ಮಂಗಳೂರು: ಕೆನರಾ ಎಂಜಿನಿಯರಿಂಗ್ ಕಾಲೇಜಾಚೆ ವಾರ್ಷಿಕೊತ್ಸವಾಚೊ ವಾಂಟೊ ಜಾವನು ತೀನ ದೀವಸಾಚೆ ರಾಜ್ಯಸ್ಥರಾಚೆ° ತಾಂತ್ರಿಕ, ಸಾಂಸ್ಕೃತಿಕ  ಉತ್ಸವ ‘ಆಕೃತಿ' ಚಲೊ. ಹಾಂಗ್ಯೋ ಐಸ್‍ಕ್ರೀಂ ಪ್ರೈ. ಲಿ. ಹಾಜೊ ಆಡಳಿತ ನಿರ್ದೇಶಕ ಪ್ರದೀಪ್ ಜಿ.ಪೈ ಹಾಂನಿ° ದಿವೊ ಲಾವನು ಉಗತಾವಣ ಕೆಲೆ°.

ಕಾಲೇಜಾಚೊ ಸಂಚಾಲಕ, ಆಡಳಿತ ಮಂಡಳಿ ಕಾರ್ಯದರ್ಶಿ ಎಂ. ರಂಗನಾಥ ಭಟ್ ಹಾಂನಿ ಶುಭಾಶಯ ಪಾಟಯಲೊ. ಕೆನರಾ ಹೈಸ್ಕೂಲ್ ಎಸೋಸಿಯೇಶನ್ ಹಾಜೊ ಉಪಾಧ್ಯಕ್ಷ ಎಂ. ಪದ್ಮನಾಭ ಪೈ ಹಾಂನಿ° ಸಭೆಚೆ ಅಧ್ಯಕ್ಷ ಆಶಿಲೆ. ಕೋಶಾಧಿಕಾರಿ ವಾಮನ ಕಾಮತ, ಸಹ ಕೋಶಾಧಿಕಾರಿ ಜಗನ್ನಾಥ ಕಾಮತ, ಸಹ ಕಾರ್ಯದರ್ಶಿ ಟಿ. ಗೋಪಾಲಕೃಷ್ಣ ಶೆಣೈ, ಕೆ. ಸುರೇಶ್ ಕಾಮತ, ಸಾಂದೆ ಬಸ್ತಿ ಪುರುಷೋತ್ತಮ ಶೆಣೈ, ಮಂಗಲ್ಪಾಡಿ ನರೇಶ್ ಶೆಣೈ, ಕೆ. ಶಿವಾನಂದ ಶೆಣೈ, ಆಕೃತಿ ಉತ್ಸವಾಚೆ ಪ್ರಧಾನ ಸಮನ್ವಯಕಾರ ನವೀನ ಎ. ಕುಲಾಲ್ ಉಪಸ್ಥಿತ ಆಶಿಲೆ.

ಪ್ರಾಂಶುಪಾಲ ಡಾ. ಗಣೇಶ್ ವಿ.ಭಟ್ ಹಾಂನಿ° ವಾರ್ಷಿಕ ವರದಿ ವಾಚಲಿ. ಪ್ಲೇಸ್‍ಮೆಂಟ್ ಆಫೀಸರ್ ಎಂ. ಪಂಚಮಿ ನಾಯಕ ಹಾಂನಿ° ಸೊಯರೆಲೊ ವಳಕ ಕರನು ದಿಲೊ. ಪ್ರತಿಭಾನ್ವಿತ, ಸಾಧಕ ವಿದ್ಯಾರ್ಥಿಯಾಂಕ ಸನ್ಮಾನ ಚಲೊ. ಪ್ಲೇಸ್‍ಮೆಂಟ್ ಆಫೀಸರ್ ಕೀರ್ತನ ಕಿಣಿ, ಉಪನ್ಯಾಸಕಿ ಕ್ಯಾರಲ್ ರೋಡ್ರಿಗಸ ಹಾಂನಿ° ಸಾಧಕ, ಪ್ರತಿಭಾನ್ವಿತ ವಿದ್ಯಾರ್ಥಿಯಾಲೊ ವಳಕ ಕರನು ದಿಲೊ. ಬೇಸಿಕ್ ಸೈನ್ಸ್ ವಿಭಾಗಾಚೊ ಮುಖ್ಯಸ್ಥ ಡಾ. ಎನ್. ಸತೀಶ್ ಕುಮಾರ್ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ಆಕೃತಿ ಉತ್ಸವಾಚೊ ಪ್ರಧಾನ ಸಮನ್ವಯಕಾರ ಧನಂಜಯ ಬಿ. ಹಾಂನಿ° ಆಬಾರ ಮಾನಲೊ. ವಿದ್ಯಾರ್ಥಿ ಸೌರಭ್ ಹಲಗೇಕರ್ ಆನಿ ತಾರಾ ಕಾಮತಾನ ಸೂತ್ರ ಸಂಚಾಲನ ಕೆಲೆ°. ಸಭಾ ಕಾರ್ಯಕ್ರಮಾಚೆ° ಪಯಲೆ° ವಿದ್ಯಾರ್ಥಿಯಾನಿ ಸಾಂಸ್ಕೃತಿಕ ಸ್ವಾಗತ ನೃತ್ಯ ಪ್ರಸ್ತುತ ಕೆಲೆ°.

ತೀನ ದಿವಸ ಚಲೆಲೆ ಆಕೃತಿ ಉತ್ಸವಾಂತು° ಕ್ರೀಡಾ, ಸಾಂಸ್ಕೃತಿಕ ಸಾಹಿತ್ಯ, ತಾಂತ್ರಿಕ ಅಶೆ° ಸಾಬಾರ 57 ಸ್ಪರ್ಧಾ ಕಾರ್ಯಕ್ರಮ ಆಶಿಲೆ. ಹ್ಯಾಕಥಾನ್, ಟೀಮ್ ಆರ್‍ಡಿಎಕ್ಸ್ ಪಂಗಡಾಚೆ ಬೈಕ್ ಸ್ಟಂಟ್, ಮೋಟೋ ಎಕ್ಸಪೋ, ನಾವಾದಿಕ ಡಿಜೆ, ಬ್ಯಾಂಡ್ ಟೀಮಾಚೆ ತೀನ ದಿವಸಾಚೆ ಪ್ರೊನೈಟ್, ಫುಡ್ ಫೆಸ್ಟ್ ಆಶಿಲೆ°. ರಾಜ್ಯಾಚೆ ವೆಗವೆಗಳೆ ಕಾಲೇಜಾಚೆ ಸಾಬಾರ ತೀನ ಹಜಾರ ವಿದ್ಯಾರ್ಥಿಯಾನಿ ವಾಂಟೊ ಘೆತಲೊ.

ಮಂಗಳೂರು: ಸಾಮರಸ್ಯ ಮಂಗಳೂರು ಸಂಘಟನೆನ ಕೊಡಿಯಾಲಚೆ ಬಂಟ್ಸ್ ಹಾಸ್ಟೆಲ್ ಲಾಗಿಚೆ ಸಿ. ವಿ. ನಾಯಕ್ ಸಭಾಗೃಹಾಂತು° ಮೇ 29 ಕ ಆಯೋಜನ ಕರಚೆ “ಸೌಹಾರ್ದ ಸಮ್ಮಿಲನ” ಕಾರ್ಯಕ್ರಮಾಚೆ ಯೆವ್ಕಾರ ಪತ್ರಾಚೆ ಉಗ್ತಾವಣ ಕಾರ್ಯಕ್ರಮ ಆಜಿ ಮೇ. 23ಕ ಗಾಂವಚೆ ಮಣ್ಣಗುಡ್ಡೆಚೆ ಶ್ರೀ ಮಹಾಗಣಪತಿ ನವದುರ್ಗಾ ದೇವಸ್ಥಾನಾಂತು° ಚಲೆ°.
ಯೆವ್ಕಾರ ಪತ್ರ ಉಗ್ತಾವಣ ಕಾರ್ಯಕ್ರಮಾಂತು° ಸಾಮರಸ್ಯ ಮಂಗಳೂರು ಸಂಘಟನೆಚಿ ಅಧ್ಯಕ್ಷಾ ಮಂಜುಳಾ ವೈ ನಾಯಕ, ಪ್ರಧಾನ ಕಾರ್ಯದರ್ಶಿ ಕೆ. ಚೇತನ್ ಕುಮಾರ್, ಕೋಶಾಧಿಕಾರಿ ಪ್ರಕಾಶ್ ಬಿ. ಸಾಲ್ಯಾನ್ ಉಪಸ್ಥಿತ ಆಶಿಲೆ. ಕಾರ್ಯಕ್ರಮಾಂತು° ಸಮಿತಿಚೆ ವಾಂಗಡಿ ಮಾಜಿ ಉಪಮೇಯರ್ ಮೊಹಮ್ಮದ್ ಕುಂಜತ್ತಬೈಲ್, ಯೋಗೀಶ್ ನಾಯಕ್, ಚೇತನ್ ಕುಮಾರ್, ದೀಕ್ಷಿತ್ ಅತ್ತಾವರ, ಸಮರ್ಥ್ ಭಟ್, ಶಾಂತಲಾ ಗಟ್ಟಿ, ಶಸಿಕಲಾ ಪದ್ಮನಾಭನ್, ಆಮ್ ಆದ್ಮಿ ಪಕ್ಷಾಚೊ ಜಿಲಾಧ್ಯಕ್ಷ ಸಂತೋಷ ಕಾಮತ್, ಸಹಬಾಳ್ವೆ ಉಡುಪಿ ಹಾಜೊ ಅಧ್ಯಕ್ಷ ಅಮೃತ್ ಶೆಣೈ, ಸಾಮಾಜಿಕ ಕಾರ್ಯಕರ್ತ ಜೆರಾರ್ಡ್ ಟವರ್ಸ್ ಆನಿ ಹೇರ ಉಪಸ್ಥಿತ ಆಶಿಲೆ.
ಮೇ 29ಕ ದೋನಪಾರ ಅಪರಾಹ್ನ 4.00 ಗಂಟೆಕ ಚಲಚೆ ಸೌಹಾರ್ದ ಸಮ್ಮಿಲನ ಕಾರ್ಯಕ್ರಮಾಂತು° ಮಾಜಿ ಜಿಲಾಧಿಕಾರಿ ಸಶಿಕಾಂತ್ ಸೆಂಥಿಲ್ ಉದ್ಘಾಟಕ ಆಸತಾತಿ ಆನಿ ಹುಬ್ಬಳ್ಳಿಚೆ ವೀರಕ್ತ ಮಠ ಹಾಜೆ ಶ್ರೀ ಗುರುಪಾದೇಶ್ವರ ಸ್ವಾಮೀಜಿ ಅಧ್ಯಕ್ಷ ಆಸತಾತಿ.

ಮಂಗಳೂರು: ರಾಷ್ಟ್ರೀಯ ಶಿಕ್ಷಣ ನೀತಿ20 ಹಾಜೆ ಪ್ರಮಾಣೆ ಮಾತೃಭಾಶೆಂತು° ಶಿಕ್ಷಣ ಅನುಷ್ಠಾನ ಕರಚೆ ನದರೇನ ಕರ್ನಾಟಕಾಚೆ ಇಲಾಖಾವತಿನ ಚಾಲನೆರಿ ಆಸಚೆ ಕೆ.ಜಿ. ದಾಕೂನ 5ವೆ° ಕಕ್ಷಾಚೆ ಪಠ್ಯ ಪುಸ್ತಕ° ಕೊಂಕಣಿ ಭಾಶೆಕ ಅಣಕಾರ ಕರಚಾಕ ಅನುದಾನ ಆನೀ ಸೌಲಭ್ಯ ದಿವಕಾ ಮ್ಹಳೆಲಿ ಮಾಘಣಿ ರಾಜ್ಯ ಸರಕಾರಾಚೆ ಪ್ರಾಥಮಿಕ ಆನಿ ಪ್ರೌಢ ಶಿಕ್ಷಣ ಮಂತ್ರಿ ಬಿ. ಸಿ. ನಾಗೇಶ ಹಾಂಕಾ° ಕೊಂಕಣಿ ಶಿಕ್ಷಣ ಸಂಸ್ಥೆಂಚೊ ಸಂಘ ಹಾಜೊ ಅಧ್ಯಕ್ಷ ಪ್ರೊ. ಡಾ. ಕಸ್ತೂರಿ ಮೋಹನ ಪೈ, ವಿಶ್ವನಾಥ ಭ್ಹಟ್ಟ ಆನಿ ವಿಜಯಚಂದ್ರ ಕಾಮತ ಹಾಂಗೆಲೆ ಮುಖೇಲೆಪಣಾರಿ ಪುತ್ತೂರಾಂತು° ದಿವಚೆ° ಜಾಲೆ°.
ಪುತ್ತೂರು ಶಾಸಕ ಸಂಜೀವ ಮಠಂದೂರು ಉಪಸ್ಥಿತ ಆಶಿಲೆ.

ಪ್ಲಾಸ್ಟಿಕ್ ತ್ಯಾಜ್ಯ ಸಮಸ್ಯಾ ಅತ್ಯಂತ ಗಂಭೀರ ಜಾಲ್ಯಾ ಆನಿ ದಿಸಾನ ದೀಸ ಪ್ಲಾಸ್ಟಿಕ್ ಎಕ ಪ್ರಮುಖ ದುಬಾವಾಚೊ ವಿಷಯ ಜಾವನು ತಾಜೆ° ತ್ಯಾಜ್ಯಾಚೆ ಅವೈಜ್ಞಾನಿಕ ನಿರ್ವಹಣೆಚೆ ನಿಮಿತ ಜೀವರಾಶಿಕ ಮಾರಕ ಜಾತಾ ಆಸಾ. ಅವಿಭಜಿತ ದಕ್ಷಿಣ ಕನ್ನಡ ಜಿಲ್ಲೆಚೆ ಸಾಗರಾಂತ ಮೇಳತ ಆಸಚೆ ಪ್ಲಾಸ್ಟಿಕ್ ತ್ಯಾಜ್ಯ ಸಮುದ್ರ ಸಂಪತ್ತ ವಾಯಟ ಕರತ ಆಸಾ. ಹ್ಯಾ ದುಬಾವಾಕ ಪರಿಹಾರ ಸೋದುಚೆ ನದರೇನ ಗಾಂವಾοತು° ಘನತ್ಯಾಜ್ಯ ನಿರ್ವಹಣಾ ಕರಚೆ ಸ್ಟಾರ್ಟಪ್ ಮಂಗಳ ರಿಸೋರ್ಸ್ ಮ್ಯಾನೇಜ್ಮೆಂಟ್ ಆನಿ ಅಮೆರಿಕಾಚೆ ರಿಪರ್ಪಸ್ ಗ್ಲೋಬ್ ಸಂಸ್ಥೆಚೆ ಸಾಂಗತ ಪ್ಲಾಸ್ಟಿಕ್ ತ್ಯಾಜ್ಯ ನಿರ್ವಹಣಾ ಬದಲ ಕರಾರ ಜಾಲ್ಯಾಂತಿ. ಆರತಾ° ಕೊಡಿಯಾಲಚೆ ಎಕ ಹೋಟೆಲಾಂತು° ಘಡಲೆಲೆ ಸರಳ ಕಾರ್ಯಕ್ರಮಾಂತು° ರಿಪರ್ಪಸ್ ಗ್ಲೋಬ್ ಸಂಸ್ಥೆಚೆ ಕಮಲ್ ರಾಜ್ ಆನಿ ಮಂಗಳ ರಿಸೋರ್ಸ್ ಮ್ಯಾನೇಜ್ಮೆಂಟ್ ಸಂಸ್ಥೆಚೆ ವ್ಯವಸ್ಥಾಪಕ ನಿರ್ದೇಶಕ ದಿಲ್ ರಾಜ್ ಆಳ್ವ ಹಾಂನಿ° ಕರಾರಾಕ ಹಸ್ತಾಕ್ಷರ ಕೆಲಿ°. ಹ್ಯಾ ವೇಳಾರಿ ರಿಪರ್ಪಸ್ ಗ್ಲೋಬ್ ಸಂಸ್ಥೆಚೆ ಇಂಪ್ಯಾಕ್ಟ್ ಮ್ಯಾನೇಜರ್ ಸ್ವೆಟ್ಲಾನಾ ಡಿಕೊಸ್ತಾ, ಫೈನಾನ್ಸ್ ವಿಭಾಗಾಚೆ ಮುಖೇಲಿ ಜೋಯಲ್ ಫೆರ್ನಾಂಡಿಸ್, ಸಂಯೋಜಕ ಅಮಿತಾ ಅಜಿತ್, ಪೂಜಾ ಮೊಯಿತ್ರಾ, ಮಂಗಳ ರಿಸೋರ್ಸ್ ಮ್ಯಾನೇಜ್ಮೆಂಟ್ ಸಂಸ್ಥೆಚೆ ಕಾರ್ಯನಿರ್ವಾಹಕ ನಿರ್ದೇಶಕ ರಂಜನ್ ಬೆಳ್ಳರ್ಪಾಡಿ, ನಿರ್ದೇಶಕ ಚಂದನ್ ಕಾಮತ್, ತರ್ಜನಿ ಸಂಸ್ಥೆಚೆ ನಿರ್ದೇಶಕ ಸಂಜಯ್ ಪ್ರಭು ಉಪಸ್ಥಿತ ಆಶಿಲೆ.

ಮಂಗಳೂರು: ಐಸ್‌ಕ್ರೀಮ್ ಉದ್ಯಮಾಕ ಅತ್ಯುತ್ತಮ ದೇಣಿಗಾ ದಿಲೆಲೆ ನಾವಾದೀಕ ಐಡಿಯಲ್ ಐಸ್‌ಕ್ರೀಮ್ ಹಾಂಕಾ° ಎಫ್. ಐ. ಸಿ. ಸಿ. ಐ. ಪ್ರಶಸ್ತಿ ಲಾಭಲ್ಯಾ. ಮಂಗಳೂರಾοತು° ಘಡಲೆಲೆ ಸಮಾರಂಭಾοತು° ಕರ್ನಾಟಕ ಸರಕಾರಾಚೆ ಬೃಹತ್ ಆನಿ ಮಧ್ಯಮ ಕೈಗಾರಿಕಾ ಮಂತ್ರಿ ಸನ್ಮಾನ್ಯ ಮುರುಗೇಶ್ ನಿರಾಣಿ ಹಾಂನಿ° ಐಡಿಯಲ್ ಐಸ್‌ಕ್ರೀಮ್ ಹಾಜೆ ಮುಕುಂದ ಕಾಮತ್ ಹಾಂಕಾ° ಪ್ರಶಸ್ತಿ ಪ್ರದಾನ ಕೆಲಿ. ಸಂಸದ ನಳಿನ್ ಕುಮಾರ್ ಕಟೀಲ್, ಎಫ್‌ಐಸಿಸಿಐ ಚೊ ಅಧ್ಯಕ್ಷ ಉಲ್ಲಾಸ್ ಕಾಮತ್ ಉಪಸ್ಥಿತ ಆಶಿಲೆ.

ಮಂಗಳೂರು: ಮಾಕ್ಷಿಚೆ ಚಾಳಿಸ ವರಸ ದಾಕೂನ ಕೊಂಕಣಿ ಭಾಸ ಆನಿ ಸಂಸ್ಕೃತಿಚಿ ಸೇವಾ ಕರೂನ ಆಸಚೆ ಕೊಂಕಣಿ ಸಾಂಸ್ಕೃತಿಕ ಸಂಘಾಚೆ ತರಪೇನ “ಆತ್ಮಲಿಂಗ” ಯಾ ಗೋಕರ್ಣಾಚಿ ಭದ್ರಕಾಳಿ ಕೊಂಕಣಿ ಸಂಗೀತಮಯ ನಾಟಕಾಚೆ ಪ್ರದರ್ಶನ ಮೆ. 7ಕ ಸಾಂಜವೇಳಾ 5 ಗಂಟ್ಯಾಕ ಕೆನರಾ ಶಾಳೆಚೆ ಸುಧೀಂದ್ರ ಸಭಾಭವನಾಂತು° ಜಾಲೆ°.

ಸಾಬಾರ 90 ಮಿನಿಟ ಚಲೆಲೆ ಹ್ಯಾ ನಾಟಕಾಚೆ ಸಂಭಾಷಣಾ, ಪದ°, ಸಂಗೀತ ಸಗಟ ಶುರವೇಕಚಿ ಧ್ವನಿಮುದ್ರಣ ಕರನು ಪ್ರದರ್ಶನ ಕೆಲೆಲ್ಯಾನ ಸಭಿಕಾಂಕ ವಿಶೇಷ ಅನುಭವ ಮೆಳೊ. ನಟನಕಾರಾಂಕ ಫಕತ ವೋಂಟು ಹಾಲೊವನು ಪಾಶ್ರ್ವ ಸಂಭಾಷಣೆಚೆ ಸಾಂಗತ ಮೆಳೊಚೆ ಆಶಿಲ್ಯಾನ ನಟನ ಕರಚೆ ಸುತಾ ಸುಲಭ ಜಾಲೆ° ಮ್ಹಣಯೆತ. ತಾಂತೂಯಿ ಅನುಭವಿ ನಟ ದೀಪಾಲಿ ಖಂಬದಕೋಣೆ, ಅರುಣ ಶೇಟ್, ಗಜಾನನ ಶೆಣೈ ಹಾಂನಿ° ಉದೇನ ದಿಸತಲೆ.
ಹ್ಯಾ ನಾಟಕಾಚೆ ಪ್ರದರ್ಶನ ಎದೋಳುಚಿ ದೇಶಾಚೆ ತೀನ ಕಡೆನ ಜಾಲಾ°. ಸ್ಥಳಿಯ ಲೋಕಾಂಕ ಮೇಳೊನು ಖೆಳಚೆ ಹ್ಯಾ ನಾಟಕಾಚೆ ವಿಶೇಷತಾ ಜಾವನು ಆಸಾ. ಮಂಗಳೂರಾಂತು ಪಯಲೆ° ಆನೀ ನಾಟಕಾಚೆ ಚೌತೆ° ಪ್ರದರ್ಶನ ಹೆ° ಜಾವನು ಆಶಿಲೆ°. ದೇವಾದಿನ ಗಜಾನನ ರಾವ್ ಹೇರಂಜಾಳ ಹಾಂನಿ° ಮೂಳತ: ರಚನ ಕೆಲೆಲೆ ಹ್ಯಾ ನಾಟಕಾಚೆ ಪರಿಷ್ಕರಣ, ದಿಗ್ದರ್ಶನ, ದೃಶ್ಯ ವಿನ್ಯಾಸ, ಧ್ವನಿ ಸಂಯೋಜನಾ ಆನೀ ಪ್ರಕಾಶ ಯೋಜನಾ ರಾಮದಾಸ ದತ್ತಾತ್ರೇಯ ಭಟ್ ಗುಲ್ವಾಡಿ ಹಾಂನಿ° ಕೆಲೆಲೆ°. ವಿದ್ವಾನ ಮಹಾಬಲೇಶ್ವರ ಭಾಗವತ, ರಾಧಾಕೃಷ್ಣ ಬಡ್ಡುಕುಳಿ ಆನಿ ವಸಂತ ಹೊಸಂಗಡಿ ಹಾಂನಿ ಸಂಗೀತ ದಿಗ್ದರ್ಶನ ಕೆಲಾ°. ರಾಧಾಕೃಷ್ಣ ಬಡ್ಡುಕುಳಿ, ಕೃಷ್ಣಾ ಚಂದಾವರ, ಮಂಗಲದಾಸ ಗುಲ್ವಾಡಿ, ವಸಂತಿ ಗುಣವಂತೆ, ಅಮೃತಾ ಗುಲ್ವಾಡಿ ಸವೂರ, ಗೌತಮಿ ಹಟ್ಟಂಗಡಿ ಹಾಂನಿ° ಪಾಶ್ರ್ವ ಗಾಯನ ಕೆಲಾ°. ಪ್ರಕಾಶ ನಾಯಕ ಆನಿ ವಸಂತ ಹಾಂನಿ° ದೃಶ್ಯ ಜೋಡನಾ ಕೆಲೆಲೆ°. ಕೋಣಿ ಶೇಷಗಿರಿ ನಾಯಕ ಹಾಂನಿ° ಪ್ರಕಾಶ ಯೋಜನಾ ಸಾಂಬಾಳಿ. ವೈಷ್ಣವಿ ಶೆಣೈನ ಧ್ವನಿ ಪ್ರಸಾರಣ, ತಾರಾನಾಥ, ನರ್ತನ ಆಟ್ರ್ಸ ಹಾಂಗೆಲೆ ವೇಷಭೂಷಾ ಆನೀ ಪ್ರಸಾದನ ಆನಿ ಎಂಜಲ್ಸ್ ಲಾಯ್ಟ್ಸ್ ಎಂಡ್ ಸೌಂಡ್ಸ್ ಹಾಂಗೆಲೆ ಧ್ವನಿವರ್ಧನ ಆನಿ ಉಜ್ವಾಡು ಆಶಿಲೊ.
ನಾರದ ಮುನಿ ಜಾವನು ಬಿಂದುಮಾಧವ ಶೆಣೈ, ಅಪ್ಸರಾ ಜಾವನು ಅಸಾವರಿ ನಾಗರಮಠ, ಕೈಕಸಿ ಜಾವನು ದೀಪಾಳಿ ಖಂಬದಕೋಣೆ, ಲಂಕಾಧಿಪತಿ ರಾವಣ ಜಾವನು ಅರುಣ್ ಜಿ. ಶೇಟ್, ಮೇನಕಾ ಜಾವನು ಸಂಧ್ಯಾ ಪೈ, ಮಹಾದೇವು ಜಾವನು ಗಜಾನನ ಶೆಣೈ, ಪಾರ್ವತಿ ಜಾವನು ವಿದ್ಯಾ ಶೆಣೈ, ಭದ್ರಕಾಳಿ ಜಾವನು ಮಂಜುನಾಥ ಕಾಮತ, ಗಣಪತಿ ಜಾವನು ವಿನೀತ ಶೆಣೈ, ಗೋವಾಳೊ ಆನಿ ನೃತ್ಯಾಂಗನಾ ಜಾವನು ಸ್ವಾತಿ ಭಟ ಹಾಂನಿ° ನಟನ ಕೆಲೆ°. ಎಂ. ಆರ್. ಕಾಮತ ಸೂತ್ರಧಾರ ಆಶಿಲೆ. 
ನಾಟಕ ಪ್ರದರ್ಶನಾಚೆ ಪಯಲೆ° ಸಭಾ ಕಾರ್ಯಕ್ರಮಾಂತು° ಕೊಂಕಣಿ ಸಾಂಸ್ಕೃತಿಕ ಸಂಘಾಚೊ ಆದಲೊ ಅಧ್ಯಕ್ಷ ರಾಘವ ಕಾಮತ ಹಾಂಕಾ° ಸನ್ಮಾನ ಚಲೊ. ಎಲ್ಲೂರು ರಾಮಕಿಶೋರ ರಾವ್, ನಾವಾದಿಕ ಸಂಗೀತ ನಿರ್ದೇಶಕ ಚರಣಕುಮಾರ ಆನೀ ಕೆನರಾ ಬ್ಯಾಂಕಾಚೆ ಡಿ. ಜಿ. ಎಮ್ ಜನಾರ್ಧನ ಭಕ್ತ ಮಾನಾಚೆ ಸೊಯ್ರೆ ಆಶಿಲೆ.

ಸಿ. ಡಿ. ಕಾಮತ ಹಾಂನಿ° ನಟಾಂಕ ಆನಿ ತಾಂತ್ರಿಕ ವರ್ಗಾಚಾಂಕ ಯಾದಸ್ತಿಕಾ ದಿಲಿ. ಅಧ್ಯಕ್ಷ ಎಂ. ದಿನೇಶ ಭಟ್ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ಸವನಾಳ ಜನಾರ್ಧನ ರಾವ, ಮಮತಾ ಕಾಮತ, ವಸಂತ ರಾವ ಆನಿ ಹೇರ ಉಪಸ್ಥಿತ ಆಶಿಲೆ.

ಮುಂಬಯಿಚೆ ವಾಶಿಂತು° ಮೆ. 1ಕ ವಿಶ್ವ ಸಾರಸ್ವತ ಫೆಡರೇಶನಾನ ಆಯೋಜನ ಕರಚೆ ವಿಶ್ವ ಸಾರಸ್ವತ ಸಮ್ಮೇಳನಾಂತು° ಕವಳೆ ಮಠಾಧೀಶ ಶ್ರೀಮದ್ ಶಿವಾನಂದ ಸರಸ್ವತಿ ಮಹಾರಾಜ್ ಸ್ವಾಮೀಜಿ ಉಪಸ್ಥಿತ ಆಸನಾತಿ ಮ್ಹಣು ಶ್ರೀ ಸಂಸ್ಥಾನ ಗೌಡಪಾದಾಚಾರ್ಯ ಕವಳೆ ಮಠಾಚೆ ಫೇಸಬುಕ್ ಪೋಸ್ಟಾಂತು° ಕಳಯಲಾ°. ಎ. 30ಕ ದೋನಪಾರಾ 12 ಗಂಟ್ಯಾಕ ಫಾಯಸ ಜಾಲೆಲೆ ಹ್ಯಾ ಪೋಸ್ಟಾಂತು° ಗುರುವರ್ಯ ಇತ್ಯಕ ಸಮ್ಮೇಳನಾಕ ಯೆನಾತಿ ಮ್ಹಳೆಲೆ ಸ್ಪಷ್ಟ ನಾ.
ಕಾಲಿ ಆನಿ ಪಯರಿ ವೆಗವೆಗಳೆ ಪತ್ರಿಕೆಂತು° ಪ್ರಕಟ ಜಾಲೆಲೆ ಖಬರೆಂತು° ಸಾರಸ್ವತ ಸಮಾಜಾಚೆ ಚಾರಯೀ ಸ್ವಾಮೆ ಸಮ್ಮೇಳನಾಂತು° ಉಪಸ್ಥಿತ ಆಸೂನ ಮಾರ್ಗದರ್ಶನ ದಿತಾತಿ ಮ್ಹಳೆಲೆ° ಹ್ಯಾ ಪೋಸ್ಟಾಂತು° ಉಲ್ಲೇಖ ಕರನು ಹ್ಯಾ ಬದಲ ಗುರುವರ್ಯಾಲಿ ಪರವಾಣಗಿ ಘೆನಿ ಮ್ಹಳೆಲೆ° ಸುತಾ ಸಾಂಗಲಾ°.
ಹ್ಯಾ ಸಮ್ಮೇಳನಾಂತು° ಗುರುವರ್ಯ ಇತ್ಯಾಕ ಉಪಸ್ಥಿತ ಆಸಚಾಕ ಜಾಯನಾ ಮ್ಹಳೆಲೆ ಕಠಿಣ ಕಾರಣ ಗುರುವರ್ಯಾಲೆ ಭೇಟಿಕ ಸದಾಶಿವಘಡಾಕ ಆಯಿಲೆ ವಿಶ್ವ ಸಾರಸ್ವತ ಫೆಡರೇಶನಾಚೆ ಅಧ್ಯಕ್ಷಾಕ ಕಳಯಲಾ° ಮ್ಹಳೆಲೆಂಯಿ° ಕಳವಣಿ ಸಾಂಗತಾ.
ಕಳವಣಿಂತು° ಆಖೇರಿಕ ಗುರುವರ್ಯಾನಿ ಸಾರಸ್ವತ ಸಮಾಜಾಚೆ ಹರ ಎಕ ಸಾರಸ್ವತ ವ್ಯಕ್ತಿಕ ಪಾವನು ಬಲಿಷ್ಠ ಸಾರಸ್ವತ ಸಮಾಜ ಬಾಂದೂಚೆ ತಶಿ° ಜಾವೊ ಮ್ಹಣು ಶ್ರೀ ಭವಾನಿ ಶಂಕರ ದೇವಾಲಾಗಿ ಮಾಘಣಿ ಕರನು ಆಶೀರ್ವಾದ ದಿಲಾ.

ಸಂಸಾರ ಪಾಡ್ವೊ ಮ್ಹಳ್ಯಾರಿ ನವೀನ ವರಸ ಶುರು. ಯುಗಾದಿ ಮ್ಹಣತಾತಿ. ತ್ಯಾ ದೀವಸು ಸೂರ್ಯ ನಮಸ್ಕಾರ, ಪಂಚಾοಗ ಶ್ರವಣ, ಕೊಡು ಬೇವು – ಗೋಡ ಸೇವನ ಕರಚೆ° ಪ್ರಮುಖ ರಿವಾಜ ಜಾವನು ಆಸಾ. ನವೀನ ಕಪಡೊ-ನಗ ಖರೀದಿ ಕರಚೆಂಯಿ ಜಾತಾ. ಜೀವನ ಮ್ಹಳ್ಯಾರ ಕೊಡು-ಗೋಡ ದೋನಯ ಕ್ಷಣ ಯೆತಾತಿ ಆನಿ ಆಮಿ ತಾಕಾ ತಯಾರ ಆಸಕಾ ಆನಿ ಸಾಂಬಾಳನು ವ್ಹರಕಾ ಮ್ಹಣು ಸಾಂಗಚೊ ದೀವಸು.
ಜೀವನಾಂತ ಸಕಾರತ್ಮಕ ಚಿಂತನ ದವರೂನ ಮುಕಾರ ಗೆಲ್ಯಾರಿ ಕೊಡಸಾಣಿ ಊಣೆ ಜಾತಾ ಮ್ಹಣತಾತಿ. ಮಹಾಮಾರಿಚಿ ಕೊಡಸಾಣಿ ನಿಮಿತ ಮಾಕ್ಷಿಚೆ ದೋನ ವರಸ° ಸಗಳೆ ಜಗಾಂತು° ಖೂಬ ತೊಂದರೆ ಆಯಲೆ. ಲಾಖಾನಿ ಲೋಕ ಅಂತರಲೆ. ಖೂಬ ಲೋಕಾಂಚೆ° ನೌಕರಿ ಯಾ ಧಂದೊ ನಷ್ಟ ಜಾಲೊ. ಜೀವನಾಂತು° ಖಂಚೆοಯ ಸ್ಥಿರ ನಾ, ಫಾಯಿ ಕೊಣಯಿ ಪಳಯನಿ ಮ್ಹಳೆಲೆ° ಸತ್ಯ ಜಾಲೆ°. ಫಾಯಿ ಸಕಾಳಿ ಉಟಾನು ವಾಕಿಂಗಾಕ ವತಾ ಮ್ಹಳೆಲೆ ವಿಶ್ವಾಸಾನ ಆಮಿ ಕಶಿ° ನಿದತಾತಿ ಕೀ ತಶಿಂಚಿ ಮುಕಾರಿ ಬರೆ° ದೀವಸ ಯೆತಾತಿ ಮ್ಹಳೆಲೆ ವಿಶ್ವಾಸಾನ ಆಜಿ ಕರಚೆ° ಕಾಮ ಆಮಿ ಕರಕಾ ಜಾತಾ. ಆಜೀ ಆಯಿಲೆ ತೊಂದರೆ ಫಕತ ಆಮಕಾ ಆಯಿಲೆ ನ್ಹಹಿ°, ಸಗಟಾಂಕ ಆಯಲಾ° ಮ್ಹಳೆಲೆ° ಆಮಿ ಸಮಜೂಕಾ. ಸಕಾರಾತ್ಮಕ ಆನಿ ಸೃಜನಾತ್ಮಕ ಚಿಂತನ ಆಪಣಾವುನು ಮುಕಾವಯಲೆ ದೀವಸಾಚೆ ಬದಲ ಯೋಜನಾ ಘಾಲ್ಯಾರಿ ಬರೆ° ಫಲ ಮೇಳತಾ ಮ್ಹಳೆಲೆ ವಿಶ್ವಾಸ ಆಮಕಾ ಆಸೂಂಕ ಜಾಯ.
ಮಾಕ್ಷಿಚೆ ದೋನ ವರಸ ದಾಕೂನ ಎಕ ಬದಲಾವ ಆಯಿಲೆ ಸಗಟಾನ ಅನುಭವ ಕೆಲಾ. ಕಷ್ಟಾರ ಆಶಿಲ್ಯಾಂಕ ಮದದ ಕರಚಾಕ ಲೋಕ ಮುಕಾರ ಯೆತಾ ಆಸಾತಿ. ಫಕತ ದುಡು ದಿವನು ಮದದ ನ್ಹಹಿ°. ಕಷ್ಟಾರ ಆಶಿಲ್ಯಾಂಕ ಕಷ್ಟಾರ ದಾಕೂನ ಭಾಯರ ಯೆವಚಾಕ ವಾಟ ದಾಕೋವಚೆ°, ಹಾತ ದ್ಹರನು ವಯರಿ ತಾಂಡಚೆ° ಪಳೊವಚಾಕ ಮೆಳತಾ. ಫುಡೆ ಕಾಳಾಂತು° ಎಕಲೊ ಕಷ್ಟಾರ ಆಸಾ ಮ್ಹಳ್ಯಾರಿ ತಾಗೆಲೆ ವಿಷಯಾರಿ ಪಂಚಾದಿಕ ಕರಚೆ° ಯಾ ತಾಕಾ ಹೀನ ಜಾವನು ಪಳೊವಚೆ° ಜಾತಾ ಆಶಿಲೆ°. ಆಜಿ ಥೊಡೊ ಬದಲಾವ ಆಯಲಾ.
ಎಕ ವಿಷಯ ವಾಯಟ ದಿಸತಾ ಮ್ಹಳ್ಯಾರಿ ‘ಧರ್ಮಯುದ್ಧ’ ಶುರು ಕರಚೆ° ಪ್ರಯತ್ನ ಜಾತಾ ಆಸಾ. ಹೆ° ಖಂಯ ತಾಂಯ ವಚೂನ ರಾಬತ ಮ್ಹಳೆಲೆ ವಿಷಯಾರಿ ಸಂದೇಹ ಆಸಾ. ಖಾಸಗಿ ಜಾವನು ಉಲಯತಾನ, ಸೋಶಿಯಲ್ ಮೀಡಿಯಾರಿ ಆನಿ ಹೇರ ಕಡೆನ ದ್ವೇಷ ಓಂಕಚೆ° ಜಾತಾ ಆಸಾ. ತಾಕಾ ತಕೀತ ಥೊಡೆ ಸಂಘ ಸಂಸ್ಥೆ ಹಾಕಾ ವ್ಹಾರೆ° ಘಾಲತಾ ಆಸಾತಿ. ಬರೆ° ಶಿಕ್ಷಣ ಫಾವೊ ಕೆಲೆಲೆ ಲೋಕ ಸೂತಾ ಹಾಕಾ ಶಿಖಾರ ಜಾಲ್ಯಾಂತಿ ಆನೀ ದ್ವೇಷ ಓಂಕತಾ ಆಸಾತಿ. ಹೆ° ಸಮ ನ್ಹಹಿ°. ಹಾಕಾ ಲಗಾಮ ಘಾಲಕಾ ಜಾತಾ. ದ್ವೇಷ ಸಾಧನೆ ಖಾತೀರ ಫಟಿಯೊ ಮಾರಚೆ° ಜಾತಾ ಆಸಾ. ಹೆಂಚಿ ಅಭ್ಯಾಸಾರ ಪಡಲ್ಯಾರಿ ಮುಕಾರಿ ಹ್ಯಾ ಅಸ್ಟ್ರಾಕ ಆಮಿ ಶಿಖಾರ ಜಾವಚೆ° ಸಾಧ್ಯತಾ ಆಸಾ.
ಸಕಾರಾತ್ಮಕ ಆನೀ ಸೃಜನಾತ್ಮಕ ಚಿಂತನ ದವರನು ದ್ವೇಷರಹಿತ ಆಸಚೆ° ಆಮಗೆಲೆ ಜೀವನ ಜಾವೊ. ಸಗಟಾಂಕ ದೇವು ಬರೆ° ಕರೊ.

ಮοಗಳೂರು: ಹಾಂಗಾಚೆ ಅತ್ತಾವರ ಪ್ರದೇಶಾಚೆ ಮ್ಹಾಲ್ಗಡೆ ನಾಗರಿಕಾಂಚೆ ಸಂಕೀರ್ಣಾಚೊ ನಿವಾಸಿ ರಮೇಶ ರಾವ್ (89) ಮಾರ್ಚ್ 14ಕ ದೇವಾದಿನ ಜಾಲೆ. ಹಾಂನಿ° ಬಾಯಲೆಕ ಸೋಡೂನ ಗೆಲ್ಯಾಂತಿ. ಪುತ್ತೂರು, ಸುಳ್ಯ, ಮಂಗಳೂರು ಆನಿ ಬೆಳ್ತಂಗಡಿοತು° ಹಾಂನಿ° ಉಪ ತಹಶೀಲ್ದಾರ್ ಜಾವನು ಸೇವಾ ದಿಲೆಲಿ ಆಸಾ.

ಮಂಗಳೂರು: ಆಮಗೆಲೆ ದೇಶಾಚೆ ರಾಷ್ಟ್ರೀಯ ಕ್ರೀಡಾ ಹಾಕ್ಕಿ, ಜಾಲಯ್ಯಾರಯಿ ಆಮಕಾ ಚಡಾವತ ಲೋಕಾಂಕ ಕ್ರಿಕೇಟ್ ಖೇಳಾಚೆ ಪಿಶೆ° ಆಸಾ. ದಕ್ಷಿಣ ಕನ್ನಡಾಚೆ ಲಾರ್ಡ್ಸ ಮ್ಹಣೋನ ಘೆವಚೆ° ಮಂಗಳೂರ ತಾಂತು° ಮಾಕ್ಷಿ ನಾ. ಕೆ. ಎಲ್ ರಾಹುಲ ತಸಲೆ ಅಂತರರಾಷ್ಟ್ರೀಯ ಕ್ರಿಕೇಟ್ ಖೇಳಾಡುಕ ತಯಾರ ಕೆಲೆಲೆ ಮಂಗಳೂರ ನೆಹರು ಮೈದಾನ ಕ್ರಿಕೇಟ್ ಖೇಳಾಚೆ ಕೇಂದ್ರ ಜಾವನು ಆಸಾ. 1767 ದಾಕೂನ 1947 ತಾಂಯ ಭಾರತಾಂತು° ಬ್ರಿಟಿಷ ಆಡಳಿತ ಆಶಿಲೆ° ಆನಿ ಆಮಕಾ ತಾಂನಿ° ಇಂಗ್ಲೀಷ ಭಾಶೆಚೆ ಸಾಂಗತ ಕ್ರಿಕೇಟ್ ಖೇಳಚಾಕ ಶಿಕಯಲೆ°. ಮಂಗಳೂರಚೆ ಕ್ರಿಕೇಟಾಕಯಿ ಹೋಡ ಇತಿಹಾಸ ಆಸಾ. ನರ್ಚರ್ಸ್ ಆಫ್ ಚೆರಿ ಗಾರ್ಡನ್ ಪ್ರದರ್ಶನಾಚೆ ದ್ವಾರಿ ಹೊ ಇತಿಹಾಸ ದಾಕೊವಚೆ° ಪ್ರಯತ್ನ ದ. ಕ. ಜಿಲ್ಲಾ ಕ್ರಿಕೇಟ್ ಎಸೋಸಿಯೇಶನಾಚೊ ಪ್ರಭಂದಕ ಕಸ್ತೂರಿ ಬಾಲಕೃಷ್ಣ ಪೈ ಹಾಂನಿ° ಕೆಲಾ°. ಮಂಗಳೂರಚೆ ಕೊಡಿಯಾಲಬೈಲಾಚೆ ಇನಟಾಕ್ ಸಂಸ್ಥೆತು° ಆಯೋಜನ ಜಾಲೆಲೆ ಹ್ಯಾ ಪ್ರದರ್ಶನಾಚೆ ಉಗ್ತಾವಣ 1957 ಇಸವಿಂತು° ಮಂಗಳೂರಚೆ ಪಯಲೆ ಕ್ರಿಕೇಟ್ ಟೀಮಾಚೊ ಸಾಂದೊ ಕೆ. ವಿಷ್ಣು ಶೆಣೈ ಹಾಂನಿ° ಕೆಲೆ°. “ಆಜಿ ಮಂಗಳೂರಾಂತು° ಕ್ರಿಕೇಟಾಕ ಚಡ ಉಮೇದಿ ದಿವಚೆ° ಜಾತಾ ನಾ. ಬರೊ ಪ್ರೋತ್ಸಾಹ ಮೆಳ್ಯಾರಿ ರಾಷ್ಟ್ರೀಯ ಆನೀ ಅಂತರಾಷ್ಟ್ರೀಯ ಸ್ಥರಾಚೆ ಖೇಳಾಡುಂಕ ತಯಾರ ಕರಚಾಕ ಸಾಧ್ಯ ಆಸಾ. ಹಾಂವೆ° ಖೂಬ ಲೋಕಾಂಕ ಮೇಳನು ಹೊ ವಿಚಾರ ಕಳಯಲಾ. ಜಾಲ್ಯಾರಯಿ ಖಾಂಯ ಜಾವಚೆ ದಿಸನಾ” ಮ್ಹಣು ತಾಂನಿ° ಹ್ಯಾ ವೇಳಾರಿ ಸಾಂಗಲೆ°.

ಹ್ಯಾ ಪ್ರದರ್ಶಿನಿಂತು° ಕಸ್ತೂರಿ ಬಾಲಕೃಷ್ಣ ಪೈ ಹಾಂಗೆಲೆ ಸಂಗ್ರಹಾಂಚೆ° ತಸ್ವೀರ° ಪ್ರದರ್ಶನ ಜಾಲ್ಯಾಂತಿ. ನೆಹರು ಮೈದಾನಾಚೆ ಇತಿಹಾಸ ಕಳಯತಾ ತಾಂನಿ° ಆಶಿ° ಸಾಂಗಲೆ°. “ಖೂಬ ಕಾಳ ದಾಕೂನ ಜಿಲ್ಲೆಚೆ ಕ್ರಿಕೇಟ್ ಫಕತ ಮಂಗಳೂರು ನೆಹರು ಮೈದಾನಾಕ ಕೇಂದ್ರಿಕೃತ ಜಾವನು ಆಶಿಲೆ°. ಆರತಾ° ಹಾಂಗಾ ಕ್ರಿಕೇಟ್ ಖೇಳಚೆ° ಊಣೆ ಜಾಲಾ°. ಹ್ಯಾ ಜಾಗೇರಿ ಖೂಬ ಲೋಕಾಲೊ ದೊಳೊ ಆಸಾ. ಹಾಂಗಾ ಮಾರ್ಕೆಟ್ ಕರಚೊ ಪ್ರಸ್ತಾವ ಆಶಿಲೊ. ಆಮಿ ನ್ಯಾಯಾಲಯಾಕ ವಚೂನ ಆಮಕಾ ನ್ಯಾಯ ಮೆಳಾ. ಹ್ಯಾ ಜಾಗೆರಿ ಕ್ರಿಕೇಟ್ ಆನಿ ಸಕಳಚೆ ಮೈದಾನಾರಿ ಫುಟ್ ಬಾಲ್ ಖೇಳಕಾ ಶಿವಾಯ ವ್ಹಿಂಗಡ ಖಂಚೆಯ ವಿಷಯಾಕ ವಾಪೂರಚಾಕ ನಜ ಮ್ಹಣು ರಾಜ್ಯ ಉಚ್ಛ ನ್ಯಾಯಾಲಯಾನ ತೀರ್ಪು ದಿಲೆಲೊ ಆಸಾ.” ಮ್ಹಣು ತಾಂನಿ° ಸಾಂಗಲೆ°.
ಹ್ಯಾ ಪ್ರದರ್ಶನ ಪಳಯತಾನ ಮಂಗಳೂರಚೆ ಖೂಬ ಸಾರಸ್ವತ ಲೋಕಾನ ಕ್ರಿಕೇಟ್ ಖೇಳೆಲೆ° ಆನಿ ಯಶಸ್ವಿ ಜಾಲೆಲೆ° ದಿಸೂನ ಯೆತಾ. ತಾಂತೂಲೆ ನಾಂವ° ದಯಾನಂದ ಕಾಮತ, ಎ. ಟಿ. ಶೆಣೈ, ಶೃಂಗೇರಿ ಗೋಪಾಲ ಪೈ, ಬಸ್ತಿ ಪುರೊಷೋತ್ತಮ ಶೆಣೈ, ಕಸ್ತೂರಿ ಎಕನಾಥ ಪೈ, ಬಸ್ತಿ ಶ್ರೀಪಾದ ಶೆಣೈ, ಬಸ್ತಿ ಶಂಕರ ಶೆಣೈ, ಕೊಂಚಾಡಿ ಸತೀಷ ಶೆಣೈ, ಕೊಂಚಾಡಿ ಪ್ರಕಾಶ ಶೆಣೈ ಹಾಂಗೆಲೆ° ನಾಂವ° ಉಡಗಾಸಾಕ ಯೆತಾ. ವಿಷ್ಣು ಶೆಣೈ ಹಾಂನಿ° ಸಾಂಗಿಲೆ ಮ್ಹಣಕೆ ಆರತಾಂಚೆ ದೀಸಾಂತು° ಆಮಗೆಲೆ ತರನಾಟೆನಿ ಹಾರ್ಡ ಬಾಲ್ ಕ್ರಿಕೆಟ್ ಖೇಳಚಾಕ ಮುಕಾರ ಯೆವಚೆ° ಊಣೆ ಜಾಲಾ° ಮ್ಹಳೆಲೆ° ದಿಸೂನ ಯೆತಾ.