ಮಂಗಳೂರು: ಫೈರ್ & ಸೇಫ್ಟಿ ಆನಿ ಎಚ್‌ಎಸ್‌ಇ ಕ್ಷೇತ್ರಾಂತು° ಮಾಕ್ಷಿಚೆ 16 ವರಸ ದಾಕೂನ ನಿರಂತರ ಸಾಧನಾ ಕರನು 17 ಹಜಾರಾಕಯೀ ಚಡ ವಿದ್ಯಾರ್ಥಿಯಾಂಕ ದೇಶ ವಿದೇಶಾಂತು° ಉದ್ಯೋಗ ಆಸಾ ಕೆಲೆಲೊ ವಿದ್ಯಾಸಂಸ್ಥೊ ಮಂಗಳೂರು ಇನ್ಸ್ಟಿಟ್ಯೂಟ್ ಆಫ್ ಫೈರ್ & ಸೇಫ್ಟಿ ಇಂಜಿನಿಯರಿಂಗ್ (ಎಂಐಎಫ್‌ಎಸ್‌ಇ) ಹಾಕಾ 2023 ವರಸಾಚೆ ಇಕಾನಮಿಕ್ಸ್ ಬಿಸಿನೆಸ್ ಟೈಮ್ಸ್ ಅವಾರ್ಡ್ ಲಾಭಲ್ಯಾ. ಬಾಲಿವುಡ್ ನಟಿ ರಿಷಿ ಖನ್ನಾ ಹೀಣೆ ಎಂಐಎಫ್‌ಎಸ್‌ಇ ಅಧ್ಯಕ್ಷ ವಿನೋದ್ ಜಾನ್ ಆನಿ ವ್ಯವಸ್ಥಾಪಕ ನಿರ್ದೇಶಕ ಮನೋಜ್ ಪಿ.ವಿ. ಹಾಂಕಾ° ಪುರಸ್ಕಾರ ಹಾತಾಂತರ ಕೆಲೊ.

ಎಂಐಎಫ್‌ಎಸ್‌ಇ ಹಾಂನಿ° ಮಾಕ್ಷಿಚೆ 15 ವರಸಾಂತು° ಉದ್ಯೋಗ ಕ್ಷೇತ್ರಾಂತು° ಕೆಲೆಲೆ ಸಾಧನಾ, ಸಂಸ್ಥೆοತು° ಶಿಖಿಲೆ ವಿದ್ಯಾರ್ಥಿಯಾಂಕ ಶಿಖವಣೆಚೆ ವರಸಾಂತೂಚಿ ದೇಶ ವಿದೇಶಾಂತು° ಉದ್ಯೋಗ ಮೇಳಚೆ°, ಬರೆ° ಸ್ಥರಾಚೆ° ಶೈಕ್ಷಣಿಕ ವಿಧಾನ°, ರಾಜ್ಯಾಂತ 9 ಶಾಖೆ, ಪ್ರಸಿದ್ಧ 3 ವಿಶ್ವವಿದ್ಯಾನಿಲಯಾಂಚೆ° ಮಾನ್ಯತಾ ಆನಿ ಸ್ಕಿಲ್ ಇಂಡಿಯಾ:ಎನ್‌ಎಸ್‌ಡಿಸಿ ಮಾನ್ಯತಾ ಆಶೆ° ಖೂಬ ವಿಷೇಶತಾ ಮನೂನ ಘೆವನು ಹೊ ಪರುಸ್ಕಾರ ತಾಂಕಾ° ಫಾವೊ ಜಾಲಾ. ಎದೋಳೂಚಿ 2014 ತು° ಇಂಡಿಯಾ ಎಜುಕೇಶನಲ್ ಎಕ್ಸಲೆನ್ಸ್ ಅವಾರ್ಡ್ ಆನಿ 2016 ತು° ನವದೆಹಲಿಚೆ ವರ್ಲ್ಡ್ವೈಡ್ ಅಚೀವರ್ಸ್ ಹಾಂಗೆಲೆ° ಏಷಿಯಾ ಎಜುಕೇಶನಲ್ ಸಮಿಟ್ ಅವಾರ್ಡ್ ಹಾಂಕಾ° ಫಾವೊ ಜಾಲೆಲೆ° ಆಸಾ.

ಚೌತೆ° ವೈದಿಕ್ ಪ್ರೀಮಿಯರ್ ಲೀಗ್
ಮೂಡುಬಿದಿರೆ: ವೈದಿಕ ಲೋಕಾಲೆ ಖಾತಿರ ಬಂಟ್ವಾಳ ಮಾಣಿಚೆ ಬರಿಮಾರು ಶ್ರೀ ಮಹಾಮಾಯ ದೇವಳಾಚೆ ಮೈದಾನಾಂತು° ಚಲೆಲೆ ಚೌತೆ° ವರಸಾಚೆ ವೈದಿಕ್ ಪ್ರೀಮಿಯರ್ ಲೀಗ್ ಕ್ರಿಕೆಟ್ ಟರ‍್ನಾಮೆಂಟಾοತು° ಮೂಡುಬಿದಿರೆಚೆ ಸುಧೇಶ್ ಭಟ್ ಮುಖೇಲಪಣಾಚೆ ಭಟ್ಜೀಸ್ ಸೂಪರ್ ಕಿಂಗ್ಸ್ ಪಂಗಡಾನ ಚೌತೆ ಪಾವಟಿ ಫೈನಲ್ ಪ್ರವೇಶ ಕರನು ಸತತ ತಿಸ್ರೆ ಪಾವಟಿ ವಿಪಿಎಲ್ ಟ್ರೋಫಿ ಜೀಕಚೆ° ಜಾಲಾ°. ಕರ್ನಾಟಕಾ, ಮಹಾರಾಷ್ಟ್ರ, ಕೇರಳ, ದೆಹಲಿ ಅಶೆ° ವೆಗವೆಗಳೆ ಗಾಂವಚೆ 300ಕಯೀ ಚಡ ವೈದಿಕ, ತಾಂಗೆಲೆ ಚೆರಡುಂವಾನಿ ಹ್ಯಾ ಟರ‍್ನಾಮೆಂಟಾοತು° ವಾಂಟೊ ಘೆತಲೊ. ಮುಂಬೈಚೆ ರಾಕಿಂಗ್ ವೈದಿಕ್ಸ್ ಪಂಗಡಾಕ ರನ್ನರ್ಸ್ ಅಪ್ ಪ್ರಶಸ್ತಿ ಫಾವೊ ಜಾಲಿ. ಭಟ್ ಬ್ರರ‍್ಸ ಆನಿ ಅನಂತ ವೈದಿಕ್ಸ್ ಮಂಜೇಶ್ವರ ಪಂಗಡಾοಕ ತಿಸ್ರೆ° ಆನಿ ಚೌತೆ° ಸ್ಥಾನ ಫಾವೊ ಜಾಲೆ°. ಸೂಪರ್ ಕಿಂಗ್ಸ್ ಪಂಗಡಾಚೊ ಮುಖೇಲಿ ಸುಧೇಶ್ ಭಟ್ (ಫೈನಲ್ ಪಂದ್ಯಶ್ರೇಷ್ಠ ) ಮುಂಬೈ ಪಂಗಡಾಚೊ ಅಜಿತ್ ಭಟ್ (ಸರಣಿಶ್ರೇಷ್ಠ) ಸೂಪರ್ ಕಿಂಗ್ಸ್ ಪಂಗಡಾಚೊ ರಾಮನಾಥ್ ಭಟ್ (ಉತ್ತಮ ಬ್ಯಾಟ್ಸಮನ್), ರಾಕಿಂಗ್ ವೈದಿಕ್ಸ್ ಮುಂಬೈ ಪಂಗಡಾಚೊ ವಿನಾಯಕ ಭಟ್ (ಉತ್ತಮ ಬೌಲರ್) ಹಾಂನಿ° ಹೇರ ಪ್ರಶಸ್ತಿ ಫಾವೊ ಕೆಲಿ. ವೈದಿಕ್ ಪ್ರೀಮಿಯರ್ ಲೀಗ್ ಹಾಜೊ ಸಂಸ್ಥಾಪಕ ಆನಿ ಮುಖ್ಯ ಸಂಯೋಜಕ ಪಂಡಿತ್ ಎಂ. ಕಾಶೀನಾಥ್ ಆಚಾರ್ಯ ಮಂಗಳೂರು, ಬರಿಮಾರು ಮಹಾಮಾಯಾ ದೇವಳಾಚೆ ಧರ್ಮದರ್ಶಿ ಬಿ. ರಾಕೇಶ್ ಪ್ರಭು ಆನಿ ಹೇರ ಮ್ಹಾಲ್ಗಡೆ ವೈದಿಕ ಆನಿ ಸಮಾಜ ಭಾಂದವಾನಿ ಉಪಸ್ಥಿತ ಆಸೂನ ಪ್ರಶಸ್ತಿ ಪ್ರದಾನ ಕೆಲೆ°. ಗೋಪಿ ಭಟ್ ಮಂಗಳೂರು ಹಾಂನಿ° ಸೂತ್ರ ಸಂಚಾಲನ ಕೆಲೆ°. ಹರೀಶ್ ಭಟ್ ಮುಂಬೈ, ರಮೇಶ್ ಭಟ್ ಉಡುಪಿ ಹಾಂನಿ° ಸಹಕಾರ ದಿಲೊ.

कोडियाळ: कोंकणी गोंयची राजभास अशें आयज संपूर्ण कोंकणी समाज व्हळखता. पूण ती राजभास कशें जाली? हाची म्हायती कर्नाटकाचे चडशे लोकांक ना. हाचे फ़ाटी कितलें संघर्ष आनी आंदोळन जालां? कितले लोकान वावर केला? हाची संपूर्ण म्हायती पुंजावुन एक प्रसिद्ध पुस्तक ‘कोंकणी राजभास कशें जाली?’ प्रकट केलेलें गोंयचो जेष्ट कोंकणी साहित्यकार संजीव वेरेंकार हानीं. असलो एक जेष्ठ आनी श्रेष्ट साहित्यकार संजीव वेरेंकार आयज ह्या संस्सारा दकून अंतरले म्हणु सांगूंक खूब दुख जाता. तांचे साहित्य कृतीक टी.विमला वी पै विश्व कोंकणी साहित्य पुरस्कार बी लाबला. एक सरळ आनी सज्जन व्यक्ती संजीव बाबाक ६४ वरसां प्राय जालेली. तांचे हें पुस्तक २०१९ नोवेंबर म्हयन्यांत कोंकणीचि जेष्ट मुखैल अरविंदबाब भाटिकार हांचे सांगात मंगळूरच्या प्रो. डा. कस्तुरी मोहन पै हांनी उग्तावण केलेलें. तांका कोडियाल खबर पत्रिकेच्या सगळेय वाचक आनी लेखकांचे तर्पेन काळजा सावुन आर्गां.

ಆಯಿಚ್ಯಾ ದಿಸಾಂತ ‘ಆಮಗೆಲೆ ಶಿಕ್ಷಣಾಂತ ಭಾರತಾಚೊ ಇತಿಹಾಸ ಆನಿ ಸಂಸ್ಕೃತಿ ಪಾಠ್ಯ ಪುಸ್ತಕಾಂತ ನಾ’ ಮ್ಹಣು ದೂಷಣ ಕರತಲ್ಯಾಲೊ ಎಕ ವಾಂಟೊ ವಾಡಲಾ. ತೆ° ಖರೆ ನಂಯ. ತಾಚೊ ಖೂಬ ಜ್ಞಾನ ಶತಮಾನಾ° ದಕೂನ ಪಾಠ್ಯ ಪುಸ್ತಕಾಂತು ಶಿಕ್ಷಕಾನ ದಿಲಾ°. ತಸಲೊ ಎಕ ಮಹಾನ ಶಿಕ್ಷಕ ಆಮಗೆಲೆ ಪೂರ್ವಜ ಆಶಿಲೊ ಮ್ಹಣು ಹ್ಯಾ ಲೇಖನಾಂತ ಹಾಂವೆ° ದಿಲಾ°, ತೊ ಪ್ರತಿಭಾವಂತ ಶಿಕ್ಷಕ ಆಶಿಲೊ ದೇ. ಜೋಡುಮಠ ವಾಮನ ಭಟ್ಟ ಆನಿ ಆಮಿ ಹಾಚೊ ಅಭಿಮಾನ ಪಾವಕಾ. ತಾಣೆ ಇಸವಿ 1953 ತು° ರಚೊವುನ ಇಸವಿ 1959 ಮೆರೆನ ಕರ್ನಾಟಕಾಚೆ ಶಿಕ್ಷಣ ಇಲಾಖೆಂತ ಜಾರಿಕ ಆಶಿಲೆ° ‘ಕನ್ನಡ ಸಾಹಿತ್ಯ ಪಾಠಗಳು’ ಮಳ್ಳೆಲೆ ಕನ್ನಡ ಪಾಠ್ಯ ಪುಸ್ತಕಚ ಹಾಕಾ ಸಾಕ್ಷಿ.

ಹಾಂತು ಭಾರತಾಚೆರ ಆಕ್ರಮಣ ಕೆಲೆಲ್ಯಾ ಎಕ ವ್ಯಕ್ತಿಲೆ° ಎಕಯ ಬಿ ಪಾಠ ನಾ. ಹ್ಯಾ ಪುಸ್ತಕಾಚೆ ಮುಖಪೃಷ್ಠ್ಟ ಬೇಲೂರಚಿ ಶಿಲಾಬಾಲಿಕಾ, ಇತಿಹಾಸಾಂತ ಪ್ರಸಿದ್ಧ ರಾಯ ನೃಪತುಂಗ, ಬಾಪ್ಸುಲೆ ಕಾತಿರ ಘೋರ ಪ್ರತಿಜ್ಞ ಘೆತಿಲೊ ಭೀಷ್ಮ ಪಿತಾಮಹ, ಬಲಿ ಚಕ್ರವರ್ತಿಲೆ° ಔದಾರ್ಯ, ಅಂಗದಾಲೆಂ ರಾಯಬಾರ, ಕಾಳಿದಾಸಾಲೆ ಶಾಕುಂತಲಾ, ಭಾರತಾಂತುಲಿ ಅದ್ಭುತ ಶಿಲ್ಪಕಲೆಂಚಿ ದೆವುಳಾ°, ಪಂಚತಂತ್ರಾತುಲಿ ಶಿವಭೂತಿಚೆ ಕಾಣಿ, ಸಿತೇಚೆ° ವನವಾಸ ಅಶೆ° ಭಾರತಾಚೆ ಸಂಸ್ಕೃತಾಯೆಚೆ ವಿಪುಲ ಮಾಹಿತಿ ಆನಿ ಜ್ಞಾನ ತಾಣೆ ಪಾಠ್ಯ ಪುಸ್ತಕಾಂತ ದಿಲಾ° ಆನಿ ತೀ ಪಾಠ್ಯ ಪುಸ್ತಕಾ° ಶಾಳೆಂತ ಚಾಲತಿಂತ ಆಶಿಲಿ°.

ದೇ. ಜೋಡುಮಠ ವಾಮನ ಭಟ್ಟಾನ ಊರ್ವ ಕೆನರಾ ಶಾಳೆಂತ ಶಿಕ್ಷಣ ದಿಲೆಂ ಆನಿ ಶ್ರೀನಿವಾಸ ಪಾಠಶಾಲಾ ಓರಿಯಂಟಲ್ ಶಾಳೆಂತ ಗೌರವ ಸಂಚಾಲಕ ಜಾವುನ ಸೇವಾ ದಿಲಿ. ಆಪಣ್ಯಾಲೆ ಧೂವಾಂಕ ಶಿಕ್ಷಕಿ ಕೆಲೆ ಆನಿ ತಾನಿಯ ಉತ್ಕೃಷ್ಟ ಗುಣಾಂಚೆ ಶಿಕ್ಷಣ ಹಜಾರಾನಿ ವಿದ್ಯಾರ್ಥಿಯಾಂಕ ದಿಲಾಂ. ಅಸಲೆ ಹಜಾರಾನಿ ಶಿಕ್ಷಕ/ಶಿಕ್ಷಿಕಾನಿ  ಸ್ವತಂತ್ರ ಭಾರತಾಂತ ಆಮಗೆಲಿ ಶ್ರೀಮಂತ ಸಂಸ್ಕೃತಾಯೆಚೆರ ಶೇಕಡ್ಯಾನೆ ಪಾಠ್ಯ ಪುಸ್ತಕಾಂ ರಚಯಲ್ಯಾಂತಿ ಆನಿ ಲೋಕಾಂಕ ದಿಲ್ಯಾಂತಿ. ಅಸಲೆ ಎಕ ಅಪ್ಪಟ ಭಾರತೀಯ ಸಂಸ್ಕೃತಿಚೊ ಶಿಕ್ಷಕಾನ ಆಪಣ್ಯಾಲೆ ಬಾಪುಸು ದೇ. ಟಿ.ವಿ. ರಮಣ ಪೈಕ ಪ್ರಾಥಮಿಕ ಶಿಕ್ಷಣ ದಿಲೆಲೆಂ ಮ್ಹಳ್ಳೆ ಅಭಿಮಾನಾನ ಪೂತು ಟಿ. ವಿ. ಮೋಹನದಾಸ ಪೈನ ಕೊಡಿಯಾಳಕ ಎವುನ ಜೆ. ವಾಮನ ಭಟ್ಟಾನ ಸ್ವರ್ಗಸ್ಥ ಜಾವುನ 35 ವರಸಾಂಚೆ ಉಪರಾಂತ ತಾಣೆ ಸೇವಾ ದಿಲೆಲೆ ಶ್ರೀನಿವಾಸ ಪಾಠಶಾಲಾ ಓರಿಯಂಟಲ್ ಶಾಳೆಕ ನವೆಂ ಇಮಾರತ ಬಾಂದುವುನ ದಿಲೆಂ ಆನಿ ಜೆ. ವಾಮನ ಭಟ್ಟಾಲೆ ಧರ್ಮಪತ್ನಿಕ ಎಕಲಕ್ಷ ರೂಪಯಚೆ ಗುರುದಕ್ಷಿಣಾ ಪಾವಯಲೆಲೆಂ ಇತಿಹಾಸಾಂತ ಎಕ ಮೊಲಾಧಿಕ ಕಾರ್ಯ ಕೆಲೆಂ. ಆಯಚ್ಯಾ ಲೋಕಾನಿ ಆನಿ ರಾಜಕಾರಣಿಯಾನ ಅಸಲೆ ಮಹಾನ್ ಗುರುಂಕ ವಿಸರೂಂಕ ನಂಯ.  

ಮοಗಳೂರು: "ಜೀವನಾಂತು° ಸಲ್ವಣಿ(ಸೋಲು) ಸಹಜ. ತೆ° ಸಾಂಬಾಳನು ಮುಕಾರ ವಚೆ° ಸಫಲತಾ ಜಾತಾ. ಶಿಕ್ಷಣ ಮನಶಾಲೆ ಜೀವನಾಂತು° ಪ್ರಮುಖ ಜಾತಾ. ಚಡ ಶಿಕ್ಷಣ ಮ್ಹಳ್ಯಾರಿ ಚಡ ಆಮದನಿ ಜಾತಾ" ಮ್ಹಣು ಕ್ವೆಷ್ಟ್ ಗ್ಲೋಬಲ್ ಹಾಜೊ ಸಿ.ಇ.ಒ ಆನಿ ಅಜಿತ್ ಪ್ರಭು ಫೌಂಡೇಶನ್ ಹಾಜೊ ಸಂಸ್ಥಾಪಕ ಅಜಿತ್ ಪ್ರಭು ಹಾಂನಿ° ಸಾಂಗಲಾ°. ಕೊಡಿಯಾಲಚೆ ಕೆನರಾ ಶಾಳೆಚೆ ಸುಧೀಂದ್ರ ಸಭಾಗೃಹಾಂತು° ಮುಂಬಯಿಚೆ ಜಿ.ಎಸ್.ಬಿ. ಸ್ಕಾಲರಶಿಪ್ ಲೀಗ್ ಆನಿ ಪ್ರಭು ಫ್ಯಾಮಿಲಿ ಟ್ರಸ್ಟ್ ಹಾಂಗೆಲೆ ಜೋಡ ಆಶ್ರಯಾರಿ ಚಲೆಲೆ "ದಾನಿಕ ಮೇಳಾ" ಕಾರ್ಯಕ್ರಮಾಂತು° ವಿದ್ಯಾರ್ಥಿಯಾಂಕ ಆನಿ ತಾಂಗೆಲೆ ವ್ಹಡಿಲಾಂಕ ಸಂಭೋದನ ಕರನು ತಾಣೆ ಅಶೆ° ಸಾಂಗಲೆ°.

ಸಗಟಾಲೆ ಜೀವನಾಂತು° ದೇವು ವ್ಹಿಂವ್ಹಿοಗಡ ರೂಪಾರ ಯಾ ಅವಕಾಶ ಸ್ವರೂಪ ಯೆತಾ. ತೆ° ಪರಕೂನು ನಿರ್ಧಾರ ಘೆವಚೆ° ಆಮಿ ಕರಕಾ. ಮೆಗೆಲೆ ಜೀವನಾಂತೂಯಿ ಮೆಗೆಲೆ ವ್ಹಡಿಲಾನಿ, ಶಿಕ್ಷಕಾನಿ, ವಿದ್ಯಾರ್ಥಿ ವೇತನ ದಿಲೆಲ್ಯಾನಿ ಖೂಬ ಪ್ರಭಾವ ಘಾಲೆಲೊ ಆಸಾ. ತ್ಯಾಚ ಉಡಗಾಸಾನ ಹಾಂವೆ° ಪರತೂನ ಸಮಾಜಾಕ ದಿವಚೆ° ಕರತ ಆಸಾ. ವಿದ್ಯಾರ್ಥಿಯಾನಿ ಭವಿಷ್ಯಾಂತು° ತಾಂಗತಾοಗೆಲೆ ಪಾಯಾರಿ ರಾಬತರಿ ಸಮಾಜಾಕ ಮ್ಹಳ್ಯಾರಿ ಮುಕಾವಯಲೆ ಪಿಳಗಿಕ ದಿವಚೆ° ಕರಕಾ ಮ್ಹಣು ತಾಣೆ ಉಲೊ ದಿಲೊ.

ಜಿ.ಎಸ್.ಬಿ ಸ್ಕಾಲರಶಿಪ್ ಲೀಗ್ ಮುಂಬಯಿ ಹಾಜೆ ಚೇರಪರ್ಸನ್ ಗೀತಾ ಆರ್. ಪೈ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗೂನ ಸೂತ್ರ ಸಂಚಾಲನ ಕೆಲೆ°. ಅಜಿತ್ ಪ್ರಭು ಫೌಂಡೆಶನಾ ಬದಲ ಸುರೇಶ ಪ್ರಭು ಹಾಂನಿ° ಮಾಹಿತಿ ದಿಲಿ. ಅಜಿತ್ ಪ್ರಭು ಹಾಂಗೆಲಿ ದ್ಹುವ ವಿಧಿಶಾ ಪ್ರಭು ವಿದ್ಯಾರ್ಥಿಯಾಂಕ ಪ್ರಮಾಣ ವಚನ ಭೋದನ ಕೆಲೆ°. ವಿದ್ಯಾರ್ಥಿ ವೇತನ ಘೆತಿಲೆ ವಿದ್ಯಾರ್ಥಿಯಾನಿ ತಾಂಗೆಲೆ ಜೀವನಕಾಲಾಂತು° ದೋನ ವಿದ್ಯಾರ್ಥಿಯಾಂಕ ಮದದ ಕರತಾತಿ ಆನಿ ಪರ್ಯಾವರಣಾಚೆ ಕಾಳಜಿ ಘೆತಾತಿ ಮ್ಹಣು ಶಪಥ ಗೆತಲೆ°. ಗಣೇಶ ಎನ್. ಶ್ಯಾನಭಾಗ ಹಾಂನಿ° ಆಬಾರ ಮಾನಲೊ. ಅರ್ಹ ವಿದ್ಯಾರ್ಥಿಯಾಂಕ ಚೆಕ್ ರೂಪಾರಿ ವಿದ್ಯಾರ್ಥಿ ವೇತನ ವಾಂಟಪ ಜಾಲೆ°.

ಮಂಗಳೂರು: ಹಾಂಗಾಚೆ ಮಾಲೆಮಾರ ಪ್ರದೇಶಾಂತು° ಭಾರ್ಗವಿ ಬಿಲ್ಡರ್ಸ್ ಹಾಂನಿ° ಬಾಂದಿತಾ ಆಸಚೆ° ಪಂದ್ರ ಮ್ಹಾಳಿಯೆಚೆ° "ಕೈಲಾಶ" ಹೈ ಲಿವಿಂಗ್ ಲಕ್ಸುರಿ ಹೋಮ್ಸ್ ಹಾಂತು° ತಯಾರ ಜಾಲೆಲೆ° ಗುಣನಾಥಾಲೆ ° ಮಾಕ್ ಅಪ್ ಫ್ಲಾಟ್ ಹಾಜೆ° ಘರಾ ವಕ್ಕಲ ಆಜಿ (ಮಾರ್ಚ 10) ಚಲೆ°. ಮುಂಬಯಿಚೆ ಸಾಯಿ ಪ್ಯಾಲೇಸ್ ಗ್ರೂಪ್ ಆಫ್ ಹೋಟೆಲ್ಸ್ ಹಾಜೊ ಸಿ.ಎಂ.ಡಿ ರವಿ ಶೆಟ್ಟಿ ಹಾಂನಿ° ಟೇಪ್ ಖಾತೋರನು ಉಗ್ತಾವಣ ಕೆಲೆ°. ಕ್ರೆಡೈ ಮಂಗಳೂರು ಹಾಜೊ ಅಧ್ಯಕ್ಷ ಪುಷ್ಪರಾಜ ಜೈನ್ ಹಾಂನಿ° ದಿವೊ ಲಾವನು ಶುಭಾಷಯ ಪಾಟಯಲೊ.

ಕೊವಿಡ್ ಮಹಾಮಾರಿ ಸಂದರ್ಭಾರಿ ಹ್ಯಾ ಯೋಜನೆಚೊ ವಿಚಾರಾಕ ಜೀವ ಆಯಿಲೊ. ದುಬಾಯಚೊ ಗುಣನಾಥ ಮ್ಹಳೆಲೆ ಕಾಲ್ಪನಿಕ ವ್ಯಕ್ತಿಕ ಮನಾಂತ ದವರನು ತಾಣೆ ದುಬಾಯಚೆ ಉಂಛ ಸ್ಥರಾಂಚೆ ಅಪಾರ್ಟಮೆಂಟ್ ಕೊಡಿಯಾಲಾಂತ ಸೊದೂಚೆ ಮ್ಹಳೆಲೆ ಕಲ್ಪನಾ ದವರೂನ ಹಿ ಯೋಜನಾ ಶುರು ಜಾಲಿ ಮ್ಹಣು ಹ್ಯಾ ಯೋಜನೆಚೊ ರುವಾರಿ ಗುರುದತ್ತ ಶೆಣೈ ಹಾಂನಿ° ಹ್ಯಾ ವೇಳಾರ ಸಾಂಗಲೆ°. ಆಜಿ ಕಾಲ್ಪನಿಕ ವ್ಯಕ್ತಿ ಗುಣನಾಥ ಆನಿ ತಾಗೆಲಿ ಕಾಲ್ಪನಿಕ ಬಾಯಲ ಶಿಲ್ಪಾ ಗುಣನಾಥ ಹಾಂಗೆಲೆ ಉಪಸ್ಥಿತಿರಿ ಹೊ ಕಾರ್ಯಕ್ರಮ ಚಲೊ. ಭಾರ್ಗವಿ ಬಿಲ್ಡರ್ಸ್ ಹಾಜೊ ಮಾಲಕ ಭಾಸ್ಕರ್ ಗಡಿಯಾರ್ ಆನಿ ತಾಗೆಲಿ ಬಾಯಲ ಭಾರ್ಗವಿ ಗಡಿಯಾರ್ ಹಾಂನಿ° ಆಬಾರ ಮಾನಲೊ. ಮಂಗಲದೀಪ ಆನಿ ಮುಖೇಶ ಶೆಟ್ಟಿ ಹಾಂನಿ° ಹ್ಯಾ ಯೋಜನೆಚೆ ಮುಖೇಲಿ ಆಸಾತಿ.
ಫೆ. 14, 2021ಕ ಭೂಮಿ ಪೂಜಾ ಜಾಲೆಲೆ ಹ್ಯಾ ಇಮಾರತಾಂತು° ಪಂದ್ರ ಮ್ಹಾಳಿ ಆಸೂನ 131 ಫ್ಲಾಟ° ಆಸಾತಿ. 2 ಬಿ.ಎಚ್.ಕೆ (ರೂ. 67 ಲಾಖ), 3 ಬಿ.ಎಚ್.ಕೆ (ರೂ. 1. 10 ಕರೋಡ), 4 ಬಿ.ಎಚ್.ಕೆ (ರೂ. 1.80 ಕರೋಡ) ಮ್ಹೋಲ ಆಸೂನ ಎದೋಳೂಚಿ 75 ಠಕೊ ಫ್ಲಾಟ° ವಿಕ್ರಿ ಜಾಲ್ಯಾಂತಿ ಮ್ಹಣು ಗುರುದತ್ತ ಶೆಣೈ ಹಾಂನಿ° ಕಳಯಲೆ°. ಸೌಜನ್ಯಾ ಹೆಗ್ಡೆನ ಸೂತ್ರ ಸಂಚಾಲನ ಕೆಲೆ°.

ಎಕ ಅವಘಾಡಾಂತು° ದೋನಯ ಹಾತ ವಗಡಾಯಲೇ ತರೀ ವ್ಹಡ ಸಾಧನಾ ಕೆಲೆಲೊ ಏಕ ಉದ್ಯಮಿ ಜಿ.ಕೆ. ಡೆಕೋರೇಟರ್ಸಚೋ ಗಣೇಶ ಕಾಮತ ದೇವಾದಿನ
ಮೂಡಬಿದಿರೆಃ ಜಿ.ಕೆ. ಡೆಕೋರೇಟರ್ಸ, ಜಿ.ಕೆ. ಗಾರ್ಡನ ಸಿಟೀಚೋ ಧನೀ ಗಣೇಶ ಕಾಮತ (46) ಹ್ಯಾ ತರಣಾಟ್ಯಾ ಉದ್ಯಮಿ ಶುಕ್ರಾರಾ(ಮಾರ್ಚ 3) ಆಪಲ್ಯಾ ಘರಾಂತ ಹೃದಯವಿಕಾರಾಕ ಲಾಗೂನ ಮರಣ ಪಾವಲೊ. ಸಕಾಳೀ° ತಾಕಾ ಖೂಬ ದುಯೇಂತ ದಿಸಲೋ ಆನೀ ರೋಖಡೋಚ ತಾಕಾ ಹಾಸ್ಪಿಟಲಾಂತ ಹಾಡಲೋ, ಪೂಣ ರೋಖಡೋಚ ತಾಕಾ ಮರಣ ಆಯಲೆ°. ತೊ ತಾಚೀ ಬಾಯಲ, ಧೂವ, ಆವಯ ಆನೀ ಭಾವ ಸೋಡೂನ ಗೇಲಾ. ದೋನ ದಶಕಾ° ಆದಿ° ಆಪಲ್ಯಾ ಕಾರಕಿರ್ದೀಂತ ವೀಜ ಪಡೂನ ತಾಕಾ ಗಂಭೀರ ಜಖಮೀ ಜಾವನ ದೋನೂಯ ಹಾತ ಗೆಲೆ. ಧೈರ್ಯ ಆನೀ ಆತ್ಮವಿಸ್ವಾಸಾನ ಸಜವಣೀ ಆನೀ ವೇವಸ್ಥಾಪಕಾಚ್ಯಾ ಮಳಾರ ಏಕ ಯಶಸ್ವೀ ತರಣಾಟೋ ವೇವಸಾಯೀಕ ಜಾವನ ತಾಣೇ° ಸಗಳ್ಯಾಂಕ ಅಜಾಪೀತ ಕೆಲೆ°. ತಾಚ್ಯಾ ಜಿ.ಕೆ. ಸ್ವತಾಚೋ ವೇವಸಾಯ ಕರಪೀ ಸಂಘಟನಾ° ವರವೀಂ ಜಾಯತ್ಯಾ ಕುಟುಂಬಾοಕ ಏಕ ನಿಯೋಕ್ತಾ ಮ್ಹೂಣ, ಸಜಾವಟ, ಮಾಚಯೇರ, ಡಿಝಾಯನಾಂತ ಸೃಜನಶೀಲ ವಿಚಾರ ಕರೂನ ಧರ್ಮ ಸಂಸಾದ, ಜಿ.ಏಸ.ಬಿ. ಸಂವಸಾರೀಕ ಪರಿಶಧ, ನವೋದಯ ಸಮಾವೇಶ ಅಶೋ ಜಾಯತ್ಯೋ ವ್ಹಡ ಪರಿಶದೋ ಆನೀ ಸುವಾಳೋ ಯೇಸಸ್ವೀಪಣಾನ ಘಡೋವನ ಹಾಡಪಾಕ ತಾಣೆ° ಪರದೇ ಫಾಟಲ್ಯಾನ ಖೂಬ ಕಶ್ಟ ಘೇತಲೆ.
ದುಖ್ಖದ ನಾಯಕ: ಹಾಂಗಾಚ್ಯಾ ಪೋನ್ನೇಛಾರೀ ಶ್ರೀ ಲಕ್ಷ್ಮೀ ವೇಂಕಟರಮಣ ದೇವಳಾಚೋ ಎಂ. ಪಿ. ಕಾಮತ ಘಾರಾಣೆಚೊ ಗಣೇಶ ಕಾಮಠ ಲ್ಹಾನ ಪಿರಾಯೇಚೇರ ಸಹಾಯ್ಯಕ ಮ್ಹಣೂನ ಶಾಮಿಯಾನಾ ಆನೀ ಸಜವಣ ಉದ್ದೇಗಾಂತ ಭರತೀ ಜಾಲೊ. 2001 ವರ್ಸಾ ಕಾರ್ಕಳ ಮೈದಾನಾಂತಲ್ಯಾ ಫ್ಲಡ್ ಲಿಟ್ ಕಾರ್ಯಕ್ರಮಾಕ ಲಾಯಟೀಚೀ ವೇವಸ್ಥಾ ಕರತನಾ ಉಚ್ಚ ತಾಣ ಆಶಿಲ್ಲ್ಯಾ ವೀಜ ತಾರೇಕ ಹಾತ ಲಾಯಿಲ್ಲ್ಯಾನ ಗಂಭೀರ ಅವಸ್ಥೇಂತ ತೋ ಜಳಲೋ. ಉಪರಾಂತ ಮೂಡಬಿದಿರೀಚ್ಯಾ ರೋಟರೀ ಕ್ಲಬಾನ ತಾಕಾ ದೋನೂಯ ಕೃತ್ರೀಮ ಹಾತ ಬಸಪಾಕ ಆದಾರ ಕೇಲೊ.
ನಿರಾಶಾ ಆಸೂನ ಆತ್ಮವಿಸ್ವಾಸಾನ ವಾಡಪೀ ಗಣೇಶ ಕಾಮತ ಹಾಣೇ° ಆಪಲೋ ಸ್ವತಾಚೋ ಲ್ಹಾನ ವೇವಸಾಯ ಪಂಗಡ ತಯಾರ ಕೆಲೊ ಆನೀ ಜಿ. ಕೆ. ಸಜವಣದಾರಾ ಹೀ ಕಂಪನಿ ವಾಡಯಲಿ ಆನಿ ಜಾಯತ್ಯಾ ಜಣಾಂಕ ಉದರ ನಿರ್ವಾಹಾಚೀ ವೇವಸ್ಥಾ ಕೆಲಿ. ಸ ವರ್ಸಾ° ಆದೀ° ಜಿ. ಕೆ. ಗಾರ್ಡನ ಸಿಟಿ ಸಭಾಂಗಣ ನಿರ್ಮಾಣ ಕರನು ಕೋವಿಡ ಕಾಳಾಂತ ಖೂಬ ಸವಲತೀಚ್ಯಾ ದರಾನ ಸಾದೇ ಲಗ್ನಾಂಕ ಪ್ರೋತ್ಸಾಹನ ದಿಲ್ಲೇ°. ತಾಗೆಲ ಉದ್ಯಮಾಂತು° ಕರ್ಮಚಾರಿ ಆಶಿಲಿ ಲತಾಲೆ ಸಾಂಗತ ಲಗ್ನ ಜಾವನು ತಿಣೆ ಹಾಕಾ ಸಾಂಬಾಳನು ಹಾಡಿಲೆ° ವಿಶೇಷ ಆಸಾ. ಏಕ ಪರೋಪಕಾರಿ ಆಶಿಲೊ ಗಣೇಶ ಕಾಮತ ಹಾಣೇ° ಉಪರಾಂತ ಆಪಲ್ಯಾ ಕಾರಕಿರ್ದೀಂತ ಯೇಸಸ್ವೀಪಣಾನ ಪಾವಲಾ° ಉಬಾರೂನ ಮುಖಾರ ಸರಲೊ ಆನೀ ಬಸಕಾ, ಸುವಾಳೋ ಆನೀ ಅಧಿವೇಶನ ವೇವಸ್ಥಾಪನಾಂತಲ್ಯಾ ವೇವಸಾಯೀಕ ಖಾಶೇಲಪಣಾಕ ಲಾಗೂನ ರಾಜ್ಯ ಪಾಂವಡ್ಯಾರ ತಾಕಾ ಮಾನ್ಯತಾಯ ಮೇಳ್ಳಿ. ಗಾಂವ ಪರಗಾಂವಚ್ಯಾ ಕಾರ್ಯಾವಳೀಂಚೀ ತೋ ಸದಾಂಚ ಸವಲತೀಚ್ಯಾ ವೇವಸ್ಥಾ ಕರತಾಲೋ ಆನೀ ತಾಂಕಾ° ಪ್ರೋತ್ಸಾಹನ ದಿತಾಲೊ.
ಶಾಮಿಯಾನ ಓನರ್ಸ ಅಸೋಸಿಏಶನಾಚೇ ಮೂಡಬಿದಿರೆ ಯುನಿಟಾಚೊ ಸಂಸ್ಥಾಪಕ ಅಧ್ಯಕ್ಷ ಆಶಿಲೊ ಆನಿ ಸಧ್ಯಾಕ ಗೌರವಾಧ್ಯಕ್ಷ ಆಶಿಲೊ. ಧಾರ್ಮಿಕ ಮೆರವಣಿಗೆಂತು° ಪೌರಾಣಿಕ ಕಲ್ಪನೇಚ್ಯಾ ಸ್ಥಬ್ದಚಿತ್ರಾ° ನಿರ್ಮಾಣ ಕರತಲೆ ಹಾಂನಿ° ಮೂಡುಬಿದಿರೆಚೆ ಭೌಶೀಕ ಶ್ರೀ ಗಣೇಶೋತ್ಸವಾಚ್ಯಾ ಟ್ರಕ ಸಜಾವಟ, ನಿಮಾಣ್ಯಾ ಉತ್ಸವಾಂತ ಆಂತರಾಳ ಡಾಬರ ಡಿಝಾಯನ, ಏಕಾಂತ ಗಣೇಶೋತ್ಸವಾಚ್ಯಾ ಟೇಬಲಾಚಿ ತಯಾರಿ ಹಾಂಚೆ ಖಾತೀರ ತಾಕಾ ಜಾಯತಿ° ವರ್ಸಾ° ವಳಖ ಮೆಳ್ಳಿ. ಬೇದ್ರದ ಬರ‍್ಸೆರ್ (2016) ಮಾ. ಮಂಗಳೂರ ಪ್ರೆಸ್ ಕ್ಲಬ್ ಪುರಸ್ಕಾರ (2017) ಸಯತ ಜಾಯತ್ಯಾ ಸಂಸ್ಥಾ° ಕಡಲ್ಯಾನ ತಾಕಾ ಜಾಯತೇ ಭೋವಮಾನ ಆನೀ ಪುರಸ್ಕಾರ ಮೇಳ್ಯಾತ.
ಆಮದಾರ ಉಮಾನಾಥಾ ಕೋಟ್ಯಾನ, ಆದಲೇ ಮಂತ್ರೀ ಅಭಯಚಂದ್ರ ಜೈನ, ಮಿಥುನ ರೈ, ಆಳ್ವಾಸ ಏಜ್ಯುಕೇಶನ ಫೌಂಡೇಶನಾಚೇ ಅಧ್ಯಕ್ಷ ಡಾ. ಎಂ. ಮೋಹನ ಆಳ್ವಾ, ಶಾಮಿಯಾನ ಓನರ್ಸ ಅಸೋಸಿಯೆಶನ ಹಾಜೊ ಜಿಲ್ಲಾಧ್ಯಕ್ಷ ಬಾಬೂ ಕೆ. ವಿ., ವೇವಸಾಯೀಕ ಕೆ. ಶ್ರೀಪತಿ ಭಟ್ಟ, ನಾರಾಯಣ ಪಿ. ಎಂ. ಆನಿ ಹೇರಾಂನಿ ದು:ಖ ಪ್ರಕಟ ಕೆಲೆ°. ತಾಚ್ಯಾ ಮರಣಾಚೀ ಖಬರ ಆಯಕೂನ ವ್ಹಡ ಪ್ರಮಾಣಾಂತ ಲೋಕ ತಾಚ್ಯಾ ನಿವಾಸ ಸ್ಥಾನಾಕ ನಿಮಾಣೋ ಶ್ರದ್ಧಾಂಜಲೀ ದಿವಪಾಕ ಗೆಲೆ. ಉಪರಾಂತ ನಿಮಾಣೇ ಯಾತ್ರಾ ವೇಳಾರ ಲವಂತ ಬೇಟ್ಟೂ ರಸ್ತ್ಯಾರ ಆಶಿಲ್ಲ್ಯಾ ತಾಚ್ಯಾ ಸಂಸ್ಥೇಚ್ಯಾ ಆವಾರಾಂತಯ ಭೌಸಾಕ ನಿಮಾಣೋ ಶ್ರದ್ಧಾಂಜಲೀ ದಿವಪಾಕ ಜಾಲೆ°.

भारताचे सांस्कृतिक परंपेरेंत वसंतोत्सव खूब प्रमुख आनी समयोचित आसा.वर्सुकी ऋतुचक्रांत 12 मासां आनी 6 ऋतुंचो वर्णन वराह मिहिराचे काला सावन आसा. महाकवी काळिदास आपण्याले अद्भुत काव्य ‘ऋतु संहार’ हांतु खूबशे ऋतुंचे शोभित वर्णन दिता. ऋतु चक्राचो युवकाल म्हळ्यार वसंत ऋतु आनी जीणेचो वसंतकाल म्हळ्यार यौवन अशें म्ह्णतात. माघ शु पंचमीक वसंत कालाचे आगमन जावुन फ़ाल्गुणचे बहुळ पंचमी मेरेन तो आसता म्हणु भारताचे लोकांलो अभिमत. त्या खतिर भारतांत ह्या समयाचेर वसंतोत्सव मानयतात.

भागवत पुराणाचे दशम स्कंदांचे 8 आनी 9 जुंवळींत भगवंतान ग्वाल-बाला-गोपिकां सांगात वसंत उत्सव मानयलो भो शोभित वर्णन आसा आनी 16-19 वे शतमानांत शेखड्यानी चित्रां रचयल्यांची. भास कविले ‘महा श्वेता’ कल्ह्णाले ‘राजतरंगिणी’ बिल्हणाले ‘चौरपंचाशिखा’ हांतु सगळीं वसंत उत्सवाचो खूब वर्णन आसा. आयज बी असेतु-हिमाचल मेरेन चालती आस्च्या वसंतोत्सव पळोवुंक मेळता. खूब वावंट काडून रोहुन वाडयिलें शेतांत फ़सल कटाव जातर लोक संतोशान संगीत-नांच- रंगा खेळ खेळतात. काश्मीर, हिमाचल, आसाम, मणिपुर, बंगाल, राजस्थान, गोमांतक, मध्य भारत, तमिळनाडु अशें सगळेय भारतांत हाचो दबाजो आसता. खूब प्रदेशांत होळी म्हळ्यार कोंकणी सीमेंत शिग्मो म्हणतात.

कोंकण्य़ाले शिग्म्यांत मांड मांडोवुन धालो, फ़ुगडी, गोडे मोडनी, शिवज़, सत्री, गुलाल इत्यादी नांवांन परब मानयतात. गोंयांत सांप्रदायक आनी आधुनिक शिग्म्याचो ‘राज परब’ म्हणु उत्साहान वेवेगळे गांवांत 10-15 दिवस मानयतात. कोंकणी कुडमी समाजांत रंग रंगाचो पोषाक घालुन फ़ाल्गुण पुनवेक देवाक प्रणाम करून शेतांत अग्नी सुतु सांप्रदायिक जानपद कोंकणी पदां म्हणत नृत्य करतात. व्हडल्या शारांत एक कालाचेर रावळेरांत आशिले शास्त्रीय संगीत आनी वेवेगळी शास्त्रीय नृत्यांचो उत्सव आयज सार्वजनिक रंग मंदिरांत मान्यतात.

ईशान्य भारतांत रंग पंचमीक सरस्वतिचो पूजन केल्यार कोंक्ण सीमेंत देवुळांत वसंत मांटवांत देवालो मूर्तीयो प्रतिष्ठ करून पारंपरिक ‘वसंत सेवा’ करून ‘अष्टावधान’ सेवा करतात. हांतूय ऋग्वेद, यजुर्वेद, सामवेद, अथर्ववेद, काव्य, कविता, संगीत आनी नृत्य म्हळेले आट विधांचे साहितिक सेवा दितात. अशें बरो सुंदर वसंतोत्सव (Spring festival) भारतीय संस्कृतायेचो एक प्रमुख आनी मानसोल्लासित परब म्हणयेत.   

ಮಂಗಳೂರು: ಶಾಸ್ತ್ರೀಯ ಸಂಗೀತಗಾರ ಎಂ. ಸುಬ್ರಾಯ ಪೈ ಹಾಂಗೆಲಿ ದಾಕಲಿ ದ್ಹುವ ಜಾವನು ಜಲ್ಮಾಕ ಆಯಿಲಿ ಆನಿ ಜಾಹಿರಾತ ಉದ್ಯಮಾಂತು° ಆಶಿಲೆ ದೇವಾದಿನ ಪಾಂಗಾಳ ರಾಮಕೃಷ್ಣ ನಾಯಕ ಹಾಂಗೆಲಿ ಬಾಯಲ ನಾವಾದೀಕ ಹಿಂದುಸ್ಥಾನಿ ಆನಿ ಕೊಂಕಣಿ ಸಂಗೀತ ಕಲಾಕಾರಾ ವಸಂತಿ ಆರ್. ನಾಯಕ (79 ವರಸ) ಹಾಂನಿ° ಫೆ. 28ಕ ತಾಂಗೆಲೆ ಸ್ವಗೃಹಾಂತು° ಅಂತರಲೆ. ಮಂಗಳೂರಚೆ ಸ್ತ್ರೀಯಾ° ಪಯಕಿ ಅಪರೂಬಾಯೆಚೆ ಹಿಂದುಸ್ಥಾನಿ ಸಂಗೀತ ಕಲಾಕಾರಾ ಆನೀ ಸಂಗೀತ ಶಿಕ್ಷಕಿ ಆಶಿಲೆ ಹಾಂನಿ° ಆರತಾ° ಥೊಡೆ ಕಾಳ ದಾಕೂನ ಭಲಯಕಿ ಸಮ ನಾತಿಲೆ° ಘರಾಕಡೆನ ಆಶಿಲೆ.
ಎಕ ಕಾಳಾಂತು° ಜಿ. ಎಸ್. ಬಿ. ಸಮುದಾಯಾ ಮಧೆ° ಬಾಯಲಾನಿ ಸಂಗೀತ ಶಿಕ್ಷಣ ಫಾವೊ ಕರಚೆ° ಸುಲಭ ನಾ ಆಶಿಲೆ°. ಜಾಲ್ಯಾರ ವಸಂತಿ ಆರ್. ನಾಯಕ ಹಾಂನಿ° ತಾಂಗೆಲೆ ತರನಾಟೆ ಪ್ರಾಯೇರಿಚಿ ಸಂಗೀತಗಾರ ಬಾಪಸೂಲೆ ಸಹಕಾರಾನ ಸಂಗೀತ ಕ್ಷೇತ್ರಾಂತು° ಉಮೇದಿ ದಾಕಯಲಿ. ಬಾಪಸೂಲೆ ನಿಮಿತ ಘರಾಕಡೆನ ಸಂಗೀತಗಾರ ಯೆತಲೆ ಆನಿ ಸಂಗೀತಾಚೊ ಮಾಹೋಲ ಆಸತಲೊ. 1944 ಇಸವಿಂತು° ಜುಲೈ 7ಕ ಜಲ್ಮಾಕ ಆಯಿಲೆ ಹಾಂನಿ° ಮಣ್ಣಗುಡ್ಡೆಚೆ ಎಂ. ಸುಬ್ರಾಯ ಪೈ ಆನಿ ಲಕ್ಸ್ಮಿದೇವಿ ಹಾಂಗೆಲೆ 7 ಚೆರಡುವಾ° ಪಯಕಿ ದ್ಹಾಕಲಿ ಜಾವನು ಜಲ್ಮಾಕ ಆಯಿಲಿ°. ಹಾಂಗೆಲೆ° ಲಗ್ನ ಕಟಪಾಡಿಚೆ ಪಾಂಗಾಳ ರಾಮಕೃಷ್ಣ ನಾಯಕ ಹಾಂಗೆಲೆ ಸಾಂಗತ ಜಾಲೆ° ಆನಿ ಉಪರಾಂತ ತಾಂನಿ° ಕೊಡಿಯಾಲಾಂತ ಬಿಡಾರ ಕೆಲೆ°. ಜಾಹಿರಾತ ಉದ್ಯಮಾಂತ ಆಶಿಲೆ ಪಿ. ಆರ್. ನಾಯಕ ಹಾಂನಿ° ವಸಂತಿ ಆರ್ ನಾಯಕ ಹಾಂಕಾ° ಸಂಗೀತ ಕ್ಷೇತ್ರಾಂತ ಆಶಿಲಿ ಉಮೇದಿ ಭಾಗೂಂಕ ಸೊಡನಿ. ಭಾರತೀಯ ವಿದ್ಯಾಭವನಾಂತು° ಸಂಗೀತ ಶಿಕ್ಷಕ ಎಂ. ನಾರಾಯಣ ಪೈ ಹಾಂಗೆಲಾಗಿ ಸಂಗೀತ ಶಿಕ್ಷಣಾಚಿ ವ್ಯವಸ್ಥಾ ಕೆಲಿ. ಉಪರಾಂತ ಜಯಪುರ್ ಘರಾಣೆಚೆ ಕೌಶಲ್ಯಾ ಮಂಜೇಶ್ವರ್ ಹಾಂಗೆಲಾಗಿ ಸಂಗೀತ ಶಿಕ್ಷಣ ಫಾವೊ ಕರಚೊ ಅವಕಾಶ ವಸಂತಿ ಆರ್. ನಾಯಕ ಹಾಂಕಾ° ಮೆಳೊ. ಕೌಶಲ್ಯಾ ಮಂಜೇಶ್ವರ್ ಹಾಂಗೆಲೊ ಗುರು ಮಗ್ಗುಬಾಯಿ ಕುರ್ಡಿಕರ್ ಹಾಂಗೆಲಾಗಿ ಪ್ರಭಾವ ಘಾಲೊನು ಹೊ ಅವಕಾಶ ಮೆಳೆಲೊ. ಶುರುವಚೆ ಥೊಡೆ ವರಸ° ಸಾರ್ವಜನಿಕ ಕಾರ್ಯಕ್ರಮ ದಿವಚಾಕ ನಾ ಮ್ಹಳೆಲೆ ಶರತ್ತಾರಿ ಹೊ ಅವಕಾಶ ಮೆಳೊ. ತ್ಯಾಚ ಪ್ರಮಾಣೆ 18 ವರಸ° ಕಠಿಣ ಅಭ್ಯಾಸ ಕರತರಿ ವಸಂತಿ ಆರ್. ನಾಯಕ ಹಾಂನಿ° ಸಾರ್ವಜನಿಕ ಕಾರ್ಯಕ್ರಮ ದಿಲೊ. ಮಂಗಳೂರಾಂತು ಶಿಕ್ಷಣ ಫಾವೊ ಕರಚೆ° ನಂತಾ° ವಸಂತಿ ಆರ್. ನಾಯಕ ಹಾಂನಿ° ಮುಂಬಯಿಕ ವಚೂನುಯೀ ಗುರುಲಿ ಸೇವಾ ಕರತಲಿಂಚಿ. ತ್ಯಾ ವೇಳಾರ ಮಹಾಗುರು ಮಗ್ಗುಬಾಯಿ ಕುರ್ಡಿಕರ್ ಹಾಂಗೆಲಾಗಿ ಸುತಾ ಥೋಡಿಂ ಸಂಗೀತಾಚೆ ಸೂತ್ರಾ° ಹಾಂಕಾ° ಮೆಳಿ°.
ಆಟ್ರ ವರಸಾಚೆ ಸಂಗೀತಾಭ್ಯಾಸ ಜಾತರಿ ವಸಂತಿ ಆರ್. ನಾಯಕ ಹಾಂನಿ° ಸಾರ್ವಜನಿಕ ಜಾವನು ಸಂಗೀತ ಕಾರ್ಯಕ್ರಮ ಪ್ರಸ್ತುತ ಕರಚಾಕ ಶುರು ಕೆಲೆ°. ಶುರುವೇಕ ಲಘು ಸಂಗೀತ ಆನಿ ಭಜನಾ ಕಾರ್ಯಕ್ರಮ ದಿತಲೆ ಹಾಂನಿ° ಮಂಗಳೂರು, ಉಡುಪಿ, ಕಾರವಾರ, ಅಂಕೋಲಾ, ಗೋವಾ, ಕೇರಳಚೆ ಥೊಡೆ ಗಾಂವ°, ಧಾರವಾಡ, ಮುಂಬಯಿ ಆನಿ ಬೆಂಗಳೂರಾಂತು° ಕಾರ್ಯಕ್ರಮ ದಿಲೆಲೊ ಆಸಾ. ನಾವಾದೀಕ ಸಂಗೀತಗಾರ ಗಂಗೂಬಾಯಿ ಹಾನಗಲ್, ಪರ್ವಿನ್ ಸುಲ್ತಾನಾ, ಪಂಡಿತ ಮಲ್ಲಿಕಾರ್ಜುನ ಮಾನ್ಸೂರ್ ಹಾಂಕಾ° ತಾನ್ಪುರಾರಿ ಸಾಥ ದಿವಚೆ° ಹಾಂನಿ° ಕೆಲಾ°. 1998 ಇಸವಿಂತು° ಬಾಮಣಾಲೆ ಸಾಂಗತ ಸಿಂಗಾಪುರ ಭ್ಹೊಂವಚಾಕ ಗೆಲೆಲೆ ವೇಳಾರ ಸುತಾ ಹಾಂನಿ° ತಂಯ ಸಂಗೀತ ಕಾರ್ಯಕ್ರಮ ಪ್ರಸ್ತುತ ಕೆಲೆಲೊ ಆಸಾ.
ಹರಿಧ್ವಾರಾಂತು° ವ್ಯಾಸ ಮಂದಿರ ಪ್ರತಿಷ್ಠಾಪನೆ ವೇಳಾರಿ ಹಾಂನಿ° ಶ್ರೀಮದ್ ಸುಧಿಂದ್ರತೀರ್ಥ ಸ್ವಾಮೀಜಿ ಹಾಂಕಾ° ಪದಾಂಚಿ ಎಕಿ ಸಿಡಿ ಅರ್ಪಣ ಕೆಲೆಲಿ. ತ್ಯಾ ವೇಳಾರಿ ಚಲೆಲೆ ಮೆರವಣಿಗೆ ವೇಳಾರಿ ಹ್ಯಾ ಸಿಡಿಂತುಲೆ ಪದ° ನಿರಂತರ ಚಾಲೂ ಆಶಿಲಿಂತಿ. ತ್ಯಾ ಸಿಡಿಂತು° ವಸಂತಿ ಆರ್. ನಾಯಕ ಹಾಂನಿ° ಗಾಯಲೆಲೆ° ಬಾದರಾಯಣ ಸ್ತುತಿ, ಪ್ರಪಾತಿ, ಹಗಲು ಸಹಸ್ರನಾಮ ಆನಿ ಹೇರ ಸಂಸ್ಕೃತ ಭಜನ° ಆಶಿಲಿಂತಿ. ಉಪರಾಂತ ಹಾನಿ° ಸಾಬಾರ ಸಿಡಿ ಪ್ರಕಟ ಕೆಲಿ°. ಹಾಂತು° ಕೊಂಕಣಿ ಭಾಶೆಂತು° ಫಾಯಸ ಜಾಲೆಲೆ "ಸಂಗೀತ ಸುಗಂಧಿ", "ಕೊಂಕಣಿ ಗೀತ ಗುಚ್ಛ", "ಕೊಂಕಣಿ ನೃತ್ಯ ವಂದನಾ", "ಮಂಜುನಾಥ ಕರತಾ° ಪ್ರಣಾಮ" ಆನೀ "ಜೀವನ ಚಕ್ರ" ಪ್ರಮುಖ ಆಸಾತಿ. ಬಾಳಗೀತಾಂಚೆ ಎಕ ಸಿಡಿ ಸುತಾ ಹಾಂನಿ° ಫಾಯಸ ಕೆಲೆಲಿ ಆಸಾ.
ಆಕಾಶವಾಣಿಚೆ ಬಿ ಗ್ರೇಡ್ ಕಲಾಕಾರ ಆಶಿಲೆ ಹಾಂನಿ° ಆಕಾಶವಾಣಿರಿ ಖೂಬ ಕಾರ್ಯಕ್ರಮ ದಿಲೆಲೊ ಆಸಾ. ದೂರದರ್ಶನಾಚೆ ಅಪ್ರೂವಡ್ ಆರ್ಟಿಸ್ಟ್ ಆಶಿಲೆ ಹಾಂನಿ° ದೂರದರ್ಶನಾರಿ ತಾತಾವಳಿ ಕಾರ್ಯಕ್ರಮ ದಿಲೆಲೊ ಆಸಾ.
ಬಾಮಣಾಲೊ ಸಂಪೂರ್ಣ ಸಹಕಾರ ಆಶಿಲೆ ಹಾಂಕಾ° 2002 ವರಸಾಂತು° ಬಾಮಣಾಲೆ ದೇಹಾಂತ್ಯ ಜಾವನು ಹಾಂಗೆಲೆ ಜೀವನಾಂತು° ಧಕ್ಕೊ ಪಳೊ. ಜಾಲ್ಯಾರಯೀ ಧೈರ್ಯ ಘೆವನು ಬಾಮಣಾಕ ತಾಂಗೆಲೆ ಸಂಗೀತಾರಿ ಆಶಿಲಿ ಉಮೇದಿ ಉಡಗಾಸ ಕರನು ಸಂಪೂರ್ಣ ಪ್ರಯತ್ನ ಕರನು ತೀನ ಸಿಡಿ ಪ್ರಕಟ ಕೆಲೆಲಿ ಆಸಾ. ಸ್ವರಶ್ರೀ ಕಲಾವೇದಿಕೆ ಮ್ಹಳೆಲೆ ಟ್ರಸ್ಟ್ ಶುರು ಕರನು ಹರ ವರಸ ಚಾರ ವಿದ್ಯಾರ್ಥಿಯಾಂಕ ವಿದ್ಯಾರ್ಥಿ ವೇತನ ದಿವಚೆ° ಆನಿ ಸಂಗೀತ ಉಪಕರಣ ದಿವಚೆ° ಕರತ ಆಶಿಲಿಂತಿ. ಸ್ವರಶ್ರೀ ಸಕಳ ಸಂಗೀತಾಸಕ್ತ ವಿದ್ಯಾರ್ಥಿಯಾಂಕ ಆನೀ ಕೆನರಾ ಸಿಬಿಎಸಸಿ ಶಾಳೆಚೆ ವಿದ್ಯಾರ್ಥಿಯಾಂಕ ಹಾಂನಿ° ಸಂಗೀತಾಚೆ ಕ್ಲಾಸ° ಘೆತಲಿಂತಿ. ತ್ಯಾ ನಂತಾ° ಹರ ವರಸ ವೈಶಾಖಾಂತು° ಚೆರಡುವಾಂಕ "ಅಂಕರ" ಶಿಬಿರ ಆಯೋಜನ ಕರತಲೆ.
40 ಪದಾಂಕ ಸಂಗೀತ ಸಂಯೋಜನ ಕೆಲೆಲೆ ಹಾಂನಿ° ಮುಕಾವಯಲೆ ಪಿಳಗಿಕ ಸಂಗೀತ ಪಾವೊಚೆ ನದರೇನ ಯುವ ಕಲಾಕಾರಾಂಕ ವೇದಿಕಾ ದಿತಲೆ. ತಾಂನಿ° ರಚನ ಕೆಲೆಲೆ ಪದಾಂಚೆ ಪುಸ್ತಕ "ಭಕ್ತಿ ಭಾವ ಮಿಲನ" 2006 ವರಸಾಂತು° ಪ್ರಕಟ ಕರನು ದೇವಾದಿನ ಪಿ. ಆರ್. ನಾಯಕ ಹಾಂಕಾ° ಅರ್ಪಣ ಕೆಲೆಲೆ° ಆಸಾ. 2016 ಇಸವಿಂತು° ಹಿಂದುಸ್ತಾನಿ ಶಾಸ್ತ್ರೀಯ ಸಂಗೀತಾοಚೆ ರಾಗಾಚೆ ಸಂಗ್ರಹ "ರಾಗ-ರಂಗ" ಮ್ಹಳೆಲೆ° ಪುಸ್ತಕಯಿ ಹಾಂನಿ° ಫಾಯಸ ಕೆಲೆಲೆ° ಆಸಾ.
ಹಾಂಗೆಲಿ ಸಂಗೀತ ಸೇವಾ ಮಾನೂನ ಘೆವನು ಹಾಂಕಾ° ಸಾಬಾರ ಸಂಘಸಂಸ್ಥೆನಿ ಪ್ರಶಸ್ತಿ ದೀವನು ಸನ್ಮಾನ ಕೆಲೆಲೊ ಆಸಾ. 1997 ಇಸವಿಂತು° ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಪ್ರಶಸ್ತಿ, 2005 ವರಸಾಂತು° ಹಾಂಗೆಲೆ ಸಂಗೀತ ಪುಸ್ತಕಾಕ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, 2011 ವರಸಾಂತು° "ನೂಪೂರ ಪ್ರಶಸ್ತಿ", "ಪುರಂದರದಾಸ ಪ್ರಶಸ್ತಿ", ಬೆಂಗಳೂರು ಜಿಎಸಬಿ ಸಮಾಜಾಚೊ ಸನ್ಮಾನ ಹಾಂಕಾ° ಫಾವೊ ಜಾಲೆಲೊ ಆಸಾ. ತ್ಯಾ ನಂತಾ° ಹಾಂಕಾ° "ಸಂಗೀತ ಕೋಗಿಲೆ", "ಸಂಗೀತ ರತ್ನ" ಆನಿ ಗೋಕರ್ಣ ಮಠಾಧೀಶ ಶ್ರೀಮದ್ ವಿದ್ಯಾಧಿರಾಜ ತೀರ್ಥ ಹಾಂನಿ° "ಗಾನಶ್ರೀ" ಬಿರುದು ಸುತಾ ಫಾವೊ ಜಾಲೆಲೊ ಆಸಾ. ಆರತಾ° 2020 ಇಸವಿಂತು° ಹಾಂಕಾ° ವಿಮಲಾ ಪೈ ವಿಶ್ವಕೊಂಕಣಿ ಪ್ರಶಸ್ತಿ ಸುತಾ ಫಾವೊ ಜಾಲ್ಯಾ.
ವಸಂತಿ ಆರ್ ನಾಯಕ ಹಾಂಕಾ° ಚೆರಡುವ° ನಾತಲ್ಯಾರಯಿ ತಾಂಗೆಲಿ ಪೊಸ್ಕಿ ವನಿತಾ ತಾಂಕಾ° ತಿಗೆಲೆ ದ್ಹಾ ವರಸಾಚೆ ಪ್ರಾಯೆರಿ ದಾಕೂನ ಸಾಂಬಾಳನು ಆಯಲ್ಯಾ. ಜಿ.ಎಸ್.ಬಿ ಸಮಾಜಾಂತು° ಅಪರೂಬಾಯೆನ ಜಲ್ಮಾಕ ಯೆವನು ಸಂಗೀತ ಕ್ಷೇತ್ರಾಂತು° ಊಂಛ ಸಾಧನಾ ಕೆಲೆಲಿ ಬಾಯಲಮನಿಸ ಮ್ಹಣು ನಾವ° ಫಾವೊ ಕೆಲೆಲಿ ವಸಂತಿ ಆರ್. ನಾಯಕ ತರನಾಟೆ ಸ್ತ್ರೀಯಾಂಕ ಆದರ್ಶ ಜಾವನು ಆಸಾತಿ. ಜಿ. ಎಸ್. ಬಿ ಮಹಿಳಾವೃಂದ ಮಂಗಳೂರು ಆನಿ ಕೊಂಕಣಿ ಸಾಂಸ್ಕೃತೀಕ ಸಂಘ ಹಾಜಿ ಅಧ್ಯಕ್ಷಾ ಜಾವನೂಯಿ ಹಾಂನಿ° ಸೇವಾ ದಿಲೆಲಿ ಆಸಾ. ಮಂಗಳೂರಾಂತು° 1995 ಇಸವಿಂತು° ಘಡಲೆಲೆ ವಿಶ್ವ ಕೊಂಕಣಿ ಸಮ್ಮೇಳನ ಆನಿ 1999 ಇಸವಿಂತು° ಘಡಲೆಲೆ ವಿಶ್ವ ಸಾರಸ್ವತ ಸಮ್ಮೇಳನ ಹಾಂತು° ದೋನಿಂತೂಯಿ ಸಕ್ರೀಯ ಆಸೂನ ಸಂಗೀತ ವಿಭಾಗಾಂತು° ಸೇವಾದಿಲೆಲೆ ಹಿಗೆಲೆ ಪಾರ್ಥಿವ ಶರೀರಾಕ ಖೂಬ ಕೊಂಕಣಿ ಆನಿ ಸಂಗೀತಾಸಕ್ತ ಲೋಕಾನ ಶ್ರದ್ಧಾಂಜಲಿ ಅರ್ಪಣ ಕೆಲಿ.

कोडियाळ: हांगाचे विश्व कोंकणी केंद्रांत घडलेले ‘कोंकणी शिक्षण शास्त्र्स आनी आधुनिक तंत्रज्ञान’ म्हळ्ळे भासाभासांत मंगळूर आनी गोंयचे कोंकणी शिक्षण तज्ञान कोंकणी शिक्षणाचें भविश्य खूब बरें आसा म्हणु एकमताचो विश्वास प्रगट केलो. भागीदार आशिल्या तज्ञान अशें तांचो विचार मांडयलो. डा. कस्तुरी मोहन पै (मंगळूर): गोंय सोडुन आयिल्या 400 वरसांत थटवर्ती कर्नाटकाच्या कोंकणी लोकान कोंकणी भास घरांत उलौवुन जीवंत दवरली आनी आतां 15 वरसांत शाळेंत कोंकणी शिक्षण चालतीं हाडली. आतां मेरेन 4200 विद्यार्थियांक कोंकणींत साक्षर केल्यात, 14 शाळेंत 12 शिक्षिका कोंकणी भास देवनागरी लिपियेंत 6 -10 वर्गा मेरेन तीसरी भास म्हणु शिकयतात. फ़ाटी धा वरसां दकून SSLC परेक्षेंत 100% जैत निकाल आयला. हाका राज्य सरकाराचो मान्यताय आनी विश्व कोंकणी केंद्राचो अर्थिक बळ आसा. आतां मेरेन सांप्रदायिक पाठ्य पुस्तकां आनी मौखिक शिक्षण चाल्तींत आसा. दिजिटल माध्यम बेगीन सुरुवात जातलें” अशें म्हळ्लें.

डा. देवदास पै (मंगळूर): कर्नाटकांत PUC स्नातक (graduation) पावंड्यार कोंकणी शिक्षण एकत कालेजींत आसा. चड लभ्यनात.  तर मंग्ळूर युनिवर्सिटीचे उमेदेचेर MA कोंकणी सुरुवात करून 8 वरसां जालीं. वी.वी थळाचेर दूसरी भाशांक आसच्या सगळेय उपलब्दियों कोंकणीकयं लागू केल्यात. अवुंदु संगीत विशय बी परिचय केल्ला. गोंय वी.वी. सांगात मेळुन लिखित कोंकणीचे प्रमाणीकरण जायत आयलां. अशें कोंकणीचे भविश्य बरे आसा म्हणु म्हायिती दिल्ली.

स्नेहा सबनिस (कोंकणी एम.ए. शिकपी आनी कोंकणी राजभास संचालनालय, गोंयं): गोंयांत के.जी सावुन, प्राथमिक आनी प्रौढ शिक्षण, स्नातक, स्नातकोत्तर, पी.एच.डी मेरेन शिक्षण लभ्य आसा. वेवेगळीं पाठ्य पुस्तक लभ्य आसा. पूण आयज कोंकणींत दिजिटल पाठ्य (Digital contents) तयार करपाचे चड गरज आसा. अंताराष्ट्रीय भाशेंचे तुलनात्मक करूंक बुर्ग्यांक टी.वी. माध्यमांचो खूब उपेग करूंक जाय. animation इत्यादी सहायक शिक्षण गरजेचो आसा. बहुभाशिक शिक्षणेचो सहाय घेतल्यार कोंकणी शिकोवुपाक सामके जातलें. Technology and digital contents आयची गरज. ल्हान बुर्ग्यांक कोंकणींत सुशिक्षित करूंक तांका तांचे माय  भाशेंत आसची वेवेगळी श्ब्दांची दृश्य चित्रण (visual forms) तांच्या टी.वी चेर दाकोवुंक जाय आनी तेन्ना तीं बुर्गीं भासेंत बेगीन क्षमताय मेळतली. गोंय कोंकणी भाशा मंडलान ह्या कार्यांत खूब वावर केलां. यु ट्यूबाचेर खूब तांची audio-visual पाठां लभ्य आसात आनी कोणयं उपेग करत” म्हणु स्नेहा सबनिस हानीं म्हायिती दिल्ली.

सत्राचो प्रमुख संचालक गोंयचो दामोदरबाब घाणेकर हानी लोकांचे प्रश्न्यांक सूक्त जाप दिल्ली आही “गोंयं आनी कर्नातक राज्यान कोंकणी शिक्षणाक बरो संबंध जोडुवुन फ़ुडे वेल्यार कोंकणी शिक्षणाक बरो भविश्य आसा म्हणु समापनाचे उत्रांत सांगलें