ಮಂಗಳೂರು: “ಭಾರತಾಚೆ ಸಂವಿಧಾನಾಂತು° ಕೊಂಕಣಿ ಭಾಶೆಕ ಬರೆ° ಸ್ಥಾನಮಾನ ಆಸಾ. ಕೊಂಕಣಿ ಎಕ ಸ್ವತಂತ್ರ ಭಾಸ ಜಾವನು ಆಸಾ. ತೇದನಾಚೆ ಇತಿಹಾಸಕಾರ, ಸಮಾಜ ಚಿಂತಕ, ಭಾಷಾಭಿಮಾನಿ ಲೋಕಾನ ಕಷ್ಟ ಪಾವನು ಮಾತೃಭಾಸ ಕೊಂಕಣಿ ವರೋಚಾಕ ತಾಂಗೆಲಿ ಅಮೂಲ್ಯ ಸೇವಾ ದಿಲ್ಯಾ. ತೆ° ವರೋನ ಹಾಡಚಿ ಹೋಡಿ ಜಬಾಬದಾರ ಆಮಗೆಲಿ ಜಾವನು ಆಸಾ. ಭಾಸ ವರಕಾ ಜಾಲ್ಯಾರ ತಿ ವಾಪರೂನ ಬರೊವಚೆ° ಆನಿ ವಾಚೂಚೆ° ಕರಕಾ” ಮ್ಹಣು ಕೊಂಕಣಿ ಶಿಕ್ಷಣಾಚೊ ರೂವಾರಿ ಡಾ. ಕೆ. ಮೋಹನ ಪೈ ಹಾಂನಿ° ಸಾಂಗಲಾ°. ಶಕ್ತಿನಗರಾಚೆ ವಿಶ್ವ ಕೊಂಕಣಿ ಕೇಂದ್ರಾಂತ ಕೊಂಕಣಿ ಮಾನ್ಯತಾ ದಿವಸಾಚೊ ಸಂದೇಶ ದಿತಾ ತಾಂನಿ° ಅಶೆ° ಸಾಂಗಲೆ°.

ಹ್ಯಾಚ ವೇಳಾರ ಪಾಂಚ ಲೋಕ ಕೊಂಕಣಿ ಮಹಾನ ಮನಸಾಲೆ° ಭಾವಚಿತ್ರಾಂಚೆ ಅನಾವರಣ ಜಾಲೆ°. ಬೆನಗಲ್ ನರಸಿಂಗ್ ರಾವ್, ಬೆನಗಲ್ ಶೀವ ರಾವ್, ರೆವರೆಂಡ್ ಜೆರೋಮ್ ಡಿಸೋಜಾ, ಉಳ್ಳಾಲ ಶ್ರೀನಿವಾಸ ಮಲ್ಯಾ, ಹರಿ ವಿಷ್ಣು ಕಾಮತ ಹಾಂಗೆಲೆ° ಭಾವಚಿತ್ರಾಂಚೆ ಅನಾವರಣ ಜಾಲೆ°.
ಕೆನರಾ ಚೇಂಬರ್ ಆಫ್ ಕಾಮರ್ಸ್ ಹಾಜೊ ಅಧ್ಯಕ್ಷ ಮಾರೂರು ಶಶಿಧರ ಪೈ ಆನಿ ರೆವರೆಂಡ್ ಆರ್ನಲ್ಡ್ ಹಾಂನಿಂ ಮಾನಾಚೆ ಸೊಯರೆ ಆಶಿಲೆ. ವಿಶ್ವ ಕೊಂಕಣಿ ಕೇಂದ್ರಾಚೊ ಅಧ್ಯಕ್ಷ ನಂದಗೋಪಲ ಶೆಣೈ, ಗಿಲ್ಬರ್ಟ ಡಿಸೋಜಾ, ಬಿ. ಆರ್. ಭಟ್, ವಿಲಿಯಂ ಡಿಸೋಜಾ, ಡಾ. ಪದ್ಮಾವತಿ ಶೆಣೈ, ಉಷಾ ಕಾಮತ, ಹುಂಡಿ ಪ್ರಭಾ ಕಾಮತ್, ಅಶ್ವಿನ್ ಚೆರ್ಕಳ್, ಧರ್ಮಶ್ರೀ ರಾವ್ ಆನಿ ಹೇರ ಉಪಸ್ಥಿತ ಆಶಿಲೆ.
ಡಾ. ವೈಷ್ಣವಿ ಎನ್. ಕಿಣಿನ ಕೊಂಕಣಿ ಅಭಿಮಾನ ಗೀತ ಗಾಯಲೆ°.

ಮಂಗಳೂರು: "ಮಾತೃ ಭೂಮಿ ಆನಿ ಮಾತೃಭಾಸ ಆಮೀ ಕೇದನಾಯಿ ವಿಸೊರೂಂಕ ನಜ. ಮಾತೃಭಾಸ ಕೊಂಕಣಿಕ ಸಂವಿಧಾನಾಚೆ ಆಟ್ವೆ ವಳೆರಿಂತ ಸ್ಥಾನ ಮೇಳನು 30 ವರಸ° ಜಾಲೆಲೆ ವೇಳಾರ ಆಮಿ ಸಗಟಾನ ಮೇಳನು ಕೊಂಕಣಿ ಭಾಶೆಚೆ ಅಭಿವೃದ್ಧಿಕ ನಿರಂತರ ಸೇವಾ ದಿಲೆಲೆ ಲೋಕಾಲೊ ಉಡಗಾಸ ಕಾಣು ತಾಂಕಾ° ಅಭಿನಂದನ ಸಾಂಗೂಕಾ. ತಾಂಗೆಲೆ ನಿಸ್ವಾರ್ಥ ಸೇವೆ ನಿಮಿತ ಆಮೆಗೆಲಿ ಮಾತೃ ಭಾಸ ಕೊಂಕಣಿಕ ಆಜಿ ಊಂಚ ಸ್ಥಾನ ಪ್ರಾಪ್ತ ಜಾಲಾ°. ಮಂಗಳೂರಾಂತು° ಖೂಬ ಸಂಘ ಸಂಸ್ಥೆ ಕೊಂಕಣಿ ಭಾಶೆಚೆ ಅಭಿವೃದ್ಧಿ ಕಾತಿರ ಕಾಮ ಕರತ ಆಸಾತಿ. ಜಾಲ್ಯಾರ 48 ವರಸಾಚೊ ಇತಿಹಾಸ ಆಸಚೆ ಕೊಂಕಣಿ ಭಾಶಾ ಮಂಡಳಾನ 1995 ಇಸವಿಂತು° ಪಯಲೆ° ಪಾವಟಿ ವಿಶ್ವ ಕೊಂಕಣಿ ಸಮ್ಮೇಳನ ಆಯೋಜನ ಕರನು ತಾಜೆ ಉಡಗಾಸಾಕ ಶಕ್ತಿನಗರಾಂತು°ವಿಶ್ವ ಕೊಂಕಣಿ ಕೇಂದ್ರ ಸ್ಥಾಪನಾ ಕೆಲಾ°. 2024 ಇಸವಿಂತು° ಭಾಶಾ ಮಂಡಳಾಕ 50 ವರಸ° ಭರತಾತಿ ತ್ಯಾ ವರಸ ಪನ್ನಾಸ ಬರೆ ಕಾರ್ಯಕ್ರಮ ಕರಕಾ. ಹಾಂವ ತುಮಗೆಲೆ ಸಾಂಗತ ಆಸತಲೊ" ಮ್ಹಣು ನಾವಾದಿಕ ಚಾರ್ಟರ್ಡ ಅಕೌಂಟೆಂಟ್ ಎಸ್. ಎಸ್. ನಾಯಕ ಹಾಂನಿ° ಸಾಂಗಲೆ°.

ಕೊಂಕಣಿ ಭಾಶಾ ಮಂಡಳ ಕರ್ನಾಟಕ ಹಾಂನಿ° 30ವೆ° ಕೊಂಕಣಿ ಮಾನ್ಯತಾಯ್ ದೀವಸಾಚೊ ವಾಂಟೊ ಜಾವನು ಆಯೋಜನ ಕೆಲೆಲೆ ಅಂತರ ಶಾಳಾ ಆನಿ ಅಂತರ ಕಾಲೇಜ ವಿವಿಧ ವಿನೋದಾವಳಿ ಸ್ಪರ್ದೇಚೆ ಉಗ್ತಾವಣ ಕರನು ತಾಂನಿ° ಆಶೆ° ಸಾಂಗಲೆ°.

ಕೊಡಿಯಾಲ ಖಬರ ಸಂಪಾದಕ ಆನಿ ಕೊಂಕಣಿ ಭಾಶಾ ಮಂಡಳಾಚೊ ಆದಲೊ ಅಧ್ಯಕ್ಷ ವೆಂಕಟೇಶ ಬಾಳಿಗಾ ಮಾವಿನಕುರ್ವೆ ಹಾಂನಿ ಕೊಂಕಣಿ ಮಾನ್ಯತಾಯ ದಿವಸಾಚೊ ಸಂದೇಶ ದಿಲೊ. "ಕೊಂಕಣಿ ಭಾಶೆಕ ಹಜಾರಾನಿ ವರಸಾಚೊ ಇತಿಹಾಸ ಆಸಾ. ಕೊಂಕಣಿ ಭಾಸ ಬರೊವಚೆ° ಆನಿ ವಾಚೂಚೆ° ಕೆಲ್ಯಾರಿ ಭಾಸ ವರತಾ. ಆಯಚೆ ಪಿಳಗಿಕ ಶಾಳೆಂತು° ಆನಿ ಕಾಲೇಜಾಂತು° ಕೊಂಕಣಿ ಶಿಖಚೊ ಅವಕಾಶ ಆಸಾ. ಕೊಂಕಣಿ ಎಂ.ಎ ಕರಚೊ ಅವಕಾಶ ಆಸಾ. ಹಾಜೆ ಉಪೇಗ ಸಗಟಾನ ಕರಕಾ" ಮ್ಹಣು ತಾಂನಿ° ಸಾಂಗಲೆ°. ವಿದ್ಯಾರ್ಥಿಯಾ° ಕಾತಿರ ತಾಂನಿ° ಕೊಂಕಣಿ ಕ್ವಿಜ್ ಆಯೋಜನ ಕರನು ವೆಗವೆಗಳೆ ವಿಷಯಾರಿ ಮಾಹಿತಿ ದಿಲಿ. ವಿದ್ಯಾರ್ಥಿಯಾನಿ ಉಮೇದಿನ ವಾಂಟೊ ಗೆತಿಲೆ° ದಿಸೂನ ಆಯಲೆ°.
ವಿವಿಧ ವಿನೋದಾವಳಿ ಸ್ಪರ್ಧೇಚೊ ಸಂಚಾಲಕ ಆನಿ ಭಾಶಾ ಮಂಡಳಾಚೊ ಉಪಾಧ್ಯಕ್ಷ ರತ್ನಾಕರ ಕುಡ್ವ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲೆ°. ತಾಣೆ ಭಾಶಾ ಮಂಡಳಾಚೆ ಸ್ಥಾಪಕ ಲೋಕಾಲೊ ಉಡಗಾಸ ಕಾಳೊ. ಸ್ಥಾಪಕ ಅಧ್ಯಕ್ಷ ದೇವಾದಿನ ಚಾಫ್ರಾ ಡಿಕೋಸ್ತಾ, ಉಪಾಧ್ಯಕ್ಷ ದೇವಾದಿನ ಬಿ. ವಿ. ಬಾಳಿಗಾ, ಸ್ಥಾಪಕ ಕಾರ್ಯದರ್ಶಿ ಆಸ್ಟಿನ್ ಡಿಸೋಜಾ, ಸ್ಥಾಪಕ ಖಜಾಂಚಿ ಫಾ| ಮಾರ್ಕ ವಾಲ್ಡರ್ ತಸಲೆ ಹಜಾರಾನಿ ಸಂಖ್ಯಾನಿ ಕೊಂಕಣಿ ವಾವ್ರಾಡಿಲೊ ಆಶೀರ್ವಾದ ಆಮಕಾ ಆಸಾ. ವಗೀಚ ಯೆವಚೆ ಸ್ವರ್ಣ ಮಹೋತ್ಸವ ಅತ್ಯಂತ ವಿಜೃಂಭಣೆನ ಆಚರಣ ಕರತಾತಿ ಮ್ಹಣು ತಾಣೆ ಭಾಷೈಲೆ°. ದೇವಾದಿನ ಪೌಲ ಮೋರಾಸ ಹಾಂಗೆಲೆ ಹಾಂನಿ° ಭಾಶಾ ಮಂಡಳಾಚೆ ಅಧ್ಯಕ್ಷ ಆಸತಾನ ಚಲೆಲೆ ಕೊಂಕಣಿ ಚಳ್ವಳಾಚೆ ನಿಮಿತ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ ಸ್ಥಾಪನ ಜಾಲಿ. ಭಾಶಾ ಮಂಡಳಾನ ವಿಶ್ವ ಕೊಂಕಣಿ ಸಮ್ಮೇಳನ ಆಯೋಜನ ಕೆಲೆಲೆ ನಿಮಿತ ವಿಶ್ವ ಕೊಂಕಣಿ ಕೇಂದ್ರ ಸ್ಥಾಪನ ಜಾಲೆಂ ಮ್ಹಣು ತಾಣೆ ಕಳಯಲೆಂ. ಕೊಂಕಣಿ ಭಾಶಾ ಮಂಡಳಾಚೊ ಅಧ್ಯಕ್ಷ ವಸಂತ ರಾವ್ ಹಾಂನಿ° ಅಧ್ಯಕ್ಷೀಯ ಭಾಷಣ ಕೆಲೆ°.

ಉಪರಾಂತ ಘಡಲೆಲೆ ಅಂತರ ಶಾಳಾ ಆನಿ ಅಂತರ ಕಾಲೇಜ ವಿವಿಧ ವಿನೋದಾವಳಿ ಸ್ಪರ್ಧೇಂತು° ವಿದ್ಯಾರ್ಥಿಯಾನಿ ಕೊಂಕಣಿ ಭಾಶೆಚೆ ಸಂಸ್ಕ್ರತಿಚೆ ವಳಕ ಕರನು ದಿಲೆ. ಕೊಂಕಣಿ ವೊವಯೊ, ಮ್ಹಣಿಯೊ, ನಾಟ್ಕುಳೆ°, ಬೈಲಾ ನೃತ್ಯ, ಹರಿಕಥಾ, ಪದ ಗಾಯಚೆ° ಅಶೆ° ಸಾಬಾರ ಸಾಂಸ್ಕೃತಿಕ ಪ್ರಕಾರಾಂಚೆ° ಪ್ರದರ್ಶನ ಕೆಲೆ°.
ಉಪರಾಂತ ಘಡಲೆಲೆ ಸಮಾರೋಪ ಕಾರ್ಯಕ್ರಮಾಂತು° ನಾವಾದೀಕ ನಟು ಆನಿ ನಿರ್ದೇಶಕ ಕಾಸರಗೊಡು ಚಿನ್ನಾ ಹಾಂಕಾ° "ಕೊಂಕಣಿ ಭಾಶಾ ರತ್ನ" ಬಿರುದು ದಿವನು ಸನ್ಮಾನ ಚಲೊ. ಕೆನರಾ ಬ್ಯಾಂಕಾಚೆ ಎ.ಜಿ.ಎಂ ರಾಬರ್ಟ ಡಿಸಿಲ್ವಾ ಹಾಂನಿ° ಮುಖೇಲ ಸೊಯ್ರೆ ಆಶಿಲೆ. ತಾಂನಿ° ವಿಜೇತಾಂಕ ಇನಾ° ವಾಂಟಲಿ°. "ಆಮಿ ಆಮಗೆಲೆ ಮಧೆ° ಉಲಯತಾನಾ ಕೊಂಕಣಿ ಭಾಸ ವಾಪೂರಕಾ. ಕೆನರಾ ಬ್ಯಾಂಕ ಅಸಲೆ ಕಾರ್ಯಕ್ರಮಾಂಕ ಕೆದನಾಯಿ ಪಾಟಿಂಬೊ ದಿತಾ" ಮ್ಹಣು ತಾಂನಿ° ಸಾಂಗಲೆ°.
ಸನ್ಮಾನ ಸ್ವೀಕಾರ ಕೆಲೆಲೆ ಕಾಸರಗೊಡು ಚಿನ್ನಾ ಹಾಂನಿ ಶುಭಾಷಯ ಪಾಟಯಲೊ. "ಮಂಗಳೂರ ಶಹರಾಂತು° ಕೊಂಕಣಿ ಭಾಶೆ ಕಾತಿರ ಕಾಮ ಕರಚೆ ಖೂಬ ಸಂಸ್ಥೆ ಆಸಾತಿ. ತೆಂಚಿ ಭಾಯರಚೆ ಗಾಂವ° ಪಳಯಲ್ಯಾರಿ ಅಸಲೆ ಸಂಸ್ಥೆ ಖೂಬ ಊಣೆ ಆಸಾತಿ. ಅಶೆ° ಕಸಲ್ಯಾಕ ಜಾತಾ ? ಹರ ಎಕ ಗಾಂವಾಂತು° ಕೊಂಕಣಿ ಭಾಶೆ ಕಾತಿರ ಕಾಮ ಕರಚೆ ಸಂಸ್ಥೆ ಜಾವಕಾಚಿ" ಮ್ಹಣು ತಾಂನಿ° ಸಾಂಗಲೆ°. ಭಾಶಾ ಮಂಡಳಾಚೊ ಕಾರ್ಯದರ್ಶಿ ರೇಮಂಡ ಡಿಸೋಜಾನ ಆಭಾರ ಮಾನಲೊ. ಖಜಾಂಚಿ ಸುರೇಶ ಶೆಣೈ, ಸಹ ಕಾರ್ಯದರ್ಶಿ ಜ್ಯುಲಿಯೆಟ್ ಫೆರ್ನಾಂಡಿಸ್ ವೇದಿಕೆರಿ ಉಪಸ್ಥಿತ ಆಶಿಲೆ. ವಿದ್ಯಾ ಬಾಳಿಗಾ, ನವೀನ ಕುಲಶೇಖರ, ಗೀತಾ ಸಿ. ಕಿಣಿ, ರಾಘವೇಂದ್ರ ಕಿಣಿ, ಲಾರೇನ್ಸ್ ಪಿಂಟೊ, ಪವಿತ್ರಾ ಕುಡ್ವ, ಅನಿರುದ್ಧ ಕುಡ್ವ ಹಾಂನಿ° ಸಹಕಾರ ದಿಲೊ.
ಅರುಣ ಪ್ರಕಾಶ ನಾಯಕ, ಉರ್ಬನ್ ಡಿಸೋಜಾ, ಪ್ರೇಮ ಮೋರಾಸ್ ವರೇಣ್ಯಾರ ಆಶಿಲೆ.

ಸ್ಪರ್ಧೆಚೊ ಫಲಿತಾಂಶ:

ಪ್ರೌಢಶಾಳಾ ವಿಭಾಗ: 

ಪಯಲೆ° ಸ್ಥಾನ: ಸಂತ ಅಲೋಶಿಯಸ್ ಪ್ರೌಢ ಶಾಳಾ

ದುಸ್ರೆ° ಸ್ಥಾನ: ಕೆನರಾ ಹಿರಿಯ ಪ್ರಾಥಮಿಕ ಶಾಳಾ

ತಿಸ್ರೆ° ಸ್ಥಾನ: ಉರ್ವ ಕೆನರಾ ಪ್ರೌಢ ಶಾಳಾ.

ಕಾಲೇಜ ವಿಭಾಗ:

ಪಯಲೆ° ಸ್ಥಾನ: ಮಿಲಾಗ್ರಿಸ್ ಕಾಲೇಜ

ದುಸ್ರೆ° ಸ್ಥಾನ: ಸಂತ ಅಲೋಶಿಯಸ್ ಕಾಲೇಜ

ತಿಸ್ರೆ° ಸ್ಥಾನ: ಕೆನರಾ ಡಿಗ್ರಿ ಕಾಲೇಜ.

ಅತ್ಯುತ್ತಮ ಸೂತ್ರದಾರ ಪ್ರಶಸ್ತಿ:

ಪ್ರೌಢಶಾಳಾ ವಿಭಾಗ: ಸಂತ ಅಲೋಶಿಯಸ್

ಕಾಲೇಜು ವಿಭಾಗ: ಮಿಲಾಗ್ರಿಸ್ ಕಾಲೇಜ.

ಮಂಗಳೂರು: "1981 ಇಸವಿಂತು° ಸ್ಥಾಪನಾ ಜಾಲೆಲೆ ಕೊಂಕಣಿ ಸಾಂಸ್ಕೃತಿಕ ಸಂಘ, ಮಂಗಳೂರು ಹಾಂನಿ° ಕೊಂಕಣಿ ಯಕ್ಷಗಾನ, ನಾಟಕ, ಚೆರಡುವಾಂಕ ಕೊಂಕಣಿ ಸ್ಪರ್ಧೇ ಆಯೋಜನ ಕರನು ಕೊಂಕಣಿ ಭಾಸ ಜೀವಾಳ ದವರಲ್ಯಾ. ಸಂಸ್ಥೆಚೊ ಸ್ಥಾಪಕ ದೇವಾದಿನ ಜಿ. ಜಿ. ವಾಸುದೇವ ಪ್ರಭು ಹಾಂನಿ° ಆಜಿ ಜೀವಂತ ಆಶಿಲೆ ಜಾಲ್ಯಾರ ಖೂಬ ಸಂತೋಸ ಜಾತಾ ಆಶಿಲೊ. ಹಾಂವ° ತಾಂಗೆಲಿ ಸೂನ ಮ್ಹಣು ಸಾಂಗಚಾಂತು° ಮಾಕಾ ಭರಮ ಆಸಾ. ಆಮಿ ಸಗಟಾನ ಮೇಳನು ಕೊಂಕಣಿ ಭಾಶೆಚೆ ವಾಪರಪ ಚಡ ಕರಕಾ ಆನಿ ಕೊಂಕಣಿ ಭಾಸ ವರೊಕಾ" ಮ್ಹಣು ಜಿ. ಜಿ. ಮಿತ್ರಾ ಪ್ರಭು ಹಾಂನಿ° ಸಾಂಗಲೆ°.
ಕೊಂಕಣಿ ಸಾಂಸ್ಕøತೀಕ ಸಂಘ ಮಂಗಳೂರು ಹಾಂನಿ° ಅಗಸ್ಟ 20ಕ ಭುವನೇಂದ್ರ ಸಭಾಗೃಹಾಂತು° ಆಯೋಜನ ಕೆಲೆಲೆ ಕೊಂಕಣಿ ಮಾನ್ಯತಾ ದೀವಸಾಚೆ ವೇಳಾರ ಸ್ಥಾಪಕ ಜಿ. ಜಿ. ವಾಸುದೇವ ಪ್ರಭು ಹಾಂಗೆಲೆ ಸಂಸ್ಮರಣ ಕರನು ತಾಂನಿ° ಆಶೆ° ಸಾಂಗಲೆ°. ಎಸ್. ಎಲ್. ಶೇಟ್ ಜ್ಯುವೆಲ್ಲರ್ಸ್ ಎಂಡ್ ಡೈಮಂಡ್ ಹೌಸ್ ಹಾಜೆ ಎಂ. ಪ್ರಶಾಂತ ಶೇಟ್, ಶಾಳೆಂತು° ಕೊಂಕಣಿ ಶಿಕ್ಷಣಾಚೊ ರುವಾರಿ ಡಾ. ಕೆ. ಮೋಹನ ಪೈ ಮಾನಾಚೆ ಸೊಯ್ರೆ ಆಶಿಲೆ.

ಕೊಂಕಣಿ ಭಾಶೆ ಕಾತಿರ ಮಾಕ್ಷಿಚೆ ಚಾರ ದಶಕಾ ದಾಕೂನ ಸೇವಾ ದಿವನು ಆಯಿಲೆ ಕೊಡಿಯಾಲ ಖಬರ ಪಾಕ್ಷಿಕ ಆನಿ ವೆಬ್ ಪೊರ್ಟಲಾಚೊ ಸಂಪಾದಕ ವೆಂಕಟೇಶ ಬಾಳಿಗಾ ಮಾವಿನಕುರ್ವೆ ಹಾಂಕಾ° "ಕೊಂಕಣಿ ಸಾಹಿತ್ಯ ರತ್ನ" ಆನಿ ಸಾಬಾರ ವರಸ ದಾಕೂನ ಕೊಂಕಣಿ ನಾಟ್ಕುಳೆ° ರಚನ ಕರನು ಖೇಳಯಿಲಿ ಆಶಾ ದಿನೇಶ ನಾಯಕ ಹಾಂಕಾ° "ಕೊಂಕಣಿ ಸಾಂಸ್ಕೃತಿಕ  ರಾಯಭಾರಿ" ಬಿರುದು ದಿವನು ಸನ್ಮಾನ ಚಲೊ. ಗೀತಾ ಸಿ. ಕಿಣಿನ ವೆಂಕಟೇಶ ಬಾಳಿಗಾಲೊ ಆನಿ ಆಶಾ ದಿನೇಶ ನಾಯಕ ಹಾಂಗೆಲೆ ವಳಕ ವಸಂತ ರಾವ ಹಾಂನಿ° ಕರನು ದಿಲೆ°.

ಹ್ಯಾಚ ಕಾರ್ಯಕ್ರಮಾಂತು° ಮಾಕ್ಷಿಚೆ ದೋನ ವರಸಾಂತು° ಕೊಂಕಣಿ ಎಂ. ಎ ಪರೀಕ್ಷೆಂತು° ಉತ್ತೀರ್ಣ ಜಾಲೆಲೆ ವಿದ್ಯಾರ್ಥಿಯಾಂಕಯೀ ಸನ್ಮಾನ ಚಲೊ.
ಸಭಾ ಕಾರ್ಯಕ್ರಮಾಚೆ ಪಯಲೆ° ಚಲೆಲೆ ಸತ್ರಾಂತು° ಕೊಂಕಣಿ ಭಾಶೆಚೆ ಇತಿಹಾಸಾ ಬದಲ ಪರಿಸಂವಾದ ಚಲೊ. ವೆಂಕಟೇಶ ಬಾಳಿಗಾ ಹಾಂನಿ° ಕೊಂಕಣಿ ಭಾಶೆಚೊ ಇತಿಹಾಸ, ಎಂ. ಆರ್. ಕಾಮತ ಹಾಂನಿ° ಕೊಂಕಣಿ ಮಹಾನ ಮನಿಸ, ಗೋವಿಂದರಾಯ ಪ್ರಭು ಹಾಂನಿ° ಕೊಂಕಣಿ ಕಲಾಪ್ರಕಾರ ಆನಿ ಗೀತಾ ಸಿ. ಕಿಣಿ ಹಾಂನಿ° ಶಾಳೆಂತು° ಕೊಂಕಣಿ ಬದಲ ತಾಂಗೆಲೊ ಅನುಭವ ವಾಂಟೂನ ಘೆತಲೊ.

ಸಭಾ ಕಾರ್ಯಕ್ರಮಾಚೆ ಉಪರಾಂತ ಗೀತಾ ಸಿ. ಕಿಣಿ ಹಾಂನಿ° ಬರೊವನು ನಿರ್ದೇಶನ ಕೆಲೆಲೆ ಕೊಂಕಣಿ ನಾಟ್ಕುಳೆ° "ಭಿಂಗ್ರಿ ಸುಬ್ಬಾ" ಹಾಜೆ° ಪ್ರದರ್ಶನ ಜಾಲೆ°. ಗೀತಾ ಸಿ. ಕಿಣಿ, ಗಜಾನನ ಶೆಣೈ ಆನಿ ಬಿಂದುಮಾಧವ ಶೆಣೈ ಹಾಂನಿ° ನಟನ ಕೆಲೆ°. ಸಂಘಾಚೊ ಅಧ್ಯಕ್ಷ ವೇದಮೂರ್ತಿ ದಿನೇಶ ಭಟ್ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ಕಾರ್ಯದರ್ಶಿ ಮಮತಾ ಕಾಮತಾನ ಆಭಾರ ಮಾನಲೊ. ಬಿಂದುಮಾಧವ ಶೆಣೈನ ಸೂತ್ರ ಸಂಚಾಲನ ಕೆಲೆ°. ಪುರ್ಣಿಮಾ ಕಿಣಿ, ಮಾನಸಾ ಕಿಣಿ ಆನಿ ಜಯಲಕ್ಷ್ಮಿ ಪೈ ಹಾಂನಿ° ಸಹಕಾರ ದಿಲೊ. ಮಮತಾ ಕಾಮತ ಆನಿ ಪ್ರತಿಮಾ ಪ್ರಭು ಹಾನಿ ಪ್ರಾರ್ಥನಾ ಗೀತ ಗಾಯ್ಲೆ

ಮಂಗಳೂರು: ಮಾಕ್ಷಿಚೆ ಚಾರ ದಶಕ ದಾಕೂನ ಕೊಂಕಣಿ ಭಾಸ ಆನಿ ಸಂಸ್ಕೃತಿಚೆ ಸೇವಾ ಕರೂನ ಆಸಚೆ ಕೊಂಕಣಿ ಸಾಂಸ್ಕೃತಿಕ ಸಂಘ ಮಂಗಳೂರ ಹಾಂಗೆಲೊ ವರಸಾವಧಿ ಧಾರ್ಮಿಕ ಪ್ರವಾಸು ಹ್ಯಾ ಪಾವಟಿ ಸೊಮೇಶ್ವರಚೆ ವೆಂಕಟರಮಣ ದೇವಸ್ಥಾನಾಕ ವಚೂನ ಸಂಪನ್ನ ಜಾಲೆ°. ಮೇ 29ಕ ಸಕಾಳಿ 7.45ಕ ಮಂಗಳೂರು ಶ್ರೀ ವೆಂಕಟರಮಣ ದೇವಳಾಚೆ ಮುಕಾರಿ ಮೆಳೆಲೆ ಸದಸ್ಯಾನಿ ಶುರುವೇಕ ವೆಂಕಟರಮಣಾಕ ನಮಸ್ಕಾರ ಕರನು ಜೈಕಾರ ಘಾಲೊ. ಬಸ್ಸಾರ ಬಶಿಲೆ ಆಮಕಾ ಪೋಳಲಿ ದ್ವಾರಾ ಲಾಗಿ ಪಾವತಾನಾ ಸಕಾಳಿಚೊ ಫಳಾರ ವಾಂಟೂಚೆ° ಜಾಲೆ°. ಥಂಯ ದಾಕೂನ ಆಮಿ ಸಿದಾ ಕಾರ್ಕಳ ಪಡುತಿರುಪತಿ ಶ್ರೀ ವೆಂಕಟರಮಣ ದೇವಳಾಕ ಪಾವಲಿಂತಿ. ದೇವಳಾಕ ಭೇಟಿ ದಿತರಿ ಥಂಯಚಿ ಮುಕಾರಿ ಆಸಚೆ ಹನುಮಂತ ದೇವಳಾಕ ಆಮಿ ಭೇಟಿ ದಿಲಿ. ದೋನಯ ದೇವಸ್ಥಾನಾಂತು° ಆಮಿ ನಾರಲ ಕೆಳೆಂಚಿ ಸೇವಾ ಕೆಲಿ.

ಥಂಯ ದಾಕೂನ ಭಾಯರ ಸರಲೆಲೆ ಆಮಿ ಸೋಮೇಶ್ವರಚೆ ಶ್ರೀ ವೆಂಕಟರಮಣ ದೇವಸ್ಥಾನಾಕ ಪಾವಲಿಂತಿ. ಥಂಯ ಸುತಾ ದೇವಳಾಚೆ ಮುಕಾರಿ ಹನುಮಂತ ದೇವಸ್ಥಾನ ಆಶಿಲೆ°. ಆಮೀ ದೋನಯ ದೇವಳಾಂತು° ಪೂಜಾ ಕರಯಲಿ ಆನಿ ಕೊಂಕಣಿ ಸಾಂಸ್ಕೃತಿಕ ಸಂಘಾಕ ಬರೆ° ಜಾವೊ ಮ್ಹಣು ಮಾಘಲಿಂತಿ. ಥಂಯಚೆ ವಾತಾವರಣ ಪಳೊವನು ಸಗಟಾಂಕ ಸಂತೋಸ ಜಾಲೊ. ಪೂಜೆ ವೇಳಾರ ಸಂಘಾಚೆ ತರಪೇನ ಆಮಿ ಭಜನ ಸೇವಾ ದಿಲಿ. ದೇವಳಾಚೆ ಆಡಳಿತ ಮಂಡಳಿನ ಜೇವಣಾಚಿ ವ್ಯವಸ್ಥಾ ಕೆಲೆಲಿ. ಉಪರಾಂತ ದೇವಳಾಚೆ ಸಭಾಗೃಹಾಂತು° ಸಭಾಕಾರ್ಯಕ್ರಮ ಚಲೊ. ಶುರುವೆಕ ದೇವಳಾಚೆ ಆಡಳಿತ ಮಂಡಳಿಚೊ ಕಾರ್ಯದರ್ಶಿ ರಾಘವೇಂದ್ರ ಭಕ್ತಾ ಹಾಂನಿ° ದೇವಳಾಚೊ ಇತಿಹಾಸ ಕಳಯಲೊ. ದೇವಸ್ಥಾನಾಕ ಸಂಬಂಧ ಪಾವಿಲೆ ಫಕತ 12 ಕುಟುಂಬ ಆಸಚೆ ಹ್ಯಾ ವೆಂಕಟರಮಣ ದೇವಳಾಕ ಇತಿಹಾಸ ಆಸಾ ಮ್ಹಣು ತಾಣೆ ಕಳಯಲೆ°. ಕೊಂಕಣಿ ಸಾಂಸ್ಕೃತಿಕ ಸಂಘಾಚೊ ಅಧ್ಯಕ್ಷ ದಿನೇಶ ಭಟ್ ಹಾಂನಿ° ಸಂಘಾಚೊ ವಳಕ ಕರನು ದಿಲೊ. ದೇವಳಾಚೆ ಪ್ರಭಂದಕ ಅಣ್ಣಪ್ಪ ಪ್ರಭು ಉಪಸ್ಥಿತ ಆಶಿಲೆ. ಸೋಮೇಶ್ವರ ದೇವಳಾಚೆ ಆಡಳಿತ ಮಂಡಳಿಚೆ ಸಾಂಗತ ಶುರುವೇಕಚಿ ಉಲೊವನು ಸಗಟ ವ್ಯವಸ್ಥಾ ಕೆಲೆಲೆ ಆದಲೊ ಅಧ್ಯಕ್ಷ ಸಂತೋಷ ಶೆಣೈ ವೇದಿಕೆರಿ ಉಪಸ್ಥಿತ ಆಶಿಲೆ. ತಾಂನಿ° ದೇವಳಾಚಾಲೊ ಆಬಾರ ಮಾನಲೊ. ಆದಲೊ ಅಧ್ಯಕ್ಷ ರತ್ನಾಕರ ಕುಡ್ವ ಹಾಂನಿ° ಸೂತ್ರ ಸಂಚಾಲನ ಕೆಲೆ°.

ಥಂಯ ದಾಕೂನ ಆಮಿ ವರಂಗಾಚೆ ಜೈನ ಬಸದಿಕ ಭೇಟಿ ದಿಲಿ. ದೋಣಿರಿ ಬಯಸೂನ ಆಮಿ ಬಸದಿಕ ಪಾವಲಿಂತಿ. ಪಾಶ್ರ್ವನಾಥ ಆನಿ ಪದ್ಮಾವತಿ ದೇವಾಂಕ ಪಾಯ ಪಡೂನ ಥಂಯಚೆ ನ್ಹಂಯತು ಆಸಚೆ ಜ್ಹಳಕೆಂಕ ತಾಂದೂಲ ಘಾಲತರಿ ಆಮಿ ಪರತೂನ ಭಾಯರಸರನು ಪಡುಪದ್ರಿಚೆ ಸಮುದ್ರ ತಡಿಯೆಕ ಯೇವನು ಪಾವಲಿಂತಿ. ಥಂಯ ವ್ಹಿಂಗವ್ಹಿಂಗಡ ಖೇಳು ಖೆಳನು ಇನಾಂ ವಾಂಟೂಚೆ° ಜಾಲೆ°. ತಾಜೆ ನಂತರ ಫಳಾರ ಕರನು ಸೀದಾ ರಥಬೀದಿಚೆ ವೆಂಕಟರಮಣ ದೇವಳಾ ಮುಕಾರ ಯೇವನು ಪಾವಲಿಂತಿ. ಎಕ ದುಸ್ರೆಕ ವಿದಾಯ ಸಾಂಗೂನ ಘರಾ ಪಾವಲಿಂತಿ.
– ಮಮತಾ ಕಾಮತ

ಮಂಗಳೂರು: ಹ್ಯಾ ವರಸಾಚೆ ಎಸ್. ಎಸ್. ಎಲ್. ಸಿ ಪರೀಕ್ಷೆಂತು° ದೇವನಾಗರಿ ಲಿಪಿ ವಾಪರೂನ ಪರೀಕ್ಷಾ ಬರಯಿಲೆ 49ಕ 49 ವಿದ್ಯಾರ್ಥಿ ಉತೀರ್ಣ ಜಾವನು 100% ಫಲಿತಾಂಶ ಹಾಡೂಂಕ ಶಕ್ಯ ಜಾಲ್ಯಾಂತಿ ಮ್ಹಣು ಕಳನು ಆಯಲಾ°. ಹಾಂತು° ಆಟ ವಿದ್ಯಾರ್ಥಿಯಾನಿ 90% ಕಯೀ ಚಡ ಅಂಕ ಜೋಡಲ್ಯಾಂತಿ. ಮಹಾಲಕ್ಷ್ಮೀ ಶ್ಯಾನುಭಾಗ - ನ್ಯೂ ಇಂಗ್ಲೀಷ್ ಸ್ಕೂಲ್ ಹೊನ್ನಾವರ – 98%, ಅಮೃತಾ ಖಾರ್ವಿ – ಎ. ವಿ. ಸ್ಕೂಲ್ ಗಂಗೊಳ್ಳಿ – 97%, ಅರ್ಚನಾ ಖಾರ್ವಿ – ಎಸ್. ವಿ. ಸ್ಕೂಲ್ ಗಂಗೊಳ್ಳಿ – 97%, ದೀಪಕ್ ಶ್ಯಾನುಭಾಗ – ಎಸ್. ವಿ ಇಂಗ್ಲೀಷ್ ಸ್ಕೂಲ್ ಗಂಗೊಳ್ಳಿ – 96%, ರಿಯಾ ತಾಂಡೆಲ್ - ನ್ಯೂ ಇಂಗ್ಲೀಷ್ ಸ್ಕೂಲ್, ಹೊನ್ನಾವರ – 96%, ಶಿವರಾಜ ಖಾರ್ವಿ – ಎಸ್. ವಿ. ಸ್ಕೂಲ್ ಗಂಗೊಳ್ಳಿ – 95%, ಜರಿನಾ, ಎಸ್. ವಿ. ಟಿ ಸ್ಕೂಲ್ ಕಾರ್ಕಳ – 94%, ಸಂಜನಾ ಮೇಸ್ತಾ - ನ್ಯೂ ಇಂಗ್ಲೀಷ್ ಸ್ಕೂಲ್ ಹೊನ್ನಾವರ – 90% ಹಾಂನಿ° ಅವಲ್ ಅಂಕ ಜೋಡೂನ ಶಾಳೆಂಚಿ ಭರಮ ವಾಡಯಲ್ಯಾ.

ಕರ್ನಾಟಕಾಂತು° ದ್ಹಾ ಲಾಖ ಕೊಂಕಣಿ ಲೋಕ ಆಸಾತಿ. ಹಾಂನಿ° ಮುಕಾರ ಯೇವನು ಹ್ಯಾ ಪ್ರತಿಭಾನ್ವಿತ ವಿದ್ಯಾರ್ಥಿಯಾಂಕ ವಿದ್ಯಾರ್ಥಿ ವೇತನ ದಿವಚೆ° ಕರಕಾ ಮ್ಹಣು ಶಾಳೆಂತು° ಕೊಂಕಣಿ ಶಿಕ್ಷಣಾ ಬದಲ ಫುಡಾರಪಣ ಘೆತಿಲೆ ಡಾ| ಕೆ. ಮೋಹನ ಪೈ ಹಾಂನಿ° ಫೇಸಬುಕ್ಕಾರಿ ಮಾಘಣಿ ಕೆಲ್ಯಾ.

ಮಂಗಳೂರು: ಕರ್ನಾಟಕ ಸರ್ಕಾರಾಚೆ ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರಾನ ಪ್ರಕಟ ಕೆಲೆಲೆ ಕನ್ನಡಾಚೊ ಶ್ರೇಷ್ಠ ಕವಿ ಡಿವಿಜಿಲೆ ಮಂಕುತಿಮ್ಮನ ಕಗ್ಗ ಪ್ರೊ. ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆನ ಕೊಂಕಣಿಕ ಭಾಶಾಂತರ ಕರನು ಸಂರಚಿತ ಕೆಲೆಲಿ ಕೃತಿ ‘ಮಂಕುತಿಮ್ಮಾಚೆ° ಕಾವ್ಯೆ°’ ಪುಸ್ತಕಾಚೆ ಲೊಕಾರ್ಪಣ್ ಮೂಡ್‍ಬಿದ್ರಿ ಕೋರ್ಪುಸ್ ಕ್ರಿಸ್ತಿ ಫಿರ್ಗಜೆಚೊ ವಿಗಾರ್ ಬಾಪ್ ಒನಿಲ್ ಡಿಸೋಜಾ ಹಾಂನಿ° ಕೆಲೆ°. ಕಾರ್ಯಾಂತ್ ಸಂತ ಎಲೋಶಿಯೆಸ್ ಕಾಲೆಜಾಚೊ ರಿಜಿಸ್ಟ್ರಾರ್ ಡಾ. ಆಲ್ವಿನ್ ಡೆ’ಸಾನ ಪುಸ್ತಕಾಚಿ ವಳಕ ಕರನು ದಿಲಿ. ಮಂಕುತಿಮ್ಮನ ಕಗ್ಗ ಕಾವ್ಯಾಂತು° ಡಿವಿಜಿನ ಸಾದ್ಯಾ ಲೊಕಾಂಚೊ ಅನುಭವ ಆನಿ ಅನುಭಾವ ಪ್ರಸ್ತುತ ಕರಚೆ° ಪ್ರಯತ್ನ ಕೆಲಾ° ಮ್ಹಣು ತಾಂನಿ° ಸಾಂಗಲೆ°.

ಕುವೆಂಪು ಭಾಷಾ ಭಾರತಿ ಪ್ರಾಧಿಕಾರಾಚೊ ಅಧ್ಯಕ್ಷ ಡಾ. ಗಿರೀಶ್ ಭಟ್ ಅಜಕ್ಕಳ ಮುಕೆಲ ಸೊಯರೊ ಆಶಿಲೊ. ತಾಣೆ ಪ್ರಾಧಿಕಾರಾಚೆ ಯೋಜನಾಂಚೊ ಆನಿ ದ್ಯೇಯೋದ್ದೇಶಾಂಚಿ ವಳಕ ಕರನು ದಿಲಿ. ಕಾಲೇಜಾಚೊ ಪ್ರಾಂಶುಪಾಲ ಬಾಪ್ ಡಾ. ಪ್ರವೀಣ್ ಮಾರ್ಟಿಸ್ ಸುವಾಳ್ಯಾಚೆ ಅಧ್ಯಕ್ಷ ಆಶಿಲೆ. ಇಂಗ್ಲಿಷ್ ಉಪನ್ಯಾಸಕಿ ಸೆವ್ರಿನ್ ಪಿಂಟೊನ ಸ್ವಾಗತಾಚೆ ಉತ್ರ° ಸಾಂಗಲಿ°. ಪ್ರೊ. ಸ್ಟೀವನ್ ಕ್ವಾಡ್ರಸ್ ಪೆರ್ಮುದೆನ ಆಬಾರ ಮಾನಲೊ. ವಿದ್ಯಾರ್ಥಿ ರಾಹುಲ್ ನೊರೊನ್ಹಾನ ಸೂತ್ರ ಸಂಚಾಲನ ಕೆಲೆ°.

ಮಂಗಳೂರು: ರಾಷ್ಟ್ರೀಯ ಶಿಕ್ಷಣ ನೀತಿ20 ಹಾಜೆ ಪ್ರಮಾಣೆ ಮಾತೃಭಾಶೆಂತು° ಶಿಕ್ಷಣ ಅನುಷ್ಠಾನ ಕರಚೆ ನದರೇನ ಕರ್ನಾಟಕಾಚೆ ಇಲಾಖಾವತಿನ ಚಾಲನೆರಿ ಆಸಚೆ ಕೆ.ಜಿ. ದಾಕೂನ 5ವೆ° ಕಕ್ಷಾಚೆ ಪಠ್ಯ ಪುಸ್ತಕ° ಕೊಂಕಣಿ ಭಾಶೆಕ ಅಣಕಾರ ಕರಚಾಕ ಅನುದಾನ ಆನೀ ಸೌಲಭ್ಯ ದಿವಕಾ ಮ್ಹಳೆಲಿ ಮಾಘಣಿ ರಾಜ್ಯ ಸರಕಾರಾಚೆ ಪ್ರಾಥಮಿಕ ಆನಿ ಪ್ರೌಢ ಶಿಕ್ಷಣ ಮಂತ್ರಿ ಬಿ. ಸಿ. ನಾಗೇಶ ಹಾಂಕಾ° ಕೊಂಕಣಿ ಶಿಕ್ಷಣ ಸಂಸ್ಥೆಂಚೊ ಸಂಘ ಹಾಜೊ ಅಧ್ಯಕ್ಷ ಪ್ರೊ. ಡಾ. ಕಸ್ತೂರಿ ಮೋಹನ ಪೈ, ವಿಶ್ವನಾಥ ಭ್ಹಟ್ಟ ಆನಿ ವಿಜಯಚಂದ್ರ ಕಾಮತ ಹಾಂಗೆಲೆ ಮುಖೇಲೆಪಣಾರಿ ಪುತ್ತೂರಾಂತು° ದಿವಚೆ° ಜಾಲೆ°.
ಪುತ್ತೂರು ಶಾಸಕ ಸಂಜೀವ ಮಠಂದೂರು ಉಪಸ್ಥಿತ ಆಶಿಲೆ.

ಮಂಗಳೂರು: ಕೊಂಕಣಿ ಚಳುವಳಿಚೊ ಪಿತಾಮಹಾ ಶೆಣೈ ಗೊಂಯಬಾಬ ಹಾಂಗೆಲಿ ಪುಣ್ಯ ತಿಥಿ ಖೂಬ ವರಸ ದಾಕೂನ ವಿಶ್ವ ಕೊಂಕಣಿ ದೀವಸ ಜಾವನು ಆಚರಣ ಕರನು ಆಯಲ್ಯಾಂತಿ. ಕೊಂಕಣಿ ಭಾಶಾ ಮಂಡಳ ಕರ್ನಾಟಕ ಆನಿ ಜಿ.ಎಸ.ಬಿ ಸೇವಾ ಸಂಘ, ಮಂಗಳೂರು ಹಾಂಗೆಲೆ ಜೋಡ ಆಶ್ರಯಾರಿ ಮಂಗಳೂರಾοತು° ಪಯಲೆ ಪಾವಟಿ ಎ. 9ಕ ‘ವಿಶ್ವ ಕೊಂಕಣಿ ದೀವಸ’ ಸಂಭ್ರಮಾರಿ ಗಾಂವಚೆ ಸಿ. ವಿ. ನಾಯಕ ಸಭಾಸಾಲಾಂತು° ಆಚರಣ ಜಾಲೊ.

ಹ್ಯಾ ವೇಳಾರ ‘ಶಾಳೆಂತು° ಕೊಂಕಣಿ ಶೀಖರೆ ಬಾಳಾ’ ಆಂದೋಲನಾಕ ನಿಶಾಂತ ಶೇಟ್ ಹಾಂನಿ° ಚಾಲನ ದಿಲೆ°. “ಕರ್ನಾಟಕ ರಾಜ್ಯಾಂತು° ಸ್ಹವೆ ದಾಕೂನ ದ್ಹಾವೆ ಕಕ್ಷಾ ತಾಂಯ ತೀಸ್ರಿ ಐಚ್ಛಿಕ ಭಾಸ ಜಾವನು ಕೊಂಕಣಿ ಶೀಖಚೊ ಅವಕಾಶ ಆಸಾ. ಚಡ ಲೋಕಾನ ಉಮೇದಿ ದಾಕೊವಚೆ° ದಿಸೂನ ಯೆನಾ. ತಾಜೆ ಖಾತೀರ ಕೊಂಕಣಿ ಭಾಷಾ ಮಂಡಳ ಕರ್ನಾಟಕ ಹಾಂನಿ° ಹೊ ಕಾರ್ಯಕ್ರಮ ಮಾಂಡೂನ ಹಾಡಲಾ” ಮ್ಹಣು ಕೊಂಕಣಿ ಭಾಷಾ ಮಂಡಳ ಕರ್ನಾಟಕ ಹಾಜೊ ಅಧ್ಯಕ್ಷ ವೆಂಕಟೇಶ ಬಾಳಿಗಾ ಮಾವಿನಕುರ್ವೆ ಹಾಂನಿ° ಸಾಂಗಲೆ°.

ಹ್ಯಾ ಕಾರ್ಯಕ್ರಮಾಂತು ಕೊಂಕಣಿ ಸಾಹಿತಿ ನವೀನ ಕುಲಶೇಖರ ಹಾಂಕಾ° ಡಾ| ಬಿ ದೇವದಾಶ ಪೈ ಹಾಂನಿ°, ಮಾಕ್ಷಿಚೆ ದೋನ ವರಸಾಂತು° ಕೊಂಕಣಿ ಎಂ.ಎ ಸ್ನಾತಕೋತರ ಪದವಿ ಫಾವೊ ಕೆಲೆಲ್ಯಾಂಕ ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಸಾಂದೊ ನವೀನ ನಾಯಕ ಹಾಂನಿ°, ಶಾಳೆಂತು° ದೇವನಾಗರಿ ಲಿಪಿಂತು° ಕೊಂಕಣಿ ಶೀಕಿಲೆ ವಿದ್ಯಾರ್ಥಿಯಾಂಕ ಜಿ. ಎಸ. ಬಿ ಸೇವಾ ಸಂಘ ಹಾಜೆ ಸಾಂದ್ಯಾನಿ ಸನ್ಮಾನ ಚಲೊ. “ಕೊಂಕಣಿ ಭಾಶೆ ವಯರಿ ಪೋರ್ಚುಗೀಸಾಲೆ ದಬಾವ ಪಡೂನ ಕೊಂಕಣಿ ಭಾಸ ನಾಶ ಜಾವಚೆ ಪರಿಸ್ಥಿತಿ ಯೆತನಾ ಮುಂಬಯಿοತು° ಕರತ ಆಶಿಲಿ ಬರಿ ನೌಕರಿ ಸೋಡೂನ ಆಂಗಣಾಕ ದೇವೂನ ಮಾತೃ ಭಾಸ ಕೊಂಕಣಿಚೆ ರಕ್ಷಣೆಕ ರಾಬಿಲೊ ಮಹಾಪುರುಷ ಶೆಣೈ ಗೋಂಯಬಾಬಾಲಿ ಪುಣ್ಯ ತಿಥಿ ವಿಶ್ವ ಕೊಂಕಣಿ ದೀವಸ ಜಾವನು ಆಚರಣ ಕರತಾತಿ. ಪಯಲೆ ಪಾವಟಿ ಮಾತೃಭಾಸ ಕೊಂಕಣಿ ಭಾಶೆಚಿ ವ್ಯಾಕರಣ ಆನೀ ಬರೊವಚಿ ಶೈಲಿ ಕಳಯಿಲೆ ಶೆಣೈ ಗೊಂಯಬಾಬ ಸಹಸ್ರಮಾನಾಚೊ ಮಹಾಪುರುಷ ಜಾವನು ಆಸಾ. ತಾಂಗೆಲೆ ಹ್ಯಾ ಯೋಗದಾನಚೆ ನಿಮಿತ ಕೊಂಕಣಿ ಆಜಿ ಏಕ ಸ್ವತಂತ್ರ ಭಾಸ ಮ್ಹಣೂನ ಸಾಬಿತ ಜಾವನು ಆಸಾ” ಮ್ಹಣು ಡಾ| ಕೆ. ಮೋಹನ ಪೈ ಹಾಂನಿ° ಹ್ಯಾ ವೇಳಾರ ಸಾಂಗಲೆ°. ಸನ್ಮಾನ ಸ್ವೀಕಾರ ಕೆಲೆಲೆ ಸಾಹಿತಿ ನವೀನ ಕುಲಶೇಖರ ಹಾಂನಿ° ಆಭಾರ ಪ್ರಕಟ ಕೆಲೊ. ಮಂಗಳಾ ಭಟ್, ಚಂದ್ರಿಕಾ ಮಲ್ಯ ಆನೀ ಫಾ. ಜೇಸನ್ ಪೀಂಟೊ ಹಾಂನಿ ಶಣೈ ಗೋಂಯಬಾಬಾಚೆ° ಸಾಹಿತ್ಯಾಚೆ ವಿಮರ್ಸೊ ಕೆಲೊ.

ಉಪರಾಂತ ಚಲೆಲೆ ಕಾರ್ಯಕ್ರಮಾಂತು° ಭಾಷಾ ಮಂಡಳಾಚೆ ಅಧ್ಯಕ್ಷ ವೆಂಕಟೇಶ ಬಾಳಿಗ ಹಾಂನಿ° ‘ಎನ್. ಇ. ಪಿ 20(ನ್ಯೂ ಎಜುಕೇಶನ್ ಪಾಲಿಸಿ) ತು° ಕೊಂಕಣಿ ಭಾಶೆಕ ಆಸಚೊ ಅವಕಾಶ’ ಬದಲ ಮಾಹಿತಿ ದಿಲಿ. ಡಾ| ಕೆ. ಮೋಹನ ಪೈ ಹಾಂನಿ° ಎನ್. ಇ. ಪಿ ಪ್ರಮಾಣೆ ಪಠ್ಯಪುಸ್ತಕ ತಯಾರಿ ಕರಚೆ ಬದಲ ಮಾರ್ಗದರ್ಶನ ದಿಲೆ°. ಡಾ| ದೇವದಾಸ ಪೈ ಹಾಂನಿ° ವಿಚಾರ ಮಂಡನ ಕೆಲೆ°. ಜಿ. ಎಸ ಬಿ ಸೇವಾ ಸಂಘಾಚೆ ಖಜಾಂಚಿ ವಿಶ್ವನಾಥ ಭಟ್, ಸಹ ಕಾರ್ಯದರ್ಶಿ ರಮೇಶ ಪೈ, ಎಚ್. ವಿ. ಕಾಮತ, ಜಿ. ಎಂ ಪ್ರಭು, ಕೊಂಕಣಿ ಭಾಷಾ ಮಂಡಳಾಚೆ ಆದಲಿ ಅಧ್ಯಕ್ಷಾ ಗೀತಾ ಸಿ. ಕಿಣಿ, ಕಾರ್ಯಕಾರಿ ಮಂಡಳಿಚೊ ಸಾಂದೊ ಪ್ರವೀಣ ಕಾಮತ ಉಪಸ್ಥಿತ ಆಶಿಲೆ. ಮೇಘಾ ಪೈನ ಪ್ರಾರ್ಥನಾ ಕೆಲಿ. ಎಂ. ಆರ್. ಕಾಮತ ಹಾಂನಿ° ಸೂತ್ರ ಸಂಚಾಲನ ಕೆಲೆ°. ಕನ್ನಡ ಸಾನ ಕಾಣಿ ಕೊಂಕಣಿ ಭಾಶೆಕ ಅಣಕಾರ ಕರಚೆಂ ಆನೀ ಕನ್ನಡ/ ಇಂಗ್ಲಿಷ್ ಶಬ್ದಾಂಚೆ ಕೊಂಕಣಿ ಸಮಾನಾಂತರ ಶಬ್ದ ಬರೊವಚೆ ಸ್ಪರ್ಧೇ ಚಲೆ. ಮೇಧಾ ಕಾಮತ ಆನೀ ಶಾಂತಕುಮಾರ ಭಟ್ ವರೇಣ್ಯಾರ ಆಶಿಲೆ.

ಮಂಗಳೂರು: 2021 ವರಸಾಚೆ ವಿಮಲಾ ವಿ. ಪೈ ವಿಶ್ವ ಕೊಂಕಣಿ ಸಾಹಿತ್ಯ, ಕವಿತಾ ಕೃತಿ ಪುರಸ್ಕಾರ, ಜೀವನ ಸಿದ್ಧಿ ಸಮ್ಮಾನ್, ಬಸ್ತಿವಾಮನ ಶೆಣೈ ಸೇವಾ ಪುರಸ್ಕಾರ ಪ್ರದಾನ ಸಮಾರಂಭ ಮಾರ್ಚ 20ಕ ವಿಶ್ವ ಕೊಂಕಣಿ ಕೇಂದ್ರಾοತ ಚಲೆಂ. ಜ್ಞಾನಪೀಠ ಪುರಸ್ಕೃತ ಕೊಂಕಣಿ ಸಾಹಿತಿ ದಾಮೋದರ ಮೌಜೊ ಹಾಂನಿ° ಪ್ರಶಸ್ತಿ ಪ್ರದಾನ ಕೆಲೆ°. 2021 ವರಸಾಚೆ ವಿಮಲಾ ವಿ. ಪೈ ವಿಶ್ವ ಕೊಂಕಣಿ ಸಾಹಿತ್ಯ ಪುರಸ್ಕಾರ "ಮಾಸಾ°" ಕಥಾಸಂಕಲನ ರಚನ ಕೆಲೆಲೆ ಆಂಟನಿ ಬಾರ್ಕೂರ ಹಾಂಕಾ° “ಇಂದ್ರಧೊಣು ಉದೇಂವ್” ಕವಿತಾ ಸಂಕಲನ ರಚನ ಕೆಲೆಲೆ ಉದಯ ಮ್ಹಾಂಬ್ರೊ ಹಾಂಕಾ° ಕವಿತಾ ಕೃತಿ ಪುರಸ್ಕಾರ, ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಖಾತಿರ ಜೀವಮಾನ ಸೇವಾ ದಿಲೆಲೆ ಕೊಂಕಣಿ ವ್ಯಾಕರಣ ಆನಿ ನಿಘಂಟುಕಾರ ಸುರೇಶ ಜಯವಂತ ಬೋರ್ಕರ್ ಹಾಂಕಾ ಜೀವನ ಸಿದ್ಧಿ ಸಮ್ಮಾನ, ವೈಟ್ ಡೊವ್ಸ್ ಸಂಸ್ಥೆಚೆ ಮುಖಾಂತರ ನಿರ್ಗತಿಕ ಲೋಕಾಲಿ ಸೇವಾ ಕೆಲೆಲೆ ಕೊರೀನ್ ಎ. ರಸ್ಖಿನ್ಹಾ ಆನಿ ಕಾರ್ಡಿಯೋಲಜಿ ಎಟ್ ಡೋರ್ ಸ್ಟೆಪ್ ಸಂಸ್ಥೆ ಮುಖಾಂತರ ಹಳ್ಳಿ ಹಳ್ಳಿಕ ವಚೂನ ಹೃದ್ರೋಗ ಸಾಂಬಾಳಚಿ ವ್ಯವಸ್ಥಾ ಸ್ಥಾಪನ ಕೆಲೆಲೆ ಡಾ. ಪದ್ಮನಾಭ ಕಾಮತ ಹಾಂಕಾ° ಬಸ್ತಿ ವಾಮನ ಶೆಣೈ ವಿಶ್ವ ಕೊಂಕಣಿ ಸೇವಾ ಪುರಸ್ಕಾರ ಪ್ರದಾನ ಜಾಲೆ°. ಪ್ರಶಸ್ತಿಚೆ ಸಾಂಗತ ರೂ. 1.00 ಲಾಖ ನಗದ ಆನಿ ಯಾದಸ್ತಿಕಾ ಪ್ರದಾನ ಜಾಲೆ°.
ಕೊಂಕಣಿ ಭಾಸ್ ಆನಿ ಸಂಸ್ಕೃತಿ ಪ್ರತಿಷ್ಠಾನ, ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ ನಂದಗೋಪಾಲ ಶೆಣೈ, ಖಜಾನದಾರ ಬಿ. ಆರ್. ಭಟ್, ಕಾರ್ಯದರ್ಶಿ ಗಿರಿಧರ ಕಾಮತ ಆನೀ ಹೇರ ಉಪಸ್ಥಿತ ಆಶಿಲೆ. ಟಿ. ವಿ. ಮೋಹನದಾಸ ಪೈ ಹಾಂನಿ° ಅಂತರಜಾಲಾ ಮುಖಾಂತರ ಸಂದೇಶ ದಿಲೊ.

ಮಂಗಳೂರು: ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿಚಿ 2021 ವರಸಾಚಿ ಗೌರವ ಪ್ರಶಸ್ತಿ / ಪುಸ್ತಕ ಪುರಸ್ಕಾರ ಘೋಷಣಾ ಆರತಾ° (ಮಾ. 8) ಘಡಲೆಲೆ ಪತ್ರಿಕಾ ಗೋಷ್ಠಿಂತು° ಅಧ್ಯಕ್ಷ ಡಾ| ಜಗದೀಶ ಪೈ ಹಾಂನಿ° ಕೆಲೆ°. 2021 ವರಸಾಚೆ ಪ್ರಶಸ್ತಿ ಆನಿ ಪುಸ್ತಕ ಬಹುಮಾನ ಪ್ರಧಾನ ಸುವಾಳೊ ಮಾರ್ಚಿ 27ಕ ಕುಮಟಾಚೆ ಮಹಾಲಸಾ ನಾರಾಯಣಿ ದೇವಸ್ಥಾನಾಚೆ ಸಭಾಂಗಣಾοತು° ಚಲತಾ. ಇಂಧನ, ಕನ್ನಡ ಆನಿ ಸಂಸ್ಕತಿ ಇಲಾಖೆಚೊ ಮಂತ್ರಿ ವಿ. ಸುನಿಲ್ ಕುಮಾರ್ ಪ್ರಶಸ್ತಿ ಪ್ರಧಾನ ಕರತಾತಿ. ಉತ್ತರ ಕನ್ನಡ ಜಿಲ್ಲಾ ಉಸ್ತುವಾರಿ ಮಂತ್ರಿ ಕೋಟ ಶ್ರೀನಿವಾಸ ಪೂಜಾರಿ ಆನಿ ಕುಮಟಾ ಹೊನ್ನಾವರ ವಿಧಾನಸಭಾ ಕ್ಷೇತ್ರಾಚೆ ಶಾಸಕ ದಿನಕರ ಶೆಟ್ಟಿ ಮುಖೇಲ ಸೊಯ್ರೆ ಆಸತಲೆ ಮ್ಹಣು ತಾಂನಿ° ಕಳಯಲೆ°.
ಪ್ರಶಸ್ತಿ ವಿಜೇತ ಆಶೆ° ಆಸಾತಿ.

ಕೊಂಕಣಿ ಸಾಹಿತ್ಯ - ನಾಗೇಶ್ ಅಣ್ವೇಕರ್
ಕೊಂಕಣಿ ದೈವಜ್ಞ ಬ್ರಾಹ್ಮಣ ಸಮಾಜಾಚೆ ಜಾವನು ಆಸಚೆ ಹಾಂನಿ° ವೃತ್ತಿನ ಸ್ವರ್ಣಾಭರಣ ತಯಾರಿ ಕರತಾತಿ. ಕೊಂಕಣಿ ಭಾಷೆಂತು° ಸಾಹಿತ್ಯ ರಚನಾ, ಜನಪದ ಸಾಹಿತ್ಯ ಸಂಗ್ರಹ ಆನಿ ಛಂದೋಬದ್ದ ಸಾಹಿತ್ಯ ರಚನ ಕರಚೆ ಹಾಂನಿ° ಯಕ್ಷಗಾನಾಚೆ ಸಾಬಾರ ಪ್ರಸಂಗ° ಕೊಂಕಣಿ ಭಾಷೆಕ ಅಣಕಾರ ಕರನು ತಾಳಮದ್ದಳೆ ಪ್ರಸ್ತುತ ಕೆಲಾ. ಗಮಕ ಕಲೆಂತುοಯಿ ಕೊಂಕಣಿ ಭಾಷಾ ಸಾಹಿತ್ಯ ರಚನ ಹಾಂನಿ° ಕೆಲೆಲೆ° ಆಸಾ. ಆಕಾಶವಾಣಿಂತು° ಹಾಂಗೆಲೊ ಖೂಬ ಕೊಂಕಣಿ ಸಾಹಿತ್ಯಾತ್ಮಕ ಕಾರ್ಯಕ್ರಮ ಪ್ರಸಾರ ಜಾಲಾ. ಕೊಂಕಣಿ ಕಾವ್ಯ ಮಂಜರಿ, ಕೊಂಕಣಿ ಕಾವ್ಯ ಪ್ರಭಾ, ಕೊಂಕಣಿ ಶ್ರೀ ದೈವಜ್ಞ ಪೀಠ, ಪುಲಾ ಕಳೊ, ಸುಭಾಷಿತಾಚೆ ತತ್ವಾದರ್ಶ ಹಾಂಗೆಲೆ ಪ್ರಕಟ ಜಾಲೆಲೆ ಕೃತಿ ಜಾವನು ಆಸಾತಿ. ಕೊಂಕಣಿ ಸಾಹಿತ್ಯ ಕ್ಷೇತ್ರಾಂತು° ನಿರಂತರ ಸೇವಾ ದಿಲೆಲೆ ಹಾಂಕಾ° 2021 ವರಸಾಚೆ ಸಾಹಿತ್ಯ ವಿಭಾಗಚೆ ಗೌರವ ಪ್ರಶಸ್ತಿ ಫಾವೊ ಜಾಲ್ಯಾ.
ಕೊಂಕಣಿ ಕಲಾ – ದಿನೇಶ್ ಪ್ರಭು ಕಲ್ಲೊಟ್ಟೆ
ಹಾಂನಿ° ವೃತ್ತಿನ ಹಿರಿಯಂಗಡಿ ಅಂಚೆ ಇಲಾಖೆಂತು° ಪೋಸ್ಟ್ ಮಾಸ್ಟರ್ ಜಾವನು ಆಸಾತಿ. ಸಾಬಾರ 30 ವರಸ ದಾಕೂನ ಕೊಂಕಣಿ ನಾಟಕ ಕ್ಷೇತ್ರಾಂತು° ಸಕ್ರೀಯ ಆಸಚೆ ಹಾಂನಿ° ವಕ್ಕಲ್, ಅಮ್ಮಿ ಸೋಣಾತಿ, ಮಕ್ಕ್ ಗೊತ್ತಸ್ಸ್, ಅಶಿ° ಜಾಲ್ಯಾರಿ ಕಶಿಂ, ಪೂರ ತುಮ್ಗೆಲೆ ಕತೀರ್, ಗಿರ್ಮಿಟ್ ಗಿರಿಧರು, ಮಂಕಡ್ ಕೊರ್ನುಕಾತಿ, ಗಂಗ್ ಮಾಯ್ಯೆಲೆ ಗಮ್ಮತ್, ವ್ಹರಣ್ ತಸಲೆ ನಾಟಕ° ರಚನ ಕೆಲ್ಯಾಂತಿ. "ಪಲ್ಲವಿ ಆರ್ಟ್ಸ್" ಸಂಸ್ಥೊ ಬಾಂದೂನ 15 ವರಸ ದಾಕೂನ ಖೂಬ ಸಂಘ ಸಂಸ್ಥೆοಚೆ° ನಾಟಕ ಕಲಾವಿದಾಂಕ, ಶಾಳಾ ವಿದ್ಯಾರ್ಥಿಯಾಂಕ ಪ್ರಸಾಧನ ಕರನು ರಂಗ ತರಬೇತಿ ಶಿಬಿರ ಆಯೋಜನ ಕರನು ನಟನಾ, ಪ್ರಸಾಧನ ಕಲಾಚೆ ತರಬೇತಿ ದಿಲೆಲಿ ಆಸಾ. ಹಾಂಗೆಲೆ ಸಾಧನಾ ಮಾನೂನ ಘೆವನು ಹಾಂಕಾ° ಡಾ| ಬಿ. ಆರ್. ಅಂಬೇಡ್ಕರ್ ಸಮಾಜ ಸೇವಾ ಸಂಘಾನ "ಕಲಾಬ್ರಹ್ಮ" ಬಿರುದು, 2019 ತು° ಉಡುಪಿ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ, 2020 ತು° ಭಾರತ ರತ್ನ ಸರ್. ಎಂ ವಿಶ್ವೇಶ್ವರಯ್ಯ ಇಂಜಿನಿಯರಿοಗ್ ಪ್ರತಿಷ್ಠಾನ ಟ್ರಸ್ಟ್(ರಿ) ಹಾಂನಿ° "ವಿಶ್ವೇಶ್ವರಯ್ಯ ರಾಜ್ಯ ಪ್ರಶಸ್ತಿ" ಅಶೆ° ಸಾಬಾರ 200ಕಯೀ ಚಡ ಸಂಘ ಸಂಸ್ಥೆನಿ ಸನ್ಮಾನ ಕೆಲೆಲೊ ಆಸಾ. ಕೊಂಕಣಿ ಕಲಾ ಕ್ಷೇತ್ರಾಂತು° ನಿರಂತರ ಸೇವಾ ದಿತಾ ಆಸಚೆ ಹಾಂಕಾ° 2021 ವರಸಾಚೆ ಕಲಾ ಗೌರವ ಪ್ರಶಸ್ತಿ ಫಾವೊ ಜಾಲ್ಯಾ.
ಕೊಂಕಣಿ ಜಾನಪದ – ಮಾಧವ ಖಾರ್ವಿ
ಅಂಚೆ ಇಲಾಖೆಂತು° ನೌಕರಿ ಕರನು ನಿವೃತ್ತಿ ಜೀವನ ಕರತ ಆಸಾತಿ. ಕೊಂಕಣಿ ಜಾನಪದ ಕಲೆಂತು° ಉಮೇದಿ ದವರನು ಆಸಚೆ ಹಾಂನಿ° ಕೋಡಿ ಬೆಂಗ್ರೆοತು° ಸಂಘಟನ ಬಾಂದೂನು ಖಾರ್ವಿ ಜಾನಪದ ಕಲಾ ಆನಿ ಖಾರ್ವಿ ಧಾರ್ಮಿಕ ಆಚರಣೆ ಬದಲ ಸಮಾಜಾಚೆ ಮ್ಹಾಲ್ಗಡೆ ಲೋಕಾ ಲಾಗಿ ತರಬೇತಿ ಘೆವನು ಖಾರ್ವಿ ಜಾನಪದ ವರೊಚೆ° ಕರನು ಆಸಾತಿ. ಕುಂದಾಪುರ, ಕಾರವಾರ, ಹಳದಿಪುರ, ಎರ್ಮಾಳ, ಬ್ರಹ್ಮಾವರ ಪರಿಸರಾಂತು° ಖಾರ್ವಿ ಸಂಘಟನ ಬಾಂದೂನ ಖಾರ್ವಿ ಜಾನಪದ ಕಲಾ ವರೊನು ವಾಡೊಚೆ° ಕರತ ಆಸಾತಿ. ಸಮಾಜಾಚೆ ತರನಾಟೆಂಕ ಆನಿ ಚೆರಡುವಾಂಕ ಗುಮಟೆ ನೃತ್ಯ, ಥೊಣಿಯೆ ಖೇಳು, ಗಾಯನ ತರಬೇತಿ ದಿತಾ ಆಸಾತಿ. ಕೊಂಕಣಿ ಖಾರ್ವಿ ಸಮುದಾಯಾಚೆ ಪಾರಂಪರಿಕ ಆಚರಣ ಆನಿ ಜಾನಪದ ವರೊಚಾಕ ಅವಿರತ ಸೇವಾ ದಿತಾ ಆಸಚೆ ಹಾಂಕಾ° 2021 ವರಸಾಚೆ ಕೊಂಕಣಿ ಜಾನಪದ ಗೌರವ ಪ್ರಶಸ್ತಿ ಫಾವೊ ಜಾಲ್ಯಾ.

ಕರ್ನಾಟಕ ಕೊಂಕಣಿ ಸಾಹಿತ್ಯ ಅಕಾಡೆಮಿ - ಪುಸ್ತಕ ಪುರಸ್ಕಾರ-2021

ಕೊಂಕಣಿ ಕವನ - ಲಾರಾಚೆ° ಗೀತ್ ಜೆ. ವಿ. ಸಿಕೇರ್ ಕಾವ್ಯ ನಾಮಾಚೆ ಫಾ| ಜೊವಿನ್ ವಿಶ್ವಾಸ್ ಸಿಕ್ವೇರಾ ಹಾಂನಿ° ರಚನ ಕೆಲೆಲೆ "ಲ್ಹಾರಾಂಚೆ° ಗೀತ್" ಕವನ ಸಂಗ್ರಹ ಪುಸ್ತಕಾಕ 2021 ವರಸಾಚೆ ಪುಸ್ತಕ ಬಹುಮಾನ ಫಾವೊ ಜಾಲಾ°.

ಕೊಂಕಣಿ ಸಾನ ಕಾಣಿಯೊ –  “ಲವ್ಲೆಟರ್ಸ್ ವಾಜ್ಜಿತಾಲೊ ಮ್ಹಾಂತಾರೊ” ಗೋಪಾಲಕೃಷ್ಣ ಪೈ ಹಾಂನಿ° ರಚನ ಕೆಲೆಲೆ “ಲವ್ಲೆಟರ್ಸ್ ವಾಜ್ಜಿತಾಲೊ ಮ್ಹಾಂತಾರೊ” ಕೃತಿಕ ಫಾವೊ ಜಾಲಾ°

.

ಕೊಂಕಣಿ ಲೇಖನ – ಎಚ್ಚೆಮ್ ಪೆರ್ನಾಲ್ ಕಾವ್ಯನಾಮಾಚೆ ಹೆನ್ರಿ ಇಗ್ನೇಶಿಯಸ್ ಮೆಂಡೋನ್ಸಾ ಹಾಂನಿ° ರಚನ ಕೆಲೆಲೆ° “ರುಪಾ° ಆನಿ ರೂಪಕಾ°” ಹಾಕಾ ಫಾವೊ ಜಾಲಾ°.
ಪತ್ರಿಕಾ ಗೋಷ್ಠಿಂತು° ಅಧ್ಯಕ್ಷ ಡಾ. ಕೆ. ಜಗದೀಶ್ ಪೈ, ರಿಜಿಸ್ಟ್ರಾರ್ ಆರ್. ಮನೋಹರ್ ಕಾಮತ್, ಸಾಂದೆ ಕೆನ್ಯುಟ್ ಜೀವನ್ ಪಿಂಟೊ, ನವೀನ ನಾಯಕ್, ಸಾಣೂರು ನರಸಿಂಹ ಕಾಮತ್, ಗೋಪಾಲಕೃಷ್ಣ ಭಟ್ ಆನಿ ಅರುಣ್ ಜಿ. ಶೇಟ್ ಉಪಸ್ಥಿತ ಆಶಿಲೆ.