ಉಡುಪಿ: ಹಾಂಗಾಚೆ ಶ್ರೀ ಲಕ್ಷ್ಮೀ ವೆಂಕಟೇಶ ದೇವಳಾಚೆ ಗಣೇಶ ವಿಗ್ರಹ ವಿಸರ್ಜನಾ ಶೋಭಾಯಾತ್ರಾ ಶನಿವಾರ (ಸೆ.23) ಸಾಂಜವೇಳಾ ಚಲೆ. ದೇವಳಾಂತು° ಪೂಜಿಲೆಲೆ 12 ಗಣೇಶ ಮೂರ್ತಿಚೆ ಸಾಂಗತ ದೇವಳಾಚೆ ಮಹಾಗಣಪತಿಕ ರುಪ್ಯಾ ಪಾಲ್ಲಕಿ ಉತ್ಸವಾರಿ ಮಂಗಳ ವಾದ್ಯ, ವಾಘಾ ವೇಸ ಸಹಿತ ಮೆರವಣಿಗಾ ಚಲಿ. ದೇವಳಾ ದಾಕೂನ ಭಾಯರ ಸರಲೆಲಿ ಮೆರವಣಿಗಾ ಐಡಿಯಲ್ ಸರ್ಕಲ್ - ಪೊರನೆ ಪೋಸ್ಟ್ ಆಫೀಸ್ ರಸ್ತೊ - ಡಯಾನಾ ಸರ್ಕಲ್ - ಕವಿ ಮುದ್ದಣ್ಣ ಮಾರ್ಗ - ತ್ರಿವೇಣಿ ವೃತ್ತ - ಪೋಸ್ಟ್ ಆಫೀಸ್ ರಸ್ತೊ - ಸಂಸ್ಕೃತ ಕಾಲೇಜು ಸರ್ಕಲ್ - ಮಾರುತಿ ವಿಥಿಕ ರಸ್ತೊ - ಚಿತ್ತರಂಜನ್ ಸರ್ಕಲ್ - ಮೈಸೂರ್ ಸ್ಟೀಲ್ ರಸ್ತೊ - ತೆಂಕುಪೇಟೆ ಜಾವನು ಪರತೂನ ದೇವಳಕಾ ಪಾವಲಿ. ಉಪತಾಂತ ದೇವಳಾಚೆ ಪದ್ಮ ಸರೋವರಾಂತು° ಶ್ರೀ ಗಣೇಶ ವಿಗ್ರಹಾಚೆ ವಿಸರ್ಜನಾ ಚಲೆ. ಅರ್ಚಕ ವಿನಾಯಕ ಭಟ್ , ದಯಾಘನ್ ಭಟ್, ಗಿರೀಶ ಭಟ್ ಹಾಂನಿ° ಧಾರ್ಮಿಕ ಪೂಜಾ ವಿಧಿ ವಿಧಾನ ಸಂಪನ್ನ ಕೆಲೆ°. ದೇವಳದ ಆಡಳಿತ ಮಂಡಳಿಚೆ ಸಾಂದೆ, ಜಿ ಎಸ್ ಬಿ ಯುವಕ ಮಂಡಳಿ ಆನಿ ಮಹಿಳಾ ಮಂಡಳಿಚೆ ಸಾಂದೆ ಆನಿ ಸಮಾಜ ಬಾಂದವ ಉಪಸ್ಥಿತ ಆಶಿಲೆ.

ತ್ಯಾಚ ದೀವಸ ಸಾಂಜವೇಳಾ ಕಲ್ಯಾಣಪುರ ಶ್ರೀ ವೆಂಕಟರಮಣ ದೇವಳಾಚೆ ಶ್ರೀ ಗಣೇಶ ವಿಸರ್ಜನಾ ಮೆರವಣಿಗಾ ಚಲಿ. ಗಾಂವಚೆ ಪ್ರಮುಖ ಬೀದಿಂತು° ಮೆರವಣಿಗಾ ಚಲನು ಸ್ವರ್ಣ ನ್ಹಂಯತು° ವಿಸರ್ಜಾನ ಚಲೆ. ದೇವಳಾಚೊ ಆಡಳಿತ ಮೋಕ್ತೆಸರ ಅನಂತ ಪದ್ಮನಾಭ ಕಿಣಿ ಹಾಂಗೆಲೆ ಮಾರ್ಗದರ್ಶನಾರಿ ದೇವಳಾಚೆ ಪ್ರಧಾನ ಅರ್ಚಕ ಜಯದೇವ ಭಟ್, ಗಣಪತಿ ಭಟ್ ಹಾಂನಿ° ಧಾರ್ಮಿಕ ಪೂಜಾ ವಿಧಾನ ಸಂಪನ್ನ ಕೆಲೆ°. ಜಿ ಎಸ್ ಬಿ ಸಭಾ ಸದಸ್ಯ ಆನಿ ಭಕ್ತವೃಂದ ಉಪಸ್ಥಿತ ಆಶಿಲೆ.

ಮುಂಬಯಿ: ಜಿ ಎಸ್ ಬಿ ಸಭಾ ಕುರ್ಲಾ, ಘಾಟ್ಕೋಪರ್, ಚೆಂಬುರ ಹಾಂಗಾ ಮಾಕ್ಷಿಚೆ ಪನ್ನಾಸ ವರಸ ದಾಕೂನ ಆಚರಣ ಜಾತಾ ಆಸಚೆ ಶ್ರೀ ಗಣೇಶೋತ್ಸವ ಕುರ್ಲಾಚೆ ಪ್ರತಿಷ್ಟಿತ ಬಾಲಾಜಿ ಮಂದಿರಾಚೆ ವಠಾರಾಂತು° ಆಸಚೆ ಶ್ರೀ ವೆಂಕಟರಮಣ ದೇವಾಲೆ ಸಾನಿಧ್ಯಾಂತು° 5 ದಿವಸ ಚಲೊ. ಸೆ. 19ಕ ಗಣೇಶ ಚತುರ್ಥಿ ದಿವಸು ಶುರು ಜಾವನು ಶನಿವಾರ, ಸೆ. 23ಕ ಚೌಪಾಟಿ ಸಮುದ್ರಾಂತು° ವಿಸರ್ಜನ ಜಾಲೆ°. ಗಣೇಶ ಉತ್ಸವಾಚೆ ವೇಳಾರಿ ವಿವಿಧ ಪೂಜಾ, ಪುನಸ್ಕಾರ, ಗಣಹೋಮ, ಮೂಡಗಣಪತಿ ಸೇವಾ, ಪುಷ್ಪ ಪೂಜಾ, ರಂಗ ಪೂಜಾ ಚಲೆ. ಶುಕ್ರವಾರ, ಸೆ. 22ಕ ಶ್ರೀಭಕ್ತ, ಶೆಣೈ ಹಾಂಗೆಲೆ ಬಾಲಾಜಿ ಭಜನಾ ಮಂಡಳಿಚಿ ಭಜನ ಸೇವಾ ಚಲಿ. ವೇದಮೂರ್ತಿ ತ್ರಿವಿಕ್ರಮ ಆಚಾರ್ಯ ಹಾಂನಿ° ಶಾಸ್ತ್ರೋಕ್ತ ಪದ್ಧತಿರಿ ಪೂಜಾ ಕರನು ಭಕ್ತ ಲೋಕಾಂಕ ತೀರ್ಥ ಪ್ರಸಾಧ ದಿಲೊ. ಉಪರಾಂತ ಸಮಾರಾಧನಾ ಆಶಿಲಿ.

ಖಬರಿ: ಕಮಲಾಕ್ಷ ಸರಾಫ್

ಮುಂಬಯಿ: ಹಾಂಗಾಚೆ ಬಾಣಗಂಗಾಚೆ ವಾಲಕೇಶ್ವರ ಕವಳೆ ಮಠ ಶಾಖೆಚೆ ಕಾಳಿಕಾ ಮಾತಾ - ಶಾಂತಾದುರ್ಗಾ ದೇವಳಾಂತು° ಹ್ಯಾ ವರಸಾಚೆ (2023) ಶ್ರೀ ಗಣೇಶೋತ್ಸವ 19 ದಾಕೂನ 25 ತಾಂಯ ಆಚರಣ ಜಾತಾ. ಪರಮಪೂಜ್ಯ ಕವಳೆ ಮಠಾಧೀಶ ಹಾಂಗೆಲಿ ಆಜ್ಞಾ ಆನಿ ಆಶೀರ್ವಾದಾನ ಚಲಚೆ ಹ್ಯಾ ಉತ್ಸವಾಂತ ಗಣೇಶ ಚತುರ್ಥಿ ಸೆ. 19ಕ ಗಣೇಶೋತ್ಸವ ಶುರು ಜಾತಾ. ದೇವಿ ಶಾಂತಾದುರ್ಗಾ ಸಾನಿಧ್ಯಾನಾಂತು° ಮಠಾಚೆ ಸಂಕೀರ್ಣಾοತ ವಿವಿಧ ಪೂಜಾ, ಅನುಷ್ಠಾನ, ನೈವೇದ್ಯ ಚಲತಾತಿ. ಸಕಾಳಿ ಗಣಹೋಮ, ಅಥರ್ವಶೀರ್ಷ ಪಠಣ, ದೋನಪಾರಾ ಮೂಢ ಗಣಪತಿ ಸೇವಾ, ಮಹಾಪೂಜಾ ಚಲತಾತಿ. ಭೋಜನ ಪ್ರಸಾದ ಜಾವಚೊ ಆಸಾ. ಸಾಂಜವೇಳಾ ರಂಗ ಪೂಜಾ, ಪುಷ್ಪ ಪೂಜಾ, ರಾತಿ ಪೂಜಾ ಚಲತಾತಿ. ಹರ ದೀವಸ ದೇವಾಲೆ ಮುಕಾರಿ ಭಜನಾ, ಗಾಯನ, ನೃತ್ಯ ಆನಿ ವಿವಿಧ ವಿನೋದಾವಳಿ ಕಾರ್ಯಕ್ರಮ ಚಲಚೊ ಆಸಾ. ಮೂಲ ಕವಳೆ ಮಠ, ಗೋವಾ ದಾಕೂನ ಆಯಿಲೆ ಅನುಭವಿ ವೈದಿಕ ಶ್ರೇಷ್ಠಾಲೆ ಮಾರ್ಗದರ್ಶನಾರಿ ವಿವಿಧ ಧಾರ್ಮಿಕ ಕಾರ್ಯಕ್ರಮ, ವಿಧಿ ವಿಧಾನ°, ಅನುಷ್ಠಾನ° ಚಲಚೆ ಆಸಾ. 7 ದಿವಸಾಚೆ ಉತ್ಸವಾಚೆ ಸಮಿತಿಂತು° ಪ್ರಮೋದ್ ಗಾಯತೊಂಡೆ, ಚಿಂತಾಮಣಿ ನಾಡಕರ್ಣಿ, ಸುಧೀರ್ ಫಡನ್ವಿಸ್, ತೋನ್ಸೆ ವೆಂಕಟೇಶ್ ಶೆಣೈ, ಕಿರಣ್ ವೈದ್ಯ, ಅನಂತ್ ಎಸ್. ಪೈ ಆಸಾತಿ. ತಶಿಂಚಿ ಬೆಂಗಳೂರ ದಾಕೂನ ವಿಶೇಷ ಜಾವನು ಯೆವಚೆ ಪ್ರಶಾಂತ್ ಶೆಣೈ, ಸಮೀರ್ ನಾಡಕರ್ಣಿ, ವಿಜಯ್ ಹುಂಸವಾಡ್ಕರ, ಪ್ರಸಾದ್ ಮಜುಂದಾರ್, ದಯಾನಂದ್ ಗಾಯತೊಂಡೆ, ಮಂದಾರ್ ಸರಾಫ್ ಸಕ್ರೀಯ ಆಸತಾತಿ. ಮುಂಬಯಿ ಮಹಾನಗರ, ಉಪನಗರಾಚೆ ಸಂಘ ಸಂಸ್ಥೆಚೆ ಪ್ರತಿನಿಧಿ ಆನಿ ಸ್ವಯಂಸೇವಕಾοಕಾಯಿ ಆಮಂತ್ರಣ ಗೆಲಾ°. ಸೆ. 25 ಕ ಸೋಮವಾರ ಸಾಂಜವೇಳಾ ಗಣಪತಿಲಿ ಮೂರ್ತಿ ಬಾಣಗಂಗಾ ತಳೆಂತು° ಜಲಸ್ಥಂಬನ ಕರತಾತಿ ಮ್ಹಣು ಮಠಾಚೆ ಸ್ಥಳೀಯ ಸಮಿತಿ ಸಾಂದೊ ಆನಿ ವಕ್ತಾರ ಕಮಲಾಕ್ಷ ಸರಾಫ್ ಹಾಂನಿ° ಕಳಯಲಾ°.