ಬೆಂಗಳೂರು: ಸಂಗೀತ ನೃತ್ಯ ಅಕಾಡೆಮಿ ಹಾಂನಿ° 2020 ವರಸಾಚಿ ಕರ್ನಾಟಕ ಕಲಾಶ್ರೀ ಪ್ರಶಸ್ತಿ ನಾವಾದಿಕ ತಬಲಾ ವಾದಕ ಮಣಿಪಾಲಚೆ ಟಿ. ರಂಗ ಪೈ ಹಾಂಕಾ° ಪ್ರಧಾನ ಕೆಲ್ಯಾ. ಆರತಾ°(ಜ.14)ಕ ಬೆಂಗಳೂರಚೆ ರವೀಂದ್ರ ಕಲಾಕ್ಷೇತ್ರಾಂತು° ಘಡಲೆಲೆ ಕಾರ್ಯಕ್ರಮಾಂತು° ಮ್ಹಾಲ್ಗಡೊ ಗಾಯಕ ಗರ್ತಿಕೆರೆ ರಾಘವೇಂದ್ರ ಹಾಂನಿ° ಪ್ರಶಸ್ತಿ ಪ್ರಧಾನ ಕೆಲಿ. ಕೊವಿಡ್ ಪಾಸಿಟಿವ್ ಜಾಲೆಲ್ಯಾನ ಮಖೇಲ ಮಂತ್ರಿ ಬಸವರಾಜ ಬೊಮ್ಮಾಯಿ ಆನಿ ಕನ್ನಡ ಆನಿ ಸಂಸ್ಕೃತಿ ಮಂತ್ರಿ ಇಲಾಖೆಚೊ ಸುನಿಲಕುಮಾರ್ ಹಾಂಗೆಲೆ ಅನುಪಸ್ಥಿತಿರಿ ಹೊ ಕಾರ್ಯಕ್ರಮ ಚಲೊ. ರಂಗ ಪೈ ಹಾಂನಿ° ಸಾಬಾರ ದಶಕಾ ದಾಕೂನ ನಾವಾದಿಕ ಹಿಂದುಸ್ಥಾನಿ ಸಂಗೀತಗಾರಾοಕ ತಬಲಾ ಸಾಥ ದಿಲೆಲೆ ಆಸಾ. ಹಾಂನಿ° ಮಣಿಪಾಲಚೆ ಡಾ| ಟಿ.ಎಂ.ಎ. ಪೈ ಪಾಲಿಟೆಕ್ನಿಕ್ ಹಾಂಗಾ ಪ್ರಾಂಶುಪಾಲ ಜಾವನು ಸೇವಾ ದಿತಾ ಆಸಾತಿ.

ಉಡುಪಿ: ‘ಪಂಚ್ಕದಾಯಿ’ ಕೊಂಕಣಿ ಮಾಸಿಕ ಪತ್ರಿಕೆಚೊ ಆದಲೊ ಸಂಪಾದಕ ಬಂಟ್ವಾಳ ಶಾಂತರಾಮ ಬಾಳಿಗಾ ಹಾಂಕಾ° ಆಜಿ(ಡಿ. 18) ಉಡುಪಾಚೆ ಅದಮಾರು ಮಠಾಚೆ ಶ್ರೀ ಶ್ರೀ ಈಶಪ್ರೀಯ ತೀರ್ಥ ಶ್ರೀಪಾದ ಸ್ವಾಮೀಜಿ ಹಾಂನಿ° ತಾಂಗೆಲೆ ಪ್ರಥಮ ಪರ್ಯಾಯಾಚೆ ದೀಕ್ಷಾ ವಿಶ್ವಾರ್ಪಣ ಕಾರ್ಯಕ್ರಮಾಂತು° ‘ಸಾಹಿತ್ಯ ಶೇಖರಾ’ ಪ್ರಶಸ್ತಿ ದೀವನು ಸಮ್ಮಾನ ಕೆಲೊ. ಉಡುಪಿ ಮಠಾಚೆ ರಾಜಾಂಗಣಾoತು° ಘಡಲೆಲೆ ಹ್ಯಾ ಕಾರ್ಯಕ್ರಮಾಂತು° ಶ್ರೀ ಕಾಶೀ ಮಠಾಧೀಶ ಶ್ರೀಮದ್ ಸಂಯಮೀoದ್ರ ತೀರ್ಥ ಸ್ವಾಮೀಜಿ ಉಪಸ್ಥಿತ ಆಶಿಲೆ. 
ಕಲ್ಯಾಣಪುರಚೆ ದೇವಾದಿನ ಕೃಷ್ಣ ಬಾಳಿಗಾ ಆನೀ ದೇವಾದಿನ ರಮಾ ಬಾಳಿಗಾ ಹಾಂಗೆಲೊ ಪೂತು ಜಾವನು ಆಸಚೆ ಬಿ. ಶಾಂತರಾಮ ಬಾಳಿಗಾ ಹಾಂಗೆಲೆ° ಮೂಳಾವೆ ಶಿಕ್ಷಣ ಬಂಟ್ವಾಳಚೆ ಎಸ್. ವಿ. ಎಸ್ ಪ್ರೌಡ ಶಾಳೆಂತು° ಜಾಲೆಲೆ°. ಉಪರಾಂತ ಚಾಳಿಸ ವರಸ° ಹಾಂನಿ° ಅಂಚೆ-ತoತಿ ಇಲಾಖೆಂತು° ಸೇವಾ ದಿವನು ನಿವೃತ್ತ ಜಾತರಿ ‘ಪಂಚ್ಕದಾಯಿ’ ಕೊಂಕಣಿ ಮಾಸಿಕ ಪತ್ರಿಕೆಚೆ ಸಂಪಾದಕ ಜಾಲೆ. ಕನ್ನಡ – ಕೊಂಕಣಿ, ಕನ್ನಡ – ಇಂಗ್ಲಿಷ್, ಇಂಗ್ಲಿಷ್ – ಕೊಂಕಣಿ ಅಣಕಾರಾಂತು° ಪಂಡಿತ ಆಶಿಲೆ ಹಾಂನಿ° ಖೂಬ ಲೇಖನ° ಆನೀ ಪುಸ್ತಕ° ಅಣಕಾರ ಕರನು ಪ್ರಕಟ ಕೆಲೆಲೆ° ಆಸಾ. ಸ್ವತ: ಗೀತ ರಚನ ಕರನು ಸಂಗೀತ ಸಂಯೋಜನ ಕರತಲೆ ಹಾಂನಿ° ಸಾಬಾರ ಕ್ಯಾಸೆಟ° ಫಾಯಸ ಕೆಲ್ಯಾಂತಿ. ಉಡುಪಾಂತು° ಘಡಲೆಲೆ ಪುರಂದರದಾಸ ನಿರ್ವಾಣ ಚತುಶತಮಾನ ಸಂಭ್ರಮಾಚೆ ವೇಳಾರಿ ‘ಪುರಂದರದಾಸರು’ ಮ್ಹಳೆಲೆ ಗೀತ ನಾಟಕ ರಚನ ಕರನು ಸ್ವತ: ಪುರಂದರದಾಸಲೆ ಪಾತ್ರ ಹಾಂನಿ° ನಿರ್ವಹಣ ಕೆಲೆಲೆ° ಆಸಾ. ‘ಸಚತುಶಾಖಾ ಸುಭಾಷಿತ ಗಂಗಾ’ ಆನೀ ‘ದ್ವಾದಶ ಪಂಜರಿಕಾ’ ತಸಲೆ ಕೃತಿ ಸುತಾ ರಚನ ಕೆಲೆಲೆ ಹಾಂಗೆಲೆ° ವಿದ್ವತ್ ಮನೂನ ಘೆವನು ಉಡುಪಿ ಪರ್ಯಾಯ ಸ್ವಾಮಿಜಿನ ಹಾಂಕಾ° ‘ಸಾಹಿತ್ಯ ಶೇಖರಾ’ ಪ್ರಶಸ್ತಿ ದೀವನು ಸಮ್ಮಾನ ಕೆಲಾ. ಹ್ಯಾ ಸಂದರ್ಭಾರಿ ಮಂಗಳೂರು ದಕ್ಷಿಣ ಶಾಸಕ ವೇದವ್ಯಾಸ ಕಾಮತ ಆನೀ ಉಡುಪಿ ಶಾಸಕ ರಘುಪತಿ ಭಟ್ ಉಪಸ್ಥಿತ ಆಶಿಲೆ. 

ಅತ್ಯುತ್ತಮ ಕೊಂಕಣಿ ಪುಸ್ತಕ ಪುರಸ್ಕಾರಾಕ ಪುಸ್ತಕ ಆಮಂತ್ರಿತ
ಡಾ.ಟಿ.ಎo.ಎ.ಪೈ ಅತ್ಯುತ್ತಮ ಪುಸ್ತಕ ಪುರಸ್ಕಾರ – 2020 ಕ ಕೊಂಕಣಿ ಪುಸ್ತಕ ಆಮಂತ್ರಿತ ಕೆಲ್ಲಾ. ಅಂತಿಮ ದಿವಸ ಸೆಪ್ಟೆಂಬರ್ 30, 2021. ಚಡ್ತಾವತ ಮಾಹಿತಿಕ www.drtmapaifoundation.com ಸಂಪರ್ಕ ಕರಾತಿ.