ಬೆಂಗಳೂರು: ಮೂಳಾವೆ ದಾಕೂನ ಉಡುಪಿ ಜಿಲ್ಲೆಚಿ ಆತ° ಬೆಂಗಳೂರಾoತು ವಾಸ ಕರನು ಆಸಚಿ ಕರ್ನಾಟಕ ಪಬ್ಲಿಕ್ ಶಾಲಾ, ಮಲ್ಲೇಶ್ವರಂ ಹಾಂಗಾಚಿ ವಿದ್ಯಾರ್ಥಿನಿ ನಂದಿತಾ ನಾಯಕ್ ಹೀಣೆ ಆರತಾ° ಚಲೆಲೆ ಎಸ್. ಎಸ್. ಎಲ್. ಸಿ ಪರೀಕ್ಷೆಂತು° 619/625 ಅಂಕ ಜೋಡೂನ ಬೆಂಗಳೂರು ಉತ್ತರ ಜಿಲ್ಲೆಕ ಪಯಲೆ° ರ‍್ಯಾಂಕ್ ಫಾವೊ ಕೆಲಾ°.
ಬೆಂಗಳೂರಾಚೆ ಚಿಕ್ಕ ಬಾಣಾವರಾಚೆ ಲಾಗಿ ಗಾಣಿಗ ಹಳ್ಳಿಂತು° ನಿವಾಸ ಕರನು ಆಸಚೆ ಅಟೋ ಚಾಲಕ ಮಂಜುನಾಥ ನಾಯಕ ಆನಿ ಬೆಂಗಳೂರಾoತುಚಿ ಸಿಲ್ವರಸ್ಪ್ರಿಂಗ್ ಇಂಟರನ್ಯಾಶನಲ್ ಶಾಳೆಂತು° ಕೇರ್ ಟೇಕರ್ ಜಾವನು ಆಸಚಿ ವೀಣಾ ನಾಯಕ ಹಾಂಗೆಲಿ ದ್ಹಾಕಲಿ ದ್ಹುವ ಜಾವನು ಆಸಚಿ ನಂದಿತಾ ಸಾನಪಣೆ ದಾಕೂನೂಚಿ ಶೀಖವಣೆಂತು° ಮುಕಾರ ಆಶಿಲಿ ಮ್ಹಣು ತಿಗೆಲಿ ಆವಸು ಸಾಂಗತಾ. ಹ್ಯಾ ದಂಪತಿಲಿ ಮ್ಹಾಲ್ಗಡಿ ದ್ಹುವ ನಂದಿನಿ ಬೆಂಗಳೂರಾoತುಚಿ ಬಿ. ಅರ್. ಅಂಬೇಡ್ಕರ್ ಇಂಜಿನಿಯರಿoಗ್ ಕಾಲೇಜಾಂತು° ಇ. ಸಿ. ವಿದ್ಯಾಭ್ಯಾಸ ಕರತ ಆಸಾ.

ನಂದಿತಾನ ತಿಗೆಲೆ ಮುಳಾವೆ ಶಿಕ್ಷಣ ಬೆಂಗಳೂರಚೆ ಎಕ ಖಾಸಗಿ ಶಾಳೆಂತು° ರೈಟ್ ಟೂ ಎಜುಕೇಶನ್ ವಾಪರೂನ ಕೆಲೆ° ಮ್ಹಣು ತಿ ಸಾಂಗತಾ. ಘರಾಂತ ಆಸಚೆ ಕಷ್ಟಚೀ ತೀಕಾ ಬರೆ° ಶಿಕ್ಷಣ ಫಾವೊ ಕರೂಂಕ ಪ್ರೇರಣ ಮ್ಹಣೂಯಿ ತಿ ಸಾಂಗತಾ. ಪಿ.ಯು.ಸಿತು° ಪಿ.ಸಿ.ಎಂ.ಬಿ ಕರನು ಉಪರಾಂತ ಬಾಯೊಟೆಕ್ ಇಂಜಿನಿಯರಿoಗ್ ಜಾತರಿ ಯು.ಪಿ.ಎಸ್.ಸಿ ಪರೀಕ್ಷಾ ಬರೋವಚೆ ಸೋಪನ ತಿಗೆಲೆ° ಜಾವನು ಆಸಾ. ಜೀವನಾಂತು° ಸಫಲತಾ ಫಾವೊ ಕರನು ವ್ಹಡಿಲಾಂಕ ಸಂತೋಷ ದಿವಕಾ ಮ್ಹಳೆಲೆ° ತಿಗೆಲೆ° ಲಕ್ಷ್ಯ ಜಾವನು ಆಸಾ ಮ್ಹಣು ತಿ ಸಾಂಗತಾ.
ಬೆಂಗಳೂರಾoತು° ತೀಣೆ ಶಿಕ್ಷಣ ಪಾವೊ ಕರಚೆ ಶಾಳೆಂತು° ಬೆಂಗಳೂರು ಮಲ್ಲೇಶ್ವರಂಚೆ ಗೌಡ ಸಾರಸ್ವತ ಸೇವಕ ಸಮಾಜ ಹಾಂನಿ° ಆನ್ನದಾನ ಸೇವಾ ಕರತ ಆಸಾತಿ ಆನಿ ತಂಯಚೆ ವಾಂಗಡಿoಕ ಹಿಗೆಲೆ ಸಾಧನಾ ಬದಲ ಕಳನು ತಿಕಾ ತಾಂಗೆಲೆ ದಫ್ತರಾಕ ಅಧ್ಯಕ್ಷ ಜಿ. ಜಿ. ಶೆಣೈ ಹಾಂನಿ° ಆಪಯಲಾ° ಮ್ಹಣು ತಿಣೆ ಕಳಯಲಾ°.

To Support Kodial Khaber click the following button.

ಬೆಂಗಳೂರು: ಶ್ರೀ ಕಾಶಿಮಠಾಧೀಶ ಶ್ರೀಮದ್ ಸಂಯಮೀoಧ್ರ ತೀರ್ಥ ಸ್ವಾಮೀಜಿ ಹಾಂಗೆಲೆ ಚಾತುರ್ಮಾಸ್ಯ ವೃತಾಚಾರಾಣೆಚೆ ಸಂದರ್ಭಾರಿ ಹಾಂಗಾಚೆ ಮಲ್ಲೆಶ್ವರಂಚೆ ಶ್ರೀ ಕಾಶಿ ಮಠಾಂತು° ಮಂಗಳೂರಚೆ ಸಾಧನಾ ಬಳಗ ಹಾಂನಿ° ಕೊಂಕಣಿ ಹಾಸ್ಯಮಯ ನಾಟಕ "ಘೊಟಾಳೊ" ಖೆಳತಾತಿ ಮ್ಹಣು ಕಳವಣಿಂತು° ಸಾಂಗಲಾ°. ಹ್ಯಾ ನಾಟಕಾಚೆ ರಚನಾ ಆನಿ ನಿರ್ದೇಶನ ಯು. ಪ್ರಕಾಶ ಶೆಣೈ ಹಾಂನಿ° ಕೆಲಾ°. ಉಜ್ವಾಡು ಆನಿ ರಂಗ ಸಜ್ಜಿಕಾ ಕೋಣಿ ಶೇಷಗಿರಿ ನಾಯಕ ಆನಿ ದೀಪಕ ಕಾಮತ ಹಾಂನಿ° ಸಾಂಬಾಳಾ°. ಸಂಗೀತ ಆನಿ ಸೌಂಡ್ ರಕ್ಷಾ ರಾವ್ ಆನಿ ಭಾವನಾ ಪ್ರಭು, ತಾಂತ್ರಿಕ ಸಹಕಾರ ಗಣೇಶ ಭಟ್ ಕೊಡಿಕಲ್ ಆನಿ ಯೋಗಿಷ ಪೈ, ಪ್ರಸಾದನ ಎ. ಪ್ರಕಾಶ ನಾಯಕ ಹಾಂನಿ° ಸಾಂಬಾಳಾ°. ಪಾತ್ರವರ್ಗಾಂತು° ಎ. ಪ್ರಕಾಶ ನಾಯಕ, ಮರೋಳಿ ಸಬಿತಾ ಕಾಮತ, ಪುಷ್ಪಲತಾ ಭಟ್, ಎನ್. ಕೃಷ್ಣ ಕಾಮತ, ಸುನಿತಾ ಎಂ. ಪೈ, ಗಜಾನನ ಶೆಣೈ ಎಂ. ಮಂಜುನಾಥ ಕಾಮತ, ಪಂಡರಿನಾಥ ಪ್ರಭು, ಸಬಿತಾ ರಾವ್, ಅಪೂರ್ವಾ ಕಿಣಿ ಆನಿ ಬೇಬಿ ಅಕ್ಷರ ಕಿಣಿ ಆಸಾತಿ. 'ಘೊಟಾಳೊ' ನಾಟಕಾಚೊ ಹೊ ಇಕ್ರಾಂವೊ ಪ್ರಯೋಗ ಜಾವನು ಆಸಾ ಮ್ಹಣು ಕಳವಣಿ ಸಾಂಗತಾ.

ಬೆಂಗಳೂರು: ಹಾಂಗಾಚೆ ಮಲ್ಲೇಶ್ವರಂಚೆ ಕಾಶಿಮಠಾಂತ ಚಲತ ಆಸಚೆ ಶ್ರೀ ಕಾಶಿಮಠಾಧಿಪತಿ ಶ್ರೀಮದ್ ಸಂಯಮಿಂದ್ರ ತೀರ್ಥ ಸ್ವಾಮೀಜಿ ಹಾಂಗೆಲೆ ಚಾತುರ್ಮಾಸ ಸಂದರ್ಭಾರಿ ಶನಿವಾರ, ಅಕ್ಟೋಬರ್ 14, 2023 ದಿವಸು ಮುಂಬಯಿಚೆ 'ಆಮ್ಮಿ ರಂಗಕರ್ಮಿ' ಹಾಂನಿ° ಕೊಂಕಣಿ ಹಾಸ್ಯ ಪ್ರಧಾನ, ಸಂಗೀತ ನಾಟಕ 'ಲಗ್ನಾ ಪಿಶೆ°' ಪ್ರಸ್ತುತ ಕರತಾ ಆಸಾತಿ. ಹ್ಯಾ ನಾಟಕ ಬಾಲಕೃಷ್ಣ ಪುರಾಣಿಕ್, ಕಾಸರಕೊಡ್ ಹಾಂನಿ° ಬರೋವನು ಲಿಮ್ಕಾ ಬುಕ್ಕ್ ಆಫ್ ರೆಕಾರ್ಡ್ಸ ಖ್ಯಾತಿ ಪಾವಿಲೊ ಡಾ. ಚಂದ್ರಶೇಕರ ಶೆಣೈ ಹಾಂನಿ° ನಿರ್ದೇಶನ ಕೆಲಾಂ. ಹ್ಯಾ ನಾಟಕಾಂತು ಮುಂಬಯಿಚೆ ನಾವಾದೀಕ ಕಲಾಕಾರ ಕಮಲಾಕ್ಷ ಸರಾಫ್, ಹರೀಶ್ ಚಂದಾವರ್, ತೋನ್ಸೆ ವೆಂಕಟೇಶ ಶೆಣೈ, ಅಕ್ಷತಾ ಕಾಮತ್, ಪ್ರಮೋದ್ ಮಲ್ಯ ಆನಿ ಹೇರ ಕಲಾಕಾರ ಅಭಿನಯ ಕರತಲೆ. ಕೃಷ್ಣ ಚಂದಾವರ್ ಸಂಗೀತ ನಿರ್ದೇಶಕ ಆಸಾತಿ.

ಬೆಂಗಳೂರು: ಗೌಡ ಸಾರಸ್ವತ ಸೇವಕ ಸಮಾಜ ಚ್ಯಾರಿಟೇಬಲ್ ಫೌಂಡೆಶನ್ ಹಾಂನಿ° ಆರತಾ° "ಅನ್ನದಾತಾ ಸುಖಿಭವ ಸೇವಾ" ಶುರು ಕೆಲೆಲಿ ಆಸಾ. ಹ್ಯಾ ಯೋಜನೆಚೆ ಸಕಳ ಮಲ್ಲೇಶ್ವರಂಚೆ ಸರಕಾರಿ ಪಿ. ಯು. ಕಾಲೇಜಾಚೆ ವಿದ್ಯಾರ್ಥಿನಿಯಾಂಕ ಸಕಾಳಿಚೊ ಫಳಾರಾಚಿ ಸೇವಾ ಶುರು ಕೆಲಿ. ಆ. 2ಕ ಸಕಾಳಿ 9 ಗಂಟ್ಯಾಕ ಶಾಸಕ ಆನಿ ಆದಲೊ ಉಪ ಮುಖ್ಯಮಂತ್ರಿ ಡಾ| ಸಿ. ಎನ್. ಅಶ್ವಥ ನಾರಾಯಣ ಹಾಂನಿ° ಹ್ಯಾ ಯೋಜನೆಚೆ ಉಗ್ತಾವಣ ಕೆಲೆ°. ಜಿ.ಎಸ್.ಎಸ್.ಎಸ್. ಚ್ಯಾರಿಟೆಬಲ್ ಫೌಂಡೆಶನ್ ಹಾಜೊ ಅಧ್ಯಕ್ಷ ಜಿ. ಜಿ. ಶೆಣೈ, ಉಪಾಧ್ಯಕ್ಷ ಶರತಚಂದ್ರ ಬಾಳಿಗಾ ಆನೀ ಪ್ರಕಾಶ ಕಿಣಿ, ಕಾರ್ಯದರ್ಶಿ ಗಣೇಶ ನಾಯಕ, ಡಿ.ಇ.ಓ ರಂಗನಾಥ ಆನೀ ಹೇರ ಉಪಸ್ಥಿತ ಆಶಿಲೆ. ಸಾಬಾರ ದೊನಶೆ ವಿದ್ಯಾರ್ಥಿಯಾಂಕ ಕೆದನಾಯಿ ಸಕಾಳಿಚೊ ಫಳಾರ ವಾಂಟಚೆ° ಕರತಾತಿ ಮ್ಹಣು ಜಿ. ಜಿ. ಶೆಣೈ ಹಾಂನಿ° ಹ್ಯಾ ವೇಳಾರ ಕಳಯಲೆ°.

 ಗೌಡ ಸಾರಸ್ವತ ಸೇವಕ ಸಮಾಜ ಚ್ಯಾರಿಟೇಬಲ್ ಫೌಂಡೆಶನ್ ಹಾಜೆ ಘಟನಾ ಮಲ್ಲೇಶ್ವರಂಚೆ ಗೌಡ ಸಾರಸ್ವತ ಸೇವಕ ಸಮಾಜ ಹಾಂನಿ° 2008 ವರಸಾಚೆ ಫೆ. 13ಕ ಕೆಲೆಲೆ°. ಸಮಾಜಾಂತ ಆಸಚೆ ಆರ್ಥಿಕ ಜಾವನು ಅಶಕ್ತ ಲೋಕಾಂಕ ಸೇವಾ ದಿವಚೆ ನದರೇನ ಶುರು ಜಾಲೆಲೆ ಹ್ಯಾ ಸಂಸ್ಥೆನ ಮಾಕ್ಷಿಚೆ ಎಕ ದಶಕಾಂತ ಖೂಬ ಲೋಕಾಂಕ ವಿದ್ಯಾರ್ಥಿ ವೇತನ ದಿವಚೆ° ಆನಿ ವೈದ್ಯಕೀಯ ಮದದ ಕರಚೆ° ಕೆಲಾ°. ದಾನಿ ಲೋಕಾಲ ಮದದ ಘೆವನು "ಸಿನಿಯರ್ ಸಿಟಿಜನ್ ಎನ್ಕ್ಲೇವ್" ಯೋಜನಾ ಹಾಂನಿ ಘಾಲೆಲಿ ಆಸಾ.

ಉಡುಪಿ: ಕಾಶೀ ಮಠಾಧೀಶ ಶ್ರೀಮದ್ ಸಂಯಮಿಂದ್ರ ತೀರ್ಥ ಸ್ವಾಮೀಜಿ ಹಾಂನಿº ಜನವರಿ 7 ಶುಕ್ರವಾರ ಪಯಲೆº ಪಾವಟಿ ಬೆಂಗಳೂರು ಪೂರ್ಣಪ್ರಜ್ಞ ವಿದ್ಯಾಪೀಠಾಕ ಭೇಟಿ ದಿಲಿ. ಶ್ರೀ ಕೃಷ್ಣಾಲೆº ದರ್ಶನ, ಶ್ರೀ ವಿಶ್ವೇಶತೀರ್ಥ ಶ್ರೀಪಾದ ಹಾಂಗೆಲೆº ವೃಂದಾವನಾಚೆ ದರ್ಶನ ಘೆತರಿ ವಿದ್ಯಾಪೀಠಾಚೆ ಸಂಶೋಧನ ಕೇಂದ್ರಾಕ ಭೇಟಿ ದೀವನು ವಿದ್ಯಾರ್ಥಿಯಾಂಕ ಸಂದೇಶ ದಿಲೊ. ಪೇಜಾವರ ಶ್ರೀ ವಿಶ್ವಪ್ರಸನ್ನ ತೀರ್ಥ ಶ್ರೀಪಾದ ಹಾಂನಿº ಗುರುವರ್ಯಾಲೆ ಭೇಟಿ ಬದಲೊ ಸಂತೋಸ ವ್ಯಕ್ತ ಕೆಲೊ ಆನಿ ಶಾಲ ಪಾಂಗರೂನ ಸನ್ಮಾನ ಕೆಲೊ.. ಗುರುವರ್ಯಾನಯೀ ಪೇಜಾವರ ಶ್ರೀಂಕ ಗೌರವಾರ್ಪಣ ಕೆಲೆº. ವಿದ್ಯಾಪೀಠಾಚೆ ವಿದ್ವಾಂಸ ಲೋಕಾನ ಕಾಶೀ ಮಠಾಧೀಶಾಂಕ ಸಾಂಪ್ರದಾಯಿಕ ಗೌರವ ದಿವನು ಸ್ವಾಗತ ಕೆಲೆº.

ಬೆಂಗಳೂರು: ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜ ಅನಾದಿ ಕಾಳಾ ದಾಕೂನ ಶ್ರೇಷ್ಠ ಮ್ಹಣೂನ ಘೆವಚಾಕ ಪ್ರಮುಖ ಕಾರಣ ಮ್ಹಳ್ಯಾರಿ ಆಮಕಾ ದೇವಾರ ಆಸಚೊ ವಿಶ್ವಾಸ, ಚಲನು ಆಯಿಲಿ ವಾಟ, ರೀತಿ ರಿವಾಜ, ಧರ್ಮಾಚೆ ಅಧ್ಯಯನ ಮ್ಹಣು ಸಾಂಗಲ್ಯಾರಿ ಖಾಂಯ ಚೂಕಿ ಜಾಯನಾ. ಮಠ ಪರಂಪರಾ, ಇಷ್ಠ ದೇವು, ಗ್ರಾಮ ದೇವು ಅಶಿ° ಮಾನೂನ ಆಯಿಲೆ ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಂತು° ವಿದ್ವತ್ ಊಣೆ ಜಾತಾ ಆಸಾ ಮ್ಹಳೆಲಿ ಭಾವನಾ ಯೆತಾ ಆಸತನಾ ತೀಸ ವರಸಾಚೆ ಬ್ರಹ್ಮಾವರ ರಾಮಕೃಷ್ಣ ಭಟ್ ಹಾಂನಿ° “ಶ್ರೀಮನ್‌ನ್ಯಾಯಸುಧಾ” ಹಾಜೆಂ ಮಂಗಲ ಕರನು ಸಮಾಜಾಚಿ ಭರಮ ವಾಡಯಲ್ಯಾ.  

ಉಡುಪಿ ಪೇಜಾವರ ಮಠಾಚೆ ಪೂರ್ಣಪ್ರಜ್ಞ ವಿದ್ಯಾಪೀಠ, ಬೆಂಗಳೂರು ಹಾಂಗಾ ಇಕ್ರ ವರಸ ದಾಕೂನ ವ್ಯಾಕರಣ, ನ್ಯಾಯ ಆನೀ ವೇದಾಂತ ಶಾಸ್ತ್ರಾಂಚೆ  ಅಧ್ಯಯನ ಕೆಲೆಲೆ ಹಾಂಕಾ° ಪೇಜಾವರ ಮಠಾಚೆ ಪೀಠಾಧಿಪತಿ ಶ್ರೀಮದ್ ವಿಶ್ವೇಶ ತೀರ್ಥ ಸ್ವಾಮೀಜಿ ಆನೀ ಶ್ರೀಮದ್ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ ಹಾಂಗೆಲೆ ಮಾರ್ಗದರ್ಶನ ಮೆಳೆಲೆ° ಆಸಾ. ಆಖೇರಿಚೆ ದೋನ ವರಸಾಂತು° ದೇಡ ವರಸ ಶ್ರೀಮದ್ ವಿಶ್ವೇಶ ತೀರ್ಥ ಸ್ವಾಮೀಜಿ ಹಾಂಗೆಲೆ ಮಾರ್ಗದರ್ಶನಾರಿ ಕಠಿಣ ಅಧ್ಯಯನ ಕೆಲೆಲೆ ಹಾಂನಿ° ಜ. 1ಕ ಬೆಂಗಳೂರಾಂತು° ಚಲೆಲೆ ಪರೀಕ್ಷೆಂತು° ಅತೀ ಉತ್ತಮ ಶ್ರೇಣಿರಿ (ಸಗಟಾ ಪಶಿ ಚಡ ಅಂಕ ಜೋಡೂನ) ಶ್ರೀಮನ್‌ನ್ಯಾಯ ಸುಧಾ ಪರೀಕ್ಷೆಂತು° ಉತ್ತೀರ್ಣ ಜಾಲ್ಯಾಂತಿ°. ಪೇಜಾವರ ಮಠಾಚೆ ಪೀಠಾಧಿಪತಿ ಶ್ರೀಮದ್ ವಿಶ್ವ ಪ್ರಸನ್ನ ತೀರ್ಥ ಸ್ವಾಮೀಜಿ ಆನೀ ಉತ್ತರಾದಿ ಮಠಾಚೆ ಶ್ರೀಮದ್ ಸತ್ಯಾತ್ಮ ತೀರ್ಥ ಸ್ವಾಮೀಜಿ ಹಾಂಗೆಲೆ ಉಪಸ್ಥಿತಿರಿ ಚಲೆಲೆ ಹ್ಯಾ ಪರೀಕ್ಷೆಂತು° ಪಂಡಿತ ಲೋಕಾನ ವಿದ್ಯಾರ್ಥಿಯಾಂಕ ಸವಾಲ ಘಾಲೊ. ಹ್ಯಾ ವಿಶೇಷ ಸಾಧನೆ ಖಾತಿರ ಗುರುವರ್ಯಾನಿ ಹಾಂಕಾ° ಪನ್ನಾಸ ಹಜಾರ ರುಪಯೋ ನಗದ ಇನಾಮ ದಿವನು ಸನ್ಮಾನ ಕೆಲಾ.

ಬ್ರಹ್ಮಾವರ ರಾಮಕೃಷ್ಣ ಭಟ್ ಹಾಂನಿ° 2018 ಇಸವಿಂತು° ಕರ್ನಾಟಕ ಸಂಸ್ಕೃತ ವಿಶ್ವ ವಿದ್ಯಾಲಯಾ ದಾಕೂನ ‘ನವೀನ ನ್ಯಾಯ’ ವಿಷಯಾರಿ ‘ವಿದ್ವಾನ ಮಾಧ್ಯಮ’ (ಬಿ.ಎ.) ಪದವಿ ಫಾವೊ ಕೆಲಿ. 2020 ಇಸವಿಂತು° ‘ನವೀನ ನ್ಯಾಯ’ ವಿಷಯಾರಿ ‘ಆಚಾರ್ಯ’ (ಎಂ.ಎ) ಮಾಸ್ಟರ್ಸ್ ಪದವಿ ಪ್ರಾಪ್ತ ಕೆಲೆಲಿ ಆಸಾ. ಎಂ.ಎ ಪದವಿಚೆ ಸಾಂಗತ ಹಾಂಕಾ ದೋನ ಭಾಂಗರಾ ಪದಕಯೀ ಮೆಳ್ಯಾಂತಿ.

ಹಾಂಗೆಲೆ ಶಿಕ್ಷಣಾಚೆ ವೇಳಾರಿ ಹಾಂನಿ° ಖೂಬ ಹೇರ ಸಾಧನಾಯಿ ಕೆಲೆಲೆ ಆಸಾ. 2015-16 ವರಸಾಂತು° ಕರ್ನಾಟಕ ಸಂಸ್ಕೃತ ವಿಶ್ವ ವಿದ್ಯಾಲಯಾನ ಆಯೋಜನ ಕೆಲೆಲೆ ‘ವೇದಾಂತ ಶಲಕಾ’ಪರೀಕ್ಷೆಂತು° ರಾಜ್ಯ ಸ್ಥರಾರಿ ಪಯಲೆ° ಸ್ಥಾನ, 2016-17 (ಉಡುಪಿ), 2018-19 (ಮೇಲುಕೋಟೆ) ಆನೀ 2019-20 (ಮೈಸೂರು) ತು° ಚಲೆಲೆ ರಾಜ್ಯ ಸ್ಥರಾಚೆ ಸ್ಪರ್ಧೆಂತು° ಹರ ಎಕ ಪಾವಟಿ ಪ್ರಥಮ ಸ್ಥಾನ, 2018-19 ವರಸಾಂತು° ಸೆಂಟ್ರಲ್ ಸಂಸ್ಕೃತ ಯುನಿವರ್ಸಿಟಿ ದೆಹಲಿನ ತ್ರಿಪುರಾಚೆ ಅಗರ್ತಾಲಾಂತು° ಆಯೋಜನ ಕೆಲೆಲೆ ರಾಷ್ಟ್ರೀಯ ಸ್ಥರಾಚೆ ಸ್ಪರ್ಧೆಂತು° ‘ನ್ಯಾಯ ಶಾಸ್ತ್ರ ಭಾಷಣಂ’ವಿಷಯಾಂತು° ಪಯಲೆ° ರೇಂಕ್ ಆನೀ ಭಾಂಗರಾಚೆ ಪದಕ ಫಾವೊ ಕೆಲಾ°.

ಉಡುಪಿ ಜಿಲ್ಲೆಚೆ ಬ್ರಹ್ಮಾವರ ಭಟ್ ಕುಟುಂಬೆಚೆ ಜಾವನು ಆಸಚೆ ಹಾಂಗೆಲೆ ಜನ್ಮ ಉತ್ತರ ಕನ್ನಡ ಜಿಲ್ಲೆಚೆ ಹೊನ್ನಾವರಚೆ ಆವಸುಲೆ ಘರಾಕಡೆನ ಜನವರಿ 1, 1992ಕ ಜಾಲೆ°. ಆತ° ತಾಂನಿ° ಬಾಪುಸು ನಾವದೀಕ ಪುರೋಹಿತ ಬ್ರಹ್ಮಾವರ ಉಮಾನಾಥ ಭಟ್, ಆವಸು ಬಿ. ವೇದಾವತಿ ಭಟ್ ಆನೀ ಬ್ಹಾವು ಬ್ರಹ್ಮಾವರ ಬಾಲಕೃಷ್ಣ ಭಟ್ ಹಾಂಗೆಲೆ ಸಾಂಗತ ಬೆಂಗಳೂರಚೆ ಬಸವನಗುಡಿಂತು° ನಿವಾಸ ಆಸಾತಿ. ಬ್ರಹ್ಮಾವರ ಶ್ರೀ ಲಕ್ಶ್ಮೀ  ವೆಂಕಟರಮಣ ದೇವಳಾಚೆ ಅನುವಂಶಿಕ ಪರ್ಯಾಯ ಸಾಂಬಾಳನು ಆಸಚೆ ಹಾಂಗೆಲೊ ಬಾಪ್ಪಾ ಬ್ರಹ್ಮಾವರ ಪಾಂಡುರಂಗ ಭಟ್ ಹಾಂನಿ° ಆಜಿಕಯೀ ಬ್ರಹ್ಮಾವರ ದೇವಳಾಚೆ ಅರ್ಚಕ ಆಸಾತಿ. ಬ್ರಹ್ಮಾವರಾಂತು° ಆಸಚೆ ಮ್ಹಾಲ್ಗಡೆಲೆ ಘರಾಕ ರಾಮಕೃಷ್ಣ ಭಟ್ ತಾತಾವಳಿ ಯೆತಾತಿ ಮ್ಹಣು ಪಾಂಡುರಂಗ ಭಟ್ ಸಾಂಗತಾತಿ. ರಾಮಕೃಷ್ಣ ಭಟ್ ಹಾಂಗೆಲೊ ಮ್ಹಾಂತು ಬ್ರಹ್ಮಾವರ ದೇವಾದಿನ ರಾಧಾಕೃಷ್ಣ ಭಟ್ ಹಾಂನಿ 1958 ಇಸವಿಂತ ಬೆಂಗಳೂರಾಕ ಗೆಲೆಲೆ. ತಾಂಕಾ° ಗೋಕರ್ಣ್ ಪರ್ತಗಾಳಿ ಜಿವೋತ್ತಮ ಮಠಾಧೀಶ ಶ್ರೀಮದ್ ದ್ವಾರಕನಾಥ ಶ್ರೀಪಾದ ವಡೇರ ಸ್ವಾಮೀಜಿ ಹಾಂನಿ ಬಸವನಗುಡಿಚೆ ಮಾಠಾಚೆ ದೇವಾಳಾಚಿ ಜಬಾಬದಾರಿ ದಿಲೆಲಿ. ಉಪರಾಂತ ತಾಂನಿ° ಬ್ಹಾಂವಡಾಂಕ ಥಂಯ ವೆಲೆ ಆನೀ ಆಜೀ ತಾಂನಿ° ಬೆಂಗಳೂರಚೆ ನಾವಾದೀಕ ಪುರೋಹಿತ ಆಸಾತಿ. ಬ್ರಹ್ಮಾವರ ಶ್ರೀ ಲಕ್ಶ್ಮೀ ವೆಂಕಟರಮಣ ದೇವಳಾಚೆ ಅಭಿವೃದ್ಧಿಂತುಂಯೀ ಹಾಂಗೆಲೊ ಹೋಡು ವಾಂಟೊ ಆಸಾ.

ಶ್ರೀಮನ್‌ನ್ಯಾಯಸುಧಾ ಪರೀಕ್ಷೆಂತು° ಉತ್ತೀರ್ಣ ಜಾವಚೆ° ಸುಲಭ ನಾ ಆನೀ ಜಿ.ಎಸ್.ಬಿ ಸಮಾಜಾಂತು° ಹಿ ಪರೀಕ್ಷಾ ಉತ್ತೀರ್ಣ ಜಾಲೆಲೆ ಲೋಕ ಊಣೇಚಿ ಆಸಾತಿ ಮ್ಹಣು ಅನುಭವ ಜಾತಾ. ದೇವಾದಿನ ಕಾರ್ಕಳ ಪದ್ಮನಾಬ ಪುರಾಣಿಕ ಆನೀ ಗೋಕರ್ಣ ಮಾಧವ ಭಟ್ ಹಾಂನಿ°  ಹಾಜೆ ಪಯಲೆ° ಹಿ ಪರೀಕ್ಷಾ ಉತ್ತೀರ್ಣ ಜಾಲ್ಯಾಂತಿ ಮ್ಹಣು ಕಳನು ಯೆತಾ.

ಬ್ರಹ್ಮಾವರ ರಾಮಕೃಷ್ಣ ಭಟ್ ಹಾಂಗೆಲಿ ಹ್ಯಾ ಸಾಧನೆ ನಿಮಿತ ಲೋಕ ಕಲ್ಯಾಣ ಜಾತಾ ಮ್ಹಣು ವಿಶ್ವಾಸ ಕರೂಯಾ°.   

ಬೆಂಗಳೂರು: ಶ್ರೀ ಗೋಕರ್ಣ ಪರ್ತಗಾಲಿ ಜಿವೋತ್ತಮ ಮಠಾಧೀಶ ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮೀಜಿ ಹಾಂನಿ° ಆಜೀ (ಡಿ. 17) ಸಕಾಳಿ ಬೆಂಗಳೂರ ಮೊಕ್ಕಾಂ ದಾಕೂನ ಪರ್ತಗಾಲಿಚೆ ಕೇಂದ್ರ ಮಠಾಕ ವಚೆ ವಾಟೇರಿ ನೈಸ ರಸ್ತೆಚೆ ಬಗಲೇನ ಕಾರ ರಾಬೋನ ಮಠಾಚೊ ಮ್ಹಲ್ಗಡೊ ಅನುಯಾಯಿ ದಂಪತಿoಕ ಪ್ರಸಾದ ದೀವನು ಆಶೀರ್ವಾದ ಕರಚೆ° ಜಾಲೆ°. 

ಶುರುವೇಕಚಿ ಗುರುವರ್ಯಾಂಕ ಮಾಘಣಿ ಕೆಲೆಲೆ ಪ್ರಮಾಣೆ ಸಕಾಳಿ ಸಾಬಾರ 11 ಗಂಟ್ಯಾಕ ಬೆಂಗಳೂರ ಜಯನಗರ ನಿವಾಸಿ ಶ್ರೀ ಗಜಾನನ ಗ್ರೂಪಾಚೆ ಮ್ಹಾಲ್ಗಡೆ ಮನೀಸ ಕಟಪಾಡಿ ಕಮಲದಾಸ ಶೆಣೈ ಆನಿ ತಾಂಗೆಲಿ ಬಾಯಲ ಶೀಲಾ ಶೆಣೈ ನೈಸ್ ರಸ್ತೆಚೆ ಬಗಲೇನ ಗುರುವರ್ಯಾಂಕ ರಾಖತ ಆಶಿಲೆ. ವೇಳಾರ ಆಯಿಲೆ ಗುರುವರ್ಯಾನಿ ರಸ್ತೆ ಬಗಲೇನ ಕಾರ ರಾಬೋವನು ಮಠಾಚೆ ಪರಮ ಅನುಯಾಯಿ ದಂಪತಿಲೊ ಗೌರವ ಸ್ವೀಕಾರ ಕೆಲೊ ಆನೀ ತಾಂಕಾ° ಆಶೀರ್ವಾದ ದಿಲೊ. ಆಜೀ ಶೀಲಾ ಶೆಣೈ ಹಾಂಗೆಲೊ 80ವೊ ಜಲ್ಮ ದೀವಸ ಜಾವನು ಆಸಚೆ° ವಿಶೇಷ ಜಾವನು ಆಸಾ.   

ಬೆಂಗಳೂರು: ವಿರಾಜಪೇಟೆ ಮೂಳಾಚೊ ವಕೀಲ ಎನ್. ರವೀಂದ್ರನಾಥ ಕಾಮತ ಹಾಂಕಾ° ರಾಜ್ಯ ಉಚ್ಛ ನ್ಯಾಯಾಲಯಾನ 14.12.2021ಕ ಅಧಿಸೂಚನಾ ಕರನು ಸೀನಿಯರ್ ಕೌನ್ಸೆಲ್ ಮ್ಹಣು ಪದೋನ್ನತಿ ದಿಲ್ಯಾ. ಹಾಂನಿ° ಮೂಳಾವೆ° ಶಿಕ್ಷಣ ಸೇಂಟ್ ಆನ್ಸ್ ಸ್ಕೂಲ್ ವಿರಾಜಪೇಟೆಂತು° ಜಾತರಿ ಪಿ.ಯು.ಸಿ ಶಿಕ್ಷಣ ಉಜಿರೆಚೆ ಎಸ್.ಡಿ.ಎಮ್. ಕಾಲೇಜಾಂತು° ಕರನು 1985 ದಾಕೂನ 1990 ತಾಂಯ ಮಂಗಳೂರುಚೆ ಎಸ್. ಡಿ. ಎಮ್. ಲಾ ಕಾಲೇಜಾಂತು° ಕಾನೂನು ಶಿಕ್ಷಣ ಫಾವೊ ಕೆಲೆ°. 1990 ಉಸವಿಂತು° ವಿರಾಜಪೇಟೆಂತು° ಕಾನೂನು ವೃತ್ತಿ ಶುರು ಕೆಲೆಲೆ ಹಾಂನಿ° 2002 ಇಸವಿಂತು° ಬೆಂಗಳೂರಾಕ ಸ್ಥಳಾಂತರ ಜಾಲೆ ಆನೀ ರಾಜ್ಯ ಉಚ್ಛ ನ್ಯಾಯಾಲಯಾಂತು° ವೃತ್ತಿ ಮುಕಾರಶಿಲಿ. ಆಜಿ ತಾಂನಿ° ಕರ್ನಾಟಕ ಉಚ್ಛ ನ್ಯಾಯಾಲಯ, ದೆಹಲಿಂತು° ದೇಶಾಚೆ ಸರ್ವೋಚ್ಛ ನ್ಯಾಯಾಲಯ ನಂತಾ° ದೇಶಾಚೆ ವೆಗವೆಗಳೆ ನ್ಯಾಯಾಲಯಾಂತ ತಾಂಗೆಲೆ ಕಕ್ಷಿಗಾರಾಂಕ ಕಾನೂನ ಸೇವಾ ದಿವನು ಆಸಾತಿ. 2012 ಇಸವಿಂತು° ಲಂಡನ್ ಪಾರ್ಲಿಮೆಂಟಾ0ತು ಭಾಷಣ ದಿಲೆಲೆ ಹಾಂನಿ° ಎದೋಳು ಪ್ರಪಂಚಾಚೆ ವೆಗವೆಗಳೆ ದೇಶಾಂತ ವ್ಹಿಂವ್ಹಿಂಗಡ ಸೇಮಿನರ‍್ಸಾಂತು° ಪ್ರಭಂದ ಮಂಡನ ಕೆಲೆಲೆ° ಆಸಾ. ಎದೋಳು ಥಾಂಯ ಖೂಬ ಸನಸನಿ ಕೇಸ° ಸಾಂಬಾಳನು ಹಾಡಲೆಲೆ ಹಾಂನಿ° ಶ್ರೀ ಕಾಶಿಮಠಾಚೆ ಶ್ರೀಮದ್ ಸುಧೀಂದ್ರ ತೀರ್ಥ ಸ್ವಾಮೀಜಿ ತರಪೇನ ಶ್ರೀಮದ್ ರಾಘವೇಂದ್ರ ತೀರ್ಥ ಹಾಂಗೆಲೆ ವಿರುದ್ಧ ತಿರುಪತಿ, ಕಡಪಾ, ಎರ‍್ನಾಕುಲಂ, ಹೈದರಾಬಾದ ನ್ಯಾಯಾಲಯಾಂತು° ಆನೀ ದೆಹಲಿಚೆ ಸುಪ್ರೀಂ ಕೋರ್ಟಾಂತ ಕಾನೂನ ಝುಜ ಕರನು ಸ್ವಾಮೀಜಿಂಗೆಲೆ ವಿಶೇಷ ಅಭಿವಾದನ ಫಾವೊ ಕೆಲಾ°. 
ಸದ್ಯಾಕ ತಾಂನಿ° ಆರ್.ಟಿ.ಐ ಕಾರ್ಯಕರ್ತ ವಿನಾಯಕ ಬಾಳಿಗಾ ಹತ್ಯಾ ಕೇಸಾಂತು° ಅನುರಾಧಾ ಬಾಳಿಗಾಲೆ ಕುಟುಂಬೆಚೆ ತರಪೇನ ಕಾನೂನ ಸೇವಾ ದಿವನು ಆಸಾತಿ. ಸರಕಾರಾನ ಹ್ಯಾ ಕೇಸಾಂತು° ತಾಂಕಾ° ಸ್ಪೆಶಲ್ ಪಬ್ಲಿಕ್ ಪ್ರಾಸಿಕ್ಯೂಟರ್ ಜಾವನು ನೇಮಣೂಕ ಕೆಲೆಲೆ° ಟ್ರಾಯಲ್ ಕೋರ್ಟಾನ ತಾಂತ್ರಿಕ ಕಾರಣಾಕ ಲಾಗೂನ ರದ್ಧ ಕೆಲೆಲೆ° ಆಸಾ. 'ಹಿಂದು ಲಾ’ ಆನೀ 'ಕಾನ್ಸ್ಟಿಟ್ಯೂಷನಲ್ ಲಾ’ ಹಾಂತು° ಪ್ರವೀಣ ಆಸಚೆ ಹಾಂನಿ° ಸಾಂಬಾಳನು ಹಾಡಲೆಲೆ ಸಾಬಾರ ಕೇಸ° ಲಾ ಜರ್ನಲ್ಸಾಂತು° ಪ್ರಕಟ ಜಾಲ್ಯಾಂತಿ. ರಾಜ್ಯಾಚೆ ನಾವಾದಿಕ ಶಿಕ್ಷಣ ಸಂಸ್ಥೆಚೆ ತರಪೇನ ಹಾಂನಿ° ಯಶಸ್ವಿ ತರಾನ ಕೇಸ° ಝುಜಲ್ಯಾಂತಿ. 
2010 ಇಸವಿಂತು° ಕರ್ನಾಟಕ ಉಚ್ಛ ನ್ಯಾಯಾಲಯಾನ ಹಾಂಕಾ° ‘ಎಲಿಫೆಂಟ್ ಟಾಸ್ಕ್ ಫೋರ್ಸ’ ಹಾಜೊ ಸಾಂದೊ° ಜಾವನು ನೆಮಣೂಕ ಕೆಲೆಲೊ. ಹ್ಯಾ ಅನುಭವಾನ ಹಾಂನಿ° ಬರಯಿಲೆ° ಪುಸ್ತಕ ‘ಮ್ಯಾನ್ ಎಂಡ್ ಎಲಿಫೆಂಟ್ ಕಾನಫ್ಲಿಕ್ಟ್’ ವಗೀಚ ಪ್ರಕಟ ಜಾವಚೆ° ಆಸಾ. ವಿರಾಜಪೇಟೆಚೆ ಎನ್. ವೆಂಕಟೇಶ ಕಾಮತ ಆನೀ ಚಂದ್ರಕಲಾ ಕಾಮತ ಹಾಂಗೆಲೊ ಪೂತು ಜಾವನು ಆಸಚೆ ಹಾಂಗೆಲೆ° ಜಲ್ಮ 1968 ಎಪ್ರಿಲ್ 14ಕ ದಕ್ಷಿಣ ಕನ್ನಡ ಜಿಲ್ಲೆಚೆ ಬೆಳ್ತಂಗಡಿoತು° ಜಾಲೆಲೆ°.        

. 

ಬೆಂಗಳೂರು: ಶ್ರೀ ಸಂಸ್ಥಾನ ಗೋಕರ್ಣ ಪರ್ತಗಾಲಿ ಮಠ, ಗೊಂಯ ಹಾಂಗೆಲಿ ಯೋಜನಾ ಜಾವನು ಆಸಚೆ 68 ಕೂಡಾಂಚೆ° ವಸತಿ ನಿಲಯಾಚೆ ಉಗ್ತಾವಣ ಶ್ರೀಮದ್ ವಿದ್ಯಾಧೀಶ ತೀರ್ಥ ಶ್ರೀಪಾದ ವಡೇರ ಸ್ವಾಮೀಜಿ ಹಾಂನಿ° ಡಿ. 10 ತಾರೀಕೆಕ ಬೆಂಗಳೂರಚೆ ಇಲೆಕ್ಟಾçನಿಕ್ ಸಿಟಿಕ ಲಾಗಿ ಆಸಚೆ ಶ್ರೀ ಅನಂತನಗರಾಚೆ ಹೆಬ್ಬಾಗೋಡಿಂತು° ಕರನು ಆಶೀರ್ವಚನ ದಿಲೆ°. 

ದೋಗ ಲೋಕಾನ ಎಕ ಕೂಡಾಂತ ವಸತಿ ಕರೂಂಕ ಅವಕಶ ಆಸಚೆ ಹೆ° ವಸತಿ ಗೃಹ ಬೆಂಗಳೂರಾoತ ನೌಕರಿ ಕರೂಂಕ ಯೆವಚೆ ಸಮಾಜಾಚೆ ಸ್ತ್ರೀಯಾ° ಖಾತಿರ ಬಾಂದಿಲೆ° ಆಸಾ. ಸರ್ವ ಸೌಕರ್ಯ ಆಸಚೆ ಹ್ಯ ವಸತಿ ನಿಲಯಂತು° ವಸತಿ ಕರತಲೆನ ರಾಂದಪ ಕರಚಾಕಯೀ ಅವಕಾಶ ಆಸಾ. ಹ್ಯಾ ಸಂದರ್ಭಾರ ಗೋಕರ್ಣ ಮಠ ಸೆಂಟ್ರಲ್ ಕಮಿತಿ ಅಧ್ಯಕ್ಷ ಶ್ರೀನಿವಾಸ ದೆಂಪೊ, ಕಾಮತ ಗ್ರೂಪ್ ಆರ್ಫ ಹೋಟೆಲ್ಸ್ ಹಾಜೊ ಆರ್. ಆರ್. ಕಾಮತ, ಪಿ. ಎನ್. ಬಿಚೊ ಆದಲೊ ಅಧ್ಯಕ್ಷ ಕೆ. ಆರ್. ಕಾಮತ, ಯು. ರಾಮದಾಸ ಕಾಮತ, ಗೋಕರ್ಣ ಮಠ ವಡಾಲಾ ಹಾಜೊ ಅಧ್ಯಕ್ಷ ಮುಕುಂದ ಕಾಮತ ಆನೀ ಗೋಕರ್ಣ ಮಠ ಬೆಂಗಳೂರು ಸಮಿತಿ ಅಧ್ಯಕ್ಷ ಅಮರನಾಥ ಕಾಮತ ಉಪಸ್ಥಿತ ಆಶಿಲೆ.