मंगळूर: ह्या वर्साची पयली परकी क्रूझ आयज न्यू मंगळूर बंदराचेर पावली आनी तातूंतल्या जायत्या परकी पर्यटकांनी पांडेश्वर हांगाच्या मंगळूर मुखेल टपाल खात्याक भेट दिवन भारताची टपाल सेवा आनी वेगवेगळ्या टपाल शिक्के विशीं म्हायती मेळ्ळी. ह्या पंगडांत ऑस्ट्रेलियांतले 2, स्पेनांतले 2, अमेरिकेंतले 3 आनी न्यूयॉर्कांतले 2 पर्यटक आशिल्ले.
मंगळूर मुखेल टपाल खात्यांतलें फिलाटेलिक ब्युरो आतां अधिकृत पर्यटन थळ जावपाचे प्रक्रियेंत आसा. श्रीमती दीपान हांगा भेट दिवपी परकी पर्यटकांक टपाल शिक्के विशीं पुराय म्हायती दिली. टपाल खात्याच्या कामगिरीची पर्यटकांनी तोखणाय केली. हांगाच्यान ताणें आपल्या देशांत चित्र पोस्टकार्ड घाले.
श्री श्रीनाथ बसरूरू, वरिश्ठ पोस्ट संरक्षक हांणी परकी पर्यटकांक येवकार दिलो आनी तांकां टपाल खात्याचे सेवां विशीं म्हायती दिली. तशेंच हांगाच्या फिलाटेलिक ब्युरोंत परकी पर्यटकांक इंडियन पोस्टा विशीं चड म्हायती दिवपा खातीर एक खाशेली किट उपलब्ध करून दिल्या.

To Support Kodial Khaber click the following button.

मंगळूर : 2022-2023 वर्सा मंगळूर टपाल विभागीय पांवड्याचो पुरस्कार उत्कृश्ट कामगिरी करपी टपाल खात्यांक आनी पांच पुरस्कार पांडेश्वर हांगाच्या मंगळूर मुखेल टपाल खात्याक मेळ्ळे. मंगळूर मुखेल टपाल खात्यान आधार नोंदणी आनी दुरुस्तींत दुसरो, टपाल बचत येवजणेंत दुसरो, सुकन्या समृध्दींत पयलो, अटल पेन्शन येवजणेंत पयलो आनी महिला सम्मान येवजणेंत दुसरो क्रमांक मेळोवन वट्ट 5 पुरस्कार मेळयले. विभागीय वरिश्ठ अधीक्षक सुधाकर माल्या आनी मुखेल सोयरो श्री गोपाल, निवृत्त ज्येश्ठ टपाल अधीक्षक हांणी हो पुरस्कार मुखेल टपाल खात्याचे वरिश्ठ टपाल मास्तर श्रीनाथ बसरूरू हांकां भेटयलो. उप पोस्टमास्टर श्दिनेश पी. हाजीर आशिल्ले.

To Support Kodial Khaber click the following button.

ಮಂಗಳೂರು: ಮಾಕ್ಷಿಚೆ 20 ವರಸ ದಾಕೂನ ಮಾಧ್ಯಮ ಕ್ಷೇತ್ರಾಂತು° ಸಕ್ರಿಯ ಆಸಚೆ ಎನ್. ವಿ. ಪೌಲೊಸ್ ಮುಖೇಲಪಣಾಚೆ ಗ್ಲೋಬಲ್ ಟಿವಿ ಹಾಂನಿ° ಪ್ರಧಾನ ಕರಚಿ "ವಿಮೆನ್ ಆಫ್ ಸಬಸ್ಟೆನ್ಸ್" ಪ್ರಶಸ್ತಿ ಶ್ರೀ ದೇವಿ ಇಂಜಿನಿಯರಿoಗ್ ಕಾಲೇಜಾಚಿ ಎಂಬಿಎ ವಿಭಾಗಾಚಿ ಮುಖ್ಯಸ್ಥಾ ಡಾ. ಗಾಯತ್ರಿ ಬಿ ಜೆ ಹಾಂಕಾ° ಮಂಗಳೂರು ಇನಕಂಟ್ಯಾಕ್ಸ್ ವಿಭಾಗಾಚೊ ಡೆಪ್ಯುಟಿ ಕಮಿಷನರ್ ರಮಿತ್ ಚೆನ್ನಿತ್ತಲ ಹಾಂನಿ° ಪ್ರದಾನ ಕೆಲಿ. ಜುನಿತ ಮಾರಿಯಂ ಜಾನ್, ಅಕ್ಷತ ನಾಯಕ್, ಮಂಜುಳಾ ನಾಯಕ್, ಡಾ. ಕೆ. ಇ. ಪ್ರಕಾಶ್, ಕಲ್ಲಚ್ಚು ಪ್ರಕಾಶನಾಚೊ ಮಹೇಶ ಆರ್ ನಾಯಕ್ ಆನಿ ಹೇರ ಉಪಸ್ಥಿತ ಆಶಿಲೆ. ಹ್ಯಾಚ ಕಾರ್ಯಕ್ರಮಾಂತು° ಕಲ್ಲಚ್ಚು ಪ್ರಕಾಶನ ಹಾಂನಿ° ಪ್ರಕಟ ಕೆಲೆಲೆ "ವಿಮೆನ್ ಆಫ್ ಸಬಸ್ಟೆನ್ಸ್" ಕೃತಿಚೆ ಉಗ್ತಾವಣ ಜಾಲೆ°. ಹ್ಯಾ ಪುಸ್ತಕಾಂತು° ಪಾಂಚ ವನಿತಾ ಲೋಕಾಂಚೆ ಜೀವನಾ ಯಶೋಗಾಥಾ ಆಸಾ. ಶ್ರೀ ದೇವಿ ಇಂಜಿನಿಯರಿoಗ್ ಕಾಲೇಜಾಚೊ ಪ್ರಾಂಶುಪಾಲ ಡಾ. ಕೆ. ಇ. ಪ್ರಕಾಶ್ ಹಾಂನಿ° ಪುಸ್ತಕಾಚೆ ಮೋಕಳಿಕ ಕೆಲೆ°. 

To Support Kodial Khaber click the following button.

ಮಂಗಳೂರು: ಕುಡಾಳ್ ದೇಶ್ಕರ್ ಆದ್ಯ ಗೌಡ್ ಬ್ರಾಹ್ಮಣ ಸಂಘ (ಕೆಡಿಎಜಿಬಿ) ಹಾಂನಿ° ಗೌಡ ಬ್ರಾಹ್ಮಣ ಸಭಾ, ಮುಂಬೈ ಹಾಂಗೆಲೆ ಜೋಡ ಆಶ್ರಯಾರಿ ಪಯಲೆ° ಪಾವಟಿ ಕರ್ನಾಟಕ, ಮಹಾರಾಷ್ಟ್ರಾ ಆನಿ ಗೋವಾ ಪ್ರದೇಶಾಚೆ ಕುಡಾಳ್ ದೇಶ್ಕರ್ ಆದ್ಯ ಗೌಡ್ ಬ್ರಾಹ್ಮಣ ಹಾಂಗೆಲೆ ದೋನ ದೀವಸಾಚೆ ಬಿಸಿನೆಸ್ ಕಾನ್‌ಕ್ಲೇವ್ ಆನಿ 8ವೆ° ಕೆಪಿಎಲ್ ಈವೆಂಟ್ ಮಂಗಳೂರಾoತು° ನ. 24 - 26ಕ ಆಯೋಜನ ಕೆಲಾ°. ದೇಶ ಭರ ಆಸಚೆ ಕುಡಾಳ್ ದೇಶ್ಕರ್ ಆದ್ಯ ಗೌಡ್ ಬ್ರಾಹ್ಮಣ ಲೋಕಾಂಕ ಕ್ರೀಡಾ, ಸಾಂಸ್ಕೃತಿಕ ಸಂಭ್ರಮ ಆನಿ ವ್ಯಾರಚೆ ನಾಂವಾರ ಎಕ ಕಡೇನ ಮೇಳೊನು ಎಕ ಕಡೇನ ಮೇಳೊನು ರಾಷ್ಟ್ರೀಯತೆಚೆ ಮನೋಭಾವಾನ ಕಾರ್ಯಕ್ರಮ ಆಯೋಜನ ಕೆಲಾ ಮ್ಹಣು ಕಳವಣಿಂತು° ಸಾಂಗಲಾ°. ಮಂಗಳೂರ ಶಹರಾಚೆ ಭಾಯರಚೆ ಸಹ್ಯಾದ್ರಿ ಇಂಜಿನಿಯರಿoಗ್ ಕಾಲೇಜಾಚೆ ಕ್ಯಾಂಪಸಾoತ ಘಡಚೆ ಹ್ಯಾ ಕಾರ್ಯಕ್ರಮಾತು° ಸಾಬಾರ 3000 ಲೋಕಾನ ವಾಂಟೊ ಘೆವಚೆ ಸಾಧ್ಯತಾ ಆಸಾ. ಮಹಾರಾಷ್ಟ್ರಾ ಸರಕಾರಾಚೆ ಕೈಗಾರಿಕಾ ಸಚಿವ ಉದಯ್ ಸಾಮಂತ್ ಉದ್ಘಾಟಕ ಆಸತಲೆ, ಶಾಸಕ ಶಾಸಕ ಡಿ. ವೇದವ್ಯಾಸ್ ಕಾಮತ್, ಎಂಎಲ್‌ಸಿ ಆನಿ ಶಿಕ್ಷಣ ತಜ್ಞ ಮಂಜುನಾಥ ಭಂಡಾರಿ, ಮಾಜಿ ಭಾರತೀಯ ಮಹಿಳಾ ಕ್ರಿಕೆಟರ್ ಸುಲಕ್ಷಣಾ ನಾಯಕ್ (ಪ್ರಸ್ತುತ ಬಿಸಿಸಿಐ ಆಯ್ಕೆ ಸಮಿತಿಚಿ ಸದಸ್ಯಾ) ಆನಿ ಕರ್ನಾಟಕ ಅಥ್ಲೆಟಿಕ್ಸ್ ಅಸೋಸಿಯೇಶನ್ ಹಾಜೆ ಉಪಾಧ್ಯಕ್ಷ ಮಹೇಶ್ ಠಾಕೂರ್ ಮಾನಾಚೆ ಸೊಯ್ರ ಆಸತಲೆ.
ಕೆಪಿಎಲ್ ಕ್ರೀಡಾಕೂಟಾಂತು° ಕ್ರಿಕೆಟ್, ಥ್ರೋಬಾಲ್, ಕೇರಂ, ಟೇಬಲ್ ಟೆನ್ನಿಸ್ ಆನಿ ಚೆಸ್ ಆಸತಲೆ. 32 ಪುರುಷ ಕ್ರಿಕೆಟ್ ಪಂಗಡ°, 12 ಮಹಿಳಾ ಕ್ರಿಕೆಟ್ ಪಂಗಡ°, 220 ಚೆಸ್ ಖೇಳಾಡು, 120 ಕೇರಂ ಖೇಳಾಡ, 50 ಟೇಬಲ್ ಟೆನಿಸ್ ಖೇಳಾಡು ಆನಿ 10 ಥ್ರೋಬಾಲ್ ಪಂಗಡ° ವಾಂಟೊ ಘೆತಾತಿ ಮ್ಹಣು ಕಳವಣಿ ಸಾಂಗತಾ. ಹ್ಯಾ ದೀಸಾಂತ ಕಲಾ ಆನಿ ರಂಗೋಲಿ ಸ್ಪರ್ಧೆ, ಚಿತ್ರಕಲಾ ಆನಿ ಕರಕುಶಲ ವಸ್ತುಂಚೆ° ಪ್ರದರ್ಶನ ಚಲಚೆ° ಆಸಾ.
ಹಾಜೆ ಪಯಲೆ° ಹ್ಯಾ ಕ್ರೀಡಾಕೂಟ° ಮಹಾರಾಷ್ಟ್ರಾ ಆನಿ ಗೋವಾಂತು° ಚಲೆಲೆ ಆಸಾ. ಹ್ಯಾ ತೀನ ದೀವಸ ಸಾಂಜವೇಳಾ ವೃತ್ತಿಪರ ಆನಿ ಸ್ಥಳೀಯ ಕಲಾವಿದ ವೈವಿದ್ಯಮಯ ಸಾಂಸ್ಕೃತಿಕ ಕಾರ್ಯಕ್ರಮ ಪ್ರಸ್ತುತ ಕರತಾತಿ.
"ಯುನೈಟ್ ಎಂಪವರ್ ಎಂಡ್ ಇನ್ಸ್ಪೈರ್ " ಮ್ಹಳೆಲೆ ಘೋಷವಾಕ್ಯಾಚೆ ಸಕಳ ಚಲಚೆ ಬಿಸಿನೆಸ್ ಕಾನ್‌ಕ್ಲೇವ್ ಹಾಂತು° 300ಕಯೀ ಚಡ ಕೈಗಾರಿಕೋದ್ಯಮಿ, ಸ್ಟಾರ್ಟ್ಅಪ್ ವಾಂಟೊ ಘೆತಾತಿ. ದೀಪಕ್ ಕರಂಜಿಕರ್, ನಟ, ನಿರ್ದೇಶಕ, ಲೇಖಕ ಆನಿ ರೂಪಾಂತರ ತರಬೇತುದಾರ, ಡಾ. ಜಯಪ್ರಕಾಶ್, ಆರ್‌ಎಸ್‌ಎಸ್ ಸ್ಟೇಟ್ ಸೆಕ್ರೆಟರಿ, ಶುಭಾಂಗಿ ತಿರೋಡ್ಕರ್, ಬಾಕುಲ್ ಗ್ರೂಪಾಚಿ ನಿರ್ದೇಶಕಿ ಆನಿ ಮಹಾರಾಷ್ಟ್ರಾ ಚೇಂಬರ್ ಆಫ್ ಕಾಮರ್ಸ್ ಹಾಜಿ ಉಪಾಧ್ಯಕ್ಷಾ, ನಂದನ್ ಶೆಣೈ, ಕರ್ನಾಟಕ ಕೃಷಿ ಇಲಾಖೆಚೊ ಉಪನಿರ್ದೇಶಕ, ಅಜಯ್ ನಾಯಕ್, ರುಕ್ಮಿಣಿ ಫುಡ್ ಇಂಪೆಕ್ಸ್ ಲಿಮಿಟೆಡ್, ಎಕ್ಸ್ ಡಿ ಮಾರ್ಟ್ ಎಫ್‌ಎಂಸಿಜಿ ಕೆಟಗರಿಚೊ ಮುಖ್ಯಸ್ಥ, ಜಗದೀಶ್ ವಾಲ್ವಾಲ್ಕರ್, ಐಡಿಯಲ್ ಎಜುಕೇಶನ್ ಲಿಮಿಟೆಡ್ ಸಂಸ್ಥಾಪಕ ಆನಿ ಎಂ.ಡಿ. ಸತೀಶ್ ಪಾಟೀಲ್, ವೇಗ ಟ್ರಾನ್ಸ್ಪೋಟ್ ಸಂಸ್ಥಾಪಕ ವಾಂಟೊ ಘೆತಾತಿ ಮ್ಹಣು ಕಳವಣಿತು° ರಮೇಶ ನಾಯಕ್ ಹಾಂನಿ° ಸಾಂಗಲಾ°.

To Support Kodial Khaber click the following button.

ಮಂಗಳೂರು: ಆಧುನಿಕ ಮಂಗಳೂರಚೊ ನಿರ್ಮಾತಾ ಉಳ್ಳಾಲ ಶ್ರೀನಿವಾಸ ಮಲ್ಯ ಹಾಂಗೆಲೊ 121ವೊ ಜಲ್ಮ ದೀಸ ಪದವಾರ ಕದ್ರಿ ಜೋಗಿ ಮಠ ರಸ್ತೆಚೆ ಉಳ್ಳಾಲ ಶ್ರೀನಿವಾಸ ಮಲ್ಯ ಉದ್ಯಾನವನಾಂತ ಆಸಚೆ ತಾಂಗೆಲೆ ಪುಥಳಿಚೆ ಮುಕಾರ ಆಚರಣ ಜಾಲೊ. ಉಲ್ಲಾಳ ಶ್ರೀನಿವಾಸ ಮಲ್ಯ ಜನ್ಮ ದಿನ ಆಚರಣಾ ಸಮಿತಿ ಆನಿ ಸಾಮರಸ್ಯ ಮಂಗಳೂರು ಹ್ಯಾ ದೋನ ಸಂಸ್ಥೆಚೆ ಜೋಡ ಆಶ್ರಯಾರಿ ಚಲೆಲೆ ಹ್ಯಾ ಕಾರ್ಯಕ್ರಮಾಂತು° ವೆವೆಗಳೆ ಸಂಘ ಸಂಸ್ಥೆಚೆ ಸಾಂದೆ ಉಪಸ್ಥಿತ ಆಶಿಲೆ. 
ಉಪಸ್ಥಿತ ಆಶಿಲೆ ಆದಲೊ ಸಾಂಸದ ಬಿ. ಇಬ್ರಾಹಿಂ ಹಾಂನಿ° ಶ್ರೀನಿವಾಸ ಮಲ್ಯ ಬದಲ ಉಲಯಲೆ. "ಮಂಗಳೂರ ಶಹರಾಚೆ ಅಭಿವೃದ್ಧಿಂತು° ಶ್ರೀನಿವಾಸ ಮಲ್ಯ ಹಾಂಗೆಲೆ ದೇಣಿಗಾ ಹೋಡ ಆಸಾ. ತಾಂಗೆಲಿ ಕಾರ್ಯವೈಖರಿ ಸಗಟಾಂಕ ಆದರ್ಶ ಜಾವಕಾ" ಮ್ಹಣು ಸಾಂಗಲೆ°. ಉಲ್ಲಾಳ ಶ್ರೀನಿವಾಸ ಮಲ್ಯ ಜನ್ಮ ದಿನ ಆಚರಣಾ ಸಮಿತಿಚಿ ಅಧ್ಯಕ್ಷಾ ಮಂಜುಳಾ ನಾಯಕ್, ಶ್ರೀನಿವಾಸ್ ಮಲ್ಯ ಹಾಂಗೆಲೆ ಕುಟುಂಬೆಚೆ ಸಾಂದೆ ನರಹರಿ ಮಲ್ಯ, ಅರುಂಧತಿ ಮಲ್ಯ, ಯು. ಬಾಲಚಂದ್ರ ಮಲ್ಯ, ಯು. ವಿನಿತಾತ್ಮ ಮಲ್ಯ, ಕುದ್ರೋಳಿ ದೇವಳಾಚೆ ಖಜಾಂಚಿ ಪದ್ಮರಾಜ್ ಅರ್, ಕೊಡಿಯಾಲ್ ಖಭರ. ಕಾಮ್ ಹಾಜೊ ಸಂಪಾದಕ ವೆಂಕಟೇಶ್ ಬಾಳಿಗಾ, ಮಾಜಿ ಉಪಮಹಪೌರ ಮೊಹಮ್ಮದ್ ಕುಂಜತ್ತಬೈಲ್, ಯೋಗೀಶ್ ನಾಯಕ್, ನೀರಜ್ ಪಾಲ್, ಮಾಜಿ ಕಾರ್ಪರೇಟರ್ ಪ್ರಕಾಶ್.ಬಿ. ಸಾಲಿಯಾನ್, ರಥಬೀದಿ ಶ್ರೀ ವೆಂಕಟರಮಣ ದೇವಳಾಚೆ ಮೋಕ್ತೆಸರ ಸಾಹುಕಾರ ಕಿರಣ್ ಪೈ, ಸಮರ್ಥ್ ಭಟ್, ಹೋನಯ್ಯ, ಕೊಂಕಣಿ ಸಾಹಿತ್ಯ ಅಕಾಡೆಮಿಚೊ ಆದಲೊ ಅಧ್ಯಕ್ಷ ರೊಯ್ ಕ್ಯಾಸ್ಟಾಲಿನೊ, ಸುನಿಲ್ ಕುಮಾರ್ ಬಜಾಲ, ಕಲ್ಲಚ್ಚು ಪ್ರಕಾಶನಾಚೊ ಮಹೇಶ್ ನಾಯಕ್, ಮಾಜಿ ಮಹಾಪೌರ ಮಹಾಬಲ ಮಾರ್ಲ, ಶಶಿಧರ್ ಹೆಗ್ಡೆ, ನರೇಶ್ ಕಿಣಿ, ಗಣೇಶ್ ಪೈ, ವಿಕಾಸ್ ಶೆಟ್ಟಿ, ರಾಕೇಶ್ ದೇವಾಡಿಗ, ಸ್ಟಾನ್ಲಿ ಅಲ್ವಾರಿಸ್, ಮುನೀರ್ ಕಾಟಿಪಳ್ಳ ಆನಿ ಹೇರ ಉಪಸ್ಥಿತ ಆಶಿಲೆ. ಹ್ಯಾಚ ವೆಳಾರ ನರಹರಿ ಮಲ್ಯ ಆನಿ ಅರುಂಧತಿ ಮಲ್ಯ ಹಾಂಕಾ° ಸನ್ಮಾನ ಚಲೊ 

ಸ್ವಾತಂತ್ರ್ಯ ಹೋರಾಟಗಾರ ಜಾವನು ದಕ್ಷಿಣ ಕನ್ನಡ- ಉಡುಪಿ ಜಿಲ್ಲಾ ಪ್ರದೇಶಾಕ ಭಾರತಾಚೆ ಸಂಸತ್ತಾಂತು ಪಯಲೆ ಪಾವಟಿ ಪ್ರತಿನಿಧಿತ ಕೆಲ್ಲೊ ಸಂಸದ ಮಂಗಳೂರಾಚೆ ಬಂದರ, ವಿಮಾನ ನಿಲ್ದಾಣ, ರಾಷ್ಟ್ರೀಯ ರಸ್ತೊ, ರೈಲಾ ಮಾರ್ಗ, ರಾಷ್ಟ್ರೀಯ ತಾಂತ್ರಿಕ ವಿದ್ಯಾ ಸಂಸ್ಥೊ ಅಶಿ° ಸ್ಥಾಪನ ಕರನ, ಪ್ರದೇಶಾಚೆ ಸರ್ವತೋಮುಖ ಅಭಿವೃದ್ಧಿಚೆ ಕಾರಣೀಕರ್ತ ಜಾಲ್ಲೊ ಉಳ್ಳಾಲ ಶ್ರೀನಿವಾಸ ಮಲ್ಯ ಹಾಂಗೆಲೆ ಜಲ್ಮ ದೀಸ ಆಚರಣ ಕೆಲೆ°. ಮಂಗಳೂರು ಶಕ್ತಿನಗರಾಚೆ ವಿಶ್ವ ಕೊಂಕಣಿ ಕೇಂದ್ರ ವತೀನ ಪಡೀಲಾಂತ ಆಸಚೆ ಉಳ್ಳಾಲ ಶ್ರೀನಿವಾಸ ಮಲ್ಯ ಹಾಂಗೆಲೆ ಪುತ್ಥಳಿಕ  ಮಾಲಾರ್ಪಣ ಕರಚೆ ಮುಖಾಂತರ ಜಲ್ಮ ದೀಸ  ಆಚರಣ ಕೆಲೆ°. ಟ್ರಸ್ಟಿ ಡಾ ಮೋಹನ ಪೈ ಪ್ರಾಸ್ತಾವಿಕ ಜಾವನು ಶ್ರೀನಿವಾಸ ಮಲ್ಯ ಹಾಂಗೆಲೆ ಸರಳ ಜೀವನ ಆನಿ ಸಬಾರ ಸೇವಾ ಬದ್ದಲ ಪರಿಚಯ ದಿಲೆ°. ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ ಮ್ಹಾಲ್ಗಡೆ ಲೇಕ ತಪಾಸಕ ನಂದಗೋಪಾಲ ಶೆಣೈ, ಉಪಾಧ್ಯಕ್ಷ ಗಿಲ್ಬರ್ಟ್ ಡಿಸೋಜಾ, ಖಜಾಂಚಿ ಬಿ. ಆರ್ ಭಟ್, ಟ್ರಸ್ಟಿ ರಮೇಶ್ ಡಿ ನಾಯಕ್, ವಾಲ್ಟರ್ ಡಿಸೋಜಾ, ಕೆ ಸಿ ಸಿ ಐ  ಅಧ್ಯಕ್ಷ ಅನಂತೇಶ್ ವಿ ಪ್ರಭು, ಗೌ. ಕಾರ್ಯದರ್ಶಿ ಅಶ್ವಿನ ಪೈ ಮಾರೂರು, ಪಡೀಲ ಕಾರ್ಪೊರೇಟರ್ ರೂಪಾ ಶ್ರೀ, ಆನಿ ಕಿಶೋರ್ ಕೊಟ್ಟಾರಿ, ಶ್ರೀ ವೆಂಕಟರಮಣ ದೇವಳಾಚೆ ಟ್ರಸ್ಟಿ ಸಿ. ಎ. ಜಗನ್ನಾಥ ಕಾಮತ, ಉಳ್ಳಾಲ ವಿನೋದ ಮಲ್ಯ ಆನಿ ನವೀನ್ ನಾಯಕ್, ಗಣೇಶ್ ಭಟ್ ಆನಿ  ಡಾ ಬಿ. ದೇವದಾಸ್ ಪೈ ಹಾನಿ ಸಗಳೆ ಕಾರ್ಯಕ್ರಮಾಂತ ಉಪಸ್ಥಿತ ಆಶಿಲೆ°.

To Support Kodial Khaber click the following button.

ಮಂಗಳೂರು: ನ. 14 ರಾಷ್ಟ್ರೀಯ ಸ್ಥರಾರ ಭುರ್ಗ್ಯಾಂಲೊ ದೀಸ ಮ್ಹಣ ಆಚರಣ ಜಾತಾ. ದೇಶಾಚೊ ಪಯಲೊ ಪ್ರಧಾನಿ ಜವಾಹರಲಾಲ್ ನೆಹರುಲೊ ಜಲ್ಮ ದೀಸ ಹೊ. ತಾಕಾ ಚೆರಡುವ° ಮ್ಹಳ್ಯಾರಿ ಖೂಬ ಪ್ರೀತಿ ಆಶಿಲ್ಯಾನ ತಾಗೆಲೆ ಇಚ್ಛಾ ಪ್ರಮಾಣೆ ಹೊ ದೀಸ ಭುರ್ಗ್ಯಾಂಲೊ ದೀಸ ಮ್ಹಣ ಆಚರಣ ಕರತಾತಿ. ಹ್ಯಾ ದೀಸ ಸಗಟ ಕಡೆನ ಚೆರಡುಂವಾಲೊ ಗಲಗಲೊ ಪಳೊವಚಾಕ ಮೇಳತಾ. ಹಾಂಗಾಚೆ ಶಕ್ತಿನಗರಾಚೆ ವಿಶ್ವ ಕೊಂಕಣಿ ಕೇಂದ್ರಾತ ಸುತಾ ಚೆರಡುವಾಂಲೊ ದೀಸ ಆಚರಣ ಜಾಲೊ. ಜೆಪ್ಪು ಭಗಿನಿ ಸಮಾಜ, ಕಂಕನಾಡಿ ಈಶ್ವರಾನಂದ ಮಹಿಳಾ ಸೇವಾಶ್ರಮ, ನಳಂದಾ ಶಾಳಾ, ಚಿನ್ಮಯ ಶಾಳಾ ಅಶೆ° ವೆಗವೆಗಳೆ ಸಂಸ್ಥ್ಯಾಂಚೆ ವ್ಹಿಂವ್ಹಿoಗಡ ವಯಾಚೆ ಚೆರಡುವ° ತಂಯ ಪಾವಲೆ. ತಾಂಕಾ° ವಿವಿಧ ಕಾರ್ಯಾವಳ, ಚೆಲಿಯಾಂಕ ಆರೋಗ್ಯ ಬದ್ದಲ ಸಮಾಲೋಚನಾ, ಲ್ಹಾನ ಭುರ್ಗ್ಯಾಂಕ ಬಣ್ಣ ಬಣ್ಣಾಚೆ ಚಿತ್ರಕಲಾ, ಪದ ಸಾಂಗಚೆ, ಅಭಿನಯ ಗೀತಾ, ಕಾಣಿ ಸಾಂಗಚೆ, ರಂಗರoಗಾಚೆ ಬಲೂನ್ ಶೃಂಗಾರ ಆಯೋಜನ ಕೆಲೆಲೆ°. ಹ್ಯಾ ಸಂದರ್ಭಾರ "ಭುರ್ಗ್ಯಾಂಕ ಸಾಧನಾ ?" ಪ್ರೇರಕ ವಿಡಿಯೋ ಪ್ರದರ್ಶನನ ಜಾಲೆಂ. ವಿಶ್ವ ಕೊಂಕಣಿ ಕೇಂದ್ರಾಚೆ ಅಧ್ಯಕ್ಷ ನಂದಗೋಪಾಲ ಶೆಣೈ ಹಾನ್ನಿ ಸ್ವಾಗತಾಚೆ ಉತ್ರ° ಸಾಂಗಲಿ°. ಉಷಾ ಮೋಹನ ಪೈ, ಸುಮತಿ ಪೈ, ವಂದನಾ ಕಾಮತ್, ರಾಧಿಕಾ ಪೈ, ಕುಡ್ಪಿ ವಿದ್ಯಾ ಶೆಣೈ, ಪಂಚಮಹಲ್ ಪ್ರೀತಮ್ ಕಾಮತ ಹಾಂನಿ° ಕಾರ್ಯಾವಳಿ ಸಾಂಬಾಳಿ. ಕುದ್ರೋಳಿ ಗಣೇಶ್ ಹಾಂನಿ° ಜಾದೂ ಪ್ರದರ್ಶನ ದಿಲೆ°. ಫುಕಟ ಬುಕ್ ವಾಂಟಪ, ಫಳಾರ ಆನಿ ಭೋಜನ ವ್ಯವಸ್ಥಾ ಆಶಿಲಿ. ವಿಶ್ವ ಕೊಂಕಣಿ ಕೇಂದ್ರಾಚೆ ಉಪಾಧ್ಯಕ್ಷ ಗಿಲ್ಬರ್ಟ್ ಡಿಸೋಜಾ, ಖಜಾಂಚಿ ಬಿ. ಆರ್. ಭಟ್, ಟ್ರಸ್ಟಿ ಕಸ್ತೂರಿ ಮೋಹನ ಪೈ, ವಿಲಿಯಂ ಡಿಸೋಜಾ, ರಮೇಶ ಡಿ. ನಾಯಕ್, ಶಕುಂತಲಾ ಆರ್. ಕಿಣಿ, ಮೆಲ್ವಿನ್ ರೊಡ್ರಿಗಸ್ ಆನಿ ಹೇರ ಲೋಕ ಉಪಸ್ಥಿತ ಆಶಿಲಿಂತಿ. ಡಾ. ಬಿ. ದೇವದಾಸ್ ಪೈನ ಆಬಾರ ಮಾನಲೊ.

To Support Kodial Khaber click the following button.

ಮoಗಳೂರ ಶಹರಾಚೆ ಇತಿಹಾಸಾಂತ ಸ್ವಾತಂತ್ರ್ಯೋತ್ತರ ಜಾಲೆಲೆ ಅಭಿವೃದ್ಧಿಚೊ ಚಡಾವತ ವಾಂಟೊ ದಾರ್ಶನಿಕ ವ್ಯಕ್ತಿ ಉಳ್ಳಾಲ ಶ್ರೀನಿವಾಸ ಮಲ್ಯ ಹಾಂಗೆಲೆ ಕಾಲಗತಿಂತು° ಜಾಲೆ° ಮ್ಹಳೆಲೆ° ಕೋಣಯಿ ನಕಾರಚಾಕ ಜಾಯನಾ. ತೆ° ಸಗಟ ಇತಿಹಾಸಾಚೆ ಪಾನ್ನಾರ ಬರೊವನು ಜಾಲಾ°. ಗೌಡ ಸಾರಸ್ವತ ಬ್ರಾಹ್ಮಣ ಸಮಾಜಾಚೊ ಉಳ್ಳಾಲ ಶ್ರೀನಿವಾಸ ಮಲ್ಯ ತಾಗೆಲೆ ಇಷ್ಟ ಲೋಕಾಂಕ ಶೀನಪ್ಪ ಮಲ್ಯ ಯಾ ತುಳು ಭಾಶಿಕ ಲೋಕಾಂಕ ಶೀನಪ್ಪ ಮಲ್ಯೇರ ಮ್ಹಣೊನ ಘೆತಾಲೊ. ತೊ ಭಾರತಾಚೆ ಲೋಕಸಭೆಂತು° ಹ್ಯಾ ಪ್ರದೇಶಾಚೊ ಪಯಲೊ ಜನ ಪ್ರತಿನಿಧಿ ಆಶಿಲೊ. ತಾಗೆಲೆ ಜನಾನುರಾಗಿ ಗುಣ, ನಿಸ್ವಾರ್ಥ ಸೇವಾ ಮನೋಭಾವ, ಕಾರ್ಯಕ್ಷಮತಾ, ಚಾಣಾಕ್ಷ ಮುಖೇಲಪಣಾಚೆ ನಿಮಿತ ತಾಣೆ ಹ್ಯಾ ಪ್ರದೇಶಾಚೆ ಅಭಿವೃದ್ಧಿಕ ಖೂಬ ಯೋಗದಾನ ದಿವಚಾಕ ಜಾಲೆ°.
ಮಂಗಳೂರು ಆಕಾಶವಾಣಿ, ಮಂಗಳೂರು ವಿಮಾನ ನಿಲ್ದಾಣ, ಮಂಗಳೂರು - ಹಾಸನ ರೈಲ್ವೇ ಯೋಜನಾ, ರಾಷ್ಟ್ರಿಯ ಹೆದ್ದಾರಿ 17, ರಾಷ್ಟ್ರಿಯ ಹೆದ್ದಾರಿ 42, ಕರ್ನಾಟಕ ರೀಜನಲ್ ಇಂಜಿನೀಯರಿoಗ್ ಕಾಲೇಜ್, ಮಂಗಳೂರು ಸರ್ವಋತು ಬಂದರ್, ಮಂಗಳೂರು ಕೆಮಿಕಲ್ಸ್ ಎಂಡ್ ಫರ್ಟಿಲೈರ‍್ಸ್ ಹಿ° ಶೀನಪ್ಪ ಮಲ್ಯ ಹಾಂನಿ° ಹ್ಯಾ ಮಂಗಳೂರು ಪ್ರದೇಶಾಕ ಹಾಡಲೆಲೆ ಪ್ರಮುಖ ಯೋಜನಾ ಆಸಾತಿ.

ಹ್ಯಾ ಸರ್ವ ಯೋಜನಾ ಮಂಗಳೂರಾಕ ಹಾಡಚಾಕ ತಾಣೆ ಕೆಲೆಲೆ ಕಸರತ್ತಾ ಬದಲ ಖೂಬ ಕಾಣಿಯೊ ಆಯಕೂಂಕ ಮೆಳತಾತಿ. ಎಕ ಕಾಣಿ ಮಂಗಳೂರು - ಹಾಸನ ರೈಲ್ವೇ ಯೋಜನಾ ಬದಲ ಆಸಾ. ತ್ಯಾ ವೇಳಾರ ಲಾಲಬಹಾದ್ದೂರ ಶಾಸ್ತ್ರೀ ಓಕ್ಕೂಟ ಸರಕಾರಾಚೊ ರೈಲ್ವೇ ಮಂತ್ರಿ ಆಶಿಲೊ. ಮಂಗಳೂರು - ಹಾಸನ ರೈಲ್ವೇ ಯೋಜನೆಚೆ ಫೈಲ್ ತಾಗೆಲೆ ಮೇಜೆರಿ ಆಶಿಲೆ°. ಶೀನಪ್ಪ ಮಲ್ಯಾನ ತೀನ ಚಾರ ಪಾವಟಿ ಶಾಸ್ತ್ರೀಕ ಉಡಗಾಸ ಕೆಲೊ. ಜಾಲ್ಯಾರಯಿ ಅಧಿಕಾರಿ ಲೋಕಾಲೆ ನಕಾರಾತ್ಮಕ ಷರಾ ಆಸೂಂಕ ಲಾಗೂನ ಶಾಸ್ತ್ರೀಲೆ ಅನುಮತಿ ಸಾಧ್ಯ ಜಾಯನಿ ಆಶಿಲೆ°. ಹ್ಯಾ ಸಂದರ್ಭಾರ ಶೀನಪ್ಪ ಮಲ್ಯಾನ ತಾಗೆಲೊ ಆಖೇರಿಚೊ ಅಸ್ತ್ರ ಪ್ರಯೋಗ ಕೆಲೊ. ಡೆಲ್ಲಿ ದಾಕೂನ ಕೊಡಿಯಾಲಾಕ ಯೆವನು "ಮಂಗಳೂರು - ಹಾಸನ ರೈಲ್ವೇ ಯೋಜನೆಕ ಅನುಮತಿ ದೀನಿ ಜಾಲ್ಯಾರಿ ಹಾಂವ° ಪಾರ್ಲಿಮೆಂಟಾ ಮುಕಾರಿ ಉಪಾಶಿ ಬಯಸೂನ ಸತ್ಯಾಗ್ರಹ ಕರತಾ" ಮ್ಹಣು ಶಾಸ್ತ್ರೀಕ ವಾಯರ್ ಸೋಳೆ°. ಹಾಜೆನ ಕಾಮ ಜಾಲೆ°. ಶಾಸ್ತ್ರೀನ ಪರತೂನ ವಾಯರ್ ಸೊಡೂನ ಅನುಮತಿ ದಿಲ್ಯಾ ಮ್ಹಣು ಕಳಯಲೆ° ಖಂಯ.
ಸುರತ್ಕಲ್ ಕರ್ನಾಟಕ ರೀಜನಲ್ ಕಾಲೇಜ್ ಸ್ಥಾಪನಾ ಕೆಲೆಲಿ ಕಾಣಿ ಸುತಾ ವರ್ಣರಂಜಿತ ಆಸಾ. ದೇಶಾಂತು° ಚಾರ ರೀಜನಲ್ ಇಂಜಿನಿಯರಿoಗ್ ಕಾಲೇಜ° ಸ್ಥಾಪನಾ ಕರಚೆ° ಮ್ಹಣು ಒಕ್ಕೂಟ ಸರಕಾರಾನ ಠರಯಿಲೆ° ಕಳಿತಾಕ್ ಆಯ್ಲೆ ಕೂಡಲೆ ಶೀನಪ್ಪ ಮಲ್ಯಾ ವಿದ್ಯಾಮಂತ್ರಿ ಲಾಲ್ ಬಹಾದ್ದೂರ್ ಶಾಸ್ತ್ರೀಕ ವಚೂನ ಮೆಳೊ. ಎಕ ರೀಜನಲ್ ಕಾಲೇಜ್ ತಾಗೆಲೆ ಕ್ಷೇತ್ರಾಕ ದೀವಕಾ ಮ್ಹಣು ವತ್ತಾಯ ಕೆಲೊ. ಜಾಲ್ಯಾರ ತುಮಗೆಲಾಗಿ ತಾಕಾ ಜಾವಕಾ ಜಾಲೆಲಿ ವ್ಯವಸ್ಥಾ ನಾ, ತ್ಯಾ ದೆಕೂನ ವತ್ತಾಯ ಕರುನಕಾ ಮ್ಹಣ ಶಾಸ್ತ್ರೀನ ಸಾಂಗಲೆ° ಖಂಯ°. ಜಾಲ್ಯಾರಿ ವಿಷಯ ಥಂಯಕ ಸೋಣಾ ಆಶಿ° ಶೀನಪ್ಪ ಮಲ್ಯಾನ ವ್ಯವಸ್ಥಾ ದಾಕೋವಚಾಕ ಪಂದ್ರಾ ದೀಸಾಚೊ ವೇಳ ಘೆತಲೊ. ತ್ಯಾಚ ರಾತಿ ಮಂಗಳೂರಚೆ ಪಿ.ಡಬ್ಲು.ಡಿ ಇಂಜಿನಿಯರ್ ಎಂ. ಎಲ್. ಶ್ರೇಷ್ಠಾಕ ಫೋನ ಕರನು ಸುರತ್ಕಲಚೊ ಜಾಗೊ ರೀಜನಲ್ ಇಂಜಿನಿಯರಿoಗ್ ಕಾಲೇಜಾಕ ಮೇಳತವೆ ಮ್ಹಣು ತಪಾಸಣಾ ಕರಚಾಕ ಆದೇಶ ದಿಲೊ. ತ್ಯಾಚ ವೇಳಾರ ಉದ್ಯಮಿ ಸಿ.ಪಿ.ಸಿಚೊ ವಿ. ಎಸ್. ಕುಡ್ವಾಕ ಫೋನ ಕರನು ತ್ಯಾ ಜಾಗೇರಿ ತಾತ್ಕಾಲಿಕ ಶೆಡ್ ಬಾಂದಚಾಕ ತಾಕೀತ ಕೆಲೆ°. ಪಂದ್ರಾ ದೀಸಾನ ಶಾಸ್ತ್ರೀನ ಯೆವನು ಸುರತ್ಕಲ್ ಇಂಜಿನಿಯರಿoಗ್ ಕಾಲೇಜಾಚೆ ಉಗತಾವಣ ಕೆಲೆ°. ಶೀನಪ್ಪ ಮಲ್ಯಾಲೆ ಚಾಣಕ್ಷತಾ ನಿಮಿತ ಅಸಲೆ ಯೋಜನಾ ಮಂಗಳೂರಾಕ ಆಯಲಿಂತಿ. ಮಂಗಳೂರು ಪುರಭವನ, ಕದ್ರಿ ಸರ್ಕ್ಯೂಟ್ ಹೌಸ್ ಬಾಂದಿಲಿ ಕೀರ್ತಿ ಸುತಾ ಶೀನಪ್ಪ ಮಲ್ಯಾಲಿ ಜಾವನು ಆಸಾ.
ಮಂಗಳೂರು ಬಂದರಾರಿ ಹೋಡ ಹೋಡ ಬಂಡಸಾಳಾ ಆಶಿಲೆ ಉಳ್ಳಾಲ ಮಲ್ಯ ಕುಟುಂಬೆoತು° ಜಲ್ಮಾ ಆಯಿಲೆ ಶ್ರೀನಿವಾಸ್ ಮಲ್ಯ ಹಾಂನಿ° 18 ವರಸ ಪ್ರಾಯೇರಿಚಿ ರಾಜಕೀಯ ಕ್ಷೇತ್ರಾಕ ಪಾವಲ° ದವರಲಿ°. 1920 - 30ಚೆ ದಶಕಾಂತು° ಕಾರ್ನಾಡ್ ಸದಾಶಿವ ರಾವ್ ಹಾಂಗೆಲೆ ಮುಖೇಲಪಣಾರ ಸ್ವಾತಂತ್ರ್ಯಾಚೆ  ಜೂಜ್ ಚಲತ ಆಶಿಲೆ ವೇಳಾರ 1920 ತು° ಅಗಸ್ಟ್ 19ಕ ಮಹಾತ್ಮಾ ಗಾಂಧೀನ ಮಂಗಳೂರಾಕ ಭೇಟಿ ದಿಲಿ. ತ್ಯಾ ವೇಳಾರ ಗಾಂಧೀಜಿಲೆ ತತ್ವಂ ಜಾವನು ಆಸಚೆ ಅಹಿಂಸಾತ್ಮಕ ಚಳವಳ, ಹರಿಜನೋದ್ಧಾರ, ಹರಿಜನಾಂಕ ದೇವಳಾಂಕ ಪ್ರವೇಶ, ಖಾದಿ-ಚರಕ ಹಾಜೆ ಬದಲ ದಿಲೆಲೆ ಸಂದೇಶ ಆಯಕೂನು ಶೀನಪ್ಪ ಮಲ್ಯ ಪ್ರಭಾವಿತ ಜಾಲೆ. ಎಕ ಸಾಮಾನ್ಯ ಕಾರ್ಯಕರ್ತ ಜಾವನು ಸ್ವಾತಂತ್ರ್ಯ ಹೋರಾಟಾಕ ಉಡಿಲೆ ಶೀನಪ್ಪ ಮಲ್ಯಾಕ ಮುಕಾರಿ ಜವಾಹರಲಾಲ್ ನೆಹರು, ಕಮಲಾದೇವಿ ಚಟ್ಟೋಪಾಧ್ಯಾಯ, ಸರದಾರ ವಲ್ಲಭಭಾಯ ಪಟೇಲ, ಲಾಲ ಬಹಾದ್ದೂರ ಶಾಸ್ತ್ರೀ ತಸಲೆ ಊಂಛ ಸ್ಥರಾಚೆ ಮುಕೇಲಿಯಾಲೆ ಸಾಂಗತ ಕಾಮ ಕರಚೊ ಅವಕಾಶ ಮೆಳೊ.
1946 ಇಸವಿಂತು° ದೇಶಾಕ ಸ್ವಾತಂತ್ರ್ಯ ಮೆಳಚೆ° ಮ್ಹಣು ಜಾತಾನ ಶೀನಪ್ಪ ಮಲ್ಯಾಕ ಕಾನ್ಸ್ಟಿಟ್ಯುಯೆಂಟ್  ಎಸೆಂಬ್ಲಿಚೊ ಸಾಂದೊ ಜಾವಚೊ ಅವಕಾಶ ಮೆಳೊ. 1947 ಇಸವಿಂತು° ಭಾರತ ದೇಶಾಕ ಸ್ವಾತಂತ್ರ್ಯಮೇಳತ ದಾಕೂನ ತಾಗೆಲೆ ಜೀವಿತಾವಧಿಕ (17 ವರಸ°) ತೊ ಪಾರ್ಲಿಮೆಂಟಾoತು° ಕಾಂಗ್ರೆಸ್ ಪಕ್ಷಾಚೊ ಚೀಫ್ ವ್ಹಿಪ್ ಆಶಿಲೊ. ತ್ಯಾ ವೇಳಾರ ತಾಕಾ ಸರಕಾರಾಚೆ ವರಿಷ್ಠ, ದೇಶಾಚೆ ವೆಗವೆಗಳೆ ಪ್ರದೇಶಾಚೆ ಜನ ಪ್ರತಿನಿಧಿ ಲೋಕಾಂಚೊ ಆನಿ ಪಾರ್ಟಿಚೆ ಮುಖೇಲಿ ಆನಿ ಸಾಂದ್ಯಾಲೆ° ಸಾಂಗತ ನಿಕಟ ಸಂಪರ್ಕ ದವರಚೊ ಅವಕಾಶ ಮೆಳೊ. ತಾಣೆ ಮಂಗಳೂರು ಆನಿ ಪರಿಸರಾಚೆ ಪ್ರದೇಶಾಂಚೆ ಅಭಿವೃದ್ಧಿ ಕರಚಾಂತು° ಹೆ° ಖೂಬ ಮದದಾಕ ಮೆಳೆ°.
ಸಾಮಾನ್ಯ ಕಾರ್ಯಕರ್ತ ಜಾವನು ಕಾಮ ಕರನು ಊಂಛ ಸ್ಥರಾಕ ಪಾವಿಲೊ ಶೀನಪ್ಪ ಮಲ್ಯಾನ ಪಕ್ಷಾಚೆ ಸಾಮಾನ್ಯ ಕಾರ್ಯಕರ್ತಾಂಕ ವಿಸೊರಚೆ° ಕರನಿ. ಖಂಚೆಯ ಕಾರ್ಯಕರ್ತಾನ ಕಷ್ಟಾರ ಆಸಾ ಮ್ಹಣು ಕಳನು ಆಯಲ್ಯಾರಿ ತೊ ಸ್ವತ: ಯಾ ತಾಗೆಲೆ ಇಷ್ಟಾಂಚೆ ಮದದ ಪಾವೊಚಾಕ ವ್ಯವಸ್ಥಾ ಕರತಲೊ. ಹಾಗೆಲೆ ಹ್ಯಾ ಗುಣ ಪಳೊವನು ಕಾಂಗ್ರೆಸ್ ಪಕ್ಷಾನ ತಾಕಾ ದೇಶಭರ "ಟ್ರಬಲ್ ಶೂಟರ್" ಜಾವನು ವಾಪರಲಾ.
ಸ್ವಾತಂತ್ರ್ಯ ಹೋರಾಟಾ ಖಾತೀರ ದಕ್ಷಿಣ ಕನ್ನಡ ಜಿಲ್ಲೆಚೆ ಹರ ಎಕ ಮುಲ್ಲೆಕ ಭೊಂವಿಲೆ ನಿಮಿತ ಶೀನಪ್ಪ ಮಲ್ಯಾಕ ಹ್ಯಾ ಪ್ರದೇಶಾಚೆ ಗರಜೆಚೆ ವಿಷಯ ಕಳಿತ ಆಶಿಲೆ. ತ್ಯಾ ದೆಕೂನ ನೆಹರುನ ಪಂಚ ವಾರ್ಷಿಕ ಯೋಜನಾ ಘಾಲತನಾ 1952- 62 ಮಧೆಂತು° ಶೀನಪ್ಪ ಮಲ್ಯಾನ ತಾಗೆಲೆ ಸಂಪೂರ್ಣ ಚರಿಶ್ಮಾ ವಾಪರೂನ ದಕ್ಷಿಣ ಕನ್ನಡ ಜಿಲ್ಲೆಂತ ಸಾಬಾರ ಯೋಜನಾ ಹಾಡಚಾಂತು° ಸಫಲ ಜಾಲೊ. ತಾಗೆಲೆ ಉಪರಾಂತ ಸಾಬಾರ ಜನಪ್ರತಿನಿಧಿನಿ ಪ್ರಯತ್ನ ಕೆಲೆ°. ಜಾಲ್ಯಾರ ತಾಗೆಲೆ ಸ್ಥರಾಕ ಪಾವಚೊ ಎಕ ಪ್ರತಿನಿಧಿ ವಿಂಚೂನ ಕಾಡಚಾಕ ಆಮಿ ಅಸಫಲ ಜಾಲ್ಯಾಂತಿ.
ನ. 21 2023 ಉಳ್ಳಾಲ ಶ್ರೀನಿವಾಸ ಮಲ್ಯ ಹಾಂಗೆಲೊ 121ವೊ° ಜಲ್ಮ ದೀವಸ. ಆಯಚೆ ಹ್ಯಾ ಸುಮುಹೂರ್ತಾರಿ ಆಮಿ ಸಂಕಲ್ಪ ಕರಚೆ° ಗರಜೆಚೆ° ಆಸಾ. ಆಮಗೆಲೆ ಮಧೆ° ಆಸಚೆ ಸಮಾಜಮುಖಿ ಲೋಕಾಂಕ ಸೋದೂನ ಆಮಗೆಲೆ ಜನಪ್ರತಿನಿಧಿ ಕರಕಾ. ಅಸಾಮಾಜೀಕ ತತ್ವ ಪಸರಚೆ ಲೋಕಾಂಕ ದೂರ ದವರಚೆ° ಕರಕಾ. ಪರತೂನ ಎಕ ಪಾವಟಿ ಶೀನಪ್ಪ ಮಲ್ಯ ತಸಲೆ ಲೋಕ ಆಮಗೆಲೆ ಜನ ಪ್ರತಿನಿಧಿ ಜಾವಕಾ.
ಶೀನಪ್ಪ ಮಲ್ಯ ಫಕತ ಎಕ ಲೋಕಸಭಾ ಸದಸ್ಯ ಆಶಿಲೊ. ತಾಣೆ ಮಂತ್ರಿ ಜಾವಯೆತ ಆಶಿಲೆ°. ಅಧಿಕಾರ ಪ್ರಯೋಗ ಕರನು ವಿಪಕ್ಷಚಾಂಕ ಭಾದಾ ದಿವಯೆತ ಆಶಿಲೆ. ತಾಣೆ ತಶಿ° ಕರನಿ. ತೋ ಸಗಟಾಲೆ ಸಾಂಗತ, ತಾಂತೂoತಾಯಿ ಗೆಲೆ ವಿರೋಧಿ ಲೋಕಾಲೆ ಸಾಂಗತ ಬರೊ ಸಂಬoಧ ದವರನು ಆಶಿಲೊ. ಕೊಣ ತಾಗೆಲೆ ಘರಾ ಬಾಗಲಾ ಆಯಲ್ಯಾರಯೀ ತಾಂಗೆಲೆ ಕಾಮ ಕರನು ದಿತಾಲೊ. ತೊ ಖರೆ° ಅರ್ಥಾರ ಜನಪ್ರತಿನಿಧಿ ಆಶಿಲೊ.
ಬಂಟ್ವಾಳ ದಾಮೋದರ ಪ್ರಭು ಹಾಂಗೆಲಿ ದ್ಹುವ ಇಂದಿರಾಲೆ ಸಾಂಗತ ಲಗ್ನ ಜಾಲೆಲೆ ಹಾಂಕಾ° ಚೆರಡುವ° ನಾತಿಲಿ°. ಇಂದಿರಾ ಮಲ್ಯ ಸುತಾ ಶೀನಪ್ಪ ಮಲ್ಯಾಲೆ ಮ್ಹಣಕೆ ಜನಾನುರಾಗಿ ಆಸೂನ ಆತಿಥ್ಯಾಕ ನಾವಾದೀಕ ಆಶಿಲಿ.

To Support Kodial Khaber click the following button.

कोडियाळ: “खंचेय भाशेंत शिक्षण बरें आसल्यार साहित्य बरें वाडता, त्या खातिर आमगेले मुखारचे पीळीक कोंकणी शिक्षण दिवुंक यत्न करका” म्हणु प्रोफ़.डा. कस्तुरी मोहन पै हांनी सांगलें. कोडियाळच्या विश्व कोंकणी केंद्रांत बस्ती वामन शेणै वेदीर घड्लेल्या 25वे अखिल भारतीय कोंकणी साहित्य सम्मेलनाचे समारोप सुवाळ्यांत तीन प्रमुख कोंकणी साधकांक सम्मान केलो. कर्नाटकांत कोंकणी भाषा शिक्षणाक विश्व कोंकणी केंद्राच्या तर्पेने 25 वरसां वावर करून आयज मेरेन 4000 विद्यार्थियांक शाळेंत कोंकणी शिक्षण दिवूंक् जैत करूंक वावंट घेतिल्या कोडियाळचे प्रो. डा. कस्तुरी मोहन पै हांका मुखैल सोयरे साहित्य अकाडमी पुरस्कार विजेत हिंदी साहिती उदयन वाजपेयी, कन्नड साहितिका ममता सागर आनी सम्मेलनाचे संघटकान सम्मान केलो. कर्नाटकांत कोंकणी लोकान चलौंची 120 शिक्षण संस्थे आसाती, तानी तांच्य शाळा कालेजांत कोंकणी शिक्षणाक तांक दिवुंक जाय म्हणु डा. पै हांनी उलो दिलो.  तशेंच कोंकणी चळ्वळांत फ़ुडारपण घेतिल्या कुमटाचो डा. शिवराम कामत आनी कोंकणी साहित्कार रोन रोच कासिया हांकायं सम्मान जालो. सम्मेलनाची अध्यक्ष हेमा नायक,  स्वागत समितीचो अध्यक्ष मैखेल डीसोज़ा, अखिल भारतीय कोंकणि परिशदेचे चेतन आचार्य, गोकुलदास प्रभु, सचिव टैटस नोरोना आनी खजांची शिरीश पै उपस्थित आशिल्ले.

To Support Kodial Khaber click the following button.

ಜಿ. ಎಸ್. ಬಿ ಮಹಿಳಾವೃಂದ (ರಿ) ಮಂಗಳೂರ ಹಾಂಗೆಲೆ ವತಿನ  ಮಂಗಳೂರಾಚೆ ವಿ.ಟಿ ರಸ್ತ್ಯಾರ ಆಸೂಚೆ  ಚೇತನ ವಿಶೇಷ ಶಾಳೇಂತ ದೀಪಾವಳಿ ಆಚರಣ ನವೆಂಬರ ೧೫ ತಾರೀಕೆಕ ಆಚರಣ ಕೆಲೆ°. ಶ್ರೀಮತಿ ಸತ್ಯವತಿ ವಿಶ್ವನಾಥ ಕಾಮತ್ ಹಾಂನಿ ಪ್ರಾಯೋಜಿತ ಕೆಲೆಲೊ ಹೊ ಕಾರ್ಯಕ್ರಮ ಅಧ್ಯಕ್ಷೆ ಶ್ರೀಮತಿ ನಯನಾ ರಾವ್ ಹಾಂನಿ ದಿವೊ ಲಾವನ ಆರಂಭ ಕೆಲೊ. ಮಹಿಳಾವೃಂದಾಚೆ  ಪ್ರತಿಮಾ ಪ್ರಭು, ಲತಾ ಪ್ರಭುನ ಭುರಗ್ಯಾಂಕ ಭಜನ ಶಿಕಯಲೆ°. ವಿಮಲಾ ಕಾಮತ್, ಚಂದ್ರಿಕಾ ಮಲ್ಯಾನ ಕಾಣಿಯೊ ಸಾಂಗಲೆ°. ಚೇತನ ಶಾಳೆಚ್ಯಾ ಭುರ್ಗ್ಯಾನಿ ಭಜನ ಆನಿ ಕಾಣಿಯೊ ಸಾಂಗಲೆ°. ಮಹಿಳಾವೃಂದಾಚೆ ಸಾಂದೆ ಆನಿ ಶಿಕ್ಷಕಾಂನಿ ಮೇಳನು ದಿವಲೆ ಸುತ್ತು ನೃತ್ಯಭಜನ ಸಾದರ ಕೆಲೆ°. ಶ್ರೀಮತಿ ಮರೋಳಿ ಸಬಿತಾ ಕಾಮತಾನ ಸೂತ್ರ ಸಂಚಾಲನ ಕೆಲೆ°. ಮುಖೇಲ ಶಿಕ್ಷಕಿನ ಆಭಾರ ಮಾನಲೊ. ಮಹಿಳಾವೃಂದಾಚೆ ಸರ್ವ ಕಾರ್ಯಕಾರಿ ಸಮಿತಿ ಸಾಂದೆ ಆನಿ ಇತರ ಸದಸ್ಯ ಹಾಜರ ಆಶಿಲೇಂತ. ಉಪ್ರಾಂತ ವಜನ ಲಾಸೂನ ಚೆರಡುಂವ ಆನಂದ ಪಾವಲೆಂತಿ. ಫಳಾರ ವಾಂಟೂನ ಕಾರ್ಯಕ್ರಮ ಆಖೆರ ಕೆಲೊ.

To Support Kodial Khaber click the following button.

ಮಂಗಳೂರು: ಹಾಂಗಾಚೆ ಜಿ.ಎಸ್.ಬಿ. ಮಹಿಳಾ ವೃಂದ (ರಿ.) ಹಾಂನಿ° ನ. 12ಕ ಶ್ರೀ ಗೋಕರ್ಣ ಮಠಾಂತು° ದೀಪಾವಳಿ ಪರಬೆಚೆ ವಾಂಟೊ ಜಾವನು ಶ್ರೀ ಲಕ್ಶ್ಮೀ  ಪೂಜಾ ಕೆಲಿ. ವೇದಮೂರ್ತಿ ಹಾಂಗೆಲೆ ಮುಖೇಲಪಣಾರಿ ಚಲೆಲೆ ಶ್ರೀ ಲಕ್ಶ್ಮೀ ಅಷ್ಟೋತ್ತರಾಂತು° 70 ಸುವಾಸಿಯಾನಿ ವಾಂಟೊ ಘೆತಲೊ. ಅಧ್ಯಕ್ಷಾ ನಯನಾ ರಾವ್ ಹಾಂನಿ° ದೇವಾ ಮುಕಾರಿ ದಿವೊ ಲಾಯಲೊ. ಆದಲಿ ಅಧ್ಯಕ್ಷಾ ಮರೋಳಿ ಸಬಿತಾ ಕಾಂತ ಹಾಂನಿ° ಮಾರ್ಗದರ್ಶನ ದಿಲೆ°. ಉಪಾಧ್ಯಕ್ಷಾ ಲಕ್ಶ್ಮೀ ಭಂಡಾರಕಾರ, ಕಾರ್ಯದರ್ಶಿ ವಿಜಯಲಕ್ಶ್ಮೀ ಕಾಮತ್, ಕಾರ್ಯಕಾರಿ ಮಂಡಳಿಚೆ ಸಾಂದೆ ಆನಿ ಹೇರ ಸಾಂದೆ ಉಪಸ್ಥಿತ ಆಶಿಲೆ.

To Support Kodial Khaber click the following button.