ಮಂಗಳೂರು: ಹಾಂಗಾಚೆ ಸಹ್ಯಾದ್ರಿ ತಾಂತ್ರಿಕ ಮಹಾವಿದ್ಯಾಲಯ ಮಾಹಿತಿ ವಿಜ್ಞಾನ ವಿಭಾಗಾಚೆ ವಿದ್ಯಾರ್ಥಿಯಾನಿ ಬಂಟ್ವಾಳ ತಾಲೂಕೆಚೆ ಕಾವಲಪಡೂರು ಗ್ರಾಮಾಂತು° “ಶೇತಕಾರಾಲೆ ಸಾಂಗತ ಎಕ ದೀವಸ” ಕಾಯಾಕ್ರಮ ಆಯೋಜನ ಕೆಲೊ. ಕಾವಲಪಡೂರು ಗ್ರಾಮ ಪಂಚಾಯತ ಸಾಂದೊ ಪ್ರಮೋದ್ ರೈ ಹಾಂನಿ° ಕಾರ್ಯಕ್ರಮಾಚೆ ಉಗ್ತಾವಣ ಕೆಲೆ°. ಭಾತ ಕಶಿ° ಸಿದ್ಧ ಜಾತಾ ಮ್ಜಣು ಕಳಯಿಲೆ ತಾಂನಿ° ವಿದ್ಯಾರ್ಥಿಯಾಂಕ ಕೃಷಿಂತು° ಉಮೇದಿ ಘೆವಚಾಕ ಸಾಂಗಲೆ°. ಮಾಕ್ಷಿಚೆ ದೋನ ವರಸಾಂತು° ಕೃಷಿ ಜಾಯನಿ ಆಶಿಲೆ ಗಾದೆಂತು° ವಿದ್ಯಾಥಿಯಾನಿ ಗಾಂವοಚೆ ಲೋಕಾಲೆ ಸಾಂಗತ ನೇಜಿ ಒಯಲಿ. ತ್ಯಾಚ ವೇಳಾರ ಕೃಷಿ ಕ್ಷೇತ್ರಾಂತು° ಆಧುನಿಕ ತಂತ್ರಜ್ಞಾನ ವಾಪೂರಯೇತ ಮ್ಹಳೆಲೆ ವಿಷಯಾರಿ ಮಾಹಿತಿ ಎಕತ್ರ ಕೆಲಿ. ಶಂಬರಿಕಯಿ ಚಡ ವಿದ್ಯಾರ್ಥಿ ಆನಿ 7 ಪ್ರಾಧ್ಯಾಪಕಾನಿ ವಾಂಟೊ ಗೆತಿಲೊ. ಸ್ಥಳೀಯ ಗ್ರಾಮ ಪಂಚಾಯತ ಸದಸ್ಯಾ ಭವಾನಿ, ಗಾದೆಚೆ ಮಾಲಕ ವಿಠ್ಠಲ ರೈ ಆನಿ ಗೋಪಾಲ ರೈ ಕುಟುಂಬೆಚಾನಿ ಉಪಸ್ಥಿತ ಆಸೂನ ಸಹಕಾರ ದಿಲೊ. ಸಹ್ಯಾದ್ರಿ ತಾಂತ್ರಿಕ ಮಹಾವಿದ್ಯಾಲಯಾಚೊ ಪ್ರಾಂಶುಪಾಲ ಡಾ. ರಾಜೇಶ ಎಸ್ ಆನಿ ಮಾಹಿತಿ ವಿಜ್ಞಾನ ವಿಭಾಗಾಚೆ ಮುಖ್ಯಸ್ಥ ಡಾ. ಮುಸ್ತಪ್ಪಾ ಬಸ್ತಿಕೋಡಿ ಹಾಂನಿ° ಮಾರ್ಗದರ್ಶನ ದಿಲೆ°.

ಮೂಡುಬಿದಿರೆ: ಹಾಂಗಾಚೆ ಎಕ್ಸಲೆಂಟ್ ವಿಜ್ಞಾನ ಆನಿ ವಾಣಿಜ್ಯ ಪದವಿ ಪೂರ್ವ ಕಾಲೇಜಾಂತು° ಸ್ವಾತಂತ್ರ್ಯೋತ್ಸವಾಚೆ ಅಮೃತ ಮಹೋತ್ಸವ ಆಚರಣೆಚೆ ವೇಳಾರ ಸಂಸ್ಥೆಚೆ ಸಾಧಕ ವಿದ್ಯಾರ್ಥಿಯಾಂಕ ಸನ್ಮಾನ ಚಲೊ. ಮುಖೇಲ ಸೊಯರೆ ಜಾವನು ನಿಟ್ಟೆ ವಿಶ್ವವಿದ್ಯಾನಿಲಯಾಚೆ ಕುಲಪತಿ ಎನ್. ವಿನಯ ಹೆಗ್ಡೆ ಉಪಸ್ಥಿತ ಆಶಿಲೆ.ಸಾಧಕ ವಿದ್ಯಾರ್ಥಿಯಾಂಕ ಸನ್ಮಾನ ಕರನು ಉಲಯಿಲೆ ತಾಂನಿ° “ದ್ಹಾ ವರಸಾಂತು° ಎಕ್ಸಲೆಂಟ್ ವಿದ್ಯಾ ಸಂಸ್ಥೆನ ಕೆಲೆಲಿ ಸಾಧನಾ ಪ್ರಶಂಸನಿಯ. ಸಂಸ್ಥೆನ ಕ್ರೀಡಾ ಚಟುವಟಿಕಾ ಕರಚೆ ಖಾತೀರ ನಿರ್ಮಾಣ ಕೆಲೆಲೆ ವಿಶಾಲ ಕ್ರೀಡಾ ಮೈದಾನ ಎಕ ಬರೊ ವಿಚಾರ, ಕ್ರೀಡಾ ವಿದ್ಯಾರ್ಥಿಯಾಲೆ° ದೈಹಿಕ ಉನ್ನತಿಕ ಪೂರಕ ಜಾತಾ. ಎಕ ವಿದ್ಯಾರ್ಥಿನ ಫಕತ ಅಂಕ ಜೋಡಚೆ° ಕರನಾಶಿ° ಉತ್ತಮ ಚಾರಿತ್ರ್ಯಫಾವೊ ಕರಕಾ. ಮಾನವಿಯ ಗುಣ ವಾಡೋನ ಘೆವನು ಬರೆ° ಭವಿಷ್ಯ ಆಪಣಾವಕಾ” ಮ್ಹಣು ಸಾಂಗಲೆ°. ಕ್ಯಾಪ್ಟನ್ ಗಣೇಶ್ ಕಾರ್ಣಿಕ್ ಮಾನಾಚೆ ಸೊಯ್ರೆ ಆಶಿಲೆ. ಎಕ್ಸಲೆಂಟ್ ವಿದ್ಯಾ ಸಂಸ್ಥೆಚೊ ಅಧ್ಯಕ್ಷ ಯುವರಾಜ ಜೈನ್ ಸಮಾರಂಭಾಚೆ ಅಧ್ಯಕ್ಷ ಆಶಿಲೆ. ಸಂಸ್ಥೆಚೆ ವಾರ್ಷಿಕಾಂಕ ‘ಮೌಲ್ಯ’ ಹಾಜೆ° ಉಗ್ತಾವಣ ವಿನಯ ಹೆಗ್ಡೆ ಹಾಂನಿಂ ಕೆಲೆ°. ಛದ್ಮವೇಷ ಸ್ಪರ್ಧೊ,  ಚರ್ಚಾ ಸ್ಪರ್ಧೊ ಚಲೊ. ಎಕ್ಸಲೆಂಟ್ ವಿದ್ಯಾ ಸಂಸ್ಥೆಚೆ ವಿದ್ಯಾರ್ಥಿಯಾನಿ ದೇಶಭಕ್ತಿ ಗೀತ ಗಾಯಚೆ°, ನೃತ್ಯ ಆನಿ ನಾಟ್ಕುಳೆ° ಪ್ರದರ್ಶನ ಕೆಲೆ°. ಸಂಸ್ಥೆಂಚಿ  ಕಾರ್ಯದರ್ಶಿ  ರಶ್ಮಿತಾ ಯುವರಾಜ್  ಜೈನ್ ಹಾಂನಿ° ಸ್ವಾಗತಾಚೆ ಉತ್ರಂ ಸಾಂಗಲಿ°.  ಪದವಿ ಪೂರ್ವ ಕಾಲೇಜಾಚೊ ಪ್ರಾಂಶುಪಾಲ ಪ್ರದೀಪ್ ಕುಮಾರ್ ಶೆಟ್ಟಿ, ಉಪ ಪ್ರಾಂಶುಪಾಲ ಮನೋಜ್ ಕುಮಾರ್, ಶಿಕ್ಷಕ  ಜಯಶೀಲ್, ಉಪನ್ಯಾಸಕ ಡಾ. ವಾದಿರಾಜ ಉಪಸ್ಥಿತ ಆಶಿಲೆ. ಪ್ರೌಢ ಶಾಳೆಚೆ  ಮುಖ್ಯ ಶಿಕ್ಷಕ ಶಿವಪ್ರಸಾದ ಭಟ್ ಹಾಂನಿ° ಆಭಾರ ಮಾನಲೊ. ಉಪನ್ಯಾಸಕ ರಂಜಿತ್ ಜೈನ್ ಹಾಂನಿ° ಸೂತ್ರಸಂಚಾಲಕ ಆಶಿಲೆ.

ಮಂಗಳೂರು: “ಭಾರತಾಚೆ ಸಂವಿಧಾನಾಂತು° ಕೊಂಕಣಿ ಭಾಶೆಕ ಬರೆ° ಸ್ಥಾನಮಾನ ಆಸಾ. ಕೊಂಕಣಿ ಎಕ ಸ್ವತಂತ್ರ ಭಾಸ ಜಾವನು ಆಸಾ. ತೇದನಾಚೆ ಇತಿಹಾಸಕಾರ, ಸಮಾಜ ಚಿಂತಕ, ಭಾಷಾಭಿಮಾನಿ ಲೋಕಾನ ಕಷ್ಟ ಪಾವನು ಮಾತೃಭಾಸ ಕೊಂಕಣಿ ವರೋಚಾಕ ತಾಂಗೆಲಿ ಅಮೂಲ್ಯ ಸೇವಾ ದಿಲ್ಯಾ. ತೆ° ವರೋನ ಹಾಡಚಿ ಹೋಡಿ ಜಬಾಬದಾರ ಆಮಗೆಲಿ ಜಾವನು ಆಸಾ. ಭಾಸ ವರಕಾ ಜಾಲ್ಯಾರ ತಿ ವಾಪರೂನ ಬರೊವಚೆ° ಆನಿ ವಾಚೂಚೆ° ಕರಕಾ” ಮ್ಹಣು ಕೊಂಕಣಿ ಶಿಕ್ಷಣಾಚೊ ರೂವಾರಿ ಡಾ. ಕೆ. ಮೋಹನ ಪೈ ಹಾಂನಿ° ಸಾಂಗಲಾ°. ಶಕ್ತಿನಗರಾಚೆ ವಿಶ್ವ ಕೊಂಕಣಿ ಕೇಂದ್ರಾಂತ ಕೊಂಕಣಿ ಮಾನ್ಯತಾ ದಿವಸಾಚೊ ಸಂದೇಶ ದಿತಾ ತಾಂನಿ° ಅಶೆ° ಸಾಂಗಲೆ°.

ಹ್ಯಾಚ ವೇಳಾರ ಪಾಂಚ ಲೋಕ ಕೊಂಕಣಿ ಮಹಾನ ಮನಸಾಲೆ° ಭಾವಚಿತ್ರಾಂಚೆ ಅನಾವರಣ ಜಾಲೆ°. ಬೆನಗಲ್ ನರಸಿಂಗ್ ರಾವ್, ಬೆನಗಲ್ ಶೀವ ರಾವ್, ರೆವರೆಂಡ್ ಜೆರೋಮ್ ಡಿಸೋಜಾ, ಉಳ್ಳಾಲ ಶ್ರೀನಿವಾಸ ಮಲ್ಯಾ, ಹರಿ ವಿಷ್ಣು ಕಾಮತ ಹಾಂಗೆಲೆ° ಭಾವಚಿತ್ರಾಂಚೆ ಅನಾವರಣ ಜಾಲೆ°.
ಕೆನರಾ ಚೇಂಬರ್ ಆಫ್ ಕಾಮರ್ಸ್ ಹಾಜೊ ಅಧ್ಯಕ್ಷ ಮಾರೂರು ಶಶಿಧರ ಪೈ ಆನಿ ರೆವರೆಂಡ್ ಆರ್ನಲ್ಡ್ ಹಾಂನಿಂ ಮಾನಾಚೆ ಸೊಯರೆ ಆಶಿಲೆ. ವಿಶ್ವ ಕೊಂಕಣಿ ಕೇಂದ್ರಾಚೊ ಅಧ್ಯಕ್ಷ ನಂದಗೋಪಲ ಶೆಣೈ, ಗಿಲ್ಬರ್ಟ ಡಿಸೋಜಾ, ಬಿ. ಆರ್. ಭಟ್, ವಿಲಿಯಂ ಡಿಸೋಜಾ, ಡಾ. ಪದ್ಮಾವತಿ ಶೆಣೈ, ಉಷಾ ಕಾಮತ, ಹುಂಡಿ ಪ್ರಭಾ ಕಾಮತ್, ಅಶ್ವಿನ್ ಚೆರ್ಕಳ್, ಧರ್ಮಶ್ರೀ ರಾವ್ ಆನಿ ಹೇರ ಉಪಸ್ಥಿತ ಆಶಿಲೆ.
ಡಾ. ವೈಷ್ಣವಿ ಎನ್. ಕಿಣಿನ ಕೊಂಕಣಿ ಅಭಿಮಾನ ಗೀತ ಗಾಯಲೆ°.

ಮಂಗಳೂರು: ಕೊಂಕಣಿ ಸಾಂಸ್ಕೃತಿಕ ಸಂಘ, ಮಂಗಳೂರು ಹಾಂನಿ° ಶ್ರೀ ಕ್ರಷ್ಣ ಜನ್ಮಾಷ್ಟಮಿ ಪ್ರಯುಕ್ತ ಆ. 13ಕ ಕೆನರಾ ಶಾಳೆಚೆ ಸುಧೀಂದ್ರ ಸಭಾ ಭವನಾಂತು° ಕೃಷ್ಣ ವೇಷ ಆನಿ ಕೊಂಕಣಿ ಕಾಣಿ ಸಾಂಗಚೊ ಸ್ಪರ್ಧೊ ಆಯೋಜನ ಕೆಲೊ. ದೋನಪಾರ 4 ಘಂಟ್ಯಾಕ ಸಭಾಭವನಾಚೆ ಶ್ರಿ ಕೃಷ್ಣ ಪ್ರತಿಮೆಚೆ ಮುಕಾರ ದಿವೊ ಲಾವನು ಸ್ಪರ್ಧೊ ಆರಂಭ ಜಾಲೊ.

ಕೃಷ್ಣ ವೇಷ ಸ್ಪರ್ಧೆಚೆ ಫಲಿತಾಂಶ ಅಶೆ° ಆಸಾ.

ತೀನ ವರಸ ಥಾಂಯ ವಿಭಾಗ:

ಪಯಲೆ° ಸ್ಥಾನ - ಸ್ತುತಿ ನಾಯಕ ಆನಿ ಸ್ಮೃತಿ ನಾಯಕ.

ದುಸರೆ° ಸ್ಥಾನ – ಆರ್ಯಾ ವಿ. ಪೈ

ತಿಸರೆ° ಸ್ಥಾನ -  ಅಭಯ ವಿ. ಪೈ

ಎಲ್. ಕೆ. ಜಿ, ಯು. ಕೆ. ಜಿ ಆನಿ ಪಯಲೆ° ಕಕ್ಷಾ ವಿಭಾಗ 

ಪಯಲೆ° ಸ್ಥಾನ – ಧ್ಯಾನ ಚೆರ್ಕಳ್

ದುಸರೆ° ಸ್ಥಾನ – ಕೃತಿ ಅಯ್ಯರ್

ತಿಸರೆ° ಸ್ಥಾನ – ದೇವಿಕಾ ಶ್ಯಾನಭಾಗ

ದುಸರೆ°, ತಿಸರೆ° ಆನಿ ಚೌತೆ ಕಕ್ಷಾ ವಿಭಾಗ-

ಪಯಲೆ° ಸ್ಥಾನ – ವೈಷ್ಣವಿ ಪಡಿಯಾರ

ದುಸರೆ° ಸ್ಥಾನ - ಪ್ರಣಿತಾ ಭಟ್

ಪಾಂಚವೆ°, ಸ್ಹವೆ° ಆನಿ ಸಾತವೆ° ಕಕ್ಷಾ ವಿಭಾಗ

ಪಯಲೆ° ಸ್ತಾನ - ಸ್ವಾತಿ ಭಟ್

ದುಸರೆ° ಸ್ಥಾನ – ಮಧುನಂದನ ಎಂ. ಶೇಟ್

ಕಾಣಿಯೊ ಸಾಂಗಚೊ ಸ್ಪರ್ಧೆಚೆ ಫಲಿತಾಂಶ ಅಶೆ° ಆಸಾ.

ದುಸರೆ°, ತಿಸರೆಂ ಆನಿ ಚೌತೆ ಕಕ್ಷಾ ವಿಭಾಗ

ಪಯಲೆ° ಸ್ಥಾನ – ವೈಷ್ಣವಿ ಪಡಿಯಾರ

ದುಸರೆ° ಸ್ಥಾನ – ಮಯೂರ ಶೆಣೈ

ತಿಸರೆ° ಸ್ಥಾನ – ಮನ್ವಿತಾ ಸಿ.

ಪಾಂಚವೆ°, ಸ್ಹವೆ° ಆನಿ ಸಾತವೆ° ಕಕ್ಷಾ ವಿಭಾಗ

ಪಯಲೆ° ಸ್ಥಾನ - ಸ್ವಾತಿ ಭಟ್

ದುಸರೆ° ಸ್ಥಾನ - ಭೂಮಿಕಾ ವಿ. ಭಟ್

ತಿಸರೆ° ಸ್ಥಾನ – ಮಧುನಂದನ ಎಂ. ಶೇಟ್

ಆಟವೆ°, ಣವೆ° ಆನಿ ದ್ಹಾವೆ° ಕಕ್ಷಾ ವಿಭಾಗ

ಪಯಲೆ° ಸ್ಥಾನ – ಅನಂತ ಕಾಮತ

ದುಸರೆ° ಸ್ಥಾನ – ರೋಹಿತ ಭಟ್

ತಿಸರೆ° ಸ್ಥಾನ – ಚಂದ್ರೇಶ ನಾಯಕ

ಕೊಂಕಣಿ ಸಾಂಸ್ಕøತಿಕ ಸಂಘಾಚೆ ಅಧ್ಯಕ್ಷ ದಿನೇಶ ಭಟ್ ಹಾಂನಿ° ಸಭೆಚೆ ಅಧ್ಯಕ್ಷ ಆಶಿಲೆ ಆನಿ ತಾಂನಿ° ಸಗಟಾಲೊ ಆಭಾರ ಮಾನಲೊ. ಆದಲಿ ಅಧ್ಯಕ್ಷಾ ಗೀತಾ ಸಿ. ಕಿಣಿನ ಸ್ವಾಗತಾಚೆ ಉತ್ರ° ಸಾಂಗಲಿ°. ಕಾರ್ಯದರ್ಶಿ ಮಮತಾ ಕಾಮತಾನ ಪ್ರಾರ್ಥನಾ ಸಾಂಗಲಿ. ಆದಲೊ ಅಧ್ಯಕ್ಷ ರತ್ನಾಕರ ಕುಡ್ವ ಹಾಂನಿ° ಸೂತ್ರ ಸಂಚಾಲನ ಕೆಲೆ°. ಶೈಲಾ ಕಾಮತ ಆನಿ ಜ್ಯೋತಿ ಕಾಮತ ಹಾಂನಿ° ಸ್ಪರ್ಧೆಚೊ ನಿವಾಡೊ ಕೆಲೊ. ಐಡಿಯಲ್ ಐಸ್ ಕ್ರಿಮ್ಸ್ ಆನಿ ದೇವಗಿರಿ ಚಹಾ ಪ್ರಮುಖ ಪ್ರಾಯೋಜಕ ಆಶಿಲೆ.

ಮಂಗಳೂರು: ಪೊರನೆ ಮಂಗಳೂರಚಿ ಸಹೃದಯಿ ಸ್ತ್ತ್ರೀ , ದೇಶಾಚೆ ವೆಗವೆಗಳೆ ಪ್ರದೇಶಾಂತು° ನಾವಾದೀಕ ಜಾವನು, ಸಗಟಾಲೊ ಮೋಗು ಆನಿ ಗೌರವ ಜೋಡಿಲಿ, ಮುಂಬಯಿοತು° ವಿವಾಸ ಕರನು ಸಮಾಜಾಕ ಭರಪೂರ ದೇಣೆ ದಿಲೆಲಿ ಸಾವಿತ್ರಿ ರಮೇಶ ಬಾಬುಲಕರ್ ಆಲಿಯಾಸ್ ಉದ್ಯಾವರ್ (1936-2022) 86 ವರಸ ಪ್ರಾಯೇರಿ ಜೂನ್ 5, 2022ಕ ದೋನಪಾರಾ ದೇವಾದಿನ ಜಾಲಿ. ಸಾಂತಾಕ್ರೂಜ್ ವೆಸ್ಟ್ ಹಾಂಗಾ ತಿಗೆಲೊ ಅಂತ್ಯ ಸಂಸ್ಕಾರ ತ್ಯಾಚಿ ದಿವಸು ಚಲೊ. ತಿಗೆಲೆ ಲಾಗಶಿಚೆ ಸಂಭοದಿ ಆನೀ ಇಷ್ಟ ಲೋಕ ಉಪಸ್ಥಿತ ಆಶಿಲೆ.

1936 ಇಸವಿಂತು° ಜಲ್ಮಾಕ ಆಯಿಲಿ ಸಾವಿತ್ರಿ ಉದ್ಯಾವರ ಯು. ಭಾಸ್ಕರ್ ರಾವ್ (ಮುಂಬಯಿοತು° ಟೈಮ್ಸ್ ಆಫ್ ಇಂಡಿಯಾಚೊ ಸಬ್ ಎಡಿಟರ್) ಹಾಂಗೆಲಿ ದ್ಹುವ ಆನಿ ಯೋಧಾ ದೇವಾದಿನ ರಮೇಶ ಬಾಬುಲಕರ್ ಹಾಂಗೆಲಿ ಬಾಯಲ ಜಾವನು ಆಸಾ. ನಿವೃತ್ತಿ ನಂತರ ಮುಂಬಯಿಕ ಆಯಿಲೊ ರಮೇಶ ಬಾಬುಲಕರ್ ಹಾಂಗೆಲೆ ದೇಹಾಂತ್ಯ 2010 ಇಸವಿಂತು° ಜಾಲೆ°.

ಸಾವಿತ್ರಿಲೆ ಸಾನಪಣೆಕ ಗೆಲ್ಯಾರಿ ತಿಗೆಲೆ ಪದವಿ ಶಿಕ್ಷಣ ಮಂಗಳೂರಚೆ ಸೇಂಟ್ ಆಗ್ನೇಸ್ ಕಾಲೇಜಾಂತು°(1958) ಆನಿ ಪದವಿಯೋತ್ತರ ಶಿಕ್ಷಣ ಮುಂಬಯಿಚೆ ಸೇಂಟ್ ಕ್ಸೇವಿಯರ್ ಕಾಲೇಜಾಂತು° (1960) ಜಾಲೆ°. ಉಪರಾಂತ ತಿಣೇ 1978 ಇಸವಿಂತು° ಮುಂಬಯಿಚೆ ಸೇಂಟ್ ಥೆರೆಸಾ ಕಾಲೇಜಾಂತು° ಬಿ. ಎಡ್ ಪದವಿ ಪ್ರಾಪ್ತ ಕೆಲಿ. ಎಕ ಯೋಧಾಲಿ ಬಾಯಲ ಜಾಲೆಲ್ಯಾನ ತಿಣೇ ದೇಶಾಚೆ ವ್ಹಿಂಗವ್ಹಿοಗಡ ಸೇನಾ ಪ್ರದೇಶಾಂತು° ಜೀವನ ಕರಚೆ° ಜಾಲೆ°. ತ್ಯಾ ದೆಕೂನ ಅಸ್ಸಾಂಚೆ ಜೋರಟ್ ಪ್ರದೇಶ ಆನಿ ಅಹಮದಾಬಾದಾಚೆ ಮೌಂಟ್ ಕಾರ್ಮೆಲ್ ಶಾಲೆಂತು° ವಿದ್ಯಾರ್ಥಿಯಾಲಿ ಮೋಗಾಚಿ ಶಿಕ್ಷಕಿ ತಿ ಜಾಲಿ. ತೀಣೆ ಮಂಗಳೂರಚೆ ಗಣಪತಿ ಜ್ಯೂನಿಯುರ್ ಕಾಲೇಜಾಚಿ ಪ್ರಥಮ ಪ್ರಾಂಶುಪಾಲಾ ಜಾವನು ಸೇವಾ ದಿಲೆಲೆ° ವಿಶೇಷ ಆಸಾ. ಮುಂಬಯಿοತು° ತಿಣೇ ಲಾರೇನ್ಸ್ ಸ್ಕೂಲ್, ಸಾಂತಾಕ್ರೂಜ್, ಆರ್ಯಾ ವಿದ್ಯಾ ಮಂದಿರ, ಸಾಂತಾಕ್ರೂಜ್, ಎಸ್. ವಿ. ಟಿ ಕಾಲೇಜ್(ಎಸ್. ಎನ್. ಡಿ. ಟಿ. ಸಾಂತಾಕ್ರೂಜ್ ಹಾಜೊ ಶಾಖಾ) ಹಾಂಗಾಯಿ ಸೇವಾ ದಿಲೆಲಿ ಆಸಾ.
ತ್ಯಾ ನಂತಾ° ತಿಣೇ ವುಮನ್ಸ್ ಇರಾ, ಫೇಮಿನಾ, ವಿ, ಇವ್ಸ್ ವೀಕ್ಲಿ, ಮಿಡ್ ಡೇ ಆನಿ ಟೈಮ್ಸಾ ಖಾತಿರ ಮಿಡಿಸ್ ಅಂಕಣ(ಸಾಮಾನ್ಯ ಲೋಕಾಂಕ ಇಷ್ಟ ಜಾವಚೆ ವಿಷಯ) ಬರಯಿಲೆ ಆಸಾ. ಹೆ° ಸೋಡೂನ ಆನಿ ಇತಲೆ ವಿಷಯಾರಿ ತೀಕಾ ಉಮೇದಿ ಆಶಿಲಿ. ರಂಗಭೂಮಿ, ಭಾಷಣಕಲಾ, ಭಾರತೀಯ ಆನಿ ಪಾಶ್ಚಾತ್ಯ ಲಘು ಸಂಗೀತ, ಯೋಗಾ, ಮುದ್ರಾ ಆನೀ ಹೇರ ವಿಷಯಾರಿ ತೀ ಉಮೇದಿ ದವರೂನ ಆಶಿಲಿ.

ಬ್ಹಾಮುಣು ದೇವಾದಿನ ಕರ್ನಲ್ ರಮೇಶ ಬಾಬುಲಕರ್ ಹಿಗೆಲೊ ಆದರ್ಶ ಆಶಿಲೊ. ಪೂತು ವಿಕ್ರಂ, ದ್ಹುವ ವಿನಿತಾ ತಿಗೆಲೆ ಮೋಗಾಚೆ ಆಶಿಲೆ. ಜ್ಹಾಂವಯಿ, ಸೂನ ಆನಿ ನಾತ್ರ° ಸಹಿತ ಸಗಳೆ ಕುಟುಂಬೆಚೆ ಮೇಳನು ತಿಗೆಲೆ ಜೀವನಭರ ಆಧಾರ ಸ್ಥಂಬ ಆಶಿಲೆ. ಮುಂಬಯಿοತು° ತೀಣೆ ನಿರಂತರ ಕೆಲೆಲಿ ಸಮಾಜ ಸೇವಾ ಮೋಲಾಧಿಕ ಆನಿ ಆಜಿಕಯಿ ಉಡಗಾಸ ದವರಚಿ ತಸಲಿ° ಆಸಾ.

ವಾಚಕಾಂಕ ತಿಗೆಲಿ ಕೃತಿ ‘ಚೈಲ್ಡ್ ಹುಡ್ ಡೈಜ್” ವಾಚಿಲೊ ಆನಂದ ಉಡಗಾಸ ಜಾತಲೊ. ಸಾಬಾರ ಲೋಕಾಂಕ ಆವಡಲೆಲಿ ಹ್ಯಾ ಕೃತಿಚಿ ಖೂಬ ಪ್ರತಿಯೊ ವಿಕೂನ ಗೆಲ್ಯಾಂತಿ. ವೆಗವೆಗಳೆ ಮಾಧ್ಯಮಾಂತು° ಬರಯಿಲೆ ಹಿಗೆಲಿ ಹೀ ಕೃತಿ ಆರತಾ° ಕನ್ನಡ ಭಾಶೆಕ “ಬಾಲ್ಯತನದ ಮಾಯಾಜಾಲಾ” ಮ್ಹಣು ಭಾಶಾಂತರ ಜಾಲ್ಯಾ. ಸಾವಿತ್ರಿ ಹಾಂಕಾ ಲಾಗಿ ದಾಕೂನ ವಳಕತಲಿ ಮುಂಬಯಚಿ ಶ್ಯಾಮಲಾ ಮಾಧವಾನ ಹೆ° ಅಣಕಾರ ಕೆಲಾ°.

ದುರದೃಷ್ಟಾವಶಾತ “ಚೈಲ್ಡಹುಡ್ ಡೈಜ್” ಹಾಜೆ° ದುಸ್ರೆ° ಮುದ್ರಣ ಪಳೊವಚೆ° ಪಯಲೆಂಚಿ ಸಾವಿತ್ರಿ ಹಾಂಗೆಲೆ° ದೇಹಾಂತ್ಯ ಜಾಲಾ°. ಸಾವಿತ್ರಿ ಹಾಂಗೆಲೆ° ಚಾಂಗಪಣ ಆಟೋವನು ಪ್ರಶಂಶಾ ಕರಚಾಕ ಹೋ ಬರೊ ಅವಕಾಶ ಆಸಾ.

ದೇವು ತಿಗೆಲೆ ಆತ್ಮಾಕ ಚಿರಶಾಂತಿ ದೀವೊ ಮ್ಹಣು ಮಾಘೂಯಾ°.

ಆοಗ್ಲ ಮೂಳ: ಐವಾನ್ ಸಲ್ದಾನಾ - ಶೇಟ್, ಸೆಕ್ಯೂಲರ್ ಸಿಟಿಜನ್.
ಕೊಂಕಣಿ ಅಣಕಾರ – ವೆಂಕಟೇಶ ಬಾಳಿಗಾ ಮಾವಿನಕುರ್ವೆ

ಮಂಗಳೂರು: ಮ್ಹಾಲ್ಗಡೊ ಉದ್ಯಮಿ, ಕೆನರಾ ಸಮೂಹ ಶಿಕ್ಷಣ ಸಂಸ್ಥೆಂಚೊ ಕೆನರಾ ಹೈಸ್ಕೂಲ್ ಅಸೋಸಿಯೇಶನ್ ಹಾಜೊ ಅಧ್ಯಕ್ಷ ಎಂ. ಅಣ್ಣಪ್ಪ ಪೈ (74ವ) ಥೊಡೆ ಕಾಳಾಚೆ ಅಸ್ವಾಸ್ಥ್ಯ ನಿಮಿತ ಜೂ.29ಕ ದೇವಾದಿನ ಜಾಲೆ. ಬಾಯಲ ನಿರ್ಮಲಾ ಪೈ ಪೂತ ಅರವಿಂದ ಪೈ, ಅಜಿತ್ ಪೈ ಆನೀ ಅಪಾರ ಬಂಧು ಭಾಂದವಾಂಕ ಸೋಡೂನ ತಾಂನಿ° ಗೆಲ್ಯಾಂತಿ. ಕೊಡಿಯಾಲಚೆ ಪ್ರತಿಷ್ಠಿತ ಸಾಹುಕಾರ್ ಬಾಬಾ ಪೈ ಘರಾಣೆಚೆ ಜಾವನು ಆಸಚೆ ಹಾಂನಿ° ಇಲೆಕ್ಟ್ರಿಕಲ್ ಎಂಜಿನಿಯರಿಂಗ್ ಪದವೀಧರ ಆಶಿಲೆ. ಬಾಪಸೂಲೆ ಪ್ರಾಡಕ್ಟ್ ವಿತರಕ ಉದ್ಯಮಾಕ ಮೆಳೆಲೆ ಹಾಂನಿ° ವ್ಯವಹಾರ ರಂಗಾಂತು° ಪರಿಣಿತಿ ಘೆತಲಿ.

1984 ಇಸವಿಂತೂಚಿ ಸ್ಟಾರ್ಟಪ್ ರೂಪಾರಿ ತ್ಯಾ ವೇಳಾರಿ ಜನಪ್ರಿಯ ಬಟಾಟೆ ಚಿಪ್ಸ್ ತಯಾರ ಕರಚೆ° ಏಸ್ ಫುಡ್ ಪ್ರಾಡಕ್ಟ್ ಸಂಸ್ಥೊ ಶುರು ಕರನು ಉಚ್ಛ ಸ್ಥರಾಚೆ ಆಹಾರ ಉತ್ಪನ್ನ° ರಫ್ತು ಕರಚೆ ಉದ್ಯಮಿ ಮ್ಹಣು ನಾವಾದೀಕ ಜಾಲೆ. ಹ್ಯಾ ದಿಶೆನ ತಾಂನಿ° ಮೊಡರ್ನ್ ಕಿಚನ್, ಪ್ರೆಸ್ಟೋ ಫುಡ್ ಹಾಜೆ ವ್ಯವಸ್ಥಾಪಕ ನಿರ್ದೇಶಕ ಜಾವನು, ಆರ್. ಆರ್. ಪೈ ಆಂಡ್ ಕೋ ಸಂಸ್ಥೆಚೆ ವಾಂಟೆಲಿ ಆಶಿಲೆ. ಸಾಬಾರ ಅಡೆಸ ದಶಕ ಕೆನರಾ ಹೈಸ್ಕೂಲ್ ಅಸೋಸಿಯೇಶನ್ ಹಾಜೆ ಆಡಳಿತ ಮಂಡಳಿಂತು° ಸಾಂದೊ ಜಾವನು, ಕಾರ್ಯದರ್ಶಿ, ಉಪಾಧ್ಯಕ್ಷ ಜಾವನು ಸೇವಾ ದಿಲೆಲೆ ಹಾಂನಿ° ಪ್ರಸ್ತುತ ಅಧ್ಯಕ್ಷ ಜಾವನು ಕೆನರಾ ಶಿಕ್ಷಣ ಸಂಸ್ಥೆಚೆ ಅಭಿವೃದ್ಧಿಕ ಖೂಬ ದೇಣೆ ದಿಲೆಲೆ ಆಸಾ. ಜಿಲ್ಲಾ ಸಣ್ಣ ಕೈಗಾರಿಕಾ ಸಂಘ ಹಾಜೊ ಅಧ್ಯಕ್ಷ ಜಾವನು, ಮಂಗಳೂರು ಮಿಡ್ ಟೌನ್ ರೋಟರಿ ಅಧ್ಯಕ್ಷ ಜಾವನು, ದಾನಿ ಜಾವನು ಸಾಮಾಜಿಕ, ಶೈಕ್ಷಣಿಕ ಕ್ಷೇತ್ರಾಂತು° ತಾಂನಿ° ನಾವಾದಿಕ ಆಶಿಲೆ. ಹಾಂಗೆಲ ಗೌರವಾರ್ಥ ಕೆನರಾ ಶಿಕ್ಷಣ ಸಂಸ್ಥೆಂತು° ಗುರುವಾರ ಸಂತಾಪ ಸಭಾ ಕರನು ಶಾಳೆಂಕ ರಜಾ ಘೋಷಣಾ ಕೆಲೆಲಿ. ಮಣ್ಣಗುಡ್ಡೆಚೆ ತಾಂಗೆಲೆ ಘರ ಆರಾಧನಾಂತು° ಪಾರ್ಥಿವ ಶರೀರಾಚೆ ದರ್ಶನಾಕ ಅಪಾರ ಸಂಖ್ಯಾನಿ ಗಣ್ಯ, ಲಾಗಶಿಚೆ ಲೋಕಾನ ಉಪಸ್ಥಿತ ಆಸೂನ ಅಂತಿಮ ನಮನ ಸಾಂಗಲೆ°.

ಮಂಗಳೂರು: ವಿಶ್ವ ವಿದ್ಯಾನಿಲಯ ಸಂಧ್ಯಾ ಕಾಲೇಜು, ಅಖಿಲ ಭಾರತೀಯ ಸಾಹಿತ್ಯ ಪರಿಷತ್ತು ಆನಿ ಸಾಮರಸ್ಯ ವೇದಿಕಾ, ಮಂಗಳೂರು  ಹಾಂಗೆಲೆ ಜೋಡ ಆಶ್ರಯಾರಿ ಕುದ್ಮುಲ್ ರಂಗರಾವ್ ಹಾಂಗೆಲೆ ಜಲ್ಮ ದೀವಸ ಆಚರಣ ಸಂದರ್ಭಾರಿ “ಸಾಮರಸ್ಯಾಕ ಉಗ್ತೆ° ಮನ ಜಾವಕಾ”  ಮ್ಹಳೆಲೆ ವಿಷಯಾರಿ ವಿಶೇಷ ಉಪನ್ಯಾಸ

ಜೂನ್ 29ಕ ಬುಧವಾರ ರವೀಂದ್ರ ಕಲಾ ಭವನಾಂತು° ಮಾಂಡೊನ ಹಾಡಲೆ°. ಪ್ರೊ. ರಾಜೇಶ್ ಪದ್ಮಾರ್, ಉಪನ್ಯಾಸಕ ಆನಿ ಸಾಮಾಜಿಕ ಕಾರ್ಯಕರ್ತ ಹಾಂನಿ° ಪ್ರಧಾನ ಭಾಷಣಕಾರ ಆಶಿಲೆ. ಸಾಮರಸ್ಯ ಸಾಂಬಾಳನು ಹಾಡಚಾಕ ಜಾಯ ಆಶಿಲೆ ವಿಷಯಾರಿ ಉಲಯಿಲೆ ತಾಂನಿ° ದೀನದಲಿತ ಲೋಕಾ ಬದಲ ಕುದ್ಮುಲ್ ರಂಗರಾವ್ ಹಾಂನಿ° ತಾಂಗೆಲೆ ಜೀವನಚಿ ವ್ಯಯ ಕೆಲೆಲೊ ವಿಷಯ ಕಳಯಲೊ.

ಅಖಿಲ ಭಾರತೀಯ ಸಾಹಿತ್ಯ ಪರಿಷತ್ತ ಹಾಜೊ ಜಿಲ್ಲಾಧ್ಯಕ್ಷ ಡಾ. ಚ. ನ. ಶಂಕರ ರಾವ್ ಅಧ್ಯಕ್ಷ ಆಶಿಲೆ. ಸ್ವತಃ ಮಹಾತ್ಮ ಗಾಂಧೀಜಿನ ಸುತಾ ಕುದ್ಮುಲ್ ರಂಗರಾವ್ ಹಾಂಕಾ° ಆದರ್ಶ ಜಾವನು ಘೆತಿಲೆ ಮ್ಹಣು ತಾಂನಿ° ಕಳಯಲೆ°. 

ವೈದ್ಯ ಡಾ. ವಾಮನ ಶೆಣೈ ಹಾಂನಿ° “ಸಾಮರಸ್ಯಕ್ಕೆ ಬೇಕು ತೆರೆದ ಮನಸ್ಸು” ಮ್ಹಳೆಲೆ ಪುಸ್ತಿಕಾ ಮೋಕಳಿಕ ಕೆಲೆ°.

ಪ್ರಾಂಶುಪಾಲಾ ಡಾ. ಸುಭಾಷಿಣಿ ಶ್ರೀವತ್ಸ ಹಾಂನಿ ಸ್ವಾಗತಾಚೆ ಉತ್ರ° ಸಾಂಗಲಿ°. ಸುದೀಕ್ಷಾನ ಪ್ರಾರ್ಥನಾ ಸಾಂಗಲಿ.   ಸಾಮರಸ್ಯ ವೇದಿಕೆಚೊ ಸಂಯೋಜಕ ಪ್ರಸಾದ್ ಕಣ್ಣೂರು ಹಾಂನಿ° ಸೂತ್ರ ಸಂಚಾಲನ ಕೆಲೆ°. ಅಖಿಲ ಭಾರತೀಯ ಸಾಹಿತ್ಯ ಪರಿಷತ್ತ ಮಂಗಳೂರು ವಿಬಾಗಾಚಿ ಅಧ್ಯಕ್ಷಾ ಡಾ. ಮೀನಾಕ್ಷಿ ರಾಮಚಂದ್ರ ಹಾಂನಿ° ಆಬಾರ ಮಾನಲೊ. ಪರೀಕ್ಷಾಂಗ ಕುಲಸಚಿವ ಪ್ರೊ. ಪಿ. ಎಲ್. ಧರ್ಮ, ಸಮಾಜಶಾಸ್ತ್ರ ವಿಬಾಗಾಚೆ ಡಾ. ಶ್ರೀಪಾದ್, ಸಂಧ್ಯಾ ಕಾಲೇಜಾಚೆ ಎಂಬಿಎ ಆನಿ ಎಂಕಾಂ ವಿಭಾಗಾಚೆ ಸಂಯೋಜಕ ಡಾ. ಜಗದೀಶ್ ಬಿ., ಸ್ನಾತಕೋತ್ತರ ತುಳು ವಿಭಾಗಾಚೆ ಸಂಯೋಜಕ ಡಾ. ಮಾಧವ ಎಂ.ಕೆ., ಕೊಂಕಣಿ ವಿಭಾಗಾಚೆ ಸಂಯೋಜಕ ಡಾ. ದೇವದಾಸ್ ಪೈ, ಜಿಎಸ್‍ಟಿ ಡಿಪ್ಲೊಮಾ ವಿಭಾಗಾಚೆ ಸಂಯೋಜಕ ಡಾ. ಯತೀಶ್ ಕುಮಾರ್ ಉಪಸ್ಥಿತ ಆಶಿಲೆ.

ಕುತ್ತಾರು ಪದವು ಬಾಲಕಾಶ್ರಮಾಕ ಜಿ.ಎಸ್.ಬಿ. ಮಹಿಳಾ ವೃಂದ, ಮಂಗಳೂರು ಹಾಜೆ  ಕಾರ್ಯಕಾರಿ ಸಮಿತಿಚೆ ಸಾಂದೆ ಆನಿಕ ಇತರ ಆಸಕ್ತ ಸಾಂದೆ, ಅಧ್ಯಕ್ಷಾ ರಾಧಿಕಾ ಕಾಮತ್ ಸಮೇತ ಮೇಳನು ವರ್ಷಾವದಿ ಭೇಟಿ ದಿಲಿ.  ದೊನಪಾರಾ ಪರ್ಯಂತ ಚೆರಡುವಾಂಕ ಕಾಣಿ ಸಾಂಗುನು, ತಾಂಚೆ ಕರಾನ ಭಜನ ಸಾಂಗೊನು ವೆಗವೆಗಳೆ ಖೇಳು ಖೆಳೊನು, ವಿಜೇಂತಾಕ  ಇನಾಂ ವಾಂಟಪ ಕೆಲೆ. ತಾಂಕಾ ಫಳಾರ ವಾಂಟುನು ತಾಂಚೆ ಸಾಂಗತ ಮೇಳನು ಖುಷಿ ಪಾವಲಿಂತಿ.  ತಶೀಂಚಿ ಆಶ್ರಮಾಕ ವೃಂದಾ ತರಪೇನ ವರ್ಷಂಪ್ರತಿ ದಿವಚೆ ದೇಣಿಗ ದಿಲೆ.

ಕೊಡಿಯಾಲ ಖಬರ: ಸಂತೋಷ ಕಾಮತ ತುಂವ° ಎಕ ಯಶಸ್ವಿ ಉದ್ಯಮಿ. ಹೆ° ಪಾಲಿಟಿಕ್ಸ್ ಇತ್ಯಾಕ ?
ಸಂತೋಷ ಕಾಮತ: ಹಾಂವ° ಖಂಚೆಯ ಗೊಂದೋಳು ನಾಕಾ. ಮೆಗೆಲೆ ಇತ್ಯಾಕ ವ್ಯಾರು ಆನಿ ಸಂಸಾರ ಮ್ಹಣು ಸುಖಾರಿ ಆಶಿಲೊ. ಜಾಲ್ಯಾರ ಹ್ಯಾ ಕರೋನಾ ಮಹಾಮಾರಿ ವೇಳಾರ ಲಾಖಡೌನ ಜ್ಯಾರಿ ಜಾತರಿ ಮೆಗೆಲೆ ತಸಲೆ ವ್ಯಾರಾಚಾಲೆ ತೊಂದರೆ ಪಳೊವನು ಹಾಂವೆ° ಚಿಕೆಚಿ ಉಲೊವಚಾಕ ಶುರು ಕೆಲೆ°. ಕೋಣ ಉಲಯತಾ ತಾಕಾ ಪಾಟು ಬಾಂದೂಚೆ ಸಾಮಾನ್ಯ ಆನಿ ಸಹಜ ಪ್ರತಿಕ್ರಿಯಾ. ಆಮಿ ಸಾಬಾರ ಲೋಕ ರೇಡಿಮೆಡ್ ಆನಿ ಹೇರ ವ್ಯಾಪಾರಿ ಸಂಘಟಿತ ಜಾಲೆ ಆನಿ ಜಿಲ್ಲಾಡಳಿತಾಕ ಮೇಳಚೆ°, ಮುಖ್ಯಮಂತ್ರಿಕ ಮೇಳಚೆ° ಸಗಟ ಕೆಲೆ°. ಆಮಕಾ ಥೊಡೆ ವಿಷಯಾಂತು° ಯಶ ಸುತಾ ಮೆಳೆಂ. ಹೆಂ ಆಮ್ ಆದ್ಮಿ ಪಾರ್ಟಿಚೆ ರಾಜ್ಯ ಘಟಕಾಚೆ ದೊಳೆಕ ಪಳೆ° ದಿಸತಾ. ತಾಂನಿ° ಮಾಕಾ ಸಂಪರ್ಕ ಕೆಲೊ ಆನಿ ಹಾಂವಂ ಪಾರ್ಟಿಕ ಮೆಳೊ. ಹಾಂತು° ಕಸಲೆಂಯಿ ಪೂರ್ವಯೋಜನಾ ಯಾ ಮಹತ್ವಾಕಾಂಕಶಾ ನಾ ಆಶಿಲಿ.
ಕೊ.ಖ.: ತುಕಾ ವ್ಹಿಂಗಡ ಪಕ್ಷಾಚಾನಿ ಆಪಯನಿವೆ ?
ಸ.ಕಾ.: ನಾ...ಹಾಂವೆ° ಸಾಂಗಲೆ° ನ್ಹಹಿಂವೆ, ರಾಜಕೀಯಾಕ ಮೆಳಚಿ ಮೆಗೆಲಿ ಯೋಜನಾ ನಾ ಆಶಿಲಿ. ವ್ಹಿಂಗಡ ಪಕ್ಷಾಚಾಂಕ ಮೆಗೆಲೆ ಭಿತರಿ ರಾಜಕಾರಣಿ ದಿಸನಿ ಮ್ಹಣಯೆತ. ಜಾಲ್ಯಾರಿ ಕಾಲೇಜಾಂತ ಆಸತಾನಾ ಹಾಂವ° ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷದ್ ಹಾಜೊ ಸಕ್ರೀಯ ಸದಸ್ಯ ಆಶಿಲೊ ಆನಿ ಥೊಡಿ ಜವಾಬ್ದಾರಿ ಸುತಾ ಘೆತಿಲಿ. ತೆ° ಸೊಡಲ್ಯಾರಿ ಮಾಕಾ ಖಂಚೆಯ ಸಂಘ ಸಂಸ್ಥೆಚೆ ಮುಖೇಲಪಣ ಘೆವನು ಅನುಭವ ನಾ. ಮೆಗೆಲಿ ಆವಸು ಎಕ ಪಾವಟಿ ಮಂಗಳೂರು ನಗರಪಾಲಿಕೆಚೆ ಚುನಾವಾಂತು° ಪಕ್ಷೇತರ ಜಾವನು ರಾಬಿಲೊ ಅನುಭವ ಆಸಾ.
ಕೊ.ಖ.: ಆಮ್ ಆದ್ಮಿ ಪಾರ್ಟಿ ಇತ್ಯಾಕ ?
ಸ. ಕಾ. : ರಾಜಕಾರಣಾ ದಾಕೂನ ದೂರ ಆಶಿಲೆ ಮಾಕಾ ಆರತಾಂಚೆ ದೀವಸಾಂತು° ದೋನ ವಿಷಯ ಖೂಬ ಮನಾಕ ಖಾತಾ ಆಶಿಲೆ. ಬ್ರಷ್ಟಾಚಾರಾಚಿ ಪರಮಾವಧಿ ಆನಿ ಜನಾಲೆ ಮಧೆ° ಚಡ ಜಾತಾ ಆಸಚೆ ದ್ವೇಷ ಭಾವನಾ. ಮೆಗೆಲೆ ತಸಲೆ ಖಂಚಾಂತೂಯಿ ನಾತಿಲೆ ಲೋಕಾಂಕ ಹ್ಯಾ ದೋನ ವಿಷಯ ಖೂಬ ಮನಾಕ ಖೋಂಬತಾ. ಹಾಂವ° ತ್ಯಾ ವಿಷಯಾರಿ ಉಲಯತಾ, ಉಲಯನಾಶಿ° ಮನಾಂತೂಚಿ ಭೊಗತಲೆ ಕಿತಲೆ ಲೋಕ ಆಸಚಾಕ ಪುರೊಚಿ ?
ಆಮ್ ಆದ್ಮಿ ಪಾರ್ಟಿಚೆ ದೆಹಲಿ ಸರಕಾರಾನ ಚಲಚಿ ರೀತಿ ಮಾಕಾ ಖೂಬ ಆವಡಲಿ. ಫಕತ ತೀನ ವಿಷಯ ಮುಕಾರ ದವರನು ತಾಂನಿ° ಚಲಚಿ ರೀತಿ ಆಮಗೆಲೆ ದೇಶಾಕ ಸಾಂಗೂನ ಕರಯಲ್ಯಾ ಮ್ಹಣು ಮಾಕಾ ಭೊಗಲೆ°. ಫುಕಟ ಶ್ರೇಷ್ಠ ಶಿಕ್ಷಣ, ಫುಕಟ ಉತ್ತಮ ಆರೋಗ್ಯ ವ್ಯವಸ್ಥಾ ಆನೀ ಬ್ರಷ್ಟಾಚಾರ ರಹಿತ ಆಡಳಿತ ಹೆ° ತೀನ ಸೋಡೂನ ಎಕ ಸಾಮಾನ್ಯ ಮನಶಾಕ ಆನಿ ಕಸಲೆ° ಜಾಯಿ ? ತ್ಯಾ ದೆಕೂನ ಆಮ್ ಆದ್ಮಿ ಪಾರ್ಟಿನ ಆಪಯಲೆ ಕೂಡಲೆ ಹಾಂವ° ಪಾರ್ಟಿಕ ಮೆಳೊ.
ಕೊ. ಖ: ಪುರಾ ಪಾರ್ಟಿಚಾನಿ ಸಾಂಗಚೆ° ಎಕ ಆನಿ ಕರಚೆ° ಆನಿ ಎಕ ಮ್ಹಳೆಲಿ ಭಾವನಾ ಜನಾ ಮಧೆ° ಆಸಾ. ತುಗೆಲೊ ಅಭಿಪ್ರಾಯ ?
ಸ. ಕಾ. : ಎದೋಳು ಥಾಂಯ ಆಯಿಲೆ ಸರ್ವ ಸರಕಾರಾಚಾನಿ ತಶಿಂಚಿ ಕೆಲಾ°. ತ್ಯಾ ದೆಕೂನ ಜನಾನ ತಶಿ° ಸಾಂಗಚಾಂತು° ಅರ್ಥ ಆಸಾ. ಜಾಲ್ಯಾರ ಆಮ್ ಆದ್ಮಿ ಪಾರ್ಟಿ ಸಾಂಗಿಲೆ ಮ್ಹಣಕೆ ಚಲಚಿ ಪಾರ್ಟಿ ಜಾವನು ಆಸಾ. ದೆಹಲಿಂತು° ದುಸ್ರೆ ಪಾವಟಿ ವಿಂಚೂನ ಆಯಿಲೆ° ಹಾಕಾ ನಿದರ್ಶನ. ಪಂಜಾಬ್ ಪಳೆ, ಫಕತ 100 ದೀವಸ ಭಿತರಿ ಪ್ರಣಾಳಿಕೆಂತು° ಸಾಂಗಿಲೆ ಚಡಾವತ ವಿಷಯ ಕರನು ದಾಕಯಲಾ. ತ್ಯಾ ನಂತಾ° ಬ್ರಷ್ಟಾಚಾರ ಕೆಲೆಲೆ ಎಕ ಮಂತ್ರಿಕ ಜೈಲಾಕಯಿ ಪೆಟಯಲಾ.
ಆಜಿ ಸಾಂಗಿಲೆ° ಕರನು ದಾಕೊವಚಿ ಎಕ ಪಾರ್ಟಿ ಆಸಾ ಜಾಲ್ಯಾರ ತಿ ಜಾವನು ಆಸಾ ಆಮ್ ಆದ್ಮಿ ಪಾರ್ಟಿ.
ಕೊ. ಖ.: ದಕ್ಷಿಣ ಕನ್ನಡ ಜಿಲ್ಲೆಂತುಂ ಕಾಂಗ್ರೆಸ್ ಆನಿ ಬಿ. ಜೆ. ಪಿ ದೋನಯಿ ಬಲಶಾಲಿ ಆಸಾತಿ. ತಾಂಗೆಲಾಗಿ ಹಜಾರನಿ ಸಂಖ್ಯಾನ ಕಾರ್ಯಕರ್ತ ಆಸಾತಿ. ಆಮ್ ಆದ್ಮಿ ಪಾರ್ಟಿಕ ಹಾಂಗಾ ಮೂಳ ನಾ. ಮಾಗಿರಿ ಚುನಾವಾಕ ರಾಬಚೆ° ಕಶಿ° ಸಾಧ್ಯ ಜಾತಾ ?
ಸ. ಕಾ: ಆಮ್ ಆದ್ಮಿ ಪಾರ್ಟಿ ಆಮಗೆಲೆ ಹ್ಯಾ ಪ್ರದೇಶಾಂತು° 2013 ವರಸಾಂತೂಚಿ ಆಯಲ್ಯಾ. ಆಮೀ ಲೋಕಸಭಾ ಚುನಾವಾಕಯಿ ರಾಬಲ್ಯಾಂತಿ. ಜಾಲ್ಯಾರ ಆಮ್ ಆದ್ಮಿ ಪಾರ್ಟಿ ತೆದನಾ ಬಾಲವಸ್ಥಾರಿ ಆಶಿಲಿ. ಆಜಿ ದೆಹಲಿ ಆನಿ ಪಂಜಾಬಾಂತು° ಸಾಮಾನ್ಯ ಲೋಕಾನ ಮೇಳನು ಆಮಕಾ ಬಲ ದಿತರಿ ದ. ಕ. ಜಿಲ್ಲೆಚೆ ಸಾಮಾನ್ಯ ಲೋಕಾಂಕಯಿ ಆಮಗೆಲೆ ವಯರಿ ದೈರ್ಯ ಆಯಲಾ°. ಪ್ರತಿಭಾವಂತ, ಸ್ವಾಭಿಮಾನಿ, ಸಜ್ಜನ ಲೋಕ ಯೆದೊಳು ರಾಜಕಾರಣಾಚೆ ಗಂಧಗಾಳಿ ನಾತಿಲೆ ಲೋಕ ದೀಸಾನ ದೀಸ ಯೆವನು ಮೆಳತಾ ಆಸಾತಿ. ಜೂನ ಆಖೇರಿ ಭಿತರಿ 25,000 ಲೋಕಾಲೆ° ಎಕ ಸದೃಡ ಟೀಮ್ ತಯರಾ ಕರಚೆ° ಲಕ್ಷ್ಯ ಆಮಗೆಲೆ ಆಸಾ. ಕಾಂಗ್ರೆಸ್ ಆನಿ ಬಿಜೆಪಿ ದಾಕೂನಯಿ ಖೂಬ ಲೋಕ ಯೆತಾ ಆಸಾತಿ.
ಕೊ. ಖ: ಮುಕಾರ ಯೆವಚೆ ವಿಧಾನ ಸಭಾ ಚುನಾವಾಕ ದ.ಕ. ಜಿಲ್ಲೆಚೆ ಕಿತಲೆ ಸ್ಥಾನಾ ದಾಕೂನ ಆಮ್ ಆದ್ಮಿ ಪಾರ್ಟಿಚೆ ಅಬ್ಯರ್ಥಿ ಸ್ಪರ್ಧಾ ಕರತಾತಿ ?
ಸ. ಕಾ: ಸರ್ವ ವಿಧಾನ ಸಭಾ ಕ್ಷೇತ್ರಾ ದಾಕೂನಯಿ ಸ್ಪರ್ಧಾ ಕರತಾತಿ. ಎದೋಳೂಚಿ ಹರ ಎಕ ಸ್ಥಾನಾಕ ದೋನ ತೀನ ಉಮೇದ್ವಾರ ಮುಕಾರ ಆಯಲ್ಯಾಂತಿ. ಹಾಂಗಾ ಮಾತ್ರ ನ್ಹಹಿ° ರಾಜ್ಯಾಚೆ ಸಗಟ ವಿಧಾನಸಭಾ ಕ್ಷೇತ್ರಾಂತು° ಆಶಿಂಚಿ ಜಾತಾ ಆಸಾ. ವ್ಹಿಂಗಡ ಪಾರ್ಟಿಚಾಲೆ° ಬ್ರಷ್ಟ ಆಡಳಿತ ಪಳಯಿಲೆ ಜನಾಂಕ ಸಂತಾಪ ಆಯಲಾ. ತಾಂನಿ° ಹ್ಯಾ ಪಾವಟಿ ಬದಲಾವಣ ಆಶೈತಾ ಆಸಾತಿ. ದೆಹಲಿ ಆನಿ ಪಂಜಾಬಾ ಮ್ಹಣಕೆ ಕರ್ನಾಟಕಾಂತೂಯಿ ಬದಲಾವ ಹಾಡೂಂಕ ಆಮ್ ಆದ್ಮಿ ಪಾರ್ಟಿ ತಯಾರ ಆಸಾ.
ಕೊ. ಖ: ಧನ್ಯವಾದ

ಮಂಗಳೂರು: ಆರತಾಂಚಿ ಜಿ.ಎಸ್.ಬಿ. ಮಹಿಳಾ ವೃಂದ (ರಿ), ಮಂಗಳೂರು  2022-23 ವರಸಾಚೆ ಮಹಾ ಸಭಾ ಗೋಕರ್ಣ ಮಠಾಚೆ ಸಭಾಗೃಹಾಂತು ಮಾಲಗಡೆ ಸಾಂದೆ ಮರೋಳಿ ಸಬಿತಾ ಕಾಮತ್ ಹಾಂಗೆಲೆ ಮುಖೇಲಪಣಾರಿ ಚಲೆ. ನಿಕಟಪೂರ್ವ ಅಧ್ಯಕ್ಷಾ ವಿಮಲಾ ಕಾಮತ್ ಹಾಂನಿ ನೂತನ ಅಧ್ಯಕ್ಷಾ ರಾಧಿಕಾ ಆರ್. ಕಾಮತಿಕ ಅಧಿಕಾರು ಒಪಸೂನ ದಿಲೊ.   ನೂತನ ಅಧ್ಯಕ್ಷಾನ ವಿಮಲಾ ಕಾಮತಿಕ ಫಲ, ಯಾದಸ್ತಿಕಾ ದೀವನು ಸಮ್ಮಾನು ಕೆಲೊ.  ಉಪಾಧ್ಯಕ್ಷಾ ಜಾವನು ನಯನಾ ರಾವ್, ಕಾರ್ಯದರ್ಶಿ ಪೂರ್ಣಿಮಾ ಭಂಡಾರ್ಕಾರ್, ಸಹ ಕಾರ್ಯದರ್ಶಿ ವಿಜಯಲಕ್ಷ್ಮಿ ಕಾಮತ್, ಕೋಶಾಧಿಕಾರಿ ವಸುಧಾ ಬಾಳಿಗಾ ಆನಿಕ ಸಹ ಕೋಶಾಧಿಕಾರಿ ಜಾವನು ಮೀನಾಕ್ಷಿ ಎನ್. ಪೈ ವಿಂಚೂನ ಆಯಿಲಿಂತಿ. 

ಮರೋಳಿ ಸಬಿತಾ ಕಾಮತ್, ಗೀತಾ ಕಾಮತ್, ಚಂದ್ರಿಕಾ ಮಲ್ಯ, ಪ್ರಭಾ ಪೈ ಆನಿಕ ಗೀತಾ ಸಿ. ಕಿಣಿ  ಸಲಹಾ ಸಮಿತಿಚೆ ಸಾಂದೆ ಜಾವನು ನೇಮಕ ಜಾಲಿಂತಿ.  ತಶೀಂಚಿ ವಿಮಲಾ ಕಾಮತ್, ವಸುಧಾ ಭಟ್ ಆನಿಕ ಪ್ರತಿಮಾ ಪ್ರಭು ಹಾಂನಿ ಕಾರ್ಯಕಾರಿ ಸಮಿತಿಚೆ ಇತರ ಸಾಂದೆ ಜಾವನು ನೇಮಕ ಜಾಲಿಂತಿ.  ಲೆಕ್ಕ ಪ್ರತಿಷೋಧಕ ಜಾವನು ನಕುಲ್ ಪೈ ಹಾಂನಿ ನಿಯೋಜಿತ ಜಾಲಿಂತಿ. 

ನೂತನ ಅಧ್ಯಕ್ಷಾನ ಸಗಟ ಸಾಂದೆಲಾಗಿ ಸಹಕಾರು ಮಾಗಲೊ.  ತಿಗೆಲೆ ಮುಖೆಲಪಣಾರಿ ಸಮಾಜ ಸೇವಾ ಬರೆಂ ತರಾನ ಜಾವೊ ಮ್ಹೊಣು ಆಶಾ ವ್ಯಕ್ತ ಕೆಲಿ.  ವಿಮಲಾ ಕಾಮತಿನ ತಿಗೆಲೆ ಅಧಿಕಾರಾಚೆ ಅವಧಿಂತು ತಿಕಾ ಸಹಾಯ ಕೆಲೆಲೆ ಸಗಟ ಸಾಂದೆಂಕ ಧನ್ಯವಾದು ದಿಲೊ. ನಯನಾ ರಾವ್ ಹಾಂನಿ ವಾರ್ಷಿಕ ವರದಿ ವಾಚನ ಕೆಲೆಂ.  ಸಬಿತಾ ಕಾನತಿನ ಹೇರ ಪ್ರಕಟಣಾ ಕೆಲೆಂ.  ರಾಧಿಕಾ ಕಾಮತಿನ ಆಭಾರು ವ್ಯಕ್ತ ಕೆಲೊ. ಶಾಂತಿ ಪಾಠು ಜಾತರಿ ಸಭಾ ಸಾಂಪಲಿ.  ವೀರ ವಿಠಲ ದೇವಾಕ ಪೂಜಾ ಜಾತರಿ ಪ್ರಸಾದ ರೂಪಾರಿ ಭೋಜನ ವ್ಯವಸ್ಥಾ ಆಶಿಲಿ. ವೃಂದಾಚೆ ಸಾಂದೆ ಕಸ್ತೂರಿ ಕಾಮತ್ ಹಾಂನಿ ತಾಂಗೆಲೆ ವಾರ್ಡಿಕೆಚೆ ಪನ್ನಾಸಾ ವರಸಾಚೆ ಶುಭ ಸಂದರ್ಭ ಜಾವನು ಸಗಟಾಂಕ ಗೊಡಸೆ ವಾಂಟಿಲೆ.  ಸಾಬಾರ 120 ಸಾಂದೆ ಹಾಜರ ಆಶಿಲಿಂತಿ.