ಹೊನ್ನಾವರ: ದೈವಜ್ಞ ಬ್ರಾಹ್ಮಣ ಸಮಾಜಾಚೆ ಗುರುವರ್ಯ ಶ್ರೀ ಶ್ರೀ ಸಚ್ಚಿದಾನಂದ ಜ್ಞಾನೇಶ್ವರ ಭಾರತೀ ಮಹಾಸ್ವಾಮಿ (ಶ್ರೀ ಜ್ಞಾನೇಶ್ವರಿ ಪೀಠ, ದೈವಜ್ಞ ಬ್ರಾಹ್ಮಣ ಮಠ, ಶ್ರೀ ಕ್ಷೇತ್ರ ಕರ್ಕಿ - ಹೊನ್ನಾವರ ) ಹಾಂಗೆಲೊ 37ವೊ ಚಾತುರ್ಮಾಸ್ಯ ವ್ರತಾಚರಣ ಕಲಬುರ್ಗಿ ಜಿಲ್ಲೆಚೆ ದತ್ತಪೀಠ ಗಾಣಗಾಪುರಾಚೆ ಸಂಗಮ ರಸ್ತೊ ಹಾಂಗಾ ಆಸಚೆ ಜಗದ್ಗುರು ಶ್ರೀ ಆದಿ ಶಂಕರಾಚಾರ್ಯ ಮಠಾಂತು° ಚಲಚೊ ಆಸಾ. ಶುಭಕೃತ್ ನಾಮ ಸಂವತ್ಸರಾಚೆ ಆಷಾಢ ಪೂರ್ಣಿಮಾ ಬುಧವಾರ ಜುಲೈ 13ಕ ವೇದವ್ಯಾಸ, ಆದಿ ಶಂಕರಾಚಾರ್ಯರ ಪೂಜಾ ಸಹಿತ ಶುರು ಜಾವಚೆ ಹ್ಯಾ ಚಾತುರ್ಮಾಸ್ಯ ವ್ರತ ದೋನ ಮ್ಹಯನೊ ಚಲನು ಭಾದ್ರಪದ ಪೂರ್ಣಿಮಾ ಶನಿವಾರ ಸೆ. 10ಕ ಸೀಮೋಲ್ಲಂಘನ ಕರನು ಸಂಪನ್ನ ಜಾವಚೆ ಆಸಾ ಮ್ಹಣು ಮಠಾಚೆ ಕಳವಣಿಂತು° ಸಾಂಗಲಾ°. ಸಂಪರ್ಕ ಕರಚಾಕ ದೂರವಾಣಿ 9448317779 (ಗುರು ಭಟ್) ಜಾವನು ಆಸಾ.

ಹೈದರಾಬಾದ: 38 ವರಸ ಕೆನರಾ ಬ್ಯಾಂಕಾಂತು° ಸೇವಾ ದೀವನು ನಿವೃತ್ತ ಜಾತರಿ ತಾಗೆಲೆ ಚೆರಡುವಾಂಲೆ° ಉದ್ಯಮಾಕ ಮೇಳೂಂಕ ಹೈದರಾಬಾದಾಕ ಗೆಲೆಲೊ ಅಚ್ಚುತ ಪೈ (95 ವರಸ) ಹಾಂನಿ° ಜುಲೈ 7ಕ ಹೈದರಾಬಾದಾಂತು° ದೇವಾದಿನ ಜಾಲೆ. ಪಂದ್ರ ವರಸ ಕೆನರಾ ಬ್ಯಾಂಕಾಚೆ ಬಂದರ ಬ್ರಾಂಚಾಂತು°, 10 ವರಸ ಫೌಂಡರ್ಸ್ ಬ್ರಾಂಚಾಂತು° ಆನಿ ಹೇರ ಬ್ರಾಂಚಾಂತು° ಸೇವಾ ದಿಲೆಲೆ ಹಾಂನಿ° ಮಂಗಳೂರು ಸರ್ಕಲ್ ಆಫೀಸಾಂತು° ಡಿವಿಜನ್ ಮ್ಯಾನೇಜರ್ ಜಾವನು ನಿವೃತ್ತ ಜಾಲೆಲೆ.

ನಿವೃತ್ತ ಜಾತರಿ ಹೈದರಾಬಾದಾಂತು° ತಾಂಗೆಲೊ ಪೂತು ಪ್ರಕಾಶ ಪೈನ ಸಾಂಬಾಳನು ಹಾಡಲೆಲಿ ಪುಝುಲೋನಾ ಕಂಪನಿಚೊ ಅಧ್ಯಕ್ಷ ಜಾಲೆಲೆ ಹಾಂಗೆಲೆ ಮಾರ್ಗದರ್ಶನಾರಿ ವಾಡಿಲಿ ಕಂಪನಿ ಆಜಿ ಅತ್ಯುನ್ನತ ಸ್ಥರಾಕ ಪಾವಿಲಿ ಆಸಾ. ಸಮಾಜ ಸೇವಾ ಮನೋಭಾವ ಆಸಚೆ ಹಾಂಗೆಲೆ ಮುಖೇಲಪಣಾರಿ ಹಾಂಗೆಲೆ ಕುಟುಂಬೆಚೆ ತರಪೇನ ವಾರಂಗಲಾಂತು° ಜ್ಯೂನಿಯರ್ ಕಾಲೇಜ ಸುತಾ ಶುರು ಜಾಲಾ°.

ಜಿ. ಎಸ್. ಬಿ ಸಮಾಜಾಚೆ ಬದಲ ವಿಶೇಷ ಕಾಳಜಿ ಆಶಿಲೆ ಹಾಂನಿ° ಸಾರಸ್ವತ ಮಠಾಂಕ, ಸಮಾಜಾಕ ಆನೀ ಹೇರ ರೂಪಾರಿ ಖೂಬ ದಾನ ಧರ್ಮ ಕೆಲೆಲೆ ಆಸಾ. ಪ್ರಕಾಶ ಪೈ ಆನಿ ಅನಂತ ಪೈ ಸಹಿತ ತೀನ ಪೂತ ಆನಿ ಎಕ ದ್ಹುವೆಕ ಸೋಡೂನ ತಾಂನಿ° ಗೆಲ್ಯಾಂತಿ. ಆಜಿ (ಜುಲೈ 8) ಸಕಾಳಿ 10 ಗಂಟ್ಯಾಕ ತಾಂಗೆಲೊ ಅಂತ್ಯ ಸಂಸ್ಕಾರ ಚಲೊ.

ಆಮಗೆಲೆ ತರನಾಟೆನಿ ಉದ್ಯಮಶೀಲ ಜಾವಕಾ ಆನಿ ಸ್ವಂತ ಉದ್ಯಮ ಸ್ಥಾಪನಾ ಕರಕಾ ಮ್ಹಣು ತಾಂಗೆಲೆ ಸೋಪನ ಜಾವನು ಆಸಾ.

ಕಾಣಕೋಣ: ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಲಿ ಮಠಾಚೆ 23ವೆ° ಪೀಠಾಧಿಪತಿ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಶ್ರೀಪಾದ ವಡೇರ ಸ್ವಾಮೀಜಿ ಹಾಂಗೆಲಿ ಪ್ರಥಮ ಪುಣ್ಯತಿಥಿ ಆಚರಣ ಗೊಂಯಚೆ ಪರ್ತಗಾಲಿಚೆ ಮೂಳ ಮಠಾಂತು° ಆಜಿ (ಜುಲೈ 8) ಶುರು ಜಾಲಿ. ಸಾಬಾರ 54 ವರಸ° ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಕ ಶಿಸ್ತು, ಆದ್ಯಾತ್ಮಿಕತಾ, ಸಮಾಜ ಸೇವಾ ಆನೀ ಹೇರ ವಿಷಯಾರಿ ಮಾರ್ಗದರ್ಶನ ದಿಲೆಲೆ ಗುರುವರ್ಯಾಂಕ ದೇಶ ವಿದೇಶಾಂತು° ಶಿಷ್ಯವರ್ಗಾಚೆ ಆಸಾತಿ.

ಜು. 8ಕ ಸಕಾಳಿ 5.30ಕ ನಿರ್ಮಲ ವಿಸರ್ಜನ ಕರನು ಪ್ರಸ್ತುತ ಮಠಾಧೀಶ ಶ್ರೀಮದ್ ವಿದ್ಯಾಧೀಶ ತೀರ್ಥ ಸ್ವಾಮೀಜಿ ಹಾಂನಿ° ವೆಗವೆಗಳೆ ಧಾರ್ಮಿಕ ಕಾರ್ಯಕ್ರಮಾಂಕ ಚಾಲನ ದಿಲೆ°. ಹ್ಯಾಚ ಸಂದರ್ಭಾರಿ ಗುರುವರ್ಯಾನಿ ನವೀನ ಜಾವನು ಬಾಂದಿಲೆ° ವಸತಿ ಕೂಡಾಂಚೆ° ಉಗ್ತಾವಣ ಕೆಲೆ°. ಹ್ಯಾ ತೀನ ದೀವಸಾಂತು° ವ್ಹಿಂಗವ್ಹಿಂಗಡ ರಾಜ್ಯಾಚೆ ಭಜನಾ ಮಂಡಳಿಚಾನಿ ಭಜನ ಸೇವಾ ದಿಲಿ.

ಹ್ಯಾ ನಂತಾ° ಶಿರಾಲಿಚೆ ಶ್ರೀದೇವಿ ಭಟ್ ಆನಿ ಮಂಜೇಶ್ವರಚೆ ಶಾಂತೇರಿ ಕಾಮತ ಆನೀ ಪಂಗಡಾಚೆ ಭಜನಾಮೃತ ಕಾರ್ಯಕ್ರಮ, ರಘುನಂದನ ಭಟ್ ಬೆಂಗಳೂರು ಆನಿ ಅಕ್ಷಯ ನಾಯಕ ಗೋಂಯ ಹಾಂಗೆಲೆ ಫ್ಯೂಷನ್ ಸಂಗೀತಾಚೆ ಕಾರ್ಯಕ್ರಮ. ಆನಂದ ಭಟೇ ಆನಿ ರಾಹುಲ ದೇಶಪಾಂಡೆ ಹಾಂಗೆಲಿ ಅಭಂಗವಾಣಿ ಆನಿ ನಾಟ್ಯ ಸಂಗೀತ ಜುಗಲಬಂದಿ ಆನೀ ವಿಲಾಸ ನಾಯಕ ಬೆಂಗಳೂರು ಹಾಂಗೆಲೆ ಲೈವ್ ಚಿತ್ರಕಲಾ ಪ್ರದರ್ಶನ ಚಲಚೆ ಆಸಾ.

ಜುಲೈ 9ಕ ಸ್ವಾಮಿ ವಿದ್ಯಾಧೀರಾಜ ಭವನಾಚೆ ಉಗ್ತಾವಣ, ಗುರುವರ್ಯಾಲೆ ವೃಂದಾವನಾಂತು° ಮುಖ್ಯಪ್ರಾಣ ವಿಗ್ರಹ ಪ್ರತಿಷ್ಠಾಪನಾ ಚಲಚೆ° ಆಸಾ. ದೋನಪಾರ 3.00 ಗಂಟ್ಯಾಕ ಜೀವೋತ್ತಮ ಸಭಾಮಂಟಪಾಂತು° ಸಭಾ ಕಾರ್ಯಕ್ರಮ ಚಲಚೊ ಆಸಾ. ದೇಶ ವಿದೇಶಾ ದಾಕೂನ ಆಯಿಲೆ ಶಿಷ್ಯ ವರ್ಗಾಚೆ ಲೋಕ ಗೋಂಯಚೆ ವೆಗವೆಗಳೆ ದೇವಳಾಂತು° ಆಸೂನ ಹ್ಯಾ ತೀನ ದೀವಸಾಚೆ ಕಾರ್ಯಕ್ರಮಾಂತು ವಾಂಟೊ ಗೆತಾ ಆಸಾತಿ.  

ಮಂಗಳೂರು: ಪೊರನೆ ಮಂಗಳೂರಚಿ ಸಹೃದಯಿ ಸ್ತ್ತ್ರೀ , ದೇಶಾಚೆ ವೆಗವೆಗಳೆ ಪ್ರದೇಶಾಂತು° ನಾವಾದೀಕ ಜಾವನು, ಸಗಟಾಲೊ ಮೋಗು ಆನಿ ಗೌರವ ಜೋಡಿಲಿ, ಮುಂಬಯಿοತು° ವಿವಾಸ ಕರನು ಸಮಾಜಾಕ ಭರಪೂರ ದೇಣೆ ದಿಲೆಲಿ ಸಾವಿತ್ರಿ ರಮೇಶ ಬಾಬುಲಕರ್ ಆಲಿಯಾಸ್ ಉದ್ಯಾವರ್ (1936-2022) 86 ವರಸ ಪ್ರಾಯೇರಿ ಜೂನ್ 5, 2022ಕ ದೋನಪಾರಾ ದೇವಾದಿನ ಜಾಲಿ. ಸಾಂತಾಕ್ರೂಜ್ ವೆಸ್ಟ್ ಹಾಂಗಾ ತಿಗೆಲೊ ಅಂತ್ಯ ಸಂಸ್ಕಾರ ತ್ಯಾಚಿ ದಿವಸು ಚಲೊ. ತಿಗೆಲೆ ಲಾಗಶಿಚೆ ಸಂಭοದಿ ಆನೀ ಇಷ್ಟ ಲೋಕ ಉಪಸ್ಥಿತ ಆಶಿಲೆ.

1936 ಇಸವಿಂತು° ಜಲ್ಮಾಕ ಆಯಿಲಿ ಸಾವಿತ್ರಿ ಉದ್ಯಾವರ ಯು. ಭಾಸ್ಕರ್ ರಾವ್ (ಮುಂಬಯಿοತು° ಟೈಮ್ಸ್ ಆಫ್ ಇಂಡಿಯಾಚೊ ಸಬ್ ಎಡಿಟರ್) ಹಾಂಗೆಲಿ ದ್ಹುವ ಆನಿ ಯೋಧಾ ದೇವಾದಿನ ರಮೇಶ ಬಾಬುಲಕರ್ ಹಾಂಗೆಲಿ ಬಾಯಲ ಜಾವನು ಆಸಾ. ನಿವೃತ್ತಿ ನಂತರ ಮುಂಬಯಿಕ ಆಯಿಲೊ ರಮೇಶ ಬಾಬುಲಕರ್ ಹಾಂಗೆಲೆ ದೇಹಾಂತ್ಯ 2010 ಇಸವಿಂತು° ಜಾಲೆ°.

ಸಾವಿತ್ರಿಲೆ ಸಾನಪಣೆಕ ಗೆಲ್ಯಾರಿ ತಿಗೆಲೆ ಪದವಿ ಶಿಕ್ಷಣ ಮಂಗಳೂರಚೆ ಸೇಂಟ್ ಆಗ್ನೇಸ್ ಕಾಲೇಜಾಂತು°(1958) ಆನಿ ಪದವಿಯೋತ್ತರ ಶಿಕ್ಷಣ ಮುಂಬಯಿಚೆ ಸೇಂಟ್ ಕ್ಸೇವಿಯರ್ ಕಾಲೇಜಾಂತು° (1960) ಜಾಲೆ°. ಉಪರಾಂತ ತಿಣೇ 1978 ಇಸವಿಂತು° ಮುಂಬಯಿಚೆ ಸೇಂಟ್ ಥೆರೆಸಾ ಕಾಲೇಜಾಂತು° ಬಿ. ಎಡ್ ಪದವಿ ಪ್ರಾಪ್ತ ಕೆಲಿ. ಎಕ ಯೋಧಾಲಿ ಬಾಯಲ ಜಾಲೆಲ್ಯಾನ ತಿಣೇ ದೇಶಾಚೆ ವ್ಹಿಂಗವ್ಹಿοಗಡ ಸೇನಾ ಪ್ರದೇಶಾಂತು° ಜೀವನ ಕರಚೆ° ಜಾಲೆ°. ತ್ಯಾ ದೆಕೂನ ಅಸ್ಸಾಂಚೆ ಜೋರಟ್ ಪ್ರದೇಶ ಆನಿ ಅಹಮದಾಬಾದಾಚೆ ಮೌಂಟ್ ಕಾರ್ಮೆಲ್ ಶಾಲೆಂತು° ವಿದ್ಯಾರ್ಥಿಯಾಲಿ ಮೋಗಾಚಿ ಶಿಕ್ಷಕಿ ತಿ ಜಾಲಿ. ತೀಣೆ ಮಂಗಳೂರಚೆ ಗಣಪತಿ ಜ್ಯೂನಿಯುರ್ ಕಾಲೇಜಾಚಿ ಪ್ರಥಮ ಪ್ರಾಂಶುಪಾಲಾ ಜಾವನು ಸೇವಾ ದಿಲೆಲೆ° ವಿಶೇಷ ಆಸಾ. ಮುಂಬಯಿοತು° ತಿಣೇ ಲಾರೇನ್ಸ್ ಸ್ಕೂಲ್, ಸಾಂತಾಕ್ರೂಜ್, ಆರ್ಯಾ ವಿದ್ಯಾ ಮಂದಿರ, ಸಾಂತಾಕ್ರೂಜ್, ಎಸ್. ವಿ. ಟಿ ಕಾಲೇಜ್(ಎಸ್. ಎನ್. ಡಿ. ಟಿ. ಸಾಂತಾಕ್ರೂಜ್ ಹಾಜೊ ಶಾಖಾ) ಹಾಂಗಾಯಿ ಸೇವಾ ದಿಲೆಲಿ ಆಸಾ.
ತ್ಯಾ ನಂತಾ° ತಿಣೇ ವುಮನ್ಸ್ ಇರಾ, ಫೇಮಿನಾ, ವಿ, ಇವ್ಸ್ ವೀಕ್ಲಿ, ಮಿಡ್ ಡೇ ಆನಿ ಟೈಮ್ಸಾ ಖಾತಿರ ಮಿಡಿಸ್ ಅಂಕಣ(ಸಾಮಾನ್ಯ ಲೋಕಾಂಕ ಇಷ್ಟ ಜಾವಚೆ ವಿಷಯ) ಬರಯಿಲೆ ಆಸಾ. ಹೆ° ಸೋಡೂನ ಆನಿ ಇತಲೆ ವಿಷಯಾರಿ ತೀಕಾ ಉಮೇದಿ ಆಶಿಲಿ. ರಂಗಭೂಮಿ, ಭಾಷಣಕಲಾ, ಭಾರತೀಯ ಆನಿ ಪಾಶ್ಚಾತ್ಯ ಲಘು ಸಂಗೀತ, ಯೋಗಾ, ಮುದ್ರಾ ಆನೀ ಹೇರ ವಿಷಯಾರಿ ತೀ ಉಮೇದಿ ದವರೂನ ಆಶಿಲಿ.

ಬ್ಹಾಮುಣು ದೇವಾದಿನ ಕರ್ನಲ್ ರಮೇಶ ಬಾಬುಲಕರ್ ಹಿಗೆಲೊ ಆದರ್ಶ ಆಶಿಲೊ. ಪೂತು ವಿಕ್ರಂ, ದ್ಹುವ ವಿನಿತಾ ತಿಗೆಲೆ ಮೋಗಾಚೆ ಆಶಿಲೆ. ಜ್ಹಾಂವಯಿ, ಸೂನ ಆನಿ ನಾತ್ರ° ಸಹಿತ ಸಗಳೆ ಕುಟುಂಬೆಚೆ ಮೇಳನು ತಿಗೆಲೆ ಜೀವನಭರ ಆಧಾರ ಸ್ಥಂಬ ಆಶಿಲೆ. ಮುಂಬಯಿοತು° ತೀಣೆ ನಿರಂತರ ಕೆಲೆಲಿ ಸಮಾಜ ಸೇವಾ ಮೋಲಾಧಿಕ ಆನಿ ಆಜಿಕಯಿ ಉಡಗಾಸ ದವರಚಿ ತಸಲಿ° ಆಸಾ.

ವಾಚಕಾಂಕ ತಿಗೆಲಿ ಕೃತಿ ‘ಚೈಲ್ಡ್ ಹುಡ್ ಡೈಜ್” ವಾಚಿಲೊ ಆನಂದ ಉಡಗಾಸ ಜಾತಲೊ. ಸಾಬಾರ ಲೋಕಾಂಕ ಆವಡಲೆಲಿ ಹ್ಯಾ ಕೃತಿಚಿ ಖೂಬ ಪ್ರತಿಯೊ ವಿಕೂನ ಗೆಲ್ಯಾಂತಿ. ವೆಗವೆಗಳೆ ಮಾಧ್ಯಮಾಂತು° ಬರಯಿಲೆ ಹಿಗೆಲಿ ಹೀ ಕೃತಿ ಆರತಾ° ಕನ್ನಡ ಭಾಶೆಕ “ಬಾಲ್ಯತನದ ಮಾಯಾಜಾಲಾ” ಮ್ಹಣು ಭಾಶಾಂತರ ಜಾಲ್ಯಾ. ಸಾವಿತ್ರಿ ಹಾಂಕಾ ಲಾಗಿ ದಾಕೂನ ವಳಕತಲಿ ಮುಂಬಯಚಿ ಶ್ಯಾಮಲಾ ಮಾಧವಾನ ಹೆ° ಅಣಕಾರ ಕೆಲಾ°.

ದುರದೃಷ್ಟಾವಶಾತ “ಚೈಲ್ಡಹುಡ್ ಡೈಜ್” ಹಾಜೆ° ದುಸ್ರೆ° ಮುದ್ರಣ ಪಳೊವಚೆ° ಪಯಲೆಂಚಿ ಸಾವಿತ್ರಿ ಹಾಂಗೆಲೆ° ದೇಹಾಂತ್ಯ ಜಾಲಾ°. ಸಾವಿತ್ರಿ ಹಾಂಗೆಲೆ° ಚಾಂಗಪಣ ಆಟೋವನು ಪ್ರಶಂಶಾ ಕರಚಾಕ ಹೋ ಬರೊ ಅವಕಾಶ ಆಸಾ.

ದೇವು ತಿಗೆಲೆ ಆತ್ಮಾಕ ಚಿರಶಾಂತಿ ದೀವೊ ಮ್ಹಣು ಮಾಘೂಯಾ°.

ಆοಗ್ಲ ಮೂಳ: ಐವಾನ್ ಸಲ್ದಾನಾ - ಶೇಟ್, ಸೆಕ್ಯೂಲರ್ ಸಿಟಿಜನ್.
ಕೊಂಕಣಿ ಅಣಕಾರ – ವೆಂಕಟೇಶ ಬಾಳಿಗಾ ಮಾವಿನಕುರ್ವೆ