ್ವಾಮಿ ದೇವಸ್ಥಾನಾಚೊ ಮೊಕ್ತೆಸರ ಜಾವನು ಖೂಬ ವರಸ° ಸೇವಾ ದಿಲೆಲೆ ದಾನಿ ಆನಿ ಸಮಾಜಸೇವಕ 95 ವರಸಾಚೆ ಕೆ. ಮಂಜುನಾಥ ಕಾಮತ, ಮುದ್ರಾಡಿ ಹಾಂಕಾ ಸನ್ಮಾನ ಚಲೊ. ವಿದ್ಯಾಕಲ್ಪಕ ವಿದ್ಯಾರ್ಥಿ ವೇತನ ನಿಧಿಚೆ ತರಪೇನ ಚಲೆಲೆ ಕೊಂಕಣಿ ಕವಿತಾ ರಚನಾ ಸ್ಪರ್ಧೆಂತು° ಇನಾ° ಜಿಕಿಲೆಂಕ ಶ್ರೀ ವೆಂಕಟರಮಣ ಸ್ವಾಮಿ ದೇವಳಾಚೆ ಮೊಕ್ತೆಸರ ಕಾರ್ಯದರ್ಶಿ ಎಸ್. ರಾಘವೇಂದ್ರ ಭಕ್ತ ಹಾನಿ° ಇನಾಂ ವಾಂಟಿಲೆ°.
ಕೊಂಕಣಿ ಕವಿತಾ ರಚನಾ ಸ್ಪರ್ಧೆಚೆ ವಿಜೇತ:
ಪಯಲೆ° ಇನಾಂ: ರೂ. 25,000/-, ಅಂಕಿತ ಶೆಣೈ, ಪೆರ್ಮುದೆ, ಗೋಪಾಲಕೃಷ್ಣ ಭಟ್, ಕಣ್ಣೂರು, ಅನುಷಾ ವಿ. ಶೆಣೈ, ಕಾಪು.
ದುಸ್ರೆ ಇನಾಂ: ರೂ. 15,000/- ಸತ್ಯದೇವ ನಾಯಕ್, ಬಿದ್ಕಲ್ ಕಟ್ಟೆ, ದೀಕ್ಷಾ ವಿ. ಕಿಣಿ, ಮಂಗಳೂರು, ಸಂಜನಾ ಭಟ್, ಬೆಳ್ತಂಗಡಿ, ಸಾಯೀಶ್ ವಿ. ಕಿಣಿ, ಮಂಗಳೂರು.
ತಿಸ್ರೆ ಇನಾಂ: ರೂ. 10,000/- ವಂದನಾ ಪ್ರಭು ಮೂಂಡ್ಕುರು, ತಾರಾ ಆರ್, ಕಿರಿಮಂಜೇಶ್ವರ್, ರಮ್ಯಾ, ಬೆಳ್ಮಣ್.
ಕೊಂಕಣಿ ಎಂ.ಎ ವಿಭಾಗಾಂತ ಪ್ರಥಮ ರ್ಯಾಂಕ ಫಾವೊ ಕೆಲೆಲೆ ಮಂಗಳೂರಚಿ ಅನಿತಾ ಶೆಣೈ ಹಾಂಕಾ° ಉಷಾ ನಂದಗೋಪಾಲ ಶೆಣೈ ಹಾಂನಿ° ಸನ್ಮಾನ ಕೆಲೊ. ವಾಘ್ಮಿ ಆನಿ ಪ್ರೇರಣಾತ್ಮಕ ಭಾಷಣಗಾರ ರಾಜೇಂದ್ರ ಭಟ್ ಕೆ. ಹಾಂಕಾ° ಕೇಶವೇಂದ್ರ ಚ್ಯಾರಿಟೇಬಲ್ ಟ್ರಸ್ಟ ಹಾಜೆ ಕಾರ್ಯದರ್ಶಿ ಕುಲ್ಯಾಡಿ ಗಿರೀಶ ಪೈ ಹಾಂನಿ° ಸನ್ಮಾನ ಕೆಲೊ. ವೆಗವೆಗಳೆ ಕ್ಷೇತ್ರಾಂತ ಸಾಧನ ಕೆಲೆಲೆ ವಿದ್ಯಾಕಲ್ಪಕ ವಿದ್ಯಾರ್ಥಿ ವೇತನ ಫಾವೊ ಜಾಲೆಲೆ ವಿದ್ಯಾರ್ಥಿಯಾಂಕ ಗೌರವಾರ್ಪಣ ಜಾಲೆ°. ಕುಂದಾಪುರಚೆ ಕಾರ್ತಿಕ ಭಟ್(ಕುಸ್ತಿ), ಪಾಣೆಮಂಗಳೂರಚೆ ಆರಾಧನಾ ಶೆಣೈ (ಶೈಕ್ಷಣಿಕ ಸಾಧನಾ), ಬಂಟವಾಳಚೆ ಧನ್ಯಶ್ರೀ ಬಾಳಿಗಾ (ಶೈಕ್ಷಣಿಕ ಸಾಧನಾ), ಕಾರ್ಕಳಚಿ ರಚನಾ ಡಿ. ಭಟ್ (ಸಿ.ಎ. ಐಪಿಸಿಸಿ), ಕಾರ್ಕಳ ಮಾಳಾಚೊ ನಿತಿನ ಶೆಣೈ (ಸಿ.ಎ. ಐಪಿಸಿಸಿ), ಕಾರ್ಕಳಚಿ ಸಂಗೀತಾ ಕಾಮತ (ಅಲ್ಯೂಮ್ನಿ) ಹಾಂಕಾ° “ಕ್ಷಮತಾ” ಕಾರ್ಯಕ್ರಮಾಚೊ ಸಂಚಾಲಕ ಸಿ. ಎ. ಗಿರಿಧರ ಕಾಮತ ಆನಿ ವಿಶ್ವ ಕೊಂಕಣಿ ಭಾಶಾ ಸಂಸ್ಥಾನ ಹಾಜೊ ನಿರ್ದೇಶಕ ಗುರುದತ್ತ ಬಂಟ್ವಾಳಕರ್ ಹಾಂನಿ° ಸನ್ಮಾನ ಕೆಲೊ. ವಿದ್ಯಾಕಲ್ಪಕ ವಿದ್ಯಾರ್ಥಿ ವೇತನ ನಿಧಿಚೆ ಕಾರ್ಯಕ್ರಮ ಸಂಯೋಜನ ಕೆಲೆಲೆ ಜಗದೀಶ ಹೆಗ್ಡೆ ಆನಿ ಪವನ ಭಟ್ ಹಾಂಕಾಯಿ ಸನ್ಮಾನ ಚಲೊ.
ರಾಶ್ಟ್ರೀಯ ತರಬೇತುದಾರ ರಾಜೇಂದ್ರ ಭಟ್ ಕೆ ಹಾಂನಿ° ಪ್ರೇರೇಪಣಕಾರಿ ಉತ್ರ° ಉಲೊವನು ವಿದ್ಯಾರ್ಥಿಯಾಲಿ ಉಮೇದಿ ವಾಡಯಲಿ. ಶ್ರೀ ವೆಂಕಟರಮಣ ಸ್ವಾಮಿ ದೇವಳಾಚೊ ಆಡಳಿತ ಮೊಕ್ತೇಸರ ಎಚ್. ಯೋಗೀಶ ಭಟ್ ಹಾಂನಿ ಸ್ವಾಗತಾಚೆ ಉತ್ರ° ಸಾಂಗೂನ ಜಗದೀಶ ಹೆಗ್ಡೆ ಹಾಂನಿ ಆಭಾರ ಮಾನಲೊ. ಕಾರ್ಯಕ್ರಮಾಚೆ ಶುರುವೆಕ ಅರ್ಚಕಾನಿ ವೇದಘೋಷ ಕೆಲೊ. ಸ್ಮಿತಾ ಶೆಣೈನ ಸೂತ್ರ ಸಂಚಾಲನ ಕೆಲೆ°.
ಗುರುವರ್ಯಾನ ವ್ಯಾಕ್ಸಿನ ಘೆತಲೆಂ
ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೆ ಮೂಲ ಆನೀ ಪುರಾತನ ಮಠ ಶ್ರೀ ಸಂಸ್ಥಾನ ಗೌಡಪಾದಾಚಾರ್ಯ ಮಠ ಕವಳೆ ಗೊಂಯ್ ಹಾಜೆ ಮಠಾಧೀಶ ಶ್ರೀಮದ್ ಶಿವಾನಂದ ಸರಸ್ವತಿ ಸ್ವಾಮಿ ಮಹಾರಾಜ್ ಹಾಂನಿ° ಲೋಕ ಕಲ್ಯಾಣ ಆನೀ ಸಮಾಜಾಚೆ ಬರೆಪಣಾ ಖಾತೀರ ಬೆಳಗಾಂವ್ ಕ್ಯಾಂಪಾοತು° ಪಾಂಚ ದೀವಸ ಮಹಾರುದ್ರಾಬಿಷೇಕ ಕರನು ಮಹಾ ಮೃತ್ಯುಂಜಯ್ ಆನೀ ಭವಾನಿ ಶಂಕರ ದೇವಾ ಲಾಗಿ ಹ್ಯಾ ಜಗಾರ ದಾಕೂನ ಕರೋನಾ ಮಹಾಮಾರಿ ವಗೀಚ ನಾಶ ಜಾವೊ ಮ್ಹಣು ಪ್ರಾರ್ಥನಾ ಕೆಲೆ. ಹಾಜೆ ಪಯಲೆ° ಗುರುವರ್ಯಾನ ಕೋವಿಡ್ ವ್ಯಾಕ್ಸಿನಾಚೊ ಪಯಲೊ ಡೋಸ್ ಘೆವಚೆ° ಕೆಲೆ°. ಸಮಾಜ ಭಾಂದವಾನಿ ಸರಕಾರಾಚೆ ಸೂಚನಾ ಮಾನ್ಯ ಕರನು ಜೀವನ ಕರಕಾ ಆನಿ ಜಾಲೆ ತಿತಲೆ ವಗೀಚ ವ್ಯಾಕ್ಸಿನ ಘೆವಕಾ ಮ್ಹಣು ತಾಂನಿ° ಸೂಚನಾ ದಿಲಿ.
ಉಡುಪಿ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಸ್ಥಾನ
ಉಡುಪಿ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಂತು°
ಮುοಡ್ಕೂರು: ಹಾಂಗಾಚೆ ಶ್ರೀ ವಿಠೋಭ ದೇವಳಾಂತು°
ಉದ್ಯೋಗ ಆನೀ ನಿರುದ್ಯೋಗ ಡಾ| ಅರವಿಂದ
18:53:41 ವಿಶ್ವ ಕೊಂಕಣಿ ಕೇಂದ್ರ ‘ಕ್ಷಮತಾ
This application is only for the poor
कोंकणिंतल्या अस्तुरी साहित्याचेर
ಮಂಗಳೂರು: ವಿಶಂತಿ ಸಂಭ್ರಮಾοತು ಆಸಚೆ
ಬೆಂಗಳೂರು: ಹಾಂಗಾಚೆ ಮಲ್ಲೇಶ್ವರಂಚೆ ಗೌಡ
Editorial
ಡಾಕ್ಟರಾಲೆ ಆತ್ಮ ಪರಮಾತ್ಮಾಲೆ ಸಾಂಗತ ವಿಲೀನ ಜಾಲೆ°,,,
ಡಾ. ಜಿ. ಜಿ. ಲಕ್ಷ್ಮಣ್ ಪ್ರಭು ಎಕ ನಾವಾದೀಕ ಡಾಕ್ಟರು ಆಶಿಲೊ. ಯುರಾಲಾಜಿ ತಾಗೆಲಿ ಸ್ಪೇಷಾಲಿಟಿ. ತೊ ಎಕ ಫಾಮಾದ ಡಾಕ್ಟರ್ ನಂತಾ° ಎಕ ಬರೊ ಭಾಷಣಗಾರುಯೀ ಜಾವನು ಆಶಿಲೊ. ಸಾನ ಪ್ರಾಯೆರಿ ತೊ ಜನಾ ಮೋಗಾಳ ಜಾಲೆಲೊ. ತೊ ಅನೀರಿಕ್ಷಿತ ಜಾವನು ಅಂತರಲೊ ಮ್ಹಳೆಲಿ ಖಬರ ಆಯಕತನಾ ಸಾಬಾರ ಲೋಕಾಂಕ ತೆಂ ನಂಬಗೂಚಾಕ ಜಾಯನಿ. ಬ್ಯುಸಿ ಡಾಕ್ಟರ್ ಆಶಿಲೊ ತೊ ಕೆದನಾಯಿ ಕೊಡಿಯಾಲಚೆ ಕೆ. ಎಂ. ಸಿ ಹಾಸ್ಪಿಟಲಾಂತ ಪಳೊವಚಾಕ ಮೆಳತಲೊ. ಸಕಾಳಿ ದಾಕೂನ ಸಾಂಜವೇಳಾ ತಾಂಯ ಆಪರೇಶನ್ ಥಿಯೇಟರಾಚೆ ಸಮವಸ್ತ್ರಾಂತು ತೊ ದಿಸತಲೊ ಮ್ಹಣು ಆಸ್ಪತ್ರೆಕ ಗೆಲೆಲೆ ಸಾಂಗತಲೆ. ತಿತಲೊ ಬ್ಯುಸಿ ಡಾಕ್ಟರ್ ತೊ. ತಾಣೆ ತಾಗೆಲೆ ಪೆಶೆಂಟಾoಕ ಪಳೊವಚಾಕ ಆಸ್ಪತ್ರೆಚೆ ರೌಂಡ್ಸಾರ ವತನಾ ತಾಗೆಲೊ ಹೋಡು ತಾಳೊ ಆಯಕೂನು ತ್ಯಾ ಮ್ಹಾಳ್ಯೆರಿ ಆಸಚೆ ಸಗಟ ರೂಮಾಂತುಲೆ° ಪೇಶೆಂಟಾoಕ ತೊ ಆಯಲೊ ಮ್ಹಣು ಕಳತಲೆ° ಖಂಯ. ಕುಶಾಲ ಉಲೊವನು ಪೇಶೆಂಟಾoಲಿ ಮನೋಸ್ಥಿತಿ ಸಂತೋಸಮಯ ಕರಚೆಂ ತಾಗೆಲಿ ಸವಯ್ ಆಶಿಲಿ.
ನ. 9ಕ ಎಕ ಆಪರೇಶನ ಪೂರ್ಣ ಕರನು ಭಾಯರ ಆಯಿಲೆ ಡಾಕ್ಟರಾಕ ಕಠಿಣ ಹೃದಯಘಾತ ಜಾಲೆ°. ತ್ಯಾ ನಿಮಿತ ತಾಕಾ ತುರ್ತಾನ ಶುಶ್ರುತಾ ಮೇಳಚಾಕ ಸಾಧ್ಯ ಜಾಲೆ°. ತೊ ಐ.ಸಿ.ಯುಂತ 8 ದೀವಸ ಆಶಿಲೊ. ತಾಕಾ ಊಂಛ ಸ್ಥರಾಚೆ ಟ್ರಿಟಮೆಂಟ್ ಮೆಳೆ°. ಜಾಲ್ಯಾರ ದೈವಿಚ್ಛಾ ವ್ಹಿಂಗಡ ಆಶಿಲಿ. ನ.17 ಕ ತಾಗೆಲೆ ದೇಹಾಂತ್ಯ ಜಾಲೆ°.
ಡಾಕ್ಟರಾಕ ಫಕತ 60 ವರಸ°. ಸಾಬಾರ 30 ವರಸಾಚೊ ವೈದ್ಯಕೀಯ ಅಣಭವ. ಡಾಕ್ಟರ ಮ್ಹಣು ನ್ಹಹಿ°, ಆರತಾ° ತರನಾಟೆ ಲೋಕಾನ ಹೃದಯಘಾತ ಜಾವನು ಮರಣ ಪಾವಚಿ ಖಬರ ಆಯಕೂಚೆ° ಚಡ ಜಾಲಾ°. ಸ್ವತ: ಡಾಕ್ಟರ ಆಶಿಲೆ ತಾಕಾ ಖಾಂಯ ಮುನ್ಸೂಚನಾ ಮೇಳನಿ ವೆ ? ತಾಣೆ ತಾತಾವಳಿ ತಾಗೆಲಿ ಆರೋಗ್ಯಾಚಿ ತಪಾಸಣಾ ಕರನು ಆಸಚೆ° ಸಾಧ್ಯತಾ ಆಸಾ. ಎಕ ಫಾಮಾದ ಡಾಕ್ಟರಾಕಚೀ ಅಶಿ° ಜಾಲೆ ಮ್ಹಣತಾನ ಸಾಮಾನ್ಯ ಮನಶಾನ ತಾಗೆಲೆ ಆರೋಗ್ಯಾ ಬದಲ ಕಿತಲಿ ಜಾಗೃತಿ ಘೆವಕಾ ? ಮನಶಾನ ತಾಗೆಲೆ ಆಹಾರ ಪದ್ಧತಿ ಆನಿ ಜೀವನ ಶೈಲಿ ಕಶಿ° ದವರಕಾ ? ವಿಜ್ಞಾನ ಇತಲೆ° ವಾಡಲಾ° ಕೀ, ವಿಜ್ಞಾನಿ ಲೋಕಾ° ಮಧೆಂತೂಚಿ ಆಮಿ ಘೆವಚೆ ವಕದ ಆನಿ ಹೇರ ವಿಷಯಾಚೆರಿ ಚರ್ಚಾ ಜಾವಚೆ° ಆಮಿ ಸೋಶಿಯಲ್ ಮೀಡಿಯಾರಿ ವಾಚತಾತಿ ಆನಿ ಆಯಕತಾತಿ. ಆಮಿ ಘೆತಿಲೆ ಕೋವಿಡ್ ವ್ಯಾಕ್ಸಿನಾ ಬದಲಯಿ ಸಂದೇಹ ಉಲಯತಲೆ ಆಸಾತಿ. ಆಶೆ° ಸಾಬಾರ ಸವಾಲಾ° ಆಮಗೆಲೆ ಮುಕಾರ ಆಸಾತಿ.
ಆಹಾರ ಪದ್ಧತಿ ಬದಲ ಖೂಬ ಚರ್ಚಾ ಜಾತಾ ಆಸಾ. ಆರತಾ° ಕ್ರಿಕೇಟರ್ ಕೊಹ್ಲಿನ ತಾಗೆಲೆ ಆಹಾರ ಪದ್ಧತಿ ಬದಲ ಸಾಂಗಿಲೊ ಎಕ ವಿಡೀಯೊ ಪಳೊವಚಾಕ ಮೆಳೊ. ತಾಂತು° ತೊ ಕಾರ್ಬ್ಸ ಊಣೆ ಕರಚೆ°, ಪ್ರೊಟಿನ್ ಚಡ ಕರಚೆ°, ಗೀನ್ ವೇಜಿಟೆಬಲ್ಸ್ ಖಾವಚೆ°, ಲೋಣಿ - ತುಪ ಖಾವಚೆ° ಸಾಂಗತಾ. ತಾಗೆಲೆ ಉತ್ರ° ಆಯಕತನಾ ಆಮಗೆಲೆ ಥೊಡೆ ಇಷ್ಟ ಲೋಕಾನ ಆಶೆ° ಕರಚೆ° ಚೂಕಿ ನ್ಹಹಿ° ಮ್ಹಣು ದಿಸತಾ. ಆಮಿ ಪ್ರಯತ್ನ ಕರನು ಪಳೊವಯೆತ ಮ್ಹಣು ಭೊಗತಾ. ದೀವಸಾಕ ಉಣೆನಾ 30 ಮಿನೀಟ್ ಚಮಕಲೆರಿ ಬರೆ° ಮ್ಹಣು ಹರ ಎಕಲೊ ಡಾಕ್ಟರು ಸಾಂಗತಾ. ಆಮಗೆಲೆ ತರನಾಟೆನಿ ಸುತಾ ಸಾನ ಪ್ರಾಯೇರಿಚಿ ಆಹಾರ ಪದ್ಧತಿ ಸಮ ಕರನು ಜೀವನ ಶೈಲಿ ಸಮ ಕರಚಾಕ ಪ್ರಯತ್ನ ಕರಕಾ.
ಡಾಕ್ಟರ್ ಜಿ. ಜಿ. ಲಕ್ಷ್ಮಣ್ ಪ್ರಭು ಬರೊ ಡಾಕ್ಟರು ಆನಿ ಭಾಷಣಗಾರ ನಂತಾ° ಎಕ ಕವಿ ಸುತಾ ಆಶಿಲೊ. ತಾಣೆ ಕನ್ನಡ ಭಾಶೆನ ಖೂಬ ಕವಿತಾಂ ರಚನ ಕೆಲಾಂ ಮ್ಹಣು ತಾಣೆ ದೇವಾದಿನ ಜಾತರಿಚಿ ಲೋಕಾಂಕ ಕಳೆ°. ತಾಣೆ ಆರತಾ° ಎಕ ಸಮಾರಂಭಾoತ ಪ್ರಸ್ತುತ ಕೆಲೆಲೆ ಭಾಷಣ ಖೂಬ ವೈರಲ್ ಜಾಲಾ°. ತಾಂತು° ತೊ ಆತ್ಮ ಆನಿ ಪರಮಾತ್ಮಾ ವಿಷಯಾರಿ ಉಲಯತಾ.
"ಕ್ರಷ್ಣಾನ ಸಾಂಗಲ್ಯಾ ಮ್ಹಣಕೆ ಪರಮಾತ್ಮಾಲೆ ಮ್ಹಣಕೆ ಆತ್ಮಾಕಯೀ ಆದಿ ನಾ ಯಾ ಅಂತ್ಯ ನಾ, ಮ್ಹಳ್ಯಾರಿ ಮರಣ ನಾ" ಮ್ಹಣು ತ್ಯಾ ಭಾಷಣಾಚೆ ಶುರುವಾತಾರಿ ಡಾಕ್ಟರು ಸಾಂಗತಾ. ಆಮಿ ಜೀವನಾಂತು° ಆಮಗೆಲೆ ಕರ್ತವ್ಯ ಕರಕಾ, ಕರತನಾ ಆಮಕಾ ಜಯ ಮೇಳತಾ ಯಾ ಸೋಲು ಮೇಳತಾ. ಆಮಗೆಲೆ ವಿಷಯಾರಿ ಕೋಣ ಕಸಲೆ° ಚಿಂತಾ ಕರತಾ ಮ್ಹಣು ಆಮಿ ಮನಾಂತ ದವರನು ಕರ್ತವ್ಯ ಕರಚೆ° ಕಷ್ಟ ಜಾತಾ. ತಸಲೆ ಮನೋಸ್ಥಿತಿರಿ ತುಮಿ ಕರ್ತವ್ಯ ಕರಚೆ° ಸುಲಭ ಜಾಯನಾ ಆನಿ ಕರಚೆ ಕರ್ತವ್ಯಾಕ ನ್ಯಾಯ ದಿವಚಾಕ ಜಾಯನಾ ಮ್ಹಣು ತೊ ಸಾಂಗತಾ.
ಮುಕಾರ ತೊ ಅಶೆ° ಸಾಗತಾ ಕೀ, ಎಕ ಪಾವಟಿ ತಾಗೆಲೆ ಪ್ರೋಫೆಸರಾನ ಸಾಂಗಿಲೆ° ಖಂಯ, ತುವ° ತುಗೆಲೆ ವೃತ್ತಿಂತು° ಪ್ರಚಾರ ಘೆವಚಾಕ ಯಾ ನಾವಾದೀಕ ಜಾವಚಾಕ ಆಯಿಲೊ ನ್ಹಹಿ°. ತುಗೆಲೆ ಮನಾಕ ಖಂಚೆ ಸಮ ಮ್ಹಣ ದಿಸತಾ ತ್ಯಾ ಪ್ರಮಾಣೆ ಮಾನವಿಯತಾ ದೃಷ್ಠಿ ದವರನು ಕರ್ತವ್ಯಪಾಲನ ಕರಿ. ಕೋಣಾಕ ಅಭಿಮಾನ ಆಸಾಕೀ ತಾಗೆ ಲಾಗಿ ಮಾನವೀಯತಾ ಆಸತಾ. ಕೋಣಾಕಯಿ ಖುಷಿ ಕರಚಾಕ ಕರ್ತವ್ಯ ಕರಚಾಕ ಜಾಯನಾ. ಅಹಂ ಸೋಡಕಾ, ಶರೀರ ಆನಿ ಪ್ರಾಪಂಚಿಕ ವಸ್ತು ಸೋಡಚೆ° ಕರಕಾ. ಶರೀರ ಆನಿ ಹೇರ ವಸ್ತು ಆಮಗೆಲೊ ನ್ಹಹಿ° ಮ್ಹಣು ಚಿಂತಲ್ಯಾರಿ ಸಹಜ ಜಾವನು ಆಮಿ ಸ್ವತಂತ್ರ ಜಾತಾತಿ. ಆತ್ಮ ವ್ಹಂವಚಾಕ ಶರೀರ ಶಿವಾಯ, ಶರೀರ ವ್ಹವಂಚಾಕ ಆತ್ಮ ನ್ಹಹಿ° ಮ್ಹಳೆಲೆ ಉಡಗಾಸ ದವರಕಾ. ಆತ್ಮಾನ ಶರೀರ ವ್ಹಂವಚಿ ಪರಿಸ್ಥಿತಿ ಆಯಲ್ಯಾರಿ ಶರೀರ ಸೋಡಕಾ ಮ್ಹಣು ತೊ ಸಾಂಗತಾ.
ಆರೋಗ್ಯ ಸಾಂಬಾಳಚಾಕ ಕಸಲೆ° ಕರಕಾ ಮ್ಹಣೂಯಿ ಡಾಕ್ಟರಾನ ತಾಗೆಲೆ ಭಾಷಣಾಂತು° ಸಾಂಗಲಾ°. ಜೀವನಾಂತು° ಚಲನ, ಭೋಜನ, ಶಯನ ಆನಿ ಪ್ರಕೃತಿ ವೀಲಿನಾಚೆ ಬದಲ ಜ್ಞಾನ ಆಸೂಕಾ ಮ್ಹಣು ತೊ ಸಾಂಗತಾ.
ಆಮಿ ಕೆದನಾಯಿ ಚಲನಶೀಲ ಆಸೂಕಾ. ಚಲಚನಶೀಲತಾ ಮ್ಹಳ್ಯಾರಿ ಜೀವಂತ ಆಸಾತಿ ಮ್ಹಣಚೆ ಸೂಚನಾ. ತ್ಯಾ ನಿಮಿತ ಪ್ರಾಯ ಜಾಲೆಲ್ಯಾನಿ ಜಾಲೆ ತಿತಲೆ ಚಮ್ಕೂಚೆ° ಕರಕಾ. 60 ವರಸ° ಜಾತರಿ ಎಕ ವಾಕಿಂಗ್ ಸ್ಟಿಕ್ ದ್ಹರನು ಚಮಕೂಚೆ° ಬರೆ° ಮ್ಹಣು ತೊ ಡಾ. ಟಿ. ಎ. ಎ. ಪೈಲೆ ಉದಾಹರಣ ದಿತಾ.
ದುಸ್ರೆಂ, ಭೋಜನ. ತರನಾಟೆ ಆಸತನಾ ಫಾತೋರ ಖಾವನು ಜೀರ್ಣ ಕರಚಿ ಶಕ್ತಿ ಆಸತಾ. ಪ್ರಾಯ ಜಾತಾನ ತೀ ಶಕ್ತಿ ಊಣೆ ಜಾತಾ. ತಶಿಂ ಮ್ಹಣು ಕಸಲೆಂಯಿ ಸೊಡಚೆಂ ನ್ಹಹಿಂ. ನ್ಯೂಟ್ರಿಶಿಯನ್ ಮ್ಹಳ್ಯಾರಿ ಹೈ ಫೈಬರ್ ಆಸೂಕಾ, ಉದಾಕ ಪಿವಕಾ, ಲಾಯಕ ಕರನು ನಿದೋಕಾ. ಎಕ ಲೇಖಾ ಪ್ರಮಾಣೆ 8 ಗಂಟೊ ಕಾಮ ಕರಕಾ, 8 ಗಂಟೊ ಕುಟುಂಬಾಕ ದೀವಕಾ ಆನಿ 8 ಗಂಟೊ ನಿದೋಕಾ. ವಗೀ ನಿದೊಚೆಂ ಆನಿ ವಗೀ ಉಟಾಚೆ° ಕರಕಾ. ಪ್ರಕೃತಿ ಸಾಂಗತ ಮೆಳಚೆ° ಕರಕಾ. ಅನೈಸರ್ಗಿಕ ವಸ್ತು ದೂರ ದವರಕಾ. ಮೊಬೈಲ್ ಆನಿ ತಸಲೆ ಹೇರ ವಸ್ತು ದೂರ ಕರಚೆ°, ಖಂಚೆಯ ಗಾರ್ಡನಾಕ ವಚೆ° ಹಾಕಾ ಉದಾಹರಣ ಜಾತಾತಿ. ಪ್ರಕೃತಿ ಮಾತೆಲೆ ಸಾಂಗತ ಮೇಳನು ಆಸಚೆಂ ಅತ್ಯಂತ ಪ್ರಮುಖ ಜಾತಾ.
ಆಯಚೆ ದೀಸಾಂತ ಸಂಭoದ ಚೂಕುನ ವಚೆ° ಸಾಮಾನ್ಯ ಜಾಲಾ°. ಸಂಭoದ ವರೊನ ಹಾಡಚೆ° ಕರಕಾ. ದೋಸ್ತ ಮ್ಹಳಯಾರಿ ಕಾನ್ನಡಿ ಶೆಂ ಆಸತಾತಿ. ಮುಖಸ್ತುತಿ ಕರತಲೆ ನ್ಹಹಿ°. ಕೇದನಾಯಿ ಸಂಭoದ ಉದಾಕಶೆ° ಆಸೂಕಾ. ಉದಾಕ ಪಾರದರ್ಶಕ ಆಸತಾ. ತಾನಿ ನಿವಯತಾ. ಆಮಿ ತಶೀಂಚಿ ಜಾವಕಾ. ತ್ಯಾ ನಿಮಿತ ಜೀವನಾಂತು° ಚಲನ, ಭೋಜನ, ಶಯನ ಆನಿ ಪ್ರಕೃತಿ ವೀಲಿನಾಚೆ ಬದಲ ಚಡ ಮಹತ್ವ ದೀವಕಾ. ತ್ಯಾಚ ವೇಳಾರ ಸ್ನೇಹ ಪರಿಪಾಲನ ಕರಚೆ° ಕರಕಾ ಮ್ಹಣು ಸಾಂಗೂನು ತಾಣೆ ತಾಗೆಲೆ ಭಾಷಣ ಆಖೇರಿ ಕೆಲೆಲೆಂ ಆಸಾ.
ತಾಣೆ ಭಾಷಣಾಂತು° ಕಸಲೆ° ಸಾಂಗಲಾ° ತೆ° ತಾಣೆ ಜೀವನಾಂತು° ಪರಿಪಾಲನ ಕೆಲಾ° ಮ್ಹಣಯೆತ. ತಾಗೆಲೆ ಬದಲ ತಾಗೆಲೆ ದೋಸ್ತಾನಿ, ಪೇಶೆಂಟಾನಿ ಆನೆ ಹೇರಾನಿ ಸೋಶಿಯಲ್ ಮೀಡಿಯಾರಿ ಫಾಯಸ ಕೆಲೆಲೆ ಸಂದೇಶ ಪಳೊವನು ಆಶೆಂ ಸಾಂಗಚಾಕ ಜಾತಾ.
ಡಾಕ್ಟಾçಲೊ ಮ್ಹಾಂತು ಜಿ. ಜಿ. ವಾಸುದೇವ ಪ್ರಭು ಹಾಂನಿ° ಮಂಗಳೂರಾoತು° ಕೊಂಕಣಿ ಭಾಶೆ ಖಾತೀರ ಸೇವಾ ದಿವಚೆ ನದರೇನ 1981ತು° ಶುರು ಕೆಲೆಲೊ ಸಂಸ್ಥೊ ಕೊಂಕಣಿ ಸಾಂಸ್ಕೃತೀಕ ಸಂಘ ಆಜಿಕಯೀ ತೀ ಸೇವಾ ದಿವೂನ ಆಸಾ. ಸಂಘಾನ ಆಪಯಿಲೆ ತೇದನಾ ಜಿ. ಜಿ. ಲಕ್ಷ್ಮಣ್ ಪ್ರಭು ಯೆವನು ತಾಂಕಾ° ಮಾರ್ಗದರ್ಶನ ದಿತಲೊ. ಉತ್ತಮ ವೈದ್ಯ, ವಾಘ್ಮಿ, ಸಂಘಟಕ, ಸಾಹಿತಿ ಆನಿ ಬರೊ ಮನಿಸ್ ಆಶಿಲೆ ತಾಂಗೆಲೆ ಆತ್ಮಾಕ ಶಾಂತಿ ಮಾಘೂಯಾ°.
Shabdvihar
ಮಾಡೋವಪ ಮಾಡ್ಡಪ
ತೋ ವಾಟೇರಿ ಶೇಣ ಮಾಡೋವನು ಆಯಿಲೊ, ಶೇಣ ಮಾಡ್ಡಯಿಲೇ ಕಾರಣಾನ ತಾಗೆಲೆ ಪಾವಲ ಭರ ಶೇಣ ಜಾಲ್ಲೆ. ಹೆ ಉದ್ಘೃತ ವಾಕ್ಯಾಂತ ಮಾಡೋವನ ಮ್ಹಣಚೊ ಜೋ ಶಬ್ದು ವಾಪರಲಾ ತೇ ಶಬ್ದಾ ವಿಶಿಂ ಸಮಜೂವ್ಯಾಂ.
ಮಾಡ್ಡಪ, ಮಾಡೋವಪ್ಪ ಮ್ಹಳ್ಯಾರಿ ಜೊ ವಸ್ತುಚೆರಿ ಸಹಸಾ ಪಾವಲಾಂಚೆ ದಾಮಾಟಪಣ ಜಾತಾ ಅನೀ ತೋ ವಸ್ತು ಚಟ್ಟೆ ನ್ಹಹಿಂವೆ ವಿಕೃತ ಜಾತಾ ತಾಕಾ ಮರ್ಧನ ಮ್ಹಣು ಸಂಸ್ಕೃತಾಂತು ಸಾಂಗತಾತಿ. ಹೆಂ ಮರ್ದನ ಮ್ಹಣಚೆಚಿ ತದ್ಬವ ರೂಪ ಮಾಡ್ಡಪ ಮ್ಹಣು ಜಾತಾ. ಶಬ್ದಾಂತೂಲೆ ದೋನಿಂಚೆ ವಿಜಾತೀಯ ಸಂಯುಕ್ತಾಕ್ಷರ ಸ್ವಜಾತೀಯ ಜಾತಾ. ಶುದ್ಧ ಜಾವನು ಮಡ್ಡಪ ಜಾತ್ತಾ. ಆನೀ ತೋ ಶಬ್ದು ಉಚ್ಛಾರ ದೋಶಾನ ಮಾಡ್ಡಪ ಜಾಲ್ಲಾ. ಸಂಸ್ಕೃತಾಚೆ ಮರ್ದನ ಮ್ಹಣಚೇ ಶಬ್ದಾಕ ರಗೊವಡಚೆಂ ಆದಿ ಮಸ್ತ ಅರ್ಥ ಆಸತಿ. ತಾಂತು ಏಕ ಅಥರ್ು ಮಾಡ್ಡಪ ಮ್ಹಣ ಜಾವನು ಆಸಾ. ತೇ ಅಥರ್ಾರಿ ಹೋ ಶಬ್ದು ಆಸಾ
An Appeal to the members of the GSB Community
जेसन पींत, SDB, उद्यावर, उडुपी (MA कोंकणी)
ಕೊಡಿಯಾಲ ಖಬರ ಸಾನ ಕಾಣಿಯೊ ಬರೊವಚೆ ಸ್ಪರ್ಧೆಂತು°
ಪರಬೆಕ ತಿಸ್ರೆ ಲ್ಹಾರಾಚೆ ಭಯ ವಿಶ್ವಾಕಚ ಕರೋನಾಚೆ ಭಯ
ನವೆಂಬರ ಮ್ಹಯನೊ ಸರನು ದಶಂಬರ ಪಾವಚೆ ಸಂದರ್ಭಾರ ಲೋಕಾಂಕ
ಅಮ್ಚಿಗೆಲೆ ಪರ್ಬೆ ರಾಂದಪ ಅಮ್ಚಿ ರಾಂದಪ ಭಾರಿ ಸುಲಭಗೊ
ಪ್ರಾಕ ದಕೂನು ಪ್ರಸ್ತೂತಾಕ ಎತ್ತಾನ ಅಮ್ಗೆಲೆ ಖಾಣಜವಣ,
ಶ್ರಾವಣ ಮಾಸು ಆನಿ ಚೂಡಿ ಪೂಜಾ ಅಶ್ಶಿ ತಶ್ಶಿ ಪೊಳೊಚೆ
ಮನು ಕುಲ ಕಳನು ಕೀ ಕಳನಾಶಿ° ಚೂಕಿ ಕೆಲ್ಲಾರಿ ಆವಸು
कोरोना महामारी भारताक येवनु ६ महिने जाले.
ಗುಜರಾತ ರಾಜ್ಯಂತು ಸಾಬಾರ ಸಂಖ್ಯೆರಿ ಜೈನ ಸಮುದಾಯ ಭೊ
Well Wishers
Most Read
- “ದಕ್ಷಿಣದ ಸಾರಸ್ವತರು”
- ಆಧುನಿಕ ಮಹಾಭಾರತ
- कन्याकुमारिच्या स्वामी विवेकानंद स्मारकाक ५० वरसां
- ರಚನಾ...
- ಕುದ್ಮುಲ ರಂಗರಾವ್
- ಸತ್ಯನಾರಾಯಣ ಪೂಜಾ
- तुळशी काट्टो
- कोरोनान शिकयिलो पाठ
- ವಾಯು ದಳಾಂತು ಕೊಂಕಣಿ ಮಹಿಳಾ ರಶ್ಮಿ ಭಟ್
- ಜುನಾಗಢ್
- GSB Scholarship League Application
- ಘರ ಏಕ್ ದೇವುಳ
- ವಿಧಿ ಲಿಖಿತ
- ಘರ ಏಕ್ ದೇವುಳ -2
- ಮಸೀಂಗ
- ಹುಂಬರು (ಉಂಬರು)
- 'ಮಹಾ ಸರಕಾರ"
- ತಾಕೀತ (ತಾಕೀದ)
- भारताचे अमृत स्वातंत्र महोत्सवाचे पांच अमृत घडियो
- स्वावलंबन आनी आत्मविश्वास
- ಗುಜರಾತ - ಪಾಲಿಟಾನಾ
- ಶಿಕ್ಷಣ ಕ್ಷೇತ್ರಾಕ ಗ್ರಹಣ
- ಗಾಂಧೀಜಿ ಆನಿ ಆತ್ಮನಿರ್ಭರತಾ
- ಉದ್ಯೋಗ ಆನೀ ನಿರುದ್ಯೋಗ
- अस्तंगत जाल्यो कोंकणीचे मळबांतलीं दोन जगमगी नकेत्रां
- ಅಂತರಾಷ್ಟ್ರೀಯ ವನಿತಾ ದಿವಸು
- ಅಕಾಲಿಕ ಪಾವಸಾ ಮಧೆ ಮಾಲಿನ್ಯ ! - ಅರವಿಂದ ಶಾನಭಾಗ, ಬಾಳೆರಿ
- ವಿಶ್ವ ಕೊಂಕಣಿ ಕೇಂದ್ರ ‘ಕ್ಷಮತಾ ಅಕಾಡೆಮಿ’ 2021
- SUKRTINDRA ORIENTAL RESEARCH INSTITUTE
- ಲಾಕ್ಡೌನ್
Homage
Who is Online?
We have 10 guests and no members online