ಕಾಸರಗೋಡು: ಹಾಂಗಾಚೆ ಉಕ್ಕಿನಡ್ಕಾಚೆ ಬಳ್ಳಂಬೆಟ್ಟು ಶ್ರೀ ಪರಿವಾರ ಸಹಿತ ಶಾಸ್ತಾರ ಸ್ವಾಮಿ ದೇವಸ್ಥಾನಾಚೆ ಪುನ: ಪ್ರತಿಷ್ಠಾ ಅಷ್ಟಬಂಧ ಬ್ರಹ್ಮ ಕಲಶೋತ್ಸವು ಜ. 24 ದಾಕೂನ 26 ತಾಂಯ ಬ್ರಹ್ಮಶ್ರೀ ವೇದಮೂರ್ತಿ ಗಣೇಶ ತಂತ್ರಿ ಹಾಂಗೆಲೆ ಮಾರ್ಗದರ್ಶನಾರಿ ವಿವಿಧ ಧಾರ್ಮಿಕ, ವೈದಿಕ ಆನಿ ಸಾಂಸ್ಕೃತಿಕ ಕಾರ್ಯಕ್ರಮ ಸಹಿತ ಚಲಚೆ ಆಸಾ ಮ್ಹಣು ದೇವಳಾಚೆ ಆಡಳಿತ ಮಂಡಳಿಚೊ ಅಧ್ಯಕ್ಷ ಶ್ರೀಧರ ಪೈನ ಕಳಯಲಾ°.

ಮಂಗಳೂರು: "ದಕ್ಷಿಣ ಕನ್ನಡ, ಮಹಾಸಾಧಕಾನಿ ಜಲ್ಮ ಘೆತಿಲೊ ಪ್ರದೇಶ ಆಸಾ. ಸ್ವಾತಂತ್ರ್ಯ ಯೋಧ. ಸಮಾಜ ಸುಧಾರಕ, ಮಹಾನ ಸಾಹಿತಿ ಲೋಕಾನಿ ಜಲ್ಮಾಕ ಆಯಿಲೊ ಪ್ರದೇಶ. ಆಜೀ ದೇಶಭರ ಮಹಾತ್ಮಾ ಗಾಂಧೀಜಿ ಬದಲ ಅಪಪ್ರಚಾರ ಜಾತಾ ಆಸತಾನಾ ಹ್ಯಾ ಜಿಲ್ಲೆಚೆ ಲೋಕಾನ ಮೌನ ಆಸಚಾಕ ಜಾಯನಾ. ಅಪಪ್ರಚಾರ ಕರತಲೆ ಲೋಕಾ ಸಾಂಗತ ಸಂವಾದ ಕರಚೆ° ಗರಜೆಚೆ° ಆಸಾ. ತಾಂನಿ° ಗಾಂಧೀಜಿ ಬದಲ ಸಂಶೋಧನ ಯಾ ವಾಚಿನಾಶಿ° ಅಪಪ್ರಚಾರ ಕರಚೆ° ಜಾತಾ ಆಸಾ. ತಾಂಗೆಲೆ ಮುಕಾರಿ ಗಾಂಧೀಜಿ ಬದಲ ಸತ್ಯ ದವರಚೆಂ ಜಾವಕಾ. ಸವಾಲ ಘಾಲಚೆ ಲೋಕಾಂಕ ಟೀಕಾ ಕರನಾಶಿ° ಅಧ್ಯಯನಶೀಲ ಸತ್ಯ ಪೂರ್ಣ ಜವಾಬ ದಿವಚೆಂ ಜಾವಕಾ. ದ್ವೇಷಪೂರ್ಣ ಜಬಾಬ ನಾಕಾ" ಮ್ಹಣು ಅಟಲಬಿಹಾರಿ ವಾಜಪೇಯಿ ಹಾಂಗೆಲೊ ನಿಕಟವ್ಯಕ್ತಿ ಜಾವನು ಆಶಿಲೊ ಸುಧೀಂದ್ರ ಕುಲಕರ್ಣಿ ಹಾಂನಿ° ಸಾಂಗಲಾ°.
ಗಾಂಧಿ ವಿಚಾರ ವೇದಿಕೆನ ಆಯೋಜನ ಕೆಲೆಲೆ ಸಂವಾದ ಕಾರ್ಯಕ್ರಮಾಂತು° ಸಾಮಾಜಿಕ ಕಾರ್ಯಕರ್ತ ಎಂ. ಜಿ. ಹೆಗಡೆ ಹಾಂನಿ° ಬರಯಿಲೆ "ಮಿನುಗು ನೋಟ - ಗಾಂಧಿ ಕುರಿತ ಪ್ರಶ್ನೆ ಉತ್ತರ" ಪುಸ್ತಕಾಚೆ ಉಗ್ತಾವಣ ಕರನು ತಾಂನಿ° ಅಶೆ° ಸಾಂಗಲೆ°.
"ಗಾಂಧಿ ವಿಚಾರಾಂತು° ಆಜಿಕಯಿ ಶಕ್ತಿ ಆಸಾ. ಸತ್ಯ ಆನಿ ಅಹಿಂಸಾ ತಾಗೆಲೆ ಪ್ರಮುಖ ವಿಚಾರ ಆಶಿಲೆ. ಸತ್ಯಚಿ ದೇವು ಮ್ಹಣು ತಾಣೆ ಸಾಂಗಿಲೆ°. ದೇವಾಕ ನಂಬಗನಾತಿಲೆ ಲೋಕ ಸುತಾ ಸತ್ಯ ವಿಷಯಾಂಕ ನಂಬಗತಾತಿ. ಎಕ ಮನಶಾಕ ಜಿವಶಿ ಮಾರಯೆತ. ಜಾಲ್ಯಾರ ತಾಗೆಲೆ ಸಿದ್ಧಾಂತ ಯಾ ವಿಚಾರಾಂಕ ಜಿವಶಿ ಮಾರಚಾಕ ಜಾಯನಾ. ಸ್ವಾತಂತ್ರö್ಯ ಝುಜಾ ವೇಳಾರ ಖೂಬ ಲೋಕಾನ ಝುಜ ಕೆಲೆಲೆ° ಆಸಾ. ಜಾಲ್ಯಾರ ಮಹಾತ್ಮಾ ಗಾಂಧೀಜಿನ ಸೌತ್ ಆಫ್ರಿಕಾಂತ ಆಸತ ದಾಕೂನ ಝೂಜ ಕರನು ಆಸೂನ ಅಂತರಾಷ್ಟ್ರೀಯ ಸ್ಥರಾರ ಮಾಹಾತ್ಮಾ ಜಾಲೊ. ಭಾರತಾಂತು° ಸರ್ವೊದಯ, ಅಂತ್ಯೊದಯ, ಅಸ್ಪರ್ಷತಾ, ಸ್ತ್ರೀ ಸಬಲಿಕರಣ ಅಶೆ° ಹರ ಎಕ ವಿಷಯಾರಿ ತಾಣೆ ಝಜ ಕೆಲೆಲೆ° ಆಸಾ.
ಸತ್ಯಾಗ್ರಹ ಮ್ಹಳೆಲೊ ವಿಷಯ ಮಹಾತ್ಮಾ ಗಾಂಧಿನ ಸೌತ್ ಆಫ್ರಿಕಾಂತು ಆಶಿಲೆ ವೇಳಾರ ಜಿಹಾದ್ ಮ್ಹಳೆಲೆ ಮುಸಲ್ಮಾನ ವಿಷಯಾ ದಾಕೂನ ಪ್ರೇರಣಾ ಘೆತಿಲೆ°. ಸತ್ಯಾಗ್ರಹ ಮ್ಹಳ್ಯಾರಿ ಚೂಕಿಚೆ ಬದಲ ಝುಜ. ವ್ಹಿಂಗಡಾಲೆ ಚೂಕಿಚೆ ವಿರುದ್ಧ ಸತ್ಯಾಗ್ರಹ ಕರಚೆ° ಪಯಲೆ° ಆಮಗೆಲೆ ಭಿತರಿ ಆಸಚೆ ಚೂಕಿಚೆ ವಿರುದ್ಧ ಸತ್ಯಾಗ್ರಹ ಗರಜೆಚೆ° ಮ್ಹಣು ಗಾಂಧೀಜಿ ಸಾಂಗತಲೊ. ಮಹಾತ್ಮಾ ಗಾಂಧಿ ಎಕ ಹೋಡ ರಾಮ ಭಕ್ತ ಆಶಿಲೊ ಮ್ಹಣಚಾಕ ಪ್ರಮುಖ ನಿದರ್ಶನ ಮ್ಹಳ್ಯಾರಿ ತಾಣೆ ಆಖೇರಿಚೆ ಶ್ವಾಸ ಆಸತನಯಿ ಹೇ ರಾಮ್ ಮ್ಹಳೆಲೆ° ಆಸಾ" ಮ್ಹಣು ಸುಧೀಂದ್ರ ಕುಲಕರ್ಣಿ ಹಾಂನಿ° ಮಹಾತ್ಮಾ ಗಾಂಧಿಜಿ ಬದಲ ವ್ಯಾಕ್ಯಾನ ಕೆಲೆ°.
ಎಂ. ಜಿ. ಹೆಗಡೆನ ತಾಗೆಲೆ ಕೃತಿ ಬದಲ ಮಾಹಿತಿ ದಿಲಿ. ಹ್ಯಾ ಪುಸ್ತಕಾಂತು° ಮಹಾತ್ಮಾ ಗಾಂಧಿ ಬದಲ ಚಲತ ಆಸಚೆ ಅಪಪ್ರಚಾರಾಕ ಜಬಾಬ ದಿವಚೆ° ಪ್ರಯತ್ನ ಕೆಲಾ°. ಕೊಣಾಕಯಿ ವಿರೋಧ ಕರಚೆ° ಯಾ ವಿಮರ್ಸೊ ಕರತಾನ ತ್ಯಾ ವ್ಯಕ್ತಿಲೆ ಬದಲ ಸಂಶೋಧನ ಯಾ ವಾಚೂಚೆ° ಕರಕಾ. ಆಜಿ ವಾಟ್ಸಪ್ ಆನಿ ಫೆಸಬುಕ್ಕ ಮ್ಹಣು ಆಮಕಾ ಮೆಳಚಿ ಮಾಹಿತಿ ಪ್ರದೂಷಿತ ಜಾಲ್ಯಾ. ತ್ಯಾ ದೆಕೂನ ಸ್ವಅಧ್ಯಯನ ಗರಜೆಚೆ° ಆಸಾ ಮ್ಹಣು ತಾಣೆ ಸಾಂಗಲೆ°. ಗಾಂಧಿ ವಿಚಾರ ವೇದಿಕೆ ಹಾಜೊ ಅಧ್ಯಕ್ಷ ಶ್ರೀಧರ ಭಿಡೆ ಹಾಂನಿ° ಅಧ್ಯಕ್ಷಿಯ ಭಾಷಣ ದಿಲೆ°. ಅರವಿಂದ ಚೊಕ್ಕಾಡಿ ಹಾಂನಿ° ಸೂತ್ರ ಸಂಚಾಲನ ಕೆಲೆ°. ಗಾಂಧಿ ವಿಚಾರ ವೇದಿಕೆ ಹಾಜಿ ಮಂಗಳೂರು ಘಟಕಾಚಿ ಅಧ್ಯಕ್ಷಾ ಬಿ. ಎಂ. ರೋಹಿಣಿನ ಆಬಾರ ಮಾನಲೊ. ಉಪಾಧ್ಯಕ್ಷ ಅಣ್ಣಾ ವಿನಯಚಂದ್ರ ವೇದಿಕೆರಿ ಉಪಸ್ಥಿತ ಆಶಿಲೆ.

ಮಂಗಳೂರು: "ಜಿ. ಎಸ್. ಬಿ ಮಹಿಳಾ ವೃಂದಾಚೆ ಖೂಬ ಸಮಾಜ ಸೇವಾ ಕರೀತ ಆಸಾತಿ. ಘರಕಡೆಚಿ ಜಬಾಬದಾರಿ, ಚೆರಡುವಾಂಲೆ° ಭವಿಷ್ಯ ಸಗಟ ಸಾಂಬಾಳನು ತಾಜೆ ಮಧೆ° ಸಮಾಜ ಸೇವಾ ಕರಚೆ° ಸುಲಭ ನ್ಹಹಿ°. ಆಮಗೆಲೆ ಸ್ತ್ರೀ ಯಾನಿ ಹಾಜೆ ಮಧೆ° ತಾಂಗೆಲೆ° ಸ್ವತಾಕ ಥೊಡೊ ವೇಳು ದವರನು ಆರೋಗ್ಯ ಸಾಂಬಾಳನು ಹಾಡಲ್ಯಾರಿ ತಾಂಗೆಲಿ ಉಮೇದಿ ವಾಡಚೆ ಸಾಂಗತ ವ್ಹಿಂಗಡಾಲಿ ಉಮೇದಿ ವಾಡೋಚಾಕ ಜಾತಾ" ಮ್ಹಣು ದಂತ ವೈದ್ಯ ತರನಾಟೊ ಡಾ| ಅರ್ಜುನ ನಾಯಕ ಹಾಂನಿ° ಸಾಂಗಲಾ°.

ಜಿ. ಎಸ್. ಬಿ ಮಹಿಳಾ ವೃಂದಾಚಾನಿ ಆಯೋಜನ ಕೆಲೆಲೆ "ಕೊಂಕಣಿ ದೀವಸ" ಕಾರ್ಯಕ್ರಮಾಚೆ ಅಧ್ಯಕ್ಷ ಸ್ಥಾನಾ ದಾಕೂನ ತಾಂನಿ° ಅಶೆ° ಸಾಂಗಲೆ°. ಜ. 15ಕ ಹಾಂಗಾಚೆ ರಥಬೀದಿಚೆ ಶ್ರೀ ಗೋಕರ್ಣ ಮಠಾಚೆ ಸಭಾಂಗಣಾοತು° ಕೊಂಕಣಿ ಸಾಹಿತಿ ಬಿ. ಸುರೇಶ ಬಾಳಿಗಾ, ಸಮಾಜ ಸೇವಕ ಕೆ. ವೆಂಕಟೇಶ ಕಾಮತ ಆನಿ ಭಜನ ಸೇವಾ ಖಾತೀರ ಸುಧಾ ಶೆಣೈ ಸ್ಮರಣಾರ್ಥ ಪ್ರಫುಲ್ಲಾ ಎನ್. ಮಲ್ಯ ಹಾಂಕಾ° ಸನ್ಮಾನ ಚಲೊ.

ಆದಲಿ ಅಧ್ಯಕ್ಷಾ ಮರೋಳಿ ಸಬಿತಾ ಕಾಮತ ಹಾಂನಿ° ಜಿ. ಎಸ್. ಬಿ ಮಹಿಳಾ ವೃಂದಾಚೊ ಇತಿಹಾಸ ಕಳಯಲೊ. ಪಂಚ್ಕದಾಯಿ ಮಾಸಿಕ ಪತ್ರಿಕೆಚೊ ಸಂಪಾದಕ ದೇವಾದಿನ ಬಿ. ವಿ. ಬಾಳಿಗಾ ಹಾಂನಿ° ತಾಗೆಲೆ ಪತ್ರಾಚೆ ರುಪ್ಯಾಳೊ ಮಹೋತ್ಸವಾಚೆ ವೇಳಾರ ಜಿ. ಎಸ್. ಬಿ. ಮಹೀಳಾ ವೃಂದಾಕ ಪಂಚ್ವೀಸ್ ಹಜಾರ ರುಪಯೊ ದೀವನು "ಕೊಂಕಣಿ ದೀವಸ" ಆಚರಣ ಕರೂಂಕ ಸಾಂಗಿಲೆ°. ತ್ಯಾ ಪ್ರಮಾಣೆ ಆಮಿ ಹರ ವರಸ "ಕೊಂಕಣಿ ದೀವಸ ಆಚರಣ ಕರತ ಆಸಾತಿ ಮ್ಹಣು ತೀಣೆ ಸಾಂಗಲೆ°.
ಸನ್ಮಾನಿತ ಸುರೇಶ ಬಾಳಿಗಾ ಹಾಂನಿ° ಗೀತ ಗಾಯನ ಕರನು ಮಹಿಳಾ ವೃಂದಾಕ ಆಬಾರ ಪ್ರಕಟ ಕೆಲೊ. ಹಾಂವೆ° ಮಾಕ್ಷಿಚೆ ಪಾಂಚ ವರಸ ದಾಕೂನ ಸಾಹಿತ್ಯ ರಚನ ಶುರು ಕೆಲಾ°. ಕೊರೊನಾ ಮಹಾಮಾರಿ ಚಾಳವಳೆಲೆ ವೇಳಾರ ಥೊಡೆ ಚಡ ಬರೊವಚಾಕ ಸಾಧ್ಯ ಜಾಲೆ°. ಹಾಕಾ ಮೆಗೆಲಿ ಬಾಯಲ ಆನಿ ಕೊಡಿಯಾಲ ವೆಂಕಟರಮಣು ಪ್ರೇರಣಾ ಜಾಲೆಂತಿ ಮ್ಹಣಚಾಕ ಸಂತೋಸ ಜಾತಾ ಮ್ಹಣು ತಾಣೆ ಸಾಂಗಲೆ°.
ಮಹಿಳಾ ವೃಂದಾಚಿ ಅಧ್ಯಕ್ಷಾ ರಾಧಿಕಾ ಕಾಮತಾನ ಸ್ವಾಗತಾಚೆ ಉತ್ರ° ಸಾಂಗಲಿ°. ವಿಜಯಲಕ್ಶ್ಮೀ  ಕಾಮತ, ಲಕ್ಶ್ಮೀ ಭಂಡಾರಕಾರ್, ಎನ್. ಮಿನಾಕ್ಷಿ ಪೈ ಆನಿ ಗೀತಾ ಸಿ. ಕಿಣಿ ಹಾಂನಿ° ಸನ್ಮಾನಿತಾಲೊ ವಳಕ ಕರನು ದಿಲೊ. ಎನ್. ಪ್ರಭಾ ಪೈ ಹಾಂನಿ° ಸಭಾಧ್ಯಕ್ಷಾಲೊ ವಳಕ ಕರನು ದಿಲೊ. ಮಮತಾ ಕಾಮತ, ಪ್ರತಿಮಾ ಪ್ರಭು ಹಾಂನಿ° ಪ್ರಾರ್ಥನಾ ಗಾಯಲಿ. ಎ. ಗೀತಾ ಕಾಮತಾನ ಆಬಾರ ಮಾನಲೊ. ಚಂದ್ರಿಕಾ ಮಲ್ಯಾನ ಸೂತ್ರ ಸಂಚಾಲನ ಕೆಲ°.

ಉಪರಾಂತ ಚಲೆಲೆ ಸಾಂಸ್ಕೃತೀಕ ಕಾರ್ಯಕ್ರಮಾಂತು° ನಿರ್ಮಲಾ ಶೆಣೈ ಆನಿ ವಿದ್ಯಾ ಶೆಣೈಲೆ° ನೃತ್ಯ ಆನಿ ವೃಂದಾಚೆ ಸಾಂದ್ಯಾನಿ "ಕಾಗದಾ ಗೊಂದೊಳು" ನಾಟಕ ಪ್ರದರ್ಶನ ಕೆಲೆ°. ಹ್ಯಾ ನಾಟಕಾಂತು° ಮರೋಳಿ ಸಬಿತಾ ಕಾಮತ, ಗೀತಾ ಸಿ. ಕಿಣಿ, ಚಂದ್ರಿಕಾ ಮಲ್ಯ, ರಾಧಿಕಾ ಕಾಮತ, ಸುನೀತಾ ಕಾಮತ ಆನಿ ಲತಾ ಪ್ರಭು ಹಾಂನಿ° ನಟನ ಕೆಲೆ°.

ಕೊಂಕಣಿ ದೀವಸಾ ಪ್ರಯುಕ್ತ ಚಲೆಲೆ ಭಕ್ತಿ ಗೀತಾ, ಕಾಣಿಯೊ ಸಾಂಗಚೆ, ಭಾವಗೀತಾ ಸ್ಪರ್ಧೆಚೆ ಫಲಿತಾಂಶ
ಬಾಳಗೀತಾ/ಶಿಶು ಗೀತಾ
ಎಲ್.ಕೆಜಿ/ಯು.ಕೆಜಿ ವಿಭಾಗ
ಶ್ರೇಯಸ್ ಎಂ. ಶೇಟ್ (ಪಯಲೆ° ಇನಾ°)
ಭಕ್ತಿ ಮಲ್ಯ (ದುಸರೆ° ಇನಾ°)
ದಿವಿಶಾ ನಾಯಕ ಆನಿ ರಾಧಿಕಾ ಪೈ(ತಿಸರೆ° ಇನಾ°)

ಪಯಲೆ°, ದುಸರೆ° ಆನಿ ತಿಸರೆ° ಕಕ್ಷಾ ವಿಭಾಗ
ನಿಯತಿ ಆಶ್ವಿನ್ ಪೈ(ಪಯಲೆ° ಇನಾ°)
ವೈಷ್ಣವಿ ಪಾಡಿಯಾರ್(ದುಸರೆ° ಇನಾ°)
ಪಿ. ಸಿದ್ಧಾಂತ ಶೆಣೈ ಆನಿ ನಮನ ಪಂಡಿತ ನಾಯಕ(ತಿಸರೆ° ಇನಾ°)

ಚೌತೆ°, ಪಾಂಚವೆ° ಆನಿ ಸ್ಹವೆ° ಕಕ್ಷಾ ವಿಭಾಗ
ಮಧುಸೂದನ ಎಂ. ಶೇಟ್(ಪಯಲೆ° ಇನಾ°)
ಭೂಮಿಕಾ ಕಾಮತ(ದುಸರೆ° ಇನಾ°)
ಅನಘಾ ಪೈ(ತಿಸರೆ° ಇನಾ°)

ಭಕ್ತಿಗೀತಾ/ಭಾವಗೀತಾ (ಸಾತವೆ°, ಆಟವೆ°, ಣವೆ° ಆನಿ ದ್ಹಾವೆ° ಕಕ್ಷಾ)
ಅಕ್ಷಜ ಚೂರ್ಯಾ(ಪಯಲೆ° ಇನಾ°)
ಪ್ರೇರಣಾ ಎನ್. ಪೈ(ದುಸರೆ° ಇನಾ°)
ದೇವಿಕಾ (ತಿಸರೆ° ಇನಾ°)

ಕಾಲೇಜ್ ಆನೀ ಹೇರ ವಿಭಾಗ
ಮಮತಾ ಕಾಮತ (ಪಯಲೆ° ಇನಾ°)
ಶ್ವೇತಾ ಕಾಮತ (ದುಸರೆ° ಇನಾ°)

ಹೇರ (65ಕಯೀ ಚಡ ವಯ)
ಜಯಲಕ್ಷ್ಮೀ ನಾಯಕ (ಪಯಲೆ° ಇನಾ°)
ಲತಾ ಪ್ರಭು ಕೊಡಿಕಲ್ (ದುಸರೆ° ಇನಾ°)

ಮಂಗಳೂರು: ಹಾಂಗಾಚೆ ರಥಬೀದಿಚೆ ಶ್ರೀ ವೆಂಕಟರಮಣ ದೇವಳಾಚೊ ಕೊಡಿಯಾಲ್ ತೇರು ಜ 24 ದಾಕೂನ 29 ತಾಂಯ ಚಲಚೊ ಆಸಾ. ಮಾಕ್ಷಿ ವರಸ ನವೀನ ಜಾವನು ಸಮರ್ಪಣ ಜಾಲೆಲೆ ಬ್ರಹ್ಮರಥು ಸಿಂಗಾರಚೆ ನದರೇನ ರಥಾ ಕೊಡಕೆ ದಾಕೂನ ಹಾಡೂನ ದೇವಳಾಚೆ ಮುಕಾ ದವರಚೆ° ಜಾಲೆ°.
ಖಬರ: ಗಣೇಶ ಕಾಮತ
ತಸ್ವೀರ: ಉಪೇಂದ್ರ ನಾಯಕ್

ಮಂಗಳೂರು: ಸಾಂ.ಅಲೋಶಿಯಸ್ (ಸ್ವಾಯತ್ತ್) ಕಾಲೇಜ ಕೊಂಕ್ಣಿ ಸಂಘಚ್ಯಾ ತರಪೆನ ಕೊಂಕಣಿ ಭಾಶೆ ಖಾತಿರ ದಿಲೆಲೆ ಸೇವೆಕ ದೊ. ಲ. ಆಸ್ಟಿನ್ ಡಿ'ಸೋಜ ಪ್ರಭು ಹಾಂಕಾ° "ಅಂತರಾಶ್ಟ್ರೀಯ್ ಕೊಂಕಣಿ ಕಲಾ ಸಾಹಿತ್ಯ ಜೀವಮಾನ ಸಾಧಕ್" ಪ್ರಶಸ್ತಿ ಆನಿ ಕೊಂಕಣಿ ಭಾಶೆಕ ದಿಲೆಲಿ ಸೇವೆ ಖಾತಿರ ಗೌರಿ ಮಲ್ಯ ಹಾಂಕಾ° ಕಲಾ ಸಾಹಿತ್ಯ ಸಾಧಕಿ ಪ್ರಶಸ್ತಿ ದಿವೂನ ಸನ್ಮಾನ ಚಲೊ. ತಾಂಚೆ ವಳಕ ವಾಲ್ಟರ್ ನಂದಳಿಕೆ ಆನಿ ದೊ. ರೋಸ್ ವೀರ ಡಿಸೋಜಾ ಹಾಂನಿ° ಕರನು ದಿಲೆ°. ಸಾನಿಧ್ಯ ಸಭಾಂಗಣಾοತ ಘಡಲೆಲೆ ಹ್ಯಾಚ ಕಾರ್ಯಕ್ರಮಾಂತು° ಕು. ಆಂಜೇಲಿನ್ ಡಿಸೋಜ ಹಾಂಚೊ 'ಮ್ಹಜ್ಯಾ ಜಿವಿತಾಚಿ ಪಂಣ್ತಿ' ಕವಿತಾ ಸಂಗ್ರಹ ಮೊಕಳಿಕ ಜಾಲೆ°. ರೆಜಿಸ್ಟ್ರಾರ್ ಆಲ್ವಿನ್ ಡೆಸಾನ್ ಪುಸ್ತಕಾಚೆ ವಳಕ ಕರನು ದಿಲೆಂ. ಮಾಲ್ಗಡೆ ಮಾ. ಬಾ. ಲಿಯೊ ಸೋಜ್, ಕಾಲೇಜೀಚೆ ಪ್ರಾಶುಂಪಾಲ ಮಾ .ಬಾ. ದೊ. ಪ್ರವೀಣ್ ಮಾರ್ಟಿಸ್ ಕಾರ್ಯಾಚೆ ಅಧ್ಯಕ್ಷ ಮಾ. ಬಾ. ಮೆಲ್ಯಿನ್ ಪಿಂಟೊ ರೆಕ್ಟರ್ ಹಾಜರ ಆಶಿಲೆ. ವಿಭಾಗಚಿ ಮುಖ್ಯಸ್ಥಾ ಫ್ಲೋರ ಕಾಸ್ತೆಲಿನೊನ ಸ್ವಾಗತಾಚೆ ಉತ್ರ° ಸಾಂಗಲಿ°. ಕು. ರೀಶಲ್ ಡಿಸೋಜಾನ ಆಬಾರ ಮಾನಲೊ. ರಾಹುಲ್ ನೊರೊನ್ಹಾನ ಸೂತ್ರ ಸಂಚಾಲನ ಕೆಲೆ°. ಉಪರಾಂತ ಸಂದೀಪ ಮಲಾನಿಲೆ° "ಮಾ ಸಿನೇಮ ಹೈ" ಫಿಲ್ಮ್ ಪ್ರದರ್ಶಿತ ಜಾಲೆ°.

भारतीय इतिहासांत दोन महा पुरुशांक साम्य आसा. गौड पादाचार्यांलो शिश्योत्तर शिश्य आदी शंकराचर्यान साधारण 1500 वर्सांचे फ़ाटी भारतीय लोकां मद्धी उपनिशदादी आध्यात्म ज्ञान उणे जाल्ले वेळार सगळेय भारताचे भौंडी मारुन जागृत केलें. 130 वरसां फ़ाटी भारतीय लोकां मद्धी देशीय अस्मिताय उणे जाल्ले वेळार सगळे संसारांत भौंडी मारुन स्वामी विवेकानंदान जाग्रत केलें. तागेले जल्म शताब्दीचें इमारत (1863-1963) 1963 तुं मैसूर श्री रामकृष्ण विध्याशालेंत हांवें दाखल जाले वेळार उग्तावण जालें आनी तें ‘स्वामिजी शत्मान ब्लाक’ तुं हांवं पयलो छात्र जावुन प्रवेश करून एक वरस तांतु आशिलो. हांवें तांतु प्रवेश केल्लो दिवस स्वामी विविकानंदान मेगेले प्रज्ञेंत प्रवशे केल्लो आनी आज मेरेन मेगेलो मार्गदर्शक जावुन आसा. कष्टाचे वेळार धीर सुटनाशीं सुखाचे वेळार सोय सुटानासी ताणे चिंतनेंत श्पश्टताय, कायकांत उमेदी “उत्तिश्ट्त, जाग्रत, प्राप्यवरानिबोधत” म्हळ्ळी  वाट दाखयली. जानवरी १२ तारिकेचे स्वामिजीले 160 जल्मदिवसाक शत प्रणाम.

प्रो. डा. कस्तुरी मोहन पै

ಮಂಗಳೂರು : ಕೆನರಾ ಹೈಸ್ಕೂಲ್ ಹಳೆ ವಿದ್ಯಾರ್ಥಿ ಸಂಘಾಚೆ 96ವೆ° ವಾರ್ಷಿಕೋತ್ಸವ ಆರತಾ° ಕೆನರಾ ಹೈಸ್ಕೂಲ್ ಡೊಂಗರಕೇರಿ ವಠಾರಾಂತ ಚಲೊ. ಕೆನರಾ ಹೈಸ್ಕೂಲ್ ಹಾಜಿ ಮುಖ್ಯ ಶಿಕ್ಷಕಿ ಅರುಣಾ ಕುಮಾರಿ ಕಾರ್ಯಕ್ರಮಾಚಿ ಅಧ್ಯಕ್ಷಾ ಆಶಿಲಿಂತಿ. ನಾವಾದಿಕ ಹೃದ್ರೋಗ ತಜ್ಞ ಡಾ. ಡಿ. ನರಸಿಂಹ ಪೈ ಆನಿ ತಾಂಗೆಲಿ ಬಾಯಲ ಡಾ. ಶ್ರೀಲಕ್ಶ್ಮೀ ಎನ್. ಪೈ ಮುಖೆಲ ಸೊಯ್ರೆ ಆಶಿಲೆ. ಮಂಗಳೂರು ದಕ್ಷಿಣ ಶಾಸಕ, ಶಾಳೆಚೊ ಹಳೆ ವಿದ್ಯಾರ್ಥಿ ಡಿ ವೇದವ್ಯಾಸ್ ಕಾಮತ್ ಮಾನಾಚೆ ಸೊಯ್ರೆ ಆಶಿಲೆ. ಕೆನರಾ ಹೈಸ್ಕೂಲ್ ಅಸೋಸಿಯೇಷನ್ ಹಾಜೊ ಅಧ್ಯಕ್ಷ ಡಿ. ವಾಸುದೇವ ಕಾಮತ್ ಆನಿ ಕಾರ್ಯದರ್ಶಿ ರಂಗನಾಥ್ ಭಟ್ ಉಪಸ್ಥಿತ ಆಶಿಲಿಂತಿ. ವಿದ್ಯಾರ್ಥಿಯಾಂಕ ವಿದ್ಯಾರ್ಥಿವೇತನ ದಿವಚೆ° ಆನಿ ಹಳೆ ವಿದ್ಯಾರ್ಥಿ ಸಂಘಾಚೆ ವಾರ್ಷಿಕೋತ್ಸವ ಪ್ರಯುಕ್ತ ಚಲೆಲೆ ವೆಗವೆಗಳೆ ಕ್ರೀಡಾ ಸ್ಪರ್ಧೆಚೆ ವಿಜೇತಾಂಕ ಇನಾ° ವಾಂಟಪ ಜಾಲೆ°. ಕೆನರಾ ಶಾಳೆಚೆ ಹಳೆ ವಿದ್ಯಾರ್ಥಿ ಆನಿ ಸಮಾಜಾಂತ ತಾಂಗತಾοಗೆಲೆ ಕ್ಷೇತ್ರಾಂತ ಸಾಧನಾ ಕೆಲೆಲೆ ಲೋಕಾಂಕ ಸನ್ಮಾನ ಚಲೊ.

ಪೈ ಸೇಲ್ಸ್ ಸುಜುಕಿ ಹಾಜೆ ಮಾಲಕ ಟಿ. ಗಣಪತಿ ಪೈ, ತುಳು ಚಿತ್ರರಂಗಾಚೊ ನಾವಾದಿಕ ನಿರ್ದೇಶಕ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್, ಡೈರೆಕ್ಟರೇಟ್ ಜನರಲ್ ಆಫ್ ಜಿ.ಎಸ್.ಟಿ ಇಂಟೆಲಿಜೆοಟ್ಸ್ ಮಂಗಳೂರು ಹಾಜೊ ಡೆಪ್ಯೂಟಿ ಡೈರೆಕ್ಟರೇಟ್ ಜನರಲ್ ಸಚಿನ್ ಕಾಮತ್ ಅಳಕೆ ಐ.ಆರ್.ಎಸ್, ಎಸ್.ಐ.ಆರ್.ಸಿ ಆಫ್ ಐ.ಸಿ.ಎ.ಐ ಹಾಜೆ ಮಂಗಳೂರು ಬ್ರಾಂಚಾಚೊ ಚೇರ್‌ಮ್ಯಾನ್ ಸಿ.ಎ ಪ್ರಸನ್ನ ಶೆಣೈ ಎಂ, ಕೆ.ಎಂ.ಸಿ ಮಂಗಳೂರು ಹಾಜೆ ಫಾರೆನ್ಸಿಕ್ ಮೆಡಿಸಿನ್ ವಿಭಾಗಾಚೆ ಡಾ. ಖ. ಸುರೇಶ್ ಕುಮಾರ್ ಶೆಟ್ಟಿ ಹಾಂಕಾ° ಸನ್ಮಾನ ಚಲೊ. ಹಳೆ ವಿದ್ಯಾರ್ಥಿ ಸಂಘಾಚೊ ಅಧ್ಯಕ್ಷ ಅಶೋಕ್ ಪೈ ಎಂ. ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ಉಪಾಧ್ಯಕ್ಷ ಸಂತೋಷ್ ವಿ. ಪ್ರಭುನ ವರದಿ ವಾಚಲಿ. ಕಾರ್ಯದರ್ಶಿ ಡಿ. ವಿಕ್ರಮ್ ಪೈನ ಆಬಾರ ಮಾನಲೊ. ಸಂಘಾಚೊ ಖಜಾಂಚಿ ಸುಧೀರ್ ಭಗತ್, ಸಹ ಕಾರ್ಯದರ್ಶಿ ಸಿ.ಎ ಜಗನ್ನಾಥ್ ನಾಯಕ, ದಿನಕರ್ ಕಾಮತ್, ಎಂ. ನರಸಿಂಹ ಭಟ್, ಗೋಪಾಲ್ ಕೃಷ್ಣ ಕಾಮತ್, ವರುಣ್ ಶೆಣೈ, ಅಶ್ವಿನ್ ಭಟ್, ವಿಠ್ಠಲ್‌ದಾಸ್ ಕಾಮತ್ ಉಪಸ್ಥಿತ ಆಶಿಲಿಂತಿ. ಎನ್. ರತ್ನಾಕರ್ ಕುಡ್ವ° ಹಾಂನಿ° ಸೂತ್ರ ಸಂಚಾಲನ ಕೆಲೆ°. ಸಭಾ ಕಾರ್ಯಕ್ರಮಾಚೆ ಉಪರಾಂತ ಎಂ. ದಿನೇಶ್ ಭಟ್ ಹಾಂನಿ° ಬರೊವನು ನಿರ್ದೇಶನ ಕೆಲೆಲ ಕೊಂಕಣಿ ಹಾಸ್ಯಮಯ ಸಾಮಾಜಿಕ ನಾಟಕ “ಓಲ್ಡ್ ಫರ್ನಿಚರ್” ಹಾಜೆ° ಪ್ರದರ್ಶನ ಜಾಲೆ°.

ಮಂಗಳೂರು: ವಿಶ್ವ ವಿದ್ಯಾನಿಲಯ ಸಂಧ್ಯಾ ಕಾಲೇಜಾಚೆ "ವಿದ್ಯಾರ್ಥಿ ಸಂಘ 2022-23" ಹಾಜೆ° ಉಗ್ತಾವಣ ಡಿ. 19ಕ ಮಂಗಳೂರು ವಿಶ್ವವಿದ್ಯಾನಿಲಯಾಚೊ ಉಪಕುಲಪತಿ ಪ್ರೊ. ಪಿ. ಎಸ್. ಯಡಪಡಿತ್ತಾಯ ಹಾಂನಿ° ದಿವೊ ಲಾವನು ಕೆಲೆ°. ರವೀಂದ್ರ ಕಲಾಭವನಾಂತು° ಘಡಲೆಲೆ ಹ್ಯಾ ಕಾರ್ಯಕ್ರಮಾಂತು° ಮಂಗಳೂರು ವಿಶ್ವವಿದ್ಯಾನಿಲಯಾಚೆ ಸಿಂಡಿಕೇಟ್ ಸದಸ್ಯ ರವಿಚಂದ್ರ ಪಿ. ಎಂ. ಆನಿ ರೇಡಿಯೋ ಜಾಕಿ -ಸ್ವತಂತ್ರೋದ್ಯೋಗಿ ಆರ್. ಜೆ. ನಯನಾ ಶೆಟ್ಟಿ ಮಾನಾಚೆ ಸೊಯ್ರೆ ಆಶಿಲೆ. ಕಾಲೇಜಾಚಿ ಪ್ರಾಂಶುಪಾಲಾ ಡಾ. ಸುಭಾಷಿಣಿ ಶ್ರೀವತ್ಸ ಸಭೆಚಿ ಅಧ್ಯಕ್ಷಾ ಆಶಿಲಿ.

ವಿದ್ಯಾರ್ಥಿ ಸಂಘಾಚೊ ಸಹಾಯಕ ನಿರ್ದೇಶಕ ಡಾ. ಜಗದೀಶ್ ಬಿ. ಹಾಂನಿ° ಪ್ರತಿಜ್ಞಾವಿಧಿಚಿ ಭೋದನಾ ಕೆಲೆ°. ವಿದ್ಯಾರ್ಥಿ ಕ್ಷೇಮಪಾಲಕ ಡಾ. ಮಾಧವ ಎಂ. ಕೆ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ಎಂ. ಎ. ಕೊಂಕಣಿ ಸಂಯೋಜಕ ಡಾ. ದೇವದಾಸ್ ಪೈ, ಜಿ. ಎಸ್ .ಟಿ ಡಿಪ್ಲೊಮಾಚೊ ಸಂಯೋಜಕ ಡಾ. ಯತೀಶ್ ಕುಮಾರ್, ವಿ. ವಿ. ಕಾಲೇಜಾಚಿ ಪ್ರಾಂಶುಪಾಲಾ ಡಾ. ಅನಸೂಯಾ ರೈ ಉಪಸ್ಥಿತ ಆಶಿಲಿಂತಿ. ಮಧುಶ್ರೀ ಜೆ. ಶ್ರೀಯಾನ್ ಹಾಂನಿ° ಸೂತ್ರ ಸಂಚಾಲನ ಕೆಲೆ°. ಶ್ರೀ ಗಣೇಶ್ ಆನಿ ಪಂಗಡಾನ ಪ್ರಾರ್ಥನಾ ಗಾಯಲಿ. ಆಶಾಲತಾ, ಸಂತೋಷ ಆನಿ ದುರ್ಗಾ ಮೆನನ್ ಹಾಂನಿ° ಸೊಯ್ರೆಲೊ ವಳಕ ಕರನು ದಿಲೊ. ವಿದ್ಯಾರ್ಥಿ ಸಂಘಾಚಿ ಅಧ್ಯಕ್ಷಾ ಪ್ರತಿಭಾ ಜೆ ಹಾಂನಿ° ಆಭಾರ ಮಾನಲೊ. ಕಾರ್ಯದರ್ಶಿ ಸ್ವಾತಿ, ಜಂಟಿ ಕಾರ್ಯದರ್ಶಿ ಶಶಾಂಕ್, ಲಲಿತಕಲಾಚೊ ಕಾರ್ಯದರ್ಶಿ ಶ್ರೀ ಗಣೇಶ್ ಆಚಾರ್ಯ, ಲಲಿತಕಲಾಚೊ ಜಂಟಿ ಕಾರ್ಯದರ್ಶಿ ಕು. ನಿಮಿತಾ ವೇದಿಕೆರಿ ಉಪಸ್ಥಿತ ಆಶಿಲಿಂತಿ.

ಮಂಗಳೂರು: ಲಮಿನಾ ಸಸ್ಪೆನ್ಶನ್ ಪ್ರಾಡಕ್ಟ್÷್ಸ ಆನಿ ಕೊಂಕಣಿ ಸಾಂಸ್ಕೃತಿಕ ಸಂಘ ಹಾಜೊ ಸ್ಥಾಪಕ ಸದಸ್ಯ ತೊನ್ಸೆ ರಮೇಶ ಶೆಣೈ (ಟಿ.ಆರ್.ಶೆಣೈ) ಹಾಂನಿ° 85 ವರಸ ಪ್ರಾಯೆರಿ ಆಜಿ (ಡಿ.15) ಕೊಡಿಯಾಲ ಗುತ್ತು ವೆಸ್ಟಾಚೆ ತಾಂಗೆಲೆ ಸ್ವಗೃಹಾಂತು° ಅಂತರಲೆ.
ಉಡುಪಿಚೆ ಡಾಕ್ಯುಮೆಂಟ್ ರೈಟರ್ ಎಂ. ಗೋಪಾಲಕೃಷ್ಣ ಶೆಣೈ ಆನಿ ಶಾಂತಾ ಶೆಣೈ ಹಾಂಗೆಲೆ ಸ್ಹ ಚೆರಡುವಾ° ಪಯಕಿ ಎಕ ಜಾವನು ಜಲ್ಮಾಕ ಆಯಿಲೆ ಹಾಂನಿ° ಮುಳಾವೆ ಶಿಕ್ಷಣ ಉಡುಪಾಚೆ ಕ್ರಿಶ್ಚಿಯನ್ ಹೈಸ್ಕೂಲ್ ಹಾಂಗಾ ಕರತರಿ, ಎಂ.ಜಿ.ಎಂ ಕಾಲೇಜಾಂತು° ಪಿ.ಯು.ಸಿ ಆನಿ ರಾಂಚಿಚೆ ಬಿರ್ಲಾ ಇನ್ಸ್ಟಿಟೂಟ್ ಆಫ್ ಟೆಕ್ನಾಲಜಿ (BIT) ಹಾಂಗಾ ಮೆಕ್ಯಾನಿಕಲ್ ಇಂಜಿನಿಯರಿοಗಾοತು° ಬಿ. ಟೆಕ್ ಪದವಿ ಫಾವೊ ಕೆಲೆಲಿ. ಉಪರಾಂತ ಹಾಂನಿ° ಮಂಗಳೂರಚೆ ಕೆನರಾ ವರ್ಕ ಶಾಪ್ಸ್ ಲಿ. ಹಾಂತು° ಪ್ರೋಡಕ್ಷನ್ ಇಂಜಿನಿಯರ್ ಜಾವನು 15 ವರಸ° ಕಾಮ ಕೆಲಾ°. ದಾರ್ಶನಿಕ ವಿ. ಎಸ್. ಕುಡ್ವ ಹಾಂಗೆಲೆ ಸಕಲ ತರಬೇತಿ ಫಾವೊ ಕೆಲೆಲೆ ಹಾಂನಿ° ತಾಕಾ ಮಾರ್ಗದರ್ಶಕ ಮ್ಹಣು ಮಾನತಲೆ.
1976 ಇಸವಿಂತು° ಹಾಂನಿ° ತಾಂಗೆಲೊ ದೊಸ್ತು ಎನ್. ವಿನಯ್ ಹೆಗ್ಡೆ ಹಾಂಗೆಲೆ ಸಾಂಗತ ಮೇಳನು ಲಮಿನಾ ಸಸ್ಪೆನ್ಷನ್ ಪ್ರಾಡಕ್ಟ್ ಲಿ. ಕಂಪನಿ ಶುರು ಕೆಲಿ. ಆಜಿ ತಿ ಕಂಪನಿ ವಾಡೂನು ಹಜಾರಾಕಯಿ ಚಡ ಲೋಕಾಂಕ ಉದ್ಯೋಗ ದಿತಾ ಆಸಾ.
ಸಾಮಾಜಿಕ ಕಾಳಜಿ ಆಶಿಲೆ ಹಾಂನಿ° 1981 ಇಸವಿಂತು° ದೇವಾದಿನ ಜಿ. ಜಿ. ವಾಸುದೇವ ಪ್ರಭು ಹಾಂನಿ° ಸ್ಥಾಪನ ಕೆಲೆಲೆ ಕೊಂಕಣಿ ಸಾಂಸ್ಕೃತಿಕ ಸಂಘ ಮಂಗಳೂರು ಹಾಜೆ ಸ್ಥಾಪಕ ಸದಸ್ಯ ಜಾವನು ಮಾತೃ ಭಾಸ ಕೊಂಕಣಿಚೆ ಸೇವಾ ಕೆಲೆಲಿ ಆಸಾ.
ಬಾಯಲ ಮೋಹಿನಿ ಶೆಣೈ, ಎಕಿ ದ್ಹುವ, ದೋಗ ಪುತಾಂಕ, ಆಪಾರ ಅಭಿಮಾನಿ ಲೊಕಾಂಕ ಸೊಡೂನ ತಾಂನಿ° ಗೆಲ್ಯಾಂತಿ.

ಮಂಗಳೂರು: ಹಾಂಗಾಚೆ ರಾಮಕೃಷ್ಣ ಮಠಾಚೆ ನಿಕಟಪೂರ್ವ ಅಧ್ಯಕ್ಷ ಪೂಜ್ಯ ಸ್ವಾಮಿ ಪೂರ್ಣಕಾಮಾನಂದಜಿ ಮಹಾರಾಜ್ ಹಾಂನಿ° ಡಿ.15ಕ ಸಕಾಳಿ ಮಹಾಸಮಾಧಿ ಜಾಲೆ. 81 ವರಸ ವಯಾಚೆ ಪೂಜ್ಯ ಸ್ವಾಮಿಜಿ, ಶ್ರೀಮಾತೆ ಶಾರದಾದೇವಿಲೆ ಜನ್ಮ ಜಯಂತಿ ದಿವಸು ಸಕಾಳಿ 6.15ಕ ಹೃದಯಾಘಾತಾನ ಅಂತರಲೆ. ಮಂಗಳೂರು ರಾಮಕೃಷ್ಣ ಮಠಾಚೆ ವಠಾರಾಂತು° ಆಜಿ ದೋನಪಾರ 3 ದಾಕುನ 4 ಗಂಟೆ ತಾಂಯ ಪಾರ್ಥಿವ ಶರೀರಾಚೆ ದರ್ಶನ ಘೆವಚಾಕ ಭಕ್ತ ಲೋಕಾಂಕ ವ್ಯವಸ್ಥಾ ಕೆಲ್ಯಾ ಮ್ಹಣು ರಾಮಕೃಷ್ಣ ಮಠ, ಮಂಗಳೂರು ಹಾಂನಿ° ಕಳವಣಿಂತು° ಸಾಂಗಲಾ°.