ಮಂಗಳೂರು ರಥಬೀದಿಚೆ ಮಂಗಳೂರು ಶಾರದಾ ಮಹೋತ್ಸವ ಹಾಜೆ ಶತಮಾನೋತ್ಸವಾಚೊ ವಾಂಟೊ ಜಾವನು ಕುಂಬ್ಳ ರಾಮದಾಸ ರಂಗಪ್ಪ ನಾಯಕ ಮೇಮೊರಿಯಲ್ ಟ್ರಸ್ಟಾಚೆ ಪ್ರಾಯೋಜಕತ್ವಾರಿ ವರಸ ಭರ ಚಲಚೆ ‘ಆರೋಗ್ಯ ಸರಸ್ವತಿ ಸೇವೆ’ ಕಾರ್ಯಕ್ರಮಾಚೆ ಉಗ್ತಾವಣ ಫೆ. 20ಕ ಮಂಗಳೂರಚೆ ಜ್ಯೋತಿ ವೃತ್ತಾಚೆ ಕೆ. ಎಂ. ಸಿ ಆಸ್ಪತ್ರೆಂತು° ಜಾಲೆ°. ಪಯಲೊ ಕಾರ್ಯಕ್ರಮ ಜಾವನು ಹೃದ್ರೋಗ ತಜ್ಞ ಡಾ| ನರಸಿಂಹ ಪೈ ಹಾಂಗೆಲೆ ಮಾರ್ಗದರ್ಶನಾರಿ ಸಾಬಾರ 135 ಲೋಕಾಂಚೆ ಹೃದಯ ತಪಾಸಣಾ ಚಲೆ. ಗರಜ ಆಶಿಲ್ಯಾಂಕ ಫುಕಟ ಇ.ಸಿ.ಜಿ. \ ಇಕೊ ಪರೀಕ್ಷಾ ಕರನು ವಕದ ದಿವಚೆ° ಜಾಲೆ°. ಸಕಾಳಿ 9.30 ದಾಕೂನ ದೋನಪಾರಾ 1 ತಾಂಯ ಚಲೆಲೆ ಹ್ಯಾ ತಪಾಸಣಾ ಶಿಬಿರಾಚೆ ಕೆ.ಎಂ.ಸಿ. ಆಸ್ಪತ್ರೆಚೆ ಮೆಡಿಕಲ್ ಸುಪರಿಟೆಂಡೆಂಟ್ ಆನಂದ ವೇಣುಗೋಪಾಲ ಹಾಂನಿ° ಕೆಲೆ°. ಹ್ಯಾ ವೇಳಾರಿ ಶಾರದಾ ಮಹೋತ್ಸವ ಶತಮಾನೋತ್ಸವ ಸಮಿತಿಚೊ ಅಧ್ಯಕ್ಷ ಡಾ| ಪಿ. ಉಮಾನಂದ ಮಲ್ಯ, ಡಾ| ನರಸಿಂಹ ಪೈ, ಸಂಜೀವ ಪೈ, ಶ್ರೀ ವೆಂಕಟರಮಣ ದೇವಳಾಚೆ ಆದಲೆ ಮೊಕ್ತೇಸರ ಎಂ. ಪದ್ಮನಾಭ ಪೈ, ಪ್ರಾಯೋಜಕ ಕುಂಬ್ಳ ರಾಮದಾಸ ರಂಗಪ್ಪ ನಾಯಕ ಮೇಮೊರಿಯಲ್ ಟ್ರಸ್ಟಾಚೆ ಟ್ರಸ್ಟಿ ಕೆ. ಗೋಪಲಕೃಷ್ಣ ನಾಯಕ ಉಪಸ್ಥಿತ ಆಶಿಲೆ. ಶತಮಾನೋತ್ಸವ ಸಮಿತಿಚೆ ಸಂಚಾಲಕ ಪಂಡಿತ ನರಸಿಂಹ ಆಚಾರ್ಯ ಹಾಂನಿ° ಸ್ವಾಗತಾಚೆ ಉತ್ರ° ಸಾಂಗಲಿ°. ಸಮಿತಿಚೊ ಸಾಂದೊ ವಿನೋದ ಕಾಮತ ಹಾಂನಿ ಸೂತ್ರ ಸಂಚಾಲನ ಕೆಲೆ°. ಶಾರದೊತ್ಸವ ಸಮಿತಿಚೆ ಕಾರ‍್ಯದರ್ಶಿ ಅಡಿಗೆ ಬಾಲಕೃಷ್ಣ ಶೆಣೈ, ಖಜಾಂಚಿ ಎಂ. ಸುರೇಶ ಆಚಾರ್ಯ, ದತ್ತಾತ್ರೇಯ ಭಟ್ ಜಿ., ಎಂ. ಸುಭ್ರಹ್ಮಣ್ಯ ಭಟ್, ಭದ್ರೇಶ, ವಾಸುದೇವ ಕಾಮತ, ರಘುರಾಮ ಕಾಮತ, ವಿಘ್ನೇಶ ಹೆಗ್ಡೆ, ಸುಬ್ರಾಯ ಭಕ್ತ ಆನೀ ರವೀಂದ್ರ ಮಲ್ಯ ಹಾಂನಿ° ಸಹಕಾರ ದಿಲೊ. 

ಮಂಗಳೂರು : ಮಂಗಳೂರು ರಥಬೀದಿ ಶ್ರೀ ವೆಂಕಟರಮಣ ದೇವಸ್ಥಾನ, ವಠಾರಾಚೆ ಮಂಗಳೂರು ಶ್ರೀ ಶಾರದಾ ಮಹೋತ್ಸವ ಶತಮಾನೋತ್ಸವ ಸಮಿತಿ ಆನಿ ಕೆ.ಎಂ.ಸಿ ಆಸ್ಪತ್ರೆ ಮಂಗಳೂರು ಹಾಂಗೆಲೆ ಜೋಡ ಆಶ್ರಯಾರಿ ಮಂಗಳೂರಚೆ ಡಾ. ಬಿ. ಆರ್. ಅಂಬೇಡ್ಕರ್ ವೃತ್ತ (ಜ್ಯೋತಿ ವೃತ್ತ) ಲಾಗಿಚೆ ಕೆ.ಎಂ.ಸಿ ಆಸ್ಪತ್ರೆಚೆ ಪಯಲೆ ಮ್ಹಾಳಯೆರಿ ಫೆ.20ಕ (ಆಯತಾರಾ) ಫುಕಟ ಹೃದಯ ತಪಾಸಣಾ ಶಿಬಿರ ಆಯೋಜನ ಜಾಲಾ°. ಕೆ.ಎಂ.ಸಿ ಆಸ್ಪತ್ರೆಚೆ ಅನುಭವಿ ಹೃದ್ರೋಗ ತಜ್ಞ ಡಾ. ನರಸಿಂಹ ಪೈ ಹಾಂನಿ° ಸಮಗ್ರ ತಪಾಸಣಾ ಕರನು ಗರಜ ಆಶಿಲ್ಯಾಂಕ ಫುಕಟ ಇಸಿಜಿ / ಇಕೋ ಪರೀಕ್ಷಾ ಕರನು ಲಭ್ಯ ಔಷಧಿ ಫುಕಟ ಜಾವನು ದಿತಾತಿ ಮ್ಹಣು ಕಳವಣಿಂತು° ಸಾಂಗಲಾ°. ಸಾರ್ವಜನಿಕ ಲೋಕಾನ ಹಾಜೆ° ಉಪೇಗ ಘೆವಕಾ ಮ್ಹಣು ಶ್ರೀ ಶಾರದಾ ಮಹೋತ್ಸವ ಶತಮಾನೋತ್ಸವ ಸಮಿತಿ ತರಪೇನ ಮಾಘಣಿ ಆಸಾ. ಚಡತೆ ಮಾಹಿತಿಕ ಮೊಬೈಲ್ 8197108777 ಯಾ 9480470277ಕ ಸಂಪರ್ಕ ಕರಯೆತ ಮ್ಹಣು ಸಾಂಗಲಾ°.

ಜಿ.ಎಸ್.ಬಿ ಮಹಿಳಾ ವೃಂದ (ರಿ) ಮಂಗಳೂರ್ ಹಾಜೆ ಸ್ಥಾಪಕ ಅಧ್ಯಕ್ಷಾ ಮಾಲತಿ ಯು. ಕಾಮತ್ ಹಾಂನಿ ಫೆ. 8 ತಾರಿಕೆಕ ಅಂತರಲೆοತಿ. ತಾಂಗೆಲೆ ಆತ್ಮಾಕ ಶಾಂತಿ ಮಾಗುನು ಶೃದ್ಧಾಂಜಲಿ ಸಭಾ ಫೆ. 15 ತಾರಿಕೆಕ ರಥಬೀದಿ ಆಶೀಲೆ ದ್ವಾರಕನಾಥ ಸಭಾಗೃಹಾಂತ  ಮಾಂಡೂನ ಹಾಡಲೆ°. ಹಾಲಿ ಅಧ್ಯಕ್ಷಾ ವಿಮಲಾ ಕಾಮತಾನ ಕವನ ವಾಚನ ಕರೂನ ಶೃದ್ಧಾಂಜಲಿ ದಿಲಿ.  ಮಹಿಳಾ ವೃಂದಾಚೆ  ಮ್ಹಾಲ್ಗಡಿ ಸದಸ್ಯಾ ಶಕುಂತಲಾ ಆರ್. ಕಿಣಿನ ಮಾಲತೆಕ್ಕಾಲೆ ಸಾಂಗತ ಆಪಲೆ 40 ವರಸಾಚೊ ಬಾಂಧವ್ಯ ವಾಂಟೂನ ಘೇವನ  ತಿಗೆಲೆಆತ್ಮಾಕ ಶಾಂತಿ ಮಾಗಲೆ°.ಚಂದ್ರಮತಿ ರಾವಾನ ಮಾಲತೆಕ್ಕಾಲೆ ಸರಳ ಸಜ್ಜನಿಕಾ ಆಟೊವಕರೂನ ಶೃದ್ಧಾಂಜಲಿ ದಿಲೆ°. ಮರೋಳಿ ಸಬಿತಾ ಕಾಮತ, ಗೀತಾ ಸಿ. ಕಿಣಿ, ಚಂದ್ರಿಕಾ ಮಲ್ಯಾನ ಮಾಲತೆಕ್ಕಾಲೆ ಸಾಂಗತ ತಾοಗೆಲೆ ಅನುಭವ ವಾಂಟುನ ಘೇವನ ತಿಗೆಲೆ ಆತ್ಮಾಕ ಶಾಂತಿ ಮಾಗಲೆ°. ಮರೋಳಿ ಸಬಿತಾ ಕಾಮತಾನ ಸೂತ್ರ ಸಂಚಾಲನ ಕೆಲೆ°.ಸರ್ವ ಸದಸ್ಯಾನಿ ಪುಷ್ಪಾಂಜಲಿ ಅರ್ಪಣ ಕೆಲೆ°.

ಕರ್ಮಣ್ಯೇವಾದಿಕಾರಸ್ತೆ ಮಾ ಫಲೇಷು ಕದಾಚನ |
ಮಾಕರ್ಮ ಫಲಹೇತು ರ್ಭೂರ್ಮತೇ ಸಂಗೋಸ್ತ್ವ್ ಕರ್ಮಣೇ ||

ಹೆಂ ಮಾಲತಿ ಕಾಮತ ಹಾಂನಿ° ಬರಯಿಲೆ° ಎಕ ಲೇಖನಾಚೆ ಶುರುವಾತಿ ಉತ್ರ°. ಹ್ಯಾ ಚಿಂತನ ಆಪಣಾವನು ಜೀವನ ಕರನು ಆಶಿಲಿ ಜಿ. ಎಸ್. ಬಿ ಮಹಿಳಾ ವೃಂದಾಚಿ ಸ್ಥಾಪಕ ಅಧ್ಯಕ್ಷಾ ಮಾಲತಿ ಕಾಮತ (ಮಾಲತಿ ಮಾಯಿ) ಹಾಂನಿ° 80 ವರಸ ಪ್ರಾಯೇರಿ ಆಜಿ ಕಾರ್ಕಳಾಂತು° ಅಂತರಲಿοಚಿ. ಹಿರಿಯಡ್ಕ್ ಗಾಂವಚೆ ದೇವರಾಯ ಪೈ ಆನಿ ಲಕ್ಷ್ಮಿ ಪೈ ಹಾಂಗೆಲಿ ಮ್ಹಾಲ್ಗಡಿ ದ್ಹುವ ಜಾವನು 1942 ಇಸವಿಂತು° ಜನ್ಮಾಕ ಆಯಿಲೆ ಹಾಂನಿ° ಎಸ್. ಎಸ್. ಎಲ್. ಸಿ. ತಾಂಯ ವಿದ್ಯಾಭ್ಯಾಸ ಕೆಲಾ. ಚಡ ಶಿಕ್ಷಣ ಫಾವೊ ಕರಚೆ° ಮನ ಆಸಲ್ಯಾರಯಿ ತೇದನಾಚೆ ಕಾಳಾಂತು° ಚೆಲಿಯಾಂಕ ಚಡ ಶಿಕ್ಷಣ ದಿವಚೆ ರಿವಾಜ ನಾತಿಯಿಲ್ಯಾನ ತೆಂ ಸಾಧ್ಯ ಜಾಯನಿ ಮ್ಹಣು ತಾಂನಿ ಸಾಂಗಚೆ° ಆಶಿಲೆ°. ಸಾನ ಪ್ರಾಯ ದಾಕೂನ ಕಲಾ ಆನಿ ಶಿವಣೆಂತು° ಉಮೇದಿ ಆಶಿಲೆ ಹಾಂಕಾ° ಉಮಾನಾಥ ಕಾಮತ ಹಾಂಗೆಲೆ ಸಾಂಗತ ಲಗ್ನ ಜಾತರಿ ಬ್ಹಾಮುಣು, ಮಾವು ಆನಿ ಮಾಯೆಲೊ ಸಹಕಾರ ಆನಿ ಪ್ರೋತ್ಸಾಹ ಮೆಳೆಲ್ಯಾನ ತಾಂಗೆಲಿ ಇಚ್ಛಾ ಪ್ರಮಾಣೆ ಪ್ರತಿಭಾ ಅನಾವರಣ ಕರಚಾಕ ಜಾಲೆ°. ಬಾಯಲ ಮನಶಾಂಕ ಆರ್ಥಿಕ ಸ್ವಾವಲಂಬನಾ ಆಸೂಕಾ ಮ್ಹಳೆಲೆ ಚಿಂತನ ಆಶಿಲೆ ಹಾಂನಿ° 1982 ಇಸವಿಂತು° “ಉಮಾ ಬ್ಯೂಟಿ ಪಾರ್ಲರ್” ಶುರು ಕರನು ಕ್ರಾಂತಿ ಕೆಲಿ ಮ್ಹಣಯೆತ. ತಾಜೆ ಸಾಂಗತ ಶಿವಣೆ ಕ್ಲಾಸಯಿ ಹಾಂನಿ° ಶುರು ಕೆಲೆ°. ವ್ಹಕಲೆಂಕ ಶ್ರಂಗಾರ ಕರಚೆ° ಮುಖ್ಯ ವೃತ್ತಿ ಜಾವನು ಘೆತಿಲೆ ಹಾಂನಿ° ಸಾಬಾರ ಬಾಯಲ ಮನಶಾಂಕ ಹಿ ವೃತ್ತಿ ಆಪಣಾವಚಾಕ ಧೈರ್ಯ ದಿಲೆ°. ಮ್ಹಾನಮಿಂತು° ಖೂಬ ಶಾರದಾ ವಿಗ್ರಹಾಂಕ ಹಾಂನಿ° ಸೋಣ ಫುಲ ಮಾಳಚೆ ಕರನು ದೇವಿಲೆ ಕೃಪೆಕ ಪಾತ್ರ ಜಾಲ್ಯಾಂತಿ.
1982 ಇಸವಿಂತುಚೀ ಹಾಂನಿ° ಸ್ವಸಮಾಜಾಚೆ ಬಾಯಲ ಮನಶಾಂಕ ಮೆಳೊನು ಜಿ. ಎಸ್. ಬಿ. ಮಹಿಳಾ ವೃಂದಾಚೆ ಸ್ಥಾಪನ ಕೆಲೆ°. ಮಹಿಳಾ ವೃಂದಾಚೆ ಸ್ಥಾಪಕ ಅಧ್ಯಕ್ಷಾ ಆಶಿಲೆ ಹಾಂನಿ° ಉಪರಾಂತ ಆಯಿಲೆ ಸರ್ವ ಅಧ್ಯಕ್ಷಾಂಕ ಮಾರ್ಗದರ್ಶನ ದಿತಲೆ. ಆಮಗೆಲೆ ಸಮಾಜಾಂತು° ಆಸಚೆ ಸಾಬಾರ ಸಂಘ ಸಂಸ್ಥ್ಯಾಪಯಕಿ ಅತ್ಯಂತ ಶಿಸ್ತಾರಿ ಚಲಚೆ ಥೊಡೆ ಸಂಸ್ಥೆ ಪಯಕಿ ಹೊ ಎಕು ಸಂಸ್ಥೊ ಜಾವನು ಆಸಾ. ಹರ ವರಸ ಅಧ್ಯಕ್ಷಾ ಬದಲ ಜಾವಚೆ ನದರೆನ ಮುಖೆಲಿಯಾಂಕ ತಯರ ಕರಚೆ° ಹೊ ಸಂಸ್ಥೊ ಕರತ ಆಸಾ.
ಮಾತೃ ಭಾಸ ಕೊಂಕಣಿ ಬದಲ ವಿಶೇಷ ಮೋಗು ಆಶಿಲೆ ಹಾಂನಿ° ಸ್ವತ: ನಾಟ್ಕುಳೆ ಬರೊವನು ಖೆಳಯತಾ ಆಶಿಲೆ. ನಮ್ಮ ಟಿ.ವಿ. ಚ್ಯಾನೆಲಾರಿ ಪ್ರಸಾರ ಜಾಲೆಲೆ ‘ಯೆಯ್ಯಾ ಹಾಸಯಾ’ ಕಾರ್ಯಕ್ರಮಾಂತು° ಹಾಂಗೆಲೆ ಪಂಗಡಾನ ವಾಂಟೊ ಘೆವನು ಲೋಕಾ ಮೊಗಾಳ ಜಾಲ್ಯಾಂತಿ. ಮಂಗಳೂರು ಆಕಾಶವಾಣಿಂತು° ಕಾರ್ಯಕ್ರಮ, ಪಂಚ್ಕದಾಯಿ ಮಾಸಿಕ ಆನಿ ಕೊಡಿಯಾಲ ಖಬರ ಪತ್ರಿಕೆಂತು° ಅಂಕಣ ಬರೊವಚೆ° ಹಾಂನಿ ಕರತಲಿಂಚಿ.

ಮಂಗಳೂರು: ಹಾಂಗಾಚೆ ಮಣ್ಣಗುಡ್ಡೆಂತು° ನವೀನ ಜಾವನು ನಿರ್ಮಾಣ ಜಾತಾ ಆಸಚೆ ಗೋಕುಲ್‌ಧಾಮ್ ವಸತಿ ಸಮುಚ್ಚಯಾಂತು° ವಿನೂತನ ಮಾದರಿಚೆ ಫ್ಲಾಟ್ ವೀಕ್ಷಣೆಕ ಸಿದ್ಧ ಜಾಲಾ°. ಹಾಜೆ° ಉಗ್ತಾವಣ ಜಿ.ಎಸ್.ಬಿ. ಆಲ್ ಟೆಂಪಲ್ ಅಸೋಸಿಯೇಶನ್ ಹಾಜೊ ಅಧ್ಯಕ್ಷ ಸಿಎ. ಜಗನ್ನಾಥ ಕಾಮತ ಹಾಂನಿ° ಕೆಲೆ°. ಹ್ಯಾ ವೇಳಾರಿ ಪ್ರವರ್ತಕ ವಿಕ್ರಮ್ ಪೈ, ರಾಮ್ ಮೋಹನ್ ಹೆಗ್ಡೆ, ಪ್ರಾಜೆಕ್ಟ್ ಹೆಡ್ ಗುರುದತ್ತ ಶೆಣೈ ಆನಿ ಹೇರ ಉಪಸ್ಥಿತ ಆಶಿಲೆ. ಗೋಕುಲ್‌ಧಾಮ್ ಇಮಾರತಾಚೆ ನಿರ್ಮಾಣ ಕಾರ್ಯಾಂತು° ಗುಟ್ಟಮಟ್ಟ, ನಾವೀನ್ಯ, ಬದ್ಧತಾ ಆನಿ ಗ್ರಾಹಕಾಂಗೆಲೆ ನಿರೀಕ್ಷೆಕ ತಕೀತ ವಿಶಿಷ್ಟ ಫ್ಲಾಟ್‌° ನಿರ್ಮಾಣ ಜಾತಾ ಆಸಾತಿ. ಎದೋಳುಚಿ 90% ಫ್ಲಾಟ° ವಿಕೂನ ಗೆಲ್ಯಾಂತಿ° ಮ್ಹಣು ಕಳವಣಿಂತು° ಸಾಂಗಲಾ°. ಗೋಕುಲ್‌ಧಾಮ್ ಫ್ಲ್ಯಾಟಾಂತು° ಮಿನಿ ತಿಯೇಟರ್, ಇಂಟರ್‌ಕಾಮ್ ಆನಿ ಆ್ಯಕ್ಸೆಸ್ ಕಂಟ್ರೋಲ್ಡ್ ಲಾಬಿ ಎಂಟ್ರೆನ್ಸ್, ಹವಾನಿಯಂತ್ರಿತ ಜಿಮ್ನಾಷಿಯಮ್, ಸೋಲಾರ್ ಪ್ಯಾನೆಲ್ಸ್, ಸಿಸಿ ಟಿವಿ ಕ್ಯಾಮರಾ, ಚೆರಡುವಾಂಕ ಖೇಳಚಾಕ ಜಾಗೊ, ರೆಟಿಕ್ಯುಲೇಟೆಡ್ ಗ್ಯಾಸ್ ಕನೆಕ್ಷನ್, ದೋನ ಸ್ವಯಂಚಾಲಿತ ಲಿಫ್ಟ್, ಕಾರ್ ಪಾರ್ಕಿಂಗ್ ಆನಿ ಜನರೇಟರ್ ವ್ಯವಸ್ಥಾ ಆಸಾ. ಚಡತಿ ಮಾಹಿತಿಕ ಕಾಪಿಕಾಡಾಂತ ಆಸಚೆ ಸುಪ್ರಭಾತ್ ಬಿಲ್ಡಿಂಗಾοತು° ಮುಕುಂದ್ ಎಂಜಿಎ° ರಿಯಾಲ್ಟಿ ಸಂಸ್ಥೆಚೆ ದಫ್ತರಾಕ ಸಂಪರ್ಕ ಕರಯೇತ. (9611730555/ 7090933900) www.gokuldhamapartment.com

ಮಂಗಳೂರು: ಸಿಎ ಎಸ್. ಎಸ್. ನಾಯಕ ಹಾಂಗೆಲೆ ಮಾರ್ಗದರ್ಶನಾರಿ, ಕರ್ನಾಟಕ ಬ್ಯಾಂಕ್ ಹಾಂಗೆಲೆ ಪ್ರಾಯೋಜಕತ್ವಾರಿ, ನಮ್ಮ ಕುಡ್ಲ ವಾಹಿನಿರಿ ಚಲಚೆ ‘ಬ್ಯುಸಿನೆಸ್ ಟಾನಿಕ್’ ಕಾರ್ಯಕ್ರಮಾಚೆ 150ವೆ° ಸಂಚಿಕೆಚೆ ಸಭಾ ಕಾರ್ಯಕ್ರಮಾಂತು° ಸಮಾಜ ಸೇವಕ ಪಿ. ಸುರೇಶ ಶೆಣೈ ಹಾಂಕಾ° ಸನ್ಮಾನ ಚಲೊ. ಮಂಗಳೂರಾοತು° 1995 ಇಸವಿಂತು° ಕೊಂಕಣಿ ಭಾಶಾ ಮಂಡಳಾನ ಆಯೋಜನ ಕೆಲೆಲೆ ಪ್ರಪ್ರಥಮ ವಿಶ್ವ ಕೊಂಕಣಿ ಸಮ್ಮೇಳನ, 1999 ಇಸವಿಂತು° ಆಲ್ ಇಂಡಿಯಾ ಸಾರಸ್ವತ ಕಲ್ಚರಲ್ ಆರ್ಗನೈಸೆಶನ್ ಹಾಂನಿ° ಕೊಡಿಯಾಲಾಂತು° ಆಯೋಜನ ಕೆಲೆಲೆ ವಿಶ್ವ ಸಾರಸ್ವತ ಸಮ್ಮೇಳನ ಆನಿ 2016 ಇಸವಿಂತು° ಜಿ. ಎಸ್. ಬಿ ಹಿತರಕ್ಷಣಾ ವೇದಿಕೆನ ಹೆಜಮಾಡಿಂತು° ಆಯೋಜನ ಕೆಲೆಲೆ ವಿಶ್ವ ಜಿ. ಎಸ್. ಬಿ. ಸಮ್ಮೇಳನ ಅಸಲೆ ಹೋಡ ಕಾರ್ಯಕ್ರಮಾಂತು° ಆನಿ ಸಮಾಜಾಚೆ ಹೇರ ಸರ್ವ ಕಾರ್ಯಕ್ರಮಾಂತು° ಹಾಂನಿ ಸ್ವಾರ್ಥ ರಹಿತ ಸೇವಾ ದಿಲೆಲಿ ಆಸಾ. ಸಿಂಡಿಕೇಟ್ ಬ್ಯಾಂಕಾ ದಾಕೂನ ನಿವೃತ್ತ ಜಾತರಿ ಹಾಂನಿ° ಪೂರ್ಣ ಪ್ರಮಾಣಾರಿ ಸಮಾಜ ಸೇವಾ ಕರತ ಆಸಾತಿ.
ಸನ್ಮಾನ ಕಾರ್ಯಕ್ರಮಾಂತು° ಕರ್ನಾಟಕ ಬ್ಯಾಂಕಾಚೆ ಅಧ್ಯಕ್ಷ ಪ್ರದೀಪ ಕುಮಾರ, ಆಡಳಿತ ನಿರ್ದೇಶಕ ಎಂ. ಎಸ್. ಮಹಾಬಲೇಶ್ವರ, ಇಸ್ಕಾನಾಚೆ ಸನಂದನದಾಸ ಸ್ವಾಮೀಜಿ, ಹಾಂಗ್ಯೋ ಐಸಕ್ರೀಮ್ ಹಾಜೆ ಆಡಳಿತ ನಿರ್ದೇಶಕ ಪ್ರದೀಪ ಜಿ. ಪೈ ಆನಿ ಕಾರ್ಯಕ್ರಮಾಚೆ ನಿರೂಪಕ ಸಿಎ ಎಸ್. ಎಸ್. ನಾಯಕ ಉಪಸ್ಥಿತ ಆಶಿಲೆ.

ಮಂಗಳೂರು: ಸಾತ ವರಸ ಪ್ರಾಯೇರಿಚಿ ತಬಲಾ, ಪುಜಾ ತಾಳ, ಚಂಡೆ, ಬ್ಯಾಂಡ್, ದರ‍್ಬುಕಾ, ಹಾರ್ಮೊನಿಯಂ, ಮೃದಂಗ ವಾದನ ಕರಚೊ ಸಾಹಸ್ ನಾಯಕ, ಹಾಕಾ ಕೆನರಾ ಬ್ಯಾಂಕಾಚೆ ಫೌಂಡರ್ಸ ಬ್ರಾಂಚಾοತು° ಮಹಾ ಪ್ರಭಂದಕ ಯೋಗಿಶ ಆಚಾರ್ಯ ಹಾಂನಿ° ಸನ್ಮಾನ ಕೆಲೊ.
ಕೆನರಾ ಸಿ. ಬಿ. ಎಸ್. ಸಿ ಶಾಳೆಂತು° ದುಸ್ರೆ ಕಕ್ಷಾಚೊ ವಿದ್ಯಾರ್ಥಿ ಜಾವನು ಆಸಚೆ ಹಾಣೆ ಆಟ್ರ ಮ್ಹಯನೆ ಪ್ರಾಯೆರಿಚಿ ಪೈಂಟಾ ಡಬ್ಬೆ, ಬಾಲ್ದಿ ವಾಪರೂನ ತಬಲಾ ಮ್ಹಣು ಮಾನೂನು ವಾಜುಚೆ° ಆಶಿಲೆ ಖಂಯ. ಬ್ಯಾಂಕ ಉದ್ಯೋಗಿ ಸುಧೀರ ನಾಯಕ ಆನಿ ಗೃಹಿಣಿ ಲಕ್ಷ್ಮೀ ನಾಯಕ ಹಾಂಗೆಲೊ ಪುತು ಜಾವನು ಆಸಚೆ ಹಾಕಾ ಶೃತಿ ಆನಿ ಸ್ಮೃತಿ ಮ್ಹಳೆಲೆ ಜವಳ ಬ್ಹಯಣ್ಯೊ ಆಸಾತಿ. ಎಕ ವರಸ ಮ್ಹಣತನಾಚಿ ತಾಗೆಲೆ ಆಜ್ಜಾಲೆ ಸಾಂಗತ ತೊ ಕೊಡಿಕಲಚೆ ಜಿ. ಎಸ್. ಬಿ ಸಭಾಚೆ ಭಜನಾ ಕಾರ್ಯಕ್ರಮಾಂಕ ವತಲೊ. ಆಜ್ಜಾಲೆ ಪಾಯಾರ ಬಯಸೂನ ತಬಲಾ ವಾಜೂಚೆ° ಪಳಯತಲೊ. ಹಳೂಚಿ ತಾಣೆ ತಬಲಾ ವಾಜೂಚಾಕ ಶುರು ಕೆಲೆ°. ದೋನ ವರಸ ಪ್ರಾಯೆರಿ ತಾಕಾ ಚೌಲೋಪನಯನ ಜಾಲೆ° ಆನಿ ಇನಾಂ ರೂಪಾರಿ ತಬಲಾ ತಾಕಾ ಮೆಳೊ. ಉಪರಾಂತ ತಾಣೆ ಘರಾಕಡೆನ ಹರದೀವಸು ತಬಲಾ ವಾಜೂಚಾಕ ಶುರು ಕೆಲೆ°. ಮಾಕ್ಷಿಚೆ ಚಾರ ವರಸ ದಾಕೂನ ಮಂಗಳೂರು ಶ್ರೀ ವೆಂಕಟರಮಣ ದೇವಳಾಚೆ ವಠಾರಾಂತು° ನಾವಾದೀಕ ಜಾಲಾ. ವೀರ ವೆಂಕಟೇಶ ಭಜನಾ ಮಂಡಳಿನ ಹಾಕಾ ಖೂಬ ಪ್ರೋತ್ಸಾಹ ದಿಲೆಲೊ ಆಸಾ.
ಎದೋಳು ತಾಂಯ ಖಂಚೆಯ ನಮೂನ್ಯಾಚೆ ತಬಲಾ ಕ್ಲಾಸಾಕ ವಚನಾತಿಲೆ ಹಾಕಾ ತಬಲಾ ಕಲಾ ದೇವಾನಚೀ ದಿಲೆಲೆ ವರ ಮ್ಹಣಯೆತ. ಬಿ. ಪ್ರಶಾಂತ ನಾಯಕ ಹಾಂನಿ° ಹಾಕಾ ಭಜನ ಆನೀ ಸಂಗೀತ ಶಿಕ್ಷಣ ದಿತಾ ಆಸಾತಿ. ಭಜನ ನಂತಾ° ಹಿಂದಿ ಪದಾಂಕಯೀ ಸಾಹಸ್ ಹಾರ್ಮೋನಿಯಂ ಆನಿ ತಬಲಾ ಸಾಥ ದಿವಚೆ° ಕರತಾ.
ಆಜ್ಜೊ ಬಿ. ನಿತ್ಯಾನಂದ ಪೈ ಆನಿ ಆಜ್ಜಮ್ಮಾ ಉಷಾ ಪೈ ಹಾಂನಿ° ಸಾಹಸಾಕ ಸಾನ ಪ್ರಾಯೇರಿ ದಾಕೂನ ಆಮಗೆಲಿ ಸಂಸ್ಕೃತಿಚೆ ವಳಕ ಕರನು ದಿಲಾ°. ಪಶ್ಚಿಮ ಜಾಗರಾ ವೇಳಾರಿ ಸಕಾಳಿ ಪಾಂಚ ಗಂಟ್ಯಾಕ ಉಟಾನು ಆಜ್ಜಾ-ಆಜ್ಜಿಲೆ ಸಾಂಗತ ಹರ ದೀವಸು ದೇವಳಾಕ ವಚೂನ ತಬಲಾ ಆನಿ ಹಾರ್ಮೋನಿಯಂ ಸಾಥ ದಿವಚೆ ಹಾಕಾ ಪಳೊವನು ಆಯಿಲೆ ಸರ್ವ ಮ್ಹಾಲ್ಗಡೆ ಸಂತೋಸ ಪಾವತಾತಿ. ತ್ಯಾ ವೇಳಾರಿ ಹಾಗೆಲೆ ಪ್ರಾಯೆಚೆ ವ್ಹಿಂಗಡ ಚೆರಡುವಾನಿ ಥಂಯ ನಾ ಆಸಚೆ° ಹಾಕಾ ಪ್ರಮುಖ ಕಾರಣ ಮ್ಹಣಯೆತ.
ಹಾಗೆಲೆ ಹ್ಯಾ ವಿಶೇಷ ಗುಣ ಪಳೊವನು ಹೊ ಸನ್ಮಾನ ಹಾಕಾ ಫಾವೊ ಜಾಲಾ. ತುಳು ನಾಡಾಚೆ ತಾಸೆ ಪೆಟ್ಟಯೀ ಹಾಕಾ ಖೂಬ ಆವಡತಾ ಆನಿ ತ್ಯಾ ಶಬ್ದಾಕ ಹೊ ಬರೊ ವಾಘು ನಾಂತಾ.

ಮಂಗಳೂರು: ಸಾಧನಾ ಬಳಗ(ರಿ) ಹಾಂನಿ° ಜ.2ಕ ಆಯೋಜನ ಕೆಲೆಲೆ ಮಧುರ ಕೊಂಕಣಿ ಉತ್ಸವ-2022 ಸಮೂಹ ಗೀತ ಆನೀ ಸಮೂಹ ನೃತ್ಯ ಸ್ಪರ್ಧಾ ಕಾರ್ಯಕ್ರಮಾಂತು° 32 ಪಂಗಡಾನಿ ವಾಂಟೊ ಘೆತಿಲೊ.

ಹಾಂಗಾಚೆ ಡೊಂಗರಕೇರಿಚೆ ಕೆನರಾ ಹೆಮ್ಮಕ್ಕಳ ಶಾಳೆಚೆ ಸುಧೀಂದ್ರ ಸಭಾ ಭವನಾಂತು° ಘಡಲೆಲೆ ಕಾರ್ಯಕ್ರಮಾಚೆ ಉಗ್ತಾವಣ ಕೆನರಾ ಹೈಸ್ಕೂಲ್ ಎಸೋಸಿಯೆಶನಾಚೆ ಗೌರವ ಕಾರ್ಯದರ್ಶಿ ಎಂ. ರಂಗನಾಥ ಭಟ್ ಹಾಂನಿ° ಕೆಲೆ°. ಪಠ್ಯಾಚೆ ಸಾಂಗತ ಹೇರ ಚಟುವಟಿಕಾ ಕರನಿ ಜಾಲ್ಯಾರ ಚೆರಡುವಾಂಲೆ° ಶಿಕ್ಷಣ ಪರಿಪೂರ್ಣ ಜಾಯನಾ. ಹ್ಯಾ ನದರೇನ ಸಾಧನಾ ಬಳಗಾಚೆ ಪ್ರಯತ್ನ ಬರೊ ವಿಚಾರ ಮ್ಹಣು ತಾಂನಿ° ಸಾಂಗಲೆ°. ಡಾ| ಕೆ. ಅನಂತ ಪ್ರಭು ಆನಿ ನಿರ್ಮಲಾ ಟ್ರಾವೆಲ್ಸಾಚೆ ವತಿಕಾ ಪೈ ಮುಖೇಲ ಸೊಯರೆ ಆಸೂನ ಸ್ಪರ್ಧೆಚೆ ವಿಜೇತಾಂಕ ನಗದ ಇನಾಂ ವಾಂಟಿಲೆ°. ಲೆಕ್ಕ ಪರಿಶೋಧಕ ಆನೀ ಉದ್ಯಮಿ ಸಿ.ಎ. ನಂದಗೋಪಾಲ ಶೆಣೈ ಹಾಂನಿ° ಕಾರ್ಯಕ್ರಮಾಚೆ ಅಧ್ಯಕ್ಷ ಆಶಿಲೆ. ಸಾಧನಾ ಬಳಗಾಚೆ ಕಾರ್ಯಕ್ಷೇತ್ರ ಮಂಗಳೂರಚೆ ಭಾಯರ ವಿಸ್ತರಣ ಜಾಲ್ಯಾರ ಕೊಂಕಣಿ ಭಾಸ ಆನಿ ಸಂಸ್ಕೃತಿ ಮುಕಾವಯಲೆ ಶತಮಾನಾಕ ಪಾವಚೊ ವಿಶ್ವಾಸ ಆಸಾ ಮ್ಹಣು ತಾಂನಿ° ಸಾಂಗಲೆ°. ನಾವಾದೀಕ ನಟ ಆನೀ ಮ್ಹಾಲ್ಗಡೊ ಗಾಯಕ ಬಿ. ವಿಶ್ವನಾಥ ಭಟ್ ಆನೀ ನಾವಾದೀಕ ಸಂಗೀತ ಸಂಯೋಜಕ, ಗಾಯಕ ಜಿ. ಮುರಳೀಧರ ಕಾಮತ್ ಹಾಂಕಾ° “ಕೊಂಕಣಿ ಸಾಧನಾ ಕಲಾ ರತ್ನ” ಪ್ರಶಸ್ತಿ ದಿವನು ಸನ್ಮಾನ ಚಲೊ. ಸಾಧನಾ ಬಳಗಾಚಿ ಅಧ್ಯಕ್ಷಾ ಮರೋಳಿ ಸಬಿತಾ ಕಾಮತ್, ಸಂಘಟನಾ ಕಾರ್ಯದರ್ಶಿ ಕೆ. ಸತೀಶ್ ಕುಮಾರ್ ಭಟ್, ಸ್ಥಾಪಕ ಅಧ್ಯಕ್ಷ ಯು. ಪ್ರಕಾಶ್ ಶೆಣೈ ಉಪಸ್ಥಿತ ಆಶಿಲೆ. ಉಪಾಧ್ಯಕ್ಷ ಉಳ್ಳಾಲ ರಾಘವೇಂದ್ರ ಕಿಣಿ ಹಾಂನಿ° ಆಭಾರ ಮಾನಲೊ. ಶಕುಂತಲಾ ಆರ್. ಕಿಣಿ ಹಾಂನಿ° ಸೂತ್ರ ಸಂಚಾಲನ ಕೆಲೆಂ.

ಸಭಾ ಕಾರ್ಯಕ್ರಮಾಚೆ ಉಪರಾಂತ ಸಾಧನಾ ಬಳಗಾಚೆ ಸಾಂದ್ಯಾನಿ ಸಾಂಸ್ಕೃತಿಕ ಕಾರ್ಯಕ್ರಮ ಪ್ರಸ್ತುತ ಕೆಲೆ°.

ಮಂಗಳೂರು : ಹಾಂಗಾಚೆ ರಥಬೀದಿಚೆ ಗೌಡಸಾರಸ್ವತ ಬ್ರಾಹ್ಮಣ ಸಮಾಜಾಚೆ ಪ್ರಮುಖ ದೇವಳಾ° ಪಯಕಿ ಎಕ ದೇವಳ ಶ್ರೀ ವೆಂಕಟರಮಣ ದೇವಳಾಕ ಜಿಲ್ಲಾ ಸೆಷನ್ಸ್ ನ್ಯಾಯಾಲಯಾನ ನವೆಂಬರ 30, 2020ಕ ದಿಲೆಲೆ ತೀರ್ಪಾಚೆ ಪ್ರಮಾಣೆ ದೇವಳಾಚೆ ಆಡಳಿತ ಸಾಂಬಾಳನು ಹಾಡಚಾಕ ಎಕ ಯೋಜನಾ(ಸ್ಕೀಮ್) ಯಾ ಸಂವಿಧಾನ ಜ್ಯಾರಿ ಕರನು ತೀರ್ಪು ದಿಲೆಲೊ ಆಮಗೆಲೆ ಕಳಿತಾಕ ಆಶಿಲೊ ವಿಷಯು ಜಾವನು ಆಸಾ. ಹಾಜೆ ಪ್ರಮಾಣೆ ದೇವಳಾಚೆ ಆಡಳಿತ ಸಾಂಬಾಳಾಚಾಕ 5 ಮೊಕ್ತೆಸರಾಂಕ ವಿಂಚೂಚಾಕ ಅವಕಾಶ ಆಸಾ(ಆತಂಚೆ ಸ್ಕೀಮಾ ಪ್ರಮಾಣೆ ಫಕತ ತೀನ ಮೊಕ್ತೆಸರ ಆಸಾತಿ). ಹಾಂಗೆಲೆ° ವಿಂಚಪ ದೇವಳಾಚೆ ಮಹಾಸಭೆಂತು° ಮಹಾಸಭೆಚೆ ಸದಸ್ಯಾನಿ ಕರಕಾ ಜಾತಾ. ಹ್ಯಾ ಸ್ಕೀಮಾ ಪ್ರಮಾಣೆ ಮಂಗಳೂರು ನಗರಪಾಲಿಕೆಚೆ 60 ವಾರ್ಡಾಂತು° ಬಿಡಾರ ಆಸಚೆ ಜಿ.ಎಸ್.ಬಿ ಸಮುದಾಯಾಚೆ 18 ವರಸಾಕಯೀ ಚಡ ವಯಾಚೆ ಪುರುಷಾಂಕ ಮಹಾಸಭೆಚೆ ಸದಸ್ಯ ಯಾ ಸಾಂದೊ ಜಾವನು ನೊಂದಣಿ ಕರಚಾಕ ಅರ್ಹತಾ ಆಸಾ. ತಾಂನಿ° 31.03.2021 ಭಿತರಿ ನೊಂದ ಕರಕಾ ಮ್ಹಣು ಎದೊಳೂಚಿ ದೇವಳಾ ತರಪೇನ ಪತ್ರಿಕಾ ಪ್ರಕಟನಾ ದಿಲೆಲಿ, ಜಾಲ್ಯಾರ ತಾಕಾ ಸ್ಟೇ ಆರ್ಡರ್ ಆಶಿಲ್ಯಾನ ನೊಂದ ಪ್ರಕ್ರಿಯಾ ಪೂರ್ಣ ಜಾಲೆಲಿ ನಾ. ತ್ಯಾ ಸ್ಟೇ ಆರ್ಡರ್ ಜೂನ್ 29, 2021ಕ ವೇಕೆಟ್ ಜಾಲೆಲ್ಯಾನ ಪರತೂನ ಪತ್ರಿಕಾ ಪ್ರಕಟಣ ದೀವನು ಸಮಾಜ ಭಾಂದವಾನಿ ನೊಂದ ಕರಕಾ ಮ್ಹಣು ದೇವಳಾ ತರಪೇನ ಉಲೊ ದಿಲೆಲೊ ಆಸಾ. ಕೊರೊನಾ ಮಹಾಮಾರಿ ಆನಿ ಜಿಲ್ಲಾಡಳಿತಾಚೆ ನಿರ್ದೇಶನಾಕ ಲಾಗೂನ ನೊಂದ ಕರಚಾಕ ಮಹಾಜನ ಮಾಕ್ಷೆಚೆ° ಜಾಲಾ°. ದೇವಳಾಚೆ ಆಡಳಿತಾನ ಪರತೂನ ರಾಜ್ಯಾಚೆ ಉಚ್ಛ ನ್ಯಾಯಾಲಯಾಂತು° ಮಾಘಣಿ ಕೆಲೆಲೆ ಪ್ರಮಾಣೆ ಉಚ್ಛ ನ್ಯಾಯಾಲಯಾನ ನೊಂದ ಪ್ರಕ್ರಿಯಾ ಮಾರ್ಚ 15, 2022 ಭಿತರಿ ಸಂಪೋವಕಾ ಮ್ಹಣು ಪರವಣಗಿ ದಿಲ್ಯಾ ಮ್ಹಣು ದೇವಳಾಚೆ ಕಳವಣಿಂತು° ಸಾಂಗಲಾ°. 
ದೇವಳಾಚೆ ಮಹಾಸಭೆಕ ಸಾಂದೆ ಯಾ ಸದಸ್ಯ ಜಾವಚಾಕ ಫಕತ ಪಾಂಚ ವರಸಾಕ ಎಕ ಪಾವಟಿ ಅವಕಾಶ ಆಸತಲೊ ಮ್ಹಳೆಲೊ ವಿಷಯ ಮಹಾಜನಾನಿ ಮನಾಕ ವ್ಹರಕಾ ಮ್ಹಣೂಯೀ ಕಳವಣಿಂತು° ಸಾಂಗಲಾ°. ತಶಿಂಚಿ ದೇವಳಾಚೆ ವತಿನ ಸಮಾಜ ಭಾಂದವಾಂಕ ಮೆಳಚಾಕ ಸಾಧ್ಯ ಆಶಿಲೆ ವಿದ್ಯಾರ್ಥಿ ವೇತನ, ಬ್ಹಾಡೆ ಘರ/ಘರಾ ಜಾಗೊ, ಸಾಮಾಜಿಕ ಇನ್ಶೂರೆನ್ಸ್ ಆನೀ ತ್ಯಾತ್ಯಾ ವೇಳೆರಿ ಮೇಳಚೆ ಸವಲತ್ತ ಆನೀ ಹೇರ ಅನೂಕುಲತಾ ಫಕತ ಮಹಾಸಭೆಚೆ ಸದಸ್ಯಾಂಕ ಮೆಳತಲೆ ಮ್ಹಣು ಕಳವಣಿಂತು° ಕಳಯಲಾ°. ತ್ಯಾ ದೆಕೂನ ಮಂಗಳೂರು ಮಹಾನಗರ ಪಾಲಿಕೆಚೆ 60 ವಾರ್ಡಾಂತು° ಬಿಡಾರ ಆಸಚೆ ಜಿ.ಎಸ್.ಬಿ ಸಮಾಜ ಭಾಂದವಾನಿ ತಾಂಗೆಲೆ ಸಾಂದೆಪಣ ಯಾ ಸದಸ್ಯತ್ವ ನೊಂದ ಕರಚೆ° ಗರಜೆಚೆ° ಆಸಾ. 
ಹಿ ಪ್ರಕ್ರಿಯಾ ಫಕತ ದೇವಳಾಚೆ ಚುನಾವಾಕ ಸಂಭಂದ ಆಸಚಿ ನ್ಹಹಿ° ಜಾಲೆಲ್ಯನ ಸಗಟ ಸಮಾಜ ಭಾಂದವಾನಿ ಮಾರ್ಚ 15, 2022 ಭಿತರಿ ನೊಂದಣಿ ಕರಕಾ ಮ್ಹಣು ದೇವಳಾಚೆ ತರಪೇನ ಮೊಕ್ತೆಸರಾನಿ ಮಾಘಣಿ ಕೆಲ್ಯಾ. ವಾಟ್ಸಾಪಾರಿ ಹೊ ಸಂದೇಶ ಘುವಂತ ಆಶಿಲ್ಯಾನ ಕೊಡಿಯಾಲ ಖಬರೆನ ದೇವಳಾಚೊ ಮೊಕ್ತೆಸರ ಪ್ರಶಾಂತ ರಾವ್ ಹಾಂಗೆಲಾಗಿ ಹ್ಯಾ ಕಳವಣಿಚೆ ಖರೆಂಪಣಾ ವಿಷಯಾರಿ ಸಮಜಣಗಿ ಘೆತಲಿ. 

ಮಂಗಳೂರು: ಹಾಂಗಾಚೆ ರಥಬೀದಿಂತ ಆಶಿಲೆ ಬಾಳಿಗಾ ಎಂಡ್ ಸನ್ಸ್ (ಸ್ಟೇಶನರಿ ದುಕಾನ) ಹಾಜೊ ಮಾಲಕ ಬಂಟವಾಳ ವರದರಾಜ ಬಾಳಿಗಾ(81 ವರಸ°) ಹಾಂನಿ° ಡಿ. 24ಕ ಸುಲ್ತಾನ ಬತ್ತೆರಿ ರಸ್ತೆಚೆ ಸ್ವಗೃಹಾಂತು° ಅಂತರಲೆ. ದೇವಾದಿನ ಬಂಟ್ವಾಳ ದಾಮೋದರ ಬಾಳಿಗಾ ಆನೀ ಲೀಲಾವತಿ ಬಾಳಿಗಾ ಹಾಂಗೆಲೊ ತಿಸ್ರೊ ಪೂತು ಜಾವನು ಆಶಿಲೆ ಹಾಂನಿ° ಬಾಪುಸುಲೆ ಸ್ಟೇಶನರಿಚೊ ವ್ಯಾರು ಸಾಂಬಾಳನು ಆಯಿಲೆ. ಉಪರಾಂತ ತಾಂನಿ° ವೀರ ವಿಠಲ ಪುಸ್ತಕ ಭಂಡಾರಾಚಿ ಜವಾಬ್ದಾರಿ ಘೆವನು ಧಾರ್ಮಿಕ ಪುಸ್ತಕ° ಪ್ರಕಟ ಕರಚೊ ಧಂದೊ ಶುರು ಕೆಲೊ. ಸಂಧ್ಯಾವ0ದನಾ, ಭಜನಂ, ಲಲೀತ ಸಹಸ್ರನಾಮ, ದೇವಾಲಿ ಪೂಜಾವಿಧಿ, ಗಣಹೋಮ, ತುಳಸಿಪೂಜಾ, ಗಣಪತಿ ಪೂಜಾ ಆನೀ ಹೇರ ಪುಸ್ತಕಂ ಹಾಂನಿ° ಪ್ರಕಟ ಕೆಲೆಲೆ° ಆಸಾ. ಹ್ಯಾ ನಂತಾ° ಹಾಂನಿ° ಸ್ವತ: ‘ಫಲ ಪುಷ್ಪ’ ಮ್ಹಳೆಲೆ° ಪುಸ್ತಕ ರಚನ ಕರನು ಎಕ ಫುಲ ಕಶಿ° ಜಲ್ಮಾಕ ಯೆತಾ ಆನೀ ಕಶಿ° ವಾಡತಾ ಮ್ಹಳೆಲೆ ವಿಷಯಾರಿ ವಿಸ್ತಾರಾನ ಬರಯಲಾ°. ಬಿ.ಎಸ್ಸಿ ಪದವೀದರ ಜಾವನು ಆಸಚೆ ಹಾಂನಿ° ಮಂಗಳೂರಚೆ ಸಂತ ಅಲೋಶಿಯಸ್ ಕಾಲೇಜಾಂತು° ಶಿಖಿಲೆ. ಹಾಂನಿ° ಬಾಯಲ ವಿದ್ಯಾ ಬಾಳಿಗಾ, ಪೂತು ದಾಮೋದರ ಬಾಳಿಗಾ ಆನೀ ಅಪಾರ ಬಂಧು ಭಾಂದವಾ0ಕ ಸೊಡೂನ ಗೆಲ್ಯಾಂತಿ. ಸಿದಾಸಾದಾ ಆನೀ ವಿಶ್ವಾಸಿ ಮನೀಸ ಆಶಿಲೆ ಹಾಂನಿ° ಖೂಬ ಲೋಕಾಂಕ ಮದದ ಕೆಲೆಲೆ ಆಸಾ.